អ្នកគាំទ្រកម្ពុជារួមទាំងតារាសម្តែង ខាត់ វៃហាំង ផងបានសម្តែងក្តីអបអរសាទរចំពោះតារាសម្តែងមីយ៉ាន់ម៉ា បៃតាកន (Paing Takhon) បានបង្ហាញដំណឹងល្អ លោកបានបញ្ចប់ភាពនៅលីវរបស់ខ្លួនបានចុះសំបុត្រអាពាហ៍ពិពាហ៍ (អេតាស៊ីវិល) ជាមួយកូនស្រីមហាសេដ្ឋីប្រេងប្រចាំប្រទេសហើយ។

នៅថ្ងៃទី២៥ ខែកុម្ភៈ តារាសម្ដែង និងជាតារាម៉ូដែលមីយ៉ាន់ម៉ា បៃ តាកន បានបង្ហោះរូបភាពនៅលើបណ្តាញសង្គមជាច្រើនសន្លឹកបង្ហាញថាលោកនិងគូដណ្តឹងបានចុះអេតាស៊ីវិលជាប្តីប្រពន្ធគ្នាស្របច្បាប់ហើយក្រោមការដឹងឮពីចាស់ទុំទាំងសងខាង។ ភរិយា តារាសម្តែងរូបនេះមានឈ្មោះថា Linn Mya Phu មានអាយុ ២៩ ឆ្នាំរស់នៅក្នុងទីក្រុង Yangon និងជាកូនស្រីរបស់មហាសេដ្ឋីប្រេង San Linn ប្រធានសមាគមអ្នកចែកចាយប្រេងដែលអាចបរិភោគបានរបស់ប្រទេសមីយ៉ាន់ម៉ា។

បៃ តាកន បានបង្ហាញទំនាក់ទំនងស្នេហាលោកជាមួយ Linn នៅខែសីហា ឆ្នាំ២០២៤ ហើយបានប្រកាសពីការភ្ជាប់ពាក្យរបស់ពួកគេនៅក្នុងខែមករា ឆ្នាំ២០២៥។ ដំណឹងនេះបានបង្កឱ្យមានការភ្ញាក់ផ្អើលក្នុងចំណោមអ្នកគាំទ្រទាំងជាតិនិងអន្តរជាតិ ជាពិសេសនារីៗជាហ្វេនៗខកចិត្តមិនស្ទើរនោះទេដែលអាយដលរបស់ពួកគេមានគូគាប់ចិន្តាបាត់ទៅហើយ។ ដំណឹងរីករាយនេះតារាសម្តែងកម្ពុជា លោក ខាត់ វៃហាំង ដែលបានរួមការងារជាមួយ បៃតាកន ក្នុងខ្សែភាពយន្ត ប្រុសលក់ខ្លួន បានចូលទៅអបអរផងដែរ ខណៈមានអ្នកគាំទ្រជាច្រើនទៀតក៏បានជូនពរដូចគ្នា។

តារាសម្តែងមីយ៉ាន់ម៉ារូបនេះ បានបង្ហាញមុខជាតួឯកក្នុងខ្សែភាពយន្តខ្មែរមានដូចជា «ប្រុសលក់ខ្លួន» , «ប្រវត្តិស្នេហ៍នាងនាថ» និង «បណ្ដាសារនាងរាត្រី»។

នៅឆ្នាំ ២០២១ បៃ តាកន បានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងបន្ទាប់ពីរូបភាពរបស់លោកនៅក្នុងសម្លៀកបំពាក់ព្រះសង្ឃដែលបង្ហាញពីរូបរាងស្អាតនិងសាច់ដុំ បានរីករាលដាលនៅលើប្រព័ន្ធអ៊ីនធឺណិត។ លោកបាននៅក្នុងវត្តមួយរយៈពេល ១០ ថ្ងៃដែលជាទម្លាប់ធម្មតាសម្រាប់បុរសនៅក្នុងប្រទេសមីយ៉ាន់ម៉ា។ នៅឆ្នាំដដែលនោះ លោកត្រូវបានចាប់ខ្លួនពីបទតវ៉ាប្រឆាំងនឹងរបបយោធាមីយ៉ាន់ម៉ា ហើយត្រូវបានកាត់ទោសឱ្យជាប់ពន្ធនាគាររយៈពេលបីឆ្នាំ។ លោកត្រូវបានដោះលែងមួយឆ្នាំក្រោយមក បន្ទាប់ពីទទួលបានការលើកលែងទោសពីរដ្ឋ។

បៃ តាកន បានចាប់ផ្តើមអាជីពជាតារាបង្ហាញម៉ូតនៅក្នុងឆ្នាំ ២០១៤ បានចេញសម្ដែងជាលើកដំបូងក្នុងឆ្នាំ ២០១៧។ ក្នុងឆ្នាំ២០១៩ លោកត្រូវបានគេដាក់ឈ្មោះថាជា «តារាសម្តែងកំពូលទាំង ១០ របស់មីយ៉ាន់ម៉ា» និងបានជាប់ចំណាត់ថ្នាក់កំពូលក្នុងបញ្ជី «មុខសង្ហាបំផុត» របស់ TC Candler ក្នុងឆ្នាំ ២០២១៕

តារាសម្ដែងចិន Johnny Huang ត្រូវបានគេឃើញទៅវិស្សមកាលនៅកោះ Phu Quoc ឬកោះត្រល់ជាមួយនារីវ័យក្មេងម្នាក់។ ការដើរកម្សាន្តនេះនាំឱ្យមានការរំពឹងទុកកាន់តែខ្លាំងអំពីការបែកគ្នាជាមួយតារាសម្ដែង Dilraba Dilmurat ដែលមានពាក្យចចាមអារ៉ាមកាលពីកន្លងមកនេះ។

តាមប្រព័ន្ធផ្សព្វផ្សាយបានឱ្យដឹងថា អ្នកប្រើប្រាស់ Weibo ម្នាក់បានចែករំលែកវីដេអូដែលអះអាងថាបានប្រទះឃើញតារាសម្តែង Johnny Huang នៅឯកន្លែងហាត់ប្រាណនៅលើកោះនេះ។ វីដេអូឃ្លីបនេះ បានបង្ហាញឱ្យឃើញលោក អមដោយនារីវ័យក្មេងម្នាក់បង្កឱ្យមានពាក្យចចាមអារ៉ាមអំពីទំនាក់ទំនងថ្មី។

តារាសម្តែង Johnny បានពាក់អាវយឺតពណ៌ផ្កាឈូក និងខោខ្លីពណ៌ស ខណៈដែលស្ត្រីនោះពាក់អាវពណ៌សធំដូចគ្នាទៅនឹងអ្វីដែលលោកបានពាក់ពីមុននៅក្នុងព្រឹត្តិការណ៍មួយដែលនាំឱ្យមានការរំពឹងទុកអំពីទំនាក់ទំនងជិតស្និទ្ធ។

ដំណើររបស់លោកទៅកាន់កោះ Phu Quoc ជាមួយនារីម្នាក់នេះដែលគេមិនស្គាល់អត្តសញ្ញាណបានធ្វើឱ្យមានពាក្យចចាមអារ៉ាមកាន់តែខ្លាំងថាលោកនិងតារាសម្តែងស្រី Dilraba បានបែកគ្នា។ អ្នកទាំងពីរធ្លាប់មានពាក្យចចាមអារ៉ាមថាមានទំនាក់ទំនងស្នេហា បើទោះជាមិនដែលបញ្ជាក់ពីរឿងនេះក៏ដោយ។ អ្នកទាំងពីរនៅស្ងៀមចំពោះការរំពឹងទុកចុងក្រោយនេះ។

អត្តសញ្ញាណដៃគូថ្មីរបស់ Johnny Huang ក៏បានទាក់ទាញការចាប់អារម្មណ៍ផងដែរ ដោយអ្នកលេងអ៊ីនធឺណិតខ្លះស្មានថានាងគឺ Zhang Yishang ជាតារាសម្តែងថ្មីកំពុងឡើងកូដ។

យោងតាមគេហទំព័រ Znews ដែលដកស្រង់សម្តីពី Sohu តារាសម្តែង Johnny Huang បានប្រឈមមុខនឹងរឿងចម្រូងចម្រាសកាលពីអតីតកាលពាក់ព័ន្ធនឹងអតីតភរិយារបស់លោក ហើយមានពាក្យចចាមអារ៉ាមជាយូរមកហើយថាកំពុងទាក់ទងជាមួយ Dilraba ។ ការរំពឹងទុកអំពីទំនាក់ទំនងរបស់ពួកគេបានចាប់ផ្តើមបន្ទាប់ពីពួកគេបានសម្តែងរួមគ្នានៅក្នុងរឿង «Love Designer» ឆ្នាំ ២០១៩៕

Lisa សមាជិកក្រុម BLACKPINK កំពុងរៀបចំសម្រាប់ការចេញអាល់ប៊ុមទោលរបស់នាង «Alter Ego» នៅចុងខែកុម្ភៈ ប៉ុន្តែអ្នកគាំទ្រក៏ដូចជាសាមីខ្លួនផ្ទាល់មានការភ្ញាក់ផ្អើលនិងតក់ស្លុតនៅពេលដែលដឹងថាអាល់ប៊ុមនេះត្រូវបានបែកធ្លាយតាមអ៊ីនធឺណិតមុនកាលវិភាគ។

កាលពីថ្ងៃទី ២៥ ខែកុម្ភៈ Lisa បាន Live ជជែកជាមួយនឹងអ្នកគាំទ្រ និងនិយាយលេងសើចខ្លះអំពីអាល់ប៊ុម «Alter Ego» ។ យ៉ាងណាមិញ នាងបានហាក់មានការភ្ញាក់ផ្អើលពេលបានអានការខម្មិនដែលលើកឡើងពីការបែកធ្លាយនោះ។ Lisa បង្ហាញការភ្ញាក់ផ្អើល ដោយបាននិយាយសង្កត់សំឡេងថា «វាបែកធ្លាយមែនទេ? អ្វី?»។ នាងមើលទៅហាក់មានការសោកស្តាយ និងខកចិត្ត ខណៈដែលនាងបែរទៅរកមិត្តភក្តិរបស់នាង Alice ហាក់ដូចជាមិនបានដឹងពីស្ថានភាពដើម្បីដោះស្រាយវានៅពេលក្រោយ។

ជាមួយគ្នានេះ Lisa ក៏បាននិយាយដែរថាអាល់ប៊ុមដែលត្រៀមទម្លាក់នៅថ្ងៃទី២៨ កុម្ភៈ គឺនាងបានចំណាយពេលជាង១ឆ្នាំសម្រាប់ការរៀបចំ ជាហេតុធ្វើឱ្យហ្វេនៗមានការអាណិត Lisa យ៉ាងខ្លាំង។

អាល់ប៊ុមដែលមានចំណងជើងថា «Alter Ego» មានបទចម្រៀងចំនួន ១៥ បទ រួមទាំងការសហការជាមួយតារាអន្តរជាតិដូចជា Megan Thee Stallion, Future, Tyla, Rosalía, Doja Cat និង RAYE ។ បទចម្រៀងដែលបានចេញផ្សាយពីមុនពីអាល់ប៊ុមរួមមាន Rockstar, New Woman ជាមួយ Rosalía, Moonlit Floor និង Born Again ជាមួយ RAYE និង Doja Cat។ នៅក្នុងការ Live នេះ Lisa ក៏បានបង្ហាញ lightstick ផ្លូវការ ផ្ទាល់ខ្លួនរបស់នាងទៅកាន់អ្នកគាំទ្រផងដែរ៕

Nadech Kugimiya និង Yaya Urassaya បានប្រឡូកក្នុងវិស័យសិល្បៈអស់រយៈពេលជាង ១០ ឆ្នាំមកហើយ។ អ្នកទាំងពីររក្សាបាននូវប្រជាប្រិយភាពយ៉ាងសម្បើមជាគូស្នេហ៍កំពូល។ ពួកគេបានសហការគ្នាលើរឿងភាគចំនួន៧ និងភាពយន្តមួយដែលទទួលបានអ្នកគាំទ្រជាច្រើនក្នុងប្រទេសថៃ និងក្រៅប្រទេស។

ក្នុងឆ្នាំ២០២៥ Nadech គ្រោងនឹងបង្ហាញស្នាដៃទាំងខ្សែភាពយន្តនិងរឿងភាគ ។ ចំណែកឯខ្សែភាពយន្តភាគនាពេលខាងមុខរបស់ Yaya មានចំណងជើងថា «Dalah: Death and the Flowers» គ្រោងនឹងចាក់បញ្ចាំងនៅលើ Netflix នាថ្ងៃទី២៧ កុម្ភៈ។
Nadech ត្រូវបានគេរាយការណ៍ថារកចំណូលបាន ១៥ លានបាត ប្រមាណជាង៤៤ម៉ឺនដុល្លារអាម៉េរិក សម្រាប់ការថតពាណិជ្ជកម្ម ចំណែកឯ Yaya Urassaya វិញទទួលបាន ១០លានបាត ប្រមាណជិត៣០ម៉ឺនដុល្លារសម្រាប់ការងារពាណិជ្ជកម្មរបស់នាង។ នេះបើតាមការចុះផ្សាយដោយ Dailynews ។

ក្រៅពីជោគជ័យលើអាជីពសិល្បៈចំពោះស្នេហាវិញ ពួកគេបានរួមរស់ជាមួយគ្នាអស់រយៈពេល ១៤ ឆ្នាំ ហើយនិងបានចែករំលែកនៅក្នុងបទសម្ភាសន៍មួយថា ពួកគេគ្រោងនឹងរៀបការនៅឆ្នាំ ២០២៦ ។

កាលពីខែមិថុនា ឆ្នាំ២០២៣ Nadech បានយកចិញ្ចៀនពេជ្ររាងពងក្រពើទំហំ១២ការ៉ាត់លត់ជង្គង់សុំ Yaya រៀបការនៅឯប្រទេសអ៊ីតាលីបន្ទាប់ពីអ្នកទាំងពីរមានទំនាក់ទំនង១២ឆ្នាំ ដោយមានមិត្តភក្តិជិតស្និទ្ធធ្វើជាសាក្សីមានដូចជា Mark Prin , Kimberley , Margie និងស្វាមីជាដើម។

គួរបញ្ជាក់ផងដែរថា Nadech បានជំពប់ស្នេហ៍ Yaya ដំបូងនៅពេលអ្នកទាំងពីរមានឱកាសសម្តែងជាមួយគ្នានៅក្នុងរឿងភាគដ៏ល្បីមានចំណងជើងថា «Game Rai Game Ruk» កាលពីឆ្នាំ២០១១ បន្ទាប់មកពួកគេបង្កើតទំនាក់ទំនងជាមួយគ្នាជាបន្តបន្ទាប់រហូតឈានដល់ដំណាក់កាលជាគូជីវិតជាមួយគ្នា៕