សហរដ្ឋអាមេរិក៖ នេះជាលើកទីពីរហើយ ដែលភ្លើងបានរីករាលដាលយ៉ាងឆាប់រហ័សលើផ្ទៃដី ៣២ គីឡូម៉ែត្រការ៉េ ដោយបង្ខំឱ្យមនុស្សរាប់ម៉ឺននាក់ត្រូវជម្លៀសចេញជាបន្ទាន់។
យោងតាមកាសែត CBS News អគ្គីភ័យដែលមានឈ្មោះថា Hughes បានឆាបឆេះនៅម៉ោងប្រហែល ១០:៤២ នាទីព្រឹកនាថ្ងៃទី ២២ ខែមករា ឆ្នាំ២០២៥ នៅតំបន់ផ្លូវ Lake Hughes ក្បែរបឹង Castaic ចម្ងាយប្រហែល ៨០ គីឡូម៉ែត្រពីទីប្រជុំជន Los Angeles នៃរដ្ឋ California សហរដ្ឋអាមេរិក។

ភ្លើងឆេះយ៉ាងសន្ធោសន្ធៅនេះបានឆាបឆេះតំបន់ភ្នំក្បែរបឹង Castaic ដោយរាលដាលយ៉ាងឆាប់រហ័ស និងគ្របដណ្តប់លើផ្ទៃដីជាង ៣,២០០ ហិកតាក្នុងរយៈពេលពីរបីម៉ោងប៉ុណ្ណោះ។ ភ្លើងកាន់តែពិបាកគ្រប់គ្រង ដោយសារតំបន់នេះរងផលប៉ះពាល់ដោយសារខ្យល់ខ្លាំងនៅ Santa Ana និងអាកាសធាតុស្ងួត។ បច្ចុប្បន្នភ្លើងមិនទាន់រលត់ទេ ដោយវានៅតែបន្តឆាប់ឆេះឥតឈប់ឈរ និងរាលដាលជាច្រើនកន្លែង។

លោក Robert Luna មេបញ្ជាការខោនធី Los Angeles បាននិយាយថា មនុស្ស ៣១,០០០ នាក់បានជម្លៀសចេញភ្លាមៗ ខណៈមនុស្ស ២៥,០០០ នាក់ទៀតកំពុងស្ថិតនៅក្រោមការព្រមានអំពីការជម្លៀស។ យោងតាមទីភ្នាក់ងារសារព័ត៌មាន Reuters បានឱ្យដឹងទៀតថា ភាគខាងត្បូងនៃរដ្ឋកាលីហ្វ័រញ៉ាគឺមិនមានភ្លៀងធ្លាក់អស់រយៈពេល ៩ ខែហើយ ជាហេតុធ្វើឱ្យអាកាសធាតុនៅទីនេះស្ងួតខ្លាំង។ ទោះជាយ៉ាងណាយោងតាមការព្យាករណ៍ ចាប់ពីថ្ងៃទី ២៥ ដល់ថ្ងៃទី ២៧ ខែមករានេះ តំបន់ភាគខាងត្បូងនៃរដ្ឋកាលីហ្វ័រញ៉ាទំនងនឹងមានភ្លៀងធ្លាក់ដែលនឹងធ្វើឱ្យស្ថានភាពប្រសើឡើងវិញ។

គួរបញ្ជាក់ដែរថា ចាប់តាំងពីមានហេតុការណ៍ភ្លើងឆេះព្រៃកាលពីថ្ងៃទី៧ ខែមករាមក តំបន់ភាគខាងត្បូងនៃរដ្ឋកាលីហ្វ័រញ៉ា ជាពិសេសទីក្រុង Los Angeles គឺបានសម្លាប់មនុស្ស ២៨ នាក់ហើយ ក៏ដូចជាបំផ្លាញសំណង់ជិត ១៦,០០០ រួមទាំងបង្កឱ្យមានការខូចខាត និងការខាតបង់សេដ្ឋកិច្ចចំនួនជាង ២៥០ ពាន់លានដុល្លារអាមេរិក នេះបើយោងតាមការប៉ាន់ប្រមាណរបស់អ្នកព្យាករណ៍ឯកជន AccuWeather៕

សហរដ្ឋអាមេរិក ៖ ប្រធានាធិបតីអាមេរិក លោក Donald Trump បានអំពាវនាវឱ្យប្រធានាធិបតីរុស្ស៊ី លោក Vladimir Putin បញ្ចប់សង្គ្រា.ម នៅប្រទេសអ៊ុយក្រែនជាបន្ទាន់ បើមិនដូច្នោះទេ ប្រទេសរុស្ស៊ីនឹងប្រឈមជាមួយការដំឡើងពន្ធទំនិញខ្ពស់ និងការដាក់ទណ្ឌ.កម្ម សេដ្ឋកិច្ចជាថ្មី ។
កាលពីថ្ងៃទី២២ ខែមករា ឆ្នាំ២០២៥ សារព័ត៌មាន CNBC រាយការណ៍ថា លោក Trump ប្រធានាធិបតីអាមេរិក គ្រោងដំឡើងពន្ធទំនិញនាំចូលពីរុស្ស៊ីខ្ពស់ និងដាក់ទណ្ឌកម្មសេដ្ឋកិច្ចរុស្ស៊ីបន្ថែមទៀត បើរដ្ឋាភិបាលក្រុងមូស្គូ ពុំអាចឈានដល់កិច្ចព្រមព្រៀងបញ្ចប់សង្គ្រាមនៅអ៊ុយក្រែន ដែលអូសបន្លាយអស់រយៈពេលជិត៣ឆ្នាំ ។

លោក Trump បាននិយាយបែបនេះក្នុងបណ្តាញសង្គម Truth Social កាលពីថ្ងៃទី២២ ខែមករា កន្លងមក ដែលជាថ្ងៃទី៣ នៃការឡើងកាន់តំណែងជាប្រធានាធិបតីអាមេរិក អាណត្តិទី២ របស់លោក ។ លោកថ្លែងថា ៖ «ខ្ញុំពុំបានរកផ្លូវបំផ្លាញរុស្ស៊ីទេ ខ្ញុំស្រឡាញ់ពលរដ្ឋរុស្ស៊ី ហើយខ្ញុំមានទំនាក់ទំនងល្អជាមួយលោកប្រធានាធិបតី Putin ។ បើទោះជាមានរឿងរ៉ាវពីក្រុមឆ្វេងនិយម, ព័ត៌មានក្លែងក្លាយពីរុស្ស៊ី ប៉ុន្តែយើងកុំភ្លេចថា រុស្ស៊ីធ្លាប់ជួយយើងឱ្យឈ្នះសង្គ្រាមលោក លើកទី២ ដែលមានមនុស្សស្លាប់ជិត៦០លាននាក់» ។

ខ្ញុំនឹងជួយរុស្ស៊ី ដែលសេដ្ឋកិច្ចកំពុងធ្លាក់ចុះ និងជួយប្រធានាធិបតីរុស្ស៊ីឱ្យសម្រេចចិត្តឥឡូវនេះ គឺបញ្ចប់សង្គ្រាមឆ្កួតៗនេះទៅ ពីព្រោះសង្គ្រាមកាន់តែធ្វើឱ្យអ្វីៗអាក្រក់ខ្លាំងឡើង ។ បើពុំធ្វើកិច្ចព្រមព្រៀង មិនយូរទេ ខ្ញុំនឹងគ្មានជម្រើសផ្សេងក្រៅពីដំឡើងពន្ធទំនិញរុស្ស៊ីខ្ពស់ និងដាក់ទណ្ឌកម្មសេដ្ឋកិច្ចគ្រប់ផ្នែកទាំងអស់ដែលរុស្ស៊ីលក់ឱ្យអាមេរិក និងប្រទេសពាក់ព័ន្ធផ្សេងៗ ។

សូមបញ្ចប់សង្គ្រាមនេះ សង្គ្រាមនឹងបញ្ចប់ពេលខ្ញុំធ្វើជាប្រធានាធិបតីអាមេរិក ហើយយើងអាចធ្វើតាមវិធីងាយ និងលំបាក ប៉ុន្តែវិធីងាយ គឺល្អជាងវិធីលំបាក ។ វាដល់ពេលធ្វើកិច្ចព្រមព្រៀងបញ្ចប់សង្គ្រាម ហើយពុំគួរមានមនុស្សស្លាប់ច្រើនជាងនេះទេ ។ នេះបើតាមការសរសេរក្នុងបណ្តាញសង្គមរបស់លោក Trump ។

ពេលរកសំឡេងឆ្នោតកន្លងមក លោក Trump និយាយជានិច្ចថា លោកអាចបញ្ចប់សង្គ្រាមនៅប្រទេសអ៊ុយក្រែន ត្រឹមតែ១ថ្ងៃប៉ុណ្ណោះ ប្រសិនបើលោកឈ្នះឆ្នោតក្លាយជាប្រធាធិបតីអាមេរិក អាណត្តិទី២ ។ ភាគីជាច្រើនទន្ទឹងរង់ចាំមើលថា តើលោក Trump នឹងអាចធ្វើតាមការសន្យារបស់ខ្លួនដែរឬទេ?

ប្រទេសឥណ្ឌា៖ ក្នុងរយៈពេលមួយខែកន្លងមកនេះ នៅភូមិ Jammu និង Kashmir នៃស្រុក Rajouri របស់ប្រទេសឥណ្ឌាគឺមានអ្នកស្លា.ប់ជាប់ៗគ្នាចំនួន ១៧ នាក់ហើយដែលទំនងស្លា.ប់ដោយសារការឆ្លងជំងឺចម្លែកមួយ។

យោងតាមកាសែត The Times of India បានរាយការណ៍ថា ចាប់តាំងពីថ្ងៃទី ៧ ខែធ្នូ ឆ្នាំ២០២៤ រហូតដល់ថ្ងៃទី១៩ ខែមករា ឆ្នាំ២០២៥ គឺមានពលរដ្ឋស្លា.ប់ជាបន្តបន្ទាប់ក្នុងភូមិតែមួយ ដោយមានទាំងកុមារ មនុស្សចាស់ និងមនុស្សពេញវ័យ។

យោងតាមសារព័ត៌មាននេះ មនុស្សដែលស្លា.ប់គឺសុទ្ធតែមានអាការៈដូចៗគ្នាទាំងអស់រួមមានគ្រុនក្តៅ ឈឺចាប់ ចង្អោរ និងបាត់បង់ស្មារតី។ បច្ចុប្បន្នអាជ្ញាធរកំពុងស៊ើបអង្កេតបន្ទាប់ពីមនុស្ស ១៧ នាក់បានស្លា.ប់យ៉ាងអាថ៌កំបាំង ដោយមិនទាន់ដឹងថាពួកគេកំពុងឆ្លងជំងឺអ្វីនោះទេ ដូច្នេះជំងឺចម្លែកនេះកំពុងស្ថិតក្នុងការស៊ើបអង្កេតនៅឡើយ មិនទាន់មានការបញ្ជាក់ថាជាជំងឺអ្វីមួយពិតប្រាកដនោះឡើយ។

ទោះជាយ៉ាងណារដ្ឋមន្ត្រីក្រសួងសុខាភិបាលសហភាពលោក Amit Shah បានឱ្យដឹងថា ជំងឺចម្លែកនេះទំនងកើតឡើងដោយសារបញ្ហាទឹកកខ្វក់ និងថ្នាំសម្លាប់សត្វល្អិតលាយឡំគ្នា។ លោក Mohammad Aslam បានផ្តល់បទសម្ភាសជាមួយសារព័ត៌មានបរទេសថា ក្នុងរយៈពេលមួយខែនេះ លោកបានបាត់បង់សមាជិកគ្រួសារដល់ទៅ ៣ នាក់ រួមមានកូនប្រុសម្នាក់អាយុ ១៦ ឆ្នាំ និងពូមីងរបស់លោក ដែលពួកគេសុទ្ធតែស្លាប់ដោយសារជំងឺដ៏អាថ៌កំបាំងនេះ។

អ្នកស្លាប់សុទ្ធតែមានសភាពធ្ងន់ធ្ងរខ្លាំងមុនពេលចូលមន្ទីរពេទ្យ។ គួរបញ្ជាក់ដែរថា ចាប់តាំងពីថ្ងៃទី ៧ ខែធ្នូ ឆ្នាំ២០២៤ រហូតមកដល់ពេលនេះ ជំងឺដ៏អាថ៌កំបាំងនេះបានប៉ះពាល់ដល់មនុស្សយ៉ាងហោចណាស់ ៣៨ នាក់ និងបានសម្លាប់មនុស្ស ១៧ នាក់នៅក្នុងភូមិJammu និង Kashmir នៃស្រុក Rajouri របស់ប្រទេសឥណ្ឌា៕

ប្រទេសកូរ៉េខាងត្បូង ៖ ជាទូទៅ ភោជនីយដ្ឋាននានានៅប្រទេសកូរ៉េខាងត្បូង តែងតែដាក់អាហារក្នុងថាសធំៗសម្រាប់អតិថិជនច្រើននាក់ ហើយបើអ្នកណាទៅបរិភោគអាហារម្នាក់ឯងក្នុងភោជនីយដ្ឋានទាំងនេះ ពិតជាពុំអាចបរិភោគអស់ទេ បើទោះជាអាហារមានរសជាតិឆ្ងាញ់យ៉ាងណាក្តី ដោយសារបរិមាណអាហារច្រើនពេក ។

បច្ចុប្បន្ន យុវវ័យកូរ៉េខាងត្បូងរស់នៅម្នាក់ឯងកាន់តែច្រើន ហើយពួកគេបានផ្លាស់ប្តូរទម្លាប់រស់នៅតាមពាក្យ១ឃ្លាថា «ជីវិតមានតែម្តងទេ ត្រូវតែប្រើប្រាស់ឱ្យមានប្រយោជន៍បំផុត» (You Only Need One ឬ YONO) ។ ពាក្យនេះបានធ្វើឱ្យយុវវ័យកូរ៉េខាងត្បូងផ្លាស់ប្តូរពីទម្លាប់ចាយប្រាក់ខ្ជះខ្ជាយ ឬរស់នៅសប្បាយភ្លើតភ្លើន ទៅជាការរស់នៅដោយសន្សំសំចៃប្រាក់ និងទិញតែសម្ភារៈប្រើប្រាស់ចាំបាច់ប៉ុណ្ណោះ ព្រមទាំងកាត់បន្ថយការបរិភោគអាហារក្រៅផ្ទះជាមួយមិត្តភក្តិ ។

ការផ្លាស់ប្តូរទម្លាប់ការរស់នៅនេះកើតឡើងក្រោយពីការចំណាយប្រចាំថ្ងៃកើនឡើងខ្ពស់ ដូចជា ៖ ការស្នាក់នៅ និងអាហារឡើងថ្លៃ ជាពិសេស ការបរិភោគអាហារៅក្រៅផ្ទះ ។ ដូច្នេះ វាធ្វើឱ្យភោជនីយដ្ឋានកូរ៉េខាងត្បូងជាច្រើនកន្លែងកាត់បន្ថយអាហារក្នុងចានតាមពាក្យថា YONO ដែលយុវវ័យពេញនិយមអនុវត្តតាម ។

អតិផរណា និងប្រាក់ចំណូលធ្លាក់ចុះ ក៏ជាកត្តាជំរុញឱ្យយុវវ័យកូរ៉េខាងត្បូងសន្សំសំចៃប្រាក់ខ្លាំងផងដែរ ។ ភោជនីយដ្ឋានដែលធ្លាប់តែជាកន្លែងពេញនិយមសម្រាប់ការបរិភោគអាហារ ឬផឹកស៊ីរបស់ក្រុមយុវវ័យក្រោយចេញពីធ្វើការ បានកាត់បន្ថយអាហារក្នុងចាន និងបញ្ចុះតម្លៃ ដោយសារយុវវ័យជាច្រើនឈប់បរិភោគអាហារជាមួយមិត្តភក្តិដូចមុន គឺពួកគេបរិភោគអាហារក្នុងភោជនីយដ្ឋានម្នាក់ឯង ។ ម្យ៉ាងទៀត ការពេញនិយមបរិភោគអាហារម្នាក់ឯង ដោយសារចំនួនពលរដ្ឋកូរ៉េខាងត្បូងរស់នៅម្នាក់ឯងកើនឡើងជារៀងរាល់ឆ្នាំ ។

ហាងសាច់មាន់បំពង Kyochon F&B បានបង្ហាញអាហារថ្មីសម្រាប់អតិថិជនបរិភោគម្នាក់ឯង ដោយការកាត់បន្ថយបរិមាណអាហារ និងបញ្ចុះតម្លៃពាក់កណ្តាល ហាងនេះបញ្ជាក់ថា អាហារថ្មីសម្រាប់អតិថិជនតែម្នាក់ និងចង់បានអាហារចានតូចល្មម ។ រីឯហាងសាច់មាន់បំពងផ្សេងទៀត ក៏បានបញ្ចុះតម្លៃអាហារដែរ សម្រាប់អតិថិជនចូលហាងតែម្នាក់ ដូចជា ៖ ហាង Genesis BBQ និង Dining Brands Group ។ ដូចគ្នានេះ ហាងភីសា ចំនួន៣កន្លែង បានលក់ភីសាខ្នាតតូច និងបញ្ចុះតម្លៃសម្រាប់អតិថិជនបរិភោគតែម្នាក់ ៕

ប្រទេសអង់គ្លេស ៖ បច្ចុប្បន្ន ស្ថាប័នអប់រំជាច្រើនបានហាមឃាត់ការប្រើប្រាស់បច្ចេកវិទ្យា AI ជួយធ្វើកិច្ចការសាលា ពីព្រោះបារម្ភពីការសិក្សារបស់សិស្ស-និស្សិតធ្លាក់ចុះ ឬពុំប្រឹងប្រែងរៀនសូត្រ ប៉ុន្តែរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាអង់គ្លេស បែរជាយល់ផ្ទុយពីនេះ និងជំរុញឱ្យកូនសិស្សរៀនសូត្រពីបច្ចេកវិទ្យាទំនើប ។

កម្មវិធី ChatGPT គឺដូចគ្នានឹងម៉ាស៊ីនគិតលេខដែរ យើងអាចបញ្ចូលវាទៅក្នុងកម្មវិធីសិក្សារបស់កូនសិស្ស ។ យើងត្រូវប្រាកដចិត្តថា ក្មេងៗនឹងបានរៀនសូត្រអំពីវិធីប្រើប្រាស់បច្ចេកវិទ្យាទំនើប ។ នេះជាការលើកឡើងរបស់លោក Peter Kyle រដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាអង់គ្លេសទៅកាន់សារព័ត៌មាន BBC ដែលសួរថា តើក្មេងៗគួរតែប្រើប្រាស់ ChatGPT ជួយធ្វើកិច្ចការសាលាដែរឬទេ?

លោករដ្ឋមន្ត្រីបន្តថា ៖ «ខ្ញុំនៅចាំពីបញ្ហាការប្រើប្រាស់ម៉ាស៊ីនគិតលេខកន្លងមក ប៉ុន្តែបច្ចុប្បន្ន បច្ចេកវិទ្យា AI ត្រូវបានប្រើប្រាស់ក្នុងសេដ្ឋកិច្ចទូទាំងប្រទេស ។ ហេតុនេះ យើងគួររៀនសូត្រពីការប្រើប្រាស់បច្ចេកវិទ្យានេះចាប់ពីពេលបច្ចុប្បន្ន ហើយការប្រើប្រាស់ ChatGPT អាចជំរុញឱ្យក្មេងៗចាប់អារម្មណ៍នឹងការរៀនសូត្រខ្លាំងឡើង ពីព្រោះវាអាចដោះស្រាយបញ្ហាមួយចំនួនដែលពិបាករកចម្លើយ ។ បើ AI មានការទទួលស្គាល់ជាផ្លូវការ បច្ចេកវិទ្យានេះនឹងជួយបង្កើនតម្លៃសេដ្ឋកិច្ចរាប់លានដុល្លារអាមេរិក» ។

បើទោះជារដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាជំរុញឱ្យប្រើប្រាស់បច្ចេកវិទ្យា AI ឬកម្មវិធី ChatGPT ក្នុងការសិក្សារបស់សិស្ស ព្រមទាំងមានគម្រោងដំណើរការបច្ចេកវិទ្យាទំនើបនាពេលឆាប់ៗនេះ ប៉ុន្តែស្ថាប័នអប់រំល្បីៗនៅប្រទេសអង់គ្លេស ដូចជា ៖ សាកលវិទ្យាល័យ Oxford, សាកលវិទ្យាល័យ Cambridge និងវិទ្យាល័យ Imperial College London បានហាមឃាត់សិស្ស-និស្សិតប្រើប្រាស់បច្ចេកវិទ្យាជួយធ្វើកិច្ចការសាលាដាច់ខាត ។

ចំណែកនាយកដ្ឋានអប់រំទីក្រុងញូវយ៉ក ក៏បានហាមឃាត់ការប្រើប្រាស់បច្ចេកវិទ្យា AI ក្នុងសាលារៀនរដ្ឋដូចគ្នាដែរ ប៉ុន្តែក្រោយមក ស្ថាប័នអប់រំនេះ ក៏បានយកបច្ចេកវិទ្យា AI មកប្រើប្រាស់ក្នុងកម្មវិធីសិក្សារបស់សិស្ស ៕

សហរដ្ឋអាមេរិក៖ ស្ថិតក្នុងវ័យ ១៨ ឆ្នាំ Barron Trump បច្ចុប្បន្នកំពុងទាក់ទាញការចាប់អារម្មណ៍ពីមហាជនយ៉ាងខ្លាំង នៅពេលដែលលោកបានបង្កើតក្រុមហ៊ុនផ្ទាល់ខ្លួនមួយ ហើយកាន់កាប់ដោយខ្លួនឯងតែម្តង។
នេះបើយោងតាមការចុះផ្សាយរបស់សារព័ត៌មានបរទេស Newsweek បានឱ្យដឹងថា Barron Trump ដែលជាកូនប្រុសពៅរបស់ប្រធានាធីបតីអាមេរិក Donald Trump បានបង្កើតក្រុមហ៊ុនផ្ទាល់ខ្លួនមួយដែលមានឈ្មោះថា Trump, Fulcher & Roxburgh Capital Inc. នៅរដ្ឋ Wyoming សហរដ្ឋអាមេរិក។

ក្រុមហ៊ុននេះត្រូវបានគេស្គាល់ថាជាក្រុមហ៊ុនអចលនទ្រព្យផ្តោតលើគម្រោងអចលនទ្រព្យកម្រិតខ្ពស់ និងជាក្រុមហ៊ុនដំបូងគេដែលកូនប្រុសពៅត្រាំបានបង្កើតផងដែរ។ គម្រោងនេះអាចជាសញ្ញាមួយបញ្ជាក់ថា Barron កំពុងដើរតាមគន្លងរបស់បងប្រុសរបស់លោកគឺ Don Jr និង Eric Jr។ អ្នកទាំងពីរបានដំណើរការអាណាចក្រអាជីវកម្មគ្រួសារ Trump និងអង្គការ Trump ចាប់តាំងពីឪពុករបស់ពួកគេចូលកាន់តំណែងដំបូង។ ទន្ទឹមនឹងនេះកូនស្រី Trump គឺ Ivanka ក៏បានបម្រើការនៅក្នុងរដ្ឋបាលរបស់ឪពុកនាងមុនពេលផ្លាស់ទៅការងារផ្សេងទៀតផងដែរ។

ដូច្នេះ Barron គឺជាចំណែកមួយនៃមរតករបស់ Trump ដែលសព្វថ្ងៃលោកកំពុងគ្រប់គ្រងវា។ Barron Trump មិនត្រឹមតែជាបុរសសង្ហា និងមានសមត្ថភាពខ្លាំងពូកែប៉ុណ្ណោះទេ លោកក៏ជាបុរសជោគជ័យម្នាក់ដែលពូកែទំនាក់ទំនងផងដែរ។ បច្ចុប្បន្នកូនពៅត្រាំ ត្រូវបានមហាជនជាច្រើនកោតសរសើរមិនដាច់ពីមាត់ ពីសមត្ថភាពដ៏អស្ចារ្យរបស់លោក ទោះបីមានវ័យក្មេងក៏ដោយ តែលោកមានភាពជាអ្នកដឹងនាំពេញលេញតែម្តង។

លើសពីនេះ Barron Trump ក៏ជាចំណែកមួយជួយឱ្យឪពុករបស់ខ្លួនឈ្នះការបោះឆ្នោតផងដែរ។ Melania Trump ដែលជាស្ត្រីទីមួយរបស់អាមេរិកបានប្រាប់ Fox News ថាកូនប្រុសរបស់នាងបានប្រឹក្សាជាមួយឪពុករបស់ខ្លួនអំពីទំនាក់ទំនងសំខាន់ៗ ដោយបង្ហាញថា Barron ពិតជាមានប្រជាប្រិយភាព និងទាក់ទាញមនុស្សវ័យក្មេងជាច្រើន។ ទីប្រឹក្សាកំពូលរបស់លោក Trump គឺលោក Jason Miller ក៏បានកោតសរសើរចំពោះការរួមចំណែករបស់ Barron ផងដែរ៕

សហរដ្ឋអាមេរិក ៖ អ្នកស្រឡាញ់ភេ.ទ ដូចគ្នានៅអាមេរិកបារម្ភពីការបាត់បង់សិទ្ធិរៀបអាពាហ៍ពិពាហ៍ភេ.ទ ដូចគ្នា ក្រោយពីប្រធានាធិបតីអាមេរិកថ្មី លោក Donald Trump បានចុះហត្ថលេខាលើឯកសារទទួលស្គាល់តែ២ភេ.ទ ប៉ុណ្ណោះ គឺប្រុស និងស្រី ។ លើសពីនេះ លោកបានលុបចោលការសរសេរអក្សរ X តំណាងភេ.ទក្នុងឯកសារផ្លូវការ ដែលលោក Joe Biden ប្រធានាធិបតីអាមេរិកចាស់កំណត់ឱ្យប្រើប្រាស់ ។

កាលពីថ្ងៃទី២១ ខែមករា ឆ្នាំ២០២៥ សារព័ត៌មានបរទេសរាយការណ៍ថា ក្រោយការឡើងកាន់តំណែងជាប្រធានាធិបតីអាមេរិកភ្លាម លោក Trump បានលុបចោលបទបញ្ជាប្រតិបត្តិរបស់លោក Biden រួមទាំងលុបចោលបទបញ្ជាជាង១០ច្បាប់ទៀត ដែលគាំទ្រភាពចម្រុះផ្លូវភេទ និងប្រឆាំងការរើសអើសភេទ ដែលអាមេរិកអនុវត្តតាំងពីឆ្នាំ២០២២ ។

លោក Trump បានចុះហត្ថលេខាលើបទបញ្ជាពិសេស ដែលនឹងមានផលប៉ះពាល់ដល់ការបញ្ជាក់ភេទក្នុងឯកសារផ្លូវការរបស់អាមេរិក ដោយបទបញ្ជាពិសេសនេះកំណត់ឱ្យអាជ្ញាធរទទួលស្គាល់តែ២ភេទប៉ុណ្ណោះ គឺប្រុស និងស្រី ។ លោកក៏បានលុបចោលការប្រើអក្សរ X របស់រដ្ឋាភិបាលលោក Biden ដែលអនុញ្ញាតឱ្យពលរដ្ឋអាចបញ្ជាក់ភេទពិតរបស់ខ្លួន ពុំចាំបាច់ដូចក្នុងឯកសារសំខាន់ រួមមាន ៖ លិខិតឆ្លងដែន, ទិដ្ឋាការ និងកាត Global Entry ។

នេះជាការលុបចោលបទបញ្ជាប្រតិបត្តិរបស់អាមេរិក ដែលគាំទ្រភាពចម្រុះផ្លូវភេទក្នុងអាណត្តិរបស់លោក Biden ព្រមទាំងទប់ស្កាត់ការចំណាយប្រាក់របស់រដ្ឋាភិបាលលើការលើកកម្ពស់ភាពចម្រុះផ្លូវភេទ ។ លោកថ្លែងថា ៖ «យើងនឹងកសាងសង្គមមួយមិនខ្វល់ពីជាតិសាសន៍ ប៉ុន្តែនឹងផ្តោតលើគុណសម្បត្តិ ។ ចាប់ពីថ្ងៃនេះតទៅ (ថ្ងៃលោកឡើងកាន់តំណែង) រដ្ឋាភិបាលនឹងបង្កើតគោលនយោបាយផ្លូវការទទួលស្គាល់តែ២ភេទប៉ុណ្ណោះ គឺប្រុស និងស្រី» ។

ពលរដ្ឋអាមេរិកដែលស្រឡាញ់ភេទដូចគ្នាជាច្រើនគូបានប្រញាប់ចុះសំបុត្រអាពាហ៍ពិពាហ៍ មុនពេលរដ្ឋាភិបាលស្ថិតក្រោមការដឹកនាំរបស់លោក Trump អនុវត្តតាមឯកសារទទួលស្គាល់តែ២ភេទ ។ នៅរដ្ឋជាច្រើនរបស់អាមេរិកបានរៀបចំពិធីអាពាហ៍ពិពាហ៍ឱ្យគូស្នេហ៍ស្រឡាញ់ភេទដូចគ្នាពុំគិតថ្លៃ ដើម្បីជួយឱ្យពួកគេអាចចុះសំបុត្រអាពាហ៍ពិពាហ៍មុនការផ្លាស់ប្តូរគោលនយោបាយ ។

បើទោះជាបច្ចុប្បន្ន អាមេរិកពុំទាន់លុបចោលអាពាហ៍ពិពាហ៍ភេទដូចគ្នា ប៉ុន្តែអ្នកជំនាញច្បាប់និយាយថា ហានិភ័យផ្នែកច្បាប់នៅតែមាន ជាពិសេស មន្ត្រីតុលាការកំពូលមួយចំនួនមានឆន្ទៈផ្ទុយគ្នាពាក់ព័ន្ធនឹងសិទ្ធិនេះ ៕

ប្រទេសជប៉ុន ៖ គណៈកម្មការស្រាវជ្រាវគ្រោះរញ្ជួយដីជប៉ុនអះអាងថា រយៈពេល៣០ឆ្នាំទៀត ជប៉ុននឹងកើតគ្រោះរញ្ជួយដីយ៉ាងធ្ងន់ធ្ងរ ហើយវានឹងធ្វើឱ្យកើតរលកយក្សស៊ូណាមិ ឆក់យកជីវិ.តមនុស្សរាប់សែននាក់ ព្រមទាំងខូចខាតទ្រព្យសម្បត្តិយ៉ាងច្រើនមហាសាល ស្មើទឹកប្រាក់រាប់លានដុល្លារអាមេរិក ។ រញ្ជួយដីនេះកើតឡើងដោយសារការធ្វើចលនានៃសំបកផែនដីនៅត្រង់រណ្តៅជ្រៅបាតសមុទ្រណាន់កៃ ដែលមានប្រវែង៨០០ម៉ែត្រ រត់ស្របនឹងឆ្នេរសមុទ្រប៉ាស៊ីហ្វិកជប៉ុន ។

ភ្នាក់ងារស្រាវជ្រាវពីគ្រោះរញ្ជួយដីរបស់រដ្ឋាភិបាលជប៉ុនឱ្យដឹងថា រយៈពេល១,៤០០ឆ្នាំកន្លងមក មានរញ្ជួយដីកើតឡើងក្នុងរណ្តៅជ្រៅបាតសមុទ្រណាន់កៃ ចាប់ពី១០០ឆ្នាំ ទៅ២០០ឆ្នាំម្តង ។ រញ្ជួយដីធ្ងន់ធ្ងរលើកចុងក្រោយបានកើតឡើងកាលពីឆ្នាំ១៩៤៦ ហើយការខូចខាតដោយសាររញ្ជួយដីបានកើនឡើង១% ជារៀងរាល់ឆ្នាំ ។

រដ្ឋាភិបាលជប៉ុនបានព្យាករណ៍កាលពីឆ្នាំ២០១២ ថា បើកើតគ្រោះរញ្ជួយដីធ្ងន់ធ្ងរ (Megaquake) វានឹងធ្វើឱ្យមានរលកស៊ូណាមិ កម្ពស់ជាង៣០ម៉ែត្រនៅកោះតូចៗតាមឆ្នេរសមុទ្រ ។ រីឯកោះហនឈូ និងឈិកូគុ ដែលមានមនុស្សរស់នៅច្រើន នឹងត្រូវរលកយក្សស៊ូណាមិ វាយលុកត្រឹមមួយប៉ប្រិចភ្នែក ។

ភ្នាក់ងារឧតុនិយមជប៉ុនបានប្រកាសអាសន្នពីរញ្ជួយដីយ៉ាងធ្ងន់ធ្ងរលើកដំបូង កាលពីខែសីហា ឆ្នាំ២០២៤ ក្រោយពីមានរញ្ជួយដី និងរលកស៊ូណាមិ កើតឡើងនៅតំបន់ថូហូគុ នៅឆ្នាំ២០១១ ។ ភ្នាក់ងារឧតុនិយមសន្និដ្ឋានថា នឹងកើតរញ្ជួយដីក្នុងរណ្តៅជ្រៅបាតសមុទ្រណាន់កៃ ក្រោយមានរញ្ជួយដីស្មើនឹង៧.‌១រិចទ័រ បណ្តាលឱ្យមនុស្សរបួស១៥នាក់ ។ ពេលនោះ ពលរដ្ឋជប៉ុនបារម្ភយ៉ាងខ្លាំងនាំគ្នាទិញស្បៀងអាហារ និងសម្ភារៈប្រើប្រាស់ចាំបាច់ទុក ។

កាលពីឆ្នាំ១៧០៧ ផ្នែកទាំងមូលនៃរណ្តៅជ្រៅបាតសមុទ្រណាន់កៃ បានប្រេះធ្វើឱ្យកើតរញ្ជួយដីយ៉ាងធ្ងន់ធ្ងរ ហើយពេលនោះ វាធ្វើឱ្យភ្នំភ្លើងហ្វូជិ ផ្ទុះលើកចុងក្រោយ ។ បន្ទាប់មក ក៏មានរញ្ជួយដីធ្ងន់ធ្ងរនៅរណ្តៅជ្រៅបាតសមុទ្រណាន់កៃ ចំនួន២លើក នៅឆ្នាំ១៨៥៤ និង២លើកទៀត នៅឆ្នាំ១៩៤៤ និងឆ្នាំ១៩៤៦ ៕