ប្រជាជនជិត 180 លាននាក់ដែលរស់នៅក្នុងប្រទេសបង់ក្លាដេស កំពុងប្រឈមនឹងការកាត់ផ្ដាច់ប្រព័ន្ធទូរគមនាគមន៍ គ្មានអិនធើណេត និងគ្មានសូម្បីសេវាសម្រាប់ទំនាក់ទំនងតាមទូរស័ព្ទចល័ត ដោយសារកង្វះខាតប្រេងឥន្ធនៈដែលបង្កឡើងដោយសង្គ្រាមនៅមជ្ឈិមបូព៌ា។ នេះបើយោងតាមការចុះផ្សាយរបស់ CNA។

ដោយសារសង្រ្គាម និងការរាំងស្ទះនៅច្រកសមុទ្រដែលរំខានដល់ដំណើរការដឹកជញ្ជូនប្រេង និងឧស្ម័ន បានអូសបន្លាយពេលកាន់តែយូរ ប្រទេសជាច្រើនរួមទាំងប្រទេសបង់ក្លាដេស បានទទួលរងផលប៉ះពាល់ស្ទើលើគ្រប់វិស័យ។ ក្នុងនោះវិស័យទូរគមនាគមន៍របស់ប្រទេសនេះក៏ទទួលរងសម្ពាធធ្ងន់ធ្ងរផងដែរ ដោយរដ្ឋាភិបាលបានប្រកាសថា បើគ្មានការកែលម្អយ៉ាងឆាប់រហ័សលើបញ្ហាខ្វះខាតប្រេងឥន្ធនៈទេ ពួកគេអាចនឹងឈានដល់ការបិទប្រព័ន្ធទូរស័ព្ទចល័ត និងអ៊ីនធឺណិតឆាប់ៗនេះមិនខាន។

មូលហេតុដែលជំរុញឲ្យពួកគេធ្វើបែបនេះ គឺដោយសារតែក្រុមហ៊ុនទូរគមនាគមន៍នៅក្នុងប្រទេសបង់ក្លាដេស ពឹងផ្អែកយ៉ាងខ្លាំងទៅលើម៉ាស៊ីនភ្លើង និងមជ្ឈមណ្ឌលទិន្នន័យដែលដើរដោយប្រេងម៉ាស៊ូត និងត្រូវការប្រេងសរុបទៅជិត ៤ ០០០លីត្រក្នុងមួយថ្ងៃ ដែលស្ថានីយប្រេងក្នុងស្រុកមិនមានលទ្ធភាពផ្គត់ផ្គង់ឱ្យបានគ្រប់គ្រាន់នោះទេ។ ក្នុងន័យនេះ នៅពេលការខ្វះខាតប្រេងឥន្ធនៈកាន់តែអាក្រក់ទៅៗ គ្រឹះស្ថានសំខាន់ៗជាច្រើននឹងតម្រូវឲ្យការផ្អាកដំណើរការ ព្រោះឥឡូវនេះវាកំពុងដំណើរការលើប្រេងបម្រុងទាបដែលគួរឱ្យព្រួយបារម្ភបំផុត។

គួរជម្រាបថា ប្រទេសបង់ក្លាជាប្រទេសពឹងផ្អែកលើការនាំចូលប្រេង និងឧស្ម័នប្រហែល 95% ដែលភាគច្រើនមានប្រភពមកពីមជ្ឈិមបូព៌ា ដូច្នេះវាងាយរងគ្រោះយ៉ាងខ្លាំងចំពោះការរំខានដល់ការផ្គត់ផ្គង់ និងការកើនឡើងនៃតម្លៃ។ បច្ចុប្បន្នការតម្រង់ជួរវែងៗនៅស្ថានីយប្រេងឥន្ធនៈ និងប្រេងឡើងថ្លៃ កំពុងត្រូវបានមើលឃើញរួចហើយនៅទូទាំងប្រទេសនេះ ហើយពេលនេះវាក៏បង្កើនសម្ពាធដល់ប្រព័ន្ធដឹកជញ្ជូន អគ្គិសនី និងប្រព័ន្ធទំនាក់ទំនងបន្ថែមទៀត។

ដោយមានប្រជាជនសរុបរហូតដល់ទៅ 177 លាននាក់ ពឹងផ្អែកលើការតភ្ជាប់ទូរស័ព្ទចល័ត ស្ថានភាពនេះមិនមែនគ្រាន់តែជាបញ្ហាថាមពលនោះទេ ប៉ុន្តែជាកង្វល់សេដ្ឋកិច្ច និងសង្គមជាតិទាំងមូលតែម្ដង៕

នៅក្នុងបទសម្ភាសន៍ថ្មីៗនេះនៅលើឆាណែលយូធូបរបស់ Rolling Stone Jungkook សមាជិក BTS បានចែករំលែកគំនិតដ៏ស្មោះស្ម័គ្ររបស់ខ្លួនអំពីការរីកចម្រើនជាសិល្បករ។ តារាចម្រៀងរូបនេះបានសម្តែងការដឹងគុណចំពោះរបៀបដែលមនុស្សយល់ឃើញលោកជាតារា ប៉ុន្តែបានសារភាពថានៅក្នុងក្រសែភ្នែករបស់ខ្លួនឯងផ្ទាល់ Jungkook នៅតែមិនចាត់ទុកខ្លួនឯងថាជា តារាចម្រៀងប៉ុប នោះទេ។ តារាចម្រៀងរូបនេះចង់បន្តកែលម្អ ដើម្បីឱ្យថ្ងៃណាមួយលោកអាចហៅខ្លួនឯងថាជា «តារា» ដោយទំនុកចិត្ត។

ដោយលើកយកស្តង់ដារផ្ទាល់ខ្លួនជាឧទាហរណ៍ Jungkook បានលើកឡើងពីជំនាញភាសាអង់គ្លេសរបស់លោក។ សមាជិកក្មេងជាងគេនៅក្នុងក្រុម BTS និយាយថាការអាចសន្ទនាជាភាសាអង់គ្លេសដោយធម្មជាតិនឹងជាការទម្លាយថ្មីមួយ។ លោកបានបង្ហាញថាលោកបានសាកល្បងកម្មវិធីរៀនភាសាជាច្រើន ប៉ុន្តែបានសង្កត់ធ្ងន់ថាកត្តាសំខាន់បំផុតគឺការតស៊ូ។

ទោះបីជាមានរូបរាងដ៏សមរម្យក៏ដោយ Jungkook ទទួលបានជោគជ័យគួរឱ្យកត់សម្គាល់ក្នុងនាមជាអ្នកសិល្បៈទោល។ បទចម្រៀងឆ្នាំ ២០២៣ មានចំណងជើងថា «Seven» ដែលមានការចូលរួមពីតារាចម្រៀងរ៉េប Latto បានឈរនៅកំពូលតារាង Billboard Hot 100 ខណៈដែលបទ «3D » «Standing Next to You» ក៏បានឈានដល់ចំណាត់ថ្នាក់ខ្ពស់ផងដែរ។

នៅពេលសួរអំពីការធ្វើឱ្យមានតុល្យភាពរវាងសកម្មភាពទោល និងសកម្មភាពជាក្រុម Jungkook បាននិយាយថាលោកមិនគិតច្រើនពេកទេ ប៉ុន្តែគាត់ចូលចិត្តដំណើរការច្នៃប្រឌិត។
លោកក៏បានសង្កត់ធ្ងន់លើស្មារតីការងារជាក្រុមដ៏រឹងមាំរបស់ BTS ដោយបញ្ជាក់ថា ទោះបីជាសមាជិកម្នាក់ៗមានល្បឿន និងរចនាប័ទ្មខុសៗគ្នាក៏ដោយ នៅពេលសម្តែងជាមួយគ្នា ពួកគេបង្កើតបានជាក្រុមរួបរួមគ្នា។

លើសពីនេះ Jungkook បានចូលរួមក្នុងការនិពន្ធបទចម្រៀង «Hooligan» នៅលើអាល់ប៊ុមស្ទូឌីយោទីប្រាំរបស់ BTS ដែលមានចំណងជើងថា«Arirang» ដែលចេញផ្សាយកាលពីខែមីនា ទទួលបានមតិប្រតិកម្មវិជ្ជមាន។ នៅចុងបញ្ចប់នៃបទសម្ភាសន៍ Jungkook បានចែករំលែកថាខ្លួនមានអារម្មណ៍ស្រួលក្នុងការធ្វើជាសមាជិកក្មេងជាងគេនៃក្រុម BTS ព្រោះវាជាតួនាទីដែលលោកស្គាល់ជាយូរមកហើយ៕

របាយការណ៍ស្រាវជ្រាវថ្មីបានបង្ហាញថា ប្រទេសថៃអាចនឹងប្រឈមមុខជាមួយកម្រិតកំដៅដ៏ខ្លាំងក្លាបំផុតនៅឆ្នាំ២០៧០ រហូតអាចក្លាយជាគូប្រជែងជាមួយវាលខ្សាច់សាហារ៉ា ដែលជាតំបន់ក្តៅបំផុតមួយរបស់ពិភពលោក។ កត្តានេះត្រូវបានអ្នកវិទ្យាសាស្រ្តអះអាងថា កើតឡើងដោយសារតែបម្រែបម្រួលនៃអាកាសធាតុរបស់ភពផែនដី។

យោងតាមការចុះផ្សាយរបស់ The Strait Times ដែលដកស្រង់ពីអត្ថបទរបស់លោក Owen Mulhern ដែលមានចំណងជើងថា “Too Hot To Live: Climate Change In Thailand” ឆ្នាំ ២០២០ បានបង្ហាញពីការព្យាករណ៍ទុកថា តំបន់ខ្លះនៃប្រទេសថៃអាចជួបប្រទះនឹងលក្ខខណ្ឌរដូវក្តៅជាមធ្យមស្រដៀងនឹងអាកាសធាតុវាលខ្សាច់សព្វថ្ងៃនេះ ដោយមានថ្ងៃញឹកញាប់ជាង ៤០°C និងយប់ក្តៅជាង។ ទោះជាយ៉ាងណាក៏ដោយ វាមិនដូចវាលខ្សាច់សាហារ៉ាទេ សំណើមត្រូពិចរបស់ប្រទេសថៃនឹងធ្វើឱ្យកំដៅកើនឡើងកាន់តែអាក្រក់ និងបង្កើនហានិភ័យនៃភាពតានតឹងកំដៅ។

គួរជម្រាបថា វាលខ្សាច់សាហារ៉ា គឺជាវាលខ្សាច់ក្តៅដែលមានទំហំធំជាងគេបំផុតនៅលើពិភពលោក។ តំបន់នេះត្រូវបានគស្គាល់ថា ជាវាលរហោស្ថានដែលមានកម្ដៅក្ដៅខ្លាំងបំផុត ដោយតុណ្ហភាពអាចឡើងលើសពី ៥០ °C។ ដូច្នេះការព្យាករណ៍ថាកម្ដៅនៅប្រទេសថៃអាចមានកម្រិតប្រហាក់ប្រហែលវានៅពេលខាងមុខ បានឆ្លុះបញ្ចាំងឲ្យឃើញថា ប្រព័ន្ធអាកាសធាតុរបស់ភពផែនដីទាំងមូលនឹងមានការប្រែប្រួលយ៉ាងខ្លាំង។

អ្នកវិទ្យាសាស្ត្រព្រមានថា គ្រោះថ្នាក់នាពេលអនាគតរបស់ប្រទេសថៃមិនត្រឹមតែសីតុណ្ហភាពខ្ពស់ប៉ុណ្ណោះទេ ប៉ុន្តែកំដៅរួមផ្សំជាមួយសំណើម អាចនឹងបង្កគ្រោះថ្នាក់ដល់សុខភាពមនុស្សយ៉ាងខ្លាំង។ អ្វីដែលកាន់តែអាក្រក់ គឺនៅថ្ងៃអនាគត កម្ដៅដែលថៃធ្លាប់ចាត់ទុកថាជាគ្រោះមហន្តរាយនាពេលនេះ នឹងក្លាយទៅជារឿងធម្មតាដែលកើតឡើងជារៀងរាល់ថ្ងៃទៅវិញ។

ក្រៅពីកម្ដៅដ៏សែនក្ដៅនេះ ប្រទេសថៃក៏កំពុងប្រឈមមុខនឹងបញ្ហាគ្រោះរាំងស្ងួត និងទឹកជំនន់ដែលកើតឡើងញឹកញាប់ និងកាន់តែធ្ងន់ធ្ងរជាងមុន រួមទាំងបញ្ហាកម្រិតទឹកសមុទ្រឡើងខ្ពស់ដែលកំពុងគំរាមកំហែងដល់តំបន់ឆ្នេរ និងតំបន់សេដ្ឋកិច្ចសំខាន់ៗ។ បញ្ហាទាំងអស់នេះមិនមែនកើតឡើងដាច់ដោយឡែកពីគ្នានោះទេ ប៉ុន្តែវាកំពុងវាយប្រហារលើសង្គមក្នុងពេលតែមួយ ដែលធ្វើឲ្យការស្ដារឡើងវិញ និងការសម្របខ្លួនទៅនឹងអាកាសធាតុថ្មី ក្លាយជាកិច្ចការដ៏លំបាក និងត្រូវចំណាយប្រាក់កាសយ៉ាងសន្ធឹកសន្ធាប់។

យ៉ាងណាក៏ដោយ ទាំងនេះគ្រាន់តែជាសេណារីយ៉ូនាពេលអនាគតដែលត្រូវបានគេសិក្សា មិនទាន់អាចសន្មត់ថាជាភាពប្រាកដប្រជានោះទេ ដោយលទ្ធផលយ៉ាងណា វាអាស្រ័យទៅលើការរៀបចំ និងសកម្មភាពរបស់មនុស្សនាពេលបច្ចុប្បន្ន។ ជាមួយគ្នានេះដែរ នាយកដ្ឋាននាយកដ្ឋានឧតុនិយមថៃបានព្រមានថា ប្រទេសថៃនឹងបន្តជួបប្រទះនឹងស្ថានភាពក្តៅទៅៗកាន់តែខ្លាំងនៅឆ្នាំ ២០២៦ ដោយសីតុណ្ហភាពត្រូវបានគេរំពឹងថានឹងលើសពី ៤៤អង្សាសេនៅក្នុងតំបន់មួយចំនួននៅសប្តាហ៍នេះ៕

កាលពីថ្ងៃទី២១ ខែមេសា ឆ្នាំ២០២៦ អាមេរិកបានប្រកាសដាក់ទណ្ឌក.ម្មបន្ថែមលើក្រុមហ៊ុននៅអ៊ីរ៉ង់ តួកគី និងអេមីរ៉ាតអារ៉ាប់រួម ដែលជួយអ៊ីរ៉ង់ក្នុងការស្វែងរក ដឹកជញ្ជូន ប្រមូលផ្តុំ និងផលិតអាវុ.ធនុយក្លេអ៊ែរ រួមទាំងសម្ភារៈកងទ័ព ខណៈការប្រកាសនេះស្របពេលការចរចាបទឈប់បា.ញ់រវាងអាមេរិកជាមួយអ៊ីរ៉ង់គ្មានភាពច្បាស់លាស់ ។ លើសពីនេះ ក៏បានដាក់ទណ្ឌកម្ម.លើបុគ្គលជាច្រើនរូបដែលពាក់ព័ន្ធនឹងក្រុមហ៊ុនអាកាសចរណ៍ Mahan Air របស់អ៊ីរ៉ង់ និងមានទំនាក់ទំនងជាមួយកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ។

រដ្ឋាភិបាលរបស់លោកប្រធានាធិបតី Donald Trump ចាប់ផ្តើមអនុវត្តវិធានការដាក់ទណ្ឌកម្មជាថ្មីកាលពីថ្ងៃទី២១ ខែមេសា ដោយកំណត់គោលដៅលើបុគ្គលសំខាន់ៗ និងក្រុមហ៊ុនមួយចំនួនដែលចូលរួមជួយអ៊ីរ៉ង់ផលិតអាវុធនុយក្លេអ៊ែរបន្ថែមទៀតក្នុងពេលការចរចារវាងអាមេរិកជាមួយអ៊ីរ៉ង់មិនច្បាស់លាស់ ហើយកិច្ចព្រមព្រៀងឈប់បាញ់រវាងប្រទេសទាំងពីរជិតដល់ពេលបញ្ចប់ ។

ក្រសួងហិរញ្ញវត្ថុអាមេរិកបានបញ្ជាក់ក្នុងសេចក្តីថ្លែងការណ៍ថា វិធានការទណ្ឌកម្មថ្មីនេះនឹងប៉ះពាល់បុគ្គលជាច្រើន រួមទាំងក្រុមហ៊ុននៅប្រទេសអ៊ីរ៉ង់ តួកគី និងអេមីរ៉ាតអារ៉ាប់រួម ដែលពួកគេពាក់ព័ន្ធនឹងការស្វែងរក, ដឹកជញ្ជូនអាវុធ, ប្រមូលផ្តុំអាវុធ, ផលិតអាវុធនុយក្លេអ៊ែរ និងឧបករណ៍ដ្រូនឱ្យអ៊ីរ៉ង់ ។

តាមការលើកឡើងរបស់រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent គឺមេដឹកនាំអ៊ីរ៉ង់ត្រូវតែទទួលខុសត្រូវដល់ទីផ្សារថាមពលពិភពលោក រួមទាំងការវាយប្រហារជនស៊ីវិលមិនរើសគោលដៅដោយប្រើប្រាស់កាំជ្រួច និងដ្រូន ។

វិធានការទណ្ឌកម្មនេះកំណត់គោលដៅលើបុគ្គលសំខាន់ៗ៣រូប ពាក់ព័ន្ធនឹងក្រុមហ៊ុនអ៊ីរ៉ង់ដែលត្រូវបានអាមេរិកដាក់ទណ្ឌកម្មមុននេះ ដោយសារក្រុមហ៊ុនអ៊ីរ៉ង់បានស្វែងរកឧបករណ៍រាប់ពាន់បំពាក់ក្នុងដ្រូនអត្តឃាត ហើយឧបករណ៍ទាំងនេះត្រូវបានរកឃើញក្នុងកំទេចដ្រូនម៉ាក Shahed-136 ដែលបាញ់ធ្លាក់ ។ អាមេរិកចោទប្រកាន់អ៊ីរ៉ង់ប្រើប្រាស់ដ្រូនអត្តឃាតវាយប្រហារគោលដៅសំខាន់ៗរបស់អាមេរិកនៅបណ្តាប្រទេសឈូងសមុទ្រពែក្សក្នុងអំឡុងពេលសង្គ្រាម និងថា រុស្ស៊ីបានប្រើប្រាស់ដ្រូន Shahed ជាច្រើនគ្រឿងធ្វើសង្គ្រាមជាមួយអ៊ុយក្រែន ។

ក្រៅពីកំណត់គោលដៅដាក់ទណ្ឌកម្មលើក្រុមហ៊ុនអ៊ីរ៉ង់ អាមេរិកក៏បានកំណត់គោលដៅដាក់ទណ្ឌកម្មលើក្រុមហ៊ុននៅប្រទេសតួកគីផងដែរ ដោយចោទប្រកាន់ក្រុមហ៊ុននៅតួកគីដឹកជញ្ជូនសម្ភារៈកងទ័ពទៅឱ្យក្រុមហ៊ុនអ៊ីរ៉ង់ដែលអាមេរិកកំពុងតែដាក់ទណ្ឌកម្ម ។ ក្រសួងហិរញ្ញវត្ថុអាមេរិកបញ្ជាក់ថា សម្ភារៈកងទ័ពទាំងនេះត្រូវបានយកទៅកែច្នៃបន្ថែមដើម្បីបង្កើនប្រសិទ្ធភាពម៉ាស៊ីនកាំជ្រួច ។

វិធានការទណ្ឌកម្មថែមទាំងកំណត់គោលដៅលើបុគ្គលជាច្រើនរូបទៀតដែលពាក់ព័ន្ធនឹងក្រុមហ៊ុនអាកាសចរណ៍អ៊ីរ៉ង់ Mahan Air​ ដែលអាមេរិកកំពុងដាក់ទណ្ឌកម្ម ដោយចោទប្រកាន់បុគ្គលទាំងនោះមានទំនាក់ទំនងជាមួយកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ៕

អ្នកនាំពាក្យក្រសួងការពារជាតិចិនបានព្រមានអាមេរិក ហ្វីលីពីន និងជប៉ុន ថា កុំលេងជាមួយភ្លើង ប្រយ័ត្នក្តៅនាំឱ្យខាតបង់ផលប្រយោជន៍ខ្លួនឯង និងបំផ្លា.ញទំនុកចិត្តក្នុងតំបន់! បន្ទាប់ពីប្រទេសទាំង៣ ចាប់ផ្តើមធ្វើសមយុទ្ធកងទ័ពទ្រង់ទ្រាយធំប្រចាំឆ្នាំឈ្មោះ «Balikatan» កាលពីថ្ងៃទី២០ ខែមេសា ឆ្នាំ២០២៦ ។ ចិនចាត់ទុកជាការជ្រៀតជ្រែតកិច្ចការផ្ទៃក្នុងតំបន់ និងមិនពេញចិត្តជប៉ុនចូលរួមសមយុទ្ធដើម្បីបង្ហាញកម្លាំងកងទ័ពធ្វើឱ្យផលប៉ះពាល់ធ្លាក់លើប្រទេសរបស់ខ្លួន ។

ចិនព្រមានការធ្វើសមយុទ្ធទ្រង់ទ្រាយធំប្រចាំឆ្នាំរបស់កងទ័ពជើងគោក កងទ័ពអាកាស និងជើងទឹកអាមេរិកជាមួយហ្វីលីពីន និងជប៉ុន ឈ្មោះ «Balikatan» ចាប់ពីថ្ងៃទី២០ ខែមេសា រហូតដល់ថ្ងៃទី៨ ខែឧសភា ឆ្នាំ២០២៦ នៅភាគខាងជើងប្រទេសហ្វីលីពីនជាប់ច្រកសមុទ្រតៃវ៉ាន់ ថាជាការបំផ្លាញទំនុកចិត្ត ធ្វើឱ្យបែកបាក់ក្នុងតំបន់ និងលេងជាមួយភ្លើង ។ សមយុទ្ធនេះមានកងទ័ពចូលរួមរហូតដល់ជាង១ម៉ឺន ៧ពាន់នាក់ ស្របពេលភាពតានតឹងនៅមជ្ឈិមបូព៌ា និងពេលចិនកំពុងដាក់សម្ពាធលើតៃវ៉ាន់ ។

លោក Guo Jiakun អ្នកនាំពាក្យក្រសួងការពារជាតិចិនបាននិយាយក្នុងសន្និសីទកាសែតនៅទីក្រុងប៉េកាំងកាលពីថ្ងៃទី២១ ខែមេសា ថា អ្វីដែលតំបន់អាស៊ីប៉ាស៊ីហ្វិកត្រូវការបំផុតនោះ គឺសន្តិភាព និងភាពស្ងប់ស្ងាត់ តំបន់នេះមិនត្រូវការកងទ័ពពីខាងក្រៅចូលមកជ្រៀតជ្រែក បង្កការបែកបាក់ ឬប្រឈមមុខទេ ។ ការធ្វើសមយុទ្ធរួមគ្នារវាងអាមេរិក ហ្វីលីពីន និងជប៉ុន គឺជាការបំផ្លាញខ្លួនឯង ខណៈជប៉ុនគួរតែប្រុងប្រយ័ត្ន ល្អជាងបង្ហាញកម្លាំងកងទ័ពបំផ្លាញស្ថិរភាពក្នុងតំបន់ ។

ការធ្វើសមយុទ្ធលើកនេះមានសារៈសំខាន់យ៉ាងខ្លាំង ដោយសារជាលើកដំបូងដែលកងទ័ពជប៉ុនចូលរួមហ្វឹកហាត់បាញ់គ្រាប់កាំភ្លើងពិត ។ ជាមួយគ្នានេះ ចិនបានបញ្ជូនកម្លាំងរបស់ខ្លួនតាមជើងទឹក និងផ្លូវអាកាស ដើម្បីតាមដាននាវាពិឃាត JS Ikazuchi របស់ជប៉ុនដែលឆ្លងកាត់ច្រកសមុទ្រតៃវ៉ាន់ ទៅចូលរួមសមយុទ្ធជាមួយអាមេរិក និងហ្វីលីពីន ។

លោក Guo បន្តថា កិច្ចសហការផ្នែកកងទ័ពរវាងប្រទេសនិងប្រទេស មិនគួរបំផ្លាញទំនុកចិត្តក្នុងតំបន់ទេ ការធ្វើសមយុទ្ធនេះកំណត់គោលដៅលើប្រទេសមួយទៀត ឬនឹងបំផ្លាញផលប្រយោជន៍ខ្លួនឯង ។ យើងសូមដាស់តឿនទៅកាន់ប្រទេសចូលរួមសមយុទ្ធថា ការសហការផ្នែកសន្តិសុខរបស់ពួកគេនឹងឈានទៅខាតបង់ផលប្រយោជន៍របស់ខ្លួនប៉ុណ្ណោះ ។

គួរបញ្ជាក់ថា ការធ្វើសមយុទ្ធប្រចាំឆ្នាំរវាងកងទ័ពអាមេរិក ហ្វីលីពីន និងជប៉ុន ចាប់ផ្តើមឡើងកាលពីថ្ងៃទី២០ ខែមេសា ដោយមានការហ្វឹកហាត់បាញ់គ្រាប់កាំភ្លើងពិតនៅភាគខាងជើងប្រទេសហ្វីលីពីនជាប់ច្រកសមុទ្រតៃវ៉ាន់ និងខេត្តជាប់ឆ្នេរសមុទ្រចិនខាងត្បូង ដែលជាតំបន់ជម្លោះរវាងហ្វីលីពីន និងចិន ប្រឈមមុខគ្នាជាច្រើនលើក ។ តាមការអះអាងរបស់អ្នកនាំពាក្យការធ្វើសមយុទ្ធអាមេរិក វាជាឱកាសបង្ហាញពីសម្ព័ន្ធមិត្តដ៏រឹងមាំ ព្រមទាំងជាការប្តេជ្ញាចិត្តរបស់អាមេរិកចំពោះតំបន់អាស៊ីប៉ាស៊ីហ្វិកឱ្យមានលក្ខណៈសេរី និងបើកចំហ ៕