ប្រទេសជប៉ុន ៖ ជប៉ុនចាប់ផ្តើមអនុវត្តគម្រោងឱ្យភោជនីយដ្ឋាននានា និងពលរដ្ឋកាត់បន្ថយរសជាតិប្រៃក្នុងអាហារដើម្បីការពារការឡើងសម្ពាធឈាមខ្ពស់ និងផលប៉ះពាល់សុខភាព ពីព្រោះបើតាមលទ្ធផលស្ទង់មតិបង្ហាញថា ពលរដ្ឋជប៉ុនម្នាក់ ក្នុងចំណោម៣នាក់ មានសម្ពាធឈាមកើនឡើងខ្ពស់ ដោយសារបការដាក់អំបិលក្នុងអាហារច្រើនពេក ។

ក្រសួងសុខាភិបាលជប៉ុនបានបង្ហាញលទ្ធផលការស្ទង់មតិមួយ គឺពលរដ្ឋជប៉ុនបរិភោគអំបិលក្នុង១ថ្ងៃ ជាមធ្យមស្មើជាង៩ក្រាម ។ នេះជាបរិមាណអំបិលខ្ពស់ជាងការកំណត់របស់អង្គការសុខភាពិភពលោក (WHO) រហូតដល់ទ្វេដង ។ ហេតុនេះ ដើម្បីឱ្យភោជនីយដ្ឋាននានាដាក់អំបិលក្នុងអាហារតិចជាងមុន សាលាក្រុងតូក្យូ បានផ្តល់លិខិតបញ្ជាក់ទៅភោជនីយដ្ឋានណាដែលគ្រប់គ្រងបរិមាណអំបិលក្នុងអាហារគ្រប់មុខ ។

ការចេញលិខិតបញ្ជាក់នេះ គឺដើម្បីឱ្យអតិថិជនដែលចូលបរិភោគអាហារដឹងថា តើភោជនីយដ្ឋានណាខ្លះបានគ្រប់គ្រងបរិមាណអំបិលក្នុងអាហារ ឬមិនដាក់អំបិលក្នុងអាហារច្រើនពេក ពីព្រោះពលរដ្ឋជប៉ុនមួយចំនួនងាកមកចាប់អារម្មណ៍ថែទាំសុខភាព និងបរិភោគអាហារប្រៃតិចជាងមុន ។

នៅឆ្នាំ២០២៥ មានភោជនីយដ្ឋានចំនួន៧៣កន្លែង នៅទីក្រុងតូក្យូ ទទួលបានលិខិតបញ្ជាក់ពីសាលាក្រុង ស្តីពីការគ្រប់គ្រងបរិមាណអំបិលក្នុងអាហារ ។ តាមធម្មតា អាហារជប៉ុនបានផ្សំគ្រឿងដោយដាក់អំបិលយ៉ាងច្រើន ទើបធ្វើឱ្យពលរដ្ឋជប៉ុនចូលចិត្តបរិភោគអាហារមានរសជាតិប្រៃ ហើយការផ្លាស់ប្តូរទម្លាប់បរិភោគអាហារ គឺជប៉ុនត្រូវចំណាយពេលយូរ ។

បច្ចុប្បន្ន ភោជនីយដ្ឋានជាច្រើនកន្លែងនៅប្រទេសជប៉ុនចាប់ផ្តើមកាត់បន្ថយអំបិលក្នុងអាហារបន្តិចម្តងៗ ដើម្បីឱ្យអាហារផ្តល់អត្ថប្រយោជន៍ដល់សុខភាព និងមានរសជាតិឆ្ងាញ់ដូចមុន ដោយការបិទស្លាកប្រាប់អតិថិជនពីការកាត់បន្ថយរសជាតិប្រៃក្នុងអាហារ ។

គួរបញ្ជាក់ថា ការបរិភោគអាហារប្រៃប្រឈមនឹងការកើតជំងឺផ្សេងៗ ដូចជា ៖ ជំងឺបេះដូង លើសឈាម តម្រងនោមរ៉ាំរ៉ៃ និងជំងឺធាត់ ។ ជាទូទៅ បរិមាណសូដ្យូមដែលរាងកាយត្រូវការ គឺមិនលើសពី២,០០០មីលីក្រាមក្នុង១ថ្ងៃ (ឬស្មើអំបិល ១ស្លាព្រាកាហ្វេ) ដោយគ្រូពេទ្យបានណែនាំឱ្យបរិភោគអាហាររសជាតិសាប ពុំប្រៃពេក និងបន្ថែមគ្រឿងផ្សំតាមក្រោយបន្តិចម្តងៗ ៕

ប្រទេសវៀតណាម ៖ កាលពីថ្ងៃទី២១ ខែឧសភា ឆ្នាំ២០២៥ សារព័ត៌មានថៃរាយការណ៍ថា ប្រទេសវៀតណាមជួបទុក្ខធំ គឺកសិករដាំទុរេនបានផ្លែច្រើន ប៉ុន្តែលក់ពុំដាច់ ដោយសារចិនរឹតបន្តឹងគុណភាពទុរេនខ្លាំង ។ នៅខែឧសភានេះ ទុរេនពូ.ជ Ri6 នៅវៀតណាម លក់បានតែជាង៣,០០០រៀលប៉ុណ្ណោះក្នុង១គីឡូក្រាម ដែលជាតម្លៃធ្លាក់ចុះយ៉ាងខ្លាំង បើធៀបនឹងខែមេសា កន្លងមក ។

លើសពីនេះ ក្រុមឈ្មួញកណ្តាលវៀតណាមក៏លែងចាប់អារម្មណ៍ទិញទុរេន ទើបធ្វើឱ្យកសិករវៀតណាមត្រូវដឹកជញ្ជូនទុរេនទៅលក់នៅតាមផ្លូវដោយខ្លួនឯង ក្នុងតម្លៃចាប់ពីជាង៤,០០០រៀល ទៅជាង៨,០០០រៀលប៉ុណ្ណោះក្នុង១គីឡូក្រាម ។ ហេតុអ្វីទុរេនវៀតណាមធ្លាក់ថ្លៃខ្លាំងបែបនេះ?

មូលហេតុធ្វើឱ្យទុរេនវៀតណាមធ្លាក់ថ្លៃខ្លាំង ដោយសារ ៖

១-ទុរេនដាំដុះលើផ្ទៃដីតាមមាត់ទន្លេ បានផ្តល់ទិន្នផលព្រមៗគ្នា
២-ចិនឈប់នាំចូលទុរេនវៀតណាមច្រើនដូចមុន ពីព្រោះទុរេនវៀតណាមគុណភាពអន់
៣-ចំនួនអ្នកទិញដូចមុន ប៉ុន្តែវៀតណាមបង្កើនទិន្នផលទុរេន និង
៤-ទុរេនវៀតណាមត្រូវប្រកួតប្រជែងជាមួយទុរេនថៃ និងម៉ាឡេស៊ី ដែលប្រទេសទាំងពីរបាននាំចេញទុរេនយ៉ាងច្រើនទៅចិន ។

រដ្ឋាភិបាលវៀតណាមបានដាក់ផែនការដាំទុរេនលើផ្ទៃដី ចាប់ពី៦ម៉ឺន៥ពាន់ហិកតា ទៅ៧ម៉ឺន៥ពាន់ហិកតាប៉ុណ្ណោះ ប៉ុន្តែបច្ចុប្បន្ន ផ្ទៃដីដាំទុរេនរបស់វៀតណាម បានកើនឡើងរហូតដល់១សែន៦ម៉ឺនហិកតា ដែលជាផ្ទៃដីច្រើនជាងផែនការកំណត់ ។ កាលពីឆ្នាំ២០២៤ វៀតណាមបាននាំចេញទុរេនទៅចិន ស្មើទឹកប្រាក់រហូតដល់៣,៣០០លានដុល្លារ ប៉ុន្តែឆ្នាំ២០២៥នេះ វៀតណាមនាំចេញទុរេនទៅចិន ធ្លាក់ចុះដល់៦១% ស្មើទឹកប្រាក់ត្រឹមតែ៩៨លានដុល្លារប៉ុណ្ណោះ ។

រដ្ឋាភិបាលវៀតណាមក៏ប្រញាប់ដោះស្រាយ ដោយបន្ថែមកន្លែងត្រួតពិនិត្យគុណភាពទុរេន ដើម្បីពង្រីកទីផ្សារទៅក្រៅប្រទេស ដូចជា ៖ កូរ៉េខាងត្បូង ជប៉ុន បណ្តាប្រទេសអឺរ៉ុប និងអាមេរិក រួមទាំងលក់ទុរេនក្នុងស្រុកកាន់តែច្រើន ។ ហេតុនេះ វៀតណាមអាចលក់ទុរេនបានថ្លៃជាងមុន គឺចាប់ពីជាង៨,០០០រៀល ទៅជាង១ម៉ឺនរៀលក្នុង១គីឡូក្រាម ដែលជាការជួយសម្រាលទុក្ខរបស់កសិករ ៕

ប្រទេសចិន ៖ កាលពីថ្ងៃទី២១ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា ប្រទេសចិនគ្រោងបង្ហាញការហោះហើរសាកល្បងរបស់យន្តហោះ Jiu Tan គ្មានមនុស្សបើក ហើយអាចបញ្ជាដ្រូនម៉ាក Kamikaze រហូតដល់ជាង១០០គ្រឿង ក្នុងពេលតែមួយ ។ ប្រទេសនានាចាត់ទុកថា នេះជាអាវុ.ធសម្ងាត់ថ្មីរបស់ចិន ដើម្បីបង្កើនសមត្ថភាពកងទ័ព និងជាប្រព័ន្ធការពារដែនអាកាស ។

តាមការចុះផ្សាយរបស់សារព័ត៌មានរដ្ឋាភិបាលចិន គឺយន្តហោះ Jiu Tan ផលិតដោយក្រុមហ៊ុន Shaanxi Unmanned Equipment Technology ដែលគ្រោងបង្ហាញសមត្ថភាពហោះហើរសាកល្បងលើអាកាសគ្មានមនុស្សបើក នៅខែមិថុនា ឆ្នាំ២០២៥ ក្រោយពីយន្តហោះនេះទើបបង្ហាញរូបរាងជាលើកដំបូងក្នុងកម្មវិធី «Zhuhai Air Show» នៅខែវិច្ឆិកា ឆ្នាំ២០២៤ ។

យន្តហោះ Jiu Tan មានស្លាបប្រវែង២៥ម៉ែត្រ អាចហោះហើរយូរបំផុតបាន១២ម៉ោង ក្នុងចម្ងាយ៧,០០០គីឡូម៉ែត្រ ។ វាអាចទ្រទ្រង់ទម្ងន់រហូតដល់៦តោន ដែលផ្នែកខាងក្នុងមានបំពាក់ឧបករណ៍ស៊ើបការណ៍ អាវុធ និងមីស៊ីល ហើយសមត្ថភាពពិសេសរបស់វា គឺអាចវាយប្រហារជាហ្វូង «Barrage Attack» ដែលប្រព័ន្ធការពារយន្តហោះរបស់សត្រូវពិបាកស្ទាក់ចាប់ ។

យន្តហោះ Jiu Tan របស់ចិនអាចហៅថា «យន្តហោះមេសម្រាប់បង្ហោះដ្រូន ឬ Drone Mothership» ដែលមានទំហំធំ និងមានតួនាទីបង្ហោះដ្រូនតូចៗជាច្រើនគ្រឿងក្នុងភារកិច្ចកងទ័ព ។ គេអាចប្រើប្រាស់វាជាច្រើនផ្នែក ដូចជា ៖ ស៊ើបការណ៍ សង្គ្រាមអេឡិចត្រូនិក ការសង្គ្រោះបន្ទាន់ និងដឹកជញ្ជូនឧបករណ៍ប្រកបដោយសុវត្ថិភាពខ្ពស់ ។

អ្នកជំនាញនិយាយថា ចិនផលិតយន្តហោះ Jiu Tan ក្នុងគោលដៅប្រឆាំងនឹងការប្រើប្រាស់អំណាចផ្លូវអាកាសរបស់អាមេរិក ។ បើប្រៀបធៀបជាមួយយន្តហោះ RQ-4 Global Hawk និង MQ-9 Reaper របស់អាមេរិក គឺយន្តហោះអាមេរិកពុំទាន់មានសមត្ថភាពវាយប្រហារជាហ្វូងដូចយន្តហោះចិនទេ ។ រីឯយន្តហោះចិនមានទំហំធំ ប៉ុន្តែវាខ្វះគុណសម្បត្តិផ្នែក Stealth ៕

ប្រទេសជប៉ុន ៖ រដ្ឋមន្ត្រីកសិកម្មជប៉ុនម្នាក់ ត្រូវបាត់បង់ពីតំណែង បន្ទាប់ពីទទួលរងការរិះគ..ន់យ៉ាងខ្លាំងអំពីសេចក្ដីថ្លែងការណ៍របស់លោក ថាទទួលបានអង្ករដោយឥតគិតថ្លៃពីអ្នកគាំទ្រ ក្នុងអំឡុងពេលដែលប្រជាជនជប៉ុនជាច្រើនកំពុងប្រឈមមុខនឹងតម្លៃអង្ករដ៏ខ្ពស់បំផុត។

យោងតាមសារព័ត៌មាន Reuters ដែលបានបានចេញផ្សាយកាលពីថ្ងៃពុធនេះ បានឲ្យដឹងថា៖ បន្ទាប់បានថ្លែង នៅក្នុងកម្មវិធីរៃអង្គាសប្រាក់សម្រាប់ទ្រទ្រង់គណបក្សកាលពីថ្ងៃអាទិត្យនេះ រដ្ឋមន្ត្រីកសិកម្មជប៉ុនលោក Taku Eto បានធ្វើឱ្យមានការរិះគ.ន់យ៉ាងខ្លាំងពីអ្នកបោះឆ្នោត និងសមាជិកសភា។

ពាក្យសំដីរបស់លោកដែលបានលើកឡើងថា លោកមិនដែលត្រូវទិញអង្ករឡើយ ព្រោះមានអំណោយពីអ្នកគាំទ្រតែងផ្ដល់ឲ្យលោក” លោកថែមទាំងបានបន្តទៀតថា អង្ករដែលអ្នកគាំទ្របានផ្ដល់មកឲ្យគាត់គឺច្រើនដល់ថ្នាក់ “អាចយកទៅលក់វិញបាន” ទៀតផង។ ការនិយាយបែបនេះ ខណៈប្រទេសជប៉ុនកំពុងស្ថិតក្នុងស្ថានភាពដែលតម្លៃអង្ករខ្ពស់ខ្លាំង និងនាំឲ្យប្រជាជនជួបទុក្ខលំបាក បានធ្វើឲ្យមានការចោ.ទប្រកាន់ថា លោកជាមន្រ្តីដែលមិនយល់ពីទុក្ខរបស់ប្រជាជន។

ពលរដ្ឋជាច្រើន និងគណបក្សប្រឆាំងបាននាំគ្នាតវ៉ា និងទាមទារឱ្យមានការចាត់វិធានការលើលោក Taku Eto ដែលប្រើប្រាស់ពាក្យសំដីមិនសមស្របនឹងកាលៈទេសៈ។ មិនយូរប៉ុន្មាន នៅថ្ងៃពុធ ទី២១ ខែឧសភា លោក Eto ក៏បានសម្រេចចិត្តលាលែងពីតំណែង និងចេញមកធ្វើការសុំទោសជាសាធារណៈ ដោយទទួលស្គាល់ថា «វាពិតជាមិនសមរម្យខ្លាំង ដែលខ្ញុំបាននិយាយបែបនេះខណៈពេលដែលប្រជាជនកំពុងជួបទុក្ខលំបាករឿងអង្ករឡើងថ្លៃ» ។

ចំណែកនាយករដ្ឋមន្រ្តីជប៉ុន លោក Ishiba បានតែងតាំងអតីតរដ្ឋមន្ត្រីក្រសួងបរិស្ថាន លោក Shinjiro Koizumi ជារដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ (MAFF) ជំនួសតំណែងលោក Taku Eto ដើម្បីរក្សាទំនុកចិត្តរបស់ប្រជាជន និងស្ថិរភាពនៃគោលនយោបាយកសិកម្ម។

គួរបញ្ជាក់ថា បញ្ហាអង្ករឡើងថ្លៃនៅជប៉ុនគឺបានកើតឡើងដោយសារ ទិន្នផលស្រូវក្នុងស្រុកធ្លាក់ចុះ, ការរឹតបន្តឹងការនាំចេញពីប្រទេសឥណ្ឌា និងតម្រូវការកើនឡើង ទើបធ្វើឲ្យតម្លៃស្រូវអង្ករក្នុងប្រទេសជប៉ុនកាន់តែកើនឡើងខ្ពស់ចាប់តាំងពីពាក់កណ្ដាលឆ្នាំ ២០២៣ មក។ ដូច្នេះពាក្យសំដីប៉ុន្មានម៉ាត់របស់លោក Taku Eto ដែលបាននិយាយដូចខាងលើ ពិតជាធ្វើឲ្យប៉ះពាល់ដល់អារម្មណ៍ប្រជាជនជាខ្លាំង។

ករណីនេះបានបន្ថែមសម្ពាធដល់រដ្ឋាភិបាលរបស់លោកIshibaដែ លកំពុងតែធ្លាក់ចុះប្រជាប្រិយភាពស្រាប់។ តែទោះជាយ៉ាងណា បច្ចុប្បន្នរដ្ឋាភិបាលជប៉ុនកំពុងដោះស្រាយបញ្ហាតម្លៃអង្ករនេះ និងស្ដារជំនឿចិត្តប្រជាជនឡើងវិញមុនការបោះឆ្នោតជាតិដ៏សំខាន់នៅខែកក្កដា៕

ប្រទេសថៃ ៖ ក្រសួងសុខាភិបាលថៃកំពុងឃ្លាំមើលយ៉ាងដិតដល់នូវប្រភេទថ្មី XEC នៃ Covid-19 ដែលរីករាលដាលឆាប់រហ័សជាងជំងឺផ្តាសាយធម្មតា ៧ ដង និងមានការឆ្លងលើប្រជាជនកើនឡើងរាប់ម៉ឺនករណី។ នេះបើតាមសារព័ត៌មានក្នុងស្រុករបស់ថៃ The Bangkok Post បានចុះផ្សាយកាលពីថ្ងៃពុធ ទី២១ ខែឧសភា។

រដ្ឋមន្ត្រីថៃលោក Somsak Thepsuthin បាននិយាយថា ប្រទេសថៃបានប្រើប្រាស់វិធានការត្រួតពិនិត្យជំងឺអស់រយៈពេល 21 សប្តាហ៍ហើយចាប់តាំងពីថ្ងៃទី 1 ខែមករា។ រហូតមកដល់ពេលនេះ មានការឆ្លងនូវកូវីតប្រភេទ XEC បានកើនឡើងដល់ 108,891 ករណី ហើយក្នុងនោះចំនួនអ្នកដែលបានបា.ត់ប.ង់ជីវិតមានចំនួន 27 នាក់។ ការស្លា..ប់ភាគច្រើនគឺកើតមានលើ “ក្រុម 608” ដែលរួមមានមនុស្សចាស់ប្រហែល 80% រីឯកុមារក៏ប៉ះពាល់ដែរ។

គួរបញ្ជាក់ថា ប្រភេទ XEC គឺជាវ៉ារ្យ៉ង់បម្លែងខ្លួនចេញមកពីប្រភេទ Omicron ។ បើទោះជាជំងឺនេះមិនធ្ងន់ធ្ងរខ្លាំង និងអត្រាស្លា..ប់មានកម្រិតទាបក៏ដោយ ប៉ុន្តែវាអាចរីករាលដាលយ៉ាងឆាប់រហ័ស ដែលនេះនឹងបង្ករហានិភ័យខ្ពស់សម្រាប់ក្រុមមនុស្សងាយរងគ្រោះរួមមាន មនុស្សចាស់ មនុស្សមានប្រព័ន្ធភាពស៊ាំខ្សោយ អ្នកមានជំងឺរ៉ាំរ៉ៃ ។ល។

វេជ្ជបណ្ឌិត Teera Woratanarat មកពីមហាវិទ្យាល័យវេជ្ជសាស្ត្រនៃសាកលវិទ្យាល័យ Chulalongkorn បានបញ្ជាក់ថា មេរោគ Covid-19 ដែលបម្លែងថ្មីនេះរីករាលដាលលឿនជាងជំងឺផ្តាសាយជិត ៧ ដង។ វាជាជំងឺឆ្លងទូទៅ ដែលអាចប៉ះពាល់លើមនុស្សគ្រប់អាយុដោយមានទាំងកុមារ ក្មេងជំទង់ មនុស្សពេញវ័យ និងមនុស្សចាស់។

ចំពោះអក្ការៈរបស់ XEC មិនសូវខុសគ្នាពីការឆ្លងជំងឺផ្ដាសាយ ឬកូវីតប្រភេទផ្សេងឡើយ រួមមាន៖ កម្ដៅក្នុងខ្លួនកើនឡើង ឈឺសាច់ដុំ ឬឈឺរាងកាយ តឹងច្រមុះហ៊ាសំបោរ ក្អក កណ្ដាស ឈឺក្បាល មិនអាចស្រង់ក្លិន ឬរសជាតិបានជាដើម។ ចំណែកវិធីការពារមានដូចជា ៖ ពាក់ម៉ាសការពារជាប់ជានិច្ចពេលចេញទៅក្រៅ, លាងសម្អាតដៃជាមួយសាប៊ូ ឬទឹកអាលកុលឲ្យបានញឹកញាប់, រក្សាគម្លាតសង្គម និងចា.ក់វ៉ាក់សាំងរំលឹកដើម្បីបង្កើនប្រព័ន្ធភាពស៊ាំ។

គួររំលឹកថា កាលពីសប្តាហ៍មុន មានអ្នកជំងឺ Covid-19 សម្រាកនៅមន្ទីរពេទ្យចំនួន 43,213 នាក់ ដែលទិន្នន័យនេះបានបង្ហាញពីការកើនឡើង 35.5% ។ ចំណែកការស្លា..ប់ថ្មីៗចំនួនបីករណី ត្រូវបានគេរាយការណ៍ថាមាននៅក្នុងខេត្ត Kanchanaburi និង Sukhothai និងនៅក្នុងស្រុក Bangkok Noi៕

ប្រទេសថៃ ៖ កាលពីថ្ងៃទី២១ ខែឧសភា ឆ្នាំ២០២៥ សារព័ត៌មានថៃ Amarin News រាយការណ៍ថា ក្រុមអ្នកបើករថយន្តតាក់ស៊ីបាននាំគ្នាបិទផ្លូវមុខវិមានរដ្ឋាភិបាល ដើម្បីតវ៉ាឱ្យរដ្ឋាភិបាលបណ្តេញរថយន្តប្រើប្រាស់កម្មវិធី Grab កុំឱ្យដឹកភ្ញៀវនៅអាកាសយានដ្ឋានសុវណ្ណភូមិ ។ បើរដ្ឋាភិបាលពុំបណ្តេញទេ ពួកគេចាត់ទុកថា នេះជាការលក់ជាតិ ពីព្រោះ Grab ពុំមែនជាក្រុមហ៊ុនថៃ ហើយពួកគេនឹងរួមគ្នាបិទផ្លូវចេញ-ចូលអាកាសយានដ្ឋានសុវណ្ណភូមិ ។

សមាគមវិជ្ជាជីវៈអ្នកបើករថយន្តតាក់ស៊ីសាធារណៈ រួមទាំងបណ្តាញក្រុមអ្នកបើកតាក់ស៊ី ដឹកនាំដោយលោក វរ៉ាផុន គែមឃុនថុត នាយកវិជ្ជាជីវៈអ្នកបើករថយន្តតាក់ស៊ីសាធារណៈ និងអ្នកបើកតាក់ស៊ីជាង៥០គ្រឿង បានប្រមូលផ្តុំគ្នាតវ៉ានៅមុខវិមានរដ្ឋាភិបាល ចាប់ពីថ្ងៃទី២០ ខែឧសភា ដើម្បីឱ្យនាយករដ្ឋមន្ត្រី លោកស្រី ផេថងថាន ស៊ីណាវ៉ាត់ និងលោក សុរិយៈ ជឹងរុងរឿងកិច្ច ឧបនាយករដ្ឋមន្ត្រី និងរដ្ឋមន្ត្រីក្រសួងដឹកជញ្ជូន ដោះស្រាយបញ្ហា និងផ្តល់ភាពយុត្តិធម៌ដល់អ្នកបើកតាក់ស៊ី ដែលត្រូវរថយន្ត Grab ដណ្តើមភ្ញៀវ ។

លោក វរ៉ាផុន និយាយថា ក្រុមអ្នកបើកតាក់ស៊ីនាំគ្នាតវ៉ា ដោយសាររដ្ឋាភិបាលអនុញ្ញាតឱ្យរថយន្តប្រើប្រាស់កម្មវិធី Grab មកដឹកភ្ញៀវក្នុងអាកាសយានដ្ឋានសុវណ្ណភូមិ ហើយពួកគេមើលឃើញរថយន្ត Grab មានភ្ញៀវហៅជិះច្រើនជាងតាក់ស៊ី ។ ការអនុញ្ញាតឱ្យរថយន្ត Grab ដឹកភ្ញៀវ គឺរដ្ឋាភិបាលផ្តល់ប្រយោជន៍ដល់ Grab ច្រើនពេក ជាពិសេស ការប្រើប្រាស់អនឡាញយ៉ាងសេរីធ្វើឱ្យប៉ះពាល់តាក់ស៊ី ។ យើងនឹងដាក់សម្ពាធដើម្បីឱ្យកុំ Grab មកដឹកភ្ញៀវគ្រប់ទីកន្លែងនៅប្រទេសថៃ ជាពិសេស កន្លែងសំខាន់ ដូចជា ៖ អាកាសយានដ្ឋាន ។

អាកាសយានដ្ឋាន គឺជាទ្វារចេញ-ចូលប្រទេសថៃ ដែលពុំគួរអនុញ្ញាតឱ្យមានរថយន្តខុសច្បាប់មកដឹកភ្ញៀវធ្វើឱ្យប៉ះពាល់ដល់តាក់ស៊ី ។ ពេលខ្លះ មានរឿងរ៉ាវកើតឡើងលើភ្ញៀវទេសចរ ប៉ុន្តែសារព័ត៌មានផ្សាយថា ជាកំហុសរបស់តាក់ស៊ីទៅវិញ រហូតធ្វើឱ្យប៉ះពាល់កិត្តិយសតាក់ស៊ី ។ ដូច្នេះ រដ្ឋាភិបាលត្រូវតែជ្រើសរើសរវាងរថយន្ត Grab ឬតាក់ស៊ី? បើរដ្ឋាភិបាលយក Grab ចាត់ទុកថា ជាការលក់ជាតិ ពីព្រោះ Grab មិនមែនជាក្រុមហ៊ុនថៃទេ ។

លោក វរ៉ាផុន បន្តថា ការតវ៉ានេះពុំពាក់ព័ន្ធនឹងនយោបាយ ពួកគេទាមទារដើម្បីឱ្យពលរដ្ឋគ្រប់រូបអាចរកចំណូលដោះស្រាយជីវភាព ។ រដ្ឋាភិបាលធ្លាប់និយាយថា នឹងធ្វើឱ្យពលរដ្ឋគ្រប់រូបមានអាហារបរិភោគគ្រប់គ្រាន់ មានប្រាក់ចាយ និងមានកិត្តិយស ប៉ុន្តែពេលនេះ រដ្ឋាភិបាលបែរជាធ្វើឱ្យពលរដ្ឋរងទុក្ខ ។ យើងសំណូមពរឱ្យរដ្ឋាភិបាលបណ្តេញរថយន្ត Grab ចេញពីបរិវេណអាកាសយានដ្ឋានសុវណ្ណភូមិ បើពុំដក Grab ចេញទេ យើងនឹងប្រមូលផ្តុំគ្នាតវ៉ាទៀតដើម្បីឱ្យចលាចល ដោយបិទផ្លូវចេញ-ចូលអាកាសយានដ្ឋានសុវណ្ណភូមិ ។

ចំណែកលោក ជិរុទ្ធ វិសានជីត អគ្គនាយកនៃនាយកដ្ឋានដឹកជញ្ជូនផ្លូវគោក ឱ្យដឹងថា អាកាសយានដ្ឋានសុវណ្ណភូមិ មានសេវាកម្មដឹកអ្នកដំណើរច្រើនប្រភេទ ដូចជា ៖ រថយន្តក្រុង, រថយន្តតាក់ស៊ី គិតប្រាក់តាម Meter វាស់ចម្ងាយផ្លូវ និងរថយន្តប្រើប្រាស់ Grab ដើម្បីបំពេញតម្រូវការអ្នកដំណើរគ្រប់ប្រភេទ ។ ក្រសួងដឹកជញ្ជូនមានគោលការណ៍ឱ្យរថយន្តទាំងអស់អាចផ្តល់សេវាកម្មនៅអាកាសយានដ្ឋានសុវណ្ណភូមិ និងត្រូវសម្របខ្លួនជាមួយបច្ចេកវិទ្យា ។ យើងត្រូវផ្តល់សិទ្ធិឱ្យអ្នកដំណើរជាអ្នកជ្រើសរើសសេវាកម្មថា តើពួកគេចង់ជិះរថយន្តណា រីឯការគំរាមបិទអាកាសយានដ្ឋាន គឺពុំអាចធ្វើបានទេ យើងនឹងចាត់ការតាមច្បាប់ ៕