ថៃ បានស្នើឱ្យគណកម្មការអូឡាំជាតិពិកកម្ពុជា កាត់បន្ថយចំនួនអតីតពលិក សម្រាប់ចូលរួមព្រឹត្តិការណ៍សុីហ្គមេលើកទី៣៣ ដែលថៃធ្វើជាម្ចាស់ផ្ទះ។

តាមរយៈលោក Chaipak Siriwat នាយកប្រតិបត្តិសហព័ន្ធកីឡាអាស៊ីអាគ្នេយ៍ បានស្នើឱ្យកម្ពុជាកាត់បន្ថយចំនួនអត្តពលិកមិនឱ្យលើស២០០នាក់។

លោក Chaipak Siriwat បានបញ្ជាក់ថា៖” កម្ពុជាបានបញ្ជូនបញ្ជីឈ្មោះអត្តពលិកចំនួន៦០០នាក់ និងមន្ត្រីជាង១០០នាក់ សម្រាប់សុីហ្គេមលើកទី៣៣នេះ”។

ក៏ប៉ុន្តែ ដោយសារតែមានការព្រួយបារម្ភអំពីស្ថានការណ៍នយោបាយរវាងប្រទេសទាំងពីរ ម្ចាស់ផ្ទះថៃ ស្នើឱ្យកាត់បន្ថយចំនួនអត្តពលិក ដើម្បីឱ្យម្ចាស់ផ្ទះថៃ ធានាឱ្យបានសុវត្ថិភាពលើក្រុមកម្ពុជា។

តែយ៉ាណាមិញ គិតមកដល់ពេលនេះ គណៈកម្មាធិការជាតិអូឡាំពិកកម្ពុជា មិនទាន់បានចេញសេចក្តីជូនដំណឹងផ្លូវការណាមួយ ជុំវិញការបញ្ជូនអត្តពលិក ម្រាប់ការទៅចូលរួមការប្រកួតស៊ីហ្គេម លើកទី៣៣ នៅប្រទេសថៃ៕

កូរ៉េខាងត្បូង៖ កូរ៉េខាងត្បូងបានបញ្ជាក់ថា ខ្លួនបានធ្វើការបា.ញ់ព្រ.មានដោយកាំភ្លើងយន្តចំនួន ១០គ្រាប់ដើម្បីជាការព្រ.មាន ខណៈមានទាហានរបស់កូរ៉េខាងជើងបានដើរឆ្លងកាត់ព្រំដែនចូលអធិបតេយ្យកូរ៉េខាងត្បូង ចំទីតាំងដែលមានការពង្រឹងយ៉ាងខ្លាំងរវាងប្រទេសទាំងពីរ។ កូរ៉េខាងជើងបានចាត់ទុកការបា.ញ់ព្រ.មាននេះថា គឺជាការគំរា.មកំហែងដល់សន្តិសុខព្រំដែនយ៉ាងធ្ងន់ធ្ងរ។

យោងតាមការចុះផ្សាយរបស់សារព័ត៌មាន BBC នៅថ្ងៃទី២៣ ខែសីហា ឆ្នាំ២០២៥ បានឲ្យដឹងថា ឧប្បត្តិហេតុនេះត្រូវបានផ្សព្វផ្សាយជាសាធារណៈ នៅពេលដែលប្រធានាធិបតីកូរ៉េខាងត្បូងថ្មី លោក Lee Jae Myung បានចាកចេញពីទីក្រុងសេអ៊ូលកាលពីថ្ងៃសៅរ៍មុន សម្រាប់ដំណើរទស្សនកិច្ចទៅកាន់ទីក្រុងតូក្យូ និងវ៉ាស៊ីនតោន។

ឧត្តមសេនីយ៍ឯក Ko Jong Chol នៃកងទ័ពកូរ៉េខាងជើង បាននិយាយថា យោធារបស់កូរ៉េខាងត្បូង បានប្រើប្រាស់កាំភ្លើងយន្ត ដើម្បីបា.ញ់ព្រមានជាង១០គ្រាប់ ទៅកាន់ទាហានរបស់ខ្លួន។ ប្រព័ន្ធផ្សព្វផ្សាយរដ្ឋកូរ៉េខាងជើងបានហៅការបាញ់ប្រហារនោះថាជា “ការបង្កហេតុដោយចេតនា” ហើយរដ្ឋាភិបាលទីក្រុងព្យុងយ៉ាងរបស់កូរ៉េខាងជើង បានចោទប្រកាន់កូរ៉េខាងត្បូងថាបានបង្ហហានិភ័យនៃភាពតានតឹងដែលមិនអាចគ្រប់គ្រងបានរវាងប្រទេសទាំងពីរ។

ចំណែក អគ្គសេនាធិការចម្រុះរបស់កូរ៉េខាងត្បូង (JCS) បាននិយាយនៅក្នុងសេចក្តីថ្លែងការណ៍មួយថា ការបា.ញ់ព្រ.មាននេះ គឺកើតឡើងដោយសារតែទាហានកូរ៉េខាងជើងមួយចំនួន បានឆ្លងកាត់ខ្សែបន្ទាត់ព្រំដែនយោធារវាងប្រទេសទាំងពីរនៅម៉ោងប្រហែល 15:00 ម៉ោងក្នុងស្រុកនៅទីក្រុងសេអ៊ូលកាលពីថ្ងៃអង្គារ ទី១៩ សីហា។ កូរ៉េខាងត្បូងចោ.ទប្រកាន់បកវិញថា សកម្មភាពរបស់ទាហានខាងជើងទាំងនេះ គឺជាការប៉ុនប៉ងរំលោ.ភលើអធិបតេយ្យភាពត្បូង។

គួរជម្រាបថា ប្រទេសកូរ៉េទាំងពីរបានបែ.កបាក់គ្នាចាប់តាំងពីសង្គ្រាមកូរ៉េបានបញ្ចប់នៅឆ្នាំ 1953។ មួយវិញទៀត បើទោះបីជាពួកគេបានផ្អាកសកម្មភាពបា.ញ់ផ្លោងដាក់គ្នាទៅវិញទៅមកអស់រយៈពេលជាច្រើនឆ្នាំមកហើយក្ដី ប៉ុន្តែហានិភ័យក្នុងការអាចកើតមានសង្រ្គាមម្ដងទៀតគឺនៅតែមានខ្ពស់ ព្រោះភាគីទាំងពីរមិនបានចុះហត្ថលេខាលើសន្ធិសញ្ញាសន្តិភាពណាមួយនោះទេ៕

មេដឹកនាំក្រុម Hacker ដែលលួចទ្រព្យសម្បត្តិដោយខុសច្បាប់ពីជនជាតិកូរ៉េជាច្រើន រួមទាំង Jungkook សមាជិក BTS ត្រូវបានចាប់ខ្លួននៅឯប្រទេសថៃបន្ទាប់ពីចូលទៅសំងំលាក់ខ្លួននៅប្រទេសនេះកាលពីខែមេសា។

យោងតាមប្រព័ន្ធផ្សព្វផ្សាយកូរ៉េជនសង្ស័យជាជនជាតិចិនម្នាក់មានអាយុ៣៤ឆ្នាំ ត្រូវបានចោទប្រកាន់ថាជាមេដឹកនាំនៃ បណ្តាញ ឧក្រិដ្ឋកម្មតាមអ៊ីនធឺណិត ទ្រង់ទ្រាយធំ ដែលមានគោលបំណងស្វែងរកទ្រព្យសម្បត្តិសមរម្យពីជនជាតិកូរ៉េដែលមានទ្រព្យសម្បត្តិ រួមទាំងនាយកប្រតិបត្តិសាជីវកម្ម និងតារាល្បីត្រូវបានចាប់ខ្លួននៅក្នុងប្រទេសថៃ និងធ្វើបត្យាប័នទៅកាន់ទីក្រុងសេអ៊ូល (កូរ៉េខាងត្បូង)។

យោងតាមក្រសួងយុត្តិធម៌កូរ៉េខាងត្បូង ជនជាតិចិននោះបានបង្កើតអង្គការហេកឃ័រនៅបរទេសហើយបានប្រមូលព័ត៌មានផ្ទាល់ខ្លួនដោយខុសច្បាប់ដោយការលួចចូលគេហទំព័ររបស់ក្រុមហ៊ុនទូរសព្ទចល័តកូរ៉េចាប់ពីខែសីហា ឆ្នាំ២០២៣ ដល់ខែមករា ឆ្នាំ២០២៤។

ពួក Hacker បានប្រើប្រាស់ព័ត៌មានដែលប្រមូលបានដើម្បីចុះឈ្មោះទូរសព្ទចល័តក្នុងនាមអ្នកដទៃ បន្ទាប់មកបានចូលទៅកាន់គណនីហិរញ្ញវត្ថុ និងទ្រព្យសម្បត្តិនិម្មិតរបស់ជនរងគ្រោះទៅកាន់ទ្រព្យសម្បត្តិសមស្រប។ ការខូចខាតសរុបមានចំនួនជាង ៣៨ពាន់លានវ៉ុន ប្រមាណ២៩លានដុល្លារអាម៉េរិក។ ជនរងគ្រោះត្រូវបានគេនិយាយថារួមមានតារាល្បីៗដូចជា Jungkook សមាជិកក្រុម BTS និងបុគ្គលដែលមានទ្រព្យសម្បត្តិផ្សេងទៀតដូចជាប្រធានក្រុម និងនាយកប្រតិបត្តិក្រុមហ៊ុនបណ្តាក់ទុនរួមគ្នា។

ក្នុងករណីរបស់ Jungkook មិនយូរប៉ុន្មានបន្ទាប់ពីលោកបានចូលបម្រើយោធាកាលពីខែមករាកន្លងទៅ ពួក Hacker បានលួចភាគហ៊ុន HYBE ចំនួន ៣៣,៥០០ ពីគណនីមូលបត្ររបស់តារាចម្រៀងរូបនេះ ដែលមានតម្លៃប្រហែល ៨.៤ ពាន់លានវ៉ុន (ប្រហែលជាង៦លានដុល្លារ)។ ពួក Hacker បានលក់ភាគហ៊ុនចំនួន ៥០០ដែលមានតម្លៃប្រហែល ១២៦ លានវ៉ុនទៅឱ្យភាគីទីបី។

ទោះជាយ៉ាងណាក៏ដោយ ក្រុមហ៊ុនគ្រប់គ្រងរបស់ BTS គឺBig Hit Music បានបង្កកគណនីយ៉ាងឆាប់រហ័ស ដោយការពារការខាតបង់បន្ថែមទៀត។ ក្រុមមេធាវីរបស់ Jungkook ក៏បានដាក់ពាក្យប្ដឹងទាមទារយកភាគហ៊ុននេះមកវិញដែរ។ តុលាការក្រុងសេអ៊ូលខាងលិច ក្រោយមកបានកាត់ក្តីឱ្យតារាចម្រៀងរូបនេះ ដោយប្រកាសថា គ្មានការផ្ទេរស្របច្បាប់ណាមួយបានកើតឡើង និងបញ្ជាឱ្យអ្នកទិញយកភាគហ៊ុនមកវិញ។

អ្នកស៊ើបអង្កេតប៉ូលីសក្រុងសេអ៊ូល ដែលធ្វើការជាមួយ Interpol បានតាមដានចលនារបស់ ជនសង្ស័យហើយបានរកឃើញថាជនជាតិចិនរូបនេះបានចូលប្រទេសថៃក្នុងខែមេសា។ បន្ទាប់មកអាជ្ញាធរកូរ៉េខាងត្បូងបានស្នើសុំការចាប់ខ្លួនបណ្តោះអាសន្នរបស់ជនសង្ស័យនៅក្នុងប្រទេសថៃដែលកំពុងរង់ចាំការធ្វើបត្យាប័ន ដែលជាយន្តការផ្លូវច្បាប់ដែលអនុញ្ញាតឱ្យមានការចាប់ខ្លួនជនសង្ស័យជាបន្ទាន់ មុនពេលសំណើធ្វើបត្យាប័នជាផ្លូវការត្រូវបានធ្វើឡើង។ មន្ត្រីថៃបានឃុំខ្លួនជនជាតិចិននេះរយៈពេលពីរសប្តាហ៍បន្ទាប់មកបានបញ្ជូនជនសង្ស័យនេះទៅកូរ៉េខាងត្បូង៕

ប្រទេសថៃ ៖ កងទ័ពភូមិភាគ២ថៃ បានសរសរក្នុងហ្វេសប៊ុកផេកពីស្ថានការណ៍ព្រំដែនកម្ពុជា-ថៃកាលពីល្ងាចថ្ងៃទី២២ ខែសីហា និងចោទប្រកាន់ថា កងកម្លាំងពិសេសកម្ពុជា (BHQ) បង្កប់មីនថ្មីនៅខាងលិចភ្នំ៣៥០ ដែលស្ថិតនៅឆ្ងាយពីទីតាំងប្រតិបត្តិការរបស់កងទ័ពថៃប្រមាណ១០០ម៉ែត្រ ហើយកងទ័ពថៃបានទៅពិនិត្យមើលតំបន់នេះឃើញថា ជាមីន PMN-2 ។ នេះបើតាមការផ្សព្វផ្សាយរបស់សារព័ត៌មាន Thairath នៅថ្ងៃទី២៣ ខែសីហា ឆ្នាំ២០២៥ ។

នៅថ្ងៃទី២៣ ខែសីហា កងទ័ពភូមិភាគ២ថៃបានសរសេរក្នុងហ្វេសប៊ុកផេកពីស្ថានការណ៍ព្រំដែនកម្ពុជា-ថៃថា នាវេលាម៉ោង៤ល្ងាច ថ្ងៃទី២២ ខែសីហា កងទ័ពថៃប្រទះឃើញកងទ័ពកម្ពុជា ពី២នាក់ ទៅ៣នាក់ និងសន្និដ្ឋានថា គឺជាកងកម្លាំងពិសេសកម្ពុជា (BHQ) ដោយសារពាក់មួកសុវត្ថិភាពពណ៌ខ្មៅ បានបង្កប់មីនថ្មីនៅខាងលិចតំបន់ភ្នំ៣៥០ ក្នុងឃុំបាក់ដៃ ស្រុកភ្នំដងរ៉ាក់ ខេត្តសុរិន្ទ ដែលស្ថិតនៅឆ្ងាយពីទីតាំងប្រតិបត្តិការរបស់កងទ័ពថៃ ប្រមាណ១០០ម៉ែត្រ ។

ពេលកងទ័ពថៃទៅពិនិត្យមើលក្នុងតំបន់ឃើញថា មីនដែលទើបបង្កប់នេះប្រភេទ PMN-2 ចំនួន១គ្រាប់ ហើយកងទ័ពថៃក៏ប្រើប្រាស់ឧបករណ៍រាវមីនយ៉ាងលម្អិត និងកំណត់សញ្ញាសម្គាល់សម្រាប់ក្រុមរុករកមីនចាត់វិធានការបន្ត ។ ថៃចាត់ទុកថា កងទ័ពកម្ពុជានៅតែបន្តបង្កប់មីនប្រឆាំងមនុស្សក្នុងដែនអធិបតេយ្យរបស់ថៃ ដែលជាការបំពានកិច្ចព្រមព្រៀងបទឈប់បាញ់ និងល្មើសសន្ធិសញ្ញាអូតាវ៉ាជាបន្តបន្ទាប់ ។ កងទ័ពថៃបន្តតាមដានស្ថានការណ៍យ៉ាងដិតដល់ និងត្រៀមខ្លួនការពារអធិបតេយ្យជាតិដើម្បីសន្តិភាព សម្រាប់ជាតិ សាសនា ព្រះមហាក្សត្រ និងប្រជាជន ។

កងទ័ពថៃនៅតែចោទប្រកាន់ដដែលៗថា កម្ពុជាបង្កប់មីនថ្មីក្នុងទឹកដីរបស់ខ្លួន បើទោះជាអាជ្ញាធរមីនកម្ពុជាបានបដិសេធ និងច្រានចោលទាំងស្រុងចំពោះការចោទប្រកាន់ក្តី ។ កម្ពុជានៅតែរក្សាជំហរម៉ឺងម៉ាត់ គឺគ្មានការប្រើប្រាស់មីនថ្មីជាដាច់ខាត កម្ពុជាមានមោទកភាពក្នុងនាមជារដ្ឋភាគីអនុសញ្ញាហាមប្រាមការប្រើប្រាស់មីនប្រឆាំងមនុស្ស ដែលកម្ពុជាបានផ្តល់សច្ចាប័នក្នុងឆ្នាំ១៩៩៩ ។ កម្ពុជាត្រូវបានទទួលស្គាល់ជាអន្តរជាតិចំពោះសមិទ្ធផលការបោសសម្អាតមីន និងគ្មានការប្រើប្រាស់មីនប្រឆាំងមនុស្សឡើយ ។

មកដល់ពេលនេះ មិនទាន់មានការស៊ើបអង្កេតផ្លូវការ និងមានតម្លាភាព ដើម្បីបញ្ជាក់ការពិតនៅឡើយពាក់ព័ន្ធនឹងបញ្ហានេះ ។ ដូច្នេះ គ្រប់ភាគីពាក់ព័ន្ធគួរចៀសវាងធ្វើសេចក្តីថ្លែងការណ៍ជាសាធារណៈណាមួយ ។ ការចោទប្រកាន់ដោយគ្មានការពិតនឹងប៉ះពាល់យ៉ាងខ្លាំងចំពោះស្មារតីបទឈប់បាញ់ និងបាត់ទំនុកចិត្តរវាងគ្នានិងគ្នាក្នុងស្ថានភាពនេះ ។ កម្ពុជាសង្ឃឹមថា ភាគីថៃនឹងគោរពបាននូវចំណុចឯកភាពគ្នាក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ជាពិសេស ចំណុចទី២ ដែលចែងថា ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការមិនដើរល្បាតហួសពីទីតាំងរបស់ខ្លួនឈរជើងឡើយ ៕

ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ីបានបង្ហាញគម្រោងឈ្មោះ «Laut Sebasah» ឬគម្រោង «Waste-Free Healthy Oceans» ដែលមានគោលដៅកាត់បន្ថយបរិមាណសំរាមក្នុងសមុទ្រ និងប្រភពទឹកផ្សេងៗរហូតដល់៧០% នៅឆ្នាំ២០២៩ ។ គម្រោងនេះនឹងផ្តោតលើការកាត់បន្ថយសំរាមនៅកន្លែងសំខាន់ៗ ដូចជា ៖ ទន្លេ ឆ្នេរសមុទ្រ កោះតូចៗ និងកំពង់ផែ ដែលមានក្រសួងកិច្ចការសមុទ្រ និងនេសាទ ទទួលខុសត្រូវអនុវត្តគម្រោងចូលរួមសហការពីក្រសួងផ្សេងៗ ។

អនុរដ្ឋមន្ត្រីក្រសួងកិច្ចការសមុទ្រ និងនេសាទឥណ្ឌូណេស៊ី លោក Didit Herdiawan និយាយថា សំរាមក្នុងសមុទ្រនៅតែជាបញ្ហាចម្បងនៅប្រទេសឥណ្ឌូណេស៊ី ហើយគម្រោងនេះនឹងអាចជួយកាត់បន្ថយសំរាមក្នុងសមុទ្រ ទន្លេ ឆ្នេរសមុទ្រ កោះ និងកំពង់ផែ ក្នុងបរិមាណយ៉ាងច្រើន ។

ក្រៅពីនេះ ក្រសួងកិច្ចការសមុទ្រនឹងសហការជាមួយក្រសួងផ្សេងៗ ស្ថាប័នរដ្ឋាភិបាល មន្ត្រីរដ្ឋាភិបាលថ្នាក់ខេត្ត អង្គការក្រៅរដ្ឋាភិបាល ស្ថាប័នអប់រំ និងផ្នែកឯកជន ដើម្បីប្រឆាំងនឹងការបំពុលក្នុងសមុទ្រដែលប៉ះពាល់ដោយផ្ទាល់ដល់សត្វក្នុងសមុទ្រ ការនេសាទ និងការរស់នៅតាមឆ្នេរសមុទ្ររបស់ពលរដ្ឋ ។ នេះជាការតាំងចិត្តអនុវត្តគម្រោងកាត់បន្ថយសំរាមក្នុងទឹកសាបកុំឱ្យហូរធ្លាក់ចូលសមុទ្រ ។

ឥណ្ឌូណេស៊ីជាប្រទេសស្ថិតនៅក្បែរទីតាំងសំរាមដ៏ធំក្នុងមហាសមុទ្រប៉ាស៊ីហ្វិក ដែលជាតំបន់ប្រមូលផ្តុំសំរាមយ៉ាងច្រើនសន្ធឹកសន្ធាប់ក្នុងសមុទ្រលើពិភពលោក ។ ឥណ្ឌូណេស៊ីក៏ស្ថិតក្នុងចំណាត់ថ្នាក់ទី៥ផងដែរ គឺជាប្រទេសមានសំរាមច្រើនបំផុតលើពិភពលោក ដែលរដ្ឋាភិបាលឥណ្ឌូណេស៊ីត្រូវមានវិធានការកម្ចាត់សំរាម ។

យោងតាមទិន្នន័យក្នុងប្រព័ន្ធព័ត៌មានគ្រប់គ្រងកាកសំណល់ជាតិ គឺឥណ្ឌូណេស៊ីនឹងមានសំរាមរហូតដល់ជាង៥០លានតោននៅចុងឆ្នាំ២០២៥ ។ ដូច្នេះ បើគ្មានវិធានការកម្ចាត់សំរាមទេនោះ សំរាមនៅឥណ្ឌូណេស៊ីរហូតដល់២០លានតោននឹងហូរចូលក្នុងសមុទ្រ ព្រមទាំងគំរាមកំហែងយ៉ាងធ្ងន់ធ្ងរដល់ជីវៈចម្រុះ និងប្រព័ន្ធអេកូឡូស៊ី ៕

បាងកក៖ ក្រោយទាហានខ្លួនដើរជាន់មីនដាច់ជើងញឹកពេក ថៃស្រាប់តែនឹកឃើញគំនិតថ្មី នោះគឺការបង្កើតស្បែងជើងពិសេសមួយប្រភេទ សម្រាប់ចែកឲ្យទាហានពាក់ការពារជៀសវាងការដើរជាន់មីន ឬកាត់បន្ថយកម្លាំងផ្ទុះប្រសិនបើបានជាន់។ នេះបើយោងតាមសារព័ត៌មាន The Nation កាលពីថ្ងៃទី២២ ខែសីហា ឆ្នាំ២០២៥។

លោក Wuttipong Phongsuwan សមាជិកព្រឹទ្ធសភា និងជាសមាជិកនៃគណៈកម្មាធិការកិច្ចការយោធាថៃបានឲ្យដឹថា គាត់និងក្រុមរបស់គាត់បានសិក្សាស្រាវជ្រាវគំរូស្បែកជើងការពារមួយប្រភេទ ដែលត្រូវបានគេដាក់ប្រើក្នុងអំឡុងសង្គ្រាមរវាងរុស្ស៊ី-អ៊ុយក្រែន ដើម្បីឆ្លើយតបនឹងស្ថានភាពព្រំដែនកំពុងតានតឹងកម្ពុជា.ថៃ ដែលបានបន្តនាំឱ្យទាហានថៃជាច្រើននាក់បាត់បង់អវយវៈដោយសារគ្រាប់មីនរបស់កម្ពុជា។

លោក Wuttipong បានបញ្ជាក់ថា ស្បែកជើងនេះត្រូវបានរចនាឡើងយ៉ាងពិសេស ទាន់សម័យ ជាមួយនឹងជើងទម្រដ៏រឹងមាំញែកចេញពីគ្នាដូចសត្វពីងពាង ដើម្បីកាត់បន្ថយទម្ងន់ និងជៀសវាងការប៉ះបាតស្បែកជើងដោយផ្ទាល់ជាមួយគ្រាប់មីន។ វាមានប្រសិទ្ធភាពក្នុងការកាត់បន្ថយកម្លាំងផ្ទុះរហូតដល់ ៧០% ដែលអាចការពារទាហានល្បាតឲ្យរងរបួសតិចតួចបំផុត ឬគ្មានសោះតែម្ដង។

លោកបានបន្ថែមថា ការច្នៃប្រឌិតថ្មីនេះ មិនត្រឹមតែជួយលើកកម្ពស់សីលធម៌របស់ទាហានថៃប៉ុណ្ណោះទេ ថែមទាំងធ្វើឱ្យខូចដល់សីលធម៌របស់អ្នកដាំគ្រាប់មីននៅកម្ពុជាទៀតផង។

បច្ចុប្បន្នស្បែកជើងនេះ មិនទាន់បានដាក់ចេញឲ្យប្រើប្រាស់ជាផ្លូវការសម្រាប់ទាហានថៃនោះទេ ដោយរដ្ឋាភិបាលថៃកំពុងសហការជាមួយនឹងរោងចក្រផលិត ហើយគំរូចុងក្រោយត្រូវបានគេរំពឹងថានឹងរួចរាល់នៅសប្តាហ៍ក្រោយ បន្ទាប់មកនឹងត្រូវបញ្ជូនទៅតំបន់កងទ័ពភូមិភាគ២សម្រាប់ការសាកល្បងបន្ថែមទៀត។

គួរឲ្យដឹងថា ទាហានថៃដែលដើរល្បាតនៅតាមព្រំដែនតែងជួបគ្រោះថ្នាក់ជាន់មីនដាច់ជើង ឬរបួសធ្ងន់ស្រាលជាបន្តបន្ទាប់ រាប់ចាប់តាំងពីមុនមានការប្រយុទ្ធគ្នាជាមួយកម្ពុជា។ លើសពីនេះ រដ្ឋាភិបាល និងថ្នាក់ដឹកនាំថៃបានទម្លាក់កំហុសគ្រប់យ៉ាងមកឲ្យកម្ពុជា បើទោះជាគ្មានមូលដ្ឋានច្បាស់លាស់ក៏ដោយ៕