ម៉ាច ដាវី បានចេញមកបញ្ជាក់ម្តងទៀតអំពីរឿងរៀបការដោយទទួលស្គាល់ថានាងពិតជា ធ្លាប់រៀបការមែន ប៉ុន្តែការរៀបការនោះគឺធ្វើទៅតាមឪពុកម្តាយហើយមិនបានរស់ នៅជាមួយគ្នាឬមានអេតាស៊ីវិលឡើយ។ លើសពីនេះ ម៉ាច ដាវី ក៏ទម្លាយរឿងក្តៅ គគុកពីបវរកញ្ញាប្រកួតរួម ជំនាន់របស់ខ្លួនផងដែរ។
នៅក្នុងកម្មវិធី សខ្មៅ ដែលបានចាក់ផ្សាយកាលពីពេលថ្មីៗនេះ ម៉ាច ដាវី បាននិយាយថាការប្រកួតបវរកញ្ញាគឺមានគ្រប់រូបភាពមិនមែនមានតែក្នុងរឿងប៉ុន្តែមានក្នុងជីវិតពិតក្នុងនោះមានទាំងភាពច្រណែន ជាន់គេដើម្បីឡើងខ្លួនឯង ដើម្បីកេរ្តិ៍ឈ្មោះនិងភាពល្បីល្បាញ។ ដាវី បានទម្លាយថានាងបានស្គាល់បវរកញ្ញាម្នាក់តាមរយៈការថតរឿងជាមួយគ្នាហើយនាងបានហៅថាប្អូនស្រី ។ លើសពីនេះអ្នកទាំងពីរគឺជាមិត្តភក្តិល្អ មានរឿងអ្វីតែងតែចែករំលែកគ្នា តែទីបំផុតគាត់បានធ្វើឱ្យនាងខកចិត្តនិងអន់ចិត្ត។
ម៉ាច ដាវី ថាអតីតមិត្តសម្លាញ់របស់នាងជាមនុស្សម្នាក់ដែលអត្មានិយមហ៊ានធ្វើគ្រប់បែបយ៉ាង ហ៊ានជាន់មិត្តភក្តិដើម្បីកេរ្តិ៍ឈ្មោះ។ ដាវី បានបង្ហើបថា បុគ្គលនោះគឺជាដៃគូប្រកួតកម្មវិធីបវរកញ្ញា Miss Grand ជាមួយគ្នា។ មុននឹងដាក់ពាក្យចូលប្រកួត ម៉ាច ដាវី បានសួរអតីតមិត្តភក្តិម្នាក់នោះថាចូលរួមប្រកួតឬអត់ហើយមិត្តភក្តិនោះបានឆ្លើយបដិសេធ តែនៅពេលនាងបានមកុដនៅក្នុងថ្នាក់ខេត្តក៏បានលេចឮដំណឹងថាគាត់បានចូលរួមប្រកួតដូចគ្នា។ 
អ្វីដែលធ្វើឱ្យនាងមិនអស់ចិត្តដល់សព្វថ្ងៃនេះគឺរឿងរ៉ាវដែលនាងបានចែករំលែកហេតុអ្វីបានជាហ្វេនរបស់គាត់ដឹងទាំងហ្វេនមិនបានស្គាល់នាងថាជាអ្នកណាសោះ ហើយពេលហ្វេន វាយប្រហារទម្លាយរឿងរៀបការរបស់នាងឡើងមកហេតុអ្វីមិត្តសម្លាញ់មិនជួយនាង ទាំងដឹងថាមិនមែនជាការពិត។
មិត្តភាពក្លែងក្លាយនេះ ម៉ាច ដាវី ថានាងមិនសោកស្តាយទេដែលអតីតមិត្តសម្លាញ់ធ្វើ បែបនេះដាក់នាងប៉ុន្តែបានធ្វើឱ្យនាងបានស្គាល់ពីមុខមាត់ពិតប្រាកដហើយមិនអាចបន្តមិត្តភាពបាន។ ចាប់តាំងពីមានរឿងចម្រូងចម្រាសមក ម៉ាច ដាវី ថាអ្នកទាំងពីរគឺមិន បានទាក់ទងគ្នានោះទេ។
ជាមួយនឹងការបង្ហាញពីភាពឈឺចាប់នៃមិត្តភាពក្លែងក្លាយ ម៉ាច ដាវី ក៏បានបញ្ជាក់ពីរឿងរៀបការរបស់នាងផងដែរគឺនាងពិតជាធ្លាប់បានរៀបការមែន ប៉ុន្តែនោះគ្រាន់តែជាកម្មវីធីជប់លៀងមួយ ហើយនាងស្របតាមឪពុកម្តាយព្រោះពេលនោះនាងស្ថិតក្រោមការគ្រប់គ្រង។ ទោះជាយ៉ាងណា នាងមិនបានរស់នៅជាមួយគ្នានោះទេព្រោះនាងគ្មានចិត្តស្រលាញ់ហើយក៏បញ្ចប់ទំនាក់ទំនងនោះខណៈការរៀបការនោះគ្មានអេតាស៊ីវិលឡើយ៕
