សហរដ្ឋអាមេរិក ៖ សារព័ត៌មានបរទេសបានរាយការណ៍កាលពីថ្ងៃទី១៧ ខែកុម្ភៈ ឆ្នាំ២០២៥ ថា ប្រធានាធិបតីអាមេរិក លោក Donald Trump ប្រាប់ឱ្យបណ្តាប្រទេសនៅតំបន់អឺរ៉ុបទិញអាវុ.ធ ពីអាមេរិកទៅជួយអ៊ុយក្រែន ប្រសិនបើអាមេរិកឈប់ផ្តល់ជំនួយយោធាដល់អ៊ុយក្រែន ។ ការលើកឡើងបែបនេះធ្វើឱ្យប្រទេសនានាភ្ញាក់ផ្អើល ខណៈរដ្ឋាភិបាលអាមេរិកត្រៀមចរចាបញ្ចប់សង្គ្រា.ម រវាងរុស្ស៊ី និងអ៊ុយក្រែន ។

បើបណ្តាប្រទេសអឺរ៉ុបទិញអាវុធរបស់អាមេរិក រួចហើយបញ្ជូនទៅឱ្យអ៊ុយក្រែន វានឹងធ្វើឱ្យអ៊ុយក្រែនអាចប្រើប្រាស់អាវុធអាមេរិកគ្រប់ពេលវេលា បើទោះជាអាមេរិកឈប់ផ្តល់ជំនួយយោធាដល់អ៊ុយក្រែនក្តី ខណៈលោក Trump បានព្យាយាមចរចាបញ្ចប់សង្គ្រាមនៅអ៊ុយក្រែនយ៉ាងឆាប់រហ័ស ដែលអូសបន្លាយអស់រយៈពេលជិត៣ឆ្នាំ ។

ប៉ុន្តែគេពុំដឹងច្បាស់ថា តើអាមេរិកនឹងឈប់គាំទ្រអ៊ុយក្រែនឬយ៉ាងណា ខណៈលោក Trump ជំរុញឱ្យបញ្ចប់សង្គ្រាមតាមរយៈកិច្ចព្រមព្រៀង ដែលធ្វើឱ្យរុស្ស៊ីទទួលបានទឹកដីមួយចំនួនរបស់អ៊ុយក្រែនទៅគ្រប់គ្រង ហើយលោកដាក់សម្ពាធបណ្តាប្រទេសអឺរ៉ុបឱ្យការពារជាតិកាន់តែខ្លាំង ព្រមទាំងអ៊ុយក្រែនផងដែរ ។ ក្រៅពីនេះ ប្រទេសនានាសង្ស័យថា តើប្រធានាធិបតីអ៊ុយក្រែន លោក Volodymyr Zelenskyy នឹងបានចូលរួមការចរចារកសន្តិភាពជាមួយរុស្ស៊ីដែរឬទេ?

លោក Trump បាននិយាយមកកាន់សារព័ត៌មាន កាលពីថ្ងៃទី១៦ ខែកុម្ភៈ កន្លងមកថា ប្រធានាធិបតីអ៊ុយក្រែននឹងបានចូលរួមចរចាបញ្ចប់សង្គ្រាមដែរ ប៉ុន្តែលោកពុំបាននិយាយលម្អិតបន្ថែមថា តើការចរចានេះនឹងធ្វើឡើងដោយរបៀបណា?

កន្លងមក មន្ត្រីរដ្ឋាភិបាលរបស់លោក Trump បានប្រកាសទៅកាន់បណ្តាសម្ព័ន្ធមិត្តលោកខាងលិចថា ប្រទេសទាំងនេះអាចទិញអាវុធពីអាមេរិកដើម្បីរក្សាសម្ព័ន្ធភាពអង្គការសនិ្ធសញ្ញាអាត្លង់ទិកខាងជើង (NATO) ។ លើសពីនេះ មន្ត្រីរដ្ឋាភិបាលរបស់លោក Trump ថែមទាំងស្នើឱ្យបណ្តាប្រទេសអឺរ៉ុបជួយទិញថាមពលពីអាមេរិកបន្ថែមទៀតក្នុងអំឡុងពេលពិភាក្សាពីទំនាក់ទំនងសន្តិសុខ ។

គួរបញ្ជាក់ថា អតីតប្រធានាធិបតីអាមេរិក លោក Joe Biden បានអនុម័តថវិកាផ្តល់ជំនួយសន្តិសុខដល់អ៊ុយក្រែនរាប់លានដុល្លារអាមេរិកក្នុងពេលលោកកាន់តំណែង ហើយលោកក៏បានផ្តល់ថវិការាប់លានដុល្លារទៀតដល់អ៊ុយក្រែនពេលលោកជិតផុតអាណត្តិ ឬមុនពេលលោក Trump ឡើងកាន់តំណែងជាផ្លូវការ ៕

ប្រទេសម៉ាឡេស៊ី ៖ បន្ទុកក្នុងផ្ទះរបស់ក្រុមគ្រួសារជាច្រើននៅតំបន់អាស៊ីអាគ្នេយ៍ គឺកូនៗមានតួនាទីថែទាំឪពុក-ម្តាយចាស់ជរា ឬជួលអ្នកថែទាំឪពុក-ម្តាយពេលកូនៗត្រូវធ្វើដំណើរទៅកន្លែងឆ្ងាយ ។ ប៉ុន្តែពលរដ្ឋម៉ាឡេស៊ីពុំធ្វើបែបនេះទេ ពួកគេនិយមផ្ញើឪពុក-ម្តាយជរានៅមន្ទីរពទ្យ ដើម្បីឱ្យពួកគេមានឱកាសដើរលេងនៅក្រៅប្រទេសយ៉ាងសប្បាយចិត្ត ហើយគិតថា ឪពុក-ម្តាយជាបន្ទុកសម្រាប់កូនចៅ ដែលវាបានក្លាយជាបញ្ហាថ្មីនៅម៉ាឡេស៊ី ។

មន្ទីរពេទ្យកូឡាឡាំពួរ គឺជាមន្ទីរពេទ្យរដ្ឋដ៏ធំបំផុតនៅប្រទេសម៉ាឡេស៊ី ប្រកាសថា តាំងពីឆ្នាំ២០២២ រហូតមកដល់ឆ្នាំ២០២៥ ឪពុក-ម្តាយចាស់ៗត្រូវបានកូនចៅយកមកទុកចោលនៅមន្ទីរពេទ្យកាន់តែច្រើនជារៀងរាល់ឆ្នាំ គឺក្នុង១ឆ្នាំៗ កើនឡើងប្រមាណ ១០០នាក់ ។

ម៉ាឡេស៊ី គឺជាប្រទេសមួយមានប្រព័ន្ធធានារ៉ាប់រងសុខភាពលក្ខណៈស្តង់ដារ និងសេវាព្យាបាលជំងឺនៅមន្ទីរពេទ្យមានតម្លៃសមរម្យ ។ ប៉ុន្តែពលរដ្ឋម៉ាឡេស៊ីបច្ចុប្បន្ន បែរជានាំឪពុក-ម្តាយចាស់ជរាទៅផ្ញើនៅមន្ទីរពេទ្យឱ្យមើលការខុសត្រូវ ដើម្បីឱ្យពួកគេមានឱកាសដើរលេងនៅថ្ងៃឈប់សម្រាក ។ មន្ទីរពេទ្យជាច្រើនប្រកាសដូចៗគ្នាថា នៅថ្ងៃឈប់សម្រាកម្តងៗ គ្រួសារជាច្រើនបាននាំឪពុក-ម្តាយមកផ្ញើនៅមន្ទីរពេទ្យ ហើយមនុស្សចាស់មួយចំនួនគ្មានជំងឺអ្វីទេ ។

គ្រួសារមួយដែលបាននាំឪពុក-ម្តាយទៅផ្ញើនៅមន្ទីរពេទ្យ ប្រាប់ថា បើនាំឪពុក-ម្តាយទៅដើរលេង ពួកគេពិបាកចាត់ចែងម្ហូបអាហារសម្រាប់ឪពុក-ម្តាយបរិភោគ ។ បើឪពុក-ម្តាយបរិភោគអាហារច្រើនពេក នាំឱ្យប៉ះពាល់សុខភាព ឈឺនេះ ឈឺនោះ ទើបនាំឪពុក-ម្តាយមកផ្ញើនៅមន្ទីរពេទ្យឱ្យគ្រូពេទ្យថែទាំ ។

មូលហេតុសំខាន់ដែលគ្រួសារជាច្រើននាំឪពុក-ម្តាយមកផ្ញើនៅមន្ទីរពេទ្យ ដោយសារពួកគេយល់ថា គ្មានប្រាក់គ្រប់គ្រាន់សម្រាប់ព្យាបាលជំងឺឪពុក-ម្តាយ ទើបពួកគេនាំឪពុក-ម្តាយទៅផ្ញើនៅមន្ទីរពេទ្យជាច្រើនខែ និងពុំនាំត្រឡប់មកផ្ទះវិញ ។ ក្រៅពីនេះ កូនចៅមួយចំនួនបាននាំឪពុក-ម្តាយទៅរស់នៅមណ្ឌលថែទាំមនុស្សចាស់ ហើយបង់ប្រាក់ឱ្យមណ្ឌលសម្រាប់ការចំណាយតែម្តងគត់ ។ បន្ទាប់មក បាត់ស្រមោលឈឹង ឈប់បង់ប្រាក់ឱ្យមណ្ឌលសម្រាប់ការថែទាំ និងលែងមកសួរសុខទុក្ខឪពុក-ម្តាយ ។

វាជាបញ្ហាថ្មីមួយដែលរដ្ឋាភិបាលម៉ាឡេស៊ីពិបាកដោះស្រាយ ដោយសារក្រុមគ្រួសារកាន់តែច្រើនយល់ឃើញថា ការថែទាំឪពុក-ម្តាយជាបន្ទុកក្នុងផ្ទះ ដែលធ្វើឱ្យពួកគេគ្មានពេលវេលារកស៊ី ឬដើរលេង ។ មតិខ្លះថា វាដូចគ្នានឹងការយកសត្វចិញ្ចឹមទៅផ្ញើនៅកន្លែងថែទាំសត្វ ពីព្រោះកន្លែងទាំងនេះមានជំនាញខាងថែទាំសត្វ ដើម្បីឱ្យម្ចាស់មានពេលវេលាដើរកម្សាន្តយ៉ាងសប្បាយចិត្ត ៕

សាប៊ូដុំ និងសាប៊ូទឹក មានតួនាទីសម្អាតស្បែករាងកាយដែលទទួលបានការពេញនិយមយ៉ាងខ្លាំងនាពេលបច្ចុប្បន្ន ហើយសាប៊ូទាំង២ប្រភេទនេះមានគុណសម្បត្តិ និងគុណវិបត្តិខុសៗគ្នា ។ មនុស្សភាគច្រើនគិតថា ការប្រើប្រាស់សាប៊ូទឹកដុសខ្លួន គឺល្អជាងសាប៊ូដុំ ពីព្រោះវាមានសំណើមច្រើន ប៉ុន្តែការដុសខ្លួនដោយសាប៊ូទឹក នឹងចំណាយទឹកអស់ច្រើនជាងសាប៊ូដុំ ។

ការដុសខ្លួនដោយសាប៊ូទឹកពេលងូតទឹក គឺមនុស្សម្នាក់ៗតែងតែប្រើប្រាស់សាប៊ូក្នុងបរិមាណច្រើនដើម្បីដុសឱ្យសព្វរាងកាយ ហើយពួកគេត្រូវការទឹកយ៉ាងច្រើនសម្រាប់លាងជម្រះសាប៊ូចេញពីខ្លួនប្រាណ ។ រីឯការប្រើប្រាស់សាប៊ូដុំវិញ គេនិយមប្រើប្រាស់តែបន្តិចប៉ុណ្ណោះសម្រាប់ដុសសម្អាតរាងកាយ ដែលធ្វើឱ្យចំណាយទឹកសម្រាប់លាងសម្អាតខ្លួន តិចជាងសាប៊ូទឹក ។

តាមការស្រាវជ្រាវបង្ហាញថា ការប្រើប្រាស់សាប៊ូទឹក នឹងចំណាយទឹកអស់ច្រើនជាងសាប៊ូដុំ ចាប់ពី២ដង ទៅ៣ដងឯណោះ ។ បើចង់សន្សំសំចៃទឹកពេលងូតទឹក យើងគួរតែជ្រើសរើសសាប៊ូដុំសម្រាប់ដុសខ្លួន ។ ក្រៅពីនេះ នៅមានកត្តាផ្សេងទៀតដែលពាក់ព័ន្ធនឹងការសន្សំសំចៃទឹកពេលងូតទឹកផងដែរ ដូចជា ៖ រយៈពេលងូតទឹក, សីតុណ្ហភាពទឹក និងកម្លាំងទឹកខ្លាំង ឬខ្សោយ ។ បើងូតទឹកយូរពេក ឬសីតុណ្ហភាពទឹកខ្ពស់ពេក ឬទឹកចេញខ្លាំងពីឧបករណ៍ផ្កាឈូក វានឹងធ្វើឱ្យយើងប្រើប្រាស់ទឹកកាន់តែច្រើន ។

ខាងក្រោមនេះ គឺជាវិធីសន្សំសំចៃទឹកពេលងូតទឹក ៖
-កំណត់សីតុណ្ហភាពទឹកឱ្យសមល្មម គឺមិនក្តៅខ្លាំងពេក ឬត្រជាក់ពេក
-បិទទឹកគ្រប់ពេលវេលា ពេលពុំប្រើប្រាស់
-ប្រើប្រាស់សាប៊ូដុំជំនួសសាប៊ូទឹក និង
-ងូតទឹកព្រមគ្នាជាមួយសមាជិកគ្រួសារ ។

ហេតុនេះ យើងអាចអនុវត្តវិធីងាយៗដើម្បីសន្សំសំចៃទឹកពេលងូតទឹកដែលអាចធ្វើបានរៀងរាល់ថ្ងៃ ដើម្បីកាត់បន្ថយការប្រើប្រាស់ទឹកអស់ច្រើន ព្រមទាំងជួយការពារបរិស្ថានពីការបំពុលដោយសារទឹកស្អុយ ៕

មហាសេដ្ឋី Kazuo Inamori គឺជាអតីតប្រធានក្រុមហ៊ុន Japan Airlines និងជាសហស្ថាបនិកនៃក្រុមទូរគមនាគមន៍ KDDI ដ៏ល្បីល្បាញមួយរបស់ប្រទេសជប៉ុន។ ប៉ុន្តែបច្ចុប្បន្នលោកបានមរណភាពហើយ ក្នុងជន្មាយុ ៩០ ឆ្នាំ ដោយសាររោគាពាធ។ ទោះបីជាយ៉ាងនេះក្តី លោកបានបន្សល់ទុកនូវជីវប្រវត្តិដ៏អស្ចារ្យ និងដំបូន្មានល្អៗជាច្រើនសម្រាប់យុវជនជំនាន់ក្រោយ។ យោងតាមការចុះផ្សាយរបស់សារព័ត៌មានបរទេស CNBC ទម្លាប់មួយចំនួនរបស់មហាសេដ្ឋីជប៉ុន អាចជាគន្លឹះដ៏ល្អមួយក្នុងការជួយមនុស្សឱ្យផ្លាស់ប្តូរជីវិតរបស់ពួកគេដើម្បីក្លាយជាអ្នកមាន។

១.មិនចុះចាញ់ ឬមិនបោះបង់៖ អតីតប្រធានក្រុមហ៊ុន Japan Airlines កើតមកក្នុងភាពក្រីក្រ ធ្លាប់បរាជ័យក្នុងសាកលវិទ្យាល័យ ដែលគាត់ចង់បាន មានន័យថា លោកបានដាក់ពាក្យប្រលងចូលសកលវិទ្យាល័យដែលលោកប្រាថ្នា ប៉ុន្តែមិនជាប់នោះទេ ហើយលោកក៏សម្រេចចិត្តទៅរៀននៅសកលវិទ្យាល័យមួយផ្សេងទៀត។

នៅពេលរៀនចប់មហាសេដ្ឋីរូបនេះក៏បានចាប់ផ្តើមបង្កើតរោងចក្រសេរ៉ាមិចមួយប៉ុន្តែក្ស័យធន។ ពាក់កណ្តាលដំបូងនៃជីវិតរបស់គាត់គឺពោរពេញទៅដោយបញ្ហាប្រឈមយ៉ាងស្មុគស្មាញជាច្រើន ប៉ុន្តែជំនួសឱ្យការត្អូញត្អែរ គឺលោកមិនចុះចាញ់ និងមិនបោះបង់នោះទេ។ លោកបានព្យាយាម តស៊ូឥតឈប់ឈរ ដើម្បីផ្លាស់ប្តូរជោគវាសនារបស់លោករហូតដល់ជោគជ័យ។

ដូច្នេះមហាសេដ្ឋី Kazuo Inamori ទើបតែទទួលបានភាពជោគជ័យនៅអាយុ ៧៧ ឆ្នាំដោយបានកាន់កាប់ក្រុមហ៊ុនអាកាសចរណ៍ជប៉ុន ដែលជួយឱ្យក្រុមហ៊ុនដ៏ធំមួយនេះទទួលបានប្រាក់ចំណេញលេខមួយនៅទូទាំងពិភពលោក។ លើសពីនេះមហាសេដ្ឋីជប៉ុនក៏បានបង្កើតក្រុមហ៊ុន Kyocera និង Second Telecom ដែលធ្វើឱ្យក្រុមហ៊ុនទាំងពីរនេះបានចូលទៅក្នុងក្រុមហ៊ុនកំពូល ៥០០ នៅលើពិភពលោកផងដែរ។

២.កត់ត្រានៅអ្វីដែលយើងធ្វើ និងរៀនកែលម្អ៖ មហាសេដ្ឋីជប៉ុន Kazuo Inamori តែងតែយកសៀវភៅកត់ត្រាមកជាមួយ ដោយសរសេរបច្ចេកទេសនីមួយៗ ដែលលោកត្រូវរៀន។ បើមិនចេះស្ទាត់ទេគាត់សុខចិត្តហាត់រាប់ពាន់ដងរហូតដល់ស្ទាត់ជំនាញ។ ការកែលម្អតូចៗទាំងនេះបាននាំលោក Kazuo Inamori ទៅកាន់មុខតំណែងមួយចំនួនដែលលោករំពឹងទុក។

Kazuo Inamori ជឿជាក់ថា “គ្មានការជោគជ័យណាមួយដែលមិនខិតខំនោះទេ ហើយក៏មិនមានទេពកោសល្យពីកំណើតអ្វីដែរ។ នៅពីក្រោយសមិទ្ធិផលល្អៗទាំងអស់ គឺជាមនុស្សដែលតស៊ូ និងព្យាយាមជានិច្ចដើម្បីកែលម្អ”។ មហាសេដ្ឋីរូបនេះបានសង្កត់ធ្ងន់ថា ទោះបីជាចំណុចចាប់ផ្តើមរបស់អ្នកទាបប៉ុណ្ណាក៏ដោយឱ្យតែអ្នកប្រសើរឡើងជារៀងរាល់ថ្ងៃ មិនយូរមិនឆាប់ អ្នកនឹងបង្កើតចំណុចរបត់មួយ ហើយនឹងក្លាយជាអ្នកមាននាពេលអនាគត។

៣.ត្រូវរៀនស្រឡាញ់ការងារដែលខ្លួនធ្វើ៖ បុគ្គលល្បីៗនៅលើពិភពលោក រាប់ចាប់ពីអ្នកចម្រៀង វិស្វករ ស្ថាបនិកក្រុមហ៊ុន សេដ្ឋី និងមហាសេដ្ឋី សុទ្ធតែសប្បាយរីករាយនឹងការងាររបស់ខ្លួនជានិច្ច។ មហាសេដ្ឋី Bill Gates ប្រហែលមិនបង្កើតក្រុមហ៊ុន Microsoft ឡើងនោះទេ ប្រសិនបើលោកស្អប់ ឬមិនចូលចិត្តកម្មវិធី Software។ ដូច្នេះមហាសេដ្ឋីជប៉ុន Kazuo Inamori បានចែករំលែកថា អាថ៌កំបាំងជោគជ័យ គឺធ្វើឱ្យការងារបច្ចុប្បន្នរបស់អ្នកក្លាយជាការងារដែលជាចំណង់ចំណូលចិត្តរបស់អ្នក ទោះបីជាអ្នកមិនបានធ្វើការងារដែលអ្នកប្រាថ្នាក៏ដោយ៕