សហរដ្ឋអាមេរិក ៖ ក្រសួងពាណិជ្ជកម្មអាមេរិកបានចុះបញ្ជីខ្មៅក្រុមហ៊ុនបច្ចេកវិទ្យារបស់ចិនបន្ថែមទៀតស្មើជាង៥០ក្រុមហ៊ុន រួមមាន ៖ ក្រុមហ៊ុនផលិត និងអភិវឌ្ឍន៍បច្ចេកវិទ្យា AI រហូតដល់ក្រុមហ៊ុនផលិតកុំព្យូទ័រទំនើបល្បឿនលឿន ដោយសារក្រុមហ៊ុនបច្ចេកវិទ្យាចិនទាំងនេះដំណើរការខុសពីគោលនយោបាយសន្តិសុខជាតិ និងគោលនយោបាយការបរទេសអាមេរិក គឺយកបច្ចេកវិទ្យាអាមេរិកទៅប្រើប្រាស់ក្នុងផ្នែកកងទ័ព ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៦ ខែមីនា ឆ្នាំ២០២៥ ។

ទូរទស្សន៍ CNBC របស់អាមេរិកបានផ្សព្វផ្សាយដោយយោងតាមសេចក្តីថ្លែងការណ៍របស់ការិយាល័យឧស្សាហកម្ម និងសន្តិសុខ ស្ថិតក្រោមក្រសួងពាណិជ្ជកម្មអាមេរិក កាលពីថ្ងៃទី២៥ ខែមីនា កន្លងមក បញ្ជាក់ថា អាមេរិកបានចុះបញ្ជីខ្មៅក្រុមហ៊ុនបរទេសសរុប៨០ក្រុមហ៊ុន ក្នុងនោះមានក្រុមហ៊ុនចិន ជាង៥០ក្រុមហ៊ុន ។ រីឯក្រុមហ៊ុនអាមេរិកត្រូវបានហាមបញ្ជូនផលិតផលពាក់ព័ន្ធនឹងបច្ចេកវិទ្យាទៅឱ្យក្រុមហ៊ុនចិនក្នុងបញ្ជីខ្មៅ បើពុំទទួលការអនុញ្ញាតពីរដ្ឋាភិបាលលោកប្រធានាធិបតី Donald Trump ។

ក្រុមហ៊ុនចិន៥០ នៅក្នុងបញ្ជីខ្មៅ គឺមាន២៧ក្រុមហ៊ុនបានបញ្ជូនផលិតផលបច្ចេកវិទ្យាពីអាមេរិកទៅគាំទ្រការលើកកម្ពស់សមត្ថភាពកងទ័ពចិន ។ ក្រុមហ៊ុនចិន៧ទៀតបានគាំទ្រការអភិវឌ្ឍបច្ចេកវិទ្យាកុំព្យូទ័រ Quantum របស់ចិន ខណៈក្រុមហ៊ុនចិន៦ទៀតប្រកបអាជីវកម្មទាក់ទងនឹង Inspur Group របស់ចិន ដែលផ្តោតលើការផលិត និងអភិវឌ្ឍន៍ប្រព័ន្ធ Cloud computing, Big data, Applications servers និងបច្ចេកវិទ្យា AI ។ ក្រុមហ៊ុនចិនទាំងនេះត្រូវបានអតីតប្រធានាធិបតីអាមេរិក លោក Joe Biden ធ្លាប់ចុះបញ្ជីខ្មៅកាលពីឆ្នាំ២០២៣ ។

លោក Joe Biden បានចុះបញ្ជីខ្មៅក្រុមហ៊ុនចិនផលិតបន្ទះឈីប និងផលិតកុំព្យូទ័រល្បឿនលឿន ដើម្បីទប់ស្កាត់ការបញ្ជូនផលិតផលបច្ចេកវិទ្យាពីអាមេរិក ពីព្រោះក្រុមហ៊ុនចិននឹងយកបច្ចេកវិទ្យាអាមេរិកទៅប្រើប្រាស់ក្នុងផ្នែកកងទ័ព ។ ក្រុមហ៊ុនអាមេរិក២ បាននាំចេញផលិតផលបច្ចេកវិទ្យាទៅឱ្យក្រុមហ៊ុនចិន ហើយរដ្ឋាភិបាលលោក Biden ក៏ដាក់ទណ្ឌកម្មក្រុមហ៊ុនចិន គឺ Huawei និង HiSilicon ដែលផលិតឈីប ។ ការចុះបញ្ជីខ្មៅក្រុមហ៊ុនចិននៅឆ្នាំ២០២៥ គឺដើម្បីទប់ស្កាត់ក្រុមហ៊ុនបរទេស ដែលស្វែងរកប្រយោជន៍ពីបច្ចេកវិទ្យាអាមេរិក ។ នេះបើតាមមន្ត្រីក្រសួងពាណិជ្ជកម្មអាមេរិក ។

រដ្ឋាភិបាលលោក Trump នឹងការពារក្រុមហ៊ុនបច្ចេកវិទ្យាអាមេរិក ដើម្បីកុំឱ្យនាំចេញផលិតផលបច្ចេកវិទ្យាទៅចិន ពីព្រោះចិននឹងយកបច្ចេកវិទ្យាអាមេរិកទៅផលិត និងអភិវឌ្ឍន៍មីស៊ីលលឿនជាងសំឡេង, យន្តហោះសមយុទ្ធ និងរថយន្តបើកបរដោយស្វ័យប្រវត្តិ ។ ប៉ុន្តែការចុះបញ្ជីខ្មៅក្រុមហ៊ុនចិនធ្វើឱ្យពាណិជ្ជកម្មអាមេរិក និងចិន កាន់តែតានតឹង ព្រោះលោក Trump ទើបតែដំឡើងពន្ធទំនិញចិន ស្មើ២០% ព្រមទាំងដំឡើងពន្ធការនាំចូលដែក និងអាលុយមីញ៉ូមចិន ២៥% ចាប់ពីថ្ងៃទី១២ ខែមីនា ។

ដោយឡែក ក្រសួងការបរទេសចិនបានចេញសេចក្តីថ្លែងការណ៍កាលពីថ្ងៃទី២៥ ខែមីនា ថា ការបន្ថែមក្រុមហ៊ុនចិនក្នុងបញ្ជីខ្មៅរបស់អាមេរិក គឺធ្ងន់ធ្ងរណាស់ ។ ចិនសូមអំពាវនាវឱ្យអាមេរិកឈប់យកបញ្ហាសន្តិសុខជាតិមកធ្វើជាលេសដើម្បីទប់ស្កាត់ក្រុមហ៊ុនបរទេស ៕

ប្រទេសជប៉ុន ៖ កាលពីថ្ងៃទី២៦ ខែមីនា ឆ្នាំ២០២៥ សារព័ត៌មានបរទេសរាយការណ៍ថា លោកតា Iwao Hakamata អាយុ៨៩ឆ្នាំ ត្រូវបានតុលាការជប៉ុនសម្រេចឱ្យលោករួចផុតពីទោសប្រ.ហារ ជីវិតកាលពីឆ្នាំ២០២៤ ដោយសារតុលាការរកឃើញថា គ្មានទោសកំហុស ក្រោយពីលោកបានជាប់ពន្ធ.នាគាររហូតដល់៤៨ឆ្នាំ ដើម្បីរង់ចាំសាលក្រមចុងក្រោយរបស់តុលាការ ។ តុលាការបានផ្តល់ប្រាក់សំណងដល់លោក ចំនួន១លាន៤សែនដុល្លារ ឬស្មើ៨៥ដុល្លារក្នុង១ថ្ងៃ បន្ទាប់ពីលោកបានចំណាយពេលអស់ពាក់កណ្តាលជីវិតរស់នៅក្នុងពន្ធ.នាគារ ។

សារព័ត៌មាន CNN របស់អាមេរិកបានរាយការណ៍កាលពីថ្ងៃទី២៥ ខែមីនា ឆ្នាំ២០២៥ ថា លោកតា Hakamata បានទទួលប្រាក់សំណងចំនួន៨៥ដុល្លារក្នុង១ថ្ងៃ ក្រោយពីចំណាយពេលរហូតដល់៤៨ឆ្នាំ រស់នៅក្នុងពន្ធនាគារគ្មានសេរីភាព ។ ការផ្តល់ប្រាក់សំណងនេះ គឺគិតចាប់ពីថ្ងៃដែលលោកតាត្រូវបានតុលាការកាត់ទោសឱ្យជាប់ពន្ធនាគារ ដោយចោទប្រកាន់ថា បានប្រព្រឹត្តបទល្មើស ។

តាមសំណុំរឿងក្តី គឺលោក Hakamata បានធ្វើការក្នុងរោងចក្រកែច្នៃសណ្តែកសៀងមួយកន្លែងនៅខេត្តឈិស៊ុអូកាក់ ស្ថិតនៅភាគកណ្តាលប្រទេសជប៉ុន ក្រោយពីលោកចូលនិវត្តន៍ពីការងារជាអ្នកប្រដាល់ កាលពីឆ្នាំ១៩៦១ ។ រយៈពេល៥ឆ្នាំក្រោយមក សមត្ថកិច្ចក៏ចាប់ខ្លួនលោក និងចោទប្រកាន់ថា ថៅកែរបស់លោក ព្រមទាំងភរិយា និងកូន២នាក់ ត្រូវបានជនល្មើសចាក់សម្លាប់មួយគ្រួសារក្នុងផ្ទះ ។

ពីដំបូង លោក Hakamata សារភាពថា លោកជាជនល្មើសសម្លាប់ថៅកែរបស់ខ្លួន ប៉ុន្តែក្រោយមកទៀត លោកសារភាថា លោកពុំមែនជាជនល្មើសទេ ព្រោះលោកត្រូវបានសមត្ថកិច្ចធ្វើបាបរាងកាយ និងគំរាមបង្ខំឱ្យលោកសារភាពទទួលកំហុស ។ តុលាការបានកាត់ទោសប្រហារជីវិតលោកនៅឆ្នាំ១៩៦៨ បើទោះជាលោកប្រាប់តុលាការជាច្រើនលើកថា លោកជាមនុស្សស្អាតស្អំ ហើយសមត្ថកិច្ចធ្វើភស្តុតាងក្លែងក្លាយទម្លាក់កំហុសលើលោក ។

ក្រោយពីតុលាការកាត់ទោសប្រហារជីវិត លោកត្រូវបានគេបញ្ជូនទៅពន្ធនាគារ និងរស់នៅក្នុងពន្ធនាគាររហូតដល់ពាក់កណ្តាលជីវិត ដើម្បីរង់ចាំសាលក្រមចុងក្រោយរបស់តុលាការ ។ រហូតមកដល់ឆ្នាំ២០២៤ តុលាការបានសម្រេចឱ្យលោករួចទោសប្រហារជីវិត ក្រោយពីទទួលបានភស្តុតាងថ្មី គឺលទ្ធផលការពិនិត្យ DNA ស្នាមឈាមលើសម្លៀកបំពាក់សាកសព ឃើញថា គឺជាស្នាមឈាមដែលគេលាបពីលើក្រោយកើតហេតុ ។

ករណីរបស់លោក Hakamata ធ្វើឱ្យមហាជនរិះគន់តុលាការ និងអំពាវនាវឱ្យលើកលែងទោសប្រហារជីវិតនៅប្រទេសជប៉ុន ។ មេធាវី និងប្អូនស្រីរបស់លោកជឿថា ប្រាក់សំណងដែលលោក Hakamata ទទួលបាន ពុំអាចជំនួសពេលវេលាដែលលោកបាត់បង់ក្នុងពន្ធនាគារឡើយ បើទោះជាប្រាក់សំណងនេះច្រើនក្តី បើធៀបនឹងអ្នកទោសផ្សេងទៀតនៅជប៉ុនដែលត្រូវតុលាការវិនិច្ឆ័យខុស ៕

កាលពីថ្ងៃទី២៦ ខែមីនា ឆ្នាំ២០២៥ គណៈកម្មការសហភាពអឺរ៉ុបបានអំពាវនាវឱ្យពលរដ្ឋ ដែលរស់នៅបណ្តាប្រទេសជាសមាជិកសហភាពអឺរ៉ុប ទិញស្បៀងអាហារស្តុកទុក និងត្រៀមសម្ភារៈប្រើប្រាស់ចាំបាច់ឱ្យបានគ្រប់គ្រាន់ សម្រាប់ការបរិភោគយ៉ាងហោចណាស់៣ថ្ងៃ ឬ៧២ម៉ោង ។ គណៈកម្មការនេះសង្កត់ធ្ងន់ថា ហានិភ័យផ្សេងៗអាចនឹងកើតឡើងគ្រប់ពេលវេលាដោយសារសង្គ្រា.មអូសបន្លាយ ហើយពលរដ្ឋនៅអឺរ៉ុបគួរតែត្រៀមខ្លួនទប់ទល់នឹងស្ថានការណ៍បត់បែន ។

តាមការផ្សព្វផ្សាយរបស់គណៈកម្មការសហភាពអឺរ៉ុប គឺតំបន់អឺរ៉ុបកំពុងប្រឈមនឹងហានិភ័យ និងភាពមិនប្រាកដប្រជា ជាច្រើនដូចជា ៖ ហានិភ័យដោយសារសង្គ្រាមរវាងរុស្ស៊ី និងអ៊ុយក្រែន ដែលធ្វើឱ្យក្នុងតំបន់កាន់តែមានភាពតានតឹងខ្លាំង ព្រមទាំងហានិភ័យពីការបំផ្លិចបំផ្លាញ, ការបំផ្លាញហេដ្ឋារចនាសម្ព័ន្ធ និងសង្គ្រាមអេឡិចត្រូនិក ។ ហេតុនេះ ពលរដ្ឋនៅអឺរ៉ុបគួរត្រៀមខ្លួនទប់ទល់នឹងស្ថានការណ៍អាសន្ន ព្រមទាំងត្រៀមសម្ភារៈចាំបាច់ឱ្យគ្រប់គ្រាន់ និងទិញស្បៀងអាហារសំខាន់ៗស្តុកទុក យ៉ាងហោចណាស់ អាចបរិភោគបាន៣ថ្ងៃ ។

សារព័ត៌មាន CNN រាយការណ៍ថា សង្គ្រាមរវាងប្រទេសរុស្ស៊ី និងអ៊ុយក្រែន បានអូសបន្លាយរហូតដល់ឆ្នាំ២០២៥ ដែលធ្វើឱ្យប្រទេសនានានៅអឺរ៉ុបគិតថា ពលរដ្ឋរបស់ខ្លួនគួរត្រៀមខ្លួនទប់ទល់នឹងសង្គ្រាម ។ លើសពីនេះ ការត្រឡប់មកកាន់តំណែងឡើងវិញរបស់ប្រធានាធិបតីអាមេរិក លោក Donald Trump និងមន្ត្រីរដ្ឋាភិបាលរបស់លោក ដែលបានបង្ហាញគោលជំហរយ៉ាងច្បាស់ថា អាមេរិកចង់ប្រឈមមុខជាមួយតំបន់អឺរ៉ុប ជាពិសេស ការចូលរួមក្នុងអង្គការណាតូ ។ ហេតុនេះ ធ្វើឱ្យបណ្តាប្រទេសអឺរ៉ុបត្រៀមកម្លាំងទ័ពរៀងៗខ្លួន ។

ប្រធានគណៈកម្មការអឺរ៉ុប លោកស្រី Ursula von der Leyen និយាយថា ៖ «យើងគួរតែត្រៀមខ្លួន ពីព្រោះពលរដ្ឋយើង ប្រទេសជាសមាជិករបស់យើងត្រូវការសិទ្ធិការពារខ្លួន និងឆ្លើយតបយ៉ាងឆាប់រហ័ស ពេលអាសន្នមកដល់» ។

គណៈកម្មការសហភាពអឺរ៉ុបបានណែនាំឱ្យពលរដ្ឋក្នុងជាសមាជិកត្រៀមខ្លួន ស្របពេលប្រទេសជាច្រើននៅតំបន់អឺរ៉ុបបង្កើតផែនការថ្មីៗសម្រាប់ត្រៀមខ្លួន ដូចជា ៖ បារាំងបានបង្កើតសៀវភៅណែនាំពលរដ្ឋពីវិធីយករួចខ្លួនពីហេតុការណ៍គ្រោះថ្នាក់ ។ រីឯអាល្លឺម៉ង់បានអប់រំពលរដ្ឋពីវិធីការពារខ្លួន និងគួរធ្វើដូចម្តេចពេលកើតសង្គ្រាមនៅអឺរ៉ុប ឬពេលរុស្ស៊ីឈ្លានពានអឺរ៉ុប ៕

កូរ៉េខាងត្បូង៖ មនុស្សជាង ២៣,០០០នាក់ត្រូវបានជម្លៀសចេញ ហើយតំបន់វប្បធម៌បេតិកភណ្ឌជាច្រើនបានរងផលប៉ះពាល់ រួមទាំងប្រាសាទពុទ្ធសាសនាដែលមានអាយុ ១,៣០០ ឆ្នាំដែលត្រូវបានបំ..ផ្លាញ ដោយសារគ្រោះ.មហន្តរាយភ្លើង.ឆេះ..ព្រៃនៅប្រទេសកូរ៉េខាងត្បូង។

ភ្លើងឆេះ.ព្រៃនេះ បានចាប់ផ្ដើមកាលពីថ្ងៃសុក្រ ទី២១ ខែមីនា ឆ្នាំ២០២៥ បណ្ដាលអោយមានមនុស្សយ៉ាងហោចណាស់ ១៨ នាក់បានស្លា.ប់ និង ១៩ នាក់បានរង.រ.បួស ដែលនេះគឺជាករណីកម្រមួយ។ បច្ចុប្បន្នភ្លើង.ឆេះព្រៃនេះនៅតែបន្តឆាប.ឆេះនៅភាគអាគ្នេយ៍ នេះបើយោងតាមតួលេខចុងក្រោយរបស់ក្រសួងមហាផ្ទៃ និងសុវត្ថិភាពរបស់ប្រទេសកូរ៉េខាងត្បូង។

ភ្លើងឆេះយ៉ាងសន្ធោសន្ធៅក្នុងទីក្រុង Uiseong បានបង្ករការខូចខាតដល់លំនៅដ្ឋាន និងសំណង់អគារប្រមាណ ២០០ កន្លែង ព្រមទាំងបានឆាបឆេះប្រាសាទ Gounsa ដែលបានសាងសង់ក្នុងឆ្នាំ ៦១៨ នៃគ.ស ដែលជាប្រាសាទមួយក្នុងចំណោមប្រាសាទដ៏ធំបំផុតនៅក្នុងខេត្តនេះ។ អាជ្ញាធរព្រៃឈើបានបញ្ជាក់ផងដែរថា ស្ថាបត្យកម្មដែលមានរចនាសម្ព័ន្ធព្រះពុទ្ធសាសនា និងចាត់ទុកថាជាសម្បត្តិជាតិពីរាជវង្សចូសុន (១៣៩២-១៩១០) ក៏ត្រូវបានបំផ្លាញផងដែរ។

មូលហេតុដែលបណ្ដាលអោយមានភ្លើង.ឆេះនេះកើតឡើង ត្រូវបានគេសន្និដ្ឋានថាមកពីកត្តាមួយចំនួនដូចជា៖ អាកាសធាតុក្ដៅស្ងួត, សកម្មភាពនៃមនុស្ស (ជក់បារី រឺដុតសំរាម…), ដាច់ខ្សែភ្លើងត្រង់ណាមួយ រួចធ្លាក់ទៅប៉ះនឹងព្រៃឈើដែលស្ងួត និងមានខ្យល់បក់ខ្លាំង។

ប្រទេសកូរ៉េខាងត្បូងបាននឹងកំពុងជួបប្រទះភាពរាំងស្ងួតជាងធម្មតា ដោយមានភ្លើងឆេះព្រៃចំនួន 244 ដងក្នុងឆ្នាំនេះ ពោលគឺច្រើនជាងរយៈពេលដូចគ្នាកាលពីឆ្នាំមុន 2.4 ដង។ ភ្លើងឆេះព្រៃជាលើកដំបូងបានកើតមាន កាលពីថ្ងៃសុក្រ សប្តាហ៍មុននៅក្នុងស្រុក Sancheong ភាគអាគ្នេយ៍របស់ប្រទេស ប៉ុន្តែឥឡូវនេះបានរាលដាលដល់ទីក្រុងជិតខាងដូចជា Uiseong, Andong, Cheongsong, Yeongyang និង Yeongdeok។

គួរជម្រាបថា ចំពោះទីតាំងនៃប្រាសាទ Gounsa គឹមានសំណង់ស្ថាបត្យកម្មចំនួន ៣០អគារ និងបានរងផលប៉ះពាល់ចំនួន ២០អគារ ដែលមានស្ថាបត្យកម្មសំខាន់ៗដូចជា ប្រាសាទ Gaunru និងប្រាសាទ Yeonsu Jeon ត្រូវបានខូតខាតស្ទើទាំងស្រុង។ យ៉ាងណាមិញ គេក៏បានជួយសង្រ្គោះនូវរូបសំណាកព្រះពុទ្ធដែលមានអាយុកាលជាង ១,២០០ឆ្នាំ និងវត្ថុបុរាណមួយចំនួនទៀតផងដែរ។

រដ្ឋាភិបាលក៏បានសន្យាថានឹងពង្រឹងការអនុវត្តច្បាប់ប្រឆាំងនឹងការដុតបំផ្លាញសំណល់ដោយខុសច្បាប់ និងចាត់វិធានការលើការធ្វេសប្រហែសរបស់បុគ្គលម្នាណាម្នាក់ដែលជាមូលហេតុចម្បងមួយនៃភ្លើងឆេះព្រៃមួយនេះ៕

ប្រទេសបារាំង ៖ កាលពីថ្ងៃទី២៦ ខែមីនា ឆ្នាំ២០២៥ សារព័ត៌មានបរទេសរាយការណ៍ថា អភិបាលក្រុងប៉ារីស លោកស្រី Anne Hidalgo គ្រោងរុះរើផ្លូវចំនួន៥០០ខ្សែនៅទីក្រុងប៉ារីស ដើម្បីពង្រីកផ្លូវថ្មើរជើង ផ្លូវជិះកង់ និងដាំកូនឈើបង្កើតទីធ្លាពណ៌បៃតង ។ ការរុះរើផ្លូវនីមួយៗនឹងចំណាយប្រាក់ចំនួន៥សែនអឺរ៉ូ (ឬស្មើជាង៥៣ម៉ឺនដុល្លារ) និងផ្តោតនៅទីតាំងក្បែរសាលារៀន ។

អភិបាលក្រុងប៉ារីស លោកស្រី Anne Hidalgo បានពង្រីកទីធ្លាដាំកូនឈើក្នុងទីក្រុង និងកាត់បន្ថយទីធ្លាចតរថយន្តនៅតាមផ្លូវចំនួន៣០០ខ្សែតាំងពីឆ្នាំ២០២០ បច្ចុប្បន្ន លោកស្រីមានគម្រោងកាត់បន្ថយចំណតរថយន្ត១០% ទៀត ។ នេះជាការផ្លាស់ប្តូរមុខមាត់ថ្មីរបស់ទីក្រុងប៉ារីសនៅដំណាក់កាលទី១ រីឯដំណាក់កាលទី២ អភិបាលក្រុងប៉ារីសនឹងកាត់បន្ថយការប្រើប្រាស់រថយន្តផ្ទាល់ខ្លួនក្នុងទីក្រុង និងគាំទ្រឱ្យពលរដ្ឋធ្វើដំណើរតាមមធ្យោបាយសាធារណៈ ព្រមទាំងធ្វើដំណើរដោយថ្មើរជើង និងជិះកង់ ។

គោលនយោបាយនេះមានគោលដៅបង្កើតផ្លូវថ្មើរជើង ចាប់ពី៥កន្លែង ទៅ៨កន្លែងក្នុង១សង្កាត់ ព្រមទាំងមានការពិភាក្សាជាមួយពលរដ្ឋក្នុងតំបន់នៅទិទាឃរដូវ ដើម្បីសម្រេចចិត្តថា តើនឹងរុះរើផ្លូវណាខ្លះ ព្រមទាំងត្រៀមប្រាក់ជាង៥៣ម៉ឺនដុល្លារ សម្រាប់រុះរើផ្លូវ១ខ្សែ ។

គម្រោងរុះរើផ្លូវមានការគាំទ្រពីពលរដ្ឋរហូតដល់៦៦% ដែលនេះបង្ហាញ ពលរដ្ឋបារាំងត្រូវការផ្លូវថ្មើរជើងច្រើន ដោយកាត់បន្ថយចំនួនរថយន្ត និងជំរុញឱ្យទីក្រុងប៉ារីសមានទេសភាពធម្មជាតិពណ៌បៃតង ។ ប៉ុន្តែពលរដ្ឋមួយចំនួនពុំគាំទ្រគម្រោងរុះរើផ្លូវរបស់អភិបាលក្រុងប៉ារីសទេ ដូចជា ៖ អាជីវករលក់ដូរ ពលរដ្ឋខ្លះនិយាយថា ការបង្កើតផ្លូវថ្មើរជើង និងកាត់បន្ថយចំណតរថយន្ត អាចធ្វើឱ្យជីវិតប្រចាំថ្ងៃរបស់ពួកគេស្មុគស្មាញ ។

ការរុះរើផ្លូវនៅទីក្រុងប៉ារីស គឺជាការរឹបអូសយកទីធ្លាក្នុងក្រុងបន្តិចម្តងៗ និងដាក់ទោសពលរដ្ឋដែលគ្មានជម្រើសការធ្វើដំណើរ ក្រៅពីការបើករថយន្ត ។ ប៉ុន្តែទីក្រុងប៉ារីសប្តេជ្ញាអនុវត្តគម្រោងអាកាសធាតុ ចាប់ពីឆ្នាំ២០២៤ ដល់ឆ្នាំ២០៣០ គឺនឹងលុបបំបាត់ចំណតរថយន្ត៦ម៉ឺនកន្លែង និងដាំកូនឈើជំនួស ហើយការលុបបំបាត់ចំណតរថយន្តជាបញ្ហាធំណាស់សម្រាប់ពលរដ្ឋ ។ នេះបើតាមការលើកឡើងនាយកសមាគមបើកបររថយន្ត ។

គោលបំណងចម្បងនៃការរុះរើផ្លូវ គឺកាត់បន្ថយខ្យល់ពុល, ជំរុញការធ្វើដំណើរថ្មើរជើង, ជិះកង់ទៅសាលារៀន, កាត់បន្ថយកំដៅ និងផលប៉ះពាល់ផ្សេងៗ ដោយបង្កើនទីធ្លាពណ៌បៃតង, ពង្រឹងការទប់ទល់ទឹកជំនន់ និងទាក់ទាញទឹកភ្លៀង ។

តាំងពីខែកញ្ញា ឆ្នាំ២០១៥ អភិបាលក្រុងប៉ារីសបានព្យាយាមកាត់បន្ថយការធ្វើចរាចរក្នុងទីក្រុង កាត់បន្ថយសំឡេងរំខាន និងកែលម្អគុណភាពអាកាសធាតុ ដោយរថយន្តក្រុង និងរថយន្តដឹកទំនិញ ដែលមានទម្ងន់ជាង៣តោន និងផលិតមុនថ្ងៃទី១ ខែតុលា ឆ្នាំ២០០១ នឹងពុំអនុញ្ញាតឱ្យបើកបរចូលក្នុងក្រុងទេ ចាប់ពីម៉ោង៨ព្រឹក ដល់ម៉ោង៨ល្ងាច រៀងរាល់ថ្ងៃ ៕