លោក ម៉ៃ សុគន្ធ បានបង្ហោះសំណេរមួយបង្កឱ្យមានការចាប់អារម្មណ៍ពីអ្នកលេងបណ្តាញសង្គមក្រោយនិយាយពី Rapper ភ្លេចកំណើត ភ្លេចមិត្តកម្សត់កម្រជាមួយគ្នា ចរិតឡូយ តោងគ្រូល្បី។ ខណៈសំណេរនេះមានការចាប់អារម្មណ៍ច្រើន OG Golden បានបង្ហោះសំណេរមួយដែរថាមិនចេះលេងទេ Marketing យកភាពល្បី។ ការបង្ហោះនេះបានធ្វើឱ្យមានការសង្ស័យថាអ្នកទាំងពីរផ្លែផ្កាឱ្យគ្នា។

នៅយប់ថ្ងៃទី២៤ ម៉ៃ សុគន្ធ រហ័្សសនាមមហាទើសបានបង្ហោះនៅលើបណ្តាញសង្គមថា «
Rapper ទើបរះ ប្រឹងរះតិច ប្រយ័ត្នលិចទៅវិញ ធ្វើជាមនុស្សកុំភ្លេចកំណើតណា(ចរិតវិញ ១០កុងទីណ័រ ថែម៥ស្បោងទៀត ពួកម៉ាកកម្សត់កម្រវាក៏វាមិនរាប់ដែរម៉ា អាRapper តោងគ្រូល្បី»។ ការបង្ហោះនេះបានធ្វើឱ្យអ្នកលេងបណ្តាញសង្គមជាច្រើនចាប់អារម្មណ៍មានការបញ្ចេញមតិវែកញែកជាច្រើន អ្នកខ្លះក៏ចង់ឱ្យ ម៉ៃ សុគន្ធ ដាក់ឈ្មោះមកចំៗផងដែរ។

ស្របពេលទស្សនិកជនមួយចំនួនមានការចាប់អារម្មណ៍ទៅកាន់សំណេររបស់ ម៉ៃ សុគន្ធ ស្រាប់តែ OG Golden ដែលជាម្ចាស់ពានក្នុងកម្មវិធីប្រលងចម្រៀងរ៉េបថ្មីថ្មោងមួយរូបចេញមកព្រលយពាក្យទាំងយប់ដែរថា «មិនចេះលេងទេ marketing យកភាពល្បី មិនចេះលេងខូចដូចក្មេងកំហូចជឿក្មេងលេងដី..»។ ការបង្ហោះរបស់ OG ត្រូវបានហ្វេនៗចូលទៅខម្មិនលើកទឹកចិត្តកុំឱ្យ OG ខ្វល់ពីសម្តីអ្នកដទៃ ព្រោះដើមឈើដែលលូតខ្ពស់រមែងត្រូវភ្លៀងខ្យល់បែបនេះហើយ។

បន្ទាប់ពីការបង្ហោះរបស់ ម៉ៃ សុគន្ធ និង OG ទៅលើសំណេររៀងៗខ្លួនដោយមិនបញ្ចេញឈ្មោះខាងលើនេះគឺត្រូវបានគេសង្ស័យថាអ្នកទាំងពីរគឺផ្លែផ្កាឱ្យគ្នាទៅវិញទៅមក។

គួរបញ្ជាក់ផងដែរថា ចាប់តាំងពី OG Golden ក្លាយជាម្ចាស់ពានមកជារឿយៗត្រូវរងនូវសម្តីផ្លែផ្កាថាជាប់ព្រោះក្តីអាណិត ដែលគ្រូបង្វឹក OG គឺ Ruthko ទទួលមរណភាពទាំងកម្មវិធីមិនទាន់បញ្ចប់។ ទោះជាយ៉ាងនេះក្តី KingChi ធ្លាប់ចេញមកនិយាយដែរថាការជាប់របស់គេគឺតាមរយៈការបោះឆ្នោតរបស់មហាជនហើយបេក្ខជន៥នាក់ចុងក្រោយសុទ្ធតែមានសមត្ថភាពដូចគ្នា៕

ហង្ស ម៉ានីតា ត្រូវបានហ្វេនៗជាច្រើនទន្ទឹងរង់ចាំការវិលត្រឡប់មកវិញជាថ្មីរបស់នាងក្នុងការតំណាងប្រទេសកម្ពុជាលើកម្មវិធីបវរកញ្ញាបន្ទាប់ពីការប្រកួតបវរកញ្ញាចក្រវាលឆ្នាំ២០២២។ ស្របពេលមានការរំពឹងថា ម៉ានីតា អាចនឹងចូលប្រកួត Miss World 2025 នោះហ្វេនៗនឹងត្រូវខកចិត្តជាថ្មីព្រោះនាងបញ្ជាក់ថានឹងមិនតំណាងកម្ពុជាប្រកួតកម្មវិធីនេះនោះទេ។

នៅថ្ងៃទី២៥ ខែមីនា ហង្ស ម៉ានីតា បវរកញ្ញាចក្រវាលកម្ពុជាឆ្នាំ២០២២ បានបញ្ជាក់ជាភាសាអង់គ្លេសទៅកាន់ហ្វេនៗដែលមានខ្លឹមសារថា «នាងនឹងមិនធ្វើជាតំណាងប្រទេសកម្ពុជាក្នុងការប្រកួត Miss World 2025 ខាងមុខនេះ។ ម៉ានីតា ថា នាងយល់ពីអារម្មណ៍នៃការខកចិត្តរបស់អ្នកគាំទ្រ ប៉ុន្តែក៏ចង់ស្វែងយល់ចំពោះការសម្រេចចិត្តដ៏លំបាកនេះដែលនាងត្រូវធ្វើ។ ដោយសារបញ្ហាផ្ទាល់ខ្លួន និងពេលវេលាដ៏ខ្លីខាងមុខនាងមិនអាចបំពេញកាតព្វកិច្ចរបស់បវរកញ្ញាពិភពលោកកម្ពុជាបានទេ ហើយវាជាទំនួលខុសត្រូវសម្រាប់នាងក្នុងការទទួលតួនាទីដ៏សំខាន់នេះ ប្រសិនបើនាងមិនអាចបំពេញវាឱ្យអស់ពីសមត្ថភាព។

ម៉ានីតា បានសុំការអធ្យាស្រ័យដោយស្មោះអស់ពីដួងចិត្ត និងអរគុណទៅកាន់អ្នកគាំទ្រ ដែលនាងទទួលបានការគាំទ្រចង់ឱ្យមានការតំណាងប្រទេសកម្ពុជាម្តងទៀត។ ក្នុងនោះ ហង្ស ម៉ានីតា បានសម្តែងការជឿជាក់សម្រាប់អ្នកតំណាងឆ្នាំនេះនឹងប្រឹងប្រែងឱ្យអស់ពីសមត្ថភាព រួមទាំងក្រុមការងាររៀបចំ CIM ផងដែរ។

បើតាមផេកគាំទ្រវិស័យបវរកញ្ញាបានបង្ហាញដែរថា ហង្ស ម៉ានីតា មានធុរៈផ្ទាល់ខ្លួនរយៈពេលមួយឆ្នាំពេញនៅសហរដ្ឋអាម៉េរិកផងដែរទើបធ្វើឱ្យនាងមិនអាចចូលរួមប្រកួតបាន។

គួរបញ្ជាក់ផងដែរថា ហង្ស ម៉ានីតា មានម្តាយជាជនជាតិខ្មែរនិងឪពុកជាជនជាតិបារាំងហើយនាងអាចនិយាយបាន៤ភាសា គឺភាសាខ្មែរ អង់គ្លេស បារាំងនិងអេស្ប៉ាញ៕

កញ្ញា ឆន ស្រីណេត TOP5 Miss Universe Cambodia 2024 បានចេញវីដេអូទាំងយប់ពេញដោយអារម្មណ៍ខ្សឹកខ្សួលក្រោយពីឃើញមានការខម្មិនទៅកាន់លោក ខេមរា ដែលជាកូនខ្មែរកម្ពុជាក្រោមកំពុងចូលរួមប្រកួតកម្មវិធីសម្រស់ហៅលោកថាជា «យួ.ន»។ ស្រីណេត ថាកូនខ្មែរនៅកម្ពុជាក្រោមប្រៀបដូចជាកូនកំព្រាព្រោះនៅទីណាក៏គេមិនទទួលស្គាល់។

ចេញវីដេអូជាង៣នាទី ឆន ស្រីណេត បាននិយាយថាវីដេអូរបស់ ថាច់ ខេមរា ដែលផ្តល់បទសម្ភាសន៍ជាមួយអ្នកសារព័ត៌មានក្នុងការដែលចូលរួមប្រកួត Mister Supranational Cambodia 2025 មានការចូលខម្មិនច្រើនហើយមានអ្នកចូលខម្មិនជាច្រើនថាចោទទៅលើ ខេមរា ហៅសុទ្ធតែ យួន និយាយខ្មែរមិនច្បាស់។ បវរកញ្ញារូបនេះបន្ថែមថាពួកគេ(នាងនិងខេមរា) គឺជាខ្មែរកម្ពុជាក្រោមមានការនិយាយបែបនេះជាក់ស្តែងដូចជានាងសំណាងដែលបានមករស់នៅខ្មែរចូល៥ ៦ឆ្នាំទើបអាចប្រើពាក្យខ្មែរបានច្រើន ហើយបងប្អូនខ្មែរកម្ពុជាក្រោមសឹងតែ៩០%លាយពាក្យវៀតណាមខ្លះៗពីរបីពាក្យក្នុងនោះ។

ឆន ស្រីណេត បានបញ្ជាក់ថាការនិយាយលាយនេះព្រោះតែមិនអាចទប់ទល់បានព្រោះនិយាយច្រើនជំនាន់ហើយតែសំណាងហើយនិយាយខ្មែរបានចឹងបើសិននៅទីនោះ(កម្ពុជាក្រោម) គ្មានសាលា គ្មានការបណ្តុះបណ្តាលខាងភាសាខ្មែរ តែពួកគេអាចរក្សាបាននូវភាសានិយាយ ទំនៀមទម្លាប់ខ្មែរ។ ស្រីណេត បានសង្កត់ធ្ងន់ថា សម្រាប់ខ្មែរក្រោមមិនភ្លេចកំណើតខ្លួនឯងទេទោះបីជាពួកគេបញ្ចេញសំឡេងបែបនេះ និយាយមិនសូវច្បាស់ ឈាមដែលរត់នៅក្នុងខ្លួនគឺខ្មែរ…។

TOP5 Miss Universe Cambodia 2024 រូបនេះបង្ហាញអារម្មណ៍ដោយក្តីអន់ចិត្តដែរដែលគេហៅមួយម៉ាត់ៗថា យួនៗៗ ហើយនៅទីនោះវៀតណាមគេហៅថាខ្មែរ ប៉ុន្តែខ្មែរគ្នាឯងហៅថា យួន ។ ស្រីណេត ពោលទាំងទឹកភ្នែករលីងរលោងដោយក្តីអន់ចិត្តព្រោះរឿងនេះធ្លាប់ធ្លាក់លើខ្លួននាងដែរតែទប់អារម្មណ៍ សម្រាប់បងប្អូនខ្មែរកម្ពុជាក្រោមផ្សេងទៀតដែលបញ្ចេញសូរស័ព្ទសំឡេងបែបនេះគេហៅពួកគាត់ថា យួន ហើយនេះពិតជាឈឺចាប់ណាស់។

បវរកញ្ញា ឆន ស្រីណេត ថាខ្លួនជាខ្មែរប៉ុន្តែគេចោទថាជា យួន នៅទីនោះគេចោទថាខ្មែរ ប្រៀបដូចជាកូនកំព្រាម្នាក់នៅទីណាក៏គេមិនទទួលស្គាល់។ កញ្ញាបានបញ្ជាក់ថា ខ្មែរកម្ពុជាក្រោមជាខ្មែរសុទ្ធហើយបើគាត់កាត់វៀតណាមក៏គិតថាគាត់មានឈាមខ្មែរនៅក្នុងនោះដែរបើសិនជាគាត់មិនភ្លេចកំណើតខ្លួនឯងជាខ្មែរ ដឹងច្បាស់ថាជានរណាមានដូនតាជាខ្មែរ…។ ស្រីណេត ក៏បានសំណូមពរចុងក្រោយដែរថាមុននឹងមានការបញ្ចេញមតិសូមគិតពិចារណាព្រោះវាប៉ះពាល់អារម្មណ៍៕