ប្រទេសចិន ៖ កាលពីដើមខែមីនា ឆ្នាំ២០២៥ Infinix គឺជាក្រុមហ៊ុនផលិតទូរស័ព្ទដៃដ៏ល្បីរបស់ចិន បានបង្ហាញទូរស័ព្ទដៃថ្មីទំនើបបំផុតក្នុងកម្មវិធីបច្ចេកវិទ្យាពិភពលោក (Mobile World Congress 2025) នៅទីក្រុងបាសេឡូណា ប្រទេសអេស្ប៉ាញ ដែលទូរស័ព្ទនេះបំពាក់បន្ទះសូឡានៅផ្នែកខាងក្រោយភ្ជាប់ជាមួយស្រោមទូរស័ព្ទសម្រាប់សាកថ្មពីពន្លឺព្រះអាទិត្យ ។ ទោះជាទូរស័ព្ទនេះពុំទាន់លក់លើទីផ្សារក្តី ប៉ុន្តែទូរស័ព្ទគំរូដែលក្រុមហ៊ុនយកមកបង្ហាញ គឺអាចទាញយកពន្លឺព្រះអាទិត្យមកប្រើប្រាស់បាន ដែលទទួលការចាប់អារម្មណ៍យ៉ាងខ្លាំង ។

ក្រុមហ៊ុន Infinix បានហៅបច្ចេកវិទ្យានេះថា SolarEnergy-Reserving ដែលមានប្រព័ន្ធ Maximum Power Point Tracking សម្រាប់គ្រប់គ្រងកម្លាំងអគ្គិសនីក្នុងទូរស័ព្ទដើម្បីឱ្យការប្រើប្រាស់មានប្រសិទ្ធភាព គឺពុំធ្វើឱ្យទូរស័ព្ទក្តៅខ្លាំងពេក ។ បច្ចុប្បន្ន ទូរស័ព្ទដ៏ទំនើបនេះអាចសាកថ្មពីពន្លឺព្រះអាទិត្យបានខ្ពស់បំផុត ស្មើនឹង២វ៉ាត់ ហើយក្រុមហ៊ុនរចនាវាឡើងសម្រាប់បំពេញថាមពលបម្រុងពេលទូរស័ព្ទអស់ថ្ម ។

ក្រៅពីទូរស័ព្ទបំពាក់បន្ទះសូឡានៅផ្នែកខាងក្រោយ ស្រោមទូរស័ព្ទដែលដំណើរការដោយពន្លីព្រះអាទិត្យ ក៏ជាបច្ចេកវិទ្យាលេចធ្លោផងដែរ ដែលស្រោមទូរស័ព្ទនេះនឹងភ្ជាប់ជាមួយទូរស័ព្ទតាមរយៈរន្ធតូចៗនៅចំហៀង ដើម្បីឱ្យទូរស័ព្ទទទួលបានថាមពលពីស្រោមទូរស័ព្ទ ។ គុណសម្បត្តិរបស់វា គឺអ្នកប្រើប្រាស់អាចផ្លាស់ប្តូរវាទៅជាស្រោមទូរស័ព្ទធម្មតាបាននៅពេលត្រូវការ ដូចជា ៖ ពេលយប់ ឬងាយស្រួលប្រើប្រាស់ពេលដាច់ភ្លើង ។

ក្រុមហ៊ុនបញ្ជាក់ថា បន្ទះសូឡាបំពាក់នៅផ្នែកខាងក្រោយទូរស័ព្ទ គឺស្រដៀងគ្នានឹងបន្ទះសូឡាដាក់នៅឆ្នេរសមុទ្រ ព្រមទាំងមានប្រព័ន្ធគ្រប់គ្រងពន្លឺព្រះអាទិត្យ ។ លើសពីនេះ អ្នកប្រើប្រាស់អាចដោះស្រោមទូរស័ព្ទដ៏ទំនើបចេញបាន ពេលមេឃងងឹត ឬគ្មានពន្លឺថ្ងៃ ។ បើទូរស័ព្ទសាកថ្មពីពន្លឺព្រះអាទិត្យបំពាក់បច្ចេកវិទ្យាកាន់តែទំនើប គឺអតិថិជនពុំចាំបាច់សាកថ្មទូរស័ព្ទដោយប្រើប្រាស់អគ្គិសនីទៀតទេនាថ្ងៃអនាគត ឱ្យតែមានពន្លឺថ្ងៃ គឺអាចសាកវាបានគ្រប់ទីកន្លែង ។

អ្វីដែលពិសេសនោះ បើអ្នកប្រើប្រាស់ដោះស្រោមរបស់វាចេញ គឺផ្ទាំងខាងក្រោយរបស់ទូរស័ព្ទនឹងប្តូរទៅជាពណ៌ផ្សេងៗដោយស្វ័យប្រវត្តិ ។ មហាជននឹងរង់ចាំមើលថា តើក្រុមហ៊ុននឹងលក់ទូរស័ព្ទទំនើបនេះនៅពេលណា ហើយវានឹងផ្លាស់ប្តូរពណ៌ផ្នែកខាងក្រោយយឺត ឬលឿនកម្រិតណា ៕

ប្រទេសជប៉ុន ៖ ស្ត្រីជប៉ុនម្នាក់ត្រូវបានម្ចាស់ហាងនំប៉័ងទូរស័ព្ទប្តឹងសមត្ថកិច្ចឱ្យចាប់ខ្លួ.ន ក្រោយពីយកដៃច្របាច់នំប៉័ងរហូតដល់បែកខូចអស់ ហើយដើរចេញពីហាងវិញ ពុំព្រមទិញ ។ ស្ត្រីរូបនេះអះអាងថា ខ្លួនគ្រាន់តែយកដៃចាប់នំប៉័ងស្រាលៗប៉ុណ្ណោះ ដើម្បីឱ្យដឹងថា តើសាច់ខាងក្នុងរបស់នំប៉័ងហាប់ណែនឬអត់? ហើយខ្លួនគ្មានប្រាក់ទិញទេ ដោយសារគ្មានការងារធ្វើ ។

សារព័ត៌មាន Straitstimes រាយការណ៍ថា អតិថិជនគួរតែប្រុងប្រយ័ត្នពេលទិញនំប៉័ងនៅប្រទេសជប៉ុន គឺកាលពីថ្ងៃទី១០ ខែកុម្ភៈ ឆ្នាំ២០២៥ មានស្ត្រីម្នាក់ អាយុ៤០ឆ្នាំ បានយកដៃច្របាច់នំប៉័ងនៅហាងមួយកន្លែងឈ្មោះ Lawson នៅទីក្រុង Fukuoka ស្ថិតនៅភាគនិរតីប្រទេសជប៉ុន បន្ទាប់មក ស្ត្រីរូបនេះក៏ដើរចេញពីហាងវិញ និងពុំព្រមទិញនំប៉័ងដែលខ្លួនច្របាច់ទេ ។

ស្ត្រីខាងលើបានដើរចេញពីហាងចម្ងាយជាង១គីឡូម៉ែត្រ ម្ចាស់ហាងនំប៉័ងក៏បានដើរតាមទាន់អតិថិជន និងឃាត់ខ្លួន ។ បន្ទាប់មក ម្ចាស់ហាងបានសុំឱ្យអតិថិជនបង់ប្រាក់ថ្លៃនំប៉័ង ពីព្រោះអតិថិជនច្របាច់វារហូតដល់ខូចទ្រង់ទ្រាយ ប៉ុន្តែស្ត្រីខាងលើប្រកែកពុំព្រមបង់ប្រាក់ ទើបម្ចាស់ហាងទូរស័ព្ទប្តឹងសមត្ថកិច្ចឱ្យមកចាប់ខ្លួនតែម្តង ។

សារព័ត៌មានជប៉ុនរាយការណ៍ថា ស្ត្រីច្របាច់នំប៉័ងត្រូវបានសមត្ថកិច្ចចាប់ខ្លួន និងចោទប្រកាន់ពីបទបំផ្លាញទ្រព្យសម្បត្តិអ្នកដទៃ ដោយសារបានយកដៃចាប់នំប៉័ងរោយល្ងខ្មៅ និងនំប៉័ងដាក់គ្រីម ចំនួន៤ដុំ ដែលមានតម្លៃ១៨០យេន (ឬជាង១ដុល្លារ) រហូតដល់ខូចនំប៉័ងអស់ ។ បើតាមម្ចាស់ហាងប្រាប់ថា នេះពុំមែនជាលើកទី១ទេ ដែលស្ត្រីរូបនេះច្របាច់នំប៉័ង ។

ចំណែកស្ត្រីដែលច្របាច់នំប៉័ងពុំទទួលស្គាល់កំហុសរបស់ខ្លួនទេ និងប្រាប់ថា ដោយសារគ្មានការងារធ្វើ ទើបគ្មានប្រាក់ទិញនំប៉័ង ។ ខ្លួនគ្រាន់តែយកដៃចាប់នំប៉័ងស្រាលៗប៉ុណ្ណោះ ដើម្បីចង់ដឹងពីសាច់ខាងក្នុងរបស់នំប៉័ងហាប់ណែនឬអត់? ប៉ុន្តែសមត្ថកិច្ចប្រាប់ថា ស្ត្រីរូបនេះច្របាច់នំប៉័ងរហូតដល់ខូចទ្រង់ទ្រាយ ហើយហាងពុំអាចលក់នំប៉័ងបែបនេះទៅឱ្យអតិថិជនផ្សេងទេ ៕

ប្រទេសឥណ្ឌូណេស៊ី ៖ រដ្ឋមន្ត្រីក្រសួងវិនិយោគឥណ្ឌូណេស៊ីឱ្យដឹងថា VinFast គឺជាក្រុមហ៊ុនផលិតរថយន្តអគ្គិសនីរបស់វៀតណាម មានគម្រោងដំឡើងស្ថានីយសាករថយន្តអគ្គិសនីឱ្យបាន១សែនកន្លែង នៅប្រទេសឥណ្ឌូណេស៊ី ក្រោយពីប្រធានាធិបតីឥណ្ឌូណេស៊ី លោក Prabowo Subianto បានជួបជជែកជាមួយអ្នកតំណាងក្រុមហ៊ុន VinFast កាលពីថ្ងៃទី១១ ខែមីនា ឆ្នាំ២០២៥ ។

រោងចក្ររបស់ក្រុមហ៊ុន VinFast នៅខេត្តចាវ៉ាខាងលិច នឹងចាប់ផ្តើមដំឡើងស្ថានីយសាករថយន្តអគ្គិសនី នៅឆ្នាំ២០២៦ ។ រោងចក្រនេះអាចផលិតរថយន្តអគ្គិសនី ចំនួន៥ម៉ឺនគ្រឿងក្នុង១ឆ្នាំ ហើយក្រុមហ៊ុនបានសាងសង់រោងចក្រដំឡើងរថយន្ត ដែលចំណាយទឹកប្រាក់អស់២០០លានដុល្លារ កាលពីឆ្នាំ២០២៤ ។ នេះបើតាមលោក Rosan Roeslani រដ្ឋមន្ត្រីក្រសួងវិនិយោគឥណ្ឌូណេស៊ី ។

ចំណែកនាយកគ្រប់គ្រងក្រុមហ៊ុន VinFast បានបដិសេធផ្តល់សម្ភាសន៍ជាមួយប្រព័ន្ធផ្សព្វផ្សាយពាក់ព័ន្ធនឹងគម្រោងដំឡើងស្ថានីយសាកថ្មរថយន្តអគ្គិសនីនៅឥណ្ឌូណេស៊ី ក្រោយពីអ្នកតំណាងក្រុមហ៊ុនបានជួបជាមួយប្រធានាធិបតីឥណ្ឌូណេស៊ី ។

ឥណ្ឌូណេស៊ីមានមហិច្ឆតាចង់ក្លាយជាប្រទេសផលិតរថយន្តអគ្គិសនី ដោយព្យាយាមទាញយកអត្ថប្រយោជន៍ពីសារធាតុនីកែលដ៏សម្បូរបែប (គឺជាសារធាតុពណ៌ប្រាក់សម្រាប់ផលិតថ្មរថយន្តអគ្គិសនី និងដែកអ៊ីណុកឱ្យរឹងមាំ ធន់ជាមួយសីតុណ្ហភាពខ្លាំង) ។ រដ្ឋាភិបាលឥណ្ឌូណេស៊ី ក៏បានលើកទឹកចិត្តក្រុមហ៊ុននានាឱ្យផលិតរថយន្តអគ្គិសនីក្នុងប្រទេសខ្លួនផងដែរ ។

រយៈពេលប៉ុន្មានខែចុងក្រោយនេះ ការប្រើប្រាស់រថយន្តអគ្គិសនីនៅឥណ្ឌូណេស៊ីបានកើនឡើងគួរឱ្យកត់សម្គាល់ ដោយសារក្រុមហ៊ុនផលិតរថយន្តអគ្គិសនីនានាលក់រថយន្តអគ្គិសនីតម្លៃសមរម្យ ។ ការប្រើប្រាស់រថយន្តនៅខែកុម្ភៈ ឆ្នាំ២០២៥ បានកើនឡើង២.២% បើធៀបពីមួយឆ្នាំទៅមួយឆ្នាំ ដែលនេះជាការកំណើនប្រើប្រាស់រថយន្តលើកដំបូង បើគិតតាំងពីខែមិថុនា ឆ្នាំ២០២៣ ដែលការលក់រថយន្តភាគច្រើនជារថយន្តអគ្គិសនី ។

លោក Rosan Roeslani រដ្ឋមន្ត្រីក្រសួងវិនិយោគបន្តថា ក្រុមហ៊ុនវៀតណាមបានជ្រើសរើសទីតាំងដំឡើងស្ថានីយសាករថយន្តអគ្គិសនីរួចហើយ ។ ការវិនិយោគដំឡើងស្ថានីយសាករថយន្តអគ្គិសនីរបស់ក្រុមហ៊ុនវៀតណាម នឹងជួយជំរុញការប្រើប្រាស់រថយន្តអគ្គិសនីនៅឥណ្ឌូណេស៊ី ។ ក្រៅពីនេះ ក្រុមហ៊ុនវៀតណាមបានពិចារណាវិនិយោគលើថាមពលកកើតឡើងវិញ, កង្ហារខ្យល់ និងបន្ទះសូឡាស្រូបពន្លឺព្រះអាទិត្យ ។

គួរបញ្ជាក់ថា ការជួបពិភាក្សារវាងប្រធានាធិបតីឥណ្ឌូណេស៊ី លោក Prabowo Subianto ជាមួយអ្នកតំណាងក្រុមហ៊ុន VinFast គឺ១ថ្ងៃក្រោយ បន្ទាប់ពីប្រធានាធិបតីឥណ្ឌូណេស៊ីបានប្រជុំទ្វេភាគីជាមួយអគ្គលេខាធិការបក្សកុម្មុយនិស្តវៀតណាម លោក តូ ឡឺម ហើយប្រទេសទាំងពីរបានព្រមព្រៀងពង្រឹងកិច្ចសហការសេដ្ឋកិច្ច ៕

ប្រទេសដាណឺម៉ាក ៖ នៅទីក្រុងអ័រហ៊ូស ប្រទេសដាណឺម៉ាក បានអនុវត្តគម្រោងប្រគល់កែវកាហ្វេឱ្យវិញពេលប្រើប្រាស់រួច (ឬគម្រោង Takeaway) ដើម្បីឱ្យភ្នាក់ងារប្រមូលកែវកាហ្វេទាំងនេះទៅសម្អាតប្រើប្រាស់ឡើងវិញ ។ ពេលអតិថិជនកុម៉្មង់កាហ្វេពីហាងទៅផឹកនៅផ្ទះ ឬកន្លែងធ្វើការ គឺពេលផឹកកាហ្វេរួច អតិថិនអាចយកកែវកាហ្វេរបស់ខ្លួនទៅដាក់នៅតាមទូរនានាក្នុងទីក្រុងអ័រហ៊ូស ដើម្បីកាត់បន្ថយសំរាមផ្លាស្ទិកប៉ះពាល់បរិស្ថាន ។

ការអនុវត្តគម្រោងនេះពុំស្មុគស្មាញទេ គឺអតិថិជនគ្រាន់តែទិញកាហ្វេ និងបង់ប្រាក់ ចំនួន៥ក្រូនដាណឺម៉ាក (ឬប្រមាណ ២ពាន់៥រយរៀល) ហើយពេលអតិថិជនយកកែវទៅដាក់តាមទូរ ចំនួន២៥កន្លែង ក្នុងទីក្រុងអ័រហ៊ូស ប្រព័ន្ធទូរទទួលកែវកាហ្វេស្វ័យប្រវត្តិ នឹងផ្ទេរប្រាក់ចូលគណនីធនាគារអតិថិជនភ្លាម ។ បន្ទាប់មក ភ្នាក់ងារក្រុមហ៊ុន TOMRA នឹងប្រមូលកែវទៅសម្អាត សម្លាប់មេរោគ និងពិនិត្យគុណភាព ក្រុមហ៊ុននឹងមើលថា តើកែវនីមួយៗខូចខាតឬអត់ ។ បើកែវនៅល្អ ក្រុមហ៊ុននឹងបញ្ជូនវាទៅហាងកាហ្វេដែលចូលរួមក្នុងគម្រោង សម្រាប់ប្រើឡើងវិញ ។

ប៉ុន្តែបើកែវកាហ្វេខូច ឬពុំអាចប្រើឡើងវិញបាន ក្រុមហ៊ុននឹងយកវាទៅកែច្នៃជាផលិតផលផ្លាស្ទិកថ្មី ដើម្បីកាត់បន្ថយសំរាម ។ រីឯកែវកាហ្វេដែលអតិថិជនដាក់តាមទូរ គឺជាកែវរបស់គម្រោងតែប៉ុណ្ណោះ អតិថិជនពុំអាចយកកែវផ្សេងមកដាក់ក្នុងទូរទេ ។ បច្ចុប្បន្ន មានហាងកាហ្វេចំនួន៤៥កន្លែង បានចូលរួមក្នុងគម្រោង និងប្រើប្រាស់កែវរបស់គម្រោង ។

ពេលអនុវត្តគម្រោងដំបូង អតិថិជនបានដាក់កែវកាហ្វេក្នុងទូរ ប្រមាណតែ២៥% ប៉ុណ្ណោះ ខុសពីគោលដៅរំពឹងទុក ប៉ុន្តែពេលអនុវត្តគម្រោងនេះក្នុងពិធីបុណ្យដ៏ធំនៅទីក្រុងអ័រហ៊ូស ឃើញថា ពលរដ្ឋដាណឺម៉ាកជាច្រើនបានយកកែវកាហ្វេដែលផឹករួចដាក់ចូលទូរ រហូតដល់១សែនកែវ ត្រឹមរយៈពេល១សប្តាហ៍ ។ បច្ចុប្បន្ន អតិថិជនបានដាក់កែវក្នុងទូរ រហូតដល់៨៨% ។

គម្រោង Takeaway បានអនុវត្តតាំងពីឆ្នាំ២០២៤ ដោយមានគោលដៅប្រមូលកែវកាហ្វេឱ្យបាន៥សែនកែវ ប៉ុន្តែក្រោយអនុវត្តគម្រោងបានយូរបន្តិច អតិថិជនក៏ប្រគល់កែវឱ្យវិញលើសគោលដៅកំណត់ គឺគម្រោងអាចប្រមូលកែវ រហូតដល់ ៧សែន៣ម៉ឺន៥ពាន់កែវ ដែលជួយកាត់បន្ថយសំរាមផ្លាស្ទិកបាន១៤តោន និងកាត់បន្ថយការបញ្ចេញកាបូនឌីអុកស៊ីតដ៏ច្រើនមហាសាល ។ នៅឆ្នាំ២០២៥ ទីក្រុងអ័រហ៊ូស មានគោលដៅប្រមូលកែវកាហ្វេមកប្រើឡើងវិញឱ្យបាន១លាន៥សែនកែវ ហើយគម្រោងនេះនឹងអនុវត្តនៅទីក្រុងក្បែរៗផងដែរ ។ ក្រៅពីប្រើប្រាស់ឡើងវិញ កែវទាំងនេះនឹងត្រូវផលិតជាផលិតផលវេចខ្ចប់អាហារ ។

គម្រោងនេះទទួលបានប្រាក់ឧបត្ថម្ភប្រាក់ពីរដ្ឋាភិបាលដាណឺម៉ាក ដោយសារមើលឃើញពីសារៈសំខាន់នៃការប្រមូលកែវមកប្រើប្រាស់ឡើងវិញ ហើយរដ្ឋាភិបាលមានគម្រោងពង្រីកគម្រោងនៅទូទាំងប្រទេស ។ បើអាចកាត់បន្ថយសំរាមផ្លាស្ទិក គម្រោងនេះអាចនឹងអនុវត្តនៅតាមទីក្រុងនានាលើពិភពលោក ដើម្បីកាត់បន្ថយសំណល់ផ្លាស្ទិក នាថ្ងៃអនាគត ៕