យោងតាមប្រព័ន្ធផ្សព្វផ្សាយកូរ៉េនៅថ្ងៃទី ២១ ខែឧសភា នេះ Kim Sae Ron ត្រូវបានគេនិយាយថាបានណាត់ជួបជាមួយតារាល្បីមួយរូបនៅជុំវិញឆ្នាំ ២០១៨ មិនមែន Kim Soo Hyun នោះទេ ស្របពេលដែលគ្រួសាររបស់ Kim Sae Ron បានបញ្ជាក់ពីមុនថាអតីតតារាស្រីរូបនេះបានណាត់ជួបតារាសម្តែង Kim Soo Hyun ពីឆ្នាំ ២០១៥ ដល់២០២១ ។

បន្ទាប់ពីមានព័ត៌មាននេះបានសាយភាយទស្សនិកជនជាច្រើនបានចោទជាសំណួរ ដោយសារតែពេលវេលាស្របគ្នាជាមួយនឹងទំនាក់ទំនងរបស់នាង។ មិត្តប្រុសរូបនេះត្រូវបានគេហៅថាជាសមាជិកក្រុមតារាចម្រៀង A ដែលមានវ័យចំណាស់ជាង Kim Sae Ron។ អ្នកទាំងពីរត្រូវបានគេរាយការណ៍ថាបានបែកបាក់គ្នាក្នុងរយៈពេលខ្លីនៅដើមឆ្នាំ ២០១៩ ប៉ុន្តែបានមានទំនាក់ទំនងជាមួយគ្នាវិញនៅដើមពាក់កណ្តាលឆ្នាំ ២០២២ ដែលជាពេលដែល Kim Sae Ron ប្រឈមមុខនឹងការរិះគន់ជាសាធារណៈចំពោះគ្រោះថ្នាក់ចរាចរណ៍របស់នាងបើកបរដោយស្ថានភាពស្រវឹង។

យោងតាមប្រព័ន្ធផ្សព្វផ្សាយកូរ៉េ តារា A នោះបានខ្ចីប្រាក់យ៉ាងច្រើនដល់ Kim Sae Ron អំឡុងពេលនេះនៅពេលដែលនាងជួបការលំបាកផ្នែកហិរញ្ញវត្ថុ។
Kim Sae Ron ត្រូវបានគេនិយាយថាបានណែនាំបុរសនោះជាសាធារណៈថាជាមិត្តប្រុសរបស់នាងដល់អ្នកស្គាល់។ តារាសម្ដែង Kim Sae Ron មិនបានប្រឹងប្រែងរក្សា ទំនាក់ទំនងនេះជាអាថ៌កំបាំងនោះទេ។ ទោះបីជាពួកគេបានបែកគ្នាជាផ្លូវការនៅដើមឆ្នាំ ២០២៣ ប៉ុន្តែពួកគេនៅតែទាក់ទងគ្នារហូតដល់ឆ្នាំ២០២៤។

អ្នកក្នុងផ្នែកកម្សាន្តមួយរូបបាននិយាយថា «ទោះជាបែកគ្នាហើយ Kim Sae Ron និង A ក៏នៅតែជាមិត្តនឹងគ្នាដែរ។ គោលបំណងនៃការលាតត្រដាងពីទំនាក់ទំនងអតីតកាលរបស់ពួកគេគឺគ្រាន់តែបញ្ជាក់ពីពេលវេលាទាក់ទងនឹង Kim Soo Hyun ហើយយើងសង្ឃឹមថាមនុស្សមិនយល់ជ្រៅពេកក្នុងព័ត៌មានផ្ទាល់ខ្លួនរបស់ A»។

ទន្ទឹមនឹងនោះ ក៏មានមហាជនមួយចំនួនបានសន្និដ្ឋានថា អតីតមិត្តប្រុសរបស់ Kim Sae Ron គឺជាសមាជិកក្រុមចម្រៀងល្បី ៧ នាក់ ប៉ុន្តែព័ត៌មាននេះត្រូវបានសារព័ត៌មានកូរ៉េអះ អាងថាជាព័ត៌មានមិនពិត៕

តារាសម្តែង Lee Jae Wook បានប្រឈមមុខនឹងការរិះគន់ពីសំណាក់អ្នកគាំទ្របន្ទាប់ពី និយាយអំពីទំនាក់ទំនងអតីតកាលរបស់លោកជាមួយ Karina សមាជិក aespa ទោះបីជាអ្នកទាំងពីរបានបែកគ្នាជាងមួយឆ្នាំមុនក៏ដោយ។

កាលពីថ្ងៃទី ១៩ ខែឧសភា តារាសម្តែង Lee Jae Wook បានធ្វើបទសម្ភាសន៍ ជាមួយប្រព័ន្ធផ្សព្វផ្សាយកូរ៉េ ដើម្បីផ្សព្វផ្សាយរឿងភាគថ្មីរបស់ Netflix ដែលមានចំណងជើងថា «Dear Hognrang» ដែលលោកគ្រងតំណែងជាតួឯក។ តាមប្រព័ន្ធបានរាយការណ៍ថា កាលពីខែកុម្ភៈ កន្លងទៅ ដំណឹងដែលថា Lee Jae Wook និងតារាចម្រៀងស្រី Karina កំពុងទាក់ទងគ្នាបានក្លាយជាប្រធានបទក្តៅ។ នៅពេលនោះតារាសម្ដែងកំពុងតែថតរឿង។ នៅពេលត្រូវបានគេសួរថាតើព័ត៌មានណាត់ជួបប៉ះពាល់ដល់ការងាររបស់លោកដែរឬទេ តារាសម្តែង Lee Jae Wook បានឆ្លើយថា «វាពិតជាមិនប៉ះពាល់ដល់ការចូលរួមក្នុងតួនាទីរបស់ខ្ញុំទេ។ ប៉ុន្តែប្រសិនបើខ្ញុំនិយាយលម្អិតខ្លាំងពេក វាអាចនឹងក្លាយទៅជារឿងផ្ទាល់ខ្លួនពេក»។

ទោះបីជា Lee Jae Wook ឆ្លើយតបយ៉ាងខ្លី និងប្រយ័ត្នប្រយែងក៏ដោយ ប៉ុន្តែអ្នកគាំទ្រ Karina ជាច្រើនបានសម្តែងការខកចិត្ត និងប្រតិកម្មចំពោះការចែករំលែករបស់ តារាប្រុសរូបនេះ។
អ្នកគាំទ្ររបស់ Karina បានចោទប្រកាន់ Lee Jae Wook ថាបានប្រើឈ្មោះអតីតមិត្តស្រីរបស់ខ្លួនដើម្បីផ្សព្វផ្សាយភាពយន្តរបស់លោក។ ពួកគេបាននិយាយថា តារាសម្តែងអាចបដិសេធទាំងស្រុងក្នុងការឆ្លើយសំណួរនេះ ប៉ុន្តែលោកនៅតែចេតនាលើកឡើងពីទំនាក់ទំនងចាស់។ ទន្ទឹមនឹងនេះ Karina ត្រូវបានរិះគន់ចំពោះការណាត់ជួប Lee Jae Wook ហើយនាងមិនដែលបាននិយាយអំពីបញ្ហានេះម្តងទៀតទេចាប់តាំងពីពួកគេបែកគ្នា។

គួរបញ្ជាក់ផងដែរថា ប្រព័ន្ធផ្សព្វផ្សាយកូរ៉េបានបង្ហាញព័ស្តុតាងដំបូងថា Karina និង Lee Jae Wook មានទំនាក់ទំនងស្នេហានៅចុងខែកុម្ភៈ ឆ្នាំ ២០២៤ ។ ក្រោយពីមានព័ត៌មាននេះមក មានអ្នកគាំទ្រមួយក្រុមបានចេញមុខរិះគន់សមាជិក aespa រូបនេះ ព្រោះគិតថាលឿនពេកសម្រាប់តារាស្រីជំនាន់ទី ៤ ដែលមានសកម្មភាពស្នេហា ហើយមិនត្រឹមតែប៉ះពាល់ដល់ Karina ខ្លួនឯងប៉ុណ្ណោះទេ ថែមទាំងក្រុម aespa ទាំងមូលផងដែរ។ ក្រោយមកនៅថ្ងៃទី ៥ ខែមីនា Karina បានបង្ហោះលិខិត សូមទោស ដែលសរសេរដោយដៃ ទៅកាន់អ្នកគាំទ្រនៅលើគណនី Instagram ផ្ទាល់ខ្លួនរបស់នាង។

ខណៈពេលដែល Karina ជាមិត្តស្រីស្ថិតនៅក្រោមសម្ពាធយ៉ាងខ្លាំង Lee Jae Wook ហាក់ដូចជាមិនមានសកម្មភាពអ្វីឡើយ។ ប្រហែល ៥ សប្តាហ៍បន្ទាប់ពីការបង្ហោះរបស់ Dispatch គូស្នេហ៍មួយគូនេះបានប្រកាសពីការបែកបាក់របស់ពួកគេ។ ក្នុងអំឡុងឆ្នាំចាប់តាំងពីពេលនោះមក Karina បានផ្តោតលើសកម្មភាពតន្ត្រីរបស់នាង មិនដែលនិយាយពីទំនាក់ទំនងចាស់របស់នាងនៅក្នុងសកម្មភាពផ្សព្វផ្សាយនោះទេ៕

ទស្សនាវដ្ដី Forbes បានប៉ាន់ប្រមាណថាទ្រព្យសម្បត្តិរបស់តារាចម្រៀង និងជាតារាសម្តែង Selena Gomez មានចំនួន ៧០០លានដុល្លារ ដែលមិនទាន់បានចូលក្នុងចំណាត់ថ្នាក់មហាសេដ្ឋីដូចដែលបានរាយការណ៍ពីមុននោះទេ។

ថ្មីៗនេះ ទស្សនាវដ្ដី Forbes បានទាក់ទាញការចាប់អារម្មណ៍ នៅពេលដែលវាបានបោះពុម្ពអត្ថបទមួយដែលមានចំណងជើងថា «ហេតុអ្វីបានជា Selena Gomez មិនមែនជាមហាសេដ្ឋី?» នៅក្នុងការចុះផ្សាយនោះ Forbes បាននិយាយអំពីស្ថានភាពហិរញ្ញវត្ថុរបស់ក្រុមហ៊ុន Wondermind ដែលបង្កើតឡើងដោយតារាចម្រៀងនិងតារាសម្តែងជនជាតិអាម៉េរិក រូបនេះក៏ដូចជាការពិតអំពីទ្រព្យសម្បត្តិរបស់ Selena ដែលត្រូវបានគេនិយាយថាលើសពី ១ ពាន់លានដុល្លារក្នុងការវិភាគហិរញ្ញវត្ថុពីមុន។

នៅឆ្នាំ ២០២៤ Bloomberg បានប្រកាសថា Selena Gomez បានក្លាយជាមហាសេដ្ឋីដែលមានទ្រព្យសម្បត្តិសរុបប្រមាណ ១.៣ ពាន់លានដុល្លារ។ ប៉ុន្តែបើយោងតាមរបាយការណ៍ចុងក្រោយរបស់ Forbes ទ្រព្យសម្បត្តិរបស់នាងគឺត្រឹម តែ ៧០០លានដុល្លារប៉ុណ្ណោះ។ យ៉ាងណាមិញ តារាចម្រៀងរូបនេះ ស្ថិតក្នុងបញ្ជីស្ត្រី ដែលមានទ្រព្យសម្បត្តិច្រើនជាងគេបំផុតរបស់អាម៉េរិក និងជាតារាដែលមានទ្រព្យ សម្បត្តិច្រើនជាងគេ។
Forbes បានវិភាគថាទ្រព្យសម្បត្តិភាគច្រើនរបស់ Selena បានមកពីភាគហ៊ុន ៥១% របស់នាងនៅក្នុងក្រុមហ៊ុនគ្រឿងសំអាង Rare Beauty ដែលនាងបានបង្កើត ឡើងក្នុង ឆ្នាំ២០១៩។ ក្រុមហ៊ុនគ្រឿងសំអាងនេះធ្លាប់បានធ្វើឱ្យមានការរំជើបរំជួលជាមួយនឹង ប្រជាប្រិយភាពនៃក្រែមលាបមាត់។ ម៉ាកយីហោនេះបានរាយការណ៍ថាប្រាក់ចំណូល ៣៦៧លានដុល្លារនៅឆ្នាំ២០២៣ ។

ទស្សនាវដ្ដី Forbes បានវាយតម្លៃក្រុមហ៊ុនគ្រឿងសំអាងរបស់ Selena ប្រហែល ១.៣ ពាន់លានដុល្លារ ដោយផ្អែកលើមតិរិះគន់ពីអ្នកវិភាគឧស្សាហកម្មសម្រស់។ ប៉ុន្តែអ្នកជំនាញក៏កត់សម្គាល់ដែរថា ការវាយតម្លៃរបស់ក្រុមហ៊ុនបានធ្លាក់ចុះក្នុងរយៈពេលប៉ុន្មានខែចុងក្រោយនេះ។ បន្ថែមពីលើ Rare Beauty Selena រកបានប្រាក់ចំណេញប្រហែល ៩០ លានដុល្លារក្នុងរយៈពេលជាច្រើនឆ្នាំពីកម្មវិធីទូរទស្សន៍ តន្ត្រី កិច្ចសន្យាផ្សាយ ពាណិជ្ជកម្មម៉ាកយីហោ និងដំណើរទេសចរណ៍។

ក្នុងនោះ Selena ទទួលបាន ៣០ លានដុល្លារពីកិច្ចសហការឆ្នាំ ២០១៧ ជាមួយ Puma ។ ប្រាក់ចំណូលរបស់នាងប៉ាន់ស្មានចំនួន ២៤លានដុល្លារបានមកពីរឿងកំប្លែង ដែលឈ្នះពានរង្វាន់ Emmy ដែលមាន ចំណងជើងថា «Only Murders in the Building »ដែលនាងបានបម្រើការជាផលិតករប្រតិបត្តិ និងសម្តែង។ Selena ក៏មានតួនាទីសំខាន់ក្នុងភាពយន្តដែលទទួលបានពានរង្វាន់អូស្ការ «Emilia Pérez» ។ តួនាទីនេះក៏បានជួយឱ្យនាងទទួលបានការតែងតាំងសម្រាប់ពានរង្វាន់ Golden Globe សម្រាប់តួឯកស្រីដែលគាំទ្រល្អបំផុតក្នុងភាពយន្ត។ ហើយនាងគឺជាផលិតករប្រតិបត្តិក្នុងរឿងភាគដ៏ចម្រូងចម្រាសរបស់ Netflix «13 Reasons Why»។

អចលនទ្រព្យរបស់តារាចម្រៀងវ័យ ៣២ ឆ្នាំរូបនេះក៏ទាក់ទាញការចាប់អារម្មណ៍ផង ដែរ។ ក្នុងឆ្នាំ២០២០ Selena បានចំណាយប្រាក់ជិត ៥ លានដុល្លារលើផ្ទះ របស់នាង នៅ Encino ។ ថ្មីៗនេះនាងបានទិញអចលនទ្រព្យតម្លៃ ៣៥ លានដុល្លារនៅ Beverly Hills ជាមួយគូដណ្តឹងនិងផលិតករតន្ត្រី Benny Blanco ។

កាលពីមុន Forbes បានរាយការណ៍ថា Wondermind ដែលជាក្រុមហ៊ុនសុខភាពផ្លូវ ចិត្ត Selena Gomez បានបង្កើតជាមួយម្តាយរបស់នាងក្នុងឆ្នាំ ២០២១ បានប្រឈម នឹងបំណុលរាប់ម៉ឺនដុល្លារ។ នាយកប្រតិបត្តិរបស់ Wondermind ថែមទាំងបានប្រាប់ បុគ្គលិកថានាងត្រូវបញ្ចាំផ្ទះផ្ទាល់ខ្លួនរបស់នាង ដើម្បីរក្សាការចាប់ផ្ដើមអាជីវកម្មដែល កំពុងជួបការលំបាក។ វាមិនច្បាស់ទេថា លុយផ្ទាល់ខ្លួនរបស់នាង Selena Gomez បានវិនិយោគនៅក្នុង Wondermind ប៉ុន្មានឆ្នាំមកនេះ។ ប៉ុន្តែក្រុមហ៊ុនបានជួបការលំបាកក្នុងការស្វែងរកមូលនិធិ ហើយបានធ្លាក់ចុះលើប្រាក់ឈ្នួលបុគ្គលិក។

យោងតាមបុគ្គលិកមួយចំនួន Selena ស្ទើរតែមិនចូលរួមក្នុងការងាររបស់ Wondermind ដោយសារតែរវល់ការងារផ្ទាល់ខ្លួនរបស់នាង។ នាងបានថតរដូវកាលទី ៥ នៃ «Only Murders in the Building» នៅទីក្រុងញូវយ៉ក ហើយផ្តោតលើក្រុមហ៊ុន គ្រឿងសំអាង Rare Beauty ។ អ្នកជំនាញបានទស្សន៍ទាយថាក្រុមហ៊ុនគ្រឿងសំអាងនេះអាចទទួលបានភាពជោគជ័យលើសពីកេរ្តិ៍ឈ្មោះរបស់ Selena ៕