ជិតដល់ថ្ងៃបុណ្យនៃសេក្តីស្រឡាញ់ ឬហៅថា Valentine’s Day ដែលត្រូវបានគេប្រារព្ធជារៀងរាល់ឆ្នាំនៅថ្ងៃទី១៤ ខែកុម្ភៈ គឺជាបុណ្យខាងប៉ែកអឺរ៉ុប ប៉ុន្តែវាបានល្បីសុះសាយនិងកំពុងចាក់ឫសក្នុងដួងចិត្តរបស់ប្រជាជនកម្ពុជា ជាពិសេសនៅក្នុងស្រទាប់យុវវ័យតែម្តង។ មានន័យថា ឱ្យតែដល់ថ្ងៃទី១៤ ខែកុម្ភៈ យុវវ័យមួយចំនួនតែងតែនិយមទិញកាដូ ឬអំណោយជូនមនុស្សជាទីស្រឡាញ់របស់ខ្លួន ដូចជាឪពុកម្តាយ មិត្តភក្តិ បងប្អូន និងគូស្នេហ៍ជាដើម ដើម្បីបង្ហាញពីបេះដូងបរិសុទ្ធ និងសេចក្តីស្រឡាញ់ដ៏ធំធេងរបស់ពួកគេ។

ទោះជាយ៉ាងណាអំណោយ ឬកាដូដែលពួកគេទិញជូនមនុស្សជាទីស្រឡាញ់ អាចជាត្រណមដែលចាស់ៗជំនាន់មុនហាមប្រាមជាយូរមកហើយ។ ចាស់ៗបុរាណជឿថា ការទិញអំណោយ ឬកាដូទាំងនេះជូនមនុស្សជាទីស្រឡាញ់ នឹងធ្វើឱ្យបែកបាក់គ្នា ឬក៏មានជម្លោះឈ្លោះប្រកែកគ្នានាពេលខាងមុខ ដែលវាមិនល្អក្នុងការទិញជូនមនុស្សជាទីស្រឡាញ់ឡើយ។ ខាងក្រោមនេះគឺជាអំណោយ ឬកាដូដែលអ្នកមិនគួរទិញក្នុងថ្ងៃ Valentine’day៖

១.នាឡិកា៖ មនុស្សជាច្រើនជឿជាក់យ៉ាងមុតមាំថា ប្រសិនបើមនុស្សជិតស្និតរបស់អ្នកទិញនាឡិកា នឹងបង្កើតរយៈពេលទំនាក់ទំនង ប៉ុន្តែបើនាឡិកាឈប់ដើរនោះអ្វីៗនឹងបញ្ចប់ទៅដូចគ្នា។

២.ស្បែកជើង៖ ស្បែកជើងតំណាងឱ្យការចាកចេញ ឬការដើរ ដូច្នេះមនុស្សដែលជាគូស្នេហ៍មិនអាចទិញស្បែកជើងជូនគ្នាបានទេ ព្រោះវាអាចបណ្តាលឱ្យពួកគេបែកបាក់គ្នា។

៣.សំលៀកបំពាក់ពណ៌ខ្មៅ៖ សំលៀកបំពាក់ពណ៌ខ្មៅត្រូវបានហាមឃាត់យ៉ាងតឹងរ៉ឹង ព្រោះមនុស្សបុរាណប្រកាន់ណាស់មិនថា ខោ អាវ សំពត់ ស្បៃទេ ចាស់ព្រឹទ្ធាចារ្យតែងតែបង្រៀនរឿងនោះ បើយើងឱ្យអាវខ្មៅទៅនរណាម្នាក់ យើងត្រូវទៅពិធីបុណ្យសពរបស់បុគ្គលនោះ។

៤.ទឹកអប់៖ ទឹកអប់ប្រៀបដូចជាក្លិនដែលក្រអូបម៉ាឆាវៗ មនុស្សជាច្រើនជឿថា ការទិញទឹកអប់នឹងធ្វើឱ្យស្នេហារបស់អ្នក រសាត់ដូចក្លិនទឹកអប់ដែលរសាត់តាមពេលវេលា។

៥.ក្រាស់សិតសក់៖ ប្រសិនបើយើងផ្តល់ក្រាស់សិតសក់ដល់មនុស្សជាទីស្រឡាញ់ នឹងធ្វើឱ្យទំនាក់ទំនងរបស់យើង ហើយគាត់ត្រូវតែដាច់ពីគ្នាដូចជាធ្មេញរបស់ក្រាស់សិតសក់អ៊ីចឹង។

៦.គ្រឿងកញ្ចក់ផ្សេងៗ៖ មនុស្សមួយចំនួនប្រហែលជាធ្លាប់ទទួលបានវាជាញឹកញាប់ផងដែរ បើតាមជំនឿគេជឿថាបើកញ្ចក់បែក មានន័យថាទំនាក់ទំនងរវាងអ្នកទាំងពីរត្រូវបានខូចខាត ហើយអាចនឹងមានរឿងរកាំរកុះច្រើន។

៧.កន្សែង៖ ជាការពិតណាស់ ភាគច្រើននៃកន្សែងត្រូវបានគេប្រើសម្រាប់ជូតខ្លួន និងជូតទឹកភ្នែកផងដែរ។ បើមិនចង់ស្រក់ទឹកភ្នែក ត្រូវចៀសវាង យកកន្សែងជាកាដូជូនមនុស្សជាទីស្រឡាញ់៕

ទីក្រុងឌូបៃតែងតែធ្វើឱ្យពិភពលោកភ្ញាក់ផ្អើលជាញឹកញាប់នូវការសាងសង់អាគារខ្ពស់ៗជាច្រើន ដែលជាសំណង់រចនាសម្ព័ន្ធដ៏អស្ចារ្យ បានទាក់ទាញការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរគ្រប់ជាតិសាសន៍។ ទីក្រុងនេះមិនត្រឹមបង្កើតការភ្ញាក់ផ្អើលជាញឹកញាប់ប៉ុណ្ណោះទេ ប៉ុន្តែពួកគេក៏ខិតខំអភិវឌ្ឍន៍ប្រទេសរបស់ខ្លួនឥតឈប់ឈរផងដែរ។

ថ្មីៗនេះបើយោងតាមការចុះផ្សាយរបស់សារព័ត៌មានបរទេស CNN ទីក្រុងឌូបៃមានបំណងសាងសង់ «កោះនៅលើមេឃ» ដែលជាយុទ្ធនាការទាក់ទាញទេសចរណ៍ថ្មីរបស់ទីក្រុង ដោយសាងសង់អាងទឹករ៉ែ និងសួនច្បាររុក្ខសាស្ត្រដែលត្រូវធ្វើឡើងនៅលើអាកាស។ គម្រោងនេះត្រូវបានគេហៅថា Therme Dubai – Islands in the Sky គឺជាអាគារថ្មីមួយកម្ពស់ ១០០ ម៉ែត្រ ដែលនៅលើអាគារខ្ពស់ជាងគេនោះ គឺមានវាលខ្សាច់ ឆ្នេសមុទ្រសប្បនិមិត្ម ឬអាងទឹករ៉ែ និងសួនរុក្ខសាស្ត្រជាច្រើនប្រភេទ ហាក់ដូចជាកោះនៅលើមេឃអ៊ីចឹង។

ជាន់នីមួយៗត្រូវបានសាងសង់ជាលក្ខណៈលំហ ជាមួយនឹងរុក្ខជាតិពណ៌បៃតងខៀវស្រងាត់ និងទិដ្ឋភាពបែប Panoramic នៃផ្ទៃមេឃរបស់ទីក្រុងឌូបៃ។ ភ្ញៀវទេសចរអាចមកទស្សនាបាននៅពេលសាងសង់រួច ដើម្បីបន្ធូរភាពតានតឹង ក៏ដូចជាទទួលយកបទពិសោធន៍ថ្មីប្លែក រួមទាំងមានកន្លែងកម្សាន្តពិសេសៗសម្រាប់រៀបចំព្រឹត្តិការណ៍ផ្សេងៗទៀតផង។ គម្រោងដ៏អស្ចារ្យនេះមានគោលបំណងទាក់ទាញភ្ញៀវទេសចរ ក៏ដូចជាផ្តល់ឱ្យភ្ញៀវនូវការសម្រាកលម្ហែកាយដ៏សម្បូរបែប និងព្យាបាលផ្លូវចិត្តយ៉ាងមានប្រសិទ្ធភាព ហើយក៏មានតន្ត្រី រួមទាំងការសម្តែងរបស់តារាល្បីៗនៅលើកោះផងដែរ។

បច្ចុប្បន្នក្រុមហ៊ុនស្ថាបត្យកម្មអាមេរិក Diller Scofidio + Renfro គឺជាអ្នកទទួលខុសត្រូវលើគម្រោងដ៏សំខាន់នេះ។ កោះស្កាយត្រូវបានសាងសង់នៅក្នុងឧទ្យាន Zabeel របស់ទីក្រុងឌូបៃដែលនៅជាប់នឹងព្រះបរមរាជវាំង។ យោងតាមប្រភពព័ត៌មាន CNN កោះនៅលើមេឃត្រូវបានគេរំពឹងថានឹងទាក់ទាញភ្ញៀវទេសចរចំនួន ១.៧ លាននាក់ក្នុងមួយឆ្នាំ។ ដូច្នេះអគារថ្មីនៅទីក្រុងឌូបៃ ត្រូវបានគេរំពឹងថានឹងក្លាយជាគំរូសកលនៃអ្វីដែលមនុស្សអាចធ្វើបានជាមួយមហិច្ឆតា និងជំនាញបច្ចេកវិទ្យា។ ហេតុនេះកោះនៅលើមេឃ ត្រូវបានគេរំពឹងថានឹងចាប់ផ្តើមសាងសង់នៅដើមឆ្នាំក្រោយ ហើយនឹងត្រូវបញ្ចប់នៅឆ្នាំ ២០២៨៕

សហរដ្ឋអាមេរិក ៖ លោក Donald Trump ប្រធានាធិបតីអាមេរិកអះអាងថា សង្គ្រាមនៅប្រទេសអ៊ុយក្រែននឹងបញ្ចប់ឆាប់ៗ ក្រោយពីលោកបានជជែកតាមទូរស័ព្ទជាមួយប្រធានាធិបតីរុស្ស៊ី លោក Vladimir Putin អស់រយៈពេលយ៉ាងយូរ និងទទួលបានលទ្ធផល កាលពីថ្ងៃទី១២ ខែកុម្ភៈ ឆ្នាំ២០២៥ ។

នេះជាលើកទី១ ដែលលោក Trump បានជជែកតាមទូរស័ព្ទជាមួយប្រធានាធិបតីរុស្ស៊ី តាំងពីលោកឡើងកាន់តំណែងជាប្រធានាធិបតីអាមេរិក កាលពីខែមករា ឆ្នាំ២០២៥ ។ លោកបានបញ្ជាក់ពីគោលជំហរច្បាស់លាស់ទៅកាន់ទីប្រឹក្សារបស់លោកថា លោកនឹងបញ្ចប់សង្គ្រាមនៅអ៊ុយក្រែនឱ្យបានឆាប់រហ័សបំផុត ។

មន្ត្រីរដ្ឋាភិបាលរបស់លោក Trump ជាច្រើនរូបរំពឹងថា ការផ្លាស់ប្តូរអ្នកទោសកាលពីថ្ងៃទី១១ ខែកុម្ភៈ កន្លងមក គឺបង្ហាញពីការព្យាយាមជាថ្មីដើម្បីបញ្ចប់សង្គ្រាមអូសបន្លាយអស់រយៈពេលជាច្រើនឆ្នាំ ។ បច្ចុប្បន្ន មេដឹកនាំទាំង២រូបបានសន្ទនាគ្នា ក្រោយពីរដ្ឋាភិបាលអាមេរិក និងរុស្ស៊ី ស្ងប់ស្ងាត់ដាក់គ្នាជាច្រើនឆ្នាំ ។

លោក Trump បានសរសេរក្នុងបណ្តាញសង្គម Truth Social ថា ៖ «យើងបានពិភាក្សាពីបញ្ហាសង្គ្រាមនៅអ៊ុយក្រែន, មជ្ឈិមបូព៌ា, ថាមពល, បច្ចេកវិទ្យា AI, ប្រាក់ដុល្លារអាមេរិក និងប្រធានបទជាច្រើនទៀត ។ យើងយល់ព្រមធ្វើការជាមួយគ្នាកាន់តែជិតស្និទ្ធ ហើយយើងបានអញ្ជើញគ្នាធ្វើដំណើរទស្សនកិច្ចទៅវិញទៅមក និងបញ្ជូនក្រុមមន្ត្រីតំណាងប្រទេសទាំងពីរចរចាគ្នា ។ យើងនឹងជូនដំណឹងទៅប្រធានាធិបតីអ៊ុយក្រែន លោក Volodymyr Zelenskyy ពីការសន្ទនានេះ» ។

លោក Trump បន្តថា ប្រធានាធិបតីរុស្ស៊ីប្រើប្រាស់ពាក្យសម្តីជាមួយលោកដោយការប្រុងប្រយ័ត្ន ខណៈមន្ត្រីវិមានក្រឹមឡាំងបញ្ជាក់ថា លោក Trump បានជជែកតាមទូរស័ព្ទជាមួយលោក Putin រយៈពេលយូរជិត៩០នាទី ។

អ្នកជំនាញនិយាយថា តាមសេចក្តីថ្លែងការណ៍របស់សេតវិមានអាមេរិក និងវិមានក្រឹមឡាំងរបស់រុស្ស៊ី ស្តីពីការសន្ទនាតាមទូរស័ព្ទរវាងលោក Trump និងលោក Putin នេះគឺជាការជជែកគ្នាប្រកបដោយភាពស្និទ្ធស្នាល និងមិត្តភាព ។

កាលពីខែកុម្ភៈ ឆ្នាំ២០២២ លោក Trump ប្រកាសថា លោកនឹងធ្វើជាអ្នកសម្របសម្រួលការចរចាបញ្ចប់សង្គ្រាមនៅអ៊ុយក្រែន ដែលកើតឡើងដោយសារការឈ្លានពានរបស់រុស្ស៊ី ។ ជំនួយការរបស់លោក Trump បាននិយាយនាពេលថ្មីៗនេះថា មេដឹកនាំអាមេរិកនឹងបញ្ចប់សង្គ្រាមនៅអ៊ុយក្រែន ក្រោយការបង្កើតរដ្ឋាភិបាលថ្មីរយៈពេល១០០ថ្ងៃ គឺសង្គ្រាមនឹងបញ្ចប់នៅខែមេសា ឆ្នាំ២០២៥ ៕

អ្នកជំនាញអះអាងថា ដើមឈើក៏ចេះនិយាយគ្នាដែរ ប៉ុន្តែវាចូលចិត្តនិយាយរឿងកុហកពីគ្រោះធម្មជាតិប្រាប់ដើមឈើនៅក្បែរៗ ដើម្បីឱ្យវាមានជីវិតរស់បន្តទៀត ឬនិយាយជាមួយដើមឈើផ្សេង ដូចកីឡាករនិយាយបំបាក់ស្មារតីគ្នានៅទីលានប្រកួត ដូចជា ៖ ចេញទៅ, ផ្លែឈើលើដើមរបស់ខ្ញុំទុំហើយ, ជួយផង និងប្រុងប្រយ័ត្ន ។ ពេលដើមឈើមួយទៀតទទួលដំណឹងពីគ្រោះធម្មជាតិ វានឹងការពារខ្លួនតាមវិធីផ្សេងៗ ។

ការនិយាយឃ្លាទាំងនេះរបស់ដើមឈើ គឺអ្នកជំនាញបានវាស់កម្រិតសំឡេង Ultrasonic ដែលដើមឈើតែងតែនិយាយរកគ្នាពេលកើតហេតុការណ៍ផ្សេងៗ ដូចជា ៖ ពេលពួកវាឈឺចាប់ ។ ដើមឈើទាំងឡាយចូលចិត្តនិយាយរឿងកុហកពីគ្រោះធម្មជាតិប្រាប់គ្នា ហើយពេលដើមឈើមួយទៀតឮថា នឹងមានគ្រោះធម្មជាតិកើតឡើង វានឹងបញ្ចេញសារធាតុពុលការពារដើមរបស់វា ប៉ុន្តែការពិត គ្មានគ្រោះធម្មជាតិកើតឡើងទេ ។

Thomas Scott ជាអ្នកជំនាញផ្នែកការវិវត្តដើមឈើ មកពីសាកលវិទ្យាល័យ Oxford ប្រទេសអង់គ្លេស ដែលបានសរសេរការស្រាវជ្រាវនេះនិយាយថា ៖ «ពេលដើមឈើ១ដើមនិយាយរឿងកុហកប្រាប់ដើមឈើមួយទៀត នឹងធ្វើឱ្យវាទទួលបានប្រយោជន៍ ។ លទ្ធផលការស្រាវជ្រាវបង្ហាញឱ្យឃើញថា ដើមឈើតែងតែនិយាយរឿងមិនពិតប្រាប់គ្នា ច្រើនជាងនិយាយការពិត» ។

ដើមឈើនីមួយៗតែងតែប្រជែងគ្នាដណ្តើមយកពន្លឺព្រះអាទិត្យ និងសារធាតុចិញ្ចឹម ទើបពួកវានិយាយរឿងកុហកប្រាប់គ្នាដើម្បីឱ្យដើមឈើនៅក្បែរៗបាត់បង់ធនធានសម្រាប់ការពារខ្លួនឯង បើទោះជាគ្មានគ្រោះធម្មជាតិកើតឡើងក៏ដោយ ។

តាមទិន្នន័យផ្នែកវិទ្យាសាស្ត្រឱ្យដឹងថា ដើមឈើអាចទំនាក់ទំនងគ្នាបានតាមរយៈមែកធាង និងប្រព័ន្ធឫសនៅក្រោមដី ឈ្មោះថា «Mycorrhizal Network» ។ ប្រព័ន្ធនេះអាចឱ្យដើមឈើ១ដើម ទំនាក់ទំនងជាមួយដើមឈើផ្សេងៗនៅក្នុងព្រៃ ហើយមានដើមឈើធំបំពេញតួនាទីជាទីតាំងកណ្តាលសម្រាប់ឱ្យដើមឈើផ្សេងៗទាក់ទងគ្នា ។

ការស្រាវជ្រាវរបស់ Society for the Protection of Underground Networks (SPUN) បញ្ជាក់យ៉ាងច្បាស់ថា ដើមឈើចាប់ពី៨០% ទៅ៩០% បាននិយាយទាក់ទងគ្នាតាមរយៈ Mycorrhizal Network ។

អ្នកជំនាញអង់គ្លេសបកស្រាយថា ដើមឈើធំមានតួនាទីបញ្ជូនសារធាតុចិញ្ចឹមទៅឱ្យដើមឈើផ្សេងទៀត ដើម្បីឱ្យឆាប់ធំលូតលាស់ និងរឹងមាំ ។ ដើមឈើក្នុងព្រៃសហការគ្នាបែបនេះ ពុំបោះបង់ចោលគ្នា ហើយពួកវាតែងតែនិយាយពីរឿងរ៉ាវទាំងអស់ដែលកើតឡើងក្នុងព្រៃឱ្យដើមឈើផ្សេងដឹង ដោយសារពួកវាមានបណ្តាញ Network ៕

ប្រទេសថៃ ៖ អង្គភាពសម្របសម្រួលមីយ៉ាន់ម៉ាបានទំនាក់ទំនងមកកាន់មជ្ឈមណ្ឌលបញ្ជាការព្រំដែនថៃនៅខេត្តតាក ដើម្បីបញ្ជូនជនរងគ្រោះចំនួន២៦០នាក់ ដែលចាញ់ល្បិ.ចក្រុមឆបោកអនឡាញ និងការជួញដូរមនុស្សនៅខេត្តមៀវឌី ប្រទេសមីយ៉ាន់ម៉ា តាមច្រកដឹកទំនិញនៅឃុំឆងឃេប ស្រុកភពព្រះ ខេត្តតាក ។ បន្ទាប់មក ថៃនឹងទំនាក់ទំនងទៅស្ថានទូតបញ្ជូនជនរងគ្រោះត្រឡប់ទៅប្រទេសកំណើតវិញ ក្នុងចំណោមជនរងគ្រោះទាំងនេះ ក៏មានជនជាតិខ្មែរដែរ ។

ជនរងគ្រោះដែលត្រូវក្រុមឆបោកលួងលោមឱ្យមកធ្វើការនៅប្រទេសមីយ៉ាន់ម៉ា ចំនួន២៦០នាក់ (ប្រុស២២១នាក់ និងស្រី៣៩នាក់) គឺមកពី២០ប្រទេស ត្រូវបានភាគីមីយ៉ាន់ម៉ា និងកងកម្លាំង (Democratic Karen Buddhist Army-DKBA) ប្រគល់ឱ្យភាគីថៃ នៅបរិវេណច្រកដឹកទំនិញក្នុងឃុំឆងឃេប ស្រុកភពព្រះ ខេត្តតាក ។

បន្ទាប់មក មន្ត្រីពាក់ព័ន្ធ និងប៉ូលិសអន្តោប្រវេសន៍ថៃនៅខេត្តតាក បាននាំជនរងគ្រោះទាំងអស់មកត្រួតពិនិត្យឯកសារដើម្បីបញ្ជាក់អត្តសញ្ញាណឃើញថា ជនរងគ្រោះទាំងនេះមកពី២០ប្រទេស រួមមាន ៖ ហ្វីលីពីន, កេនយ៉ា, តង់ហ្សានី, ប្រេស៊ីល, អេត្យូពី, ប៉ាគីស្ថាន, បង់ក្លាដែស, នេប៉ាល់, កម្ពុជា, ស្រីលង្ការ, អ៊ូហ្គង់ដា, តៃវ៉ាន់, ឡាវ, ឥណ្ឌូណេស៊ី, ប៊ូរុនឌី, នីហ្សេរីយ៉ា, កាណា, ឥណ្ឌា, ម៉ាឡេស៊ី និងចិន ។

ក្រោយពីត្រួតពិនិត្យឯកសាររកអត្តសញ្ញាណជនរងគ្រោះទាំងអស់រួចហើយ ភាគីថៃបានទំនាក់ទំនងទៅស្ថានទូតប្រទេសទាំងនេះឱ្យមកទទួលយកជនរងគ្រោះត្រឡប់ទៅប្រទេសកំណើតវិញ ។ នេះជាការបញ្ជូនខ្លួនជនរងគ្រោះចាញ់បោកតាមអនឡាញដំណាក់កាលដំបូង ហើយមីយ៉ាន់ម៉ានឹងបញ្ជូនជនរងគ្រោះចំនួន៧,០០០នាក់ទៀត មកប្រទេសថៃ ។

លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិនិយាយថា ជនរងគ្រោះទាំង២៦០នាក់នេះពុំស្នាក់នៅប្រទេសថៃទេ គឺថៃនឹងទំនាក់ទំនងទៅប្រទេសកំណើតពួកគេដោយផ្ទាល់ឱ្យមកទទួលពលរដ្ឋត្រឡប់ទៅវិញ បើប្រទេសណាមានជនរងគ្រោះច្រើននាក់អាចយកយន្តហោះមកដឹកតែមួយជើង ។ កាលពីរសៀលថ្ងៃទី១២ ខែកុម្ភៈ មីយ៉ាន់ម៉ាផ្តល់ដំណឹងមកថា នឹងបញ្ជូនជនរងគ្រោះមកឱ្យថៃ ចំនួន៧,០០០នាក់ទៀត ។

ការបញ្ជូនជនរងគ្រោះចាញ់បោកតាមអនឡាញមកឱ្យថៃ ក្រោយពីរដ្ឋាភិបាលថៃអនុវត្តវិធានការក្តៅ ដូចជា ៖ កាត់ភ្លើង បណ្តាញអ៊ីនធើរណេត សេវាទូរស័ព្ទ និងប្រេងឥន្ធនៈនៅបរិវេណព្រំដែនប្រទេសជិតខាង ហើយរដ្ឋាភិបាលចិនបានអរគុណថៃ ដែលអនុវត្តវិធានការក្តៅបំបែកទីតាំងក្រុមឆបោកអនឡាញ ៕