អាកាសយានដ្ឋាន គឺជាហេដ្ឋារចនាសម្ព័ន្ធដ៏សំខាន់មួយ លើកកម្ពស់ការអភិវឌ្ឍសេដ្ឋកិច្ចសង្គម ហើយបានដើរតួនាទីក្នុងការតភ្ជាប់ពីតំបន់មួយទៅតំបន់មួយ និងពីប្រទេសមួយទៅប្រទេសមួយទៀត។ នៅពេលធ្វើដំណើរតាមយន្តហោះ រឿងមួយដែលអ្នកអាចកត់សម្គាល់បានយ៉ាងងាយស្រួលនោះ គឺអាកាសយានដ្ឋានអន្តរជាតិ និងនៅក្នុងស្រុកភាគច្រើនមិនត្រូវបានសាងសង់នៅជិតកណ្តាលទីក្រុងនោះទេ ពោលគឺគេសាងសង់នៅជាយក្រុង ឬតំបន់ណាមួយដែលមិនសូវមានមនុស្សរស់នៅច្រើន ដោយសារមូលហេតុធំៗទាំងនេះ៖

១.បញ្ហាសុវត្ថិភាពហោះហើរ៖ ហេតុផលដ៏សំខាន់បំផុតមួយ ដែលជារឿយៗព្រលានយន្តហោះត្រូវបានសាងសង់នៅឆ្ងាយពីតំបន់លំនៅដ្ឋាន និងកណ្តាលទីក្រុងគឺដើម្បីសុវត្ថិភាព។ ប្រតិបត្តិការអាកាសយានដ្ឋាន ជាពិសេសការហោះហើរ និងការចុះចត អាចបង្កហានិភ័យជាក់លាក់ដល់តំបន់ជុំវិញ។ យន្តហោះអាចចុះចតក្នុងល្បឿនលឿន ហើយករណីខ្លះអាចជួបឧបទ្ទវហេតុធ្លាក់ជាដើម។

ប្រសិនបើអាកាសយានដ្ឋានត្រូវបានសាងសង់នៅជិតតំបន់លំនៅដ្ឋាន ឬតំបន់មានមនុស្សច្រើន គ្រោះថ្នាក់យន្តហោះអាចបណ្តាលឱ្យមានការខាតបង់យ៉ាងច្រើនដល់អាយុជីវិតមនុស្ស និងទ្រព្យសម្បត្តិ។ ទោះបីជាអត្រានៃគ្រោះថ្នាក់យន្តហោះមានតិចតួចក៏ដោយ ក៏ត្រូវតែមានការប្រុងប្រយ័ត្ន ដើម្បីកាត់បន្ថយហានិភ័យណាមួយ។ ការសាងសង់អាកាសយានដ្ឋាននៅឆ្ងាយពីទីក្រុងជួយកាត់បន្ថយការខូចខាតក្នុងករណីបែបនេះ ទន្ទឹមនឹងនោះក៏បង្កើតកន្លែងសុវត្ថិភាពសម្រាប់យន្តហោះចុះចតផងដែរ។

២.កាត់បន្ថយសំលេងរំខាន៖ យន្តហោះនៅពេលចុះចត តែងតែបង្កើតសំឡេងខ្លាំង ដែលប៉ះពាល់អវិជ្ជមានដល់សុខភាពអ្នករស់នៅក្បែរនោះ។ លើសពីនេះ ការបំភាយឧស្ម័នពីយន្តហោះ ជាពិសេសជើងហោះហើរពាណិជ្ជកម្មធំៗ ក៏រួមចំណែកដល់ការបំពុលខ្យល់ផងដែរ។ ដូច្នេះការកសាងអាកាសយានដ្ឋាននៅឆ្ងាយពីទីក្រុង ជួយកាត់បន្ថយផលប៉ះពាល់នៃសំឡេង និងការបំពុលបរិស្ថានលើតំបន់លំនៅដ្ឋាន បង្កើតលក្ខខណ្ឌសម្រាប់ការអនុវត្តវិធានការការពារបរិស្ថាន ដូចជាការដាំដើមឈើ ការកសាងតំបន់កាត់បន្ថយសំឡេង និងការសម្អាតខ្យល់។

៣.តម្រូវការលំហ៖ អាកាសយានដ្ឋានអន្តរជាតិទំនើបត្រូវការផ្ទៃដីធំ ដើម្បីសាងសង់ហេដ្ឋារចនាសម្ព័ន្ធ រួមមានផ្លូវរត់ ចំណតអ្នកដំណើរ កន្លែងចតយន្តហោះ និងតំបន់សេវាកម្មបច្ចេកទេស។តំបន់នៅជិតកណ្តាលទីក្រុងជាញឹកញាប់មានដង់ស៊ីតេប្រជាជនខ្ពស់ និងដីមានកំណត់ ប្រសិនបើព្រលានយន្តហោះត្រូវបានសាងសង់ វានឹងមានការលំបាកខ្លាំងណាស់ក្នុងការបោសសម្អាតដី និងធានាបាននូវផ្ទៃដីគ្រប់គ្រាន់សម្រាប់តម្រូវការអភិវឌ្ឍន៍នាពេលអនាគត។ ដូច្នេះអាកាសយានដ្ឋានច្រើនតែត្រូវបានគេសាងសង់នៅឆ្ងាយពីទីក្រុង នៅតំបន់ជាយក្រុង ឬនៅក្រៅតំបន់ដែលមានដីធំទូលាយ។

៤.កាត់បន្ថយការស្ទះចរាចរណ៍៖ អាកាសយានដ្ឋានដែលសាងសង់នៅឆ្ងាយពីទីក្រុងក៏ជួយកាត់បន្ថយការកកស្ទះចរាចរណ៍នៅតំបន់កណ្តាលទីក្រុងផងដែរ។ អាកាសយានដ្ឋានតែងតែមានអ្នកដំណើរ និងបុគ្គលិកយ៉ាងច្រើនធ្វើដំណើរជារៀងរាល់ថ្ងៃ ប្រសិនបើសាងសង់នៅជិតកណ្តាលទីក្រុង វានឹងដាក់សម្ពាធបន្ថែមលើចរាចរណ៍ក្នុងទីក្រុង ជាពិសេសក្នុងម៉ោងប្រញាប់។

៥.អភិវឌ្ឍន៍សេដ្ឋកិច្ច៖ ព្រលានយន្តហោះក៏មានតួនាទីសំខាន់ក្នុងការលើកកម្ពស់ការអភិវឌ្ឍសេដ្ឋកិច្ច និងបង្កើតឱកាសការងារ។ នៅពេលដែលព្រលានយន្តហោះត្រូវបានសាងសង់នៅឆ្ងាយពីទីក្រុង វាមិនត្រឹមតែជួយកាត់បន្ថយការកកស្ទះក្នុងទីក្រុងប៉ុណ្ណោះទេ ថែមទាំងរួមចំណែកដល់ការអភិវឌ្ឍន៍ជាយក្រុង ប្រែក្លាយវាទៅជាមជ្ឈមណ្ឌលសេដ្ឋកិច្ចថ្មី ទាក់ទាញអាជីវកម្ម អភិវឌ្ឍសួនឧស្សាហកម្ម តំបន់ពាណិជ្ជកម្ម និងតំបន់លំនៅដ្ឋាន បង្កើតឱកាសការងាររាប់ពាន់កន្លែងសម្រាប់ប្រជាជនក្នុងតំបន់៕

ប្រទេសចិន ៖ ថ្មីៗនេះ ពលរដ្ឋចិនបានចែកចាយអាហារប្លែកបំផុតក្នុងបណ្តាញសង្គម គឺសរសៃដែកកអាំងប្រឡាក់គ្រឿង ។ អាហារប្លែកនេះត្រូវបានពលរដ្ឋចិនសរសើរមិនដាច់ពីមាត់ថា ពេលបរិភោគក្តៅៗ វាពិតជាមានរសជាតិឆ្ងាញ់ណាស់ បើបានសាករសជាតិម្តងហើយ នឹងចង់សាកម្តងទៀត ។ អ្នកលក់នឹងលក់ចាប់ពីកន្លះគីឡូក្រាមឡើងទៅ ក្នុងតម្លៃ១៥ដុល្លារអាមេរិក ហើយពេលបរិភោគរួច ពុំចាំបាច់ប្រគល់ដែកឱ្យអ្នកលក់វិញទេ ។

កាលពីថ្ងៃទី២៥ ខែកុម្ភៈ ឆ្នាំ២០២៥ អ្នកលេង TikTok បានចែកចាយមុខម្ហូបប្លែកនេះយ៉ាងច្រើន ក្រោយពីគណនី TikTok ឈ្មោះ @aroisudjeen (អារ៉យស៊ុតជីន) ដែលតែងតែបង្ហោះវីដេអូអាហារប្លែកៗនៅគ្រប់ទីកន្លែងក្នុងប្រទេសចិន បានបង្ហោះវីដេអូអាហារប្លែកមួយ ដែលធ្វើឱ្យអ្នកទស្សនាឃើញហើយភ្ញាក់ផ្អើលគ្រប់គ្នា និងនិយាយថា «ដែកចង្កាក់អាំង» ។

សរសៃដែកអាំងប្រឡាក់គ្រឿង គឺជាអាហារប្លែកមួយនៅទីក្រុងវេនចូវ ប្រទេសចិន ។ អ្នកលក់នឹងប្រើប្រាស់សរសៃដែកមានទំហំតូចល្មម មកតម្រៀបអាំងនៅលើភ្លើងស្រដៀងនឹងសាច់ដោតចង្កាក់ ឬសាច់ក្រក ។ បន្ទាប់មក អ្នកលក់នឹងលាបខ្លាញ់ពីលើ រួចហើយ ដាក់ផ្សំគ្រឿងផ្សេងៗ ដូចជា ៖ ម្ទេស, ទឹកជ្រលក់, ស្លឹកខ្ទឹម និងខ្ទឹមសរ ដែលមើលទៅ គួរឱ្យចង់សាកល្បង ។

បុរសលក់សរសៃដែកអាំងប្រឡាក់គ្រឿង និយាយបែបកំប្លែងថា ៖ «បើអ្នកមានធ្មេញរឹងមាំ អាចទំពារវាបាន ប៉ុន្តែបើធ្មេញអត់រឹងមាំទេ ទាល់តែជញ្ជក់យកជាតិ ។ អតិថិជនត្រូវជញ្ជក់វាតែពេលក្តៅៗប៉ុណ្ណោះ បើមិនអីចឹងទេ អត់ឆ្ងាញ់ទេ» ។

អតិថិជនទិញសរសៃដែកអាំងប្រឡាក់គ្រឿង អាចជញ្ជក់វាយកជាតិហឹរៗដែលអ្នកលក់ដាក់ឱ្យ រួចហើយ អតិថិជនអាចយកដែកនេះទៅប្រើប្រាស់នៅផ្ទះបាន ពុំបាច់ប្រគល់ឱ្យអ្នកលក់វិញទេ ។ អ្នកលក់នឹងលក់ចាប់ពីកន្លះគីឡូក្រាមឡើងទៅ ក្នុងតម្លៃ១៥ដុល្លារអាមេរិក ។

ពេលវីដេអូអាហារប្លែកបានបង្ហោះក្នុងបណ្តាញសង្គមធ្វើឱ្យមហាជនចាប់អារម្មណ៍យ៉ាងខ្លាំង ហើយមានចំនួនទស្សនារហូតដល់ជាង ៣លានលើក ។ អ្នកទស្សនាម្នាក់សួរថា ដែកអាំងលើភ្លើងក្តៅៗអីចឹង តើត្រូវរង់ចាំប៉ុន្មាននាទី ទើបអាចបរិភោគគ្រឿងផ្សំវាបាន? រីឯអ្នកទស្សនាវីដេអូផ្សេងទៀតថា ពិតជាអាហារប្លែកមែន នៅប្រទេសចិនសម្បូរអាហារប្លែកៗបង្ហោះក្នុងបណ្តាញសង្គមជានិច្ច ៕

ប្រធានាធិបតីអាមេរិក លោក ដូណាល់ ត្រាំ គ្រោងនឹងដាក់លក់ទិដ្ឋាការឈ្មោះ បណ្ណមាស (Golden Card) ក្នុងតម្លៃ ៥លានដុល្លារ ដើម្បីលក់ឱ្យជនអន្តោប្រវេសន៍ ឬជនបរទេសដែលចង់បានសញ្ជាតិអាមេរិក។

លោក ដូណាល់ ត្រាំ លើកឡើងថា៖” ការដាក់លក់បណ្ណមាស (Golden Card)នេះ អាចនឹងអាចចាប់ផ្តើមនៅពាក់កណ្តាលខែមីនា ឆ្នាំ២០២៥ ខាងមុខនេះ”។

បណ្ណមាស (Golden Card)នេះ នឹងអនុញ្ញាតឱ្យជនបរទេសទទួលបានសញ្ជាតិអាមេរិកភ្លាមៗ ដោយពុំចាំបាច់ត្រូវធ្វើការវិនិយោគក្នុងអាជីវកម្មនៅសហរដ្ឋអាមេរិក។

បើតាម រដ្ឋលេខាធិការពាណិជ្ជកម្ម លោក Howard Lutnick បានលើកឡើងថា៖”បណ្ណមាសនេះ នឹងមានប្រសិទ្ធភាពជំនួសទិដ្ឋាការអ្នកវិនិយោគអន្តោប្រវេសន៍ EB-5 បច្ចុប្បន្ន ដែលតម្រូវឱ្យជនបរទេសវិនិយោគយ៉ាងតិច១.០៥ លានដុល្លារ ក្នុងអាជីវកម្ម ដែលអាចរកចំណូលបាន៨០មុឺនដុល្លារ នៅក្នុងតំបន់ជនបទ”។

បច្ចុប្បន្ននេះ គេនិយមប្រើបណ្ណបៃតង (Green Card) ដែលផ្តល់សិទ្ធិឱ្យជនបរទេសរស់នៅ និងធ្វើការនៅសហរដ្ឋអាមេរិក តែត្រូវបន្តទិដ្ឋាការជារៀងរាល់១០ឆ្នាំម្តងដូចជាលិខិតឆ្លងដែន៕

ប្រទេសឡាវ ៖ ពលរដ្ឋឡាវបានបង្ហាញការសោកស្តាយ និងចូលរួមរំលែកទុក្ខដល់អ្នកនាង វីឡៃ ខាំ ជាម្ចាស់ប្រេនផលិតផលអនឡាញ និងម្ចាស់ហាងថែរក្សាសម្ឆស្សដ៏ល្បី ដែលបានស្លា.ប់ ទាំងវ័យក្មេងក្នុងហេតុការណ៍ភ្លើងឆេះផ្ទះវីឡានៅទីក្រុងវៀងច័ន្ទន៍ កាលពីវេលាម៉ោង៥ទៀបភ្លឺ ថ្ងៃទី២៥ ខែកុម្ភៈ ឆ្នាំ២០២៥ ខណៈស្វាមីរបស់នាង បានរត់គេចពីភ្លើងទាន់ពេលវេលា ។ បច្ចុប្បន្ន សមត្ថកិច្ចកំពុងស្រាវជ្រាវរកមូលហេតុ ដែលបង្កឱ្យមានភ្លើងឆេះផ្ទះវីឡាម្ចាស់ប្រេនផលិតផលអនឡាញ ។

ហ្វេសប៊ុកផេកឈ្មោះ Laophattana News បានបង្ហោះរូបភាពភ្លើងឆេះផ្ទះវីឡាដ៏ធំមួយកន្លែងនៅឃុំសាយថានី ក្នុងទីក្រុងវៀងច័ន្ទន៍ ប្រទេសឡាវ និងសរសេរថា ៖ «ភ្លើងឆាបឆេះផ្ទះវីឡារបស់ម្ចាស់ប្រេនផលិតផលអនឡាញ នៅភូមិផាក្វា ឃុំសាយថានី ទីក្រុងវៀងច័ន្ទន៍ កាលពីវេលាម៉ោង៥ទៀបភ្លឺ ថ្ងៃទី២៥ ខែកុម្ភៈ ឆ្នាំ២០២៥» ។

តាមការចែកចាយវីដេអូរបស់អ្នកលេងបណ្តាញសង្គមឡាវ គេបានឃើញភ្លើងឆេះផ្ទះវីឡាយ៉ាងឆាប់រហ័ស ធ្វើឱ្យផ្ទះវីឡាក្លាយជាសមុទ្រភ្លើង ។ ភ្នាក់ងារពន្លត់អគ្គិភ័យបានប្រមូលកម្លាំងមកកាន់កន្លែងកើតហេតុ និងប្រើប្រាស់រថយន្តបាញ់ទឹកចំនួន៥គ្រឿង ដោយបានសហការជាមួយអ្នកស្រុកជួយគ្នាពន្លត់ភ្លើង ។ ប៉ុន្តែគេពុំដឹងថា តើភ្លើងឆេះនេះបណ្តាលមកពីមូលហេតុអ្វីទេ ប៉ុន្តែមានស្ត្រីម្នាក់ជាប់ក្នុងផ្ទះវីឡា ចេញពុំរួច ហើយអ្នកលេងបណ្តាញសង្គមអះអាងថា នាងឈ្មោះ វីឡៃ ខាំ ជាម្ចាស់ប្រេនផលិតផលអនឡាញ ។

ក្រោយមក សារព័ត៌មានឡាវរាយការណ៍ថា អ្នកនាង វីឡៃ ខាំ អាយុ៣១ឆ្នាំ បានស្លាប់ក្នុងគំនរភ្លើងនៅបន្ទប់ជាន់ទី២ របស់ផ្ទះវីឡា ដោយសារភ្លើងឆេះគ្រប់កន្លែង ហើយនាងរត់ពុំទាន់ ខណៈស្វាមីរបស់នាង រត់គេចពីភ្លើងទាន់ពេលវេលា ។ បច្ចុប្បន្ន សមត្ថកិច្ចឡាវកំពុងស្រាវជ្រាវរកមូលហេតុដែលបណ្តាលឱ្យភ្ញៀវឆេះផ្ទះវីឡាម្ចាស់ប្រេនផលិតផលអនឡាញដ៏ល្បីនេះ ។

អ្នកលេងហ្វេសប៊ុកម្នាក់ដែលបានផ្សាយបន្តផ្ទាល់ពីហេតុការណ៍ភ្លើងឆេះផ្ទះវីឡា និយាយថា ភ្នាក់ងារពន្លត់ភ្លើងអាចគ្រប់គ្រងស្ថានការណ៍បានហើយ ។ ក្នុងការផ្សាយផ្ទាល់នេះ គេបានឃើញស្លាកសញ្ញានៅមុខផ្ទះវីឡា សរសេរថា «មជ្ឈមណ្ឌលកែសម្ឆស្ស DEVER BEAUTY» ៕

ប្រទេសថៃ ៖ មហាជនចាប់អារម្មណ៍យ៉ាងខ្លាំងពេញបណ្តាញសង្គមប្រទេសថៃ ក្រោយពីគណនី TikTok ភោជនីយដ្ឋានមួយ ឈ្មោះ @hypnotized.bar នៅផ្លូវចារឺនគ្រុង ទីក្រុងបាងកក បានបង្ហោះវីដេអូស្រីរបាំរាំលាបំណន់មនុស្សយន្ត និងសរសេរថា ៖ «បើកហាងថ្មី ខ្លាចលក់អត់ដាច់ ទើបបន់ស្រន់មនុស្សយន្ត» ។ មហាជនពុំធ្លាប់ឃើញការលាបំណន់មនុស្សយន្តបែបនេះ ពីព្រោះការលាបំណន់ គឺធ្វើឡើងនៅវត្ត និងវត្ថុស័ក្តិសិទ្ធិប៉ុណ្ណោះ ប៉ុន្តែម្ចាស់ភោជនីយដ្ឋានប្រាប់ថា មនុស្សយន្តស័ក្តិសិទ្ធិណាស់ ។

ម្ចាស់ភោជនីយដ្ឋានរៀបរាប់ថា ក្រោយពីខ្លួនបន់ស្រន់ឱ្យមនុស្សយន្ត Optimus Prime ជួយឱ្យរកស៊ីលក់ដូរកាប់កប ស្រាប់តែមានអតិថិជនជាច្រើនចូលហាងពេញៗរាល់ថ្ងៃ ហើយការរកស៊ីពិតជាកាក់កបដូចការបន់ស្រន់មែន ទើបជួលស្រីរបាំមករាំលាបំណន់ និងថ្វាយគ្រឿងដង្វាយដល់មនុស្សយន្ត រហូតមហាជនចាប់អារម្មណ៍បែបនេះ ។

កាលពីថ្ងៃទី១៨ ខែកុម្ភៈ ឆ្នាំ២០២៥ ភ្នាក់ងារសារព័ត៌មាន Thairath បានចុះមកផ្លូវចារឺនគ្រុង សង្កាត់តាឡាតណយ តំបន់សំផាន់ថាវង្ស ទីក្រុងបាងកក ក៏បានឃើញមនុស្សយន្តយ៉ាងធំនៅកណ្តាលចំណុចផ្លូវបំបែកតាឡាតណយ ហើយភ្នាក់ងារសារព័ត៌មានបានសម្ភាសន៍អ្នករស់នៅម្តុំនេះ អំពីការលាបំណន់មនុស្សយន្ត ។

លោក ណុបឌុន ពេជ្រផៃសីទ្ធ អាយុ៤៦ឆ្នាំ ប្រាប់ថា លោកបានជិះម៉ូតូកាត់ម្តុំនេះ ឃើញស្រីរបាំរាំលាបំណន់មនុស្សយន្ត ហើយមានអ្នកផ្សេងទៀតយកដង្វាយមកថ្វាយជាបន្តបន្ទាប់ ប៉ុន្តែតាមធម្មតា មានតែអ្នកមកថតរូបប៉ុណ្ណោះ ពុំធ្លាប់លាបំណន់ទេ ។ លោកពុំដឹងថា គេបន់ស្រន់រឿងអ្វី ឬអាចចង់ល្បីក្នុងបណ្តាញសង្គម ។

រីឯលោក កៅលីន ថាំម៉ារ៉ាត់ឆ័យ អាយុ៤២ឆ្នាំ និយាយថា លោកបានឃើញស្រីរបាំរាំលាបំណន់មនុស្សយន្ត ពិតជាប្លែកណាស់ ពីព្រោះលោកធ្លាប់តែឃើញគេលាបំណន់នៅវត្ត ។ ប៉ុន្តែមនុស្សម្នាក់ៗមានជំនឿខុសគ្នា ពេលខ្លះ ភោជនីយដ្ឋាននេះគ្រាន់តែចង់ល្បី ដើម្បីទទួលបានអតិថិជនច្រើន ។

មតិភាគច្រើនយល់ថា វាអាចជាការបង្កើតវីដេអូ Content ទាក់ទាញការចាប់អារម្មណ៍ពីភ្ញៀវទេសចរជាតិ និងអន្តរជាតិមកថតរូបនៅតំបន់នេះ ដើម្បីឱ្យសេដ្ឋកិច្ចថៃកើនឡើង ។

ក្រោយមក ភ្នាក់ងារសារព័ត៌មានក៏បានជជែកជាមួយម្ចាស់ភោជនីយដ្ឋាន Hypnotized – Talat Noi ហើយម្ចាស់ភោជនីយដ្ឋានប្រាប់ថា ការពិត នេះជាវីដេអូកំប្លែងជាមួយបុគ្គលិក ។ ពេលមកទីនេះដំបូង បានឃើញគេថ្វាយកម្រងផ្កា និងភេសជ្ជៈផ្អែមដល់មនុស្សយន្ត ទើបចង់ធ្វើដែរ ដោយសារភោជនីយដ្ឋានពុំមានហុងស៊ុយ ប៉ុន្តែពេលធ្វើរួចឃើញថា អតិថិជនចូលហាងពេញៗរាល់ថ្ងៃ ។

ចុងក្រោយ ម្ចាស់ភោជនីយដ្ឋានប្រាប់ថា ចង់ឱ្យភ្ញៀវទេសចរមកលេងនៅផ្លូវចារឺនគ្រុង សង្កាត់តាឡាតណយ ឱ្យបានច្រើន ពីព្រោះម្ហូបអាហារនៅទីនេះឆ្ងាញ់ៗ និងមានបរិយាកាសល្អ ៕