ប្រទេសថៃ ៖ អាណាព្យាបាល និងអាជ្ញាធរថៃកំពុងយកចិត្តទុកដាក់លើការរីករាលដាលនៃគ្រឿងញៀ..នមួយប្រភេទ ដែលមានទម្រង់ដូចជាស្ករគ្រាប់រូបរាងតុក្កតា កំពុងត្រូវបានចែកចាយយ៉ាងសេរី និងទាក់ទាញកុមារជាច្រើនបានយ៉ាងងាយស្រួល។ នេះបើយោងតាមប្រភពសារព័ត៌មានថៃ The Bangkok Post កាលពីថ្ងៃព្រហស្បត្តិ៍ ទី១៥ ឧសភា។

លោកវេជ្ជបណ្ឌិត Withid Sariddeechaikool អគ្គលេខាធិការរងនៃ FDA បាននិយាយថា ការចែកចាយស្ករគ្រាប់ ដែលមានឈ្មោះថា “Molly” ត្រូវបានគេរឹបអូសនៅខេត្ត Nong Khai កាលពីខែមីនា និងបានរកឃើញថាមានផ្ទុកសារធាតុមេតំហ្វេតាមីន និងអេស្ត្រូស៊ី ដែលជាជាសារធាតុញៀ..នកម្រិតធ្ងន់មួយប្រភេទ។ បើយោងតាមការត្រួតពិនិត្យរបស់រដ្ឋបាលចំណីអាហារ និងឱសថថៃ (FDA) បានឱ្យដឹងថា ឥទ្ធិពលញៀ.នរបស់ស្ករនេះអាចបណ្តាលឱ្យកុមារស្លា..ប់បាន។

លោកវេជ្ជបណ្ឌិត Withid បាននិយាយបន្តថា នៅពេលកុមារស្រូបយកនូវសារធាតុទាំងនេះច្រើន វាអាចប៉ះពាល់យ៉ាងខ្លាំងដល់ប្រព័ន្ធសរសៃប្រសាទ ដែលបណ្តាលឱ្យមានការវង្វេងស្មារតី ចង្វាក់បេះដូងលោតមិនទៀងទាត់ សម្ពាធឈាមឡើងខ្ពស់ និងដាច់សរសៃឈាមខួរក្បាលឈានដល់ការបា.ត់ប.ង់ជី..វិត។

ដោយឡែក សម្រាប់ប្រភេទថ្នាំ Ecstasy ក្នុងទម្រង់ជាតួអង្គតុក្កតា Labubu ដ៏ពេញនិយម ក៏មានការរីករាលដាលយ៉ាងទូលំទូលាយផងដែរ ជាពិសេសក្នុងពិធីបុណ្យ Songkran កាលពីខែមុន។ ហើយកាលពីថ្ងៃពុធ សប្ដាហ៍នេះ ប៉ូលិសបានចាប់ខ្លួនបុរសម្នាក់ក្នុងទីក្រុងបាងកក និងរឹបអូសបានថ្នាំគ្រាប់ល្បឿន 1,840 គ្រាប់ និង 525 គ្រាប់ជាទម្រង់តុក្កតា Doraemon។

បើតាមការស៊ើបសួរបន្ទាប់ពីការចា.ប់ខ្លួនអ្នកចែកចាយថ្នាំប្រភេទកន្លងមកបានឲ្យដឹងថា ៖ ថ្នាំញៀនប្រភេទតុក្កតាដែលគេកំពុងពេញនិយមនេះ ត្រូវបានលក់ក្នុងតម្លៃ 300បាត ឬស្មើជាង 9ដុល្លារក្នុងមួយគ្រាប់ ទៅឲ្យក្មេងៗ និងអ្នកប្រើប្រាស់ទាំងអស់។

ការលេចធ្លា.យព័ត៌មាននេះបានធ្វើឲ្យឪពុកម្ដាយជាច្រើនមានការព្រួយបារម្ភពីសុវត្ថិភាពរបស់កូនៗពួកគេជាខ្លាំង។ រីឯខាងប៉ូលីសថៃកំពុងយកចិត្តទុកដាក់លើការបង្រ្កាបជាបន្តបន្ទាប់ និងព្យាយាមផ្សព្វផ្សាយពីបញ្ហានេះយ៉ាងសកម្មដើម្បីទប់ស្កាត់កុំឲ្យមានកុមាររងគ្រោះជាបន្តទៀត៕

កាលពីថ្ងៃទី១៥ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា ប្រទេសជាច្រើននៅតំបន់អាស៊ីបានប្រឈមនឹងជំងឺកូវីដ-១៩ ឆ្លងរាតត្បាតជាថ្មី ក្នុងនោះជំងឺកូវីដនៅប្រទេសថៃ បានឆ្លងខ្លាំងក្នុងពេលចូលឆ្នាំ ជាពិសេស ទីក្រុងបាងកក ហើយវាក៏បានឆ្លងខ្លាំងនៅប្រទេសជាច្រើនទៀត ដូចជា ៖ វៀតណាម សិង្ហបុរី ចិន ហុងកុង និងតៃវ៉ាន់ ។ គ្រូពេទ្យដាស់តឿនឱ្យថែទាំសុខភាពដោយពាក់ម៉ាស់ការពារ និងកុំប្រមា.ថ ។

ទោះពេលវេលាកន្លងផុតទៅច្រើនឆ្នាំ ប៉ុន្តែជំងឺកូវីដពុំបាត់ទៅណាទេ គឺចាប់ពីខែមេសា ឆ្នាំ២០២៥ ជំងឺនេះបានឆ្លងខ្លាំងជាថ្មីនៅប្រទេសជាច្រើន ប៉ុន្តែមានអាការៈពុំធ្ងន់ធ្ងរ ដែលធ្វើឱ្យគ្រូពេទ្យដាស់តឿនសូមកុំប្រមាថ ជាពិសេស មនុស្សចាស់ និងអ្នកជំងឺប្រចាំកាយ ។ តាមទិន្នន័យចុងក្រោយរបស់នាយកដ្ឋានគ្រប់គ្រងជំងឺថៃ ចាប់ពីថ្ងៃទី១ ខែមករា ដល់ថ្ងៃទី១៤ ខែឧសភា ឆ្នាំ២០២៥ ថៃមានអ្នកជំងឺកូវីដចំនួន៧១,០៦៧នាក់ ស្លាប់១៩នាក់ ក្នុងនោះទីក្រុងបាងកក មានអ្នកជំងឺកូវីដច្រើនជាងគេ ជាពិសេស ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា អ្នកជំងឺកូវីដកើនឡើងដល់១៤,០០០នាក់ ។

រដ្ឋមន្ត្រីក្រសួងសុខាភិបាលថៃ លោក ស៊ុមសាក់ ថេបសុថិន ឱ្យដឹងថា ពុំគួរភ្ញាក់ផ្អើលនឹងជំងឺកូវីដឆ្លងលើកនេះ ពីព្រោះថៃបានចាត់ទុកកូវីដជាជំងឺក្នុងតំបន់ ។ អ្នកជំងឺភាគច្រើនពុំមានអាការៈធ្ងន់ធ្ងរ ហើយការឆ្លងខ្លាំងនេះ ដោយសារផ្លាស់ប្តូររដូវកាល និងការប្រមូលផ្តុំមនុស្សច្រើនពេលចូលឆ្នាំ ហើយលោកបានណែនាំឱ្យពាក់ម៉ាស់ ត្រួតពិនិត្យ ATK បើលទ្ធផលវិជ្ជមាន ត្រូវនៅឱ្យឆ្ងាយពីក្រុមងាយឆ្លង ។ ក្រៅពីជំងឺកូវីដឆ្លងខ្លាំងនៅទីក្រុងបាងកក ខេត្តឈុនបុរី នុនថាក់បុរី និងរ៉ាក់យ៉ង ក៏មានអ្នកជំងឺកូវីដច្រើនដែរ គឺកូវីដ XBB.1.16 ឆ្លងយ៉ាងឆាប់រហ័ស ប៉ុន្តែពុំធ្ងន់ធ្ងរ ដែលតម្រូវឱ្យថៃត្រូវតាមដានដោយប្រុងប្រយ័ត្ន ។

ចំណែកវៀតណាម គ្រូពេទ្យបានដាស់តឿនឱ្យប្រុងប្រយ័ត្នជំងឺកូវីដ ក្រោយពីពលរដ្ឋវៀតណាមរស់នៅ២៧ខេត្ត-ក្រុង បានឆ្លងជំងឺកូវីដចំនួន១៤៨នាក់ តាំងពីដើមឆ្នាំ២០២៥ ។ ទីក្រុងហូជីមិញ មានអ្នកជំងឺកូវីដច្រើនជាងគេ ចំនួន៣៤នាក់ បន្ទាប់មក គឺហៃហ្វង ហាណូយ ង៉ាអាន និងប៉ាក់មិញ ហើយទោះជាគ្មានមនុស្សស្លាប់ ប៉ុន្តែរដ្ឋាភិបាលវៀតណាមណែនាំឱ្យប្រយ័ត្នជំងឺនេះ ជាពិសេស ក្រោយពីឈប់សម្រាកថ្ងៃបុណ្យចាប់ពីថ្ងៃទី៣០ ខែមេសា ដល់ថ្ងៃទី១ ខែឧសភា ដែលមានការធ្វើដំណើរ និងប្រមូលផ្តុំច្រើន ។ ក្រសួងសុខាភិបាលវៀតណាមបានឃ្លាំមើលការឆ្លងជំងឺកូវីដលើក្រុមងាយឆ្លង ដូចជា ៖ ស្ត្រីមានផ្ទៃពោះ មនុស្សចាស់ និងអ្នកជំងឺរ៉ាំរ៉ៃ ព្រមទាំងឱ្យពលរដ្ឋពាក់ម៉ាស់នៅទីសាធារណៈ ចៀសវាងទៅកន្លែងមនុស្សច្រើន លាងដៃញឹកញាប់ និងប្រញាប់ទៅមន្ទីរពេទ្យ បើមានអាការៈសង្ស័យ ។

សិង្ហបុរី ក៏មានអ្នកឆ្លងជំងឺកូវីដច្រើនដែរ គឺពីចំនួន១១,១០០នាក់ កើនឡើងដល់១៤,២០០នាក់ ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា ឆ្នាំ២០២៥ ។ បើទោះជាអ្នកជំងឺធ្ងន់ធ្ងរក្នុងបន្ទប់ ICU បានធ្លាក់ចុះពី៣នាក់ មកត្រឹម២នាក់ ប៉ុន្តែអ្នកជំងឺសម្រាកនៅមន្ទីរពេទ្យ បានកើតឡើងពី១០២នាក់ ទៅ១៣៣នាក់ ។ គ្រូពេទ្យសិង្ហបុរីឱ្យដឹងថា ជំងឺនេះស្រដៀងជំងឺផ្លូវដង្ហើម ហើយកូវីដដែលឆ្លងពេលនេះ គឺ LF.7 និង NB.1.8 បំលែងមកពីកូវីដ JN.1 ។ ក្រសួងសុខាភិបាលសិង្ហបុរីបានត្រៀមខ្លួនទប់ទល់នឹងជំងឺកូវីដឆ្លងរាតត្បាត ហើយរដ្ឋមន្ត្រីក្រសួងសុខាភិបាលណែនាំពលរដ្ឋអាយុចាប់ពី៦០ឆ្នាំឡើង, ក្រុមងាយឆ្លង, គ្រូពេទ្យ និងអ្នករស់នៅតំបន់ប្រឈម គួរចាក់វ៉ាក់សាំងថ្មី ចំនួន១លើកក្នុង១ឆ្នាំ ។ រីឯពលរដ្ឋធម្មតាអាចចាក់វ៉ាក់សាំងកូវីដបាន ប្រសិនបើត្រូវការ ។

រីឯនៅចិន អ្នកជំនាញឱ្យដឹងថា អ្នកឆ្លងជំងឺកូវីដបានកើនឡើងតិចតួចក្នុងរយៈពេល២ខែកន្លងមក ហើយមានអាការៈស្រដៀងផ្តាសាយធំ កើនឡើងពី៧.៥% ទៅ១៦.២% ចាប់ពីថ្ងៃទី៣១ ខែមីនា ដល់ថ្ងៃទី៤ ខែឧសភា ឆ្នាំ២០២៥ ខណៈអ្នកជំងឺផ្លូវដង្ហើមធ្ងន់ធ្ងរ កើនឡើងពី៣.៣% ទៅ៦.៣% ។ ជំងឺកូវីដបានឆ្លងនៅតាមបណ្តាខេត្តភាគខាងត្បូងចិនច្រើនជាងភាគខាងជើង បើទោះជាការឆ្លងក្នុងតំបន់មួយចំនួនធ្លាក់ចុះក្តី ។

ជំងឺកូវីដក៏បានឆ្លងខ្លាំងនៅហុងកុងដែរ កាលពីមុន អ្នកជំងឺកូវីដស្លាប់ត្រឹម៣នាក់ក្នុង១ខែ បានកើនឡើងដល់២៦នាក់ក្នុង១ខែ ។ អ្នកជំងឺមានអាការៈធ្ងន់ធ្ងរ៨០% គឺជាមនុស្សចាស់អាយុចាប់ពី៦៥ឆ្នាំ, ៦៤% រស់នៅមណ្ឌលចាស់ជរា និង៩៥% មានជំងឺប្រចាំកាយ និងពុំបានចាក់វ៉ាក់សាំងរយៈពេល៦ខែចុងក្រោយ ។ ជំងឺនេះឆ្លងខ្លាំងនៅមណ្ឌលចាស់ជរា ចំនួន៣២កន្លែង និងឆ្លងនៅតំបន់ចំនួន៥ ក្នុងរយៈពេលត្រឹម២ថ្ងៃ នៃសប្តាហ៍ទី៣ ខែឧសភា ។

ចុងក្រោយ នៅតៃវ៉ាន់ ចាប់ពីថ្ងៃទី៤ ដល់ថ្ងៃទី១០ ខែឧសភា អ្នកជំងឺកូវីដបានព្យាបាលក្នុងបន្ទប់សង្គ្រោះបន្ទាន់ និងគ្លីនិក ស្មើជិត១ម៉ឺននាក់ កើនឡើងដល់៦៦% បើធៀបនឹងពេលមុននេះ ។ វាជាការឆ្លងជាបន្តបន្ទាប់ក្នុងរយៈពេល៥សប្តាហ៍ បើទោះជាចំនួនឆ្លងតិចជាងពេលដូចគ្នាកាលពីឆ្នាំ២០២៤ ប៉ុន្តែគ្រូពេទ្យដាស់តឿនថា ជំងឺកូវីដនឹងឆ្លងខ្លាំងនៅខែមិថុនា ។

មជ្ឈមណ្ឌលបង្ការជំងឺតៃវ៉ាន់រាយការណ៍ថា សប្តាហ៍ទី១ ខែឧសភា អ្នកជំងឺកូវីដបានស្លាប់៦នាក់ និងអ្នកជំងឺអាការៈធ្ងន់ធ្ងរ ស្មើ៣៤នាក់ ។ អ្នកជំងឺកូវីដបច្ចុប្បន្ន ស្មើ៤៩% បើធៀបនឹងឆ្នាំ២០២៤ ដែលមានអ្នកជំងឺកូវីដ រហូតដល់១៣ម៉ឺន៤ពាន់នាក់ក្នុង១សប្តាហ៍ ។ ទោះចំនួនអ្នកជំងឺកូវីដ និងមនុស្សស្លាប់ដោយសារកូវីដលើពិភពលោកតិចជាងឆ្នាំ២០២៤ ប៉ុន្តែការឆ្លងជំងឺកូវីដនៅតំបន់អាស៊ីបង្ហាញថា ជំងឺនេះមិនបាត់ទៅណាទេ ហើយវានឹងនៅជាមួយយើងយូរទៀត ដែលយើងត្រូវថែទាំសុខភាពជានិច្ច និងកុំប្រមាថជំងឺនេះ ៕

ប្រទេសថៃ ៖ កាលពីថ្ងៃទី១២ ខែឧសភា ឆ្នាំ២០២៥ ការិយាល័យស្រុកឡាតក្របាំង (Lat Krabang District Office) បានដាស់តឿនពលរដ្ឋឱ្យពាក់ម៉ាស់គ្រប់ពេលវេលា ដោយសារអគ្គិភ័យបានឆាបឆេះរោងចក្រផលិតគ្រឿងសង្ហារិម ឈ្មោះ «KING» នៅផ្លូវឆាឡងគ្រុង តំបន់ឡាតក្រាបាំង បណ្តាលឱ្យមានផ្សែងខ្មៅយ៉ាងក្រាស់គ្របដណ្តប់ក្នុងតំបន់ ។ ការដាស់តឿននេះ ដោយសារបារម្ភពីផលប៉ះពាល់សុខភាពពលរដ្ឋ ជាពិសេស អ្នកមានជំងឺផ្លូវដង្ហើម ពីព្រោះភ្នាក់ងារពន្លត់អគ្គិភ័យអាចគ្រប់គ្រងស្ថានការណ៍បានខ្លះប៉ុណ្ណោះ ។ នេះបើតាមការចុះផ្សាយរបស់សារព័ត៌មាន Thairath ។

ក្រោយពីស្ថានីយវិទ្យព្រះរ៉ាម បានទទួលសេចក្តីរាយការណ៍ពីអគ្គិភ័យឆាបឆេះរោងចក្រគ្រឿងសង្ហារិមឈ្មោះ «KING» នៅផ្លូវឆាឡងគ្រុង តំបន់ឡាតក្រាបាំង ទីក្រុងបាងកក បានធ្វើឱ្យភ្នាក់ងារពន្លត់អគ្គិភ័យតំបន់ឡាតក្រាបាំង និងភ្នាក់ងារពន្លត់អគ្គិភ័យស្ម័គ្រចិត្តបញ្ជូនរថយន្តបាញ់ទឹកជាច្រើនគ្រឿងមកកាន់កន្លែងកើតហេតុ ។ រហូតមកដល់ថ្ងៃទី១២ ខែឧសភា ភ្នាក់ងារពន្លត់អគ្គិសនីអាចគ្រប់គ្រងស្ថានការណ៍បានខ្លះៗប៉ុណ្ណោះ ដោយសាររោងចក្រនេះស្ថិតនៅទីតាំងចង្អៀត និងមានប្រេងឥន្ធនៈក្នុងអគារ ។

អាជ្ញាធរបានជម្លៀសពលរដ្ឋចេញពីលំនៅឋានជាង១៤០ខ្នង ពីព្រោះបារម្ភពីផលប៉ះពាល់សុខភាពដោយសារផ្សែងពុល ហើយអាជ្ញាធរក៏បានធ្វើជម្រកស្នាក់នៅបណ្តោះអាសន្នសម្រាប់ពលរដ្ឋ ។ នៅវេលាម៉ោង១០ព្រឹកថ្ងៃទី១២ ខែឧសភា នាយកដ្ឋានសុខភាពទីក្រុងបាងកក បានបញ្ជូនមន្ត្រីមកត្រួតពិនិត្យគុណភាពខ្យល់នៅតំបន់ក្បែររោងចក្រគ្រឿងសង្ហារិម ដោយសារតាំងពីពេលកើតហេតុ នៅតែមានផ្សែងយ៉ាងក្រាស់ពេញអាកាស ។

ការត្រួតពិនិត្យគុណភាពខ្យល់ គឺដើម្បីវាយតម្លៃកំហាប់ធូលី និងសារធាតុពុលដែលសាយភាយពេញលំនៅឋានពលរដ្ឋ ពីព្រោះសារធាតុគីមីអាចប៉ះពាល់សុខភាព ជាពិសេស អ្នកមានជំងឺផ្លូវដង្ហើម ។ ក្រៅពីនេះ អាជ្ញាធរក៏បានជូនដំណឹងទៅកាន់ពលរដ្ឋរស់នៅក្បែរកន្លែងកើតហេតុ សូមពាក់ម៉ាស់គ្រប់ពេលវេលា ហើយបើពលរដ្ឋចង់ទទួលបានការសង្គ្រោះបឋម ឬចង់ជម្លៀសពីលំនៅឋានទៅស្នាក់នៅជម្រកបណ្តោះអាសន្ន គឺអាចទាក់ទងមកកាន់មជ្ឈមណ្ឌលបញ្ជាការឧប្បត្តិហេតុនៅសាលារៀនឡាំផាអ៊ុង ។

ដោយឡែក អភិបាលក្រុងបាងកក លោក ឆ័យឆាត សិទ្ធិផាន់ បានចុះមកត្រួតពិនិត្យអគ្គិភ័យឆាបឆេះនៅរោងចក្រគ្រឿងសង្ហារិម និងទៅពិនិត្យមើលជម្រកស្នាក់នៅបណ្តោះអាសន្ន ព្រមទាំងផ្តល់កម្លាំងចិត្តដល់ពលរដ្ឋផងដែរ ។ លោកបានសង្កត់ធ្ងន់លើសុវត្ថិភាពបំពេញការងាររបស់ភ្នាក់ងារពន្លត់អគ្គិភ័យ និងភ្នាក់ងារពាក់ព័ន្ធ រួមទាំងសុវត្ថិភាពពលរដ្ឋដែលរស់នៅក្បែរនោះ ត្រូវជម្លៀសចេញពីលំនៅឋានដោយសារផ្សែងចេញពីរោងចក្រអាចប៉ះពាល់សុខភាព ។

នៅវេលាម៉ោង១២និង៣០នាទីថ្ងៃទី១២ ខែឧសភា ភ្នាក់ងារ Best 1555 ទីក្រុងបាងកក តំបន់ឡាតក្របាំង បានធ្វើជម្រកបណ្តោះអាសន្ននៅសាលារៀនចំនួន២ សម្រាប់ពលរដ្ឋរងផលប៉ះពាល់ដោយសារភ្លើងឆេះ ។ ក្រៅពីនេះ មជ្ឈមណ្ឌលសេវាកម្មសង្គ្រោះបន្ទាន់ទីក្រុងបាងកក ក៏បានបញ្ជូនមន្ត្រីមកត្រួតពិនិត្យសុខភាពអ្នករងផលប៉ះពាល់ផងដែរ ៕