របាយការណ៍ស្រាវជ្រាវថ្មីបានបង្ហាញថា ប្រទេសថៃអាចនឹងប្រឈមមុខជាមួយកម្រិតកំដៅដ៏ខ្លាំងក្លាបំផុតនៅឆ្នាំ២០៧០ រហូតអាចក្លាយជាគូប្រជែងជាមួយវាលខ្សាច់សាហារ៉ា ដែលជាតំបន់ក្តៅបំផុតមួយរបស់ពិភពលោក។ កត្តានេះត្រូវបានអ្នកវិទ្យាសាស្រ្តអះអាងថា កើតឡើងដោយសារតែបម្រែបម្រួលនៃអាកាសធាតុរបស់ភពផែនដី។

យោងតាមការចុះផ្សាយរបស់ The Strait Times ដែលដកស្រង់ពីអត្ថបទរបស់លោក Owen Mulhern ដែលមានចំណងជើងថា “Too Hot To Live: Climate Change In Thailand” ឆ្នាំ ២០២០ បានបង្ហាញពីការព្យាករណ៍ទុកថា តំបន់ខ្លះនៃប្រទេសថៃអាចជួបប្រទះនឹងលក្ខខណ្ឌរដូវក្តៅជាមធ្យមស្រដៀងនឹងអាកាសធាតុវាលខ្សាច់សព្វថ្ងៃនេះ ដោយមានថ្ងៃញឹកញាប់ជាង ៤០°C និងយប់ក្តៅជាង។ ទោះជាយ៉ាងណាក៏ដោយ វាមិនដូចវាលខ្សាច់សាហារ៉ាទេ សំណើមត្រូពិចរបស់ប្រទេសថៃនឹងធ្វើឱ្យកំដៅកើនឡើងកាន់តែអាក្រក់ និងបង្កើនហានិភ័យនៃភាពតានតឹងកំដៅ។

គួរជម្រាបថា វាលខ្សាច់សាហារ៉ា គឺជាវាលខ្សាច់ក្តៅដែលមានទំហំធំជាងគេបំផុតនៅលើពិភពលោក។ តំបន់នេះត្រូវបានគស្គាល់ថា ជាវាលរហោស្ថានដែលមានកម្ដៅក្ដៅខ្លាំងបំផុត ដោយតុណ្ហភាពអាចឡើងលើសពី ៥០ °C។ ដូច្នេះការព្យាករណ៍ថាកម្ដៅនៅប្រទេសថៃអាចមានកម្រិតប្រហាក់ប្រហែលវានៅពេលខាងមុខ បានឆ្លុះបញ្ចាំងឲ្យឃើញថា ប្រព័ន្ធអាកាសធាតុរបស់ភពផែនដីទាំងមូលនឹងមានការប្រែប្រួលយ៉ាងខ្លាំង។

អ្នកវិទ្យាសាស្ត្រព្រមានថា គ្រោះថ្នាក់នាពេលអនាគតរបស់ប្រទេសថៃមិនត្រឹមតែសីតុណ្ហភាពខ្ពស់ប៉ុណ្ណោះទេ ប៉ុន្តែកំដៅរួមផ្សំជាមួយសំណើម អាចនឹងបង្កគ្រោះថ្នាក់ដល់សុខភាពមនុស្សយ៉ាងខ្លាំង។ អ្វីដែលកាន់តែអាក្រក់ គឺនៅថ្ងៃអនាគត កម្ដៅដែលថៃធ្លាប់ចាត់ទុកថាជាគ្រោះមហន្តរាយនាពេលនេះ នឹងក្លាយទៅជារឿងធម្មតាដែលកើតឡើងជារៀងរាល់ថ្ងៃទៅវិញ។

ក្រៅពីកម្ដៅដ៏សែនក្ដៅនេះ ប្រទេសថៃក៏កំពុងប្រឈមមុខនឹងបញ្ហាគ្រោះរាំងស្ងួត និងទឹកជំនន់ដែលកើតឡើងញឹកញាប់ និងកាន់តែធ្ងន់ធ្ងរជាងមុន រួមទាំងបញ្ហាកម្រិតទឹកសមុទ្រឡើងខ្ពស់ដែលកំពុងគំរាមកំហែងដល់តំបន់ឆ្នេរ និងតំបន់សេដ្ឋកិច្ចសំខាន់ៗ។ បញ្ហាទាំងអស់នេះមិនមែនកើតឡើងដាច់ដោយឡែកពីគ្នានោះទេ ប៉ុន្តែវាកំពុងវាយប្រហារលើសង្គមក្នុងពេលតែមួយ ដែលធ្វើឲ្យការស្ដារឡើងវិញ និងការសម្របខ្លួនទៅនឹងអាកាសធាតុថ្មី ក្លាយជាកិច្ចការដ៏លំបាក និងត្រូវចំណាយប្រាក់កាសយ៉ាងសន្ធឹកសន្ធាប់។

យ៉ាងណាក៏ដោយ ទាំងនេះគ្រាន់តែជាសេណារីយ៉ូនាពេលអនាគតដែលត្រូវបានគេសិក្សា មិនទាន់អាចសន្មត់ថាជាភាពប្រាកដប្រជានោះទេ ដោយលទ្ធផលយ៉ាងណា វាអាស្រ័យទៅលើការរៀបចំ និងសកម្មភាពរបស់មនុស្សនាពេលបច្ចុប្បន្ន។ ជាមួយគ្នានេះដែរ នាយកដ្ឋាននាយកដ្ឋានឧតុនិយមថៃបានព្រមានថា ប្រទេសថៃនឹងបន្តជួបប្រទះនឹងស្ថានភាពក្តៅទៅៗកាន់តែខ្លាំងនៅឆ្នាំ ២០២៦ ដោយសីតុណ្ហភាពត្រូវបានគេរំពឹងថានឹងលើសពី ៤៤អង្សាសេនៅក្នុងតំបន់មួយចំនួននៅសប្តាហ៍នេះ៕

កាលពីថ្ងៃទី២១ ខែមេសា ឆ្នាំ២០២៦ អាមេរិកបានប្រកាសដាក់ទណ្ឌក.ម្មបន្ថែមលើក្រុមហ៊ុននៅអ៊ីរ៉ង់ តួកគី និងអេមីរ៉ាតអារ៉ាប់រួម ដែលជួយអ៊ីរ៉ង់ក្នុងការស្វែងរក ដឹកជញ្ជូន ប្រមូលផ្តុំ និងផលិតអាវុ.ធនុយក្លេអ៊ែរ រួមទាំងសម្ភារៈកងទ័ព ខណៈការប្រកាសនេះស្របពេលការចរចាបទឈប់បា.ញ់រវាងអាមេរិកជាមួយអ៊ីរ៉ង់គ្មានភាពច្បាស់លាស់ ។ លើសពីនេះ ក៏បានដាក់ទណ្ឌកម្ម.លើបុគ្គលជាច្រើនរូបដែលពាក់ព័ន្ធនឹងក្រុមហ៊ុនអាកាសចរណ៍ Mahan Air របស់អ៊ីរ៉ង់ និងមានទំនាក់ទំនងជាមួយកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ។

រដ្ឋាភិបាលរបស់លោកប្រធានាធិបតី Donald Trump ចាប់ផ្តើមអនុវត្តវិធានការដាក់ទណ្ឌកម្មជាថ្មីកាលពីថ្ងៃទី២១ ខែមេសា ដោយកំណត់គោលដៅលើបុគ្គលសំខាន់ៗ និងក្រុមហ៊ុនមួយចំនួនដែលចូលរួមជួយអ៊ីរ៉ង់ផលិតអាវុធនុយក្លេអ៊ែរបន្ថែមទៀតក្នុងពេលការចរចារវាងអាមេរិកជាមួយអ៊ីរ៉ង់មិនច្បាស់លាស់ ហើយកិច្ចព្រមព្រៀងឈប់បាញ់រវាងប្រទេសទាំងពីរជិតដល់ពេលបញ្ចប់ ។

ក្រសួងហិរញ្ញវត្ថុអាមេរិកបានបញ្ជាក់ក្នុងសេចក្តីថ្លែងការណ៍ថា វិធានការទណ្ឌកម្មថ្មីនេះនឹងប៉ះពាល់បុគ្គលជាច្រើន រួមទាំងក្រុមហ៊ុននៅប្រទេសអ៊ីរ៉ង់ តួកគី និងអេមីរ៉ាតអារ៉ាប់រួម ដែលពួកគេពាក់ព័ន្ធនឹងការស្វែងរក, ដឹកជញ្ជូនអាវុធ, ប្រមូលផ្តុំអាវុធ, ផលិតអាវុធនុយក្លេអ៊ែរ និងឧបករណ៍ដ្រូនឱ្យអ៊ីរ៉ង់ ។

តាមការលើកឡើងរបស់រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent គឺមេដឹកនាំអ៊ីរ៉ង់ត្រូវតែទទួលខុសត្រូវដល់ទីផ្សារថាមពលពិភពលោក រួមទាំងការវាយប្រហារជនស៊ីវិលមិនរើសគោលដៅដោយប្រើប្រាស់កាំជ្រួច និងដ្រូន ។

វិធានការទណ្ឌកម្មនេះកំណត់គោលដៅលើបុគ្គលសំខាន់ៗ៣រូប ពាក់ព័ន្ធនឹងក្រុមហ៊ុនអ៊ីរ៉ង់ដែលត្រូវបានអាមេរិកដាក់ទណ្ឌកម្មមុននេះ ដោយសារក្រុមហ៊ុនអ៊ីរ៉ង់បានស្វែងរកឧបករណ៍រាប់ពាន់បំពាក់ក្នុងដ្រូនអត្តឃាត ហើយឧបករណ៍ទាំងនេះត្រូវបានរកឃើញក្នុងកំទេចដ្រូនម៉ាក Shahed-136 ដែលបាញ់ធ្លាក់ ។ អាមេរិកចោទប្រកាន់អ៊ីរ៉ង់ប្រើប្រាស់ដ្រូនអត្តឃាតវាយប្រហារគោលដៅសំខាន់ៗរបស់អាមេរិកនៅបណ្តាប្រទេសឈូងសមុទ្រពែក្សក្នុងអំឡុងពេលសង្គ្រាម និងថា រុស្ស៊ីបានប្រើប្រាស់ដ្រូន Shahed ជាច្រើនគ្រឿងធ្វើសង្គ្រាមជាមួយអ៊ុយក្រែន ។

ក្រៅពីកំណត់គោលដៅដាក់ទណ្ឌកម្មលើក្រុមហ៊ុនអ៊ីរ៉ង់ អាមេរិកក៏បានកំណត់គោលដៅដាក់ទណ្ឌកម្មលើក្រុមហ៊ុននៅប្រទេសតួកគីផងដែរ ដោយចោទប្រកាន់ក្រុមហ៊ុននៅតួកគីដឹកជញ្ជូនសម្ភារៈកងទ័ពទៅឱ្យក្រុមហ៊ុនអ៊ីរ៉ង់ដែលអាមេរិកកំពុងតែដាក់ទណ្ឌកម្ម ។ ក្រសួងហិរញ្ញវត្ថុអាមេរិកបញ្ជាក់ថា សម្ភារៈកងទ័ពទាំងនេះត្រូវបានយកទៅកែច្នៃបន្ថែមដើម្បីបង្កើនប្រសិទ្ធភាពម៉ាស៊ីនកាំជ្រួច ។

វិធានការទណ្ឌកម្មថែមទាំងកំណត់គោលដៅលើបុគ្គលជាច្រើនរូបទៀតដែលពាក់ព័ន្ធនឹងក្រុមហ៊ុនអាកាសចរណ៍អ៊ីរ៉ង់ Mahan Air​ ដែលអាមេរិកកំពុងដាក់ទណ្ឌកម្ម ដោយចោទប្រកាន់បុគ្គលទាំងនោះមានទំនាក់ទំនងជាមួយកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ៕

អ្នកនាំពាក្យក្រសួងការពារជាតិចិនបានព្រមានអាមេរិក ហ្វីលីពីន និងជប៉ុន ថា កុំលេងជាមួយភ្លើង ប្រយ័ត្នក្តៅនាំឱ្យខាតបង់ផលប្រយោជន៍ខ្លួនឯង និងបំផ្លា.ញទំនុកចិត្តក្នុងតំបន់! បន្ទាប់ពីប្រទេសទាំង៣ ចាប់ផ្តើមធ្វើសមយុទ្ធកងទ័ពទ្រង់ទ្រាយធំប្រចាំឆ្នាំឈ្មោះ «Balikatan» កាលពីថ្ងៃទី២០ ខែមេសា ឆ្នាំ២០២៦ ។ ចិនចាត់ទុកជាការជ្រៀតជ្រែតកិច្ចការផ្ទៃក្នុងតំបន់ និងមិនពេញចិត្តជប៉ុនចូលរួមសមយុទ្ធដើម្បីបង្ហាញកម្លាំងកងទ័ពធ្វើឱ្យផលប៉ះពាល់ធ្លាក់លើប្រទេសរបស់ខ្លួន ។

ចិនព្រមានការធ្វើសមយុទ្ធទ្រង់ទ្រាយធំប្រចាំឆ្នាំរបស់កងទ័ពជើងគោក កងទ័ពអាកាស និងជើងទឹកអាមេរិកជាមួយហ្វីលីពីន និងជប៉ុន ឈ្មោះ «Balikatan» ចាប់ពីថ្ងៃទី២០ ខែមេសា រហូតដល់ថ្ងៃទី៨ ខែឧសភា ឆ្នាំ២០២៦ នៅភាគខាងជើងប្រទេសហ្វីលីពីនជាប់ច្រកសមុទ្រតៃវ៉ាន់ ថាជាការបំផ្លាញទំនុកចិត្ត ធ្វើឱ្យបែកបាក់ក្នុងតំបន់ និងលេងជាមួយភ្លើង ។ សមយុទ្ធនេះមានកងទ័ពចូលរួមរហូតដល់ជាង១ម៉ឺន ៧ពាន់នាក់ ស្របពេលភាពតានតឹងនៅមជ្ឈិមបូព៌ា និងពេលចិនកំពុងដាក់សម្ពាធលើតៃវ៉ាន់ ។

លោក Guo Jiakun អ្នកនាំពាក្យក្រសួងការពារជាតិចិនបាននិយាយក្នុងសន្និសីទកាសែតនៅទីក្រុងប៉េកាំងកាលពីថ្ងៃទី២១ ខែមេសា ថា អ្វីដែលតំបន់អាស៊ីប៉ាស៊ីហ្វិកត្រូវការបំផុតនោះ គឺសន្តិភាព និងភាពស្ងប់ស្ងាត់ តំបន់នេះមិនត្រូវការកងទ័ពពីខាងក្រៅចូលមកជ្រៀតជ្រែក បង្កការបែកបាក់ ឬប្រឈមមុខទេ ។ ការធ្វើសមយុទ្ធរួមគ្នារវាងអាមេរិក ហ្វីលីពីន និងជប៉ុន គឺជាការបំផ្លាញខ្លួនឯង ខណៈជប៉ុនគួរតែប្រុងប្រយ័ត្ន ល្អជាងបង្ហាញកម្លាំងកងទ័ពបំផ្លាញស្ថិរភាពក្នុងតំបន់ ។

ការធ្វើសមយុទ្ធលើកនេះមានសារៈសំខាន់យ៉ាងខ្លាំង ដោយសារជាលើកដំបូងដែលកងទ័ពជប៉ុនចូលរួមហ្វឹកហាត់បាញ់គ្រាប់កាំភ្លើងពិត ។ ជាមួយគ្នានេះ ចិនបានបញ្ជូនកម្លាំងរបស់ខ្លួនតាមជើងទឹក និងផ្លូវអាកាស ដើម្បីតាមដាននាវាពិឃាត JS Ikazuchi របស់ជប៉ុនដែលឆ្លងកាត់ច្រកសមុទ្រតៃវ៉ាន់ ទៅចូលរួមសមយុទ្ធជាមួយអាមេរិក និងហ្វីលីពីន ។

លោក Guo បន្តថា កិច្ចសហការផ្នែកកងទ័ពរវាងប្រទេសនិងប្រទេស មិនគួរបំផ្លាញទំនុកចិត្តក្នុងតំបន់ទេ ការធ្វើសមយុទ្ធនេះកំណត់គោលដៅលើប្រទេសមួយទៀត ឬនឹងបំផ្លាញផលប្រយោជន៍ខ្លួនឯង ។ យើងសូមដាស់តឿនទៅកាន់ប្រទេសចូលរួមសមយុទ្ធថា ការសហការផ្នែកសន្តិសុខរបស់ពួកគេនឹងឈានទៅខាតបង់ផលប្រយោជន៍របស់ខ្លួនប៉ុណ្ណោះ ។

គួរបញ្ជាក់ថា ការធ្វើសមយុទ្ធប្រចាំឆ្នាំរវាងកងទ័ពអាមេរិក ហ្វីលីពីន និងជប៉ុន ចាប់ផ្តើមឡើងកាលពីថ្ងៃទី២០ ខែមេសា ដោយមានការហ្វឹកហាត់បាញ់គ្រាប់កាំភ្លើងពិតនៅភាគខាងជើងប្រទេសហ្វីលីពីនជាប់ច្រកសមុទ្រតៃវ៉ាន់ និងខេត្តជាប់ឆ្នេរសមុទ្រចិនខាងត្បូង ដែលជាតំបន់ជម្លោះរវាងហ្វីលីពីន និងចិន ប្រឈមមុខគ្នាជាច្រើនលើក ។ តាមការអះអាងរបស់អ្នកនាំពាក្យការធ្វើសមយុទ្ធអាមេរិក វាជាឱកាសបង្ហាញពីសម្ព័ន្ធមិត្តដ៏រឹងមាំ ព្រមទាំងជាការប្តេជ្ញាចិត្តរបស់អាមេរិកចំពោះតំបន់អាស៊ីប៉ាស៊ីហ្វិកឱ្យមានលក្ខណៈសេរី និងបើកចំហ ៕

មីយ៉ាន់ម៉ាបានបិទព្រំដែនជាមួយថៃជាឯកតោភាគីអស់រយៈពេលជាច្រើនខែ បើទោះជាថៃព្យាយាមចរចាជាច្រើនលើកសុំឱ្យមីយ៉ាន់ម៉ាបើកព្រំដែនឡើងវិញ ដើម្បីជួយស្តារសេដ្ឋកិច្ចថៃកុំឱ្យដាំក្បាលចុះ ប៉ុន្តែមីយ៉ាន់ម៉ានៅតែមិនយល់ព្រម ។ រដ្ឋមន្ត្រីក្រសួងការបរទេសថៃ លោក Sihasak Phuangketkeow និងក្រុមហ៊ុនឯកជនថៃ បានធ្វើដំណើរទៅចរចាជាមួយលោក Min Aung Hlaing ប្រធានាធិបតីមីយ៉ាន់ម៉ា ចាប់ពីថ្ងៃទី២១ ដល់ថ្ងៃទី២២ ខែមេសា ឆ្នាំ២០២៦ សុំឱ្យមីយ៉ាន់ម៉ាបើកព្រំដែនឡើងវិញជួយស្តារសេដ្ឋកិច្ចថៃ ប៉ុន្តែមិនទាន់ទទួលការឆ្លើយតបពីមីយ៉ាន់ម៉ា ។

នៅថ្ងៃទី២២ ខែមេសា រដ្ឋមន្ត្រីក្រសួងការបរទេសថៃ លោក Sihasak បានផ្តល់សម្ភាសន៍ពីទីក្រុងណៃពិដា ប្រទេសមីយ៉ាន់ម៉ា ថា លោកបានចរចាម្តងទៀតសុំឱ្យរដ្ឋាភិបាលមីយ៉ាន់ម៉ាបើកព្រំដែនធ្វើពាណិជ្ជកម្មជាមួយថៃឡើងវិញ និងបញ្ឈប់ការប្រយុទ្ធគ្នានៅមីយ៉ាន់ម៉ា ។ ការធ្វើដំណើរទៅប្រទេសមីយ៉ាន់ម៉ាលើកនេះ គឺមានគោលបំណង៣ចំណុច រួមមាន ៖ ១-បង្ហាញក្តីរីករាយដែលមីយ៉ាន់ម៉ាបង្កើតរដ្ឋាភិបាលថ្មី ២-លោក Min Aung Hlaing ត្រូវបានជ្រើសតាំងជាប្រធានាធិបតីមីយ៉ាន់ម៉ា និង៣-ការផ្លាស់ប្តូរដ៏សំខាន់ឈានទៅរកសន្តិភាព និងការផ្សះផ្សាជាតិ ។

រដ្ឋមន្ត្រីក្រសួងការបរទេសថៃបានសុំឱ្យមីយ៉ាន់ម៉ាជួយសហការសន្តិសុខព្រំដែន, ប្រយុទ្ធប្រឆាំងឧក្រិដ្ឋកម្មឆ្លងដែន និងបង្ក្រាបការជួញដូរគ្រឿងញៀនរវាងប្រទេសទាំងពីរ ព្រមទាំងឱ្យមីយ៉ាន់ម៉ាជួយថៃកាត់បន្ថយការបំពុលលើអាកាស និងទឹក ។ គោលបំណងសំខាន់បំផុតក្នុងការធ្វើដំណើរទៅមីយ៉ាន់ម៉ាលើកនេះ គឺចរចាឱ្យមីយ៉ាន់ម៉ាបើកព្រំដែនជាមួយថៃឡើងវិញដើម្បីធ្វើពាណិជ្ជកម្ម ពីព្រោះសំខាន់ណាស់សម្រាប់ជួយស្តារសេដ្ចកិច្ចថៃកុំឱ្យធ្លាក់ចុះ ខណៈកន្លងមក ពាណិជ្ជកម្មនៅព្រំដែនស្មើរហូតដល់៨០% នៃពាណិជ្ជកម្មសរុបរវាងប្រទេសទាំងពីរ ។

លោក Sihasak បន្តថា ថៃចង់បំពេញតួនាទីក្នុងនាមជាប្រទេសសមាជិកអាស៊ានដើម្បីសន្តិភាព និងការផ្សះផ្សានៅមីយ៉ាន់ម៉ា ហើយថៃរីករាយដែលរដ្ឋាភិបាលថ្មីមីយ៉ាន់ម៉ាប្រកាសលើកលែងទោសអ្នកនយោបាយ ជាពិសេស ការលើកលែងទោសអតីតប្រធានាធិបតីមីយ៉ាន់ម៉ា ។ លោកក៏បានពិភាក្សាពីការកាត់បន្ថយភាពតានតឹងនៅព្រំដែនមីយ៉ាន់ម៉ា-ថៃ ដោយគាំទ្រឱ្យអាស៊ាន និងអង្គការអន្តរជាតិជួយដល់ពលរដ្ឋមីយ៉ាន់ម៉ា ។

លើសពីនេះ លោកសុំឱ្យមីយ៉ាន់ម៉ាកាត់បន្ថយ ឬបញ្ឈប់ការប្រយុទ្ធគ្នានៅព្រំដែន ពីព្រោះបណ្តាលឱ្យគ្រាប់បែកធ្លាក់ចូលទឹកដីថៃជាបន្តបន្ទាប់ ។ កន្លងមក មន្ត្រីកងទ័ពជាន់ខ្ពស់ថៃបានធ្វើដំណើរទៅប្រទេសមីយ៉ាន់ម៉ាដើម្បីចូលរួមប្រជុំជាមួយកងទ័ពមីយ៉ាន់ម៉ាពិភាក្សាពីរឿងសន្តិសុខព្រំដែន ហើយថ្ងៃខាងមុខ ថៃនឹងធ្វើឱ្យជាម្ចាស់ផ្ទះរៀបចំកិច្ចប្រជុំកងទ័ពប្រទេសទាំងពីរជជែកពីបញ្ហានេះ ។

ក្រៅពីសុំឱ្យមីយ៉ាន់ម៉ាបើកព្រំដែនឡើងវិញ លោកក៏បានសុំឱ្យមីយ៉ាន់ម៉ាជួយកាត់បន្ថយធូលីកខ្វក់ PM 2.5 នៅប្រទេសថៃផងដែរ ដោយលោកថា មីយ៉ាន់ម៉ា និងឡាវ គួរតែជួយសហការកាត់បន្ថយធូលីកខ្វក់នៅប្រទេសថៃ ពីព្រោះជាបញ្ហាត្រូវដោះស្រាយបន្ទាន់ ។

គួរបញ្ជាក់ថា លោក Sihasak និងក្រុមហ៊ុនឯកជនថៃបានធ្វើដំណើរទៅប្រទេសមីយ៉ាន់ម៉ា ដើម្បីចរចាជាមួយលោក Min Aung Hlaing ប្រធានាធិបតីមីយ៉ាន់ម៉ា ចាប់ពីថ្ងៃទី២១ ដល់ថ្ងៃទី២២ ខែមេសា សុំឱ្យបើកព្រំដែនដើម្បីបង្កើនឱកាសពាណិជ្ជកម្ម ការវិនិយោគ បន្ទាប់ពីមីយ៉ាន់ម៉ាបិទព្រំដែនជាឯកតោភាគីបណ្តាលឱ្យរាំងស្ទះដល់ការនាំចេញទំនិញថៃ ប៉ុន្តែរដ្ឋាភិបាលមីយ៉ាន់ម៉ាមិនទាន់ឆ្លើយតបរឿងបើកព្រំដែននៅឡើយទេ ៕

ស្របពេលបច្ចេកវិទ្យាកាន់តែរីកចម្រើនទៅមុខ ក្រសួងការពារជាតិកូរ៉េខាងត្បូងបានប្រកាសថា នៅក្នុងពេលអនាគតដ៏ខ្លីពួកគេនឹងរៀបចំសម្រាប់ការផ្លាស់ប្តូរយោធាដ៏សំខាន់មួយ ដោយគ្រោងកាត់បន្ថយកងទ័ពជួរមុខរហូតដល់ ៧៥% និងជំនួសមុខតំណែងជាច្រើនវិញដោយប្រព័ន្ធឃ្លាំមើលដែលដំណើរការដោយ AI។ តើ AI ជាអាចជំនួសទាហានមនុស្សពិតបានដែរឬទេ?

យោងតាមការចុះផ្សាយរបស់សារព័ត៌មាន Korea JoongAng Daily កាលពីថ្ងៃចន្ទនេះបានឲ្យដឹងថា កងទ័ពជួរមុខរបស់កូរ៉េខាងត្បូងនៅតាមបណ្ដោយព្រំដែនអាចនឹងត្រូវកាត់បន្ថយជិត ៧៥% ក្នុងរយៈពេលមួយឬពីរទសវត្សរ៍ខាងមុខ ដែលជាចលនាមួយមិនអាចជៀសរួចមួយ បន្ទាប់ពីរដ្ឋាភិបាលបានពិចារណាលើចំនួនបុគ្គលិកយោធាថាកំពុងមានការធ្លាក់ចុះ។

រដ្ឋមន្ត្រីក្រសួងការពារជាតិ លោក Ahn Gyu-back និយាយថា បច្ចុប្បន្នក្រសួងការពារជាតិ មានគម្រោងកាត់បន្ថយចំនួនកងទ័ពដែលឈរជើងនៅតាមប៉ុស្តិ៍យោធាទូទៅនៅជិតតំបន់ដែលមានកំពែងរឹងមាំពីចំនួន ២២.០០០ នាក់បច្ចុប្បន្នមកត្រឹម ៦.០០០ នាក់នៅឆ្នាំ ២០៤០ ដោយជំនួសពួកគេវិញដោយប្រព័ន្ធ AI។ តាមរបាយការណ៍នេះ ក្រសួងកំពុងសិក្សាអំពីរចនាសម្ព័ន្ធកម្លាំងនាពេលអនាគត ដែលនឹងពឹងផ្អែកយ៉ាងខ្លាំងទៅលើឧបករណ៍ចាប់សញ្ញាឆ្លាតវៃ យន្តហោះគ្មានមនុស្សបើក កាមេរ៉ាស្វ័យប្រវត្តិ មនុស្សយន្តយាមកាម និង AI ចាប់សញ្ញាការគំរាមកំហែង តាមបណ្តោយព្រំដែនដែលមានកំពែងរឹងមាំជាមួយកូរ៉េខាងជើង។

ទោះជាយ៉ាងណាក៏ដោយ ការប្រកាសនេះបានបង្កឱ្យមានការរិះគន់ពីសមាជិកសភានៃគណបក្សអំណាចប្រជាជន (PPP) ដែលជាគណបក្សប្រឆាំងដ៏សំខាន់ ដែលអះអាងថាផែនការនេះនឹងមិនត្រឹមតែធ្វើឱ្យសមត្ថភាពយោធារបស់កូរ៉េខាងត្បូងចុះខ្សោយប៉ុណ្ណោះទេ ថែមទាំងបង្កើនការព្រួយបារម្ភរបស់សាធារណជនផងដែរ។

គួរជម្រាបថា ផែនការរយៈពេលវែងរបស់ក្រសួងការពារជាតិកូរ៉េខាងត្បូងដូចខាងលើនេះ បានកើតឡើងនៅពេលដែលកូរ៉េខាងជើងបន្តសាកល្បងមីស៊ីល និងបង្កើនសមត្ថភាពយោធារបស់ខ្លួន ហើយកូរ៉េខាងត្បូងប្រឈមមុខនឹងកង្វះខាតបុគ្គលិកយោធាសម្រាប់សមាជិកបំពេញកាតព្វកិច្ចសកម្មដោយសារតែអត្រាកំណើតទាបជាប់លាប់របស់ប្រទេស។

គិតត្រឹមឆ្នាំមុន យោធាសកម្មរបស់កូរ៉េខាងត្បូងមានប្រហែល 450,000 នាក់ តិចជាងចំនួនអប្បបរមា ដែលត្រូវការចាំបាច់សម្រាប់ការចល័តទ័ពក្នុងសម័យសង្គ្រាមចំនួន 500,000 នាក់ ។ កត្តានេះបង្ករឡើងដោយសារ តែបុរសដែលមានអាយុអាចចូលបម្រើកងទ័ពមានចំនួនកាន់តែតិចទៅៗពីមួយឆ្នាំទៅមួយឆ្នាំ ដែលធ្វើឱ្យវាពិបាកក្នុងការរក្សាចំនួនកងទ័ព។

បើទោះបីជាមានអ្នករិះគន់ថា បច្ចេកវិទ្យាមិនអាចជំនួសកម្លាំងមនុស្សពិតបានពេញលេញក៏ពិតមែន ប៉ុន្តែរដ្ឋាភិបាលកូរ៉េខាងត្បូង នៅតែជឿជាក់ថា ឆ្មាំព្រំដែននាពេលអនាគតអាចមានសណ្ឋានជាម៉ាស៊ីនច្រើនជាងមនុស្ស៕

នាយករដ្ឋមន្ត្រីថៃ លោក Anutin Charnvirakul នៅថ្ងៃទី២២ ខែមេសា ឆ្នាំ២០២៦នេះ ប្រាប់ថា ពិតជាបារម្ភពីស្ថានការណ៍អសន្តិសុខកាន់តែខ្លាំងនៅព្រំដែនជាប់មីយ៉ាន់ម៉ា បន្ទាប់ពីកងទ័ពអាកាសមីយ៉ាន់ម៉ាទម្លាក់គ្រាប់បែ.កលើមន្ទីរពេទ្យរបស់កងទ័ពសម្ព័ន្ធជាតិការ៉ែន (KNU) បណ្តាលឱ្យគ្រាប់បែ.ក១គ្រាប់ធ្លាក់ចូលទឹកដីខេត្តមេហុងស៊នរបស់ថៃ ហើយលោកបានត្រឹមតែដាស់តឿនទៅកាន់មីយ៉ាន់ម៉ាកុំឱ្យធ្វើបែបនេះ ពីព្រោះថៃរងផលប៉ះពាល់ ។

នាវេលាម៉ោងជាង១០ព្រឹកថ្ងៃទី២២ ខែមេសា នៅក្រសួងមហាផ្ទៃ លោកនាយករដ្ឋមន្ត្រី Anutin និយាយថា លោកបានរៀបចំកិច្ចប្រជុំណែនាំឱ្យមន្ត្រីជាន់ខ្ពស់ក្រសួងមហាផ្ទៃរឹតបន្តឹងនៅតំបន់ព្រំដែនមីយ៉ាន់ម៉ា-ថៃ ជាពិសេស តាមដានស្ថានការណ៍ប៉ះទង្គិចគ្នានៅមីយ៉ាន់ម៉ាយ៉ាងដិតដល់ ។ ក្រៅពីនេះ លោកក៏បញ្ជាឱ្យចាត់វិធានការជាច្រើនទៀតដើម្បីគ្រប់គ្រងតំបន់ព្រំដែន ដោយសារបារម្ភពីបញ្ហាកើតឡើងជាច្រើន ។

នាយករដ្ឋមន្ត្រីថៃបានកំណត់វិធានការផ្សេងៗសម្រាប់អនុវត្តនៅព្រំដែនជាប់មីយ៉ាន់ម៉ា ទាំងវិធានការការទូត និងផ្តល់សុវត្ថិភាពដល់ពលរដ្ឋថៃ ខណៈខាងមីយ៉ាន់ម៉ាបញ្ជាក់ថា គឺជាការប្រយុទ្ធគ្នាក្នុងប្រទេសរបស់ខ្លួន គ្មានចេតនាទម្លាក់គ្រាប់បែកចូលទឹកដីថៃទេ ។ ទោះយ៉ាងណា ថៃមិនព្រមឱ្យមានហេតុការណ៍បែបនេះកើតឡើងទៀត ប្រសិនបើប្រយុទ្ធគ្នា ត្រូវតែប្រយ័ត្នក្នុងទឹកដីមីយ៉ាន់ម៉ា ដើម្បីកុំឱ្យថៃរងផលប៉ះពាល់ ។

ក្រៅពីនេះ ប្រទេសថៃមានបញ្ហាអសន្តិសុខនៅព្រំដែនភាគខាងត្បូងជាប់ប្រទេសម៉ាឡេស៊ីផងដែរ ដោយសារក្រុមផ្តាច់ទឹកដីបានធ្វើសកម្មភាពមិនឈប់ឈរបណ្តាលឱ្យកងទ័ពថៃរងរបួស និងស្លាប់ជាបន្តបន្ទាប់ ។ លោក Anutin មានគម្រោងបង្កើតគណៈកម្មការសន្តិភាពនៅបណ្តាខេត្តភាគខាងត្បូងដើម្បីដោះស្រាយបញ្ហាក្រុមផ្តាច់ទឹកដី ប៉ុន្តែត្រូវរង់ចាំការបង្កើតតាមដំណាក់កាល រួមទាំងប្រជុំជាមុន ។

គួរបញ្ជាក់ថា កាលពីថ្ងៃទី២០ ខែមេសា កងទ័ពអាកាសមីយ៉ាន់ម៉ាបានប្រើប្រាស់យន្តហោះចម្បាំង Yak-130 និង Mig-29 ទម្លាក់គ្រាប់បែកចំនួន៩គ្រាប់លើមន្ទីរពេទ្យកងទ័ពសម្ព័ន្ធជាតិការ៉ែន (KNU) និងផ្ទះសម្បែងក្រុមការ៉ែននៅស្រុកប៊ឺសុ ខេត្តផាពូន រដ្ឋការ៉ែន ដែលឆ្ងាយពីព្រំដែនថៃប្រមាណ៥០០ម៉ែត្រ ស្ថិតនៅទល់មុខស្រុកសបមេ ខេត្តមេហុងស៊ន ។ គ្រាប់បែក១គ្រាប់ធ្លាក់ចូលដីថៃបណ្តាលឱ្យពលរដ្ឋថៃរត់គេចខ្លួនបន្ទាប់មក ក្រុមទាហានឈុតខ្មៅថៃប្រចាំការនៅព្រំដែនបានជម្លៀសពលរដ្ឋភ្លាមៗ ។

ក្រោយកើតហេតុការណ៍អសន្តិសុខកាន់តែខ្លាំងនៅព្រំដែនជាប់មីយ៉ាន់ម៉ា ហើយទីតាំងជម្លោះរាលដាលកាន់តែច្រើនតំបន់ រដ្ឋលេខាធិការក្រសួងមហាផ្ទៃថៃបានកំណត់វិធានការឱ្យអភិបាលខេត្តចំនួន៤ជាប់ព្រំដែនមីយ៉ាន់ម៉ា រួមមាន ៖ ខេត្តតាក មេហុងស៊ន ឈៀងម៉ៃ និងឈៀងរ៉ៃ ត្រូវតាមដានស្ថានការណ៍ប្រយុទ្ធគ្នានៅមីយ៉ាន់ម៉ាយ៉ាងដិតដល់ដើម្បីផ្តល់សុវត្ថិភាពដល់ពលរដ្ឋថៃ ។

រហូតមកដល់ពេលនេះ រដ្ឋាភិបាលថៃមិនទាន់ហ៊ានថ្កោលទោសការវាយប្រហាររបស់កងទ័ពអាកាសមីយ៉ាន់ម៉ាទេ ទោះជាមានគ្រាប់បែកធ្លាក់ចូលដីថៃជាបន្តបន្ទាប់ក្តី ខណៈក្រុមទាហានឈុតខ្មៅថៃបានត្រឹមតែជម្លៀសពលរដ្ឋចេញ ។ ហេតុការណ៍វាយប្រហារតាមផ្លូវអាកាសនៅមីយ៉ាន់ម៉ាមិនមែនទើបតែកើតឡើងទេ វាបានកើតឡើងជាច្រើនឆ្នាំហើយ ដែលរដ្ឋាភិបាលថៃមិនអាចដោះស្រាយ ៕