លេខមួយខាងយកមុខ! រដ្ឋមន្រ្តីការបរទេសថៃ លោក ស៊ីហាសាក់ ភួងកេតកែវ បានរៀបរាប់ប្រាប់ប្រមុខការទូតចិន លោក វ៉ាង យី យ៉ាងដូច្នេះថា៖ ភាគីថៃត្រៀមខ្លួនរួចជាស្រេចក្នុងការចរចាជាមួយកម្ពុជា ប៉ុន្តែលុះត្រាតែកម្ពុជាបង្ហាញភាពស្មោះត្រង់, កសាងទំនុកចិត្តល្អ និងសន្យាថានឹងដោះស្រាយបញ្ហាព្រំដែនតែរវាងទ្វេភាគីជាមួយថៃជាមុនសិន នោះទើបការចរចាអាចប្រព្រឹត្តទៅបាន។

ថ្លែងនៅក្នុងឱកាសជួបសំណេះសំណាល និងពិភាក្សាការងារជាមួយប្រមុខការទូត តំណាងបក្សកុម្មុយនិស្តចិន កាលពីយប់ថ្ងៃទី២៤ ខែមេសានេះ លោក ស៊ីហាសាក់ ភួងកេតកែវ បានលើកឡើងថា៖ គោលនយោបាយរបស់ប្រទេសថៃ គឺរួមរស់ជាមួយប្រទេសជិតខាងក្នុងសន្តិភាព និងសន្តិសុខ ហើយនឹងមិនច្រានចោលឡើយនូវការចរចាដើម្បីបញ្ចប់បញ្ហាជាមួយកម្ពុជា។ ទោះជា លោក ស៊ីហាសាក់ បានគូសបញ្ជាក់ថា នៅក្នុងការចរចាទាំងនេះ ភាពស្មោះត្រង់ និងការកសាងទំនុកចិត្ត គឺជារឿងសំខាន់បំផុត។

តាមសម្ដីរបស់លោក ស៊ីហាសាក់ បញ្ហាទ្វេភាគីត្រូវតែដោះស្រាយតាមរយៈការចរចាទ្វេភាគី។ ដូច្នេះ ប្រសិនបើកម្ពុជាពិតជាស្មោះត្រង់ចំពោះវិធីសាស្រ្តនេះ នោះការចរចាបែបនេះគួរតែត្រូវបានបន្ត។ មិនគួរដាក់សម្ពាធលើប្រទេសថៃទេ ហើយខ្ញុំជឿថា ការចរចានឹងរីកចម្រើនបន្តិចម្តងៗ។ បន្ថែមលើនោះ រដ្ឋមន្រ្តីការបរទេសថៃរូបនេះថែមអះអាងទៀតថា ភាគីចិនក៏មិនយល់ស្របនឹងការនាំយកបញ្ហាទ្វេភាគីមកដោះស្រាយលើឆាកអន្តរជាតិដែរ។

គួរជម្រាបថា ការលើកឡើងរបស់រដ្ឋមន្រ្តីក្រសួងការបរទេសថៃដូចខាងលើនេះ ប្រៀបបាននឹងការនិយាយជាន់ពន្លិចអ្នកដទៃដើម្បីយកល្អខ្លួនឯង ទាំងដែលជាក់ស្ដែង ភាគីថៃខ្លួនឯងសម្រេចចិត្តលុបចោល MOU ២០០១ ជាឯកតោភាគី ដោយមិនសួរយោបល់ពីកម្ពុជា ឬភាគីណាមួយឡើយ បើទោះជាអនុស្សារណៈនេះត្រូវបានចុះហត្ថលេខានៅក្រោមច្បាប់អន្តរជាតិក៏ដោយ។

សកម្មភាពហែកចោលកិច្ចព្រមព្រៀងរួមតែម្នាក់ឯងរបស់ថៃដូចខាងលើនេះ អាចចាត់ទុកបានថាជាការរំលោភលើច្បាប់អន្តរជាតិ បំផ្លា.ញទំនុកចិត្តរវាងប្រទេសទាំងពីរ និងបង្កជាឧបសគ្គដ៏ធំដល់ការអភិវឌ្ឍសេដ្ឋកិច្ចរួមគ្នា ជាពិសេសក្នុងវិស័យប្រេង និងឧស្ម័ន ដែលមានតម្លៃរាប់ពាន់លានដុល្លារ។

ឆ្លើយតបនឹងបញ្ហានេះ ក្រសួងការបរទេស និងសហប្រតិបត្តិការអន្តរជាតិកម្ពុជា បានបញ្ជាក់ថា វាជារឿងដែល “គួរឱ្យសោកស្តាយបំផុត” ប្រសិនបើភាគីថៃសម្រេចដកខ្លួនជាឯកតោភាគី។ សម្រាប់កម្ពុជា MOU 2001 នៅតែមានសុពលភាពផ្លូវច្បាប់ពេញលេញ រហូតទាល់តែគោលបំណងនៃកិច្ចព្រមព្រៀងនេះត្រូវបានសម្រេចជាស្ថាពរ។

សម្រាប់កម្ពុជា គឺនៅតែប្តេជ្ញាចិត្តយ៉ាងមុតមាំ និងឥតងាករេចំពោះខ្លឹមសារ និងស្មារតីនៃអនុស្សរណៈនេះ ព្រមទាំងចំពោះសុច្ឆន្ទៈ និងភាពស្មោះត្រង់ ដែលបាននាំឱ្យអនុស្សរណៈនៃការយោគយល់គ្នានេះ សម្រេចបានកាលពីឆ្នាំ២០០១៕

ធ្លាប់តែផ្សព្វផ្សាយលាបពណ៌ទម្លាក់កំហុសមកលើកម្ពុជាជាប្រទេសឆបោ.កអនឡាញ ប៉ុន្តែភ្លេចមើលពីប្រទេសថៃខ្លួនឯង គឺជាទីតាំងឆបោកអនឡាញដ៏ធំបំផុតក្នុងតំបន់ និងក្នុងពិភពលោក! ក្នុងដំណើរទស្សនកិច្ចមកកាន់ប្រទេសថៃកាលពីថ្ងៃទី២៤ ខែមេសា ឆ្នាំ២០២៦ រដ្ឋមន្ត្រីក្រសួងការបរទេសចិន លោក Wang Yi បានប្រាប់ឱ្យរដ្ឋាភិបាលថៃបង្ក្រា.បការឆបោ.កអនឡាញដែលកំពុងតែកើនឡើងខ្លាំងនៅប្រទេសថៃ ហើយលោកនាយករដ្ឋមន្ត្រី Anutin Charnvirakil សន្យាបង្ក្រា.បបទល្មើសអនឡាញឱ្យបានតាមសំណើរបស់ចិន ។

ប្រទេសថៃ គឺជាទីតាំងឆបោកអនឡាញដ៏ធំបំផុតក្នុងពិភពលោក និងមានបទល្មើសអនឡាញកើតឡើងមិនឈប់ឈរ ដូចជា ៖ ការជួញដូរមនុស្ស និងបោកបញ្ឆេតជនបរទេសមកធ្វើការឆបោកនៅប្រទេសថៃ ហើយជនជាតិចិនក៏ចាញ់បោក​ និងត្រូវគេជួញដូរមកប្រទេសថៃដែរ ដូចករណីតារាសម្តែងចិន ។ ទោះជារដ្ឋាភិបាលថៃអាណត្តិមុនៗបានបង្ក្រាបបទល្មើសជាបន្តបន្ទាប់ ប៉ុន្តែនៅតែបង្ក្រាបមិនអស់ រហូតដល់ជនល្មើសលួចឆ្លងដែនមកកាន់ប្រទេសជិតខាង ក្នុងនោះកម្ពុជា គឺជាប្រទេសរងគ្រោះដោយសារលំហូរជនល្មើសឆបោកអនឡាញឆ្លងដែនពីប្រទេសថៃ ។

សារព័ត៌មាននានារបស់ថៃព្យាយាមលាបពណ៌ដោយចោទប្រកាន់កម្ពុជាមានទីតាំងការឆបោកអនឡាញ ដើម្បីលាក់បាំងកំហុសកងទ័ពថៃកំពុងតែកាន់កាប់ទឹកដីកម្ពុជាដោយខុសច្បាប់ និងដើម្បីឱ្យពិភពលោក យល់ខុសមកលើកម្ពុជា ។ ការពិត ថៃទៅវិញទេជាសម្បុក និងសម្បូរឆបោកអនឡាញខ្លាំងជាងប្រទេសជិតខាងទៅទៀត ប៉ុន្តែសារព័ត៌មានថៃបែរជាមិនហ៊ានដាក់ឈ្មោះប្រទេសខ្លួនថា «Scam Thailand» ។

កាលពីថ្ងៃទី២៤ ខែមេសា នាយករដ្ឋមន្ត្រីថៃ លោក Anutin បានទទួលស្វាគមន៍ដំណើរទស្សនកិច្ចរបស់រដ្ឋមន្ត្រីក្រសួងការបរទេសចិន លោក Wang Yi មកកាន់ប្រទេសថៃ បន្ទាប់ពីបញ្ចប់ទស្សនកិច្ចនៅកម្ពុជា ។ ក្នុងឱកាសនេះ លោក Anutin លើកឡើងពីគោលជំហររបស់ថៃចង់បង្កើនចំណងមិត្តភាពជាមួយចិនយូរអង្វែង និងសុំឱ្យចិនចាត់ទុកថៃដូចជាប្រទេសបងប្អូន ខណៈលោក Wang Yi ប្រាប់ឱ្យរដ្ឋាភិបាលថៃបង្ក្រាបការឆបោកអនឡាញ (OnlineScam) ដែលកំពុងតែកើនឡើងខ្លាំង ។

ភាគីថៃរំពឹងថា ដំណើរទស្សនកិច្ចរបស់រដ្ឋមន្ត្រីក្រសួងការបរទេសចិន នឹងជួយពង្រឹងទំនាក់ទំនងរវាងប្រទេសទាំងពីរឱ្យកាន់តែជិតស្និទ្ធ និងមានទំនុកចិត្ត ។ ក្រៅពីនេះ នាយករដ្ឋមន្ត្រីថៃបានអញ្ជើញនាយករដ្ឋមន្ត្រីចិន លោក Li Qiang មកបំពេញទស្សនកិច្ចនៅថៃនាពេលខាងមុខ ព្រមទាំងប្រាប់ទៅលោក Wang Yi អំពីស្ថានការណ៍ជម្លោះកម្ពុជា-ថៃ ថា ភាគីទាំងពីរសង្ឃឹមងាកមកកាន់ទំនាក់ទំនង និងសហការជាមួយគ្នាល្អប្រសើរក្នុងពេលដ៏ឆាប់ ។

គួរបញ្ជាក់ថា ថៃបានប្រឈមនឹងការកើនឡើងនៃបទល្មើសឆបោកអនឡាញក្នុងប្រទេសរបស់ខ្លួនជាច្រើនឆ្នាំមកហើយ សមត្ថកិច្ចថៃបានចាប់ខ្លួនជនបរទេសជាបន្តបន្ទាប់ដែលសម្ងំលាក់ខ្លួននៅប្រទេសថៃក្រោមរូបភាពវិនិយោគ ។ សារព័ត៌មានបរទេសជាច្រើនបានចុះផ្សាយពីបទល្មើសឆបោកអនឡាញនៅប្រទេសថៃកើនឡើងតាំងពីឆ្នាំ២០២៥ ដែលបណ្តាលឱ្យសេដ្ឋកិច្ចថៃខាតបង់ប្រាក់អស់រាប់ពាន់លានបាត សូម្បីតែអតីតនាយរដ្ឋមន្ត្រីថៃ លោកស្រី Paetongtarn Shinawatra ក៏ធ្លាប់បង្ហើបដែរថា លោកស្រីផ្ទាល់ប៊ិះនឹងចាញ់បោកពួកឆបោកតាមអនឡាញដែលប្រើ AI បន្លំសំឡេងធ្វើជាមេដឹកនាំអាស៊ានម្នាក់ ព្យាយាមបញ្ចុះបញ្ចូលឱ្យលោកស្រី បញ្ចេញមូលនិធិជាអំណោយក្នុងនាមប្រទេសថៃ ៕

ស្របពេលដែលសង្រ្គាមនៅមជ្ឈិមបូព៌ាបានរីករាលដាលលើសពីជម្លោះលើដីនិងលើអាកាស ហេដ្ឋារចនាសម្ព័ន្ធថាមពលនិងឌីជីថលនៅក្រោមផ្ទៃទឹក ក៏ប្រឈមនឹងហានិភ័យនៃការបំផ្លិ.ចបំផ្លា.ញផងដែរ ដោយកងឆ្មាំបដិវត្តន៍អ៊ីស្លាមអុីរ៉ង់ (IRGC) បានព្រ.មានថា នឹងកាត់ផ្ដាច់ខ្សែអុបទិកដែលកប់ជ្រៅនៅក្រោមបាតសមុទ្រពែរ្សឲ្យពិភពលោកកាន់តែវឹកវរបន្ថែមទៀត។ តើពិភពលោកអាចប្រឈមនឹងបញ្ហាអ្វីខ្លះ ប្រសិនបើខ្សែអុបទិកទាំងនោះត្រូវបានកាត់ផ្ដាច់?

យោងតាមការចុះផ្សាយរបស់សារព័ត៌មាន The India Times កាលពីថ្មីៗនេះបានឲ្យដឹងថា ខ្សែបណ្ដាញអុបទិកក្រោមបាតសមុទ្រ គឺជាឆ្អឹងខ្នងលាក់កំបាំងនៃអ៊ីនធឺណិតសកល ដែលពួកវាផ្ទុកទិន្នន័យយ៉ាងច្រើនរវាងអាស៊ី អឺរ៉ុប មជ្ឈិមបូព៌ា និងអាហ្វ្រិកជារៀងរាល់វិនាទី។ ដូច្នេះហើយ អ្នកប្រើប្រាស់អ៊ីនធឺណិតនៅទូទាំងពិភពលោកអាចនឹងជួបប្រទះជាមួយបញ្ហាភ្លាមៗ ប្រសិនបើវាទទួលរងការរំខានណាមួយ។

ផ្អែកតាមរបាយការណ៍ខាងលើនេះ ប្រសិនបើខ្សែកាបអុបទិកដែលនៅក្នុងឈូងសមុទ្រពែរ្សទាំងអស់នោះ ត្រូវបានកាត់ផ្តាច់ ផលប៉ះពាល់ដំបូងនឹងជាការរំខានអ៊ីនធឺណិតយ៉ាងទូលំទូលាយនៅទូទាំងប្រទេសឈូងសមុទ្រដូចជា អារ៉ាប់រួម អារ៉ាប៊ីសាអូឌីត កាតា បារ៉ែន គុយវ៉ែត អ៊ីរ៉ាក់ និងអ៊ីរ៉ង់។ នៅពេលនោះ មនុស្សរាប់លាននាក់អាចជួបប្រទះនឹងការហៅទូរស័ព្ទដាច់ៗព្រោះសេវារអាក់រអួល ល្បឿនអ៊ីនធឺណិតយឺត ការដាច់កម្មវិធី និងបញ្ហាក្នុងការចូលប្រើគេហទំព័រ ឬសេវាកម្ម Cloud ។

ការប៉ះទង្គិចធំទីពីរនឹងប៉ះពាល់ដល់ប្រព័ន្ធធនាគារ និងអាជីវកម្មសំខាន់ៗជាច្រើននៅជុំវិញពិភពលោក ដែលរួមមានការទូទាត់អន្តរជាតិ ការជួញដូរភាគហ៊ុន កម្មវិធីភស្តុភារ និងការកក់ក្រុមហ៊ុនអាកាសចរណ៍ជាដើម។ ក្នុងន័យនេះ ការពន្យារពេល ឬការដាច់ណាមួយអាចរំខានភ្លាមៗដល់ប្រតិបត្តិការកាតឥណទាន, ប្រព័ន្ធ ATM និងប្រតិបត្តិការអាជីវកម្មនៅទូទាំងអាស៊ី អឺរ៉ុប និងមជ្ឈិមបូព៌ា។ លើសពីនោះក្រុមហ៊ុននាំចេញប្រេង និងឧស្ម័ននៅក្នុងឈូងសមុទ្រក៏អាចប្រឈមមុខនឹងបញ្ហាទំនាក់ទំនងដែលប៉ះពាល់ដល់ការដឹកជញ្ជូន និងការសម្របសម្រួលទីផ្សារផងដែរ។

សរុបមក អ្នកប្រើប្រាស់នៅខាងក្រៅតំបន់នៅទូទាំងពិភពលោក អាចកត់សម្គាល់ឃើញល្បឿនយឺតនៃអ៊ីធឺណេតភ្លាមៗ ជាពិសេសសម្រាប់វេទិកាដែលពឹងផ្អែកលើមជ្ឈមណ្ឌលទិន្នន័យដែលភ្ជាប់តាមរយៈផ្លូវឈូងសមុទ្រ ហើយក្រុមហ៊ុនបច្ចេកវិទ្យាធំៗមួយចំនួនក៏អាចរងផលប៉ះពាល់ផងដែរ។

បើទោះជាបច្ចុប្បន្នមិនទាន់មានខ្សែណាមួយត្រូវបានកាត់ផ្តាច់ក៏ដោយ ប៉ុន្តែការគំរាមកំហែងរបស់អ៊ីរ៉ង់នៅពេលនេះ បានបង្ហាញពីការពិតដែលកំពុងកើនឡើងថានៅក្នុងពិភពលោកសព្វថ្ងៃនេះ សង្គ្រាមលែងត្រូវបានប្រយុទ្ធតែនៅលើដី ឬនៅលើអាកាសទៀតហើយ ប៉ុន្តែក៏ស្ថិតនៅក្រោមសមុទ្រជ្រៅផងដែរ ហើយរាល់ការរំខានដល់ណាមួយដល់ហេដ្ឋារចនាសម្ព័ន្ធទាំងនោះនឹងនាំឲ្យរបត់សង្គមមានការប្រែប្រួលនឹកស្មានមិនដល់៕