សហរដ្ឋអាមេរិក ៖ កាលពីថ្ងៃទី២០ ខែធ្នូ ឆ្នាំ២០២៤ ប្រធានាធិបតីអាមេរិកថ្មី លោក Donald Trump បានអំពាវនាវឱ្យសហភាពអឺរ៉ុប (EU) ទិញប្រេងឥន្ធនៈ និងឧស្ម័នធម្មជាតិពីអាមេរិកបន្ថែមទៀត បើមិនដូច្នោះទេ រដ្ឋាភិបាលទីក្រុងវ៉ាស៊ីនតោននឹងដំឡើងពន្ធទំនិញនាំចូលពីសហភាពអឺរ៉ុប ដូចជា ៖ រថយន្ត និងគ្រឿងម៉ាស៊ីន ។

ទិន្នន័យរបស់រដ្ឋាភិបាលអាមេរិកបង្ហាញថា បច្ចុប្បន្ន សហភាពអឺរ៉ុបបានទិញប្រេងឥន្ធនៈ និងឧស្ម័នធម្មជាតិអាមេរិកក្នុងបរិមាណច្រើន ហើយពុំអាចបញ្ជាទិញថែទៀតទេ ។ ប៉ុន្តែលោក Trump ប្រកាសថា អាមេរិកនឹងផលិតប្រេងឥន្ធនៈ និងឧស្ម័នឱ្យច្រើនជាងមុន ហើយលោកសរសេរក្នុងបណ្តាញសង្គម Truth Social ថា ៖ «ខ្ញុំបានប្រាប់ទៅសហភាពអឺរ៉ុបឱ្យពួកគេទិញប្រេងឥន្ធនៈ និងឧស្ម័នពីយើងក្នុងបរិមាណច្រើនដើម្បីកាត់បន្ថយឱនភាពពាណិជ្ជកម្ម ។ បើមិនដូច្នោះទេ អាមេរិកនឹងដំឡើងពន្ធទំនិញនាំចូលពីសហភាពអឺរ៉ុប» ។

ចំណែកគណៈកម្មការសហភាពអឺរ៉ុបបញ្ជាក់ថា នឹងពិភាក្សាជាមួយលោក Trump ដើម្បីពង្រឹងទំនាក់ទំនងជាមួយអាមេរិកឱ្យកាន់តែរឹងមាំ រួមទាំងផ្នែកថាមពលផងដែរ ។ យើងនឹងកាត់បន្ថយការនាំចូលថាមពលពីរុស្ស៊ី និងនាំចូលថាមពលពីប្រទេសផ្សេងជំនួសវិញ ។ សហភាពអឺរ៉ុបបាននាំចូលឧស្ម័នធម្មជាតិរាវ និងប្រេងឥន្ធនៈពីអាមេរិក ស្មើនឹង៤៧% និង១៧% នៃបរិមាណនាំចូលសរុប នៅត្រីមាសទី១ ឆ្នាំ២០២៤ ។ នេះបើតាមការិយាល័យស្ថិតិ Eurostat ។

លោក Trump នឹងឡើងកាន់តំណែងជាប្រធានាធិបតីអាមេរិកថ្មី នៅថ្ងៃទី២០ ខែមករា ឆ្នាំ២០២៥ បានប្រកាសដំឡើងពន្ធទំនិញនាំចូលពីប្រទេសនានា យ៉ាងហោចណាស់១០% ហើយដំឡើងពន្ធទំនិញចិនរហូតដល់៦០% ។ អ្នកជំនាញដាស់តឿនថា វានឹងប៉ះពាល់ដល់ពាណិជ្ជកម្មធ្វើឱ្យអតិថិជនអាមេរិកចំណាយប្រាក់ច្រើនជាងមុន ហើយប្រទេសផ្សេងៗនឹងដំឡើងពន្ធទំនិញអាមេរិកដូចគ្នា ។

គួរបញ្ជាក់ថា អាមេរិកមានឱនភាពពាណិជ្ជកម្មទំនិញជាមួយសហភាពអឺរ៉ុប ស្មើជាង២០ម៉ឹនលានដុល្លារក្នុងឆ្នាំ២០២៣ ។ លោក Trump បានផ្តោតសំខាន់លើការធ្វើពាណិជ្ជកម្ម និងនិយាយជាញឹកញាប់ថា អាមេរិកបាននាំចូលរថយន្តពីសហភាពអឺរ៉ុបយ៉ាងច្រើន ប៉ុន្តែមានរថយន្តអាមេរិកតិចណាស់ដែលបានដឹកជញ្ជូនឆ្លងកាត់មហាសមុទ្រអាត្លង់ទិក ៕

សហរដ្ឋអាមេរិក៖ ផ្អែមល្ហែមណាស់បន្ទាប់ពីទាក់ទងគ្នាអស់រយៈពេល ៥ ឆ្នាំមហាសេដ្ឋី Jeff Bezos និងគូស្នេហ៍គ្រោងចូលរោងការជាមួយគ្នានៅចុងឆ្នាំនេះ។
យោងតាមការចុះផ្សាយរបស់សារព័ត៌មានបរទេស New York Post បានឱ្យដឹងថា មហាសេដ្ឋី Jeff Bezos ដែលជាស្ថាបនិក Amazon ទំនងនឹងចំណាយប្រាក់ដល់ទៅ ៦០០ លានដុល្លារ ដើម្បីរៀបចំពិធីមង្គលការដ៏ប្រណីតជាមួយគូស្នេហ៍របស់លោកគឺ Lauren Sanchez នៅថ្ងៃទី ២៨ ខែធ្នូខាងមុខនេះក្នុងទីក្រុង Aspen រដ្ឋ Colorado សហរដ្ឋអាមេរិក ។

ពិធីមង្គលការនេះត្រូវចំណាយរហូតដល់ទៅ ៦០០ លានដុល្លារអាមេរិក ហើយនឹងអញ្ជើញតារាល្បីៗជាច្រើនមកចូលរួម ។ យោងតាមប្រភពដដែលបានឱ្យដឹងទៀតថា បច្ចុប្បន្នសណ្ឋាគារលំដាប់ផ្កាយ ៥ នៅ Aspen ត្រូវបានកក់ទុក ដើម្បីរៀបចំ និងចាប់ផ្តើមទទួលភ្ញៀវអាពាហ៍ពិពាហ៍ក្រោយបុណ្យណូអែល។ លើសពីនេះមហាសេដ្ឋី Bezos ក៏ហាក់ដូចជាកក់ទុកនៅវីឡាជុំវិញទីក្រុង Aspen សម្រាប់ភ្ញៀវកិត្តិយសផងដែរ។

កាលពីមុនអ្នកស្រី Sanchez ដែលជាគូស្នេហ៍មហាសេដ្ឋី Bezos ក៏ធ្លាប់បានបង្ហាញព័ត៌មានខ្លះៗអំពីរ៉ូបអាពាហ៍ពិពាហ៍ក្នុងកម្មវិធី Today Show របស់ទូរទស្សន៍ NBC ប៉ុន្តែអ្នកទាំងពីររក្សាគម្រោងរៀបការជាឯកជន។ ទោះជាយ៉ាងណាឥឡូវនេះអ្នកទាំងពីក៏បានបង្ហាញគម្រោងរៀបការជាមួយគ្នាយ៉ាងអធិកអធមនៅចុងឆ្នាំនេះ។ គួរបញ្ជាក់ដែរថា មហាសេដ្ឋី Bezos និងគូស្នេហ៍របស់លោកបានធ្វើពិធីភ្ជាប់ពាក្យរួចហើយនៅប្រទេសអ៊ីតាលីដោយមានការចូលរួមពីបុគ្គលល្បីៗដូចជាមហាសេដ្ឋី Bill Gates តារាសម្តែង Leonardo DiCaprio និងម្ចាស់ក្សត្រី Jordan ។

មហាសេដ្ឋី Bezos អាយុ ៦០ ឆ្នាំ និងគូដណ្តឹងអាយុ ៥៤ ឆ្នាំរបស់លោកបានចាប់ផ្តើមមានទំនាក់ទំនងស្នេហាក្នុងឆ្នាំ ២០១៩ គិតមកដល់ពេលនេះគឺ ៥ ឆ្នាំហើយ។ យោងតាមទស្សនាវដ្ដី Forbes ស្ថាបនិក Amazon គឺជាមហាសេដ្ឋីទីពីរនៅលើពិភពលោកដែលមានទ្រព្យសម្បត្តិច្រើនជាង ២៣៨ ពាន់លានដុល្លារអាមេរិក បន្ទាប់ពីមហាសេដ្ឋី Elon Musk៕

បរទេស៖ កាលពីថ្ងៃទី២២ ខែធ្នូម្សិលមិញនេះមានឧបទ្ទវហេតុដ៏រន្ធ.ត់មួយបានកើតឡើងផ្ទួនៗគ្នា គឺករណីធ្លាក់យន្តហោះចូលមន្ទីពេទ្យនៅប្រទេសទួរគី ការធ្លាក់យន្តហោះចូលហាងលក់គ្រឿងសង្ហារឹមនៅប្រទេសប្រេស៊ីល និងការធ្លាក់យន្តហោះចូលផ្ទះពលរដ្ឋក្នុងប្រទេសអាហ្សង់ទីន បណ្តាលឱ្យមនុស្សរាប់សិបនាក់រងរបួស និងស្លា..ប់។

យោងតាមរបាយការណ៍ប្រទេសទាំង ៣ នេះបានជួបហេតុការណ៍ធ្លាក់យន្តហោះដូចគ្នាក្នុងថ្ងៃតែមួយ ដោយឧបទ្ទវហេតុធ្លាក់យន្តហោះចូលមន្ទីពេទ្យក្នុងប្រទេសទួរគីគឺបានកើតឡើងនៅម៉ោងប្រហែល ១០ ព្រឹកនាថ្ងៃទី២២ ខែធ្នូបណ្តាលឱ្យមនុស្ស ៤ នាក់បាត់បង់ជីវិត ក្នុងនោះមានអាកាសយានិក ២ នាក់ វេជ្ជបណ្ឌិតម្នាក់ និងគ្រូពេទ្យម្នាក់។ មូលហេតុនៃការធ្លាក់យន្តហោះគឺទំនងជាបណ្តាលមកពីអ័ព្ទក្រាស់ ដែលធ្វើឱ្យអ្នកបើកយន្តហោះមើលមិនឃើញ។

នៅថ្ងៃដដែលនោះ ពោលគឺថ្ងៃទី២២ ខែធ្នូក៏មានយន្តហោះធុនស្រាលមួយគ្រឿងបានធ្លាក់ចូលក្នុងហាងលក់គ្រឿងសង្ហារឹមក្នុងទីក្រុង Gramado ប្រទេសប្រេស៊ីល ដោយបានសម្លាប់មនុស្ស ១០ នាក់ក្នុងគ្រួសារមួយ និងជាច្រើននាក់ទៀតរងរបួស។ មូលហេតុគឺមិនទាន់ដឹងនៅឡើយទេ ខណៈបច្ចុប្បន្នកងកម្លាំងអាកាសនៃប្រទេសប្រេស៊ីលកំពុងស៊ើបអង្កេតឱ្យបានឆាប់តាមដែលអាចធ្វើបាន។

រីប្រទេសអាហ្សង់ទីនវិញក៏បានជួបឧបទ្ទវហេតុដ៏សោកសៅមួយគឺការធ្លាក់យន្តហោះឯកជនចូលក្នុងផ្ទះពលរដ្ឋតែម្តង ដែលហេតុការណ៍នេះបានកើតឡើងនៅទីក្រុង San Fernando បណ្តាលឱ្យមនុស្ស ២ នាក់បាត់បង់ជីវិត។ ក្នុងនោះជនរងគ្រោះទាំងពីរត្រូវបានគេស្គាល់ថាជាអ្នកបើកយន្តហោះឈ្មោះ Martín Fernández Loza អាយុ ៤៤ ឆ្នាំ និងសហអ្នកបើកបរ Agustín Oforte អាយុ ៣៥ ឆ្នាំ។

អ្នកនាំពាក្យប៉ូលិសសន្តិសុខអាកាសយានដ្ឋានអាហ្សង់ទីន (PSA) លោក Julio César Bono បានបញ្ជាក់ថា “យន្តហោះបានបុកផ្ទះនៅខាងក្រៅបរិវេណអាកាសយានដ្ឋាន ដោយបានសម្លាប់អ្នកបើកបរពីរនាក់ ប៉ុន្តែជាសំណាងល្អមិនមាននរណាផ្សេងទៀតរងរបួសឡើយ ដោយសារមិនមាននរណាម្នាក់នៅក្នុងផ្ទះនោះទេ។ ទោះជាយ៉ាងណាសម្រាប់មូលហេតុនៃការធ្លាក់យន្តហោះគឺដោយសារប្រព័ន្ធហ្វ្រាំងរបស់យន្តហោះមានបញ្ហា។ ដូច្នេះហើយសរុបមកវិញ កាលពីថ្ងៃទី២២ ខែធ្នូម្សិលមិញនេះគឺមានករណីធ្លាក់យន្តហោះផ្ទួនៗគ្នានៅប្រទេសអឺរ៉ុបចំនួន ៣ តើនេះជារឿងចៃដន្យឬយ៉ាងណា?

ប្រទេសថៃ ៖ សារព័ត៌មានថៃបានរាយការណ៍កាលពីថ្ងៃទី២១ ខែធ្នូ ឆ្នាំ២០២៤ ថា ថៃបានបិទព្រំដែនជាប់មីយ៉ាន់ម៉ារយៈពេល១ខែ ក្រោយពីជំងឺអាសន្នរោគឆ្លងខ្លាំងនៅទីក្រុង Myawaddy ប្រទេសមីយ៉ាន់ម៉ា ។ រហូតមកដល់ថ្ងៃទី២០ ខែធ្នូ មានពលរដ្ឋមីយ៉ាន់ម៉ាឆ្លងជំងឺនេះរហូតដល់៣០០នាក់ និងស្លា.ប់ ២នាក់ ។

ក្រោយពីជំងឺអាសន្នរោគឆ្លងខ្លាំងនៅមីយ៉ាន់ម៉ា ទាហានការពារព្រំដែនថៃស្នើឱ្យពលរដ្ឋទាំង២ប្រទេសផ្អាកឆ្លងដែនរយៈពេល១ខែ ឬរហូតដល់ស្ថានការណ៍ធូរស្រាលវិញ ។ រីឯមន្ត្រីរាជការ និងអ្នកដឹកជញ្ជូនទំនិញឆ្លងព្រំដែនត្រូវពាក់ម៉ាស់, ស្រោមដៃ, លាងដៃក្រោយប៉ះពាល់សម្ភារៈ ព្រមទាំងរក្សាអនាម័យក្នុងការបរិភោគអាហារ ឬទឹក ។

កាលពីថ្ងៃទី២១ ខែធ្នូ កន្លងមក នៅបរិវេណព្រំដែនស្រុកមេស៊ត និងស្រុកមេរ៉ាណាត ខេត្តតាក មានសភាពស្ងប់ស្ងាត់ ក្រោយពីទាហានការពារព្រំដែនស្រុកមេស៊ត រឹតបន្តឹងតាមព្រំដែនដើម្បីការពារការលួចឆ្លងដែនខុសច្បាប់ ។ ការបិទព្រំដែនក្រោយទទួលសេចក្តីរាយកាណ៍ថា ជំងឺអាសន្នរោគឆ្លងខ្លាំងនៅទីក្រុង Myawaddy នៅទល់មុខភូមិវាំងផា ឃុំមេចាក់រៅ ស្រុកមេរ៉ាណាត ខេត្តតាក ។

មីយ៉ាន់ម៉ាបានបញ្ជូនពលរដ្ឋឆ្លងជំងឺអាសន្នរោគជាង៣០០នាក់ ទៅព្យាបាលនៅមន្ទីរពេទ្យទីក្រុង Myawaddy ក្នុងនោះមានអ្នកជំងឺធ្ងន់៥៦នាក់ និងស្លាប់២នាក់ ។ ប៉ុន្តែចំនួនអ្នកឆ្លងបានកើនឡើងជាបន្តបន្ទាប់ ទើបគ្រូពេទ្យនៅទីក្រុង Myawaddy ស្នើបញ្ជូនអ្នកជំងឺមកមន្ទីរពេទ្យមេរ៉ាណាត ប្រទេសថៃ ឬឱ្យថៃជួយផ្តល់ថ្នាំ និងគ្រឿងបរិក្ខារពេទ្យព្យាបាលអ្នកជំងឺ និងការពារការឆ្លងក្នុងតំបន់ ។

មន្ទីរពេទ្យមេរ៉ាណាត ក៏បានផ្តល់ថ្នាំ និងគ្រឿងបរិក្ខារពេទ្យមួយចំនួនសម្រាប់ជួយសង្គ្រោះអ្នកជំងឺ ។ ក្រៅពីនេះ ភ្នាក់ងារគ្រប់ជំងឺនៅស្រុកមេរ៉ាណាត និងគ្រូពេទ្យខេត្តតាក បានចុះត្រួតពិនិត្យក្នុងតំបន់ដើម្បីទប់ស្កាត់ជំងឺអាសន្នរោគឆ្លងនៅថៃ ។

មន្ត្រីក្រសួងសុខាភិបាលស្រុក លោក សុផាឆូក វេឆាផាន់ផេសាត់ និយាយថា ជំងឺអាសន្នរោគនឹងឆ្លងខ្លាំងនៅមីយ៉ាន់ម៉ា បើគ្មានវិធានការទប់ស្កាត់យ៉ាងមានប្រសិទ្ធភាព ។ ហេតុនេះ សូមមន្ត្រីធ្វើការនៅព្រំដែន និងពលរដ្ឋអនុវត្តតាមវិធានការអនាម័យ បើមានអាការៈខុសធម្មតា ដូចជា រាគរូស សូមប្រញាប់ទៅមន្ទីរពេទ្យជាបន្ទាន់ដើម្បីព្យាបាលទាន់ពេលវេលា ។

អាសន្នរោគឆ្លងតាមអាហារ ជាពិសេស ទឹកមិនស្អាត ដែលបណ្តាលឱ្យរាគរូសខ្លាំងជាច្រើនដង និងក្អួតខ្លាំង ។ អ្នកជំងឺនឹងខ្វះជាតិទឹកពីក្នុងខ្លួនអាចស្លាប់បាន បើព្យាបាលមិនទាន់ពេល ។ ដូច្នេះ ការរស់នៅស្អាត ហូបស្អាត ផឹកស្អាត និងមានអនាម័យ គឺអាចការពារខ្លួនពីជំងឺនេះ ៕

ជាការពិតណាស់ មិនថាសត្វកម្រ ឬសត្វទូទៅនោះទេភាគច្រើនមិនសូវជាមានពណ៌ផ្កាឈូកឡើយ ដោយជាធម្មតាសម្បូរមានតែពណ៌ខ្មៅ ត្នោត បៃតង ខៀវ ឬពណ៌សជាដើម។ ខណៈសត្វដែលមានពណ៌ផ្កាឈូកគឺមិនសូវមាននោះទេ ទោះជាយ៉ាងណាអត្ថបទនេះនឹងនាំប្រិយមិត្តមកស្គាល់សត្វ ៧ ប្រភេទដែលមានពណ៌ផ្កាឈូកគួរជាទីប្លែកភ្នែក៖

១.កណ្ដូបអ័រគីដេ ឬ Grasshopper Orchid៖ គឺជាសត្វមួយប្រភេទដែលមានពណ៌ផ្កាឈូកដ៏គួរឱ្យចាប់អារម្មណ៍ ជាមួយរូបរាងស្រដៀងផ្កា មានសមត្ថភាពទាក់ទាញសត្វល្អិតជាងផ្កាទៅទៀត។

២.ផ្កាយសមុទ្រ៖ នៅលើពិភពលោកយើងនេះមានផ្កាយសមុទ្រសរុបប្រមាណ ២០០០ប្រភេទ ដែលមានច្រើនពណ៌បូករួមទាំងពណ៌ផ្កាឈូកផងដែរ ផ្កាយសមុទ្រពណ៌ផ្កាឈូកជួយបណ្ដេញសត្រូវនិងលាក់ខ្លួនយ៉ាងមានប្រសិទ្ធិភាព។

៣.បង្កងពណ៌ផ្កាឈូក ឬ Pink lobster៖ គឺជាប្រភេទសត្វបង្កងដែលមានឆ្អឹងខ្នង ដោយវាត្រូវបានគេរកឃើញនៅក្នុងទឹកជ្រៅនៃមហាសមុទ្រអាត្លង់ទិក និងសមុទ្រមេឌីទែរ៉ាណេ។ បង្កងពណ៌ផ្កាឈូកអាចឈានដល់អាយុយ៉ាងហោចណាស់ ២១ ឆ្នាំ ជាមួយសមត្ថភាពលាក់ខ្លួនក្នុង giant barrel sponges ដែលជាផ្ទះរបស់វា។

៤.Roseate Spoonbill៖ សត្វបក្សីនេះបានពណ៌ផ្កាឈូកពីអាហារប្រចាំថ្ងៃរបស់វាគឺ (ក្ដាមនិងបង្គា) ប៉ុន្តែសម្រស់ពណ៌ផ្កាឈូកមិនបានផ្ដល់ផលល្អដល់សត្វបក្សីនោះឡើយ ក្នុងកំឡុងពេលឆ្នាំ១៩០០ គេយកវាធ្វើជាផ្លិតសម្រាប់មនុស្សស្រីប្រើប្រាស់។ នាពេលបច្ចុប្បន្ន សត្វបក្សីនេះត្រូវទទួលការការពារយ៉ាងពេញលេញនិងមានសុវត្ថិភាពនៅក្នុងរដ្ឋផ្លរីដា ដោយគ្មានក្ដីបារម្ភចំពោះរឿងដាច់ពូជ។

៥.សេះសមុទ្រ Bargibant’s Pygmy៖ គឺជាសត្វមួយប្រភេទដែលរស់នៅលើស្លាបផ្កាថ្ម និងជាសត្វពូកែលាក់ខ្លួនបន្លំជាមួយផ្កាថ្ម។ វាត្រូវបានគេរកឃើញពេលកំពុងសិក្សាពីផ្កាថ្មក្នុងឡាបូពិសោធន៍មួយ សេះនោះគឺជាពូជ Syngnathidae មានប្រវែងពីកន្លះទៅមួយអ៊ីញប៉ុណ្ណោះ។

៦.ដូហ្វីនពណ៌ផ្កាឈូក៖ ត្រីដូហ្វីនពណ៌ផ្កាឈូក គឺជាប្រភេទត្រីដ៏កម្រមួយរបស់ពិភពលោក ដែលបានចុះបញ្ជីក្រហម IUCN (DD) ជាសត្វជិតផុតពូជ។ សព្វថ្ងៃនេះវាត្រូវបានរកឃើញតាមប្រទេស និងតំបន់មួយចំនួនប៉ុណ្ណោះ ក្នុងនោះកម្ពុជាយើងក៏មានពពួកត្រីទាំងនេះរស់នៅផងដែរ។ ជាមួយពណ៌ផ្កាឈូក ត្រីនេះមានលក្ខណៈពិសេសជាច្រើនដូចជាអាចបង្វិលក្បាលបាន ៩០ ដឺក្រេ អាចសម្របខ្លួនបានក្នុងអំឡុងពេលទឹកជំនន់ និងមានអារម្មណ៍ចេះឈឺចាប់ដូចមនុស្សដែរ។

៧.Axolotl៖ គឺជាត្រីម៉ិចស៊ិកចេះដើរ ក្រៅពីពណ៌ផ្កាឈូកពួកវាក៏មានពណ៌ស ខ្មៅ លឿង និងបៃតងផងដែរ។ មិនត្រឹមតែគួរឱ្យស្រលាញ់ប៉ុណ្ណោះទេ ពួកវាក៏មានសមត្ថភាពបង្កើតនិងព្យាបាលអវៈយវៈដែលបាត់បង់ទៅបានទៀតផង៕