ទូរស័ព្ទ ឬស្មានហ្វូនបច្ចុប្បន្ននេះគឺមានច្រើនម៉ូដ ច្រើនម៉ាកណាស់ ហើយវាក៏ជាឧបករណ៍ដ៏ពេញនិយមបំផុតទូទាំងពិភពលោកផងដែរ មិនថាប្រជាជនក្នុងប្រទេសក្រីក្រប៉ុណ្ណានោះទេ ក៏មានទូរស័ព្ទ ឬស្មាតហ្វូនប្រើប្រាស់ដែរ។ ដូច្នេះហើយតើលោកអ្នកដឹងទេថា មហាសេដ្ឋីល្បីៗរបស់ពិភពលោកដូចជា Elon Musk, Jeff Bezos, Mark Zuckerberg, Bill Gates និង Warren Buffett កំពុង​ប្រើ​ស្មាតហ្វូន​ប្រភេទ​ណាខ្លះ? យោងតាមការចុះផ្សាយរបស់គេហទំព័របរទេស PhoneArena បានឱ្យដឹងថា មហាសេដ្ឋីទាំង ៥ រូបនេះកំពុងប្រើប្រាស់ស្មាតហ្វូនខុសៗគ្នាដូចជា៖

១.Bill Gates៖ លោក Bill Gates ដែលជាសហស្ថាបនិកក្រុមហ៊ុន Microsoft បច្ចុប្បន្នកំពុងប្រើប្រាស់ស្មាតហ្វូនអេក្រង់បត់ Samsung Galaxy Z Fold5 ។ មហាសេដ្ឋីរូបនេះបានប្រើប្រាស់ទូរស័ព្ទ Samsung អស់ជាច្រើនឆ្នាំមកហើយ ដោយបានប្រើ Galaxy Z Fold3 និង Galaxy Z Fold4។ Bill Gates ធ្លាប់ចែករំលែកថា លោកបានចាប់អារម្មណ៍យ៉ាងខ្លាំងចំពោះបច្ចេកវិទ្យាថ្មីៗរបស់ Samsung។ ទោះជាយ៉ាងណា មតិ​មួយ​ចំនួន​ក៏​បាន​លើក​ឡើង​ថា មហាសេដ្ឋីរូបនេះមិន​ចង់​ប្រើ iPhone នោះទេ ដោយសារទំនាក់ទំនងមិនល្អរវាង Microsoft និង Apple នាពេលកន្លងមក។

២.Mark Zuckerberg៖ កាលពីឆ្នាំមុន Mark Zuckerberg ត្រូវបានគេប្រទះឃើញជាញឹកញាប់ប្រើប្រាស់ Samsung Galaxy S23 Ultra ។ ប៉ុន្តែបច្ចុប្បន្នមហាសេដ្ឋីរូបនេះ កំពុងប្រើប្រាស់ Galaxy S24 Ultra វិញ។ យោងតាម ​​PhoneArena នាយកប្រតិបត្តិរបស់ក្រុមហ៊ុន Meta ពិតជាជ្រើសរើសប្រើប្រាស់ស្មាតហ្វូន Android ជំនួសឱ្យ iPhone មែន។ មូលហេតុចម្បងគឺដោយសារតែទំនាក់ទំនងរបស់ Zuckerberg ជាមួយ Apple មានជម្លោះជាច្រើនឆ្នាំមកហើយ។

៣.Jeff Bezos៖ ស្ថាបនិក និងជានាយកប្រតិបត្តិក្រុមហ៊ុន Amazon មិនបានចែករំលែកនូវទូរស័ព្ទដែលគាត់ប្រើនោះទេ។ ទោះជាយ៉ាងណា ប្រភពលេចធ្លាយមួយចំនួនបាននិយាយថា លោក Jeff Bezos កំពុងប្រើប្រាស់ម៉ូដែលទូរស័ព្ទ Google Pixel ឬ Samsung Galaxy។ នៅឆ្នាំ ២០២០ មហាសេដ្ឋីរូបនេះបានប្រើ iPhone ប៉ុន្តែដោយសារ ទូរស័ព្ទនេះត្រូវបាន Hack តាមរយៈ WhatsApp ជាហេតុធ្វើឱ្យលោកបោះបង់​ទូរស័ព្ទ iPhone ហើយ​ប្តូរ​ទៅ​ប្រើ​ទូរស័ព្ទ Android វិញ។

៤.Elon Musk៖ មហាសេដ្ឋី Elon Musk ត្រូវបានគេនិយាយថាប្រើទាំង iPhone និង Samsung Galaxy ។ នៅក្នុងការចែករំលែកថ្មីៗមួយចំនួន មហាសេដ្ឋីរូបនេះបាននិយាយថា គាត់ចូលចិត្តបទពិសោធន៍នៅលើ iPhone។ ដូច្នេះ Elon Musk ត្រូវបានគេនិយាយថាកំពុងប្រើទាំង iPhone និង Samsung Galaxy។

៥.Warren Buffett៖ Warren Buffett ដែលជាអ្នកជំនួញ និងវិនិយោគិនដ៏ល្បីល្បាញ បច្ចុប្បន្នកំពុងប្រើប្រាស់ iPhone 11 ដែលចេញលក់ក្នុងឆ្នាំ ២០១៩។ ពី​មុន​គាត់​ប្រើ​ទូរស័ព្ទ​បត់​អស់​ជា​ច្រើន​ឆ្នាំ បន្ទាប់មក Tim Cook បានបញ្ចុះបញ្ចូលគាត់ឱ្យប្រើ iPhone ដោយបន្តផ្ញើផលិតផលដោយឥតគិតថ្លៃឱ្យមហាសេដ្ឋីប្រើប្រាស់៕

សហរដ្ឋអាមេរិក ៖ សមាជិកសភាអាមេរិកមកពីគណបក្សសាធារណរដ្ឋបានជំរុញឱ្យបង្កើតច្បាប់ហាមនិស្សិតចិនមកសិក្សាបន្តនៅអាមេរិក ដោយសារពួកគេអាចមកធ្វើជាភ្នាក់ងារស៊ើបការណ៍សម្ងាត់ឱ្យរដ្ឋាភិបាលក្រុងប៉េកាំង ។ កន្លងមក ការិយាល័យសហព័ន្ធស៊ើបអង្កេត (FBI) បានចាប់ខ្លួននិស្សិតចិន៥នាក់ ដែលលួ.ច ថតរូបពេលកងទ័ពអាមេរិក និងតៃវ៉ាន់ កំពុងហ្វឹកហាត់បា.ញ់ គ្រាប់ពិតនៅជំរំកងទ័ព «Camp Grayling» រដ្ឋមីឈិហ្គេន ខណៈនិស្សិតចិនខ្លះទៀតលួចបញ្ជូនអាវុ.ធ ពីអាមេរិកទៅឱ្យកូរ៉េខាងជើង ។ ប៉ុន្តែមតិខ្លះថា ការលុបចោលទិដ្ឋាការនិស្សិតចិន នឹងប៉ះពាល់ដល់ការអភិវឌ្ឍបច្ចេកវិទ្យា និងផលប្រយោជន៍អាមេរិក ។

កាលពីថ្ងៃទី១៤ ខែមីនា ឆ្នាំ២០២៥ សារព័ត៌មានអាមេរិករាយការណ៍ថា លោក Riley Moore សមាជិកសភានៅរដ្ឋ West Virginia បានស្នើបង្កើតច្បាប់មួយឈ្មោះ «Stop CCP VISAs Act» ដែលច្បាប់នេះនឹងហាមនិស្សិតចិនចូលមកសិក្សាបន្តនៅអាមេរិក ឬហាមនិស្សិតចិនចូលក្នុងទីតាំងហាមឃាត់ផ្សេងៗ ។ ការជំរុញបង្កើតច្បាប់នេះ គឺមានសមាជិកសភាមកពីគណបក្សសាធារណរដ្ឋ (Republican) គាំទ្រ៥នាក់ ព្រមទាំងមានការគាំទ្រពីសមាជិកសភានៅរដ្ឋតិចសាស់ ផងដែរ ។

លោក Moore បាននិយាយកាលពីថ្ងៃទី១៤ ខែមីនា ថា ច្បាប់ដែលលោកស្នើឱ្យបង្កើតនេះ គឺជាការស្នេហាជាតិ ហើយច្បាប់នេះនឹងអាចបញ្ឈប់ការគំរាមកំហែងពីនិស្សិតចិន ដែលទទួលបានទិដ្ឋាការមកសិក្សានៅអាមេរិក ។ ពួកគេបានលួចស៊ើបការណ៍រឿងសម្ងាត់របស់រដ្ឋាភិបាលអាមេរិក ឬលួចបច្ចេកវិទ្យាដ៏ទំនើបពីអាមេរិក ។ ក្នុង១ឆ្នាំ អាមេរិកបានផ្តល់ទិដ្ឋាការឱ្យនិស្សិតចិន ជិត៣សែននាក់មករៀននៅអាមេរិក ហើយលោកសូមអំពាវនាវទៅរដ្ឋសភាទប់ស្កាត់ទង្វើរបស់ចិន ដោយលុបចោលទិដ្ឋាការនិស្សិតចិនទាំងអស់ ។

គណបក្សកុម្មុយនិស្តចិនបានប្រឆាំងជាមួយអាមេរិក ប៉ុន្តែអាមេរិកនៅតែផ្តល់ទិដ្ឋាការឱ្យនិស្សិតចិនរាប់សែននាក់ ហើយពួកគេជាភ្នាក់ងារស៊ើបការណ៍សម្ងាត់ ដែលមានរដ្ឋាភិបាលចិននៅពីក្រោយខ្នង ។ ហេតុការណ៍មួយគួរឱ្យចាប់អារម្មណ៍ គឺមាននិស្សិតចិន៥នាក់ រៀននៅសាកលវិទ្យាល័យ Michigan រដ្ឋីឈិហ្គេន បានបន្លំខ្លួនធ្វើជាអ្នកសារព័ត៌មាន និងលួចថតរូបការធ្វើសមយុទ្ធបាញ់គ្រាប់ពិតរបស់កងទ័ពអាមេរិក ជាមួយតៃវ៉ាន់ នៅជំរំកងទ័ព «Camp Grayling» ។

និស្សិតចិនទាំង៥នាក់ បានមករៀននៅអាមេរិក ដោយសារគម្រោងសហការរវាងសាកលវិទ្យាល័យ Michigan ជាមួយសាកលវិទ្យាល័យ Shanghai Jiao Tong ។ ហេតុនេះ ធ្វើឱ្យសាកលវិទ្យាល័យ Michigan ឈប់សហការជាមួយសាកលវិទ្យាល័យចិន ។ លើសពីនេះ អតីតនិស្សិតចិនផ្សេងទៀតបានលួចមករស់នៅអាមេរិកខុសច្បាប់ និងលួចបញ្ជូនអាវុធពីអាមេរិកទៅឱ្យកូរ៉េខាងជើងតាមរយៈហុងកុង ហើយត្រូវបានភ្នាក់ងារ FBI ចាប់ខ្លួនកាលពីខែសីហា ឆ្នាំ២០២១ នៅផ្ទះក្នុងរដ្ឋកាលីហ្វ័ញ៉ា ។

ចំណែកស្ថានទូតចិននៅក្រុងវ៉ាស៊ីនតោន បានចេញសេចក្តីថ្លែងការណ៍បញ្ជាក់ថា ចិនប្រឆាំងដាច់ខាតចំពោះទង្វើបែបនេះ ។ កិច្ចសហការក្នុងវិស័យអប់រំយូរមកហើយនឹងជំរុញដល់ការអភិវឌ្ឍ និងពង្រឹងសម្ត័ន្ធភាពរវាងចិន និងអាមេរិក ។ រីឯសមាគម The Asian American Scholars Forum បានរិះគន់ច្បាប់ហាមឃាត់និស្សិតចិនមករៀនបន្តនៅអាមេរិក សមាគមអះអាងថា វានឹងប៉ះពាល់ដល់អ្នកវិទ្យាសាស្ត្រអាមេរិកកាត់អាស៊ី, ប៉ះពាល់ការអភិវឌ្ឍបច្ចេកវិទ្យា និងផលប្រយោជន៍អាមេរិក ៕

ប្រទេសជប៉ុន ៖ បច្ចុប្បន្ន ប្រទេសជប៉ុនខ្វះខាតកម្លាំងពលកម្មជាច្រើនផ្នែក រហូតធ្វើឱ្យក្រុមហ៊ុននានាព្យាយាមបង្កើតគោលការណ៍ថ្មីដើម្បីលើកទឹកចិត្តបុគ្គលិកឱ្យធ្វើការជាមួយក្រុមហ៊ុនយូរអង្វែង ខណៈក្រុមហ៊ុនខ្លះជួលបុគ្គលិកបរទេសមកធ្វើការ ដោយសារអត្រាកំណើតនៅជប៉ុនធ្លាក់ចុះខ្លាំងធ្វើឱ្យចំនួនមនុស្សចាស់កើនឡើង ។ នៅតាមភោជនីយដ្ឋានជាច្រើនក៏ខ្វះបុគ្គលិកដែរ ដូចជា ៖ ផ្នែករត់តុ ទើបភោជនីយទាំងនេះប្រើប្រាស់ឆ្មាយន្តរត់តុជំនួសមនុស្ស ដើម្បីកាត់បន្ថយការចំណាយដើមទុន និងដោះស្រាយបញ្ហាខ្វះកម្លាំងពលកម្ម ។

ការប្រើប្រាស់ឆ្មាយន្តលើកម្ហូបអាហារក្នុងភោជនីយដ្ឋានជប៉ុន មិនមែនជាការប្រើប្រាស់បណ្តោះអាសន្នទេ ប៉ុន្តែភោជនីយដ្ឋានទាំងនេះនឹងប្រើប្រាស់ឆ្មាយន្តយូរអង្វែង ។ វាបង្ហាញឱ្យឃើញពីការផ្លាស់ប្តូរក្នុងផ្នែកសេវាកម្មអតិថិជន ដែលយកគ្រឿងយន្តមកធ្វើការជំនួសមនុស្ស ។

ក្រុមហ៊ុនស្រាវជ្រាវ Fuji Keizai Co. សន្និដ្ឋានថា នៅឆ្នាំ២០៣០ ជប៉ុននឹងប្រើប្រាស់មនុស្សយន្តច្រើនក្នុងផ្នែកសេវាកម្មអតិថិជន ឬលើសឆ្នាំ២០២៤ រហូតដល់៣ដង ដោយសារជប៉ុនខ្វះខាតកម្លាំងពលកម្មខ្លាំង និងកំណើនពលរដ្ឋអាយុច្រើន ។ នៅឆ្នាំ២០៤០ ជប៉ុននឹងខ្វះខាតកម្លាំងពលកម្ម រហូតដល់១១លាននាក់ ជាពិសេស ផ្នែកសេវាកម្ម និងការថែទាំមនុស្សចាស់ ។

Service Robots ឬមនុស្សយន្តផ្នែកសេវាកម្ម កំពុងក្លាយជាដំណោះស្រាយបញ្ហានេះ ដោយសារវាអាចធ្វើការដដែលៗ មិនចេះនឿយហត់ ហើយវាអាចធ្វើការជាមួយមនុស្សបានល្អទៀតផង ។ មនុស្សយន្តទាំងនេះពុំបានដណ្តើមការងារមនុស្សទេ ប៉ុន្តែវាជួយបំពេញការងារដែលខ្វះខាតកម្លាំងមនុស្ស និងបង្កើនប្រសិទ្ធភាពការងារ ។

Skylark Holdings គឺជាភោជនីយដ្ឋានដ៏ធំបំផុតនៅជប៉ុន បានប្រើប្រាស់មនុស្សយន្តជាច្រើនគ្រឿងក្នុងភោជនីយដ្ឋាន គឺមានមនុស្សយន្តជាង៣,០០០គ្រឿង សម្រាប់ប្រចាំការនៅភោជនីយដ្ឋានធំ និងមនុស្សយន្តជាង២,០០០គ្រឿងទៀត ប្រចាំការនៅភោជនីយដ្ឋានទូទាំងប្រទេស ។ ការប្រើប្រាស់មនុស្សយន្តធ្វើឱ្យភោជនីយដ្ឋាននេះអាសន្សំសំចៃប្រាក់ រហូតដល់ជាង៣ម៉ឺនដុល្លារអាមេរិកក្នុង១ឆ្នាំ ។

លើសពីនេះ មនុស្សយន្តសេវាកម្ម មិនមែនសម្រាប់ប្រើប្រាស់ក្នុងភោជនីយដ្ឋានប៉ុណ្ណោះទេ ប៉ុន្តែគេបានប្រើប្រាស់វាក្នុងផ្នែកថែទាំមនុស្សចាស់ផងដែរ ស្របពេលរដ្ឋាភិបាលជប៉ុនសន្និដ្ឋានថា ជប៉ុននឹងខ្វះបុគ្គលិកថែទាំមនុស្សចាស់ រហូតដល់៥៧ម៉ឺននាក់ នៅឆ្នាំ២០៤០ ។

កន្លែងថែទាំមនុស្សចាស់ ឈ្មោះ Flos Higashi-Kojiya នៅទីក្រុងតូក្យូ បានប្រើប្រាស់មនុស្សយន្ត Hug ដើម្បីជួយមនុស្សចាស់ដែលអង្គុយលើរទេះ ឱ្យក្រោកឈរឡើងដោយគ្មានគ្រោះថ្នាក់ ហើយមនុស្សយន្តនេះត្រូវបានបំពាក់បច្ចេកវិទ្យាតាមដានការសម្រាករបស់មនុស្សចាស់ ៕

ប្រទេសបង់ក្លាដែស ៖ Cox’s Bazar គឺជាឆ្នេរសមុទ្រវែងជាងគេបំផុតលើពិភពលោក ដែលមានប្រវែងរហូតដល់១២០គីឡូម៉ែត្រ ស្ថិតនៅប្រទេសបង់ក្លាដែស ។ ឆ្នេរសមុទ្រនេះលាតសន្ធឹងតាមឈូងសមុទ្របេនហ្គាល់ នៅទីក្រុង Cox’s Bazar គឺដាក់ឈ្មោះតាមអ្នកបើកនាវាអង់គ្លេសម្នាក់ឈ្មោះ Hiram Cox ក្នុងសម័យអាណានិគម ។

ឆ្នេរសមុទ្រ Cox’s Bazar មិនត្រឹមតែមានប្រវែងវែងបំផុតលើពិភពលោកប៉ុណ្ណោះទេ ប៉ុន្តែវាមានចំណុចទាក់ទាញជាច្រើន ដូចជា ៖

១-ឆ្នេរខ្សាច់ពណ៌មាស លាតសន្ធឹងឆ្ងាយដាច់កន្ទុយភ្នែក ៖ ឆ្នេរសមុទ្រ Cox’s Bazar ល្បីល្បាញខ្លាំង ដោយសារមានឆ្នេរខ្សាច់ទន់ល្មើយ ពណ៌មាស និងវែងដាច់កន្ទុយភ្នែក ។ ទិដ្ឋភាពទឹករលកសមុទ្រ និងថ្ងៃលិចនៅទីនេះ ត្រូវបានគេចាត់ទុកថា គឺជាកន្លែងមើលទេសភាពដ៏ស្រស់ស្អាតបំផុតនៅប្រទេសបង់ក្លាដែស ។

២-គោលដៅទេសចរណ៍ដ៏ពេញនិយម ៖
-Laboni Beach ៖ គឺជាឆ្នេរខ្សាច់ដែលមានភ្ញៀវទេសចរបរទេសមកកម្សាន្តច្រើនបំផុត និងមានហាងលក់វត្ថុអនុស្សាវរីយ៍

-Himchari National Park ៖ គឺជាឧទ្យានជាតិមានទឹកជ្រោះ និងកន្លែងឈរមើលទេសភាពយ៉ាងស្រស់ស្អាត

-Inani Beach ៖ គឺជាឆ្នេរខ្សាច់មានថ្មធម្មជាតិ និងទឹកសមុទ្រថ្លា ដែលជាកន្លែងសម្រាកលំហែកាយដ៏ល្អបំផុត

-Saint Martin’s Island ៖ គឺជាកោះផ្កាថ្មតែមួយគត់របស់បង់ក្លាដែស ព្រមទាំងមានទឹកសមុទ្រថ្លា ប្រកបដោយបរិយាកាសស្ងប់ស្ងាត់ ។

៣-កន្លែងមើលព្រះអាទិត្យលិចដ៏ស្រស់ស្អាត ៖ ឆ្នេរសមុទ្រ Cox’s Bazar គឺជាកន្លែងមើលព្រះអាទិត្យលិចដ៏ស្រស់ស្អាត ក្នុងចំណោមកន្លែងផ្សេងៗនៅតំបន់អាស៊ីខាងត្បូង ។

៤-តំបន់វប្បធម៌ និងមានអាហារសមុទ្រឆ្ងាញ់ៗ ៖ បង់ក្លាដែសមានអាហារសមុទ្រស្រស់ៗ ដូចជា ៖ បង្កង Lobster, មឹកអាំង, សម្លត្រី និងអាហារសមុទ្រជាច្រើនមុខទៀត ដែលបង្ហាញពីភាពលេចធ្លោក្នុងតំបន់នេះ ។

ឆ្នេរសមុទ្រ Cox’s Bazar គឺជាគោលដៅទេសចរណ៍ដ៏សម្បូរបែបមួយសម្រាប់អ្នកចូលចិត្តឆ្នេរសមុទ្រ និងចង់បានបរិយាកាសធម្មជាតិ ។ ឆ្នេរនេះមានប្រវែងរហូតដល់១២០គីឡូម៉ែត្រ ព្រមទាំងមានទេសភាពដ៏ស្រស់ស្អាត អាហារសមុទ្រឆ្ងាញ់ៗ និងវប្បធម៌ក្នុងតំបន់មានមន្តស្នេហ៍ ធ្វើឱ្យវាក្លាយជាតំបន់ទេសចរណ៍ដែលលោកអ្នកពុំគួរមើលរំលងពេលទៅដល់ប្រទេសបង់ក្លាដែស ៕

ប្រទេសជប៉ុន ៖ អាហារ និងផលិតផលផលិតពីទឹកដោះគោ ស្មើជាងពាក់កណ្តាលដែលលក់នៅទីផ្សារប្រទេសជប៉ុន គឺមានប្រភពពីកោះហុកកៃដូ ដែលផ្ទៃដីប្រមាណ២០% របស់កោះនេះបានចិញ្ចឹមគោរាប់លានក្បាល ។ បច្ចុប្បន្ន រដ្ឋាភិបាលជប៉ុនផ្តោតលើការផលិតថាមពលអ៊ីដ្រូសែនពីលាមកគោនៅកោះហុកកៃដូ ដោយសារការប្រើប្រាស់ថាមពលអ៊ីដ្រូសែនមានប្រសិទ្ធភាព និងពុំប៉ះពាល់បរិស្ថាន ។

ទីក្រុង Shikaoi នៅកោះហុកកៃដូ មានសក្តានុពលខ្លាំងក្នុងការផលិតថាមពលកកើតឡើងវិញ គឺថាមពលអ៊ីដ្រូសែន ដោយសារទីក្រុងនេះចិញ្ចឹមគោច្រើនជាងគេ ។ លាមក និងទឹកនោមគោនៅតាមកសិដ្ឋាន ត្រូវបានប្រមូលទៅដាក់ក្នុងម៉ាស៊ីនកិនរបស់រោងចក្រ បន្ទាប់មក គេក៏យកលាមក និងទឹកនោមគោចេញពីម៉ាស៊ីន ហើយវាក្លាយជា Biogas ។ គេក៏បំលែង Biogas ជាសារធាតុមេតាន សម្រាប់ធ្វើជាវត្ថុធាតុដើមសំខាន់ក្នុងការផលិតថាមពលអ៊ីដ្រូសែន ។

ថាមពលអ៊ីដ្រូសែនដែលផលិតចេញពីរោងចក្រនៅទីក្រុង Shikaoi គឺសម្រាប់ប្រើជាមួយយានយន្តនៅកោះហុកកៃដូ ប្រមាណ២៨គ្រឿងក្នុង១ថ្ងៃ ប៉ុន្តែយានយន្តភាគច្រើនរបស់កសិករនៅហុកកៃដូ នៅតែប្រើប្រាស់ប្រេងឥន្ធនៈ ។ យានយន្តប្រើប្រាស់ថាមពលអ៊ីដ្រូសែន គឺសម្រាប់តែក្នុងកសិដ្ឋានប៉ុណ្ណោះ និងទទួលបានប្រយោជន៍ពីថាមពលអ៊ីដ្រូសែនទាំងស្រុង ពីព្រោះវាអាចកាត់បន្ថយការបញ្ចេញជាតិពុល ១០០% ក្នុង១ថ្ងៃ ។ បើកសិដ្ឋានប្រើប្រាស់ថាមពលអ៊ីដ្រូសែនពុំអស់ គេនឹងយកវាទៅផលិតជាអគ្គិសនីនៅកន្លែងចិញ្ចឹមត្រី ។

ការផលិតថាមពលអ៊ីដ្រូសែនពីលាមកគោ នៅទីក្រុង Shikaoi របស់កោះហុកកៃដូ គឺជាគម្រោងគាំទ្រដោយរដ្ឋាភិបាលជប៉ុន ដែលជំរុញឱ្យផ្លាស់ប្តូរលាមកគោទៅជាថាមពលអ៊ីដ្រូសែន ។ រដ្ឋាភិបាលជប៉ុនមានគម្រោងបង្កើនការប្រើប្រាស់ថាមពលអ៊ីដ្រូសែនឱ្យបាន៦ដង ឬស្មើ១២លានតោន នៅឆ្នាំ២០៤០ ។

គួរបញ្ជាក់ថា ថាមពលអ៊ីដ្រូសែន គឺជាការយកឧស្ម័នអ៊ីដ្រូសែនមកប្រើប្រាស់ជាប្រេងឥន្ធនៈក្នុងគ្រឿងម៉ាស៊ីនយានយន្ត ឬប្រើប្រាស់រួមគ្នាជាមួយប្រេងឥន្ធនៈ ។ ការប្រើប្រាស់ថាមពលនេះពុំបំពុលបរិស្ថានដូចការប្រើប្រាស់ប្រេងឥន្ធនៈទេ ហើយវាជាជម្រើសថ្មីសម្រាប់ប្រើប្រាស់ជាមួយរថយន្តដឹកទំនិញ ពេលប្រេងឥន្ធនៈឡើងថ្លៃ ។ រថយន្តដឹកទំនិញបច្ចុប្បន្ន ដូចជា ៖ រថយន្ត Toyota និង Hino ត្រូវបានផលិតឡើងសម្រាប់ប្រើប្រាស់ថាមពលអ៊ីដ្រូសែន ដើម្បីកាត់បន្ថយបញ្ហាបរិស្ថាន ពិភពលោកក្តៅ និងការខ្វះប្រេងឥន្ធនៈ ។

ថាមពលអ៊ីដ្រូសែនមានគុណសម្បត្តិ ដូចជា ៖ ជាថាមពលស្អាត, ការប្រើប្រាស់ស្មើនឹងថាមពលប្រេង និងអាចប្រើប្រាស់បានច្រើនផ្នែក ។ ប៉ុន្តែវាក៏មានគុណវិបត្តិផងដែរ ដូចជា ៖ ការផ្ទុកថាមពលអ៊ីដ្រូដែនក្នុងម៉ាស៊ីនយានយន្ត នៅតែមានបញ្ហា, សុវត្ថិភាពការប្រើប្រាស់ថាមពលអ៊ីដ្រូសែនជាមួយយានយន្តមានកំណត់ និងមានតម្លៃថ្លៃ ៕

សហរដ្ឋអាមេរិក ៖ សារព័ត៌មានបរទេសបានរាយការណ៍កាលពីថ្ងៃទី១៦ ខែមីនា ឆ្នាំ២០២៥ ថា មហាសេដ្ឋីអាមេរិក និងជាម្ចាស់ក្រុមហ៊ុន SpaceX លោក Elon Musk បានបង្ហាញពីគម្រោងបញ្ជូនមនុស្សយន្តទៅជាន់លើផ្ទៃភពអង្គារ និងគម្រោងរុករកភពអង្គារ នាចុងឆ្នាំ២០២៦ ដោយប្រើប្រាស់យានអវកាស Starship ។ បើបេសកកម្មដំបូងទទួលបានជោគជ័យ លោកសង្ឃឹមថា នៅឆ្នាំ២០២៩ លោកនឹងអាចបញ្ជូនមនុស្ស និងយានអវកាសរបស់ក្រុមហ៊ុន SpaceX ទៅចុះចតលើភពអង្គារ បើទោះលោកធ្លាប់គិតថា ឆ្នាំ២០៣១ គឺជាពេលវេលាល្អជាងក្តី ។

ការព្យាយាមរុករក និងបញ្ជូនមនុស្សយន្តទៅកាន់ភពអង្គាររបស់លោក Elon Musk គឺស្របពេលយានអវកាស Starship របស់លោក ត្រូវបានមហាជនរិះគន់ក្រោយការសាកល្បងបង្ហោះបរាជ័យជាច្រើនលើក នាពេលកន្លងមក ។ កំទេចកំទីយានអវកាស Starship បានធ្លាក់មកលើផែនដីដូចអាចម៍ផ្កាយ ហើយគេអាចមើលឃើញកំទេចយានអវកាសនេះធ្លាក់នៅតំបន់ជាច្រើន ។

Starship គឺជាយានអវកាសមានទំហំធំបំផុត និងមានកម្ពស់១២៣ម៉ែត្រ បើធៀបនឹងយានអវកាសផ្សេងៗ ដែលក្រុមហ៊ុន Space X បានផលិត ។ ការផលិតយានអវកាសនេះឡើង គឺលោក Elon Musk មានគោលដៅសម្រាប់ការធ្វើដំណើរទៅរុករកភពអង្គារ ដែលលោកបានគិតតាំងពីឆ្នាំ២០១៦ ។

ក្រៅពីគម្រោងរុករកលើភពអង្គារ លោកនឹងបញ្ជូនមនុស្ស Optimus ដែលផលិតដោយក្រុមហ៊ុន Tesla ទៅជាន់លើផ្ទៃភពអង្គារ ផងដែរ ។ មនុស្សយន្ត Optimus ទើបតែបានបង្ហាញកាលពីឆ្នាំ២០២៤ ហើយលោក Elon Musk និយាយថា មនុស្សយន្តនេះនឹងអាចជួយមនុស្សធ្វើកិច្ចការផ្សេងៗក្នុងជីវិតប្រចាំថ្ងៃ ។ វាមានតម្លៃចាប់ពី២ម៉ឺន ទៅ៣ម៉ឺនដុល្លារក្នុង១គ្រឿង សម្រាប់អតិថិជនដែលចង់ទិញវាធ្វើជាជំនួយការដ៏ឆ្លាតវៃនៅផ្ទះ ។

គួរបញ្ជាក់ថា កាលពីថ្ងៃទី១៤ ខែមីនា កន្លងមក គឺជាខួបលើកទី២៣ឆ្នាំ ដែលលោក Elon Musk បានបង្កើតក្រុមហ៊ុន SpaceX នៅឆ្នាំ២០០២ ដើម្បីធ្វើយានអវកាសតាមក្តីសុបិនកាលពីក្មេងរបស់លោក ។ លោកចង់បង្កើតគម្រោង Mars Oasis គឺការតាំងមូលដ្ឋានលើភពអង្គការ ប៉ុន្តែដោយសារប្រព័ន្ធដឹកជញ្ជូនតាមអវកាសកាលពីមុនត្រូវចំណាយប្រាក់ច្រើន ទើបលោកបង្កើតក្រុមហ៊ុន SpaceX ដើម្បីកាត់បន្ថយការចំណាយសម្រាប់ដឹកជញ្ជូនសម្ភារៈតាមយានអវកាស ។

លោកបានបង្កើតយានអវកាស Starship សម្រាប់ដឹកជញ្ជូនសម្ភារៈទៅតាំងមូលដ្ឋាននៅភពព្រះច័ន្ទ និងភពអង្គារ ព្រមទាំងពង្រីកបណ្តាញផ្កាយរណប Starlink ប្រភេទថ្មីឱ្យធំជាងមុន ៕