ប្រទេសអូស្ត្រាលី ៖ តុលាការនៅទីក្រុង Melbourne ប្រទេសអូស្ត្រាលី បានកាត់ក្តីឱ្យក្រុមហ៊ុនច្បាប់មួយឈ្មោះ Erudite Legal បង់ប្រាក់ពិន័យក្រោយពីនារីម្នាក់ជាអតីតបុគ្គលិកបានប្តឹងក្រុមហ៊ុននេះ ដោយសារបង្ខំឱ្យនាងធ្វើការរយៈពេល២៤ម៉ោង ធ្វើឱ្យសុខភាពទ្រុឌទ្រោម គ្មានពេលវេលាថែទាំគ្រួសារ ថែមទាំងបង្ខំឱ្យនាងធ្វើអ្វីប្លែកៗ ដូចជា ៖ ទៅមើលកុនពេលយប់ ។ តុលាការចាត់ទុកថា នេះជាការល្មើសច្បាប់ការងារ និងបង្កើតបរិយាកាសការងារគួរឱ្យស្អ.ប់ខ្ពើ.ម ។

ដើមបណ្តឹងជាមេធាវីស្រី និងជាអតីតបុគ្គលិកក្រុមហ៊ុន Erudite Legal បាននិយាយទៅកាន់តុលាការថា នាងទទួលបានប្រាក់ខែពីក្រុមហ៊ុននេះទាបជាងស្តង់ដារ គឺត្រឹមតែ៨,០០០ដុល្លារប៉ុណ្ណោះក្នុងរយៈពេល៣សប្តាហ៍ ប៉ុន្តែនាងត្រូវធ្វើការចាប់ពី១២ម៉ោង ទៅ១៨ម៉ោងក្នុង១ថ្ងៃ ។ ដើមបណ្តឹងដែលពុំប្រាប់ឈ្មោះអះអាងថា នាងត្រូវធ្វើការរហូតដល់២៤ម៉ោងក្នុងសប្តាហ៍ទី១ គឺចាប់ពីថ្ងៃត្រង់ថ្ងៃដំបូង រហូតដល់ថ្ងៃត្រង់នាថ្ងៃបន្ទាប់ ទើបបានសម្រាក ។

លោក Shivesh Kuksal ជានាយកក្រុមហ៊ុនប្រាប់នាងឱ្យសម្រាកតែ២-៣ម៉ោងប៉ុណ្ណោះ ហើយឱ្យនាងធ្វើការបន្ត ។ ចាប់ពីពេលនោះមក នាងត្រូវធ្វើការបន្តរហូតជិតម៉ោង១យប់ ។ ព្រឹកឡើង នាយកក្រុមហ៊ុនប្រាប់ឱ្យនាងធ្វើការក្នុងបន្ទប់សណ្ឋាគារ ហើយឱ្យនាងកលើគ្រែតែមួយជាមួយនាយក ។ បន្ទាប់ពីនាងធ្វើការបាន១៤ម៉ោង និងបញ្ចប់ការងារនៅម៉ោង១ភ្លឺ នាយកក្រុមហ៊ុនប្រាប់ឱ្យនាងទៅមើលកុនបន្តទៀត ។ ការធ្វើការច្រើនម៉ោង មិនត្រឹមតែធ្វើឱ្យនាងមានសុខភាពទ្រុឌទ្រោមប៉ុណ្ណោះទេ ប៉ុន្តែធ្វើឱ្យនាងគ្មានពេលវេលាថែទាំម្តាយដែលទើបចេញពីមន្ទីរពេទ្យ ។

លើសពីនេះ ពេលនាងសុំច្បាប់សម្រាកដើម្បីទៅចូលរួមពិធីបុណ្យសពអតីតស្វាមី នាងត្រូវក្រុមហ៊ុនបង្ខំឱ្យធ្វើការ ។ នាងគ្មានពេលវេលានៅជាមួយគ្រួសារ និងដាច់ការទំនាក់ទំនង ។ បើតាមការលើកឡើងរបស់តុលាការ គឺក្រុមហ៊ុននេះធ្វើឱ្យបរិយាកាសការងាររបស់បុគ្គលិកគួរឱ្យស្អប់ខ្ពើម និងរំលោភកិច្ចសន្យាការងារដោយអយុត្តិធម៌ ។

ចំណែកក្រុមហ៊ុន Erudite Legal ពុំបានអនុវត្តតាមដីការបស់តុលាការ ដែលតម្រូវឱ្យក្រុមហ៊ុនសងប្រាក់បុគ្គលិក ដោយសារក្រុមហ៊ុនផ្តល់ប្រាក់ខែឱ្យបុគ្គលិកតិចជាងស្តង់ដារ ។ ក្រុមហ៊ុនបានកាត់ផ្តាច់លេខទូរស័ព្ទ ទើបធ្វើឱ្យអ្នកសារព័ត៌មានពុំអាចសាកសួរពាក់ព័ន្ធនឹងករណីនេះ ។ តុលាការបានកាត់ក្តីឱ្យក្រុមហ៊ុនបង់ប្រាក់ន័យទៅដើមបណ្តឹង ចំនួន២២,២០០ដុល្លារ ព្រោះក្រុមហ៊ុនពុំបានបើកប្រាក់ខែទៀងទាត់ និងបង់ប្រាក់ចំនួន២៦,៦៤០ដុល្លារទៀតទៅយដើមបណ្តឹង គឺជាសំណងដែលឱ្យដើមបណ្តឹងធ្វើការច្រើនម៉ោង ។

កាលពីខែវិច្ឆិកា ឆ្នាំ២០២៤ តុលាការក៏ធ្លាប់កាត់ក្តីនាយកក្រុមហ៊ុន លោក Kuksal ពាក់ព័ន្ធនឹងរឿងក្តីមួយទៀត ដោយតុលាការចោទប្រកាន់ថា លោកពុំអាចធ្វើការផ្នែកច្បាប់ ហើយហាមលោកផ្ញើអ៊ីម៉ែល ឬសារក្នុងនាមក្រុមហ៊ុន Erudite Legal ឬហាមធ្វើជាអ្នកតំណាងក្រុមហ៊ុន ។ ការហាមឃាត់នេះ ដោយសារកាលពីឆ្នាំ២០២៣ លោកបានរឹបអូសគ្រឿងសង្ហារិមរបស់អតិថិជន និងផ្ញើលិខិតគំរាមអតិថិជន ដោយប្រើឈ្មោះក្រុមហ៊ុន ៕

ប្រទេសថៃ ៖ កាលពីថ្ងៃទី៨ ខែឧសភា ឆ្នាំ២០២៥ សារព័ត៌មាន Thairath រាយការណ៍ថា នៅទីក្រុងបាងកក មានអ្នកជំងឺកូវីដ-១៩ ចំនួន២,៩៦៧នាក់ ត្រឹមតែ១សប្តាហ៍ ប៉ុន្តែបើសរុបទូទាំងប្រទេសថៃ គឺមានអ្នកជំងឺកូវីដ រហូតដល់ជាង៨,០០០នាក់ ត្រឹម១សប្តាហ៍ ហើយអ្នកជំងឺកូវីដភាគច្រើន គឺជាវ័យធ្វើការ និងមនុស្សចាស់ រីឯកុមារតូចៗក៏ប្រឈមនឹងការឆ្លងជំងឺនេះដែរ ដោយសារសាលារៀនជិតបើកបវសនកាល ។ គ្រូពេទ្យបានផ្តាំផ្ញើទៅកាន់ពលរដ្ឋឱ្យពាក់ម៉ាស់ លាងដៃដោយសាប៊ូ ប្រើប្រាស់អាល់កុលពេលទៅទីប្រជុំជន និងមកព្យាបាលនៅមណ្ឌលសុខភាពសាធារណៈ ។

លោក ស៊ុនថន ស៊ុនថារៈឆាត វេជ្ជបណ្ឌិតនៅទីក្រុងបាងកក បាននិយាយពីស្ថានការណ៍ជំងឺកូវីដ នៅទីក្រុងបាងកក ដោយយោងតាមទិន្នន័យរបស់នាយកដ្ឋានសុខាភិបាលបង្ហាញថា ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា ឆ្នាំ២០២៥ គឺមានអ្នកជំងឺកូវីដ ចំនួន២,៩៦៧នាក់ ក្នុងនោះជនជាតិថៃ ២,៣៨១នាក់ និងជនបរទេស ៥៨៦នាក់ ពុំមានអ្នកស្លាប់ ។ ប៉ុន្តែបើគិតចាប់ពីថ្ងៃទី១ ខែមករា គឺមានអ្នកជំងឺកូវីដសរុបស្មើ១៥,០៥៥នាក់ ក្នុងនោះជនជាតិថៃ ១១,៧០០នាក់ និងជនបរទេស ៣,៣៥៥នាក់ ហើយរយៈពេលនេះមានអ្នកជំងឺស្លាប់ម្នាក់ ។

តាមការតាមដានស្ថានការណ៍ឃើញថា ជំងឺកូវីដបានឆ្លងរាតត្បាតចាប់ពីខែមេសា ឆ្នាំ២០២៥ ជាពិសេស វាឆ្លងរាតត្បាតខ្លាំងចាប់ពីក្រោយចូលឆ្នាំ ដល់ខែឧសភា ដោយសារមានការប្រមូលផ្តុំមនុស្សជាច្រើនជាបន្តបន្ទាប់ និងអាកាសធាតុប្រែប្រួលពីក្តៅទៅភ្លៀងធ្លាក់ ទើបធ្វើឱ្យជំងឺកូវីដងាយឆ្លងជាងជំងឺផ្តាសាយធំ ។

បើប្រៀបធៀបចំនួនអ្នកជំងឺកូវីដ ក្នុងពេលវេលាដូចគ្នាជាមួយឆ្នាំ២០២៤ និងឆ្នាំ២០២៣ គឺពុំគួរឱ្យបារម្ភទេ ដោយសារចំនួនអ្នកជំងឺកូវីដឆ្នាំ២០២៥ តិចជាងឆ្នាំមុនៗ ។ ចំណែកនៅទីក្រុងបាងកក គ្រូពេទ្យបានជូនដំណឹងពីវិធីការពារ និងគ្រប់គ្រងជំងឺកូវីដយ៉ាងតឹងរ៉ឹង ដោយពាក់ម៉ាស់ជានិច្ចពេលទៅទីប្រជុំជន ឬទៅកន្លែងមនុស្សច្រើន ព្រមទាំងចៀសវាងទៅកន្លែងប្រឈមការឆ្លង ។ បើនៅជិតអ្នកជំងឺកូវីដ គួរពាក់ម៉ាស់ លាងដៃដោយសាប៊ូនិងទឹកជានិច្ច ឬប្រើប្រាស់អាល់កុល ។

ចំណែកក្រុមងាយឆ្លងជំងឺកូវីដ រួមមាន ៖ មនុស្សចាស់ និងកុមារតូចៗ គឺអ្នកថែទាំ ឬអាណាព្យាបាលគួរប្រុងប្រយ័ត្ន និងថែទាំពួកគេឱ្យបានដិតដល់ ជាពិសេស ពេលសាលារៀនជិតបើកបវសនកាល ដើម្បីការពារការឆ្លងរាតត្បាតជំងឺកូវីដ ។ បើឆ្លងជំងឺកូវីដ ពលរដ្ឋអាចទៅព្យាបាលនៅមណ្ឌលសុខភាពសាធារណៈនៅទីក្រុងបាងកក ចំនួន៦៩កន្លែង ឬសាកសួរព័ត៌មានបន្ថែមមកកាន់នាយកដ្ឋានសុខាភិបាល ។

ដោយឡែក លោកវេជ្ជបណ្ឌិត ធីរៈ វរៈថណារ៉ាត់ សាស្ត្រាចារ្យមហាវិទ្យាល័យវេជ្ជសាស្ត្រនៅសាកលវិទ្យាល័យជូឡាឡុងកន បានសរសេរក្នុងហ្វេសប៊ុកឈ្មោះ «Thira Woratanarat» ថា រយៈពេល៤ថ្ងៃចុងក្រោយនេះ អ្នកជំងឺកូវីដមកព្យាបាលនៅមន្ទីរពេទ្យ មានចំនួនច្រើនជាងអ្នកជំងឺផ្តាសាយធំ រហូតដល់ជាង៦ដង ហើយអ្នកជំងឺស្រីច្រើនជាងប្រុស ២ដង ភាគច្រើនជាវ័យធ្វើការ ។ អ្វីគួរឱ្យបារម្ភ គឺកុមារតូចៗអាយុក្រោម៤ឆ្នាំនៅទីក្រុងបាងកក កើតជំងឺកូវីដច្រើន ។

លោកបានបង្ហាញចំនួនអ្នកជំងឺកូវីដនៅទូទាំងប្រទេសថៃ ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា ឆ្នាំ២០២៥ មានអ្នកជំងឺកូវីដសរុបទូទាំងប្រទស ចំនួន៨,៤៤៦នាក់ បានមកសម្រាកព្យាបាលនៅមន្ទីរពេទ្យ (ចំនួននេះពុំរួមបញ្ចូលអ្នកជំងឺកូវីដព្យាបាលនៅផ្ទះទេ) ។ វាធ្វើឱ្យអាណាព្យាបាលសិស្សបារម្ភពីការឆ្លងជំងឺកូវីដពេលសាលារៀនបើកបវសនការ ដោយសារជារដូវវស្សា ជំងឺនេះងាយឆ្លង ហើយវាមានរោគសញ្ញាស្រដៀងជំងឺផ្តាសាយធំ ៕

សហរដ្ឋអាមេរិក ៖ អតីតមន្ត្រីជាន់ខ្ពស់របស់អាមេរិកម្នាក់បានបង្ហើបថា អាមេរិកបានសាងសង់ទីក្រុងក្រោមដីមួយដែលមានតម្លៃ ២១ ទ្រីលានដុល្លារ ទុកជាទីតាំងសុវត្ថិភាពសម្រាប់បុគ្គលមានអំណាច និងមហាសេដ្ឋីប្រើប្រាស់ក្នុងពេលដែលពិភពលោកខាងលើស្ថិតក្នុងស្ថានភាពគ្រោះថ្នា..ក់។

លោកស្រី Catherine Austin Fitts ជាអតីតអគ្គលេខាធិការរងនៃក្រសួងការងារ និងអភិវឌ្ឍន៍ទីក្រុង (HUD) កាលពីអាណត្តិប្រធានាធិបតីចាស់ លោក Goerge H.W. Bush បានអះអាងនៅក្នុងបទសម្ភាសន៍មួយកាលពីល្ងាចថ្ងៃពុធថា ៖ រដ្ឋាភិបាលអាមេរិកបានចំណាយប្រាក់ ២១ ទ្រីលានដុល្លា (២១,០០០,០០០,០០០,០០០) ដោយសម្ងាត់ ដើម្បីសាងសង់ទីក្រុងមួយយ៉ាងធំនៅក្រោមដីសម្រាប់ក្រុមអ្នកមានឥទ្ធិពល មានអំណាច មានទ្រព្យសម្បត្តិ អាចចូលទៅស្នាក់នៅ និងលាក់ខ្លួនឲ្យមានសុវត្ថិភាព ក្នុងករណីមានបញ្ហាវិនាសកម្មកកើតឡើង។

លោកស្រី Fitts បានបញ្ជាក់ថា ចាប់តាំងពីឆ្នាំ ១៩៩៨ មករូងក្រោមដីប្រមាណ១៧០ទីតាំង ត្រូវបានសាងសង់ឡើងនៅទូទាំងសហរដ្ឋអាមេរិក រួមទាំងនៅខាងក្រោមឆ្នេរសមុទ្រមួយចំនួនផងដែរ។ គាត់បានបន្ថែមថា បណ្ដាញហេដ្ឋារចនាសម្ព័ន្ធទាំងអស់នោះត្រូវបានសាងសង់ដោយបច្ចេកវិទ្យាទំនើបម្យ៉ាងដែលគេមិនបង្ហាញជាសាធារណៈ។

ទោះជាយ៉ាងណា មិនមានភស្តុតាងគ្រប់គ្រាន់ក្នុងការបញ្ចាក់ពីការលើកឡើងរបស់លោកស្រី Fitts ចំពោះទីក្រុងក្រោមដីនេះឡើយ។ ប៉ុន្តែកន្លងមក គេធ្លាប់បានដឹងច្បាស់អំពីមូលដ្ឋានទ័ពរបស់សហរដ្ឋអាមេរិកថាមានទីតាំងនៅក្រោមដីជាមួយបច្ចេកវិទ្យាទំនើបៗដូចជា មូលដ្ឋាន Cheyenne Mountain Complex និង Greenbrier ជាដើម ដែលមានការបញ្ជាក់ច្បាស់ថាសម្រាប់ប្រើប្រាស់លើការពារប្រទេស។ រីឯទ្រឹស្ដីលើកឡើងថាមានទីក្រុងក្រោមដីតម្លៃ ២១ទ្រីលានដុល្លារនេះ កំពុងក្លាយជាប្រធានបទក្ដៅសម្រាប់អ្នកជំនាញយកទៅវិភាគជាបន្តបន្តាប់។

ដោយឡែក មានគំនិតសន្និដ្ឋានមួយទៀតអំពីទីក្រុងនេះ ថាអាចជាការសម្ងាត់របស់បុគ្គលសំខាន់ៗនៅសហរដ្ឋអាមេរិកដែលអាចគិតទុកមុនថានឹងមានអ្វីកើតឡើងនៅពេលខាងមុខមិនខាន។ បើទោះជាមិនទាន់មានភស្តុតាងបញ្ជាក់ច្បាស់ ប៉ុន្តែមនុស្សជាច្រើនជឿថាយ៉ាងហោចណាស់ក៏វាមានភាគរយដែលអាចទៅរួចផងដែរ៕

ចក្រភពអង់គ្លេស ៖ ជារឿងគួរឲ្យភ្ញាក់ផ្អើល និងមិននឹកស្មានដល់ បន្ទាប់ពីមានអត្ថបទមួយចុះផ្សាយថាថា ៖ សម្ភារៈលម្អខ្លួនរបស់អ្នកនៅពេលបន្តិចទៀត អាចផលិតចេញពីស្បែករបស់ T-Rexពិតៗ។ វាបានបង្ករជាមន្ទិលសង្ស័យ និងមានមតិចោទសួរជាច្រើនថា “វាអាចទៅរួចបានដូចម្ដេច?”

មនុស្សជាច្រើននិយាយថា ៖ ឱកាសនៃការរីកលូតលាស់ស្បែករបស់ T-rex អាចនឹងមិនជោគជ័យទេ នៅពេលដែលអ្នកវិទ្យាសាស្រ្តកំពុងព្យាយាមប្រើប្រាស់ផូស៊ីលរបស់វាមកផ្ស៊ាំនៅជាមួយខូឡូជេនដែលនៅក្នុងស្បែកសត្វស្បែកសត្វ ដើម្បីបង្កើតស្បែករបស់ដាយណូស័។

យោងតាមប្រភពសារព័ត៌មាន NBC News កាលពីថ្ងៃអង្គារ នេះបានឲ្យដឹងថា ក្រុមអ្នកស្រាវជ្រាវផ្នែកវិទ្យាសាស្រ្តបច្ចេកវិទ្យាមកពីសកលវិទ្យាល័យ Newcastle នៃប្រទេសអង់គ្លេស កំពុងសហការគ្នាដើម្បីបង្កើតស្បែកនៅក្នុងមន្ទីពិសោធន៍ (Lab-Grown leather) ដោយប្រើ DNA មកពីឆ្អឹងT-rex ដែលមានអាយុកាលជាង៦៦លានឆ្នាំ។

លោកបណ្ឌិតសាស្រ្តាចារ្យ Che Connon មកពីក្រុមហ៊ុន VML, The Organoid Company និង Lab-Grown Leather Ltd. បានអះអាងថា ៖ ពួកលោកកំពុងប្រើប្ាស់ការសំយោគ DNA (synthetic DNA) ដើម្បីបង្កើតជាសម្ព័ន្ធរូបធាតុមួយមានទម្រង់ជា Collagen ដែលជាសមាសធាតុសំខាន់មួយក្នុងការលូតលាស់របស់ស្បែក។ លោកក៏បានបញ្ជាក់ផងដែរថា ៖ គម្រោងនៃការបង្កើតស្បែកនេះឡើងគឺដើម្បីអាចផ្ដល់ឲ្យនូវវត្ថុធាតុដើមថ្មី និងបញ្ឈប់ការបំពានលើសត្វ (cruelty-free) ក្នុងការយកពួកវាមកសម្លា..ប់ និងយកស្បែកទៅផលិតជាកាបូប។ គេរំពឹងថាស្បែកដែលកំពុងបង្កើតនោះនឹងទទួលបានជោគជ័យ ហើយកាបូបស្បែកដ៏ប្រណីតបែប Luxurious prototype នឹងលេចរូបរាងឡើងឆាប់ៗផងដែរ។

ទោះជាយ៉ាងណា ផែនការ”T-rex leather” ដែលជាគម្រោងការបង្កើតកាបូបចេញពីស្បែកដាយណូស័រនេះ កំពុងស្ថិតនៅក្នុងការតាមដនរបស់អ្នកវិទ្យាសាស្រ្តនៅឡើយ ព្រោះគេមិនអាចយកDNA ដ៏ពេញលេញចេញពីដាយណូស័រនោះទេ ពោល DNA ដែលរកឃើញថ្មីជាងគេសម្រាប់យកមកប្រើប្រាស់ក្នុងការពិសោធនេះគឺមានអាយុប្រហែល២លានឆ្នាំទៅហើយ។ លើសពីនេះ ស្បែកពិតរបស់ T-rex ក៏មិនមិនអាចរកបានផងដែរ ព្រោះអ្វីដែលនៅសេសសល់សម្រាប់អ្នកវិទ្យាសាស្រ្តគឺមានតែគ្រោងឆ្អឹង និងផូស៊ីលរបស់វាតែប៉ុណ្ណោះ។

ប៉ុន្តែអ្វីទាំងអស់នេះ មិនបានធ្វើឲ្យអ្នកវិទ្យាសាស្រ្តអស់សង្ឃឹម និងបោះបង់ការខិតខំប្រឹងប្រែងនេះទេ ដោយពួកគេជឿជាក់យ៉ាងខ្លាំងលើការរីកចម្រើនផ្នែកបច្ចេកវិទ្យា ដែលអាចនឹងនាំឲ្យកើតមាននូវរបកគំហើញថ្មីៗក្នុងការសម្រេចឲ្យបាននូវគម្រោងផលិតកាបូបស្បែកដាយណូស័រនេះ ប្រកបដោយភាពច្នៃប្រឌិតដ៏សម្បូរបែប និងមិនប៉ះពាល់ដល់សត្វ៕