យោងតាមការដាក់បង្ហោះរបស់មន្ទីរទេសចរណ៍ខេត្តសៀមរាបគឺបានគូសបញ្ជាក់ថា ព្រឹត្តិការណ៍«បង្ហើរខ្លែងឯកខ្មែរ» នឹងរៀបចំឡើងរយៈពេល ៣ ថ្ងៃ គឺនៅថ្ងៃទី ២៧, ២៨ និង ២៩ ខែធ្នូ ឆ្នាំ ២០២៤ ដែលរួមមានកម្មវីធីសប្បាយៗជាច្រើន ដូចជាការប្រកួតបង្ហើរខ្លែងឯក, ការពិពណ៌, និងការសម្តែងសិល្បៈបុរាណនិងសម័យ។

រដ្ឋបាលខេត្តបានបញ្ជាក់ថា បុណ្យបង្ហើរខ្លែងឯករៀបចំឡើងក្នុងបំណងដើម្បីចូលរួមថែរក្សាសម្បត្តិវប្បធម៌ អរិយធម៌ និងស្របតាមយុទ្ធនាការ «ទស្សនាសៀមរាប ឆ្នាំ២០២៤»។ ពិធីបុណ្យនេះ នឹងប្រព្រឹត្តិទៅនៅមុំបរិវេនអាកាសយាន្តដ្ឋានអន្តរជាតិសៀមរាប (ចាស់)។

ដូច្នេះ នាថ្ងៃទី ២៧ ដល់ថ្ងៃទី ២៩ ខែធ្នូនេះ ភ្ញៀវទេសចរទាំងជាតិនិងអន្តរជាតិគឺអាចអញ្ជើញទៅចូលរួមទស្សនាបានដោយសេរី ដែលរួមមានកម្មវីធីសប្បាយៗជាច្រើនដូចជា កម្មវិធីប្រកួតបង្ហោះខ្លែងឯកខ្មែរ, កម្មវិធីពិព័រណ៍ផលិតផលក្នុងស្រុក ពិព័រណ៍បន្លែផ្លែឈើ និងពិព័រណ៍ម្ហូបអាហារ ភូមិមួយ ផលិតផលមួយ ការសម្តែងល្ខោនបាសាក់ ល្ខោននិយាយ និងការប្រគុំតន្ត្រីបុរាណនិងសម័យ នាពេលរាត្រី។ ព្រមជាមួយជាមួយនឹងកម្មវិធីបង្ហាត់បង្ហាញអំពីរបៀប នៃការធ្វើខ្លែងឯកខ្មែរ និងខ្លែងសេរី ដោយព្រឹទ្ធាចារ្យខ្លែងឯក ក្នុងខេត្តសៀមរាបផងដែរ៕

ថ្មីៗនេះ នៅលើបណ្តាញសង្គមគឺមានការចែករំលែកតៗគ្នាអំពីតម្លៃត្រីប៉ាស៊ីអ៊ី ដែលជាពូជត្រីកម្រខេត្តស្ទឹងត្រែង និងមានរសជាតិឆ្ងាញ់ពិសារបំផុត នារដូវកាលឆ្នាំនេះមានតម្លៃរហូតដល់ ៦០០,០០០រៀល ក្នុងមួយគីឡូក្រាម។

នាព្រឹកថ្ងៃទី ២៥ ខែធ្នូ ឆ្នាំ២០២៤នេះ យោងតាមគណនីផ្លូវការរបស់ឯកឧត្តម ឈួ ស៊ុន សមាជិកក្រុមប្រឹក្សាខេត្តស្ទឹងត្រែង បានចែករំលែកសារមួយឃ្លាយ៉ាងដូច្នេះថា៖ ថ្ងៃនេះបុណ្យណូលអែល! ខ្ញុំសម្រេចចិត្តចូលផ្សារសាមគ្គីស្ទឹងត្រែង ស្រាប់តែប្រទះឃើញ មនុស្សកំពុងចោមរោមហ៊ុព័ទ្ធ «ត្រីប៉ាស៊ីអ៊ីដ៏ធំអស្ចារ្យ» មួយគីឡូតម្លៃ ៦១០,០០០រៀល ហើយត្រីនោះទម្ងន់ ២.៨ គីឡូ ស្មើនឹង ១,៧០៨,០០០រៀល ឬប្រមាណ ៤២៧ដុល្លារ។

ឯកឧត្តមបានបន្តថា «ពេលនោះខ្ញុំបានតថ្លៃឲ្យចុះត្រឹម ១,៥០០,០០០រៀល (ហេតុតែត្រីប៉ាស៊ីអ៊ីត្រូវប៉ាន់?) ស្រាប់តែអ្នកលក់ស្រែកសម្លុតខ្ញុំខ្លាំងៗថា បើបងឯងតថ្លៃ? នៅ៨នាក់ទៀត ត្រៀមទិញស្នោទឹកកកក្លាស់សេត្រីឥឡូវហើយ។ ខ្ញុំយល់ឃើញថាបុណ្យណូលអែលមួយឆ្នាំមានម្ដង? រីឯត្រីប៉ាស៊ីអ៊ីស្ទឹងត្រែងមួយរដូវមានម្ដង?»។

គួររម្លឹកថា ត្រីប៉ាស៊ីអ៊ី គឺជាប្រភេទត្រីមានស្រកាដ៏កម្រ និងមានរសជាតិឈ្ងុយឆ្ងាញ់ប្លែកជាងត្រីដទៃ ត្រីនេះក្នុងមួយរដូវមានតែម្ដងទេ ចាប់ពីខែធ្នូទៅដល់ខែមករា ហើយអតិថិជនឬអ្នកទេសចរក្នុងប្រទេសនិយមចូលចិត្ត ទិញយកទៅ បរិភោគ។ ជាទូទៅ ត្រីប៉ាស៊ីអ៊ី តែងលេចវត្តមានតែនៅតំបន់មេគង្គលើ ក្នុងខេត្តក្រចេះ ស្ទឹងត្រែង និងរតនៈគីរី។

ពាក់ព័ន្ធនឹងតម្លៃនៅលើទីផ្សារវិញ យោងតាមការគូសបញ្ជាក់នាពេលកន្លងមកបានឲ្យដឹងថា ត្រីប៉ាសេអ៊ី អាចលក់បានក្នុងមួយគីឡូចាប់ពី ៤០០,០០០រៀល រហូតដល់ ៦០០,០០០រៀល ដោយគិតលើទម្ងន់និងប្រភេទត្រីលេខ១ទៀត។ ក្រៅពីត្រីប៉ាស៊ីអ៊ីត្រីមួយប្រភេទទៀត គឺត្រីប៉ាវ៉ា ក៏ជាប្រភេទត្រីកម្រនិងមានតម្លៃថ្លៃដែរ។

សូមជម្រាបថា ធនធានមច្ឆជាតិក្នុងពេលបច្ចុប្បន្ននេះ ពពួកត្រីកម្រមួយចំនួន កំពុងរងនិងប្រឈមទៅនឹងការផុតពូជ ដូចជាត្រីប៉ាសេអ៊ី ត្រីប៉ាវ៉ា ត្រីក្របី ត្រីកន្រ្តប់ខ្លា ត្រីស្រោមដាវ ត្រីនាគ ត្រីរមាស និងប្រភេទត្រីសំខាន់ៗមួយចំនួនទៀត៕

ព្រឹត្តិការណ៍សាទរកម្ពុជា នឹងរៀបចំឡើងនាថ្ងៃទី ៣១ ខែធ្នូ ឆ្នាំ២០២៤ ដ៏ឆាប់ខាងមុខនេះ ដែលនឹងប្រព្រឹត្តិទៅយ៉ាងមហាឡារិក នៅមុខព្រះបរមរាជវាំង និងមានអ្នកចូលរួមប្រមាណនឹង ៣០០០នាក់ ព្រមជាមួយនឹងទស្សនីយភាពជាច្រើនទៀត ដែលជាការចងចាំល្អនាថ្ងៃចុងក្រោយនៃឆ្នាំ២០២៤។

នាថ្ងៃទី ២៥ ខែធ្នូនេះ រដ្ឋបាលខណ្ឌដូនពេញ បានបង្ហាញពីទិដ្ឋភាពពីលើអាកាស ចំពោះការតុបតែលម្អយ៉ាងល្អប្រណិត ដើម្បីត្រៀមរៀបចំពិធីដង្ហែក្បួនថ្មើរជើង សម្រាប់ព្រឹត្តិការណ៍ “សាទរកម្ពុជា” នៅថ្ងៃទី៣១ ខែធ្នូ ឆ្នាំ២០២៤ ខាងមុខនេះ ដែលនឹងប្រារព្ធឡើងនៅមុខព្រះបរមរាជវាំង ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ។

ក្រឡេកទៅកាន់សម្រស់នាពេលរាត្រីវិញគឺរឹតតែល្អឯក ដោយមានការរៀបចំតុបតែងលម្អ បំពាក់ភ្លើងចម្រុះពណ៌ ជាការបន្ថែមសម្រស់ឲ្យព្រះបរមរាជវាំងកាន់តែមានភាពលេចធ្លោ និងអធិកអធមក្រៃ សរបញ្ជាក់អំពីកិត្យានុភាពរបស់ព្រះមហាក្សត្រនូវគង់ជាម្លប់ដ៏ត្រជាក់ត្រជុំដល់កូនចៅ និងសង្គមជាតិខ្មែរ។ យ៉ាងណា បើទោះបីជាថ្ងៃកម្មវីធីមិនទាន់នឹងចាប់ផ្តើមក្តី ដោយសង្កេតឃើញថា ប្រជាពលរដ្ឋខ្មែរជាច្រើន ព្រមទាំងជនបរទេស បានទៅទស្សនានិងថតរូបលេងកម្សាន្តជាបណ្តើរៗហើយ។

ភាពលេចធ្លោនៃព្រឹត្តិការណ៍សាទរកម្ពុជា ដែលនឹងប្រព្រឹត្តិទៅនារាត្រីថ្ងៃឆ្លងឆ្នាំនេះ នឹងមានក្បួនដង្ហែបែបវប្បធម៌ប្រពៃណី ដែលមានអ្នកចូលរួមប្រមាណ ៣០០០នាក់ ព្រមជាមួយនឹងទស្សសនីយភាពជាច្រើនទៀតដូចជា យក្សល្ខោនបាសាក់ចំនួន ២០០ ទីងមោងចំនួន ៨៥ ក្រុមល្ខោនស្បែកធំ គោមយក្ស ពោងយក្ស។ ជាមួយគ្នានោះនឹងមានកម្មវិធីកម្សាន្តចម្រុះជាច្រើនទៀតដូចជា តន្រ្តីប្រជាប្រិយ ដែលមានការអញ្ជើញចូលរួមពីតារាល្បីៗ ,ការអុជកាំជ្រួចអបអរសាទរ រាប់ថយក្រោយនារាត្រីឆ្លងឆ្នាំដ៏មហាឡារិកនៅមុខព្រះបរមរាជវាំង ដែលមិនធ្លាប់មានពីមុនមកសោះឡើយ។

យ៉ាងណា វត្តមានស្គរជ័យទម្ងន់ ៣ តោន ក៏បានលេចវត្តមាននៅមុខព្រះបរមរាជវំាង នាព្រឹកថ្ងៃទី ២៦ ខែធ្នូនេះ ត្រៀមរួចជាស្រេច សម្រាប់ចូលរួមក្នុងក្បួនដង្ហែរផងដែរ។ សូមជម្រាបថា ព្រឹត្តិការណ៍សាទរកម្ពុជា» គឺជារៀបចំឡើងដោយសហភាពសហព័ន្ធយុវជនកម្ពុជា៕

មួយរយៈចុងក្រោយនេះ គេសង្កេតឃើញមានករណីក្មេងទំនើង ជាច្រើនករណី ដែលបណ្តាលឱ្យមានមនុស្សស្លាប់ និងរបួសជាច្រើននាក់ ជាពិសេសបានបង្កភាពអសន្តិសខជាខ្លាំងនៅក្នុងសង្គម។

ពាក់ព័ន្ធនឹងករណីនេះ សម្តេចធិបតី ហ៊ុន ម៉ាណែត បានចេញសារសំឡេងពិសេសតាមរយៈតេឡេក្រាម ដោយបានដាក់បទបញ្ជាឱ្យកងកម្លាំងសមត្ថកិច្ច និងអាវុធហត្ថ ខេត្តក្រុង រាជធានី ទាំងអស់ចេញបង្ក្រាបក្រុមក្មេងទំនើង យកមកដាក់ទោស។

សម្តេចធិបតី បានសង្កត់ធ្ងន់ថា៖” បើមានក្មេងទំនើងងើបមកធ្វើសកម្មភាពត្រូវបង្រាបភ្លាមៗ កុំចាំដល់នាយករដ្ឋមន្រ្តីស្រែក ឬមហាជនស្រែកទើបតាមហ្វេសប៊ុក។ យើងមានកងកម្លាំងក្នុងដៃ មានច្បាប់ មានលុយ ត្រូវតែបែកបញ្ហានេះឱ្យបាន”។

បើយោងតាមរបាយការណ៍របស់ ក្រសួងយុត្តិធម៌ បានបញ្ជាក់ថាភ្នំពេញ ជាប់លេខ១ មានក្មេងទំនើងច្រើនជាងគេ បន្ទាប់មកខេត្តកំពង់ស្ពឺ តាកែវ បន្ទាយមានជ័យ និងសៀមរាប៕

ឯកឧត្តម ឃួង ស្រេង អភិបាលនៃគណៈអភិបាលរាជធានី បានបេីកកិច្ចប្រជុំស្ដីពីការជំរុញរៀបចំផ្លូវថ្មើរជើង ទំហំ៥៧ហិកតា នៅកណ្តាលទីក្រុងភ្នំពេញ ចាប់ពីមុខប្រៃសណីយ៍ ផ្លូវបក្សីចាំក្រុង ដល់រង្វង់មូល សម្តេចព្រះសង្ឃរាជជួនណាត។

ផ្លូវថ្មើរជើងរាជធានីភ្នំពេញ ត្រូវបានបែងចែងជា៣តំបន់រួមមាន៖

ផ្លូវថ្មើរជើងតំបន់ទី១ ទំហំ៣,៣ហិកតា មានទីតាំង នៅមុខប្រៃសណីយ៍ មានព្រំប្រទល់៖ ផ្លូវលេខ៩៤-ខាងជើង ផ្លូវលេខ១០៦-ខាងត្បូង ផ្លូវលេខ១៣-ខាងលិច តិរិវិថីព្រះស៊ីសុវត្ថិ-ខាងកើត (តំបន់នេះនឹងរៀបចំឡើងជាតំបន់វិថីម្ហូបអាហារ និងហាងទំនិញ)។

ផ្លូវថ្មើរជើងតំបន់ទី២ ទំហំ២០,៧ហិកតា មានព្រំប្រទល់៖ ផ្លូវលេខ ១០៦-ខាងជើង ផ្លូវលេខ ១៨៤-ត្បូង ផ្លូវលេខ១៣-ខាងលិច តិរិវិថីព្រះស៊ីសុវត្ថិ-ខាងកើត (តំបន់នេះរៀបចំជាតំបន់ Pub Street)។

ផ្លូវថ្មើជើងតំបន់ទី៣ ទំហំ៣៤ហិកតា មានព្រំប្រទល់៖ ផ្លូវលេខ ១៨៤-ខាងជើង មហាវិថីព្រះសីហនុ-ខាងត្បូង ផ្លូវលេខ០៧-ខាងលិច តិរិវិថីព្រះស៊ីសុវត្ថិ-ខាងកើត (រៀបចំជាតំបន់ លំហែកាយ)។

ក្រោយសាងសង់រួច ផ្លូវថ្មើរជើង Pubstreet នេះនឹងបើកឱ្យ ភ្ញៀវជាតិ អន្តរជាតិចូលទិញទំនិញ និងកម្សាន្តចាប់ពីម៉ោង៦ល្ងាច ដល់ម៉ោង១១យប់៕

នាឱកាសអញ្ជើញជាអធិបតីប្រគល់វិញ្ញាបនបត្រ និងសញ្ញាបត្រ ជូនដល់សិក្ខាកាម និងនិស្សិត សាកលវិទ្យាល័យធនធានមនុស្ស នៅព្រឹកថ្ងៃទី២៦ ខែធ្នូ ឆ្នាំ២០២៤ សម្តេចបវរធិបតី ហ៊ុន ម៉ាណែត បានបញ្ជាក់ច្បាស់ៗទៅកាន់មតិរបស់ពលរដ្ឋមួយចំនួន ដែលស្នើឱ្យរាជរដ្ឋាភិបាលទាមទាមទារយកខេត្តកម្ពុជាមកវិញពីប្រទេសជិតខាង។

សម្តេចធិបតី បានមានប្រសាសន៍ថា៖”ការទាមទារមកវិញនូវខេត្តកម្ពុជាជាង៣០ ដែលបារាំងកាត់ឱ្យទៅប្រទេសជិតខាង គឺមិនអាចធ្វើបាននោះទេ ខណៈប្រទេសជិតខាង ក៏ទាមទារឱ្យរដ្ឋាភិបាលគេ យកខេត្តគេ ដែលបារាំងកាត់ឱ្យកម្ពុជាផងដែរ”។

បន្ថែមពីនេះ សម្តេចក៏បានសង្កត់ទៀតថា៖” ចំពោះបញ្ហាការកាត់ខេត្ត ដែលបន្សល់ទុកពីសម័យបារាំងមក អ្នកនយោបាយជំនាន់ក្រោយ នឹងព្យាយាមដោះស្រាយដោយសន្តិវិធី ឈរលើមូលដ្ឋានច្បាប់ជាតិ និងអន្តរជាតិ”។

គួររំលឹកថា នៅក្នុងអំឡុងសម័យកាលក្រោមអាណានិគមចន្លោះឆ្នាំ១៨៦៣-១៩៥៣ បារាំងបានកាត់ខេត្តជាច្រើនទៅឱ្យប្រទេសជិតខាងកម្ពុជា ជាពិសេសថៃ និងវៀតណាម៕