ប្រទេសអូស្ត្រាលី ៖ ស្របពេលពិភពលោក កំពុងចាប់អារម្មណ៍នឹងភ្លើងឆេះព្រៃនៅទីក្រុងឡូសអេនជឺឡេស រដ្ឋកាលីហ្វ័រញ៉ា សហរដ្ឋអាមេរិក ដែលបានបំផ្លា.ញ ទ្រព្យសម្បត្តិ និងផ្ទះពលរដ្ឋអស់យ៉ាងច្រើនមហាសាល នៅប្រទេសអូស្ត្រាលីវិញបែរជាមានខ្យល់ព្យុះ និងរន្ទះបា.ញ់ ជាច្រើនកន្លែង ។

កាលពីថ្ងៃទី១៨ ខែមករា ឆ្នាំ២០២៥ សារព័ត៌មាន AFP រាយការណ៍ថា អូស្ត្រាលីប្រកាសអាសន្នពីគ្រោះធម្មជាតិក្នុងតំបន់ភាគខាងកើតប្រទេស ដែលគ្របដណ្តប់លើទីក្រុងស៊ីដនី និងតំបន់ជាច្រើនក្នុងរដ្ឋ New South Wales ។

ខ្យល់ព្យុះបានបោកបក់មកលើអូស្ត្រាលី តាំងពីថ្ងៃទី១៥ ខែមករា កន្លងមក ដែលបណ្តាលឱ្យមានភ្លៀងធ្លាក់យ៉ាងខ្លាំង រន្ទះបាញ់ និងខ្យល់កន្ត្រាក់ខ្លាំង ដែលមានល្បឿនជាង១០០គីឡូម៉ែត្រក្នុង១ម៉ោង ។ ដើមឈើជាច្រើនបានដួលរលំពាសពេញផ្លូវ ខណៈអគារ និងផ្ទះពលរដ្ឋ ស្មើជាង៣ម៉ឺនខ្នង គ្មានអគ្គិសនីប្រើប្រាស់ ។

រដ្ឋមន្ត្រីក្រសួងគ្រប់គ្រងការសង្គ្រោះបន្ទាន់នៅរដ្ឋ New South Wales លោក Jihad Dib លើកឡើងថា ភ្នាក់ងារសង្គ្រោះបន្ទាន់បានទទួលសេចក្តីរាយការណ៍គ្រោះធម្មជាតិពីពលរដ្ឋ រហូតដល់ជាង៧,០០០លើកក្នុងរយៈពេលខ្លី ។

តាមសេចក្តីរាយការណ៍បឋម កាលពីថ្ងៃទី១៧ ខែមករា កន្លងមក គឺមានពលរដ្ឋអូស្ត្រាលីរងរបួសចំនួន២នាក់ ដោយសារដើមឈើក្នុងសួនច្បារបាក់រលំសង្កត់ពួកគេពេលកំពុងដើរនៅតាមផ្លូវ ។ រីឯផ្លូវផ្សេងទៀតដែលមានរថយន្តបើកបរជាច្រើន ក៏មានដើមឈើបាក់រលំដែរ ។

គួរបញ្ជាក់ថា នេះពុំមែនជាលើកទី១ទេ កាលពីខែកញ្ញា ឆ្នាំ២០២៤ ពលរដ្ឋអូស្ត្រាលីរាប់ម៉ឺននាក់នៅរដ្ឋ Tasmania គ្មានអគ្គិសនីប្រើប្រាស់ក្រោយពីខ្យល់ព្យុះធ្វើឱ្យភ្លៀងធ្លាក់ខ្លាំង រហូតដល់អាជ្ញាធរប្រកាសឱ្យប្រុងប្រយ័ត្នទឹកជំនន់ ។ ពេលនោះ ក្រុមហ៊ុនផលិតអគ្គិសនីបានប្រមូលកម្លាំងដោះស្រាយបញ្ហាដាច់ចរន្តអគ្គិសនី ដើម្បីឱ្យពលរដ្ឋមានអគ្គិសនីប្រើប្រាស់ ៕

សហរដ្ឋអាមេរិក ៖ រដ្ឋបាលចំណីអាហារ និងឱសថអាមេរិក (FDA) បានប្រកាសហាមឃាត់ការប្រើប្រាស់សារធាតុពណ៌ក្រហម (FD&C Red No.3) ក្នុងចំណីអាហារ និងថ្នាំរបស់អាមេរិក ចាប់ពីថ្ងៃទី១៥ ខែមករា ឆ្នាំ២០២៧ តទៅ ពីព្រោះសារធាតុនេះនឹងបង្កជំងឺមហារីក ។ អាមេរិកបានរកឃើញសារធាតុនេះនៅក្នុងចំណីអាហារជាច្រើននាពេលបច្ចុប្បន្ន ដូចជា ៖ ស្ករគ្រាប់ និងថ្នាំផ្តាសាយ ។

សារព័ត៌មានអាមេរិករាយការណ៍ថា សារធាតុពណ៌ក្រហម ត្រូវបានប្រើប្រាស់ក្នុងចំណីអាហារជាច្រើនប្រភេទនៅអាមេរិក ដូចជា ៖ ស្ករគ្រាប់ ដែលផលិតដោយក្រុមហ៊ុន Ferrara Candy, គ្រាប់ស្ករល្អិតៗសម្រាប់រោយលើនំ ផលិតដោយក្រុមហ៊ុន Betty Crocker និងផលិតផលអាហារបំប៉នក្លិនស្ត្របឺរី ម៉ាក Ensure ជារបស់ក្រុមហ៊ុន Abbott Laboratories ។

ក្រៅពីនេះ អាជ្ញាធរក៏បានរកឃើញសារធាតុពណ៌ក្រហមក្នុងថ្នាំមួយចំនួនផងដែរ ដូចជា ៖ ថ្នាំ Vyvanse របស់ក្រុមហ៊ុន Takeda Pharmaceutical Co. ដែលថ្នាំនេះសម្រាប់ព្យាបាលអ្នកជំងឺពាក់ព័ន្ធនឹងអារម្មណ៍, ថ្នាំព្យាបាលការក្រហល់ក្រហាយលើដើមទ្រូង និងចុងដង្ហើម ជារបស់ក្រុមហ៊ុន Costco Wholesale Corp. និងក្រុមហ៊ុន Rite Aid Corp. ។

សមាគមផលិតនំចំណីជាតិអាមេរិកបញ្ជាក់ថា សុវត្ថិភាពចំណីអាហារ គឺក្រុមហ៊ុនផលិតនំអាមេរិកផ្តល់ភាពសំខាន់ជាចម្បង ព្រមទាំងអនុវត្តតាមគោលការណ៍សុវត្ថិភាពអាហាររបស់រដ្ឋបាលចំណីអាហារ និងឱសថអាមេរិក ។ អាមេរិកហៅសារធាតុពណ៌ក្រហមថា FD&C Red No.3 រីឯនៅអឺរ៉ុបហៅថា Erythrosine (E127) ក៏បានហាមប្រើសារធាតុនេះក្នុងចំណីអាហារដែរ ដូចជា ៖ អូស្ត្រាលី និងនូវែលសេឡង់ ។

កាលពី៣០ឆ្នាំមុន រដ្ឋបាលចំណីអាហារ និងឱសថអាមេរិក បានហាមឃាត់ការប្រើប្រាស់សារធាតុពណ៌ក្រហមក្នុងគ្រឿងសម្អាង ក្រោយពីមានភស្តុតាងបញ្ជាក់ថា សារធាតុនេះបង្កជំងឺមហារីកលើសត្វកណ្តុរក្នុងបន្ទប់ពិសោធន៍ ។ ក្រោយមក នៅឆ្នាំ២០២២ ពលរដ្ឋអាមេរិកបានតវ៉ាឱ្យរដ្ឋបាលចំណីអាហារហាមឃាត់ការប្រើប្រាស់សារធាតុនេះក្នុងចំណីអាហារ ។ នេះបើតាមការចុះផ្សាយរបស់សារព័ត៌មានស៊ីនហួរ កាលពីថ្ងៃទី១៦ ខែមករា ឆ្នាំ២០២៥ ៕

ប្រទេសជប៉ុន ៖ ក្រុមហ៊ុនផលិតមនុស្សយន្តនៅទីក្រុងតូក្យូ ប្រទេសជប៉ុន ឈ្មោះ Yukai Engineering បានបង្ហាញឆ្មាយន្តខ្នាតតូច Nékojita FuFu ក្នុងកម្មវិធីតាំងពិព័រណ៍បច្ចេកវិទ្យា «CES 2025» ដែលឆ្មាយន្តនេះមានសមត្ថភាពពិសេសអាចជួយផ្លុំកាហ្វេក្តៅក្នុងកែវឱ្យឆាប់ត្រជាក់ ឬអាហារក្តៅក្នុងចាន ។ ការផលិតឆ្មាយន្តនេះ ក្នុងគោលបំណងជួយអ្នកដែលមានបញ្ហាអណ្តាតពេលផឹកភេសជ្ជៈក្តៅ និងជួយអ្នកមានកូនតូច ។

ឆ្មាយន្ត Nékojita FuFu ត្រូវបានបំពាក់កង្ហារខ្នាតតូចនៅខាងក្នុង និងប្រើប្រាស់បច្ចេកវិទ្យា AI ពិសេសឈ្មោះ Fuing System ដើម្បីឱ្យវាអាចផ្លុំកាហ្វេក្តៅដូចមនុស្សបំផុត ហើយក្រុមហ៊ុនមានគម្រោងលក់ឆ្មាយន្តនៅប្រទេសជប៉ុន នាពាក់កណ្តាលឆ្នាំ២០២៥ ក្នុងតម្លៃប្រមាណ ២៥ដុល្លារអាមេរិក ។ Nékojita FuFu គឺជាឧបករណ៍តូចមួយអាចដាក់លើកែវកាហ្វេ ឬចានអាហារតាមតម្រូវការ និងអាចបញ្ជាវាឱ្យផ្លុំកាហ្វេខ្លាំង ឬផ្លុំថ្នមៗ ។

ឆ្មាយន្តនេះមិនត្រឹមតែជួយលោកអ្នកឱ្យរីករាយក្នុងការផឹកកាហ្វេប៉ុណ្ណោះទេ ប៉ុន្តែវាជួយមនុស្សចាស់ងាយស្រួលផឹកភេសជ្ជៈក្តៅ ព្រមទាំងជួយឪពុក-ម្តាយងាយស្រួលបញ្ចុកអាហារកូនតូចៗផងដែរ ។ យើងរីករាយណាស់សម្រាប់ការបង្ហាញឆ្មាយន្តក្នុងកម្មវិធីតាំងពិព័រណ៍បច្ចេកវិទ្យា «CES 2025» ហើយសង្ឃឹមថា លោកអ្នកនឹងពេញចិត្តវា ។

លោកអ្នកអាចដាក់ឆ្មាយន្តតូចច្រឡឹងនេះលើកែវកាហ្វេក្តៅ រួចហើយ បញ្ជាវាឱ្យផ្លុំកាហ្វេឱ្យឆាប់ត្រជាក់ ។ បើទោះជាមើលទៅឃើញថា វាដូចជាឆ្មាជ័រធម្មតា ប៉ុន្តែបច្ចេកវិទ្យានៅផ្នែកខាងក្នុងគួរឱ្យចាប់អារម្មណ៍ខ្លាំងណាស់ ។ នេះបើតាមការលើកឡើងរបស់ប្រធានផ្នែកទីផ្សារក្រុមហ៊ុន Yukai Engineering ។

កាលពីឆ្នាំ២០១៨ ក្រុមហ៊ុន Yukai Engineering បានបង្ហាញខ្នើយទន់កន្ទុយឆ្មាសិប្បនិម្មិត ឈ្មោះ Qoobo ដែលអាចយកតាមខ្លួនដូចឆ្មាពិតប្រាកដ សម្រាប់ជួយព្យាបាលផ្លូវចិត្តអ្នកប្រើប្រាស់ ។ រីឯឆ្មាយន្ត Nékojita FuFu គឺសម្រាប់ផ្តល់ភាពងាយស្រួលដល់អ្នកប្រើប្រាស់ ពីព្រោះឪពុក-ម្តាយមួយចំនួននឿយហត់ក្នុងការផ្លុំអាហារបញ្ចុកកូនតូច ៕

នៅលើពិភពលោកយើងនេះ មានទន្លេធំៗ និងវែងៗច្រើនជាង ១៩០ ខ្សែ ដែលទន្លេនីមួយៗសុទ្ធតែមានលក្ខណៈពិសេស និងប្លែកៗខុសពីគ្នា ប៉ុន្តែតើលោកអ្នកដឹងទេថា ក្នុងចំណោមទន្លេទាំងអស់នៅលើពិភពលោក តើទន្លេណាខ្លះដែលមានទេសភាពស្រស់ស្អាតជាងគេ?

១.The Nile៖ ទន្លេនីល ស្ថិតនៅក្នុងប្រទេសអេហ្ស៊ីប គឺជាទន្លេដ៏ធំ និងអស្ចារ្យបំផុតរបស់ពិភពលោក ជាមួយសម្រស់ដ៏ស្រស់ត្រកាលនៅភាគខាងជើងនៃទ្វីបអាហ្រ្វិកលាតសន្ធឹងប្រវែង ៤១៣២ គីឡូម៉ែត្រ និងរត់ឆ្លងកាត់ប្រទេសចំនួន ១១ ទន្លេនីលក៏បានដើរតួយ៉ាងសំខាន់ក្នុងប្រវត្តិសាស្ត្រអេហ្ស៊ីបបុរាណផងដែរ។

២.Mississippi River៖ ទន្លេមីស៊ីស៊ីពី ស្ថិតនៅក្នុងទ្វីបអាមេរិកខាងជើង គឺជាទន្លេធំបំផុត និងស្អាតបំផុតទីពីរនៅលើពិភពលោក រួមទាំងជាកន្លែងសម្រាប់ទាក់ទាញភ្ញៀវទេសចរយ៉ាងច្រើនទៀតផង។

៣.The Ganges៖ ទន្លេ Ganges ស្ថិតនៅក្នុងប្រទេសឥណ្ឌា ត្រូវបានគេស្គាល់ថាជាទន្លេដ៏បរិសុទ្ធ និងជាទន្លេដែលអាចលាងជម្រះអំពើបាបរបស់មនុស្សគ្រប់គ្នាបានទៀតផង។ ទន្លេនេះគឺមានទិដ្ឋភាពស្រស់ស្អាតខ្លាំងណាស់ ដែលជាបទពិសោធន៍ដ៏គួរឱ្យចាប់អារម្មណ៍មិនអាចបំភ្លេចបាន។

៤.The Thames៖ ទន្លេដ៏គួរឱ្យភ្ញាក់ផ្អើលមួយទៀតក្នុងពិភពលោកគឺទន្លេ Thames ដែលជាកន្លែងទាក់ទាញភ្ញៀវទេសចរដ៏លេចធ្លោមួយក្នុងទីក្រុងឡុងដ៍ប្រទេសអង់គ្លេស។ វាផ្តល់នូវផ្ទៃខាងក្រោយដ៏គួរឱ្យចាប់អារម្មណ៍ ហើយក៏ជាទន្លេវែងជាងគេរបស់អង់គ្លេសមានស្ពានប្រហែល ២០០ និងផ្លូវរូងក្រោមដីជាង ២០ ដែលគេស្គាល់វាថាជាស្ពានឡុងដ៍ដ៏ល្បីល្បាញផងដែរ។

៥.The Amazon៖ ទន្លេអាម៉ាហ្សូន ស្ថិតនៅក្នុងទ្វីបអាមេរិកខាងត្បូង គឺជាទន្លេធំបំផុតក្នុងពិភពលោក ត្រូវបានគេចាត់ទុកថាជាសរសៃឈាមនៃភពផែនដីរបស់យើង និងត្រូវបានគេស្គាល់ផងដែរថាជា River Sea។ ជាមួយទេសភាពស្រស់ស្អាតខ្លាំង ប្រៀបដូចទឹកនៅលើឋានសួគ៌ ទន្លេអាម៉ាហ្សូនត្រូវបានគេចាត់ទុកថា ជាទន្លេស្រស់ស្អាតបំផុតទី ៥ ក្នុងពិភពលោក។

៦.The Colorado៖ ទន្លេ Colorado ស្ថិតនៅក្នុងសហរដ្ឋអាមេរិក គឺជាទន្លេដែលមានទេសភាពស្រស់ស្អាតបំផុត ជាមួយនឹងការធ្វើដំណើរឆ្លងកាត់វាលខ្សាច់អារីហ្សូណាស្ងួត ទន្លេនេះផ្តល់នូវទិដ្ឋភាពអស្ចារ្យមិនធ្លាប់មាន។

៧.The River Rhine៖ ទន្លេ Rhine គឺជាទន្លេធំទីពីររបស់អឺរ៉ុប ជាមួយនឹងសម្រស់ដ៏អស្ចារ្យ ស្ថិតក្នុងចំណោមទន្លេដ៏ល្បីល្បាញ និងស្រស់ស្អាតបំផុតរបស់ពិភពលោក ដោយវាមានប្រភពមកពី Swiss Alps ហើយហូរកាត់ទីក្រុងធំៗមួយចំនួននៅអឺរ៉ុប។

៨.The Zambezi៖ Zambezi គឺជាទន្លេដែលវែងជាងគេរបស់ទ្វីបអាហ្រ្វិក ហើយត្រូវបានកត់សម្គាល់សម្រាប់ការទាក់ទាញដ៏ល្បីល្បាញបំផុតរបស់វា ជាមួយទឹកធ្លាក់ Victoria ដ៏គួរឱ្យចាប់អារម្មណ៍។

៩.The Yangtze៖ ទន្លេ Yangtze ស្ថិតក្នុងប្រទេសចិន គឺជាទន្លេដែលវែងជាងគេទី ៣ របស់ពិភពលោក និងជាទន្លេមានទេសភាពស្រស់ស្អាតទី ៩ នៅលើពិភពលោក ដែលលាតសន្ធឹងប្រវែង ៦៣០០ គីឡូម៉ែត្រ រួមជាមួយទេសភាពដ៏គួរឱ្យទាក់ទាញជាទីបំផុត។

១០.The Mekong៖ ទន្លេមេគង្គហូរចេញពីខ្ពង់រាបទីបេដ៏ល្បីល្បាញ ហើយធ្វើដំណើរឆ្លងកាត់ប្រទេសចិន មីយ៉ាន់ម៉ា ថៃ វៀតណាម កម្ពុជា និងឡាវ ក៏ត្រូវបានរាប់បញ្ចូលក្នុងចំណោមទន្លេដ៏ស្រស់ស្អាតបំផុតទាំង ១០ នៅលើពិភពលោកផងដែរ៕

ប្រទេសថៃ ៖ កាលពីថ្ងៃទី១៧ ខែមករា ឆ្នាំ២០២៥ រដ្ឋមន្ត្រីក្រសួងវប្បធម៌ប្រទេសថៃ បានប្រជុំជាមួយមន្ត្រីមកពីស្ថាប័នពាក់ព័ន្ធ ព្រមទាំងលោក និរ៉ាត់ ផុងសិទ្ធីថាវ៉ន អភិបាលខេត្តឈៀងម៉ៃ ដើម្បីជំរុញការរៀបចំឯកសារស្នើចុះខេត្តឈៀងម៉ៃ ជាតំបន់បេតិកភណ្ឌវប្បធម៌ពិភពលោក ទៅកាន់អង្គការយូណេស្កូ ។

លោកស្រី ស៊ូដាវ៉ាន់ វ៉ាង់ស៊ូផាកិចកូស៊ុន រដ្ឋមន្ត្រីក្រសួងវប្បធម៌បានពិភាក្សាជាមួយលោក និរ៉ាត់ ផុងសិទ្ធីថាវ៉ន អភិបាលខេត្តឈៀងម៉ៃ អំពីការរៀបចំឯកសារស្នើចុះខេត្តឈៀងម៉ៃជាតំបន់បេតិកភណ្ឌវប្បធម៌ពិភពលោក ជាមួយអង្គការយូណេស្កូ ។ លោកស្រីនិយាយថា ខេត្តឈៀងម៉ៃ ប្រៀបបាននឹងរាជធានីនៃទឹកដីឡានណា ដែលមានអាយុកាលយ៉ាងហោចណាស់ ៧៣០ឆ្នាំ ហើយភាពរីកចម្រើនបានបង្ហាញឱ្យឃើញនៅតាមវត្តអារ៉ាម និងទីកន្លែងបុរាណជាច្រើន ។

ពលរដ្ឋនៅខេត្តឈៀងម៉ៃ មានមោទនភាពចំពោះភាពធំធេងផ្នែកប្រវត្តិសាស្ត្រ និងបន្តប្រពៃណី វប្បធម៌ពីមនុស្សមួយជំនាន់ទៅមួយជំនាន់ ដែលធ្វើឱ្យអ្នកមកកម្សាន្តនៅឈៀងម៉ៃពុំអាចបំភ្លេចបាន ។ ហេតុនេះ ថៃសម្រេចចិត្តស្នើសុំអង្គការយូណេស្កូចុះបញ្ជីខេត្តឈៀងម៉ៃ ជាតំបន់បេតិកភណ្ឌវប្បធម៌ពិភពលោក ដើម្បីជំរុញវិស័យទេសចរណ៍ ។

បច្ចុប្បន្ន ជាដំណាក់កាលដ៏សំខាន់ដែលថៃត្រូវរៀបចំឯកសារបញ្ជាក់ពីភាពលេចធ្លោរបស់ខេត្តឈៀងម៉ៃ តាមលក្ខណៈវិនិច្ឆ័យរបស់អង្គការយូណេស្កូ ដើម្បីបញ្ជូនឯកសារតាមដំណាក់កាលបន្តទៀត ។ ស្ថាប័នពាក់ព័ន្ធត្រូវសហការគ្នាធ្វើឯកសារឱ្យជោគជ័យ និងដាក់ទៅអង្គការយូណេស្កូឱ្យបានឆាប់រហ័ស ហើយចំណុចសំខាន់ ពលរដ្ឋខេត្តឈៀងម៉ៃត្រូវចូលរួមផ្តល់កម្លាំងចិត្ត និងគាំទ្រឱ្យការស្នើសុំដំណើរការដោយរលូន ។ នេះបើតាមការលើកឡើងរបស់លោកស្រី ស៊ូដាវ៉ាន់ ។

ការស្នើចុះខេត្តឈៀងម៉ៃជាតំបន់បេតិកភណ្ឌវប្បធម៌ពិភពលោក គឺដើម្បីឱ្យប្រទេសថៃមានកេរ្តិ៍ឈ្មោះល្បីល្បាញលើឆាកអន្តរជាតិ ដោយសារខេត្តឈៀងម៉ៃសម្បូរតំបន់ទេសចរណ៍ និងវត្តអារ៉ាម ។ ពេលខេត្តឈៀងម៉ៃក្លាយជាតំបន់បេតិកភណ្ឌវប្បធម៌ពិភពលោក គឺខេត្តឈៀងម៉ៃនឹងជាគោលដៅទេសចរណ៍ ទទួលបានចំណូល ពលរដ្ឋមានជីវភាពល្អប្រសើរ ព្រមទាំងក្លាយជា Soft Power ដ៏រឹងមាំស្របតាមគោលនយោបាយរបស់រដ្ឋាភិបាលថៃ ៕

ប្រទេសថៃ ៖ នាពេលថ្មីៗនេះ ភ្ញៀវទេសចរចិនយ៉ាងច្រើនបានលុបចោលដំណើរកម្សាន្តចូលឆ្នាំចិននៅប្រទេសថៃ ដោយសារបារម្ភពីសុវត្ថិភាពការធ្វើដំណើរ និងស្នាក់នៅថៃ ជាពិសេស ការជួ.ញដូរ មនុស្ស និងចាប់ជំ.រិត ក្រោយការបាត់ខ្លួនតារាសម្តែងចិន លោក Wang Xing នៅបរិវេណព្រំដែនថៃ និងមីយ៉ាន់ម៉ា កាលពីថ្ងៃទី៣ ខែមករា ឆ្នាំ២០២៥ ។

នៅថ្ងៃទី១៧ ខែមករា កន្លងមក នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ថ្លែងថា លោកស្រីនឹងប្រើប្រាស់បច្ចេកវិទ្យា AI ជួយបកប្រែភាសាដើម្បីផ្សព្វផ្សាយ និងផ្តល់ទំនុកចិត្តដល់ភ្ញៀវទេសចរចិនឱ្យត្រឡប់មកកម្សាន្តនៅប្រទេសថៃច្រើនដូចមុន ។

យើងនឹងត្រៀមទំនាក់ទំនងជាមួយភ្ញៀវទេសចរចិន ដែលបារម្ភពីសុវត្ថិភាពការធ្វើដំណើរមកប្រទេសថៃ ហើយខ្ញុំនឹងថតសំឡេងខ្លួនឯង និងប្រើប្រាស់បច្ចេកវិទ្យា AI ជួយបកប្រែជាភាសាចិនដើម្បីទំនាក់ទំនងជាមួយជនជាតិចិន ពីព្រោះខ្ញុំអត់ចេះនិយាយភាសាចិន ។ នេះបើតាមការលើកឡើងរបស់លោកស្រី ផេថងថាន នៅវិមានរដ្ឋាភិបាល ក្រោយពីលោកស្រីអញ្ជើញមន្ត្រីមកពីស្ថាប័នពាក់ព័ន្ធចូលរួមពិភាក្សាពីការផ្តល់ទំនុកចិត្តដល់ភ្ញៀវទេសចរបរទេស ជាពិសេស ភ្ញៀវទេសចរចិន ។

លោកស្រីបន្តថា ៖ «ការនិយាយជាភាសាថៃ គឺពុំមានប្រសិទ្ធភាពដូចការនិយាយភាសាចិនទេ ទើបខ្ញុំថតសំឡេងរបស់ខ្លួនដើម្បីទំនាក់ទំនងជាមួយជនជាតិចិន ដើម្បីបញ្ជាក់ថា ថៃបានត្រៀមការពារសុវត្ថិភាពភ្ញៀវទេសចរបរទេស ។ ពួកគេអាចមកដើរលេងនៅថៃយ៉ាងសប្បាយរីករាយ និងពុំចាំបាច់បារម្ភ» ។

ប្រទេសថៃកំណត់វិធានការទាក់ទាញភ្ញៀវទេសចរចិន គឺក្រោយពីតារាសម្តែងចិន លោក Wang Xing បានធ្វើដំណើរមកប្រទេសថៃដើម្បីសម្តែងភាពយន្ត កាលពីថ្ងៃទី៣ ខែមករា កន្លងមក ប៉ុន្តែត្រូវជនខិលខូចបោកឱ្យលោកទៅស្រុកមេស៊ត ខេត្តតាក និងឆ្លងព្រំដែនទៅមីយ៉ាន់ម៉ា ។ ប៉ុន្តែនៅថ្ងៃទី៥ ខែមករា ក្រុមគ្រួសារពុំអាចទំនាក់ទំនងជាមួយលោក រហូតដល់សារព័ត៌មានចុះផ្សាយពីលោកចាញ់បោកជនខិលខូច ។

រដ្ឋាភិបាលថៃបានទំនាក់ទំនងជាមួយរដ្ឋាភិបាលចិន និងកងកម្លាំងប្រដាប់អាវុធជនជាតិភាគតិចមីយ៉ាន់ម៉ា រហូតដល់អាចជួយសង្គ្រោះតារាសម្តែងចិនរូបនេះពីមីយ៉ាន់ម៉ាត្រឡប់មកថៃវិញ នៅថ្ងៃទី៧ ខែមករា ។ ក្រោយហេតុការណ៍នេះ ក្រុមហ៊ុនទេសចរណ៍ថៃបញ្ជាក់ថា ភ្ញៀវទេសចរចិននាំគ្នាលុបចោលការកក់បន្ទប់សណ្ឋាគារនៅថៃ ដោយសារបារម្ភពីសុវត្ថិភាព ៕

ក្នុងឱកាសបុណ្យចូលឆ្នាំចិនខាងមុខនេះ ប្រជាជនចិន ឬអ្នកដែលមានសែស្រឡាយចិនតែងតែមានទំនៀមទម្លាប់មួយចំនួន និងតំណមខ្លះៗ ដើម្បីលើកតម្កើងលាភសំណាង ក៏ដូចជាបង្កើនសុភមង្គល និងទ្រពសម្បត្តិផងដែរ។ ដូច្នេះទំនៀមទម្លាប់ដែលប្រជាជនចិនតែងតែអនុវត្តនៅថ្ងៃចូលឆ្នាំថ្មីរួមមាន៖

១.សែនដង្វាយដល់ព្រះ ដូនតា និងវត្ថុស័ក្តសិទ្ធ៖ ដំណើរការដ៏សំខាន់បំផុតមួយនៃ “បុណ្យចូលឆ្នាំចិន” គឺការគោរពដល់បុព្វបុរស វត្ថុពិសិដ្ឋ ព្រោះការថ្វាយបង្គំព្រះជាអ្វីដែលជនជាតិចិនអនុវត្តជាយូរមកហើយ។ គ្រប់គ្រួសារនឹងរៀបចំដង្វាយរួមមានអាហារប្រៃ អាហារផ្អែម និងផ្លែឈើល្អៗ ដើម្បីប្រើប្រាស់ជាតង្វាយក្នុងថ្ងៃបុណ្យចូលឆ្នាំចិន ដែលត្រូវនឹងថ្ងៃអង្គារ ទី២៨ ខែមករា ឆ្នាំ២០២៥ នេះ។

២.ការឱ្យអាំងប៉ាវ៖ ការផ្តល់ស្រោមសំបុត្រក្រហម ឬគេហៅថាអាំងប៉ាវ គឺជាអំណោយដែលមនុស្សចាស់ ឬមនុស្សធំ ឱ្យទៅមនុស្សដែលមានវ័យក្មេងជាង។ សម្រាប់កូនៗ ឬចៅៗ ដែលទទួលបានអាំងប៉ាវពីសាច់ញាតិចាស់ទុំ ពួកគេត្រូវនិយាយពាក្យជូនពរទៅកាន់ចាស់ទុំថា “សូមឱ្យឆ្នាំថ្មីសម្រេចបាននូវរាល់បំណងប្រាថ្នារបស់អ្នក និងមានភាពចម្រុងចម្រើន”។

៣.ស្លៀកសម្លៀកបំពាក់ថ្មីៗ៖ ការស្លៀកសម្លៀកបំពាក់ថ្មីៗ ដែលមានពណ៌ភ្លឺចែងចាំង ជាពិសេសពណ៌ក្រហម នឹងនាំលោកអ្នកឱ្យជួបតែរឿងល្អៗក្នុងជីវិតពេញមួយឆ្នាំ ព្រោះពណ៌ “ក្រហម” មានន័យថា លាភសំណាង និងទ្រព្យសម្បត្តិហូរហៀរ។

៤.ជួបជុំញាតិមិត្តគ្រួសារ៖ កិច្ចការដែលត្រូវធ្វើ និងចាត់ទុកថាមានសារៈសំខាន់បន្ទាប់ គឺការជួបជុំគ្រួសារ ព្រោះថ្ងៃចូលឆ្នាំចិនត្រូវបានគេចាត់ទុកថាជាថ្ងៃសម្រាប់ការជួបជុំបងប្អូនគ្រួសារ ញ៉ាំអាហាររួមតុជាមួយគ្នាជាដើម។

ទោះជាយ៉ាងណា សម្រាប់តំណមដែលអ្នកមិនគួរធ្វើនៅក្នុងថ្ងៃបុណ្យចូលឆ្នាំចិនរួមមាន៖
– ហាមបោសផ្ទះ
-ហាមបោកខោអាវ
-ហាមទិញស្បែកជើងថ្មី
-ហាមមិនឱ្យជេរ ឬវ៉ៃគ្នា
-បំណុលប៉ុន្មាន ត្រូវសងឱ្យអស់
-ហាមធ្វើឱ្យរបស់ណាមួយបែកបាក់
-ហាមកក់ ឬកាត់សក់
-ហាមបរិភោគបបរ
-ហាមប្រើប្រាស់របស់មុតស្រួច
-ហាមស្លៀកសម្លៀកបំពាក់ពណ៌ខ្មៅ
– និងហាមចូលបន្ទប់អ្នកដ៏ទៃ៕