ទីក្រុងក្យូតូ ៖ ក្រុមអ្នកវិទ្យាសាស្ត្រជប៉ុនមួយក្រុម បានបង្កើតប្រភេទឈា.មសិប្បនិម្មិតថ្មីមួយ ដែលអាចប្រើប្រាស់ដោយសុវត្ថិភាពចំពោះអ្នកជំងឺគ្រប់ប្រភេទឈា.ម។ របកគំហើញនេះអាចជារបកគំហើញដ៏សំខាន់មួយក្នុងប្រតិបត្តិការសង្គ្រោះបន្ទាន់ ការសង្រ្គោះក្នុងសមរភូមិ និងប្រើសម្រាប់តំបន់ដែលមិនមានលទ្ធភាពប្រើប្រាស់ឧបករណ៍វេជ្ជសាស្ត្រត្រឹមត្រូវ។

យោងតាមសារព័ត៌មាន The Brew News ដែលបានចេញផ្សាយកាលពីថ្ងៃទី២៣ ខែឧសភា ឆ្នាំ២០២៥ នេះបានឲ្យដឹងថា ឈា.មសិប្បនិម្មិតថ្មីនេះត្រូវបានបង្កើតឡើងដោយប្រើកោសិកាឈា.មក្រហមដែលបង្កើតឡើងនៅក្នុងមន្ទីរពិសោធន៍ និងប្លាកែតដែលរុំដោយពពុះសំយោគតូចៗ។ ពពុះទាំងនេះជួយឱ្យឈា.មសិប្បនិមិត្តនេះ ធ្វើការងារដូចគ្នានឹងឈាមពិតដែរ ដូចជាផ្ទុកអុកស៊ីហ្សែន និងមានសមត្ថភាពបង្កកឈា.មឲ្យឈប់ហូរ នៅពេលរងរបួស។ គុណសម្បត្តិដ៏ធំបំផុតមួយទៀតរបស់វា គឺវាអាចត្រូវបានរក្សាទុកនៅក្នុងសីតុណ្ហភាពបន្ទប់លើសពីមួយឆ្នាំ ខុសពីឈា.មទូទៅដែលជាធម្មតាត្រូវការកន្លែងផ្ទុកត្រជាក់ និងអាចរក្សាទុកត្រឹមរយៈពេលខ្លី។

លទ្ធផលនេះបង្ហាញថា មន្ទីរពេទ្យ រថយន្តសង្គ្រោះបន្ទាន់ និងគ្លីនិកដែលនៅដាច់ស្រយាលទាំងឡាយអាចរក្សាឈា.មសិប្បនិមិត្តនេះបានយូរដោយមិនបារម្ភអំពីការរក្សាទុកទូរទឹកកក ឬស្វែងរកប្រភេទឈាមឲ្យត្រូវជាមួយអ្នកជំងឺ។ លើសពីនេះ វាអាចជួយសង្គ្រោះជីវិតមនុស្សនៅក្នុងគ្រោះ.ថ្នា.ក់ចរាចរណ៍ គ្រោះមហន្តរាយធម្មជាតិ ឬតំបន់សង្រ្គាម យ៉ាងមានប្រសិទ្ធភាពព្រោះវាមានការឆ្លើយតបលឿនទៅនឹងតម្រូវការ។

គួរបញ្ជាក់ថា គំនិតក្នុងការបង្កើតឈា.មសិប្បនិត្តនេះត្រូវបានផ្ដួចផ្ដើមដំបូងកាលពីអំឡុងចុងសតវត្សន៍ទី១៩ និងដើមសតតវត្សន៍ទី២០ ដោយអ្នកវិទ្យាសាស្រ្តជាច្រើនរូប។ ក្រោយៗមកទៀតក៏មានសាស្រ្តាចារ្យមកពីសកលវិទ្យាល័យ និងវិទ្យាស្ថានវេជ្ជសាស្រ្តមួយចំនួនដូចជា លោកសាស្រ្តាចារ្យ Teruyuki Komatsu មកពី Chou University បានអភិវឌ្ឍបាននូវសមាសធាតុមួយដែលមានមុខងារដឹកអុកស៊ីសែនរបស់កោសិកាឈាមក្រហម ។ ហើយបច្ចុប្បន្ន គំនិតនេះកំពុងត្រូវបានដឹកនាំឈានមុខគេនៅសកលវិទ្យាល័យ Nara Medical University ដោយលោក Komatsu និងអ្នកស្រាវជ្រាវជីវវេជ្ជសាស្ត្រផ្សេងទៀតនៅទូទាំងប្រទេសជប៉ុន។

អ្នកជំនាញជឿថា នៅពេលដែលត្រូវបានអនុម័តឲ្យប្រើប្រាស់កាន់តែទូលំទូលាយ ឈា.មសិប្បនិម្មិតថ្មីនេះ នឹងអាចជួយអ្នកជំងឺរាប់លាននាក់នៅជុំវិញពិភពលោក។ ជំនួសឱ្យការស្វែងរកប្រភេទឈា.មដែលត្រូវគ្នាជាមួយអ្នកជំងឺ គ្រូពេទ្យអាចប្រើឈា.មសិប្បនិម្មិតនេះក្នុងការសង្រ្គោះបានយ៉ាងឆាប់រហ័ស ដោយមិនបារម្ភពីហានិភ័យមិនមានអ្នកបរិច្ចាគឈា.ម។ វាក៏នឹងធ្វើឱ្យមានភាពងាយស្រួលក្នុងការគ្រប់គ្រងការផ្គត់ផ្គង់ឈា.មនៅតំបន់ដាច់ស្រយាល ដែលពិបាកក្នុងការរក្សាទុក និងដឹកជញ្ជូនឈា.មពិតប្រាកដផងដែរ។

បច្ចុប្បន្នមានគ្លីនិកមួយចំនួន កំពុងសាកល្បងលើឈា.មសិប្បនិមិត្តនេះ គេរំពឹងថាវានឹងទទួលបានលទ្ធផលជាវិជ្ជមាន។ ហើយប្រសិនបើជោគជ័យ វាអាចនឹងក្លាយជាវត្ថុស្ដង់ដារនៅក្នុងការសង្គ្រោះបន្ទាន់គ្រប់ទីកន្លែង គិតចាប់ពីក្នុងមន្ទីរពេទ្យរហូតដល់មូលដ្ឋានយោធា និងសូម្បីតែបេសកកម្មអវកាស៕

បារាំង និង វៀតណាម កាលពីថ្ងៃចន្ទនេះ បានចុះហត្ថលេខាលើកិច្ចព្រមព្រៀងទិញយន្តហោះ Airbus និងកិច្ចសហការការពារជាតិ រួមជាមួយកិច្ចព្រមព្រៀងផ្សេងៗទៀតដែលមានតម្លៃសរុបជាង 10 ពាន់លានដុល្លារ។ ការចុះកិច្ចព្រមព្រៀងនេះត្រូវបានធ្វើឡើង ក្នុងអំឡុងពេលប្រធានាធិបតីបារាំង លោក Emmanuel Macron បានធ្វើដំណើរទស្សនកិច្ចនៅទីក្រុងហាណូយ កាលពីថ្ងៃទី26 ឧសភា ឆ្នាំ 2025។

យោងតាមសារព័ត៌មាន Reuters បានឲ្យដឹងថា ប្រទេសវៀតណាមដែលពឹងផ្អែកលើការនាំចេញ កំពុងមានការព្រួយបារម្ភអំពីពន្ធបដិការដែលកំណត់ដោយសហរដ្ឋអាមេរិកចំនួន 46% ។ ដូចនេះវៀតណាមកំពុងស្វែងរកប្រទេសជាដៃគូផ្សេងទៀត ដើម្បីបញ្ចៀសការនាំចេញពីអត្រាពន្ធដ៏ខ្ពស់មួយនេះ។ ជាមួយគ្នានេះដែរ ការគំរា.មដាក់ពន្ធ 50% ពីលោក Donald Trump មកលើទំនិញអឺរ៉ុប ក៏នាំឲ្យបារាំងកំពុងជំរុញឥទ្ធិពលរបស់ខ្លួនចំពេលមានហានិភ័យនៃពន្ធគយខ្ពស់របស់សហរដ្ឋអាមេរិកផងដែរ។ ដូចនេះ ការធ្វើទស្សនៈកិច្ចមកកាន់វៀតណាម និងប្រទេសមួយចំនួនទៀតនៅទ្វីអាស៊ី និងអឺរ៉ុប គឺយុទ្ធសាស្ត្ររយៈពេលវែង និងសំរាប់ការរីកចម្រើនទ្វេភាគី។

នៅក្នុងកិច្ចព្រមព្រៀងដែលបានចុះហត្ថលេខារវាងបារាំង និង វៀតណាម គឺមានដូចជា៖ បញ្ជាទិញយន្តហោះ Airbus A330neo ចំនួន 20 គ្រឿង ពីក្រុមហ៊ុន Airbus, កិច្ចព្រមព្រៀងសហការរវាងក្រសួងការពារជាតិទាំងពីរ ដើម្បីពង្រឹងការសហការលើ សន្តិសុខឌីជីថល (cybersecurity), ការអភិវឌ្ឍ បច្ចេកវិទ្យានុយក្លេអ៊ែសម្រាប់គោលបំណងសន្តិភាព, កិច្ចសហការលើផ្នែកសុខាភិបាល និងឧស្សាហកម្មឱសថ, កិច្ចព្រមព្រៀងសហការក្នុងការអភិវឌ្ឍវិស័យអេឡិចត្រូនិក និងបច្ចេកវិទ្យាអវកាស, ការពិចារណាលើផ្គត់ផ្គង់បច្ចេកវិទ្យាថ្មីសម្រាប់បណ្តាញរថភ្លើងល្បឿនលឿនដើម្បីបម្រើឲ្យឧស្សាហកម្មដឹកជញ្ជូនរវាងបារាំង និងវៀតណាម និងកិច្ចព្រមព្រៀងផ្សេងទៀតសរុបចំនួន 14 ច្បាប់ មាតម្លៃស្មើនឹង 10 ពាន់លានដុល្លាអាមេរិក។

លោក Macron បានធ្វើសេចក្ដីថ្លែងការណ៍ទៅកាន់អនកសរព័ត៌មាន ដោយបញ្ជាក់ថាបារាំងនឹងបន្តគាំទ្រសេរីភាពខាងការធ្វើនាវាចរណ៍នៅសមុទ្រចិនខាងត្បូង។ លោកបន្ថែមទៀតថាការចាប់ដៃគូបារាំង-វៀតណាមលើកនេះ គឺដើម្បីពង្រឹងកិច្ចសហការខាងការពារជាតិដូចដែលយើងឃើញស្រាប់ហើយថាប្រទេសទាំង២បានចុះហត្ថលេខាលើគម្រោងជាច្រើនក្នុងផ្នែកយោធា និងវិស័យអវកាសផងដែរ។

ចំណែកខាងលោកនាយករដ្ឋមន្រ្តីវៀតណាម លោក Pham Minh Chinh បានលើកឡើងថា ការចាប់ដៃគូសហការជាមួយបារាំងនឹងពង្រឹងភាពជាដៃគូយុទ្ធសាស្ត្រជាមួយបារាំង ជាពិសេសក្នុងវិស័យ៖ បច្ចេកវិទ្យា, ការលើកកម្ពស់ទំនាក់ទំនងពាណិជ្ជកម្ម, ការការពារជាតិ និងកិច្ចសហការលើវិស័យឧស្សហកម្មយោធា។ ប៉ុន្តែក្រៅពីនេះ បើតាមការបង្ហើបដោយរដ្ឋាភិបាលវៀតណាម គឺវៀតណាមក៏នឹងត្រូវយន្តហោះ Boeing ពីក្រុមហ៊ុនអាមេរិកឲ្យបានកាន់តែច្រើនជាងមុនផងដែរ ដើម្បីជាការសម្របសម្រួលកុំឲ្យអាមេរិកបន្តតម្លើងអត្រាពន្ធគយមកកាន់វៀតណាមខ្ពស់ពេក៕

ប្រទេសទីម័រឡេស្តេ នឹងត្រូវបញ្ចូលជាសមាជិកពេញសិទ្ធិ នៅក្នុងកិច្ចប្រជុំកំពូលអាស៊ានលើកទី៤៧ នៅខែតុលា ឆ្នាំ២០២៥ ខាងមុខនេះ។

បើតាម រដ្ឋមន្រ្តីការបរទេសម៉ាឡេសលោក Mohamad Hasan ថ្លែងក្នុងនាមជាម្ចាស់ផ្ទះអាស៊ានប្តូរវេន បានលើកឡើងថា៖”ប្រទេសទីម័រឡេស្តេ សម្រេចបានវឌ្ឍនភាពយ៉ាងល្អប្រសើរ ក្នុងការអនុវត្តផែនការដើម្បីឱ្យខ្លួនអាចចូលរួមជាមួយអាស៊ាន”។

ទីម័រ បានស្នើសុំចូលជាសមាជិកអាស៊ានចំនួន២លើក ពោលនៅឆ្នាំ២០១១ និង២០១៧ ក៏ប៉ុន្តែសុទ្ធសឹងតែត្រូវចានចោល ពីប្រទេសជាសមាជិក ដោយយល់ឃើញថា ប្រទេសនេះមានកង្វះធនធានមនុស្ស និងបញ្ហាសេដ្ឋកិច្ច។

គួរបញ្ជាក់ថា ប្រទេសទីម័រឡេស្តេ ទើបតែទទួលបានឯករាជ្យកាលពីឆ្នាំ២០០២ប៉ុណ្ណោះ ក្រោយពីឥណ្ឌូនេសុីដាក់អាណានិគមចន្លោះពីឆ្នាំ១៩៧៥ ដល់ឆ្នាំ១៩៩៩៕