ត្រឹមតែ ៥០ ថ្ងៃប៉ុណ្ណោះ សហរដ្ឋអាមេរិកបានចំណាយប្រាក់អស់ជាង ៥៦ ពាន់លានដុល្លារ ដែលជាតួលេខដ៏ច្រើនមហាសាល និងបង្ហាញពីរបៀបដែលជម្លោះសម័យទំនើបអាចលេបត្របាក់យកធនធានជាតិទៅបានយ៉ាងឆាប់រហ័ស។ ការប៉ាន់ប្រមាណនេះកើតឡើងនៅពេលដែលភាពតានតឹងនៅតែមានខ្ពស់អំពីជម្លោះនៅមជ្ឈិមបូព៌ា ហើយការចរចាការទូតហាក់កំពុងត្រូវបានជាប់គាំង។

យោងតាមទិន្នន័យដែលដកស្រង់ដោយ Report News Agency នៅថ្ងៃទី២១ ខែមេសា តួលេខនេះបានឈានដល់ ៥៦,១ ពាន់លានដុល្លារហើយ ដោយផ្អែកលើកម្មវិធីតាមដានការចំណាយសង្គ្រាមអ៊ីរ៉ង់ ដែលប្រើប្រាស់ព័ត៌មានសង្ខេបរបស់មន្ទីរបញ្ចកោណ។ របាយការណ៍នេះបានបង្ហាញថា នៅក្នុងរយៈពេល ៦ថ្ងៃដំបូង សហរដ្ឋអាមេរិកបានចំណាយប្រាក់ ១១,៣ ពាន់លានដុល្លារ ហើយគិតមកដល់ពេលនេះ ការចំណាយជាមធ្យមមានប្រហែល ១ ពាន់លានដុល្លារក្នុងមួយថ្ងៃ។

ទោះជាយ៉ាងណា អ្នកវិភាគកត់សម្គាល់ឃើញថា ចំនួនសរុបពិតប្រាកដនៃការចំណាយរបស់អាមេរិកអាចមានខ្ពស់ជាងនេះ។ ការចំណាយដ៏មហិមានេះ រួមបញ្ចូលទាំងការដាក់ពង្រាយកងទ័ព ការខាតបង់ឧបករណ៍ ឬគ្រឿងសព្វាវុធ ប្រតិបត្តិការកងទ័ពជើងទឹក ការស្ទាក់ចាប់មីស៊ីល ការថែទាំ និងការចំណាយលើការស្តារឡើងវិញរយៈពេលវែងនោះទេ។

ការកើនឡើងនៃការចំណាយនេះ ក៏ភ្ជាប់មកជាមួយហានិភ័យសេដ្ឋកិច្ចកាន់តែទូលំទូលាយផងដែរ។ អ្នកវិភាគបានព្រមានថា ការកើនឡើងនៃភាពតានតឹងណាមួយជុំវិញច្រកសមុទ្រ Hormuz នឹងរំខានដល់ការដឹកជញ្ជូនប្រេងសកល ដែលធ្វើឲ្យតម្លៃប្រេងកើនឡើង និងអតិផរណាកើនឡើងទូទាំងពិភពលោក។

ចំពោះអ្នកសង្កេតការណ៍ជាច្រើន តួលេខ 56 ពាន់លានដុល្លារមិនមែនគ្រាន់តែជាការចំណាយលើសង្គ្រាមនោះទេ ប៉ុន្តែវាជាការរំលឹកថា ជម្លោះភូមិសាស្ត្រនយោបាយអាចប៉ះពាល់ដល់អ្នកជាប់ពន្ធ និងសេដ្ឋកិច្ចពិភពលោកយ៉ាងឆាប់រហ័ស និងផ្ដល់ផលប៉ះពាល់យូរអង្វែង៕

ទ្រនិចនាឡិកានៃគ្រាប់បែ.កកំណត់ម៉ោងកំពុងបង្ហាញសញ្ញាថាវាជិតដល់ពេលត្រូវផ្ទុះហើយ! បទឈប់បាញ់ដ៏ផុយស្រួយរវាងសហរដ្ឋអាមេរិក និងអ៊ីរ៉ង់អាចនឹងដល់ទីបញ្ចប់ក្នុងពេលឆាប់ៗ បន្ទាប់ពីលោកប្រធានាធិបតី ដូណាល់ត្រាំ បាននិយាយថា វា “ពិតជាមិនទំនងទាល់តែសោះ” ដែលលោកត្រូវពង្រីកបទឈប់បា.ញ់ជាមួយអ៊ីរ៉ង់។ នេះបើយោងតាមការចុះផ្សាយរបស់ The Telegraph។

ថ្លែងទៅកាន់ទីភ្នាក់ងារ Bloomberg លោក Trump បាននិយាយថា បទឈប់បាញ់នឹងត្រូវផុតកំណត់នៅល្ងាចថ្ងៃពុធ ម៉ោងនៅទីក្រុងវ៉ាស៊ីនតោន ហើយបានណែនាំថា ការវាយប្រហារយោធាអាចបន្តឡើងវិញ ប្រសិនបើគ្មានកិច្ចព្រមព្រៀងណាមួយត្រូវបានសម្រេច។ លោកក៏បាននិយាយផងដែរថា ច្រកសមុទ្រ Hormuz នឹងនៅតែត្រូវបានរឹតបន្តឹងរហូតដល់កិច្ចព្រមព្រៀងចុងក្រោយត្រូវបានចុះហត្ថលេខា។

នៅពេលសួរថាតើលោករំពឹងថាការវាយប្រហារនឹងបន្តភ្លាមៗបន្ទាប់ពីនោះទេ ប្រសិនបើមិនមានកិច្ចព្រមព្រៀងណាមួយត្រូវបានសម្រេច លោក ត្រាំ បានលេីកឡេីងថា «ប្រសិនបើមិនមានកិច្ចព្រមព្រៀងទេ ខ្ញុំពិតជារំពឹងថា វានឹងកេីតឡេីង»។

គួរជម្រាបថា ច្រកសមុទ្រ Hormuz នៅតែជាចំណុចជាប់គាំងដ៏ធំបំផុតមួយនៅក្នុងការចរចាដើម្បីបញ្ចប់ជម្លោះនេះ។ នៅក្នុងបទសម្ភាសន៍មួយ លោក Trump បាននិយាយថា អ៊ីរ៉ង់ចង់បើកផ្លូវនេះវិញខ្លាំងណាស់ ប៉ុន្តែលោកនឹងមិនអនុញ្ញាតទេ រហូតដល់ការចរចាត្រូវបានបញ្ចប់។ ដូចដែលយើងបានដឹងមកហើយ ផ្លូវទឹកនេះចូលរួមជាចំណែកដ៏សំខាន់នៃការដឹកជញ្ជូនប្រេងសកល ដូច្នេះការរំខានណាមួយដែលបន្តអាចធ្វើឱ្យតម្លៃថាមពលកើនឡើងខ្ពស់នៅទូទាំងពិភពលោក។

ទន្ទឹមនឹងនេះ ការចរចាសន្តិភាពដែលត្រូវបានគេរាយការណ៍ថា គ្រោងនឹងធ្វើឡើងនៅទីក្រុងអ៊ីស្លាម៉ាបាដ ហាក់មិនអាចទៅមុខរួចនោះទេ ព្រោះគ្រប់យ៉ាងនៅតែស្ថិតក្នុងភាពមិនប្រាកដប្រជា។ មន្ត្រីអាមេរិកមួយចំនួនបានអះអាងថា ការចរចានៅតែត្រូវបានរៀបចំ ស្របពេលដែលភាគីអ៊ីរ៉ង់ឯណោះ បែរជាបញ្ចេញសញ្ញាផ្ទុយ ដែលធ្វើឲ្យការទូតមានភាពច្របូកច្របល់។

ជុំវិញបញ្ហានេះអ្នកវិភាគបាននិយាយថា ប្រសិនបើភាពទាល់ច្រកមិនត្រូវបានទម្លុះចេញក្នុងពេលឆាប់ៗនេះទេ តំបន់មជ្ឈិមបូព៌ាអាចប្រឈមមុខនឹងការកើនឡើងនៃប្រតិបត្តិការយោធាឡើងវិញក្នុងរយៈពេលប៉ុន្មានថ្ងៃខាងមុខនៅមិនខាន៕

នាយករដ្ឋមន្ត្រីអេស្ប៉ាញ លោក Pedro Sánchez បានបង្ហោះវីដេអូរបស់ខ្លួនពេលថ្លែងសុន្ទរថាការជួបជុំជាមួយអ្នកនយោបាយគណបក្ស PSOE ដោយអំពាវនាវឱ្យសហភាពអឺរ៉ុប (EU) ដែលជាដៃគូពាណិជ្ជកម្មដ៏ធំរបស់អ៊ីស្រាអែល គួរតែលុបចោលកិច្ចព្រមព្រៀងពាណិជ្ជកម្មជាមួយអ៊ីស្រាអែល ក្រោមហេតុផលប្រទេសនេះល្មើសច្បាប់អន្តរជាតិ និងគុណតម្លៃរបស់ EU បន្ទាប់ពីធ្វើប្រតិបត្តិការកងទ័ពបង្កសង្គ្រា.មនៅមជ្ឈិមបូព៌ា ។

លោកនាយករដ្ឋមន្ត្រី Sánchez និយាយនៅថ្ងៃទី១៩ ខែមេសា ឆ្នាំ២០២៦ ថា ប្រទេសអេស្ប៉ាញបានប្រឆាំងការធ្វើសង្គ្រាម យើងគ្មានបញ្ហាជាមួយពលរដ្ឋអ៊ីស្រាអែលទេ ប៉ុន្តែអេស្ប៉ាញមិនគាំទ្រសកម្មភាពរបស់រដ្ឋាភិបាលអ៊ីស្រាអែល ។ សហភាពអឺរ៉ុប (EU) មិនគួរធ្វើកិច្ចព្រមព្រៀងពាណិជ្ជកម្មជាមួយអ៊ីស្រាអែលទៀតទេ ពីព្រោះការបង្កសង្គ្រាមលើកនេះជាកំហុសឆ្គងយ៉ាងខ្លាំង វាមិនត្រឹមតែឆក់យកជីវិតមនុស្សរាប់ពាន់នាក់ប៉ុណ្ណោះទេ ប៉ុន្តែធ្វើឱ្យមនុស្សរាប់លាននាក់នៅមជ្ឈិមបូព៌ាចាកចោលផ្ទះសម្បែង និងបំផ្លាញប្រាក់ចំណូលសេដ្ឋកិច្ចយ៉ាងធ្ងន់ធ្ងរ ។

សង្គ្រាមប៉ះពាល់ដោយផ្ទាល់មកលើប្រាក់ចំណូលពលរដ្ឋសាមញ្ញនៅប្រទេសអេស្ប៉ាញ ទើបលោកអំពាវនាវឱ្យបុគ្គលបង្កសង្គ្រាមលើកនេះបញ្ឈប់ជាបន្ទាន់ និងបញ្ឈប់រាល់សកម្មភាពរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ផងដែរ ។ នៅថ្ងៃទី២១ ខែមេសានេះ រដ្ឋាភិបាលអេស្ប៉ាញនឹងស្នើឱ្យសហភាពអឺរ៉ុបលុបចោលកិច្ចព្រមព្រៀង (Association Agreement) ជាមួយអ៊ីស្រាអែល ។

ក្នុងវីដេអូសុន្ទរកថា នាយករដ្ឋមន្ត្រីអេស្ប៉ាញថា ៖ «ការស្នើឱ្យសហភាពអឺរ៉ុបលុបចោលកិច្ចព្រមព្រៀង មិនមែនដោយសារអារម្មណ៍ប្រឆាំងនឹងអ៊ីស្រាអែលនោះទេ យើងឈរជាមួយពលរដ្ឋអ៊ីស្រាអែល ប៉ុន្តែមិនគាំទ្រសកម្មភាពរដ្ឋាភិបាលរបស់ពួកគេ» ។

មូលហេតុចម្បងដែលនាយករដ្ឋមន្ត្រីអេស្ប៉ាញស្នើទៅកាន់សហភាពអឺរ៉ុបនេះ ដោយសាររដ្ឋាភិបាលអ៊ីស្រាអែលល្មើសច្បាប់អន្តរជាតិ ទើបមិនអាចធ្វើជាដៃគូពាណិជ្ជកម្មជាមួយសហភាពអឺរ៉ុប ដែលត្រូវបានគេចាត់ទុកថា នេះជាការបង្ហាញគោលជំហរយ៉ាងច្បាស់លាស់របស់អេស្ប៉ាញប្រឆាំងសង្គ្រាមនៅតំបន់កាហ្សា ។

គួរបញ្ជាក់ថា កិច្ចព្រមព្រៀងពាណិជ្ជកម្មរវាងសហភាពអឺរ៉ុប និងអ៊ីស្រាអែល បានអនុវត្តតាំងពីឆ្នាំ២០០០ គឺជាលក្ខខណ្ឌទំនាក់ទំនងពាណិជ្ជកម្ម នយោបាយ និងកិច្ចសហការក្នុងវិស័យផ្សេងៗ ដោយផ្តល់សិទ្ធិឱ្យអ៊ីស្រាអែលចូលមកកាន់ទីផ្សារអឺរ៉ុបក្នុងនាមជាមិត្ត ។ សំណើរបស់នាយករដ្ឋមន្ត្រីអេស្ប៉ាញ គឺដូចគ្នានឹងអំពាវនាវឱ្យសហភាពអឺរ៉ុបលុបចោលអ៊ីស្រាអែលក្នុងឋានៈជាមិត្តផ្នែកសេដ្ឋកិច្ចនៅអឺរ៉ុប ហើយសំណើនេះជាបញ្ហាដែលប្រទេសជាសមាជិកសហភាពអឺរ៉ុបខ្វែងគំនិតគ្នា មិនទាន់មានការឯកភាព ។

អេស្ប៉ាញ គឺជាសមាជិករបស់សហភាពអឺរ៉ុប ដែលបានបង្ហាញគោលជំហរគាំទ្រប៉ាឡេស្ទីនរហូតមក ហើយអេស្បាញ អៀរឡង់ និងន័រវេស ធ្លាប់បានប្រកាសទទួលស្គាល់រដ្ឋប៉ាឡេស្ទីនជាផ្លូវការកាលពីឆ្នាំ២០២៤ ៕

ថៃបានណែនាំពលរដ្ឋរបស់ខ្លួនឱ្យយកចិត្តទុកដាក់ថែទាំសុខភាពចៀសផុតពីការដាច់សរសៃឈាមខួរក្បាល ដោយសារសីតុណ្ហភាពកើនឡើងខ្ពស់រហូតដល់៤៣អង្សាសេ អាកាសធាតុនឹងក្តៅខ្លាំងរហូតដល់ពាក់កណ្តាលខែឧសភា ឆ្នាំ២០២៦ ដោយកុំនៅក្រោមកំដៅថ្ងៃយូរ, ផឹកទឹកគ្រប់គ្រាន់, ហាមផឹកគ្រឿងស្រវឹង ជាពិសេស អ្នកអាយុចាប់ពី១៥ឆ្នាំ ទៅ៣៤ឆ្នាំ និងមនុស្សចាស់ ។ ក្រៅពីដាច់សរសៃឈាមខួរក្បាល ក៏ប្រឈមនឹងជំងឺជាច្រើនទៀតកើតឡើងដោយសារអាកាសធាតុក្តៅដែលមិនគួរមើលរំលង ។

រដ្ឋាភិបាលថៃបានប្រកាសឱ្យពលរដ្ឋប្រុងប្រយ័ត្នក្នុងការថែទាំសុខភាពដើម្បីកុំឱ្យដាច់សរសៃឈាមខួរក្បាល ពីព្រោះសីតុណ្ហភាពនៅខេត្តជាច្រើនអាចកើនឡើងខ្ពស់ចាប់ពី៤២អង្សាសេ ទៅ៤៣អង្សាសេ រហូតដល់ពាក់កណ្តាលខែឧសភា ឆ្នាំ២០២៦ ខណៈសីតុណ្ហភាពនៅខេត្តខ្លះនឹងកើនឡើងខ្ពស់ជាងនេះ ។ ការប្រុងប្រយ័ត្ន គឺចៀសវាងនៅក្រោមកំដៅថ្ងៃយូរ, ផឹកទឹកគ្រប់គ្រាន់ បើមានអាការៈខុសប្រក្រតី ត្រូវបញ្ជូនមកមន្ទីរពេទ្យជាបន្ទាន់ ។

តាមការលើកឡើងរបស់អ្នកនាំពាក្យរដ្ឋាភិបាលថៃ អ្នកស្រី សាវ៉ាលិដា ផេរិវិវឌ្ឍនា នៅថ្ងៃទី២១ ខែមេសា សីតុណ្ហភាពនៅប្រទេសថៃបានចាប់ផ្តើមកើនឡើងខ្ពស់តាំងពីចុងខែកុម្ភៈ រហូតដល់ខែមេសា ហើយវានឹងបន្តកើនឡើងរហូតដល់ពាក់កណ្តាលខែឧសភា ។ សីតុណ្ហភាពនៅខេត្តជាច្រើនអាចកើនឡើងខ្ពស់ចាប់ពី៤២អង្សាសេ ទៅ៤៣អង្សាសេ បណ្តាលឱ្យពលរដ្ឋកើតជំងឺផ្សេងៗដោយសារអាកាសធាតុក្តៅ ជាពិសេស ករណីដាច់សរសៃឈាមខួរក្បាលនៅប្រទេសថៃកើនឡើងគួរឱ្យកត់សម្គាល់ ។

ទិន្នន័យពីប្រព័ន្ធតាមដានជំងឺឌីជីថល (DDS) នៃនាយកដ្ឋានគ្រប់គ្រងជំងឺក្រសួងសុខាភិបាលថៃ គឺកាលពីឆ្នាំ២០២៥ ពលរដ្ឋថៃកើតជំងឺដោយសារអាកាសធាតុក្តៅ ស្មើ១៨២នាក់ ក្នុងនោះបុរសស្មើ៥៩.៣% ហើយអ្នកជំងឺរងផលប៉ះពាល់ខ្លាំងដោយសារអាកាសធាតុក្តៅ គឺចាប់ពីអាយុ១៥ឆ្នាំ ទៅ៣៤ឆ្នាំ, មនុស្សចាស់អាយុ៦០ឆ្នាំឡើង និងអ្នកធ្វើការក្រោមកំដៅថ្ងៃ ។ អាការៈភាគច្រើន គឺអាកាសធាតុក្តៅខ្លាំងបណ្តាលឱ្យអស់កម្លាំង, រមួលក្រពើ និងបាត់បង់ស្មារតី ។

ខែមេសា ប្រទេសថៃប្រឈមនឹងអាកាសធាតុក្តៅខ្លាំង ហើយសន្ទស្សន៍កំដៅ (Heat Index) នៅខេត្តមួយចំនួននឹងកើនឡើងដល់៦០អង្សាសេ ដែលជាកម្រិតគ្រោះថ្នាក់បំផុត ដូច្នេះ ត្រូវចៀសវាងនៅក្រោមកំដៅថ្ងៃយូរ, ផឹកទឹកឱ្យគ្រប់គ្រាន់ និងសង្កេតអាការៈខ្លួនឯងយ៉ាងដិតដល់ ប្រសិនបើអ្នកណាមានអាការៈខុសប្រក្រតី ដូចជា ៖ ក្តៅខ្លួន ស្បែកក្រហម គ្មានញើស វិលមុខ ក្អួតចង្អោរ ញ័រខ្លួន អស់កម្លាំង ឬបាត់បង់ស្មារតី ត្រូវបញ្ជូនមកសង្គ្រោះនៅមន្ទីរពេទ្យបន្ទាន់ ។ នេះបើតាមការលើកឡើងរបស់អ្នកស្រី សាវ៉ាលិដា ។

វិធីការពារខ្លួនឱ្យចៀសផុតពីការដាច់សរសៃឈាមខួរក្បាល រួមមាន ៖

១-ផឹកទឹកញឹកញាប់
២-ស្លៀកពាក់សម្លៀកបំពាក់អាចបញ្ចេញកំដៅបានល្អ, ស្លៀកពាក់ពណ៌ស្រាល, មិនស្លៀករឹតខ្លួនខ្លាំងពេក, កុំស្លៀកពាក់ពណ៌ខ្មៅដើម្បីកុំឱ្យស្រូបកំដៅ
៣-កុំនៅកណ្តាលថ្ងៃម្នាក់ឯង គួរនៅជាក្រុម ប្រសិនបើមានអាការៈខុសប្រក្រតីនឹងអាចជួយគ្នាភ្លាមៗ
៤-កុំនៅក្រោមកំដៅថ្ងៃយូរ ឬកុំនៅកន្លែងគ្មានខ្យល់គ្រប់គ្រាន់
៥-ហាមផឹកគ្រឿងស្រវឹង និង
៦-ហាមទុកអ្នកណាម្នាក់ក្នុងរថយន្តដែលចតក្រោមកំដៅថ្ងៃ ៕

ឆ្លៀតក្នុងឱកាសដែលអរិភាពរវាងអ៊ីរ៉ង់ និងសហរដ្ឋអាមេរិកកំពុងកើនឡើងបង្កឲ្យមានការព្រួយបារម្ភសារជាថ្មី អ៊ីស្រាអែលនៅជ្រុងម្ខាងទៀតនៃជម្លោះ ស្រាប់តែចេញមកប្រកាសក្ដែងៗថា ឥឡូវនេះខ្លួនកំពុងរៀបចំការវាយប្រហា.រលើទីតាំងរោងចក្រថាមពលរបស់អ៊ីរ៉ង់ បន្ទាប់ពីបទឈប់បា.ញ់ដ៏ផុយស្រួយនាពេលបច្ចុប្បន្នត្រូវបិទបញ្ចប់នៅថ្ងៃពុធខាងមុខ។

សារព័ត៌មានអ៊ីស្រាអែល Maariv កាលពីថ្ងៃអាទិត្យនេះ បានរាយការណ៍ថា សហរដ្ឋអាមេរិក និងអ៊ីស្រាអែលកំពុងសម្របសម្រួលការរៀបចំដើម្បីត្រៀមវាយប្រហារ ក្នុងករណីដែលបទឈប់បាញ់រយៈពេលខ្លីមិនត្រូវបានពង្រីក ដែលនេះអាស្រ័យលើការចរចានាពេលខាងមុខរវាងទីក្រុងវ៉ាស៊ីនតោន និងទីក្រុងតេអេរ៉ង់ នៅទីក្រុងឥស្លាមម៉ាបាដ ប្រទេសប៉ាគីស្ថាន។

របាយការណ៍ខាងលើនេះបានរំលឹកឡើងវិញថា កន្លងមកយោធាអ៊ីស្រាអែលធ្លាប់បានវាយប្រហារទីតាំងថាមពលសំខាន់របស់អ៊ីរ៉ង់ រួមទាំងវាលឧស្ម័ន South Pars ដែលជាកន្លែងផ្ទុកឧស្ម័នដ៏ធំជាងគេបំផុតរបស់ពិភពលោក ក៏ដូចជាទីតាំងប្រេង និងគីមីឥន្ធនៈផ្សេងៗទៀត។ បន្ថែមលើនោះ រោងចក្រថាមពលនុយក្លេអ៊ែរ Bushehr ក៏ធ្លាប់ត្រូវបានវាយប្រហារចំនួនបួនដងផងដែរ ចាប់តាំងពីការចាប់ផ្តើមនៃសង្គ្រាម ។

ក្រៅពីការប្រកាសដ៏ក្លាហានរបស់អ៊ីស្រាអែល ប្រធានាធិបតីអាមេរិក ដូណាល់ត្រាំ ឯណោះក៏បានបបញ្ចេញសារគំរាមកំហែងដ៏តឹងរឹងផងដែរ ដោយលោកព្រ.មានថានឹងបំផ្លា.ញហេដ្ឋារចនាសម្ព័ន្ធរបស់អ៊ីរ៉ង់ ប្រសិនបើពួកគេមិនចុះហត្ថលេខាលើកិច្ចព្រមព្រៀងណាថ្មីជាមួយអាមេរិក។ ថ្លែងទៅកាន់សារព័ត៌មាន Fox News លោក ត្រាំ បាននិយាយយ៉ាងខ្លាំងៗថា “ប្រសិនបើអ៊ីរ៉ង់ហ៊ានបដិសេធមិនចុះហត្ថលេខា ប្រទេសទាំងមូលនឹងត្រូវបំផ្ទុះ”។

ទោះជាយ៉ាងណាក៏ដោយ ប្រព័ន្ធផ្សព្វផ្សាយអ៊ីរ៉ង់បានរាយការណ៍ថា រដ្ឋាភិបាលអ៊ីរ៉ង់មិនទាន់បានធ្វើការសម្រេចចិត្តនៅឡើយទេ ដោយលើកឡើងពីការបិទផ្លូវកងទ័ពជើងទឹករបស់សហរដ្ឋអាមេរិកដែលកំពុងបន្ត ដែលទីក្រុងតេអេរ៉ង់និយាយថា ជាការរំលោភលើបទឈប់បាញ់។ ប្រធានសភាអ៊ីរ៉ង់ លោក Mohammad Bagher Ghalibaf ក៏បាននិយាយផងដែរថា មានភាពខុសគ្នាជាច្រើននៅក្នុងជំហរចរចារវាងភាគីទាំងពីរ។

សូមជម្រាបថា ប្រសិនបើបទឈប់បាញ់នេះពិតជាត្រូវដួលរលំ នោះវានឹងធ្វើឱ្យស្ថានការណ៍កាន់តែធ្ងន់ធ្ងរឡើង ជាពិសេសការបិទច្រកសមុទ្រ Hormuz ដែលកំពុងរារាំងករដឹកជញ្ជូនប្រេង និងឧស្ម័ន 20 ភាគរយរបស់ពិភពលោកទៅក្នុងទីផ្សារពិភពលោក ហើយនឹងបណ្តាលឱ្យមានវិបត្តិថាមពលជាសកលរយៈពេលវែង៕

នាយករដ្ឋមន្ត្រីថ្មីរបស់ហុងគ្រីបានប្រកាសចា.ប់ខ្លួននាយករដ្ឋមន្ត្រីអ៊ីស្រាអែល លោក Benjamin Netanyahu ប្រសិនបើធ្វើដំណើរមកដល់ប្រទេសហុងគ្រី ពីបទឧក្រិដ្ឋជនសង្គ្រា.ម ដោយនាយករដ្ឋមន្ត្រីថ្មីហុងគ្រីអះអាងថា មានដីកាចា.ប់ខ្លួនពីតុលាការឧក្រិដ្ឋក.ម្មអន្តរជាតិ (ICC) ពីព្រោះហុងគ្រីជាសមាជិករបស់តុលាការនេះ ។ កន្លងមក ហុងគ្រីបានដកខ្លួនចេញពីសមាជិកតុលាការ ICC ដោយសារមេដឹកនាំចាស់ហុងគ្រីមានទំនាក់ទំនងជិតស្និទ្ធជាមួយអ៊ីស្រាអែល ខណៈលោក Netanyahu ថា ខ្លួនគ្មានកំហុស ។

កាលពីថ្ងៃទី២០ ខែមេសា ឆ្នាំ២០២៦ នាយករដ្ឋមន្ត្រីថ្មីហុងគ្រី លោក Péter Magyar បានប្រកាសចាប់ខ្លួននាយករដ្ឋមន្ត្រីអ៊ីស្រាអែល លោក Benjamin Netanyahu ប្រសិនបើធ្វើដំណើរមកដល់ប្រទេសហុងគ្រី ដោយសារមានដីកាចាប់ខ្លួនដែលចេញដោយតុលាការឧក្រិដ្ឋកម្មអន្តរជាតិ (ICC) ។ លោកនិយាយមកកាន់អ្នកសារព័ត៌មានថា ៖ «បើប្រទេសណាមួយជាសមាជិករបស់តុលាការឧក្រិដ្ឋកម្មអន្តរជាតិ ហើយតុលាការនេះចេញដីកាចាប់ខ្លួនបុគ្គលណាម្នាក់ដែលបានធ្វើដំណើរមកដល់ប្រទេសយើង បុគ្គលនោះនឹងត្រូវចាប់ខ្លួន» ។

នាយករដ្ឋមន្ត្រីថ្មីហុងគ្រី លោក Magyar បន្តថា បានជូនដំណឹងទៅកាន់នាយករដ្ឋមន្ត្រីអ៊ីស្រាអែលរួចហើយ អំពីគោលបំណងរបស់លោកដែលនឹងនាំប្រទេសហុងគ្រីចូលទៅកាន់សមាជិកពេញលេញម្តងទៀតរបស់តុលាការឧក្រិដ្ឋកម្មអន្តរជាតិ (ICC) ។

ចំណែកនាយករដ្ឋមន្ត្រីស្តីទីបច្ចុប្បន្នរបស់ហុងគ្រី លោក Viktor Orbán បានបង្កើនទំនាក់ទំនងយ៉ាងជិតស្និទ្ធជាមួយរដ្ឋាភិបាលអ៊ីស្រាអែលរបស់លោកនាយករដ្ឋមន្ត្រី Netanyahu និងជំរុញឱ្យប្រទេសហុងគ្រីដកខ្លួនចេញពីសមាជិកតុលាការឧក្រិដ្ឋកម្មអន្តរជាតិ (ICC) មុនទទួលស្វាគមន៍ដំណើរទស្សនកិច្ចរបស់លោក Netanyahu មកកាន់ទីក្រុង Budapest កាលពីឆ្នាំ២០២៥ ។

គួរបញ្ជាក់ថា លោកនាយករដ្ឋមន្ត្រី Netanyahu និងលោក Yoav Gallant អតីតរដ្ឋមន្ត្រីក្រសួងការពារជាតិអ៊ីស្រាអែល គឺសុទ្ធតែជាបុគ្គលដែលតុលាការឧក្រិដ្ឋកម្មអន្តរជាតិ (ICC) ចេញដីកាចាប់ខ្លួនកាលពីឆ្នាំ២០២៤ ពីបទឧក្រិដ្ឋជនសង្គ្រាម ពីព្រោះបុគ្គលទាំង២រូបបានធ្វើសង្គ្រាមនៅតំបន់កាហ្សា ។ ប៉ុន្តែបុគ្គលទាំង២រូបបានបដិសេធការចោទប្រកាន់របស់តុលាការ និងថាពួកគេពុំបានប្រព្រឹត្តខុស ។

កាលពីថ្ងៃទី២១ ខែវិច្ឆិកា ឆ្នាំ២០២៤ តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនលោក Netanyahu ព្រមទាំងអតីតរដ្ឋមន្ត្រីក្រសួងការពារជាតិអ៊ីស្រាអែល លោក Gallant ពីបទឧក្រិដ្ឋជនសង្គ្រាម និងឧក្រិដ្ឋកម្មប្រឆាំងមនុស្សជាតិ បន្ទាប់ពីការផ្ទុះសង្គ្រាមនៅតំបន់កាហ្សា ។ ប៉ុន្តែតុលាការនេះគ្មានកម្លាំងសមត្ថកិច្ចជារបស់ខ្លួន និងបណ្តាញការទូតមានកំណត់ក្នុងការបង្ខំឱ្យប្រទេសនានាអនុវត្តតាមដីកាចាប់ខ្លួន ប្រសិនបើប្រទេសនោះមិនយល់ស្រប ៕