ប្រធានាធិបតីអាមេរិក លោក ដូណាល់ ត្រាំ កំពុងស្តារឡើងវិញនូវគោលនយោបាយហាមប្រាមការធ្វើដំណើរពីអាណត្តិដំបូងរបស់គាត់ ដោយចុះហត្ថលេខាលើសេចក្តីប្រកាសមួយកាលពីយប់ថ្ងៃពុធ ទី ៤ ខែមិថុនា ដែលរារាំងប្រជាជនមកពីប្រទេសរាប់សិបមិនឱ្យចូលសហរដ្ឋអាមេរិក។ នៅបើតាមប្រភពសារព័ត៌មាន South China Morning។

យោងតាមសារព័ត៌មាន រ៉យទ័រ ប្រទេសទាំងនោះរួមមាន អាហ្វហ្គានីស្ថាន មីយ៉ាន់ម៉ា ឆាដ សាធារណរដ្ឋកុងហ្គោ អេក្វាទ័រហ្គីណេ អេរីទ្រា ហៃទី អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។

បន្ថែមពីលើការហាមប្រាមដែលចូលជាធរមាននៅម៉ោង ១២:០១ ព្រឹកថ្ងៃចន្ទ ទី ៩ ខែមិថុនា ឆ្នាំ២០២៥ ខាងមុខនេះ នឹងមានការដាក់កំហិតខ្ពស់ចំពោះភ្ញៀវមកពី ប្រទេសប៊ូរុនឌី គុយបា ឡាវ សៀរ៉ាឡេអូន តូហ្គោ តូមិននីស្ថាន និងវេណេហ្ស៊ុយអេឡា។

លោក Trump បាននិយាយនៅក្នុងសេចក្តីប្រកាសរបស់គាត់ថា “ខ្ញុំត្រូវតែធ្វើសកម្មភាពដើម្បីការពារសន្តិសុខជាតិ និងផលប្រយោជន៍ជាតិរបស់សហរដ្ឋអាមេរិក និងប្រជាជនរបស់ខ្ញុំ” ។

បញ្ជីលទ្ធផលបានមកពីបទបញ្ជាប្រតិបត្តិថ្ងៃទី ២០ ខែមករា ដែលលោក Trump ចេញដោយតម្រូវឱ្យក្រសួងសន្តិសុខរដ្ឋ និងមាតុភូមិ និងនាយកស៊ើបការណ៍ជាតិចងក្រងរបាយការណ៍ស្តីពី “អាកប្បកិរិយាអរិភាព” ចំពោះសហរដ្ឋអាមេរិក និងថាតើការចូលពីប្រទេសមួយចំនួន មានហានិភ័យចំពោះសន្តិសុខជាតិដែរឬទេ។

គួររំលឹកថា ក្នុងអំឡុងពេលអាណត្តិដំបូងរបស់គាត់ លោក Trump ក៏បានចេញបទបញ្ជាប្រតិបត្តិមួយក្នុងខែមករា ឆ្នាំ ២០១៧ ផងដែរ ដោយហាមប្រាមការធ្វើដំណើរទៅកាន់សហរដ្ឋអាមេរិក ដោយពលរដ្ឋនៃប្រទេសចំនួនប្រាំពីរ ដែលមានជនជាតិឥស្លាមច្រើនជាងគេ គឺអ៊ីរ៉ាក់ ស៊ីរី អ៊ីរ៉ង់ ស៊ូដង់ លីប៊ី សូម៉ាលី និងយេម៉ែន៕

ទីក្រុងបាកក ៖ ប្រជាជនថៃជាច្រើនបានប្រមូលផ្ដុំគ្នានៅមុខក្រសួងការពារជាតិថៃ ដើម្បីធ្វើបាតុកម្មក្នុងប្រទេស ពាក់ព័ន្ធនឹងជម្លោះព្រំដែនកម្ពុជា-ថៃ ក្រោយដឹងដំណឹងថា «រាជរដ្ឋាភិបាលកម្ពុជា» នៅតែរៀបចំសំណុំរឿងពាក់ព័ន្ធនឹងបញ្ហាព្រំដែនឡើងទៅតុលាការអន្តរជាតិ និងប្រកាសមិនយករឿងតំបន់មុំបី ប្រាសាទតាមាន់ធំ តាមាន់តូច និងតាក្របី មកនិយាយក្នុងកិច្ចប្រជុំនៅថ្ងៃទី14ខាងមុខនេះឡើយ។ នេះបើយោងតាមសារព័ត៌មានថៃ Khaaw chaong 8 (ข่าวช่อง8) ។

តាមប្រភពព័ត៌មានខាងលើ ដែលបានចេញផ្សាយនាព្រឹកថ្ងៃព្រហស្បត្តិ៍ ទី៥ នេះបានឲ្យដឹងថា មានអ្នកតំណាងពលរដ្ឋ ដែលជាបណ្តាញតាមដានស្ថានការណ៍នៅប្រាសាទព្រះវិហារ និងបណ្តាញសង្គមស៊ីវិលជាច្រើនផ្សេងទៀត បាននាំគ្នាមកឡាំប៉ានៅមុខអគារក្រសួងការពារជាតិថៃ។

ការតវ៉ានេះត្រូវបានធ្វើឡើងភ្លាមៗបន្ទាប់ពីដំណឹងដែលរាជរដ្ឋាភិបាលកម្ពុជាបញ្ចាក់នៅក្នុងសេចក្ដីថ្លែងការណ៍កាលពីយប់មិញថា កម្ពុជានឹងមិនបញ្ចូលបញ្ហានៅតំបន់ទាំង៤រួមមាន ប្រាសាទតាមាន់ធំ តាមាន់តូច តាក្របី និងតំបន់មុំបី ចូលក្នុងរបៀបវារៈនៃកិច្ចប្រជុំទ្វេភាគីរវាងកម្ពុជា-ថៃ នៅថ្ងៃទី១៤ខែមិថុនា ខាងមុខនេះឡើយ។ បន្ថែមពីនេះកម្ពុជា បានស្នើសុំឲ្យភាគីថៃចូលរួមសហការក្នុងការរៀបចំឯកសារនានាដើម្បីយកបញ្ហាទាំងនេះទៅដោះស្រាយនៅតុលាការយុត្តិធម៌អន្តរជាតិ។

ការលើកឡើងបែបនេះ បានបង្ករឲ្យពលរដ្ឋថៃជាច្រើន មានការមិនពេញចិត្តជាខ្លាំង។ ដូច្នេះហើយពួកគេក៏ប្រមូលផ្ដុំគ្នាធ្វើបាតុ.ក.ម្ម ដើម្បីទាមទារឲ្យរដ្ឋាភិបាលមានចំណាត់ការលើរឿងនេះ និងមិនព្រមឲ្យរដ្ឋាភិបាលរបស់ខ្លួនយល់ស្របនឹងសំណើររបស់កម្ពុជាជាដាច់ខាត។ បាតុករទាំងនោះសង្កត់ធ្ងន់ថា យន្តការណ៍ដោះស្រាយបញ្ហារបស់កម្ពុជា គឺជាការរំលោ.ភលើសិទ្ធិស្របច្បាប់ និងបូរណភាពទឹកដីរបស់ប្រទេសថៃ។

គួរជម្រាបផងដែរថា សម្រាប់គោលជំហររបស់កម្ពុជាក្នុងការដោះស្រាយជម្លោះព្រំដែនរវាងកម្ពុជា-ថៃ នៅតុលាការយុត្តិធម៌អន្តរជាតិ របស់ភាគីកម្ពុជា គឺមានគោលបំណងចង់បញ្ចប់បញ្ហាដោយសន្តិវិធី ប៉ុន្តែក្នងស្មារតីយុត្តិធម៌ ដើម្បីកសាងនូវទំនុកចិត្តមិត្តភាព និងអ្នកជិតខាងល្អបានយូរអង្វែង៕

ប្រទេសថៃ ៖ សមាជិកសភានៃគណបក្សប្រឆាំងរបស់ថៃម្នាក់ បានស្នើទៅកាន់នាយករដ្ឋមន្រ្តីថៃឲ្យដោះស្រាយបញ្ហាព្រំដែនជាមួយកម្ពុជា ដោយប្រើ«យុទ្ធសាស្រ្តឈ្នះដោយមិនបាច់ប្រយុទ្ធ” ជាជាងការឡើងទៅដោះស្រាយជាមួយតុលាការយុត្តិធម៌អន្តរជាតិ ព្រោះការធ្វើបែបនោះថៃអាចនឹងចាញ់ប្រៀបកម្ពុជា ហើយថៃនឹងលែងជាទីទំនុកចិត្តរបស់ឆាកអន្តរជាតិតទៅទៀត។

នៅថ្ងៃអង្គារ ទី៣ ខែមិថុនា លោក Rangsiman Rome សមាជិកសភានៃបក្ស «ប្រជាជនថៃ» បានបង្ហោះសារនៅគណនីហ្វេសប៊ុករបស់ខ្លួន ទាក់ទងនឹងជម្លោះនៅព្រំដែនរវាងកម្ពុជា-ថៃ ដោយស្នើទៅកាន់នាយករដ្ឋមន្រ្តី ឲ្យប្រើប្រាស់យុទ្ធសាស្រ្តឈ្នះដោយមិនប្រយុទ្ធក្នុងករណីមានហិង្សា។ លោក Rangsiman បានលើកឡើងថា បើទោះជាថៃមានប្រៀបជាងកម្ពុជាលើការធ្វើពាណិជ្ជកម្ម សេដ្ឋកិច្ច និងយោធាក៏ពិតមែន ប៉ុន្តែចំណុចទាំងនេះ មិនមែនជាអ្វីដែលថៃអាចយកមកប្រើដើម្បីឈ្នះកម្ពុជាបានឡើយ។

លោកពន្យល់ទៀតថា រដ្ឋាភិបាលកម្ពុជាបានដឹងច្បាស់ពីសក្កដានុពលយោធារបស់ថៃរួចហើយ ប៉ុន្តែហេតុអ្វីបានជាកម្ពុជានៅតែប្រើយុទ្ធសាស្រ្តញុះញង់ចង់បង្ករជម្លោះជាមួយថៃ? នោះក៏ព្រោះតែកម្ពុជាបានដឹងថា ជ័យជម្នះរបស់កម្ពុជាមិនមែនបានមកពីការប្រយុទ្ធគ្នានោះទេ ប៉ុន្តែបានមកពីការបំផ្លាញភាពស្របច្បាប់របស់ថៃ តាមរយៈទិដ្ឋភាពផ្សេងៗ មិនថាការទូត ប្រើប្រាស់យន្តការអន្តរជាតិ ឬស្វែងរកជំនួយពីភាគីទីបីឡើយ។ លោកអះអាងថា ៖ កម្ពុជាសង្ឃឹមថាយន្តការរបស់ខ្លួននឹងធ្វើឲ្យប្រទេសថៃក្លាយជាអ្នកខុសនៅចំពោះមុខឆាកអន្តរជាតិ។ កម្ពុជាកំពុងស្ថិតនៅក្នុងស្ថានភាពទាញយកផលប្រយោជន៍ពីបញ្ហានេះឲ្យបានច្រើន។ ដូច្នេះហើយយើងត្រូវមានការប្រុងប្រយ័ត្នបំផុត កុំឲ្យប្រទេសដទៃទៀតមើលមកឃើញថា “យើងកំពុងសម្លុតធ្វើប្រទេសតូចតាច”។

ជាងនេះទៅទៀត លោកបានសង្កត់ធ្ងន់ថា សូមឲ្យរដ្ឋាភិបាលធ្វើយ៉ាងណាបញ្ចៀសពីសង្រ្គាម ព្រោះបើទោះជាថៃអាចយកឈ្នះកម្ពុជាក្នុងការដោះស្រាយដោយហិង្សាបែបនេះក៏ពិតមែន ប៉ុន្តែវានឹងផ្ដល់ផលប៉ះពាល់ច្រើន ជាពិសេសគឺពលរដ្ឋដែលរស់ៅតាមព្រំដែន។ វាមិនត្រឹមបង្កការខូចខាតទ្រព្យសម្បត្តិ បាត់បង់អាយុជីវិតទាហាន និងពលរដ្ឋស្លូតត្រង់ប៉ុណ្ណោះទេ ប៉ុន្តែការឈ្នះក្នុងសមរភូមិនេះ អាចជាការបើកផ្លូវឲ្យប្រទេសមហាអំណាចផ្សេងទៀតដែលជាសម្ព័ន្ធមិត្តរបស់កម្ពុជា ចូលមកអន្តរាគមន៍ក្នុងរឿងនេះផងដែរ។ ហើយវាមិនមែនជារឿងល្អសម្រាប់ថៃឡើយ។

ទាំងអស់នេះគែជាពាក្យសំដីរបស់លោក Rangsiman អំពីការយល់ឃើញរបស់ខ្លួនទៅលើបញ្ហាដែលថៃនិងកម្ពុជាកំពុងប្រឈម។ ក្រៅពីនេះលោកក៏បានផ្ដល់ជាយុទ្ធសាស្រ្តណែនាំមួយចំនួន ទៅកាន់រដ្ឋាភិបាលថៃក្នុងការយកទៅពិចារណា ដើម្បីយកទៅដោះស្រាយជម្លោះជាមួយកម្ពុជាដោយសន្តិភាព។

គួររំលឹកថា នាព្រឹកថ្ងៃពុធ ទី៤ ខែមិនថុនា នេះ រដ្ឋាភិបាលថៃបានចេញសេចក្ដីថ្លែងការណ៍មួយរួចហើយ ជុំវិញការប្ដឹ.ងឡើងតុលាការយុត្តិធម៌អន្តរជាតិរបស់កម្ពុជា ដោយថៃប្ដេជ្ញារថានឹងដោះស្រាយបញ្ហាវិវាទព្រំដែនជាមួយកម្ពុជាដោយប្រើយន្តការច្បាប់អន្តរជាតិ សន្ធិសញ្ញា និងកិច្ចព្រមព្រៀងផ្សេងៗ ដូចជា ៖ MOU ឆ្នាំ២០០០ រួមទាំងភស្តុតាងផ្សេងៗដោយសន្តិវិធីវិញ ក្នុងឋានៈជាអ្នកជិតខាងល្អជាមួយកម្ពុជា ។ ក្រៅពីនេះ រដ្ឋាភិបាបាលទាំងពីរក៏នឹងផ្តោតសំខាន់លើការទំនាក់ទំនងល្អជាមួយពលរដ្ឋ ដើម្បីការពារកុំឱ្យមានការយល់ខុសរវាងពលរដ្ឋនៃប្រទេសទាំងពីរ៕

ប្រទេសថៃ ៖ កាលពីថ្ងៃទី៤ ខែមិថុនា ឆ្នាំ២០២៥ សារព័ត៌មានថៃ The Better News រាយការណ៍ថា រដ្ឋាភិបាលថៃបានចេញសេចក្តីថ្លែងការណ៍ស្តីពីបញ្ហាព្រំដែនកម្ពុជា-ថៃ ដោយសូមឱ្យពលរដ្ឋថៃមានទំនុកចិត្តលើរដ្ឋាភិបាលក្នុងការដោះស្រាយបញ្ហាព្រំដែន ។ រដ្ឋាភិបាលថៃសូមប្រកាន់ខ្ជាប់នូវការដោះស្រាយបញ្ហាដោយសន្តិវិធី និងគោរពច្បាប់អន្តរជាតិ ហើយភាគីទាំងពីរសហការការពារកុំឱ្យស្ថានការណ៍កាន់តែតានតឹង ។

រដ្ឋាភិបាលថៃចេញសេចក្ដីថ្លែងការណ៍ដើម្បីឆ្លើយតបនឹងផែនការប្ដឹងទៅតុលាការយុត្តិធម៌អន្តរជាតិរបស់កម្ពុជា រឿងព្រំដែនទាំង៤ចំណុច រួមមាន ៖ ប្រាសាទតាមាន់តូច តាមាន់ធំ តាក្របី និង តំបន់មុំបី ។ រដ្ឋាភិបាលថៃចង់ត្រឹមចរចារកដំណោះស្រាយព្រំដែនជាមួយកម្ពុជា ជាលក្ខណៈទ្វេភាគីដោយប្រើប្រាស់យន្តការ គណៈកម្មការព្រំដែនចម្រុះ (JBC) និងគណៈកម្មការព្រំដែនទូទៅ (GBC)។ រដ្ឋាភិបាលថៃថា កម្ពុជាបានយល់ព្រមលើការស្នើជួបប្រជុំក្នុងប្រទេសកម្ពុជា នៅថ្ងៃទី១៤ ខែមិថុនា នេះ ។ រីឯហេតុការណ៍ប៉ះទង្គិចនៅថ្ងៃទី២៨ ខែឧសភា កន្លងមក ថៃនៅបន្តអះអាងថា ពួកគេគ្រាន់តែបានបាញ់ការពារខ្លួន ។

លោក Jirayu Houngsub អ្នកនាំពាក្យទីស្តីការនាយករដ្ឋមន្ត្រីថៃ លើកឡើងថា រដ្ឋាភិបាលថៃបានប្រជុំជាមួយគ្រប់ស្ថាប័នក្រោយកើតហេតុការណ៍ប៉ះទង្គិចរវាងកងទ័ពកម្ពុជា និងថៃ កាលពីព្រឹកថ្ងៃទី២៨ ខែឧសភា ។ ររដ្ឋាភិបាលថៃនឹងការពារអធិបតេយ្យភាព និងបូរណភាពទឹកដីថៃ ដោយប្រកាន់ខ្ជាប់នូវដំណោះស្រាយបញ្ហាដោយសន្តិវិធី ស្របតាមច្បាប់អន្តរជាតិ និងគោលការណ៍មនុស្សធម៌ ។

ក្រោយការប៉ះទង្គិចរវាងកងទ័ពកម្ពុជា និងថៃ រដ្ឋាភិបាលប្រទេសទាំងពីរប្រទេសបានពិភាក្សាគ្នា និងបារម្ភពីស្ថានការណ៍ ។ បន្ទាប់ពីពិភាក្សា រដ្ឋាភិបាលទាំងពីរបានឯកភាពថា នឹងសហការធ្វើឱ្យស្ថានការណ៍វឹលមករកភាពប្រក្រតីឡើងវិញ មិនរាលដាល និងប្រើប្រាស់យន្តការទ្វេភាគីដែលមានស្រាប់ដើម្បីដោះស្រាយបញ្ហា ក្នុងនោះមានគណៈកម្មការព្រំដែនចម្រុះ (JBC) តាមការពិភាក្សាគ្នារបស់មេបញ្ជាការកងទ័ពទាំងពីរភាគី កាលពីថ្ងៃទី២៩ ខែឧសភា ឆ្នាំ២០២៥ ។

ចំណែកភាគីកម្ពុជាចង់ដោះស្រាយបញ្ហាដោយប្តឹងទៅតុលាការយុត្តិធម៌អន្តរជាតិ គឺរដ្ឋាភិបាលថៃបញ្ជាក់ថា ថៃក្នុងឋានៈជាប្រទេសជិតខាងរបស់កម្ពុជា ថៃចង់ដោះស្រាយបញ្ហាដោយសន្តិវិធី ផ្អែកលើមូលដ្ឋានច្បាប់អន្តរជាតិ សន្ធិសញ្ញា និងកិច្ចព្រមព្រៀងផ្សេងៗ ដូចជា ៖ MOU ឆ្នាំ២០០០ រួមទាំងភស្តុតាងផ្សេងៗ ហើយថៃត្រៀមខ្លួនចរចាទ្វេភាគីជាមួយកម្ពុជាពាក់ព័ន្ធនឹងការបោះបង្គោលព្រំដែន ។ ក្រៅពីនេះ រដ្ឋាភិបាបាលទាំងពីរនឹងផ្តោតសំខាន់លើការទំនាក់ទំនងជាមួយពលរដ្ឋ ដើម្បីការពារកុំឱ្យមានការយល់ខុសរវាងពលរដ្ឋទាំងពីរប្រទេស ។

រដ្ឋាភិបាលថៃសូមបញ្ជាក់ថា បច្ចុប្បន្ន ស្ថានការណ៍នៅបរិវេណព្រំដែនកម្ពុជា-ថៃ មានភាពល្អប្រសើរ ហើយសូមពលរដ្ឋមានទំនុកចិត្តថា ភ្នាក់ងារពាក់ព័ន្ធបានចាត់វិធានការតាមនីតិវិធីដើម្បីការពារអធិបតេយ្យភាព និងរក្សាសិទ្ធិរបស់ថៃ ។ រដ្ឋាភិបាលថៃជឿជាក់ថា កម្ពុជា និងថៃ នឹងអាចដោះស្រាយបញ្ហារួមគ្នាបានក្នុងនាមជាប្រទេសជិតខាងល្អ មានសុវត្ថិភាព និងសន្តិភាពសម្រាប់ពលរដ្ឋរស់នៅព្រំដែន ខណៈកម្ពុជា និងថៃ គឺជាក្រុមគ្រួសាររបស់អាស៊ានទាំងអស់គ្នា ៕

ប្រទេសថៃ ៖ អ្នកនាំពាក្យកងទ័ពជើងគោកថៃបានច្រានចោលព័ត៌មានថា កងទ័ពថៃបញ្ជូនដ្រូនមកស៊ើបការណ៍ពីការចល័តកងទ័ពកម្ពុជា និងអាវុ.ធ នៅខេត្តព្រះវិហារ ដោយអះអាងថា គឺជាព័ត៌មានមិនពិត ថៃពុំធ្លាប់បញ្ជូនដ្រូនទៅកម្ពុជា វាពុំមែនជាដ្រូនរបស់ថៃទេ ។ ថៃពុំចាំបាច់បញ្ជូនដ្រូនទៅស៊ើបការណ៍ក្នុងទឹកដីកម្ពុជា ពីព្រោះថៃបានឃើញការចល័តកងទ័ពកម្ពុជា និងអាវុធពេញបណ្តាញសង្គម ។ នេះបើតាមការចុះផ្សាយរបស់សារព័ត៌មាន Thairath កាលពីថ្ងៃទី៣ ខែមិថុនា ឆ្នាំ២០២៥ ។

កាលពីថ្ងៃទី៣ ខែមិថុនា កន្លងមក លោកឧត្តមសេនីយ៍ Winthai Suvaree អ្នកនាំពាក្យកងទ័ពជើងគោកថៃ បានផ្តល់សម្ភាសន៍ជាមួយសារព័ត៌មានតាមទូរស័ព្ទ ពាក់ព័ន្ធនឹងការចុះផ្សាយព័ត៌មានថា កាលពីរសៀលថ្ងៃទី២ ខែមិថុនា ឆ្នាំ២០២៥ កងទ័ពកម្ពុជាឈរជើងនៅខេត្តព្រះវិហារ បានស្ទាក់ចាក់ដ្រូនរំលោភដែនអាកាសកម្ពុជា ក្នុងគោលបំណងស៊ើបការណ៍ ។ ក្រោយការវាយតម្លៃដំបូងឱ្យដឹងថា វាជាដ្រូនរបស់កងទ័ពថៃ ដែលបញ្ជូនចូលទឹកដីកម្ពុជាដើម្បីស៊ើបការណ៍ពីការចល័តកងទ័ពកម្ពុជា និងអាវុធ ។

លោក Winthai អ្នកនាំពាក្យកងទ័ពជើងគោកថៃបញ្ជាក់ថា មិនពិតទេ ការប្រើប្រាស់ដ្រូននាពេលបច្ចុប្បន្ន គឺជារឿងធម្មតា ។ ភាគីទាំងពីរបានប្រើប្រាស់ដ្រូនក្នុងតំបន់ដូចគ្នា ហើយថៃចាត់ទុកថា នេះជាតំបន់ត្រួតស៊ីគ្នា ពុំទាន់មានការកំណត់ព្រំដែនច្បាស់លាស់ ។ ហេតុនេះ ការប្រើប្រាស់ដ្រូន គឺពុំអាចដឹងថា តើជាការរំលោភដែនអាកាសរបស់ប្រទេសណាឬក៏អត់ ប៉ុន្តែថៃពុំបានបញ្ជូនដ្រូនចូលទឹកដីកម្ពុជាទេ ហើយដ្រូននេះ ក៏ពុំមែនជារបស់ថៃដែរ ។

លោក Winthai បន្តទៀតថា ថៃពុំចាំបាច់បញ្ជូនដ្រូនទៅស៊ើបការណ៍សម្ងាត់ក្នុងទឹកដីកម្ពុជាទេ ពីព្រោះថៃបានឃើញការចល័តកងទ័ពកម្ពុជា និងអាវុធពេញបណ្តាញសង្គម ។ ហេតុនេះ ការអានព័ត៌មាននានាដែលផ្សព្វផ្សាយនាពេលបច្ចុប្បន្ន សូមឱ្យពលរដ្ឋថៃពិនិត្យមើលប្រភពព័ត៌មានគួរឱ្យទុកចិត្ត ពីព្រោះព័ត៌មានភាគច្រើនមិនពិត ។ លោកអះអាងថា កងទ័ពថៃអនុវត្តតាមគោលការណ៍ និងមិនចង់ឱ្យមានជម្លោះកាន់តែខ្លាំងក្លានៅបរិវេណព្រំដែនជាប់កម្ពុជា ៕

ប្រទេសចិន ៖ ក្រសួងការបរទេសចិនប្រកាសផ្តល់ទិដ្ឋាការអាស៊ានដល់សមាជិកអាស៊ាន១០ប្រទេស រួមមាន ៖ កម្ពុជា ថៃ ម៉ាឡេស៊ី សិង្ហបុរី ហ្វីលីពីន ឥណ្ឌូណេស៊ី ព្រុយណេ វៀតណាម មីយ៉ាន់ម៉ា ឡាវ និងទីម័រខាងកើត ដើម្បីលើកកម្ពស់ការធ្វើដំណើរក្នុងតំបន់ ។ បុគ្គលដែលធ្វើដំណើរសម្រាប់ប្រកបអាជីវកម្មនឹងទទួលបានទិដ្ឋាការអាស៊ាន ដោយមានសិទ្ធិចូលប្រទេសចិនច្រើនលើកក្នុងរយៈពេល៥ឆ្នាំ ហើយអាចយកស្វាមី-ភរិយា និងកូនមកស្នាក់នៅចិនរហូតដល់១៨០ថ្ងៃ ។

អ្នកនាំពាក្យក្រសួងការបរទេសចិន លោក Lin Jian និយាយថា កិច្ចសហការរវាងចិនជាមួយបណ្តាប្រទេសអាស៊ាននារយៈពេលប៉ុន្មានឆ្នាំចុងក្រោយនេះល្អប្រសើរយ៉ាងខ្លាំង ទាំងផ្នែកសន្តិសុខ សេដ្ឋកិច្ច និងទំនាក់ទំនងរវាងពលរដ្ឋ ។ ហេតុនេះ ចិននឹងបង្កលក្ខណៈងាយស្រួលដល់ការធ្វើដំណើរក្នុងតំបន់អាស៊ាន ។

ក្រៅពីនេះ ប្រទេសចិននឹងលើកលែងទិដ្ឋាការដល់ពលរដ្ឋរស់នៅប្រទេសអាមេរិកឡាទីនផងដែរ ដូចជា ៖ ពលរដ្ឋប្រេស៊ីល អាហ្សង់ទីន និងឈីលី ដោយអនុវត្តចាប់ពីថ្ងៃទី១ ខែមិថុនា តទៅ ។ ដូច្នេះ ធ្វើឱ្យចំនួនប្រទេសដែលទទួលបានសិទ្ធិធ្វើដំណើរមកចិនដោយពុំចាំបាច់ស្នើសុំទិដ្ឋាការ កើនឡើងរហូតដល់៤៣ប្រទេស ។

លោក Lin បន្តថា ការផ្តល់ទិដ្ឋាការអាស៊ានជាផ្នែកមួយនៃការប្តេជ្ញាចិត្តរបស់រដ្ឋាភិបាលចិន ក្នុងការបើកប្រទេស និងអភិវឌ្ឍន៍សេដ្ឋកិច្ចពិភពលោកបើកចំហ ។ នៅត្រីមាសទី១ ឆ្នាំ២០២៥ ចិនបានទទួលស្វាគមន៍ជនបរទេសជាង៩លាននាក់ និងមានក្រុមហ៊ុនអន្តរជាតិថ្មីៗចូលមកវិនិយោគនៅចិន ស្មើជាង១ម៉ឺន៨ពាន់ក្រុមហ៊ុន កើនឡើងជាង១២ភាគរយ បើធៀបនឹងរយៈពេលដូចគ្នាឆ្នាំ២០២៤ ។

ចិន និងបណ្តាប្រទេសអាស៊ានបានផ្លាស់ប្តូរអ្នកជំនាញជាញឹកញាប់ ហើយយើងនឹងជំរុញការផ្លាស់ប្តូរអ្នកជំនាញបន្ថែមទៀត ដែលនេះជាគោលបំណងរួមគ្នារវាងចិន និងបណ្តាប្រទេសអាស៊ាន ។ ចិនរំពឹងថា ការផ្តល់ទិដ្ឋាការអាស៊ាននឹងក្លាយជាជំហ៊ានមួយទៀតឆ្ពោះទៅរកការជំរុញកសាងសហគមន៍ចិន-អាស៊ាន ដែលផ្តោតលើការរួមរស់ជាមួយគ្នាប្រកបដោយសន្តិភាព សន្តិសុខ និងមិត្តភាព ។ នេះបើតាមការលើកឡើងរបស់លោក Lin ៕