តេវ ត្រូវបានអ្នកមួយចំនួនស្គាល់តាមរយៈវីដេអូរឿងខ្លី ប៉ុន្តែលោកក៏ជាអ្នកចម្រៀងមួយរូបដូចគ្នា។ ថ្មីៗនេះ តេវ បានចេញបទចម្រៀងសម្រាប់អបអរពិធីបុណ្យចូលឆ្នាំខ្មែរនៅក្នុងផលិតកម្មសាន់ដេ។ ទោះជាយ៉ាងណាបទថ្មីរបស់លោកទទួលបានមតិប្រតិកម្មចម្រុះពីអ្នកលេងបណ្តាញសង្គមទាំងការសរសើរនិងរិះគន់។

ថ្មីៗនេះផលិតកម្មសាន់ដេ បានទម្លាក់បទ «ស្រលាញ់បងមិនខុសទេ» ពីតារាចម្រៀង តេវ សម្រាប់អបអរពិធីបុណ្យចូលឆ្នាំខ្មែរខណៈតារាចម្រៀងផ្សេងទៀតក៏បានចេញជាបន្តបន្ទាប់។ MV នេះគឺប្រមូលផ្តុំដោយអ្នកសម្តែងនៅក្នុងរឿងកំប្លែងខ្លីអមមកជាមួយនឹងទេសភាពតាមជនបទ។ បន្ទាប់ពីទម្លាក់វីដេអូខ្លី តេវ ត្រូវបានទស្សនិកជនបញ្ចេញមតិប្រតិកម្មចម្រុះជាច្រើន។

អ្នកលេងអ៊ីនធឺណិតបានបញ្ចេញមតិថា «សម្លេងអ៊ីចឹងចូល Sunday តាមណា? , សំឡេងអត់ចូលនឹងសាច់ភ្លេង, ពីរោះចង់ខ្យល់ចាប់, បទនេះបើអនុសាវរីយ៍ដឹងតែអ៊េម, សំឡេងមិនពីរោះផង, ស្តាប់បានតែចាក់បាសមិនកើត, ដូចអត់ពីរោះព្រោះច្រៀងមិនស៊ីនឹងចង្វាក់,ភ្លេងបទប្រពៃណីចូលឆ្នាំជាតិយើងឥឡូវស្ដាប់អត់ចូលត្រចៀកសោះ… »។ ទោះជាយ៉ាងណា ទន្ទឹមនឹងការមិនពេញចិត្តពីសំណាកទស្សនិកជនមួយចំនួន ប៉ុន្តែនៅមានអ្នកគាំទ្របានបញ្ចេញមតិវិជ្ជមាននិងលើកទឹកចិត្ត តេវ ដូចគ្នា។

អ្នកគាំទ្របានបញ្ចេញមតិថា «សំឡេងគាត់មានទឹកដមលើកដាក់គន្លុកគន្លាក់, អេម Sunday នៅតែអេម , អ្នកណាថាអីថាទៅខ្ញុំនៅតែគាំទ្រ, ប្រូតេវឆ្នាំនេះសម្លេងធ្ងន់ល្អ»។

គួរឱ្យដឹងថា តេវ បានចេញបទចម្រៀងមួយចំនួនប៉ុន្តែហាក់ទទួលបានការគាំទ្រនៅមានកម្រិត ហើយសំឡេងរបស់អ្នកចម្រៀងរូបនេះជារឿយៗរងនូវការវែកញែកពីអ្នកស្តាប់។ មុននឹងចាប់ អាជីពចម្រៀង តេវ បានធ្វើឱ្យមហាជនស្គាល់យ៉ាងទូលំទូលាយតាមរយៈការសម្តែងវីដេអូកំប្លែងខ្លីៗ៕

ទោះបីជាពេលនេះប្រជាប្រិយភាពរបស់ វណ្ណដា នៅក្នុងប្រទេសថៃមានការធ្លាក់ចុះកម្រិតគាំទ្រដោយសារតែស្ថានភាពព្រំដែនក្តីប៉ុន្តែសម្រាប់ជនជាតិថៃមួយចំនួននៅតែបង្ហាញការចូលចិត្ត វណ្ណដា និងស្តាប់បទចម្រៀងថ្មីរបស់លោកដដែល។ ជាមួយនឹងការពេញចិត្ត វណ្ណដា នៅតែប្រឈមជាមួយនឹងជនជ្រុលនិយមមួយចំនួនដែលនៅតែមានការបញ្ចេញមតិស្អប់លោក។

«ជួបជុំ» គឺជាបទសម្រាប់អបអរពិធីបុណ្យចូលឆ្នាំរបស់តារាចម្រៀង វណ្ណដា ដែលលោកបានផ្តល់ជូនជាមួយនឹងរសជាតិថ្មីលាយឡំការបញ្ជូលនូវវប្បធម៌ខ្មែរនិងចង្វាក់ភ្លេងដ៏ទាក់ទាញ។ នាឱកាសពិធីបុណ្យចូលឆ្នាំតារារ៉េបរូបនេះតែងតែឆក់បេះដូងទស្សនិកជនតាមរយៈស្នាដៃល្បីៗជាច្រើនដូចជាបទ «កំលោះស្រុកខ្មែរ» «សង្ក្រាន្តស្គាល់ស្នេហ៍» «៥០/៥០» «ចែចង់» «ក្រមុំស្រុកណា» និងបទចេញផ្សាយចុងក្រោយនេះជាដើម។

អ្វីដែលគួរឱ្យចាប់អារម្មណ៍គេសង្កេតឃើញថា បទ «ជួបជុំ» នេះបានរីកសាយភាយគួរឱ្យកត់សម្គាល់ដោយមានជនបរទេសជាច្រើនបានបង្ហាញការចូលចិត្តបទថ្មីរបស់ វណ្ណដា ហើយក្នុងនោះក៏មានជនជាតិថៃមួយចំនួនបង្ហាញការគាំទ្រលោកចំៗបើទោះបីជាប្រទេសទាំងពីរប្រឈមនឹងការមិនចុះសម្រុងគ្នាយ៉ាងណាក្តី។ ក្រៅពីនេះមានជនបរទេសជាច្រើនរូបបានធ្វើការ Reaction បទនេះដូចគ្នា។

តាមរយៈខម្មិននៅលើបណ្តាញសង្គមយូធូប ជនជាតិថៃបានសរសេរថា «ខ្ញុំមកពីប្រទេសថៃ ទោះបីជាប្រទេសយើងទាំងពីរមានជម្លោះក៏ដោយ ខ្ញុំមិនដែលស្អប់អ្នកឡើយ។ ខ្ញុំស្រឡាញ់បទចម្រៀងនេះខ្លាំងណាស់។ សួស្តីឆ្នាំថ្មី! ខ្ញុំសូមជូនពរឱ្យអ្នកមានសុខភាពល្អ»។ ការបញ្ចេញមតិនេះបានការឆ្លើយឆ្លងគ្នាជាច្រើននាក់ដូចគ្នា។

មុនពេល ថៃនិងខ្មែរ មានបញ្ហានឹងគ្នាបទ «សង្ក្រាន្តស្គាល់ស្នេហ៍» របស់ វណ្ណដា ទទួលបាននូវប្រជាប្រិយភាពយ៉ាងខ្លាំងសូម្បីតែតារាល្បីៗនៅក្នុងស្រុកថៃការបានរាំលេងបទនេះដូចគ្នា។ បច្ចុប្បន្ននេះ វណ្ណដា នៅតែមានជនជាតិថៃមួយចំនួនចូលចិត្តតន្រ្តីលោក ប៉ុន្តែក៏មានជនជាតិថៃមួយចំនួនទៀតនៅតាមបញ្ចេញមតិយោបល់អាក្រក់ៗដាក់ វណ្ណដា ដូចគ្នា៕

គីម ច័ន្ទជីញហ្វា បវរកញ្ញាវ័យក្មេងដែលតំណាងឱ្យប្រទេសកម្ពុជាបានឈ្នះមកុដ Miss Pre Teen Global 2026 នៅលើឆាកអន្តរជាតិដែលប្រកួតនៅប្រទេសម៉ាឡេស៊ីក្នុងកម្មវិធី Kids & Teens Pageant Global 2026។ ក្រៅពីឈ្នះមកុដធំឈុតតំណាងជាតិរបស់ ជីញហ្វា មានឈ្មោះ ទេពបក្សីសួគ៌នៃព្រៃហេមពាន្ត ក៏ដណ្តើមបានជ័យជម្នះផងដែរ។

នារាត្រីថ្ងៃទី៩ ខែមេសា វគ្គផ្តាច់ព្រ័ត្រនៃកម្មវិធី Kids & Teens Pageant Global 2026 បានរកឃើញម្ចាស់ជ័យលាភីធំៗទៅលើ Titel ចំនួន៤ហើយមានទាំងអ្នកតំណាងឱ្យឥណ្ឌូនេស៊ី ថៃ និងកម្ពុជា។ ក្នុងការប្រកួតនៅឯប្រទេសម៉ាឡេស៊ីនេះ គីម ច័ន្ទជីញហ្វា Miss Preteen Global Cambodia 2025 បានប្រកួតឈ្នះបវរកញ្ញាវ័យក្មេងដទៃទៀតដោយគ្រងមកុដជា Miss Pre Teen Global 2026 ។ ក្រៅពីការឈ្នះមកុដនេះ គីម ច័ន្ទជីញហ្វា បានឈ្នះពានរង្វាន់ចំនួន៣ផ្សេងទៀតរួមមាន Best Nation Costume, Best introduction Video និង Best in Social Media។

នៅក្នុងការប្រកួត Kids & Teens Pageant Global 2026 ជីញហ្វា បាននាំយកឈុតតំណាងជាតិ
«ទេពបក្សីសួគ៌នៃព្រៃហេមពាន្ត» ដែលជាឈុតច្នៃម៉ូតបែបសហសម័យនិង អំណាចនៃសត្វបក្សីក្នុងព្រេងនិទាន។ តាមការបញ្ជាក់នៅលើបណ្តាញសង្គមរបស់បវរកញ្ញាវ័យក្មេងរូបនេះ តួមកុដនៅលើក្បាលមានពាក់មកុដរាងខ្ពស់ស្រួចពណ៌មាស ដែលមានកាំរស្មីជុំវិញដូចពន្លឺព្រះអាទិត្យ បង្ហាញពីភាពរុងរឿង និងឧត្តមភាព។
គ្រឿងអលង្ការផ្នែកខាងលើមានការរចនាជាគ្រឿងអលង្ការមាសស្រោបខ្លួន ជាមួយនឹងអាវដែលមានរាងជាស្លាបបក្សីយ៉ាងផ្ចិតផ្ចង់។ មានពាក់គ្រឿងអលង្ការនៅដើមដៃ និងកដៃដែលមើលទៅរឹងមាំតែទន់ភ្លន់។ សត្វហង្ស ឬភីនីក (Phoenix) នៅលើដៃខាងស្តាំ មានរូបសត្វហង្សមាសដ៏ធំមួយដែលមានពន្លឺភ្លើងឆេះសន្ធោសន្ធៅ ចេញពីស្លាប និងកន្ទុយ។ វាជានិមិត្តរូបនៃ ការកើតជាថ្មី និង ភាពអមតៈ។

ការទទួលបានមកុដនេះបានធ្វើឱ្យអ្នកគាំទ្រវិស័យបវរកញ្ញាជាច្រើនសម្តែងការអបអរសាទរចំពោះជ័យលាភីរបស់កូនខ្មែរនៅលើឆាកអន្តរជាតិ។ ក្រៅពី ជីញហ្វា ស៊ីផាត ឡារីណា Little Miss Cambodia ទទួលបានពានរង្វាន់ Little Miss Global Rising Star 2026។

ជាការកត់សម្គាល់របស់ទស្សនិកជនអ្នកស្នេហាវិស័យបវរកញ្ញាការប្រកួតបវរកញ្ញាវ័យក្មេងជារឿយៗតែងតែទទួលបានលទ្ធផលជាទីគាប់ប្រសើរនៅលើឆាកអន្តរជាតិទទួលបានមកុដធំនៅក្នុងការប្រកួត ដែលអាចបញ្ជាក់បានថាវិស័យបវរកញ្ញានៅកម្ពុជាកាន់តែរីកចម្រើនទៅៗជាពិសេសធនធានជំនាន់ក្រោយៗគឺធ្វើបានល្អជាទីគាប់ប្រសើរគួរទីមោទនភាពសម្រាប់ប្រទេសកម្ពុជា៕

អាចកុហកប្រជាជននិងខ្លួនឯងបានប៉ុន្តែមិនអាចកុហកទូទាំងពិភពលោកបាននោះទេពីព្រោះនោះជាប្រវត្តិសាស្រ្តពិតប្រាកដមិនមែនជាប្រវត្តិសាស្រ្តនៅក្នុងប្រទេសថៃ។ ក្នុងពេលដែល Opal Suchata បង្ហោះរូបភាពពីប្រាសាទភ្នំរុង នៅក្នុងខេត្តបុរីរម្យ ផេក Miss World បានបញ្ជាក់ទីតាំងប្រវត្តិសាស្រ្តនេះថាជា «ប្រាសាទខ្មែរ»។

នៅយប់ថ្ងៃទី៩ ខែមេសា បណ្តាញសង្គមរបស់កម្មវិធី Miss World បានបង្ហោះរូបភាពរបស់ Opal Suchata Miss World 2025 ប៉ុន្មានសន្លឹកអមដោយការរៀបរាប់ដោយមិនបំភ្លៃប្រវត្តិសាស្រ្តឡើយទោះបីជាម្ចាស់មកុដជាជនជាតិថៃក៏ដោយ។

នៅក្នុងការរៀបរាប់ Miss World បានសរសេរថា Opal បានទៅទស្សនាខេត្តបុរីរ៉ាំ ដែលជាខេត្តមួយនៅភាគឦសាននៃប្រទេសថៃ ដែលជាខេត្តដ៏ល្បីល្បាញដោយសារការលាយបញ្ចូលគ្នារវាងបេតិកភណ្ឌបុរាណ និងភាពរស់រវើកទំនើប។ ទីតាំងនេះត្រូវបានគេស្គាល់ថាជាឧទ្យានប្រវត្តិសាស្ត្រភ្នំរុងដ៏អស្ចារ្យ ដែលជាប្រាសាទខ្មែរដែលស្ថិតនៅលើកំពូលភ្នំនិងបានផ្តល់ជូននូវបេតិកភ័ណ្ឌស្ថាបត្យកម្មដ៏ពិសេសមួយដែលឆ្លុះបញ្ចាំងពីភាពអស្ចារ្យនៃអង្គរ។

ការពិពណ៌នារបស់ Miss World ប្រៀបដូចជាទះថៃចំកណ្តាលមុខពីព្រោះកម្មវិធីនេះបានបញ្ជាក់ច្បាស់ៗតាមប្រវត្តិសាស្រ្តពិតប្រាកដដោយមិនបំភ្លៃដូចជាជាតិសាសន៍ខ្លះនោះទេដែលរៀនតែប្រវត្តិសាស្រ្តក្លែងក្លាយពុំទទួលស្គាល់ការពិត។ អ្វីដែលកាន់តែធ្វើឱ្យជនជាតិថៃឈឺចិត្តថែមទៀតនោះគឺថា Opal Suchata Miss World 2025 ជាជនជាតិថៃខំផ្សព្វផ្សាយពីកន្លែងទេសចរណ៍តែហាក់ដូចជាត្រូវបំបាក់មុខទាំងស្រុងដោយសារតែការបញ្ជាក់ការពិត ថាជា «ប្រាសាទខ្មែរ»។

ជាមួយគ្នានេះអ្នកលេងបណ្តាញសង្គមកម្ពុជាជាច្រើនបានកោតសរសើរកម្មវិធី Miss World ដែលហ៊ានបង្ហោះអ្វីដែលជាការពិតដោយមិនកោតខ្លាចការខឹងសម្បារពីប្រជាជនផ្ទះលេខ២ឡើយ៕