តារាកំប្លែង ពាក់មី លោក ជំទាវ នៅ សូនិតា អនុប្រធានសមាគមសិល្បករ និងសាធារណជនជាច្រើនទៀតបានចែករំលែកគំនិតរបស់ខ្លួនប្រសិនជាអាចគ្រាន់តែអប់រំបុគ្គល ពេជ ពិសិដ្ឋ ដែលតាំងខ្លួនជាលោក ស៊ិន ស៊ីសាមុត ចាប់ជាតិបានហើយបើសិនជាមានការជាប់ទោសនឹងធ្វើឱ្យសាធារណជនមានការប្រៀបធៀបទៅមួយទៀតដែលបញ្ចប់ត្រឹមការសូមទោសរួចខ្លួន។

នៅព្រឹកថ្ងៃទី៨ កុម្ភៈ លោក ចែម ចាន់រ៉ា ហៅ នាយពាក់មី បានបង្ហោះរូបភាពរូបភាពពីរសន្លឹកអមដោយខ្លឹមសារថា «ប្រសិនជាអាចគ្រាន់តែអប់រំគាត់ទៅ ខ្ញុំមិនហ៊ានវែកញែកអីទេគ្រាន់តែមានអារម្មណ៍ថាអាណិត នៅពេលដែលឃើញរូបភាពគាត់ជិះកង់មកចូលខ្លួន ខ្ញុំជឿថាគាត់ប្រហែលជាអាចមានបញ្ហាស្មារតី ( វីដេអូគាត់ច្រៀង ខ្ញុំមើលហើយញញឹម គិតថាគាត់ភ្លៀវ មិនដូចវីដេអូអ្នកខ្លះខ្ញុំមើលហើយជ្រិញ )»។ តារាកំប្លែងរូបនេះបានបន្តទៀតថា « បើសិនជាគាត់ត្រូវមានទោសដូចដែលព័ត៍ម៌នចុះផ្សាយមែន ប្រជាជននឹងមានកាប្រៀបធៀប ទៅអ្នកផ្សេង ដែលសុំទោសរួចខ្លួន»។

ខ្លឹមសាររបស់តារាកំប្លែង ពាក់មី លោកជំទាវ នៅ សូនិតា អនុប្រធានសមាគមសិល្បករ បានចែករំលែកបន្តនិងបានដាក់ចំណងជើងថា «អាណិតគាត់ណាស់ បើអាចលើកលែងបានល្អ គ្រាន់តែអប់រំណែនាំបានហើយ. ព្រោះឮថាគាត់ក៏មិនមែនជាអ្នកដែលមានសតិមិនគ្រប់គ្រាន់ដែរ»។ ជាមួយគ្នានេះតារាចម្រៀង សុខ សីឡាលីន ក៏បានស៊ែរការបង្ហោះរបស់ នាយពាក់មី ដូចគ្នា ខណៈសាធារណជនជាច្រើនទៀតក៏សម្តែងការយល់ស្របផងដែរ ព្រោះប្រសិនជាមានការជាប់ឃុំឃាត់មែននឹងមានការប្រៀបធៀបថា ចាប់ជាតិដូចគ្នាតែវាសាសនាខុសគ្នា ព្រោះមួយជាប់ទោស មួយទៀតគ្រាន់តែធ្វើកិច្ចសន្យាអប់រំ សូមទោសជាសាធារណៈ។ យ៉ាងណាមតិមួយចំនួនបានលើកឡើងថាបុគ្គលតាំងខ្លួនជាលោក ស៊ិន ស៊ីសាមុត ចាប់ជាតិ នេះបានប្រើពាក្យមិនសមរម្យទោះបីមានការដាស់តឿនពីអ្នកមួយចំនួនឱ្យឈប់តាំងខ្លួនបែបនេះក៏ដោយ។

គួរបញ្ជាក់ផងដែថា ពេជ ពិសិដ្ឋ ត្រូវបានសមត្ថកិច្ចឃាត់ខ្លួនត្រៀមកសាងសំណុំរឿងបញ្ជូនទៅតុលាការ ពាក់ព័ន្ធបទល្មើសញុះញង់ឱ្យមានការរើសអើង វាយប្រហាររាជរដ្ឋាភិបាល មិនសហការក្នុងការផ្ដល់ចម្លើយ ខណៈបុគ្គលរូបនេះក៏រងបណ្ដឹងពីលោក ផែង វណ្ណៈ ដែលបានប្ដឹងទៅកាន់ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ពីបទញុះញង់ឱ្យមានការរើសអើង និងជេរប្រមាថជាសាធារណៈ តាមរយៈបណ្ដាញសង្គមហ្វេសប៊ុក៕

ថ្មីៗនេះអ្នកលេងបណ្តាញសង្គមជាអ្នកគាំទ្របានចែករំលែកវីដេអូខ្លីៗជាបន្តបន្ទាប់ដោយបានបញ្ជាក់ថាតារាសម្តែងចិន Meng Ziyi និង Wang Hongyi បានថតរឿងនៅក្នុងខេត្តសៀមរាប។

តាមការចែករំលែកវីដេអូ និងរូបភាពតៗគ្នាអ្នកគាំទ្រជាច្រើនបានឱ្យដឹងថា តារាសម្តែងចិន Meng Ziyi និង Wang Hongyi បានមកថតរឿងថ្មីរបស់ពួកគេនៅលើទឹកដីសៀមរាបធ្វើឱ្យក្រុមអ្នកគាំទ្រមានការរំជើបរំជួលយ៉ាងខ្លាំងចង់តែទៅដល់សៀមរាប។ ក្នុងវីដេអូនោះគេបានឃើញតារាប្រុស Wang Hongyi បានថតប្លង់រត់នៅតំបន់ផាប់ស្ត្រីត ចំណែកឯវីដេអូផ្សេងទៀត មានការសម្តែងពី Meng Ziyi និង Wang Hongyi និងមួយផ្នែកទៀតថតនៅពេលយប់ផងដែរ។

ក្នុងមកតារាសម្តែងចិនទាំងពីរដួងមកថតនៅលើទឹកដីសៀមរាបនេះកំពុងក្លាយជាប្រធានបទក្តៅមានការស្វែងរកច្រើននៅលើបណ្តាញសង្គមចិន Weibo ។ មុននោះផេកធំជាអ្នកគាំទ្ររបស់តារាស្រី Meng Ziyi បានបង្ហោះពីការព្រួយបារម្ភក្នុងការដែលអាយដលខ្លួនមកថតនៅប្រទេសកម្ពុជា ប៉ុន្តែក្រោយមកបានបង្ហោះបង្ហាញថានាងមកដល់ខ្មែរសុវត្ថិភាព ប្រជាជននៅតំបន់សៀមរាបក៏មានចិត្តល្អ មិនអាក្រក់ដូចព័ត៌មាននៅលើប្រព័ន្ធអ៊ឺនធឺណិតនិយាយមួយចំនួននោះទេ។

បើនៅលើគេហទំព័រ mydramalist តារាសម្តែង Meng Ziyi និង Wang Hongyi គឺមានគម្រោងជាមួយគ្នានៅក្នុងរឿង «San Xian Mi Hui» ដោយអ្នកទាំងពីរគឺតួឯក។ ការថតនៅលើទឹកដីសៀមរាបនេះអ្នកគាំទ្រក៏សង្ឃឹមដែរថានឹងមានប្លង់នៅប្រាសាទអង្គរវត្ត។ គម្រោងការមកដល់និងថតរបស់ក្រុមការងារភាពយន្តត្រូវបានគេចែករំលែកថាគឺចាប់ពីថ្ងៃទី៥ ខែកុម្ភៈនឹងត្រឡប់ទៅប្រទេសចិនវិញនៅថ្ងៃទី១៣ ខែកុម្ភៈនេះ។

Meng Ziyi មានអាយុ២៩ឆ្នាំ បានប្រឡូកអាជីពសិល្បៈ១០ឆ្នាំមកហើយដែលកំពុងរីកចម្រើនជាបន្តបន្ទាប់ក្នុងអាជីពសម្តែងជាពិសេសរឿងបុរាណក្នុងឆ្នាំ២០២៤ Blossom ។ Wang Hongyi មានអាយុ ២៥ឆ្នាំ ហើយសាងភាពល្បីល្បាញក្នុងរឿង «Lost You Forever» ៕

អ្នកលេងបណ្តាញសង្គមមានការភ្ញាក់ផ្អើលនិងចាប់ផ្តើមជជែកវែកញែកបន្ទាប់ពីបទចម្រៀង Diss Track «ថីអ្ហែងថី!» របស់ ជី ដេវីត នៅលើបណ្តាញសង្គមហ្វេកប៊ុក មិនអាចទស្សនាបាន ខណៈនៅលើយូធូបនៅលើដំណើរការធម្មតា។ ងាកទៅកាន់ផេកអ្នកគាំទ្រតារាចម្រៀងរូបនេះបានបង្ហាញថាមានគណនីក្លែងក្លាយជាក្រុម MMO មកវាយលុក។

នៅយប់ថ្ងៃទី៧ កុម្ភៈ ទស្សនិកជនជាអ្នកលេងបណ្តាញសង្គមបានរកឃើញថា បទចម្រៀង Diss Track «ថីអ្ហែងថី!» របស់ ជី ដេវីត ទៅកាន់តារាចម្រៀងរ៉េប វណ្ណដា ដែលបានបំបែកកំណត់ត្រា២៥ម៉ោងមានការស្តាប់១០លានដងនៅលើហ្វេកប៊ុកពេលនេះស្ថិតនៅក្នុងដំណាក់កាលមើលឃើញទៀតនោះទេ ខណៈបទនេះមុននឹងបាត់ មានការទស្សនាជាង១៣លានដង។ ការបាត់នេះគេមិនទាន់ដឹងពីមូលហេតុនោះទេប៉ុន្តែមានការសង្ស័យថារងការ រីផតពីក្រុម MMO ។

ការរំពឹងទុកបែបនេះដោយសារតែគណនីផ្ទាល់ខ្លួន ជី ដេវីត បានចែករំលែកផេកអ្នកគាំទ្ររបស់លោកត្រូវរងការវាយប្រហារពីគណនីក្លែងក្លាយជាច្រើនជាប្រទេសជិតខាង និងបានបន់ឱ្យផេកហ្វេនលោកមានសុវត្ថិភាព។

ជី ដេវីត ក៏បាននិយាយនៅក្នុង Group អ្នកគាំទ្រស្របពេលបទចម្រៀង «ថីអ្ហែងថី!» លែងឃើញនៅលើហ្វេកប៊ុកថា «បងប្អូនកុំទៅខ្វល់រឿង Video ចម្រៀងខ្ញុំអី ធ្វើខ្លួនឱ្យរឹងមាំសាមគ្គីគ្នាឱ្យល្អយើងខ្លាំងនឹងហើយទើបវាខ្លាចវាគ្មានធ្វើស្អីកើតទេ បានតែល្អមើលទេតិចទៀតលែងអីហើយ ។ ចំពេលគ្នាល្អម្លេះ ហិហិ, សើចមុនទៅចាំ ឱ្យពួកវាយំតាមក្រោយ»។
ប្រាប់អ្នកគាំទ្រកុំឱ្យខ្វល់ខ្វាយនាំគ្នាសាមគ្គីគ្នានេះបន្ទាប់ពីបាត់បទចម្រៀងខាងលើ ជី ដេវីត ក៏បានបង្ហើបបទថ្មីរបស់ខ្លួនដែលលោកបានបង្ហាញថាហាក់មើលឃើញអនាគត ព្រោះបាននិយាយពីក្រុម MMO ។ នៅថ្ងៃទី៨ ខែកុម្ភៈ ឆ្នាំ២០២៥ នេះ ជី ដេវីត នឹងទម្លាក់បទ Diss Track មួយទៀតបន្ទាប់ពីមកពីប្រទេសជប៉ុនដែលមានចំណងជើងថា «អ្ហែងចង់ទៅណា? អ្ហា៎!» ដោយបានបន្ថែមខេបសិនថា «Plan អ្ហែងចង់ចេញបទផ្សេងយកមកបិទមុខមិនបាច់លាក់អញទេ!»៕