ប្រទេសអង់គ្លេស ៖ កាលពីថ្ងៃទី២៨ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា យុវជនម្នាក់នៅប្រទេសអៀរឡង់ខាងជើង ឈ្មោះ Ryan Luney បានធ្វើឱ្យពិភពលោកភ្ញាក់ផ្អើលយ៉ាងខ្លាំង ក្រោយពីបំបែកកំណត់ត្រាពិភពលោក (Guinness World Records) ដោយការលោតបង្វិលក្បាលចុះក្រោមពេលភ្លើងកំពុងឆាបឆេះពេញខ្លួនប្រាណ ចំនួន៧លើក និងចំណាយពេលត្រឹមតែ៣០វិនាទីប៉ុណ្ណោះ ។

លោក Ryan Luney អាយុ២៨ឆ្នាំ បានបំបែកកំណត់ត្រាពិភពលោកជាច្រើនលើក ដោយការស្លៀកឈុតការពារខ្លួនជាច្រើនជាន់ មុនពេលដុតភ្លើងលើរាងកាយ បន្ទាប់មក លោកក៏លោតបង្វិលក្បាលចុះក្រោមយ៉ាងឆាប់រហ័ស ។ លោកនិយាយមកកាន់ Guinness World Records ថា ៖ «ខ្ញុំបានយកសម្លៀកបំពាក់ជាច្រើនជាន់ទៅត្រាំក្នុងជែល និងយកវាទៅក្លាសេ ប្រមាណជាង២៤ម៉ោង ទើបខ្ញុំយកឈុតនេះមកស្លៀកដើម្បីការពារកំដៅ» ។

ពេលត្រៀមខ្លួនរួចរាល់ហើយ ក្រុមការងារជំនាញក៏យកភ្លើងមកដុតលើខ្លួនលោក Ryan Luney ហើយលោកក៏ចាប់ផ្តើមលោតបង្វិលក្បាលចុះក្រោមឱ្យបានលឿនបំផុត និងតស៊ូជាមួយអណ្តាតភ្លើងដែលកំពុងឆេះរាលដាលពេញខ្លួន ។ លោកផ្តោតតែម្យ៉ាងគត់ គឺកម្រើកខ្លួនឱ្យបាន ហើយបន្តកម្រើកខ្លួនជាបន្តបន្ទាប់យ៉ាងឆាប់រហ័ស ពីព្រោះបើនៅស្ងៀមអាចពិបាកដកដង្ហើម និងពិបាកធន់ជាមួយកំដៅភ្លើង ។

នៅទីបំផុត លោក Ryan Luney ក៏អាចបំបែកកំណត់ត្រាពិភពលោកដោយជោគជ័យ ដោយការលោតបង្វិលក្បាលចុះក្រោម ចំនួន៧លើក ពេលភ្លើងកំពុងឆេះពេញរាងកាយ និងចំណាយពេលត្រឹមតែ៣០វិនាទីប៉ុណ្ណោះ ។ ក្រោយមក ក្រុមការងារជំនាញក៏យកបំពង់ពន្លត់អគ្គិភ័យមកបាញ់ពន្លត់ភ្លើង និងយកកន្សែងមករុំលើខ្លួនលោកភ្លាមៗ សំណាងល្អ លោក Ryan Luney ពុំរងរបួសធ្ងន់ធ្ងរទេ បើទោះជារាងកាយទាំងមូលត្រូវភ្លើងឆេះក្តី ។

នេះជាការបង្ហាញសមត្ថភាពយ៉ាងក្លាហាន ប៉ុន្តែវាប្រឈមនឹងគ្រោះថ្នាក់ខ្លាំងបំផុត ។ ភាពក្លាហាននេះពុំគួរយកគំរូតាមដាច់ខាត ពីព្រោះបើខ្វះចំណេះដឹងពីវិធីការពារខ្លួនឱ្យមានសុវត្ថិភាព ឬធ្វេសប្រហែសតែបន្តិច គឺប្រឈមនឹងការស្លាប់ ៕

កាលពីថ្ងៃទី 28 ខែឧសភា ឆ្នាំ 2025 បានកើតមាននូវការបា.ក់រលំទឹកកកដ៏ធំមួយ (glacier) ដែលរលាយធ្លាក់មកពីលើភ្នំដែលស្ថិតនៅតំបន់ស្វីសអាល់ (Swiss Alps) ដែលបានបំ.ផ្លាញភូមិ Blatten ក្នុងតំបន់ Lötschental នៅខេត្ត Valais និងបង្កឲ្យប្រជាជនម្នាក់បានបា.ត់ខ្លួន។ នេះបើយោងតាមសារព័ត៌មាន BCC បានរាយការណ៍។

ភូមិ Blatten ដែលមានលំនៅដ្ឋានរបស់ប្រជាជនជាច្រើនត្រូវបានកប់ក្រោមគំនរទឹកកក និងថ្ម បន្ទាប់ពីផ្ទាំងទឹកកកដ៏ធំមួយបានធ្លា.ក់ចុះពីលើភ្នំ មកគ្របដណ្ដប់ពីលើភូមិស្ទើតែទាំងស្រុង។ គ្រោះមហន្តរាយនេះ គឺជាសុបិន្តអាក្រក់បំផុតសម្រាប់សហគមន៍នៅទូទាំងភ្នំអាល់។

លោក Matthias Bellwald ដែលជាអភិបាលក្រុង បាននិយាយថា «សំណាងល្អណាស់ ដែលអ្នកវិទ្យាសាស្រ្តបានព្យាករណ៍ដឹងមុនពីហេតុការនេះ។ ពួកយើងបានជម្លៀសអ្នកភូមិជាង 300នាក់ឲ្យចេញពីទីនោះ កាលពី9ថ្ងៃមុន ប៉ុន្តែទោះជាយ៉ាងណា ពេលនេះមានសេចក្ដីរាយការណ៍ថា មានបុរសចំណាស់វ័យ 64ឆ្នាំម្នាក់ត្រូវបានបា.ត់ខ្លួន ចំណែកការស្វែងរកជួយសង្រ្គោះពេលនេះគឺមិនអាចពន្លឿនបានទេ ដោយសារស្ថានភាពគ្រោះថ្នាក់ខ្លាំងពេក។»

អ្នកជំនាញថា កត្តាធំៗដែលនាំឲ្យមានការរលំទឹកកកនេះកើតឡើងដោយសារតែបម្លាស់ប្តូរអាកាសធាតុ ដែលធ្វើឱ្យបរិស្ថានភ្នំខ្ពស់កាន់តែមានអស្ថិរភាព និងចុះខ្សោយ។ ហើយកត្តាទាំងនេះបណ្ដាលមកពីចំណុចផ្សុំដូចជា ៖ ការរលាយផឺម៉ាហ្វ្រូស (Permafrost), ការរលាយទឹកកកលឿនពេក, ការមានទឹកជ្រៀតចូលក្នុងថ្មនិងទឹកកក ដោយសារមានភ្លៀងធ្លាក់ច្រើន និងអាកាសធាតុក្ដៅជាងមុន។ អ្នកវិទ្យាសាស្រ្តបានសង្កេតមើលពីចំណុចទាំងនេះអស់រយៈពេលជាយូរឆ្នាំមកហើយ ដូច្នេះទើបបានជាពួកគេបានចេញសេចក្ដីព្រមានឲ្យប្រជាជននាំគ្នាចាកចេញ ដើម្បីចៀសវាងការបាត់បង់ជីវិត។

ចំពោះរបាយការណ៍ចុងក្រោយបង្អស់នាពេលថ្មីៗនេះតាមរយៈការបង្ហោះដ្រូនបានបង្ហាញថា ទឹកកកដែលមាននៅលើភ្នំក្នុងតំបន់នេះ នឹងរលាយអស់ទាំងស្រុងក្នុងរយៈពេលមួយសតវត្សខាងមុខ ប្រសិនបើសីតុណ្ហភាពសកលបន្តកើនឡើង 1.5អង្សាសេទៀត៕

ប្រទេសថៃ ៖ កាលពីថ្ងៃទី២៩ ខែឧសភា ឆ្នាំ២០២៥ សារព័ត៌មានថៃ Khaosod រាយការណ៍ថា ក្រោយពីពលរដ្ឋថៃ និងភ្ញៀវទេសចរបរទេសរអ៊ូរទាំរឿងរថយន្តតាក់ស៊ីថៃនៅទីក្រុងបាងកក ទារថ្លៃខ្ពស់កប់ពពក នារីជ.នជាតិថៃម្នាក់បានបន្លំខ្លួនធ្វើជាភ្ញៀវទេសចរបរទេសហៅរថយន្តតាក់ស៊ីជិះទៅសាយ៉ាម គឺជាតំបន់ពាណិជ្ជកម្មដ៏សំខាន់នៅកណ្តាលទីក្រុងបាងកក ក្នុងចម្ងាយផ្លូវ១០គីឡូម៉ែត្រ ។ នាងហួសចិត្តយ៉ាងខ្លាំង ដោយសាររថយន្តតាក់ស៊ីដែលនាងហៅជិះទារថ្លៃខ្ពស់រហូតដល់៧០០បាត (ឬស្មើ២១ដុល្លារ) ថ្លៃជាងរថយន្តប្រើប្រាស់ App ។

បច្ចុប្បន្ន បញ្ហាតាក់ស៊ី និងរថយន្តប្រើប្រាស់ App បានក្លាយជាប្រធានបទជជែកគ្នាយ៉ាងខ្លាំងនៅប្រទេសថៃ ក្រោយពីក្រុមអ្នកបើកបរតាក់ស៊ីប្រមូលផ្តុំគ្នាតវ៉ានៅមុខវិមានរដ្ឋាភិបាល ដើម្បីសុំឱ្យរដ្ឋាភិបាលដោះស្រាយបញ្ហា និងផ្តល់ភាពយុត្តិធម៌សម្រាប់ក្រុមតាក់ស៊ី ដែលត្រូវរថយន្តប្រើប្រាស់ App ដណ្តើមម៉ូយ ។ រដ្ឋាភិបាលថៃបានអនុញ្ញាតឱ្យរថយន្ត Grab បង្កើតទីតាំងដឹកអ្នកដំណើរនៅបរិវេណអាកាសយានដ្ឋានសុវណ្ណភូមិ ហើយអ្នកបើកតាក់ស៊ីយល់ថា អ្នកដំណើរបានហៅរថយន្ត Grab ជិះច្រើនជាងតាក់ស៊ី ទើបតាក់ស៊ីចាញ់ប្រៀប ។

អ្នកប្រើប្រាស់បណ្តាញសង្គមមួយចំនួននៅប្រទេសថៃនិយាយថា ការហៅរថយន្តណាមួយជិះ គឺជាសិទ្ធិរបស់អ្នកដំណើរ ហើយពួកគេក៏បានលើកឡើងពីបញ្ហាតាក់ស៊ីបដិសេធការដឹកភ្ញៀវផងដែរ ។ លើសពីនេះ តាក់ស៊ីតែងតែទារថ្លៃជិះពីភ្ញៀវខ្ពស់ខ្លាំង ដោយពុំគិតតម្លៃតាមចម្ងាយផ្លូវ ជាពិសេស ទារថ្លៃខ្ពស់ពីភ្ញៀវទេសចរបរទេស ។

កាលពីថ្ងៃទី២៩ ខែឧសភា ឆ្នាំ២០២៥ គណនីហ្វេសប៊ុកមួយឈ្មោះ «Ketmanee Bualuang» បានស្លៀកពាក់តុបតែងខ្លួនបន្លំជាភ្ញៀវទេសចរបរទេស និងហៅតាក់ស៊ីជិះទៅតំបន់សាយ៉ាម ស្មើចម្ងាយផ្លូវ១០គីឡូម៉ែត្រ ។ នៅពេលនាងឡើងជិះតាក់ស៊ី ស្រាប់តែអ្នកបើកតាក់ស៊ីទារថ្លៃខ្ពស់ជាងថ្លៃការហៅរថយន្ត Grab ទៅទៀត ។

ម្ចាស់គណនីហ្វេសប៊ុករូបនេះនិយាយថា នាងបានហៅតាក់ស៊ី ចំនួន៣គ្រឿង ជិះទៅតំបន់សាយ៉ាម ក្នុងនោះតាក់ស៊ីទី១ ទារថ្លៃ២០០បាត, តាក់ស៊ីទី២ ទារថ្លៃ៣០០បាត ហើយទារថ្លៃខ្ពស់បំផុត គឺតាក់ស៊ីទី៣ ទាររហូតដល់៧០០បាត (ឬស្មើ២១ដុល្លារ) ក្នុងចម្ងាយផ្លូវត្រឹមតែ១០គីឡូម៉ែត្រ ។

ពលរដ្ឋថៃបានរិះគន់យ៉ាងខ្លាំងក្នុងបណ្តាញសង្គមពាក់ព័ន្ធនឹងតាក់ស៊ីថៃពុំគិតតម្លៃតាមចម្ងាយផ្លូវ ទាមទារថ្លៃខ្ពស់ពីអ្នកដំណើរ និងបដិសេធពុំដឹកអ្នកដំណើរ បើអ្នកដំណើរពុំយល់ព្រមតាមការទាមទាររបស់ខ្លួន ។ ផ្ទុយទៅវិញ ការជិះរថយន្តប្រើប្រាស់ App ដូចជា ៖ រថយន្ត Grab គឺអ្នកដំណើរមានភាពងាយស្រួល និងដឹងតម្លៃច្បាស់លាស់ជាងតាក់ស៊ី ។ ពលរដ្ឋថៃសំណូមពរឱ្យតាក់ស៊ីទាំងអស់កែប្រែទម្លាប់មិនល្អចេញ បើចង់ឱ្យអ្នកដំណើរមានទំនុកចិត្ត ៕

ប្រទេសថៃ ៖ តាមការចេញផ្សាយរបស់សារព័ត៌មានថៃ Daily News ឱ្យដឹងថា កងទ័ពថៃមកពីកងកម្លាំងស៊ុណារី បានត្រួតពិនិត្យការឆ្លងដែនយ៉ាងតឹងរ៉ឹងនៅច្រកទ្វារព្រំដែនអន្តរជាតិអូរស្មាច់ ខេត្តឧត្តរមានជ័យ ហៅច្រកឆងចម ជាប់ខេត្តសុរិន្ទ ប្រទេសថៃ ក្រោយពីមានការប៉ះទង្គិចគ្នាដោយអាវុ.ធ រវាងកងទ័ពកម្ពុជា និងថៃ កាលពីព្រឹកថ្ងៃទី២៨ ខែឧសភា ឆ្នាំ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ជាប់ខេត្តឧប៊ុនរ៉ាជធានី ។ ពលរដ្ឋថៃរស់នៅក្បែរព្រំដែនបារម្ភពីស្ថានការណ៍ព្រំដែន ប៉ុន្តែជឿជាក់ថា គ្រប់យ៉ាងនឹងល្អប្រសើរឡើងវិញ ខណៈអាជ្ញាធរមូលដ្ឋានត្រៀមរថយន្តជម្លៀសពលរដ្ឋ ។

ក្រោយពីមានការប៉ះទង្គិចដោយអាវុធរវាងកងទ័ពកម្ពុជា និងថៃ កាលពីព្រឹកថ្ងៃទី២៨ ខែឧសភា ឆ្នាំ២០២៥ ស្ថិតនៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ នាថ្ងៃទី២៩ ខែឧសភា វេលាម៉ោង៣និង៣០នាទីរសៀល នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង មេបញ្ជាការកងទ័ពជើងគោកនៃកងយោធពលខេមរភូមិន្ទ និងនាយឧត្តមសេនីយ៍ Pana Klaewblaudtuk មេបញ្ជាការកងទ័ពជើងគោកភូមិន្ទថៃ បានជួបចរចានៅការិយាល័យទំនាក់ទំនងកិច្ចការព្រំដែនកម្ពុជា-ថៃ នៅច្រកព្រំដែនអូរស្មាច់-ឆងចម ដើម្បីដោះស្រាយបញ្ហា និងទទួលយកនូវ៤ចំណុច ។

ចំណែកបរិយាកាសនៅច្រកទ្វារព្រំដែនអន្តរជាតិអូរស្មាច់-ឆងចម មានសភាពស្ងប់ស្ងាត់ កងទ័ពថៃមកពីកងកម្លាំងស៊ុណារី បានត្រួតពិនិត្យការឆ្លងដែនយ៉ាងតឹងរ៉ឹង ហើយពុំអនុញ្ញាតឱ្យអ្នកសារព័ត៌មានចូលមកថតរូបទេ និងឱ្យអ្នកសារព័ត៌មានទៅកាន់មជ្ឈមណ្ឌលបណ្តុះបណ្តាលវិជ្ជាជីវៈពលរដ្ឋនៅព្រំដែនខេត្តសុរិន្ទ ។

ដោយឡែក ពលរដ្ឋថៃរស់នៅឆ្ងាយពីព្រំដែនកម្ពុជា-ថៃ ប្រមាណ៣គីឡូម៉ែត្រ ព្រួយបារម្ភពីការត្រួតពិនិត្យការឆ្លងដែនយ៉ាងតឹងរ៉ឹងពីសំណាក់កងទ័ពថៃ និងបារម្ភពីស្ថានការណ៍ព្រំដែន ប៉ុន្តែជឿជាក់ថា ស្ថានការណ៍នឹងល្អប្រសើរឡើងវិញ ។

អ្នកស្រី យីន ថងប៉ិន អាយុ៥៦ឆ្នាំ រស់នៅឃុំដាន ស្រុកកាបឈឺង ខេត្តសុរិន្ទ និយាយថា អ្នកស្រីភ័យខ្លាច បើមានការប៉ះទង្គិចគ្នានៅព្រំដែន ។ អាជ្ញាធរមូលដ្ឋានបានដើរប្រាប់ពលរដ្ឋគ្រប់ផ្ទះឱ្យត្រៀមខ្លួន ករណីមានការប៉ះទង្គិចកើតឡើង ដោយអាជ្ញាធរបានត្រៀមរថយន្តទុកជម្លៀសអ្នកភូមិទៅកន្លែងមានសុវត្ថិភាព ហើយអាជ្ញាធរឱ្យអ្នកភូមិទាំងអស់ប្រមូលទ្រព្យសម្បត្តិ មាសប្រាក់ សម្ភារៈប្រើប្រាស់ចាំបាច់ និងរបស់មានតម្លៃដាក់តាមខ្លួន ។

ដូចគ្នានេះ អ្នកស្រី បួរីន ថងម៉ាក អាយុ៣៨ឆ្នាំ រស់នៅឃុំដាន ស្រុកកាបឈឺង ខេត្តសុរិន្ទ និយាយថា អ្នកស្រីព្រួយបារម្ភពីបញ្ហានេះ ប៉ុន្តែអ្នកស្រីជឿជាក់ថា អ្វីៗគ្រប់យ៉ាងនឹងល្អប្រសើរឡើងវិញ ៕