ប្រទេសថៃ ៖ ចំនួនពលរដ្ឋក្នុងប្រទេសនានាបានធ្លាក់ចុះជាបន្តបន្ទាប់ពីមួយឆ្នាំទៅមួយឆ្នាំ ហើយបញ្ហានេះមិនគ្រាន់តែឆ្លុះបញ្ចាំងពីការផ្លាស់ប្តូរក្នុងគ្រួសារប៉ុណ្ណោះទេ ប៉ុន្តែវាក៏បានប៉ះពាល់ដល់សេដ្ឋកិច្ច សង្គម និងអនាគតរបស់ប្រទេសទាំងនេះផងដែរ ។ តើលោកអ្នកជ្រាបទេថា ប្រទេសណាខ្លះមានអត្រាកំណើតទាបបំផុតលើពិភពលោក ហើយអ្វីជាមូលហេតុធ្វើឱ្យគ្រួសារភាគច្រើនសម្រេចចិត្តមានកូនតិច ឬគ្មានកូន?

Global Statistics បានចាត់ចំណាត់ថ្នាក់ប្រទេសចំនួន១៥ មានអត្រាកំណើតទាបបំផុតលើពិភពលោក ដោយផ្អែកតាមការប្រមូលទិន្នន័យអត្រាកំណើតរបស់ប្រទេសនានា ចាប់ពីឆ្នាំ១៩៥០ ដល់ឆ្នាំ២០២៤ ហើយការចាត់ចំណាត់ថ្នាក់នេះ គឺប្រទេសថៃបានជាប់លំដាប់ទី៣ ។ លទ្ធផលការចាត់ចំណាត់ថ្នាក់ធ្វើឱ្យពលរដ្ឋថៃបារម្ភយ៉ាងខ្លាំង ពីព្រោះបើថៃមានអត្រាកំណើតធ្លាក់ចុះជារៀងរាល់ឆ្នាំ គឺនឹងលែងមានជនជាតិថៃ នាថ្ងៃអនាគត ។

ប្រទេសចំនួន១៥ មានអត្រាកំណើតទាបបំផុតលើពិភពលោក និងជិតផុតពូជ រួមមាន ៖ កូរ៉េខាងត្បូង, ចិន, ថៃ, ជប៉ុន, អ៊ីរ៉ង់, ប្រេស៊ីល, កូឡុំប៊ី, ម៉ិកស៊ិក, ប៉ូឡូញ, តួកគី, រុស្ស៊ី, អារ៉ាប៊ីសាអូឌីត, ម៉ាឡេស៊ី, ម៉ារ៉ុក និងអ៊ុយក្រែន ។

ការចាត់ចំណាត់ថ្នាក់នេះបង្ហាញថា អត្រាកំណើតធ្លាក់ចុះបានកើតឡើងនៅប្រទេសជាច្រើន ជាពិសេស ប្រទេសអភិវឌ្ឍន៍ដែលពលរដ្ឋមានប្រាក់ចំណូលខ្ពស់ និងមធ្យម ។ ស្ត្រីបានរៀនសូត្រខ្ពង់ខ្ពស់, ធ្វើការងារចូលរួមក្នុងសង្គមច្រើន, មានប្រាក់ចំណូលផ្ទាល់ខ្លួន ព្រមទាំងអាចទទួលការថែទាំសុខភាព និងការពន្យារកំណើត ។ បច្ចុប្បន្ន ប្រទេសអភិវឌ្ឍជាច្រើន រួមទាំងថៃ មានអត្រាការស្លាប់ខ្ពស់ជាងអត្រាកំណើត ដែលធ្វើឱ្យចំនួនពលរដ្ឋធ្លាក់ចុះនាថ្ងៃអនាគត ខណៈប្រទេសក្រីក្រនៅតែមានអត្រាកំណើតខ្ពស់ ។

កត្តាធ្វើឱ្យពលរដ្ឋប្រទេសអភិវឌ្ឍន៍ និងថៃមានកូនតិច ឬគ្មានកូន ដោយសារពួកគេមានការចំណាយច្រើនក្នុងជីវិតប្រចាំថ្ងៃ ហើយការចិញ្ចឹមកូនត្រូវការថវិកាច្រើនគ្រប់បែបយ៉ាង ។ លើសពីនេះ ស្ត្រីមានបន្ទុកច្រើនជាងមុន ដូចជា ៖ ធ្វើការរកប្រាក់ ធ្វើការងារផ្ទះ និងថែទាំកូន ៕

សហរដ្ឋអាមេរិក ៖ អ្នកប្រើប្រាស់កម្មវិធី TikTok នៅអាមេរិកអាចដោនឡូតកម្មវិធីនេះនៅលើ App Store និង Play Store ឡើងវិញកាលពីថ្ងៃទី១៣ ខែកុម្ភៈ ឆ្នាំ២០២៥ ក្រោយពីប្រធានាធិបតីអាមេរិក លោក Donald Trump ពន្យារពេលការហាមឃាត់ រហូតដល់ថ្ងៃទី៥ ខែមេសា ខាងមុខ ។ លោក Trump បញ្ជាក់ថា លោកពុំពិន័យប្រាក់ក្រុមហ៊ុនផ្សេងៗនៅអាមេរិកដោយសារការចែកចាយ ឬជួយឱ្យកម្មវិធីវីដេអូខ្លីរបស់ចិនអាចដំណើរការបន្តទៀត ។

កម្មវិធី TikTok ដែលមានអ្នកប្រើប្រាស់នៅអាមេរិក ចំនួន១៧០លាននាក់ បានចាប់ផ្តើមផ្តល់សេវាកម្មឡើងវិញជាបណ្តើរៗនាពេលថ្មីៗនេះ ក្រោយពីកម្មវិធី TikTok ចេញផ្ទាំងខ្មៅបណ្តោះអាសន្ន ដោយសារច្បាប់អាមេរិកហាមឃាត់ពលរដ្ឋប្រើប្រាស់កាលពីថ្ងៃទី១៩ ខែមករា កន្លងមក ។ អាមេរិក និងប្រទេសមួយចំនួនបានបិទកម្មវិធីនេះ ព្រោះបារម្ភពីការបញ្ជូនទិន្នន័យអ្នកប្រើប្រាស់ទៅឱ្យរដ្ឋាភិបាលចិន ។

ការចុះហត្ថលេខាលើបទបញ្ជាប្រតិបត្តិរបស់លោក Trump ក្រោយការស្បថឡើងកាន់តំណែងជាប្រធានាធិបតីអាមេរិក នៅថ្ងៃទី២០ ខែមករា កន្លងមក គឺបានពន្យារពេលការហាមឃាត់ TikTok ចំនួន៧៥ថ្ងៃ និងទុកឱកាសឱ្យ ByteDance ជាក្រុមហ៊ុនមេ TikTok អាចផ្តល់សេវាកម្មនៅអាមេរិកបានមួយរយៈទៀត ។

ក្រៅពីនេះ Apple និង Google ដែលជាក្រុមហ៊ុនគ្រប់គ្រង Application Store ឬទីផ្សារឌីជីថល អាចអនុញ្ញាតឱ្យអ្នកប្រើប្រាស់ស្វែងរក, ដោនឡូត និងអាប់ដេត App ផ្សេងៗបាន ហើយក្រុមហ៊ុននឹងពុំប្រឈមមុខជាមួយការពិន័យតាមផ្លូវច្បាប់ណាមួយឡើយ ក្នុងការជួយឱ្យ TikTok ដំណើរការនៅអាមេរិកបន្ត ។

TikTok គឺជាកម្មវិធីពេញនិយមមួយមានចំនួនដោនឡូតច្រើនលំដាប់ទី២ នៅអាមេរិក គឺចំនួនការដោនឡូតកើនឡើងរហូតដល់៥២លានលើក កាលពីឆ្នាំ២០២៤ ក្នុងនោះការដោនឡូតតាមរយៈ App Store ស្មើ៥២% និងការដោនឡូតតាម Play Store ស្មើ៤៨% ។ នេះបើតាមការដកស្រង់ទិន្នន័យរបស់ Sensor Tower ៕

ប្រទេសអង់គ្លេស ៖ ក្រុមហ៊ុនអង់គ្លេសឈ្មោះ Better Dairy បានចាប់ផ្តើមផលិតឈីស និងយ៉ាអ៊ួប្រភេទថ្មីដោយពុំប្រើប្រាស់ទឺកដោះគោធ្វើជាគ្រឿងផ្សំ ហើយក្រុមហ៊ុននេះបញ្ជាក់ថា ឈីស និងយ៉ាអ៊ូប្រភេទថ្មីនឹងផ្តល់ផលល្អសម្រាប់សុខភាពអ្នកបរិភោគ និងពុំប៉ះពាល់បរិស្ថានដូចការផលិតតាមវិធីចាស់ដែលត្រូវចិញ្ចឹមគោក្នុងកសិដ្ឋានយកទឹកដោះ ។

ឈីសពុំផលិតពីទឹកដោះគោនេះ គឺជាការប្រើប្រាស់បច្ចេកវិទ្យាជាក់លាក់ហៅថា Fermentation ដើម្បីផលិត Casein ដែលជាប្រូតេអ៊ីនដ៏សំខាន់ ។ ក្រុមហ៊ុននឹងប្រើប្រាស់ប្រព័ន្ធការសរសេរកម្មវិធីឱ្យមីក្រូសរីរាង្គ (Microorganism) បង្កើតជាប្រូតេអ៊ីនសម្រាប់ប្រើប្រាស់ជាគ្រឿងផ្សំផលិតឈីសជំនួសទឹកដោះគោ ។

រសជាតិឈីសដែលក្រុមហ៊ុនផលិត គឺមិនខុសគ្នាពីរសជាតិឈីសទូទៅទេ ហើយឈីសនេះថែមទាំងប៉ះពាល់បរិស្ថានតិចជាងការផលិតតាមវិធីចាស់ ពីព្រោះគេពុំចាំបាច់ចិញ្ចឹមគោក្នុងកសិដ្ឋានយកទឹកដោះ និងបញ្ចេញឧស្ម័នមេតានប៉ះពាល់បរិស្ថាន ។ លើសពីនេះ ថែមទាំងកាត់បន្ថយការប្រើប្រាស់ធនធាន ដូចជា ៖ ដី និងទឹកសម្រាប់ចិញ្ចឹមគោ ។

ឧស្ម័នមេតាន គឺជាឧស្ម័នផ្ទះកញ្ចក់ ហើយឧស្ម័នមេតាន៤០% កើតឡើងដោយសារវិស័យកសិកម្ម គឺការចិញ្ចឹមគោ និងការផលិតទឹកដោះគោបានបង្កើតជាឧស្ម័នមេតាន ។ ក្រៅពីនេះ លាមកគោក្នុងកសិដ្ឋាននានា ក៏ជាបញ្ហាចម្បងនាពេលបច្ចុប្បន្នផងដែរ ។ ក្រុមហ៊ុន Better Dairy បានលក់ប្រូតេអ៊ីនទៅឱ្យក្រុមហ៊ុនធំៗដើម្បីផលិតឈីសគ្មានធាតុផ្សំពីសត្វ និងមានគុណភាពល្អ ព្រមទាំងសហការជាមួយក្រុមហ៊ុនផ្សេងៗ ។

ក្រុមហ៊ុនបានកំណត់គោលដៅពង្រីកការផលិតឈីស និងលក់នៅលើទីផ្សារធំៗពិភពលោកនៅឆ្នាំ២០២៨ ដើម្បីឱ្យអតិថិជនបានបរិភោគអាហារល្អសម្រាប់សុខភាព ។ ក្រុមហ៊ុនក៏មានបំណងឱ្យឈីស និងយ៉ាអ៊ួនេះអាចប្រកួតប្រជែងជាមួយផលិតផលចាស់លើទីផ្សារផងដែរ ទាំងផ្នែករសជាតិ និងការរលាយ ។

បច្ចុប្បន្ន ក្រុមហ៊ុនកំពុងបង្កើនសមត្ថភាពផលិត និងសុំលក់ផលិតផលលើទីផ្សារអាមេរិក ។ ការផលិតឈីស និងយ៉ាអ៊ួនេះបានបង្ហាញពីទិសដៅថ្មីនៃឧស្សាហកម្មអាហារផ្តោតលើនិរន្តរភាព ប៉ុន្តែពុំប៉ះពាល់គុណភាពអាហារ ។ បើការផលិតឈីស និងយ៉ាអ៊ូតាមបច្ចេកវិទ្យានេះត្រូវបានទទួលស្គាល់យ៉ាងទូលំទូលាយ វាជាការផ្លាស់ប្តូរដ៏សំខាន់ក្នុងការផលិតឈីស និងទឹកដោះគោលើពិភពលោក ៕

ហ្វីលីពីនជាប្រទេសប្រជុំកោះ ដែលសម្បូរទៅដោយតំបន់ទេសចរណ៍ធម្មជាតិប្លែកៗ និងគួរឱ្យចាប់អារម្មណ៍ជាច្រើនដូចជាឆ្នេរសមុទ្រ កោះ កន្លែងប្រវត្តិសាស្ត្រ ព្រៃឈើ ទិដ្ឋភាពបាតសមុទ្រ ភ្នំភ្លើង និងដីទួលជាដើម។

ប្រទេសហ្វីលីពីនមានទីតាំងនៅចុងភាគខាងកើតនៃទ្វីបអាស៊ី ដែលមានកោះជាង ៧០០០ ភាគច្រើនមានប្រជាជន និងជនជាតិភាគតិចកុលសម្ព័ន្ធរស់នៅ។

នេះបើយោងតាម Lonely Planet ដែលគេហទំព័រទេសចរណ៍បរទេស មានទីស្នាក់ការនៅប្រទេសអូស្ត្រាលី បានណែនាំគោលល្បីៗជាច្រើនជុំវិញពិភពលោក ក្នុងនោះតំបន់ទេសចរណ៍ ៥ កន្លែងខាងក្រោមនេះគឺកំពុងពេញនិយម និងទាក់ទាញខ្លាំងបផុតនៅប្រទេសហ្វីលីពីន៖

១.កោះ Palawan៖ គឺជាកោះមួយដែលមានលក្ខណៈពិសេសជាងកោះនានា ដោយសារឆ្នេរសមុទ្រនៅក្បែរផ្ទាំងថ្មធំៗ និងមានផ្ទះប្រជាជនជាច្រើនរស់នៅទីនោះ។ នៅពេលលោកអ្នកមកដល់កោះ Palawan នឹងបានឃើញវាលខ្សាច់សក្បុស ទឹកសមុទ្រថ្លាឈ្វង់ឆ្លុះដល់បាត ខ្យល់អាកាសត្រជាក់បរិសុទ្ធ ទីធ្លាធំល្វឹងល្វើយ អមដោយបរិយាកាសអ៊ូអរ មានសុខសុវត្ថិភាព បង្កើតបានជាទិដ្ឋភាពដ៏ល្អឥតខ្ចោះមួយដែលមិនអាចបំភ្លេចបាន។

២.ភ្នំភ្លើង Mayon៖ ភ្នំភ្លើងនេះមានកម្ពស់ ២,៤០០ ម៉ែត្រដែលមានរាងកោនស្អាតល្អ ខណៈភ្ញៀវទេសចរទៅលេងទីនោះអាចបោះជុំរុំ ដើរឡើងភ្នំ មើលសត្វបក្សី និងថតរូបទេសភាពខៀវស្រងាត់ អមជាមួយផ្សែងពពកតាមជើងភ្នំយ៉ាងមានក្តីសុខ។ Mayon ជាភ្នំភ្លើងសកម្មជាងគេបំផុតនៅប្រទេសហ្វីលីពីន ដែលបានផ្ទុះ ៤៩ ដងក្នុងរយៈពេលជាង ៤០០ ឆ្នាំកន្លងទៅ។

៣.កោះ Malapascua៖ គឺជាកូនកោះដ៏តូចមួយ និងជាភូមិអ្នកនេសាទដ៏ស្ងប់ស្ងាត់ ហើយក៏ជាកន្លែងមុជទឹកដ៏ពេញនិយមបំផុតសម្រាប់ភ្ញៀវទេសចរដើម្បីមើលត្រីចម្រុះគ្នាផងដែរ។ នៅទីនេះមានឆ្នេរខ្សាច់សស្អាត ទឹកថ្លាដូចកញ្ចក់ចាំងផ្លេកៗ ដើមដូងដុះតម្រៀបគ្នា និងមានសួនផ្កាថ្មចម្រុះពណ៌គ្នាយ៉ាងច្រើន បង្កើតបានទិដ្ឋភាពដ៏គួរឱ្យចាប់អារម្មណ៍ និងទាក់ទាញបំផុត។

៤.ទីក្រុង Tagaytay៖ ទីក្រុងនេះមានភ្នំភ្លើង Taal ដែលបានបន្សល់ទុករណ្ដៅដ៏ធំមួយ និងក្លាយជាទន្លេកណ្ដាលកោះយ៉ាងស្រស់ស្អាត។ ភ្នំភ្លើងកណ្ដាលទន្លេ ត្រូវគេមើលឃើញមានផ្សែងហុយៗ តាមថ្ងៃខ្លះ ដែលបង្កើតភាពទាក់ទាញមួយទៀតសម្រាប់ភ្ញៀវទេសចរ។

៥.វាលស្រែថ្នាក់ៗ Banaue៖ ជាការពិតណាស់ ភ្ញៀវទេសចរដែលចូលទស្សនាប្រទេសហ្វីលីពីន គឺមិនដែលមើលរំលងវាលស្រែនេះនោះទេ ព្រោះវាត្រូវបានគេកាប់គាស់តាមជើងភ្នំអស់រយៈពេលជាង ២០០០ ឆ្នាំមកហើយ គឺជាវាលស្រែបុរាណដែលបន្សល់ទុកមកដល់បច្ចុប្បន្ន៕

ទោះបីជារូបសម្បត្តិរបស់អ្នកមើលទៅស្រស់ស្អាត ឬស្រស់សង្ហាយ៉ាងណាក៏ដោយ ប្រសិនបើអ្នកមានទម្លាប់មួយចំនួននេះ នឹងធ្វើឱ្យអ្នកបាត់បង់ភាពទាក់ទាញយ៉ាងងាយ ក៏ដូចជាមិនសូវមាននរណាម្នាក់ចូលចិត្តអ្នកឡើយ ដោយទម្លាប់អាក្រក់ទាំងនោះរួមមាន៖

១.មិនចេះលេងសើច៖ យោងតាមការសិក្សាឆ្នាំ ២០២១ ដែលបានបោះពុម្ភផ្សាយក្នុងទស្សនាវដ្តី Journal of Positive Psychology បានបង្ហាញថា មនុស្សដែលអសមត្ថភាពក្នុងការលេងសើច គឺអាចបង្កើតភាពតានតឹង និងរំខានដល់អន្តរកម្មសង្គមធម្មជាតិ។ ទម្លាប់នេះក៏អាចបង្ហាញពីភាពរឹងមាំជ្រុលពេក និងកង្វះការកោតសរសើរចំពោះភាពប៉ិនប្រសប់ ជាហេតុបណ្តាលឱ្យអ្នកគ្មានភាពទាក់ទាញ។

២.ប្រកាន់ច្រើន៖ ការប្រកាន់ច្រើនពេកពីកំហុសរបស់នរណាម្នាក់ ធ្វើឱ្យមនុស្សជុំវិញខ្លួនអ្នកមិនសប្បាយចិត្ត ឬមានអារម្មណ៍ថាតានតឹងនៅពេលដែលពួកគេនៅជិតអ្នក។ ដូច្នេះអ្នកនឹងបាត់បង់ភាពទាក់ទាញយ៉ាងងាយ ឬក៏មិនសូវមាននរណាម្នាក់ចូលចិត្តអ្នកជាដើម ដោយសារអាកប្បកិរិយាដ៏តឹងរ៉ឹងហួសហេតុរបស់អ្នក។ ដូច្នេះដើម្បីដោះស្រាយទំនោរនេះ អ្នកគួរបើកចិត្តឱ្យទូលាយ ក៏ដូចជាផ្តល់ការគាំទ្រជាវិជ្ជមាន និងការឆ្លើយតបយ៉ាងក្លៀវក្លាចំពោះព័ត៌មានវិជ្ជមានរបស់ដៃគូ រួមទាំងបង្កើនការពេញចិត្តនៃទំនាក់ទំនងជារួម។

៣.ចូលចិត្តសន្យា៖ មនុស្សដែលចូលចិត្តសន្យាតែមិនធ្វើ ឬធ្វើមិនបាន គឺអាចបំផ្លាញទំនុកចិត្តរបស់មនុស្សជុំវិញខ្លួន បង្កើតបរិយាកាសដ៏អាក្រក់មួយ ធ្វើឱ្យគេខកចិត្ត ក៏ដូចជាបំផ្លាញទំនាក់ទំនងផ្ទាល់ខ្លួន រួមទាំងខ្វះវិជ្ជាជីវៈ។ ដូច្នេះដើម្បីដោះស្រាយទម្លាប់នេះ ជម្រើសដ៏ល្អគឺអ្នកត្រូវនិយាយបដិសេធចំពោះការសន្យាដែលមិនអាចរក្សាបាន ឬមិនអាចធ្វើបាន។ ហេតុនេះហើយ ការធ្វើតាមការប្តេជ្ញាចិត្តរបស់អ្នកជាប្រចាំ នឹងបង្កើនភាពជឿជាក់ ក៏ដូចជាបង្កើនភាពទាក់ទាញរបស់អ្នកផងដែរ៕

នៅលើភពផែនដីយើងនេះ អាងមហាសមុទ្រត្រូវបានបែងចែកចេញជា៥ ខណៈពួកវាមានសីតុណ្ហភាពខុសៗគ្នា ដោយមានខ្លះត្រជាក់ និងខ្លះទៀតក្តៅ។ ដូច្នេះហើយ តើលោកអ្នកដឹងទេថា មហាសមុទ្រណាខ្លះដែលក្តៅជាងគេ និងត្រជាក់ជាងគេនៅលើពិភពលោក? យោងតាមគេហទំព័របរទេស Live Science មហាសមុទ្រដែលក្តៅជាងគេនោះគឺមហាសមុទ្រឥណ្ឌា។

មហាសមុទ្រឥណ្ឌា (Indian Ocean) គឺជាមហាសមុទ្រដែលត្រូវបានគេចាត់ទុកថា ក្តៅបំផុតនៅលើភពផែនដី ដោយសារតែមួយផ្នែកធំរបស់វាស្ថិតនៅក្នុងតំបន់ត្រូពិច ដែលមានសីតុណ្ហភាពជាមធ្យមចន្លោះ ២០ ទៅ ៣០ អង្សាសេ។ ក្រៅពីមហាសមុទ្រឥណ្ឌា មហាសមុទ្រប៉ាស៊ីហ្វិក (Pacific Ocean) ក៏ជាមហាសមុទ្រដែលត្រូវបានគេចាត់ទុកថាក្តៅបំផុតទីពីរនៅលើភពផែនដីផងដែរ។

ដោយសារតែវាស្ថិតនៅតំបន់ក្បែរខ្សែអេក្វាទ័រ ដែលមានកម្រិតសីតុណ្ហភាពឡើងដល់ជាង ៣០ អង្សាសេ។ រីឯមហាសមុទ្រអាត្លង់ទិច (Atlantic Ocean) ដែលគ្របដណ្តប់លើផ្ទៃផែនដីជិត ២០ ភាគរយវិញ ត្រូវបានគេចាត់ទុកថា ជាមហាសមុទ្រក្តៅត្រជាក់ ដោយសារកន្លែងខ្លះស្ថិតក្រោមអាកាសធាតុត្រជាក់ខ្លាំង ដូចជានៅក្បែរតំបន់ប៉ូលជាដើម ខណៈខ្លះទៀតនៅក្បែរខ្សែអេក្វាទ័រ គឺវាមានអាកាសធាតុក្តៅបែបត្រូពិច។

ដូច្នេះសីតុណ្ហភាពជាមធ្យម របស់មហាសមុទ្រអាត្លង់ទិច គឺចន្លោះ ២ ក្រោមសូន្យអង្សាសេ ទៅដល់ ៣០ អង្សាសេ។ ចំណែកមហាសមុទ្រខាងត្បូង (Southern Ocean) ស្ថិតនៅចំណាត់ថ្នាក់ទី៤ នៃមហាសមុទ្រដែលត្រជាក់ជាងគេលើពិភពលោក។ មហាសមុទ្រនេះព័ទ្ធជុំវិញដោយទ្វីបទឹកកកអង់តាក់ទិច នៃប៉ូលខាងត្បូង ដែលមានសីតុណ្ហភាពជាមធ្យមចន្លោះ ២ក្រោមសូន្យអង្សាសេ ទៅដល់ ១០ អង្សាសេ។

ចុងក្រោយមហាសមុទ្រដែលត្រជាក់ជាងគេនៅលើភពផែនដីនោះគឺមហាសមុទ្រអាក់ទិច (Arctic Ocean) ដែលស្ថិតនៅតំបន់ប៉ូលខាងជើង គឺជាមហាសមុទ្រត្រជាក់ជាងគេបង្អស់នៅលើពិភពលោក ហើយក៏ជាមហាសមុទ្រតូចបំផុតផងដែរ ជាមួយទំហំ ១៥,៥៥៨,០០០ គីឡូម៉ែត្រក្រឡា។ មហាសមុទ្រអាក់ទិច មានសីតុណ្ហភាពជាមធ្យមចន្លោះ ១ ទៅ ២ ក្រោមសូន្យអង្សាសេ ដែលនាំឱ្យវាទទួលបានរហស្សនាមថា មហាសមុទ្រទឹកកក៕