ប្រទេសវៀតណាម ៖ កាលពីថ្ងៃទី១៤ ខែកុម្ភៈ ឆ្នាំ២០២៥ សារព័ត៌មានវៀតណាមរាយការណ៍ថា តម្លៃគ្រាប់កាហ្វេវៀតណាម និងពិភពលោកបានកើនឡើងខ្ពស់លើសកម្រិតអ្នកជំនាញរំពឹងទុក ហើយធ្វើឱ្យកសិករដាំកាហ្វេស្តុកកាហ្វេទុកដើម្បីកើបប្រាក់ចំណេញ ។ តម្លៃកាហ្វេនៅតំបន់ខ្ពង់រាបកណ្តាលរបស់វៀតណាម បានកើនឡើងរហូតដល់៥ដុល្លារអាមេរិកក្នុង១គីឡូក្រាម នៅសប្តាហ៍ទី២ ខែកុម្ភៈ នេះ ។

បើទោះជាតម្លៃគ្រាប់កាហ្វេនៅវៀតណាម និងទីផ្សារពិភពលោកកើនឡើងខ្លាំង ប៉ុន្តែកសិករដាំកាហ្វេនៅប្រទេសវៀតណាមនៅតែប្រុងប្រយ័ត្នក្នុងការលក់កាហ្វេរបស់ពួកគេនៅលើទីផ្សារ ដោយសារតម្លៃកាហ្វេប្រែប្រួលធ្វើឱ្យកសិករជាច្រើនពុំប្រាកដចិត្តថា តើពួកគេគួរតែលក់កាហ្វេពេលណា ទើបទទួលបានប្រាក់ចំណេញច្រើន ។

អ្នកស្រី ង្វៀន ធិឈៀន ជាកសិករដាំកាហ្វេនៅខេត្តកនទូម ប្រទេសវៀតណាម និយាយថា ក្រុមគ្រួសាររបស់អ្នកស្រីបានលក់កាហ្វេត្រឹមតែ១តោនប៉ុណ្ណោះ ក្នុងតម្លៃ៤ដុល្លារអាមេរិកក្នុង១គីឡូក្រាម ។ អ្នកស្រីបានប្រមូលកាហ្វេស្តុកទុករង់ចាំឱ្យតម្លៃកើនឡើងថែមទៀត ទើបអ្នកស្រីលក់ចេញ ។

អ្នកជំនាញសន្និដ្ឋានថា តម្លៃគ្រាប់កាហ្វេវៀតណាមនឹងកើនឡើងខ្ពស់រហូតដល់ខែកក្កដា ឆ្នាំ២០២៥ តម្លៃកាហ្វេកើនឡើងនាពេលបច្ចុប្បន្ន អាចប៉ះពាល់ដល់អតិថិជន ។ អ្នកជំនាញបានដាស់តឿនកសិករកុំឱ្យចង់បានប្រាក់ចំណេញខ្លាំងពេកពីការលក់កាហ្វេ ដើម្បីចៀសវាងហានិភ័យហិរញ្ញវត្ថុ ។

ចំណែកតម្លៃគ្រាប់កាហ្វេលើទីផ្សារពិភពលោក ក៏បានកើនឡើងដែរ ដូចជា ៖ តម្លៃកាហ្វេ Robusta នៅទីក្រុងឡុងដ៍ ប្រទេសអង់គ្លេស គឺស្មើចាប់ពី៥,៥៧៣ដុល្លារ ទៅ៥,៦៩៦ដុល្លារអាមេរិកក្នុង១តោន ខណៈតម្លៃកាហ្វេ Arabica នៅទីក្រុងញូវយ៉ក សហរដ្ឋអាមេរិក បានកើនឡើងលើសនេះ ប្រមាណ៥៤០ដុល្លារអាមេរិក ។ អ្នកជំនាញសន្និដ្ឋានថា តម្លៃគ្រាប់កាហ្វេលើទីផ្សារពិភពលោក នឹងកើនឡើងដល់៩,៤៦០ដុល្លារអាមេរិកក្នុង១តោន នៅខែមីនា ឆ្នាំ២០២៥ ៕

ចិនជាប្រទេសដែលមានសេដ្ឋកិច្ចរីកចម្រើន និងលូតលាស់លឿនជាងគេបំផុតនៅលើពិភពលោក បន្ទាប់ពីសហរដ្ឋអាមេរិក ហើយក៏ជាប្រទេសមួយដែលមានវ័យចំណាស់ជាងគេផងដែរ។ ដូច្នេះប្រទេសនេះគឺសម្បូរកន្លែងទេសចរណ៍ល្បីៗជាច្រើន ដែលបង្ហាញពីវប្បធម៌ដ៏សម្បូរបែប សិល្បះ និងសាសនា ដែលយើងគ្រប់គ្នាគួរតែស្វែងយល់។ នេះបើយោងតាមសារព័ត៌មានបរទេស CNN បានចុះផ្សាយថា តំបន់ទេសចរណ៍ខាងក្រោមនេះ គឺមានភាពទាក់ទាញ និងល្បីល្បាញខ្លាំងបំផុតនៅប្រទេសចិន ដោយសាររចនាសម្ពន្ធ័ប្លែកខុសពីគេ និងប្រវត្តិសាស្ត្រដ៏អស្ចារ្យ ដែលភ្ញៀវទេសចរមិនគួរមើលរំលងឡើយ៖

១.មហាកំពែងចិន Mutianyu ៖ មហាកំពែងចិន គឺជាកម្រងជញ្ជាំងនិងកំពែងបុរាណដែលមានទីតាំងស្ថិតនៅភាគខាងជើងប្រទេសចិន ត្រូវបានសាងសង់ប្រមាណ ៥០០ ឆ្នាំមុន និងមានប្រវែងសរុបចំនួន ២១ ១៩៦ គីឡូម៉ែត្រ។ មហាកំពែង Mutiayu នេះគឺជាសណង់ប្រវត្តិសាស្ត្រ ដែលមានឈ្មោះល្បីល្បាញ ហើយក៏ជាកំពែងដ៏វែងបំផុតមួយនៅលើពិភពលោកផងដែរ។ មហាកំពែងចិនត្រូវបានចុះនៅក្នុងបញ្ជីបេតិកភណ្ឌពិភពលោកយូណេស្កូ តាំងពីឆ្នាំ១៩៨៧ សាងសង់ឡើងក្នុងគោលបំណងការពារការឈ្លានពានកាលពីសម័យបុរាណ។

២.កំពូលភ្នំលីងសាន៖ គឺជាភ្នំដែលល្បីល្បាញជាងគេនៅប្រទេសចិន មានទីតាំងស្ថិតស្រុក Mentougou នៃទីក្រុងប៉េកាំង។ កំពូលភ្នំនេះមានសារៈសំខាន់សម្រាប់សត្វព្រៃ ជាពិសេសសត្វស្លាប។ នៅកម្ពស់ ២,៣០៣ ម៉ែត្រ កំពូលភ្នំលីងសានគឺជាចំណុចខ្ពស់បំផុតនៅក្នុងក្រុងប៉េកាំង។ មកដល់ទីនេះភ្ញៀវទេសចរអាចទស្សនាព្រះដំណាក់ និងរូបដិមាព្រះពុទ្ធដ៏ធំមហិមា ដែលមានកម្ពស់ ៨៨ម៉ែត្រស្ថិតនៅលើកំពូលភ្នំ ហើយក៏ជាកន្លែងសក្ការៈបូជាដ៏ស័ក្តសិទ្ធសម្រាប់ប្រជាជននៅក្នុងតំបន់ផងដែរ។

៣.The Bund ឬ Wai Tan៖ The Bund ដែលត្រូវបានគេស្គាល់ថាជា វ៉ៃតាន់ (wai tan) គឺជាកន្លែងទាក់ទាញដ៏ពេញនិយម និងអ៊ូអរបំផុតនៅក្នុងទីក្រុងសៀងហៃ។ វ៉ៃតាន់ ក៏ជាតំបន់មាត់ទឹកដ៏ស្រស់ស្អាតដែលមានទីតាំងនៅតាមច្រាំងទន្លេ Huangpu ផ្តល់នូវការមើលឃើញដ៏គួរឱ្យទាក់ទាញទៅក្នុងយុគសម័យអតីតកាលនៃទីក្រុងសៀងហៃចាស់។ សម្រាប់ភ្ញៀវទេសចរដែលបានទៅដល់ទីនោះ នឹងទទួលបានអារម្មណ៍ស្រស់ស្រាយបំផុតនូវការទស្សនាបែបប្រវត្តិសាស្រ្ត និងសម័យទំនើប។

៤. ប្រាសាទ Bach Ma៖ ប្រាសាទ Bach Ma មានទីតាំងនៅទីក្រុង Luoyang ខេត្ត Henan ប្រទេសចិន ត្រូវបានគេនិយាយថាជាប្រាសាទដំបូងគេដែលសាងសង់បន្ទាប់ពីព្រះពុទ្ធបានមកដល់ប្រទេស។ ជាមួយនឹងប្រវត្តិសាស្រ្តជិត ២,០០០ ឆ្នាំ ប្រាសាទនេះត្រូវបានគេស្គាល់ថាជាកន្លែងកំណើតនៃព្រះពុទ្ធសាសនាចិន។ យោងតាមកំណត់ត្រា វត្ត Bach Ma ត្រូវបានសាងសង់ឡើងដោយអធិរាជ Han Ming ក្នុងឆ្នាំ ៦៨ នៃគ.ស ដើម្បីធ្វើជាកន្លែងស្នាក់នៅ និងជាកន្លែងដើម្បីផ្សព្វផ្សាយព្រះពុទ្ធសាសនានៅក្នុងប្រទេសចិន។

៥.ប្រាសាទ Linh An៖ ប្រាសាទ Linh An ស្ថិតនៅជើងភ្នំ Linh An ស្រុក Tay Ho នៃទីក្រុង Hangzhou ខេត្ត Jiangnan ប្រទេសចិន។ វត្តដ៏អស្ចារ្យនេះឈរទល់នឹងភ្នំ Phi Lai ដ៏ល្បី ហើយបែរមុខទៅបឹងខាងលិចដ៏រ៉ូមែនទិក។ វត្ត Linh An ត្រូវបានកសាងឡើងក្នុងឆ្នាំ ៣២៦ នៃគ.ស មានប្រវត្តិជាង ១៦០០ ឆ្នាំ ដែលកន្លែងនេះត្រូវបានចាត់ទុកថាជាទឹកដីដ៏ពិសិដ្ឋនៃពុទ្ធសាសនា Zen ដែលជានិកាយពុទ្ធសាសនាមហាយានមានដើមកំណើតពីបុព្វបុរសឥណ្ឌាចំនួន ២៨ ជំនាន់ ហើយបានរីករាលដាលយ៉ាងខ្លាំងនៅក្នុងប្រទេសចិន។ វត្ត Linh An ត្រូវបានគេស្គាល់ថាជាវត្តលេខ ១ ក្នុងខេត្ត Jiangnan ដោយសារប្រវត្តិសាស្ត្រដ៏យូរលង់ ទេសភាពដ៏ទាក់ទាញ និងបេតិកភណ្ឌវប្បធម៌ដ៏ជ្រាលជ្រៅបំផុត៕

ប្រទេសជប៉ុន ៖ នៅខែកុម្ភៈ ឆ្នាំ២០២៥ ពលរដ្ឋជប៉ុនពិបាកធ្វើដំណើរយ៉ាងខ្លាំង ដោយសារផ្ទាំងទឹកកកបានធ្លាក់យ៉ាងក្រាស់គ្របដណ្តប់ និងកាត់ផ្តាច់ផ្លូវជាច្រើនខ្សែ ។ អ្នកដំណើរពុំអាចធ្វើដំណើរទៅដល់គោលដៅ ហើយត្រូវសម្រាកនៅតាមផ្លូវ រង់ចាំភ្នាក់ងារសម្អាតផ្ទាំងទឹកកក ខណៈភ្នាក់ងារ​ពិបាកដឹកជញ្ជូនឧបករណ៍សម្អាតមកកាន់កន្លែងព្រិលធ្លាក់ខ្លាំង ។ រីឯការធ្វើដំណើរតាមផ្លូវអាកាស និងរថភ្លើង ក៏ប៉ះពាល់ដូចគ្នាដែរ ដោយសារក្រុមហ៊ុនលុបចោលការធ្វើដំណើរ ។

សារព័ត៌មានបរទេសបានចុះផ្សាយកាលពីថ្ងៃទី១៤ ខែកុម្ភៈ ឆ្នាំ២០២៥ ថា អាកាសធាតុត្រជាក់ និងព្រិលធ្លាក់ខ្លាំងបានគ្របដណ្តប់ស្ទើរគ្រប់តំបន់ទាំងអស់នៅប្រទេសជប៉ុន រហូតធ្វើឱ្យពលរដ្ឋស្លា.ប់ ១៣នាក់ និងរងរបួស១៧៣នាក់ ដោយសារពុំអាចទ្រាំទ្រនឹងអាកាសធាតុត្រជាក់ និងគ្រោះថ្នាក់ចរាចរណ៍ ខណៈភ្នាក់ងារសម្អាតព្រិលពិបាកធ្វើការ ។ លើសពីនេះ ព្រិលធ្លាក់ខ្លាំងធ្វើឱ្យក្រុមហ៊ុនអាកាសចរណ៍នានាលុបចោលការធ្វើដំណើរតាមយន្តហោះ និងប៉ះពាល់ការធ្វើដំណើរតាមរថភ្លើង ។

ព្រិលធ្លាក់ខ្លាំងនៅខេត្តហ្វុគុឈិម៉ាក និងឆ្នេរសមុទ្រប៉ាស៊ីហ្វិកភាគខាងកើតប្រទេសជប៉ុន ហើយព្រិលបានធ្លាក់គ្របដណ្តប់លើផ្លូវសំខាន់ៗ និងកាត់ផ្តាច់ការធ្វើដំណើររបស់ពលរដ្ឋ ប្រវែងជាង៥គីឡូម៉ែត្រ ។ ពលរដ្ឋធ្វើដំណើរតាមផ្លូវជាច្រើនបានស្នាក់នៅសណ្ឋាគារ ចំនួន៣កន្លែង ដោយសារពុំអាចធ្វើដំណើរបន្តទៀត ។

អាជ្ញាធរឱ្យដឹងថា ពលរដ្ឋបានបាត់បង់ជីវិត និងរងរបួសជាច្រើននាក់ដោយសារព្រិលធ្លាក់ខ្លាំង ហើយការជួយសង្គ្រោះពលរដ្ឋធ្វើឡើងទាំងលំបាក ដោយសារអាជ្ញាធរពិបាកធ្វើដំណើរតាមផ្លូវ ។ ជំហ៊ានដំបូង អាជ្ញាធរត្រូវប្រមូលកម្លាំងមកសម្អាតព្រិលនៅតាមផ្លូវជាមុន ។ ពលរដ្ឋនៅខេត្តហ្វុគុឈិម៉ាក ពុំធ្លាប់ឃើញព្រិលធ្លាក់ខ្លាំងបែបនេះអស់រយៈពេលជាង១០ឆ្នាំ ហើយពួកគេត្រូវដើរឆ្លងកាត់ព្រិលមានកម្ពស់ខ្ពស់ ខណៈរថយន្តទាំងអស់គ្របដណ្តប់ដោយព្រិល ។ អាជ្ញាធរក៏បានដាស់តឿនពលរដ្ឋផងដែរ ឱ្យប្រុងប្រយ័ត្នការធ្វើដំណើរ ។

ភ្នាក់ងារឧតុនិយមប្រកាសថា ប្រទេសជប៉ុនទទួលឥទ្ធិពលខ្យល់សម្ពាធទាប និងសំណើមកាន់តែខ្លាំង ទើបធ្វើឱ្យព្រិលធ្លាក់ខ្លាំងក្នុងតំបន់ជាច្រើន ។ កាលពីព្រឹកថ្ងៃទី៧ ខែកុម្ភៈ កន្លងមក នៅខេត្តគីហ្វុ និងនីង៉ាតាក់ មានព្រិលធ្លាក់ខ្លាំងរយៈពេល៣ម៉ោង មានកម្ពស់១៦សង់ទីម៉ែត្រ ខណៈខេត្តគុនម៉ាក់ ព្រិលធ្លាក់កម្ពស់១៥សង់ទីម៉ែត្រ ។ ក្រៅពីនេះ មានខ្យល់បក់ខ្លាំង និងទឹករលកខ្ពស់តាមឆ្នេរសមុទ្រជប៉ុន នៅទិសខាងជើង និងខាងលិច ៕

ប្រទេសថៃ ៖ ភ្លើងឆេះកន្លែងដាំកញ្ឆា មហាជនសប្បាយរីករាយសើចក្អាកក្អាយគ្រប់ៗគ្នា សូម្បីអ្នកពន្លត់អគ្គិភ័យ ក៏សើចញញឹមបិទមាត់មិនជិតឡើយ ព្រោះតែបានហិតផ្សែងកញ្ឆា ។ បើស្តាប់មួយភ្លែត អាចគិតថាមានគំនិតមិនល្អ ពេលបានឃើញអ្នកជិតខាងមានទុក្ខព្រួយ ប៉ុន្តែក្រោយដឹងមូលហេតុ ហួសចិត្តទប់សំណើចមិនបានដែរ ។

សារព័ត៌មាន Thairath រាយការណ៍ថា កាលពីថ្ងៃទី១៣ ខែកុម្ភៈ ឆ្នាំ២០២៥ ក្រោយពីទទួលសេចក្តីរាយការណ៍ភ្លើងឆេះលំនៅឋានពលរដ្ឋក្នុងអគារពាណិជ្ជកម្មមួយកន្លែងស្ថិតនៅតំបន់វែលខាំចុមធៀន ឃុំណងព្រឺ ស្រុកបាងឡាមុង ខេត្តឈុនបុរី មជ្ឈមណ្ឌលវិទ្យុសង្គ្រោះគ្រោះមហន្តរាយទីក្រុងប៉ាតាយ៉ា បានបញ្ជូនរថយន្តពន្លត់ភ្លើង២គ្រឿងទៅកន្លែងកើតហេតុ ព្រមទាំងទាក់ទងសមត្ថកិច្ចនៅទីក្រុងប៉ាតាយ៉ា មកជួយអន្តរាគមន៍ ។

នៅកន្លែងកើតហេតុ គឺជាអគារពាណិជ្ជកម្មកម្ពស់៤ជាន់ ដែលផ្នែកខាងមុខមានស្លាកសញ្ញាក្រុមហ៊ុន Little Christiania Co., Ltd. ។ អគារនេះបានឆេះយ៉ាងសន្ធោសន្ធៅ ដោយមានភ្លើង និងផ្សែងយ៉ាងខ្លាំងចេញពីអគារជាន់ទី២ ។ ភ្នាក់ងារពន្លត់ភ្លើងក៏បានបាញ់ទឹកពន្លត់ភ្លើងទាំងក្នុងអគារ និងក្រៅអគារ ប៉ុន្តែការបាញ់ទឹកធ្វើឡើងយ៉ាងលំបាក ដោយសារផ្សែងចេញពីអគារមានក្លិនប្លែកៗ ។

តាមការត្រួតពិនិត្យឃើញថា ចាប់ពីអគារជាន់ទី២ រហូតដល់ជាន់លើបំផុត គឺជាកន្លែងដាំកញ្ឆា ហើយភ្លើងបានឆេះដើមកញ្ឆា ។ ហេតុនេះ ធ្វើឱ្យមានផ្សែងយ៉ាងច្រើនភាយឡើងលើ និងគ្របដណ្តប់នៅបរិវេណជុំវិញ ដែលធ្វើឱ្យភ្នាក់ងារពន្លត់ភ្លើងចំណាយពេលជិត១ម៉ោងក្នុងការបាញ់ទឹកពន្លត់ភ្លើង ទើបអាចគ្រប់គ្រងស្ថានការណ៍បាន ។

អ្នកស្រី កាន់ចាណា ហ្វាំងសាន់ធៀយ៉ាក់ អាយុ៤០ឆ្នាំ ជាអ្នកមើលការខុសត្រូវអគារ និយាយថា នៅទីនេះ បានសុំការអនុញ្ញាតដាំកញ្ឆាក្នុងអគារត្រឹមត្រូវតាមច្បាប់ ។ រីឯមូលហេតុបណ្តាលឱ្យភ្លើងឆេះ គឺដោយសារមានបញ្ហាប្រព័ន្ធភ្លើងបើកចោលរហូតសម្រាប់ដាំកញ្ឆា ។ ភ្លើងឆេះអគារបានបំផ្លាញទ្រព្យសម្បត្តិ និងកញ្ឆា ស្មើទឹកប្រាក់ប្រមាណ ២សែនបាត (ឬស្មើ៦ពាន់ដុល្លារអាមេរិក) ប៉ុន្តែសំណាងល្អ គ្មានអ្នកណាម្នាក់រងរបួសទេ ។

ទោះជាភ្នាក់ងារពន្លត់ភ្លើងអាចគ្រប់គ្រងស្ថានការណ៍ក្តី ប៉ុន្តែភ្លើងបានឆេះអគារធ្វើឱ្យអណ្តាតភ្លើងឆេះដើមកញ្ឆា និងចេញផ្សែងយ៉ាងខ្លាំងគ្របដណ្តប់លើបរិវេណតំបន់វែលខាំចុមធៀន ដែលផ្សែងនេះធុំក្លិនកញ្ឆា ។ អ្នកភូមិ ភ្ញៀវទេសចរបរទេស និងភ្នាក់ងារពន្លត់ភ្លើងនៅម្តុំនេះបានស្រូបក្លិនផ្សែង ហើយក៏កើតអាការៈស្រវឹងកញ្ឆា ឈឺក្បាល និងឈឺភ្នែក ខណៈអ្នកខ្លះទៀត ស្រាប់តែមានអារម្មណ៍ល្អ សើចសប្បាយ ក្រោយពីពួកគេស្រូបក្លិនផ្សែង ។

វាបែរជាធ្វើឱ្យពលរដ្ឋ និងភ្ញៀវទេសចរបរទេសដែលមកឈរមើលភ្លើងឆេះអគារ បែរជាមានអារម្មណ៍សប្បាយរីករាយ និងសើចក្អាកក្អាយឥតឈប់ សូម្បីតែភ្នាក់ងារពន្លត់ភ្លើងក៏សប្បាយចិត្តដែរ ពួកគេបាញ់ទឹកពន្លត់ភ្លើងបណ្តើរ សើចបណ្តើរ ៕

ប្រទេសដាណឺម៉ាក ៖ កាលពីថ្ងៃទី១៣ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ប្រទេសដាណឺម៉ាកបានរៀបចំយុទ្ធនាការមួយឈ្មោះ «Denmarkification» ដើម្បីចុះឈ្មោះពលរដ្ឋគាំទ្រការទិញរដ្ឋកាលីហ្វ័រញ៉ាពីអាមេរិក ស្មើទឹកប្រាក់១លានលានដុល្លារអាមេរិក ។ វាជាការឆ្លើយតបជាមួយលោក Donald Trump ដែលប្រាថ្នាកាន់កាប់កោះហ្គ្រីនឡែនរបស់ដាណឺម៉ាក ។

ចាប់ពីយុទ្ធនាការនេះបង្កើតឡើងកាលពីថ្ងៃទី១១ ខែកុម្ភៈ រហូតមកដល់ថ្ងៃទី១៣ ខែកុម្ភៈ គឺមានពលរដ្ឋដាណឺម៉ាកចុះឈ្មោះគាំទ្រការទិញរដ្ឋកាលីហ្វ័រញ៉ាពីអាមេរិក រហូតដល់ជាង២សែននាក់ ។

អ្នកបង្កើតយុទ្ធនាការ Denmarkification និយាយថា ប្រធានាធិបតីអាមេរិក លោក Trump ហាក់ពុំសូវចាប់អារម្មណ៍នឹងរដ្ឋកាលីហ្វ័រញ៉ាទេ ហើយលោកក៏ពុំចូលចិត្តរដ្ឋនេះប៉ុន្មានដែរ ។ រដ្ឋកាលីហ្វ័រញ៉ាបានរងនូវការបំផ្លាញច្រើនជាងរដ្ឋផ្សេងៗនៅអាមេរិក លោក Trump បានប្រេះឆាជាមួយរដ្ឋនេះអស់រយៈពេលជាច្រើនឆ្នាំហើយ ។ ដូច្នេះ វាគ្មានបញ្ហាអ្វីទេ បើពលរដ្ឋដាណឺម៉ាកសុំទិញរដ្ឋនេះដោយតម្លៃសមរម្យ ។

ខ្លឹមសារក្នុងយុទ្ធនាការ Denmarkification បញ្ជាក់ថា តើអ្នកជ្រាបទេថា ដាណឺម៉ាកត្រូវការអ្វី? យើងត្រូវការពន្លឺព្រះអាទិត្យ និងការជិះស្គី ហើយយើងនឹងធ្វើឱ្យក្តីសុបិននេះក្លាយជាការពិត ។ យើងនឹងទិញរដ្ឋកាលីហ្វ័រញ៉ាពីលោក Trump ពីព្រោះរដ្ឋនេះគួរតែជារបស់យើង ហើយយើងត្រូវការការគាំទ្រពីពលរដ្ឋដាណឺម៉ាកគ្រប់រូប ។ ដាណឺម៉ាកនឹងការពារពិភពលោកសេរី យើងនឹងផ្លាស់ប្តូរឈ្មោះ «រដ្ឋកាលីហ្វ័រញ៉ា» ទៅជា «Hans Christian Andersenland» ។

ទោះយ៉ាងណា យុទ្ធនាការនេះធ្វើឡើងដើម្បីប្រមូលឈ្មោះពលរដ្ឋគាំទ្រតែប៉ុណ្ណោះ និងគ្មានការទទួលថវិកាបរិច្ចាគដើម្បីទិញរដ្ឋកាលីហ្វ័រញ៉ាទេ ខណៈអ្នកបង្កើតយុទ្ធនាការប្រាប់ថា រដ្ឋកាលីហ្វ័រញ៉ា នឹងប្តូរជា New Denmark ។ រដ្ឋកាលីហ្វ័រញ៉ា មានទីក្រុងឈ្មោះថា Solvang ឬជាទីក្រុងរបស់ដាណឺម៉ាក ដោយសាររដ្ឋនេះមានទេសភាពធម្មជាតិស្រស់ស្អាត និងលំនៅឋានបែបអឺរ៉ុប ហើយការរស់នៅទីនេះ មានលក្ខណៈស្រដៀងគ្នានឹងការរស់នៅប្រទេសដាណឺម៉ាក ។

ចំណែកហ្គ្រីនឡែន (Greenland) គឺជាកោះដ៏ធំរបស់ប្រទេសដាណឺម៉ាក និងជាកោះធំជាងគេបំផុតលើពិភពលោក ។ កោះនេះស្ថិតនៅចន្លោះមហាសមុទ្រអាកទិក និងមហាសមុទ្រអាត្លង់ទិក នៅភាគខាងកើតនៃប្រជុំកោះអាកទិករបស់ប្រទេសកាណាដា ហើយលោក Trump ប្រកាសម្តងហើយម្តងទៀតថា ចង់កាន់កាប់កោះនេះ ៕