ថ្លែងក្នុងពិធីសម្ពោធដាក់ឱ្យប្រើប្រាស់ស្ពានអាកាសមរតកតេជោ នាព្រឹកថ្ងៃទី៧ ខែមេសា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត បានបង្ហើបពីគម្រោងធ្វើសួនសាធារណៈទំហំជាង៧០ហិកតានៅតំបន់កប់ស្រូវ។

សម្តេចធិបតី បានមានប្រសាសន៍ថា៖” ខ្ញុំបានឱ្យរៀបចំនៅកន្លែងផ្លូវកប់ស្រូវ ទៅជាសួនសាធារណៈ ដោយនឹងរៀបចំឱ្យមានការប្រគុំតន្ត្រីនៅថ្ងៃសៅរ៍ អាទិត្យ ដើម្បីឱ្យពលរដ្ឋបានកម្សាន្តយ៉ាងសប្បាយរីករាយ ខណៈ
បច្ចុប្បន្ន ឯកឧត្តម ឃួង ស្រេង កំពុងរៀបចំដាំដើមឈើរាប់មុឺនដើមនៅទីនោះ “។

ចំពោះរុក្ខជាតិ ដែលត្រូវដាំនៅឧទ្យានជាតិនោះ ជាប្រភេទ ដើមគីនីន ដើមត្របែកព្រៃ ដើមសាគូរ៉ា ដើមក្ងោក ដែលសុទ្ធតែជាប្រភេទដើមឈើមានភាពស្រស់ស្អាត។

បន្ថែមពីនេះ សម្តេចធិបតី ក៏បានឱ្យដឹងនៅតាមបណ្តាខេត្តខ្លះ សម្តេចបានឱ្យយោបល់ទុកដី១០០ហិកតា ឬ២០០ហិកតាសម្រាប់រៀបចំកន្លែងសាធារណៈសម្រាប់ប្រជាពលរដ្ឋផងដែរ៕

បុរសម្នាក់ដែលជាខ្មែរឥស្លាមបានប្រើពាក្យមិនសមរម្យប្រមាថមើលងាយស្រ្តីធ្វើការនៅក្រៅប្រទេសបានបង្កឱ្យបណ្តាញសង្គមផ្ទុះកក្រើកយ៉ាងខ្លាំងខណៈរឿងនេះបានរីករាលបន្ថែមទៀតភ្ជាប់នឹងខ្មែរឥស្លាម។ ឃើញមានការរីករាលដាលព្រោះតែបុគ្គលម្នាក់តារាកំប្លែង ពាក់មី ស្នើកុំឱ្យមានការបង្ហោះកុំឱ្យមានការរើសអើងជាតិសាសន៍។

នៅថ្ងៃទី៥ មេសា តារាកំប្លែង ពាក់មី បានបង្ហោះរូបពីរសន្លឹកដោយអត្ថន័យក្នុងរូបថតនោះបានសរសេរថា «ស្មានតែខ្មែរដឹងអីពូជបាត់ប្រទេសសោះ ទើបវាហ៊ានដៀលនារី ខ្មែរសាហាវមិនបង្អង់មាត់ឡើយ។» និងពាក្យ «ប្រទេសបងចិញ្ចឹមប្អូនឱ្យមានជីវិតហេតុនេះកុំរមិលគុណជាតិសាសន៍របស់ពួកបង។

ពាក្យសម្តីខាងលើនេះតារាកំប្លែងល្បីឈ្មោះរូបនេះបានលើកឡើងថា «កុំដោយសាតែបុគ្គលម្នាក់ បងប្អូនផុសធ្វើឱ្យមានការរើសអើងជាតិសាសន៍ ខឹងបុគ្គលណា និយាយតែបុគ្គលនឹងទៅ»។ លោក ចែម ចាន់រ៉ា ហៅ ពាក់មី បន្តទៀតថា ផ្ទះលោករាល់ថ្ងៃនៅក្បែបងប្អូនឥស្លាម កីឡាករUផ្ការីកគ្រប់រដូវ ៩០% ជាកូនខ្មែរឥស្លាម អាចថាលោក ស្គាល់ខ្មែរឥស្លាមច្រើនជាមនុសស្លូតបូត រស់នៅរកស៊ីសុំតែសុខសប្បាយ ភាគច្រើនស្រលាញ់កីឡាបាល់ទាត់ ខែបុណ្យទានពួកគាត់ចេះចែករំលែកគ្នា ជួយគ្នាណាស់ គឺអាចរស់ក្នុងដំបូលតែមួយជាមួយខ្មែរបាន»។

តារាកំប្លែងរូបនេះបានសង្កត់ធ្ងន់ថា «សូមបញ្ឈប់ការផុស ធ្វើឱ្យមានការើសអើងជាតិសាសន៍»។

គួរបញ្ជាក់ផងដែរថាថ្មីៗនេះបុរសខ្មែរឥស្លាមដែលក្លាយជាប្រធានបទក្តៅគគុកនៅលើបណ្តាញសង្គមនេះដោយសារតែលោកបានប្រើសម្តីមិនសមរម្យយ៉ាងខ្លាំងជាមួយពាក្យប្រមាថមើលងាយស្រ្តីដែលធ្វើការនៅក្រៅស្រុក។ ជុំវិញរឿងនេះបុគ្គលនេះបានចេញមុខសូមទោស ប៉ុន្តែហាក់មិនទទួលបានការអភ័យពីសាធារណជនឡើយខណៈលោកជំទាវ ហ៊ុន ស៊ីណាត ស្នើឱ្យក្រសួងកិច្ចការនារីមានចំណាត់ការតឹងរឹងចំពោះបុគ្គលម្នាក់នេះ៕

ឆាប់ៗនេះពិធីបុណ្យចូលឆ្នាំថ្មីប្រពៃណីខ្មែរ នឹងឈានចូលមកដល់ ដែលជាឪកាសដ៏ឱឡារិកសម្រាប់ប្រជាជនខ្មែរដែលនៅគ្រប់ទិសទី វិលត្រឡប់ទៅកាន់ស្រុកកំណើត ដើម្បីជួបជុំគ្រួសាររៀងៗខ្លួន។

ក្រៅពីការរៀបចំគ្រឿងរណ្ដាប់ទទួលទេវតាឆ្នាំថ្មីដើម្បីបានលាភសំណាង មានការប្រារព្ធ រឺរៀបចំផ្សេងៗ ដែលខ្មែរយើងយល់ឃើញ និងមានជំនឿដូចៗគ្នា ថាក៏ជារឿងដែលចាំបាច់ធ្វើផងដែរ។ គេយល់ថា ការធ្វើបែបនេះក្នុងអំឡុងពេលរដូវកាលនៃពិធីបុណ្យចូលឆ្នាំខ្មែរ នឹងជួយអោយមានសំណាងល្អ និងសិរីសួរស្ដីចូលក្នុងក្រុមគ្រួសារ ហើយចំណុចទាំងនោះមានដូចជា៖

1 ការរៀបចំផ្ទះសម្បែង ៖ ចាស់ៗពីដើមតែងប្រើកូនចៅ អោយរៀបចំ និងបោសជូតសម្អាតលំនៅឋានអោយមានរបៀបរៀបរយ ដើម្បីត្រៀមទទួលសង្រ្កាន្តឆ្នាំថ្មី។ មិនមែនសម្អាតត្រឹមតែផ្ទះមួយមុខទេ តុ ទូ កៅអី មុង ភួយ កន្ទេល … ក៏ត្រូវប្រមូលយកបោកគក់សម្អាតផងដែរ។ ទំនៀមទម្លាប់នេះ ត្រូវបានអនុវត្តតៗគ្នាមកទល់បច្ចុប្បន្ន ព្រោះខ្មែរយើងជឿថានឹងទទួលបានសិរីសួរស្ដី ព្រមទាំងមានផាសុកភាពក្នុងការរស់នៅទៀតផង។

2. របាំត្រុដិ ៖ ប្រជាជនខ្មែរជាច្រើន ជាពិសេសអ្នកដែលមានធនធាន តែងយករបាំត្រុដិមកសម្ដែងនៅក្នុងផ្ទះ រឺក្នុងភូមិដែលគេរស់នៅ ដើម្បីបណ្ដេញឧបទ្រពចង្រៃ និងទទួលមង្គលសិរីនាឪកាសឆ្នាំថ្មី។ ចំណែកតាមតំបន់មួយចំនួនទៀត គេយករបាំនេះទៅសម្ដែងដើម្បីបួសសួងដល់ព្រះភិរុណ អោយប្រោសព្រំទឹកភ្លៀងសម្រាប់ធ្វើស្រែចម្ការបរបូណ៍ហូរហៀពេញមួយឆ្នាំ។

3. គោមផ្កាយ ៖ តាំងពីយូរលង់ណាស់មកហើយ គេជឿថា ការចង់ព្យួរគោមផ្កាយនៅមុខផ្ទះ រឺតាមផ្លូវក្នុងភូមិ នឹងជះពន្លឺដល់ទេវតាអោយយាងចុះមកប្រទានពរជ័យដល់ម្ចាស់ផ្ទះ រឺអ្នកភូមិនោះ។ ក្រៅពី ពន្លឺ និងភាពចម្រុះពណ៌របស់វា ក៏បង្កើតនូវភាពស្រស់ស្អាត ល្អសម្រាប់ការដាក់តុបតែងលម្អ សាកសមក្នុងឪកាសឆ្នាំថ្មីជាខ្លាំង។

ទោះជាយ៉ាងណា ខ្មែរយើងនៅមានជំនឿលើរឿងរ៉ាវមួយចំនួនទៀតដូចជា៖ ពិធីបង្សុកូលជូនបុព្វការីជន រាប់បាតព្រះសង្ឃ និងស្រង់ព្រះជាដើម ថាជារឿងដែលគួរធ្វើផងដែរ ក្នុងពិធីបុណ្យចូលឆ្នាំខ្មែរ ដើម្បីទទួលបានលាភសក្ការៈ និងសិរីសួរស្ដីពេញមួយឆ្នាំ៕

សម្ដេចមហាបវរធិបតី ហ៊ុន ម៉ាណែត បានចេញលិខិតមួយច្បាប់ផ្ញើរទៅកាន់ ឯកឧត្តម ដូណាល់ ជេ. ត្រាំ ដើម្បីស្នើសុំការចរចា ពាក់ព័ន្ធនឹងសេចក្ដីជូនដំណឹងលើការតម្លើងអត្រាពន្ធនាំចេញទំនិញរបស់កម្ពុជា។

សេចក្តីជូនដំណឹងរបស់សហរដ្ឋអាមេរិកនៅថ្ងៃទី២ ខែមេសា ដែលនឹងធ្វើការតម្លើងអត្រាពន្ធចំពោះប្រទេជាច្រើន ដែលនៅក្នុងកម្ពុជាយើងបានកើនរហូតដល់49%។

គួរជម្រាបថា ការកើនឡើងនៃពន្ធដល់អត្រាកម្រិតនេះ អាចនឹងផ្ដល់ផលប៉ះពាល់ដល់សេដ្ឋកិច្ចកម្ពុជាមួយផ្នែក ដូចនេះរដ្ឋាភិបាលក៏បានគិតគូររកវិធី និងចេញសេចក្ដីលិខិតស្នើសុំការចរចាដើម្បីបញ្ចុះអត្រាពន្ធ ដែលមានខ្លឹមសារដូចខាងក្រោម៖

ជូនចំពោះ ឯកឧត្តម ដូណាល់ ជេ. ត្រាំ ដើម្បីជាការឆ្លើយតបទៅនឹងការប្រកាសរបស់ឯកឧត្តម កាលពីថ្ងៃទី២ ខែមេសា ឆ្នាំ២០២៥ ក្នុងការដាក់អនុវត្តនូវអត្រាពន្ធនាំចូល ៤៩% លើទំនិញរបស់កម្ពុជា ចាប់ពីថ្ងៃទី៩ ខែមេសា ឆ្នាំ២០២៥ ខាងមុខនេះ, កម្ពុជាសូមស្នើបើកការចរចាជាមួយរដ្ឋាភិបាលរបស់ឯកឧត្តម ក្នុងពេលដ៏ឆាប់បំផុត តាមដែលអាចធ្វើទៅបាន និងសូមស្នើរដ្ឋាភិបាលរបស់ឯកឧត្តម ពន្យារការអនុវត្តអត្រាពន្ធនាំចូលថ្មីនេះ ដោយក្តីអនុគ្រោះ។

សម្ដេចនាយករដ្ឋមន្រ្តីក៏បានបន្ថែមទៀតថា ៖ ខ្ញុំសូមជម្រាបជូនឯកឧត្តមផងដែរថា អត្រាពន្ធនាំចូលខ្ពស់បំផុតដែលកម្ពុជាកំពុងអនុវត្តជាទូទៅមានត្រឹមតែ ៣៥% ប៉ុណ្ណោះ។ ក្នុងគោលបំណងបង្ហាញនូវសុឆន្ទៈ និងក្នុងស្មារតីនៃការពង្រឹង ទំនាក់ទំនងពាណិជ្ជកម្មទ្វេភាគីរបស់យើង, កម្ពុជាប្តេជ្ញាចិត្តខ្ពស់ ក្នុងការជំរុញការនាំចូលទំនិញពីសហរដ្ឋអាមេរិក ជាមួយនឹងការបន្ថយភ្លាមៗនូវអត្រាពន្ធនាំចូលទំនិញ ១៩ ប្រភេទ ពីអត្រាអតិបរមា ៣៥% មកត្រឹមអត្រា ៥%។

ក្នុងស្មារតីនេះ ខ្ញុំបានប្រគល់ភារកិច្ចជូនរដ្ឋមន្រ្តីក្រសួងពាណិជ្ជកម្មរបស់ខ្ញុំ ធ្វើការទាក់ទង ជាមួយតំណាងពាណិជ្ជកម្មសហរដ្ឋអាមេរិករបស់ឯកឧត្តម ដើម្បីអនុវត្តកិច្ចការនេះ។

សម្ដេច ហ៊ុន ម៉ាណែតក៏បានគូសបញ្ជាក់៖ កម្ពុជាប្តេជ្ញាចិត្តខ្ពស់ក្នុងការបន្តកិច្ចសន្ទនា ក្នុងន័យស្ថាបនា និង ប្រកបដោយលទ្ធផលផ្លែផ្កា ជាមួយរដ្ឋាភិបាលអាមេរិក ដើម្បីជំរុញឱ្យទំនាក់ទំនងពាណិជ្ជកម្មរវាងប្រទេសយើងទាំងពីរកាន់តែស៊ីជម្រៅបន្ថែមទៀត សំដៅឱ្យប្រជាជាតិ និង ប្រជាជនយើងទាំងពីរ អាចទទួលបានផលប្រយោជន៍ជាក់ស្តែង ពីទំនាក់ទំនងពាណិជ្ជកម្មដ៏សំខាន់នេះ។

យ៉ាងណាមិញ បន្ទាប់ពីការចេញលិខិតស្នើសុំការចរចា កម្ពុជាកំពុងរង់ចាំការឆ្លើយតបវិញពីសំណាក់សហរដ្ឋអាមេរិក វិញ ដោយសង្ឃឹមថានឹងមានការបន្ធូរបន្ថយអត្រាពន្ធអោយបានត្រឹម 35% រឺទាបជានេះ៕

ស្នងការដ្ឋាននរគបាលខេត្តកណ្ដាល បានកោះហៅ កងកម្លាំងនគរបាលចរាចរណ៍ផ្លូវគោក ៧នាក់ ដើម្បីសាកសួរ និងធ្វើការព្រមាន ករណីមានការធ្វេសប្រហែសលើការអនុវត្តការរឹតបន្តឹងច្បាប់ចរាចរណ៍ផ្លូវគោក បណ្ដាលអោយប៉ះពាល់ដល់សុវត្ថិភាពប្រជាពលរដ្ឋកំពុងធ្វើដំណើរ និងគេចខ្លួនចេញដោយគ្មានទំនួលខុសត្រូវ។

តាមរយៈវីដេអូឃ្លីបមួយ ដែលបង្ហោះដោយគណនីហ្វេសប៊ុកឈ្មោះ Lay Kongkea បានបង្ហាញអោយឃើញ ពីភាពមិនសុខចិត្ត ក្រោយក្រុមនគរបាលចរាចរណ៍ដែលស្ថិតនៅគោលដៅ ផ្លូវជាតិលេខ៣ ចំណុចហួសព្រៃទទឹង បានឃាត់រថយន្តមួយគ្រឿងម៉ាក Ford ដែលកំពុងបើកបរនៅខាងមុខ ភ្លាមៗធ្វើអោយគាត់ចាប់ហ្វ្រាំងមិនទាន់ក៏ជ្រុលទៅបុ..ករថយន្ត Ford ដែលនៅខាងមុខនោះបណ្ដាលអោយប៉ះពាល់ផ្នែកខាងក្រោយនៃរថយន្ត និងខូចខាតផ្នែកខាងមុខនៃរថយន្តរបស់គាត់។ ក្រោយពីកើតមានហេតុការណ៍ដូចខាងលើ មន្ត្រីនគរបាលដែលប្រចាំការណ៍នៅទីនោះ មិនបានចូលមកពិនិត្យ រឺដោះស្រាយអ្វីជុំវិញបញ្ហាខាងលើឡើយ ផ្ទុយទៅវិញបែរជានាំគ្នារើបារាសដើរចេញហាក់មិនដឹងរឿងអ្វីសោះ ធ្វើអោយម្ចាស់គណនីខាងលើខឹងជាខ្លាំង។

ក្រោយពីវីដេអូមានការចែករំលែកជាបន្តបន្ទាប់ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីបំភ្លឺព័ត៌មាន ដើម្បីជម្រាបជូនសាធារណជន និងបណ្តាញសារព័ត៌មានថា៖ ការផ្សាយក្នុងគណនីហ្វេសប៊ុកឈ្មោះ Lay Kongkea ដែលបានបង្ហោះវីដេអូ សកម្មភាពមន្រ្តីនគរបាលចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោក នៅព្រឹកថ្ងៃទី០២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល នៅរសៀលម៉ោង១៤.០០នាទីថ្ងៃខែដដែល ក្រុមការងារថ្នាក់ស្នងការដ្ឋាននគរបាលខេត្ត បានធ្វើការស្រាវជ្រាវបឋម។

លុះព្រឹកថ្ងៃទី០៣ ខែមេសា ឆ្នាំ២០២៥ ការិយាល័យបុគ្គលិក នៃស្នងការដ្ឋាននគរបាលខេត្តកណ្តាល បានកោះហៅកងកម្លាំងនគរបាលចរាចរណ៍ផ្លូវគោកចំនួន០៧នាក់ ឲ្យចូលខ្លួនមកបំភ្លឺ ពាក់ព័ន្ធហេតុការណ៍ដែលបានកើតឡើងខាងលើនេះ។

ក្រោយពីសាកសួរ និងឆ្លើយបំភ្លឺរួច មន្រ្តីនគរបាលចរាចរណ៍ដែលមានការពាក់ព័ន្ធក្នុងហេតុការណ៍ខាងលើ ត្រូវបានព្រមានជាលាយលក្ខណ៍អក្សរលើកទី១ ចំនួន០៤នាក់ និងអប់រំ ធ្វើកិច្ចសន្យាចំនួន០៣នាក់ ហើយដាក់ឲ្យអនុវត្តវិន័យរយៈពេល ០៣ខែ នៅការិយាល័យបុគ្គលិក។ អាស្រ័យហេតុនេះ សូមសាធារណជន និងបណ្តាញសារព័ត៌មានជ្រាបជាព័ត៌មាន៕