វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បាននិយាយថា លោកនឹងដាក់ “ពន្ធដ៏ធ្ងន់ធ្ងរ” លើរុស្ស៊ី ប្រសិនបើមិនមានកិច្ចព្រមព្រៀងសន្តិភាពជាមួយអ៊ុយក្រែន ក្នុងរយៈពេល ៥០ថ្ងៃខាងមុខ រួមជាមួយនឹង “ពន្ធបន្ទាប់បន្សំ” ប្រហែល 100% ទៀតទៅលើប្រទេសផ្សេងៗដែលធ្វើពាណិជ្ជកម្មជាមួយរុស្ស៊ី ដើម្បីជាការដាក់ទណ្ឌកម្មប្រឆាំងនឹងរុស្ស៊ីដែលនៅបន្តឈ្លានពានអ៊ុយក្រែន។

យោងតាមការចុះផ្សាយរបស់សារព័ត៌មាន NBC នាថ្ងៃអង្គារ ទី១៥ កក្កដានេះបានឱ្យដឹងថា ប្រធានាធិបតីអាមេរិកលោកដូណាល់ ត្រាំបានប្រកាសថា សហរដ្ឋអាមេរិកនឹងបញ្ជូនសព្វាវុធធនធ្ងន់ ទៅកាន់ប្រទេសអ៊ុយក្រែន តាមរយៈបណ្តាប្រទេសដែលជាសមាជិកអង្គការ NATO ។ ជាមួយគ្នានេះលោកត្រាំ បានព្រមា.នរុស្ស៊ី ថាអាមេរិកនឹងចាត់វិធានការពន្ធគយដ៏ធ្ងន់ ប្រសិនបើគ្មានកិច្ចព្រមព្រៀងបញ្ចប់សង្គ្រាម នៅក្នុងរយៈពេល ៥០ ថ្ងៃទៀត។

ជាមួយនឹងការកំណត់ពន្ធគយនេះ លោកត្រាំបាននិយាយថា សហរដ្ឋអាមេរិកនឹងដាក់ពន្ធ១០០ភាគរយ សំដៅលើដៃគូពាណិជ្ជកម្មរបស់រុស្ស៊ីសហការជាមួយ ។ គោលបំណងនៃការតម្លើងពន្ធនេះ គឺដោយសារអាមេរិក និងអង្គការ NATO ចង់ឱ្យប្រទេសណាដែលធ្វើពាណិជ្ជកម្មជាមួយរុស្ស៊ីប្រឈមនឹងពន្ធបដិការខ្ពស់នៅពេលនាំចូលមកលក់នៅក្នុងទីផ្សារអាមេរិក។ វានឹងធ្វើឱ្យទំនិញរបស់ពួកគេឡើងថ្លៃខ្លាំង ហើយជំរុញឱ្យអ្នកជំនួញអាមរិកងាកមករកទំនិញដូចគ្នាតែនៅកន្លែងផ្សេងដែលមានតម្លៃថោកជាង ហើយប្រទេសទាំងនោះនឹងបាត់បង់ចំណូល។ ប្រេង និងឧស្ម័នមានចំនួនជិតមួយភាគបី នៃប្រាក់ចំណូលរដ្ឋរបស់ទីក្រុងមូស្គូ និងច្រើនជាង៦០ភាគរយ នៃការនាំចេញរបស់ខ្លួន ដូច្នេះ ពន្ធ ១០០ភាគរយ អាចធ្វើឱ្យខូចផ្នែកហិរញ្ញវត្ថុរបស់រុស្ស៊ី។

ចំណែកលោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន បានបង្ហោះនៅលើបណ្តាញសង្គម X ថា លោកបានពិភាក្សាអំពីមធ្យោបាយ និងដំណោះស្រាយចាំបាច់ជាមួយប្រធានាធិបតីអាមេរិក ដើម្បីផ្តល់ការការពារកាន់តែប្រសើរឡើងសម្រាប់ប្រជាជនអ៊ុយក្រែន ពីការវា.យប្រហាររបស់រុស្ស៊ីនិងត្រៀមខ្លួនរួចរាល់ ក្នុងការអនុវត្តតាមលទ្ធភាពដែលអាចធ្វើទៅបានដើម្បីគាំទ្រដល់កិច្ចព្រមព្រៀងសន្តិភាព។ ឆ្លៀតក្នុងឱកាសនោះ លោកបានអរគុណចំពោះឆន្ទៈរបស់លោកត្រាំ ក្នុងការគាំទ្រអ៊ុយក្រែននិងបន្តធ្វើការរួមគ្នា ដើម្បីបញ្ឈប់ការសម្លា.ប់ ព្រមទាំងបង្កើតសន្តិភាពយូរអង្វែងនិងយុត្តិធម៌៕

ប្រទេសថៃ ៖ កាលពីថ្ងៃទី១៤ ខែកក្កដា ឆ្នាំ២០២៥ សារព័ត៌មានថៃ Nation រាយការណ៍ថា ស្ត្រីម្នាក់ឈ្មោះ ស៊ីកាកូស កំពុងល្បីល្បាញរឿងអាស្រូ.វយ៉ាងខ្លាំងនៅប្រទេសថៃ ដោយសារនាងមានទំនាក់ទំនងស្នេហាជាមួយព្រះសង្ឃជាច្រើនអង្គ ពុំលើកលែងសូម្បីព្រះចៅអធិការវត្ត សុទ្ធតែក្លាយជាប្តីនាងទាំងអស់ ។ បើតាមការសាកសួរពីប្រវត្តិ គឺនាងចូលចិត្តមកធ្វើបុណ្យនៅវត្ត និងសេពគប់ជាមួយព្រះសង្ឃតាំងពីអាយុ១៦ឆ្នាំមកម៉្លេះ ។

ស្ត្រីឈ្មោះ ស៊ីកាកូស តែងតែបើករថយន្តទំនើបទៅធ្វើបុណ្យនៅវត្ត ស្លៀកពាក់ហ៊ឺហារ មានប្រាក់ចាយវាយពេញដៃ និងស្និទ្ធស្នាលជាមួយព្រះចៅអធិការវត្តជាច្រើនអង្គនៅទីក្រុងបាងកក និងតាមបណ្តាខេត្ត ។ ក្រោយពីនាងមានទំនាក់ទំនងជាមួយព្រះចៅអធិការវត្តមិនយូរប៉ុន្មាន ព្រះចៅអធិការវត្តគ្រប់អង្គក៏បានក្លាយជាប្តីនាងទាំងអស់ ហើយព្រះសង្ឃខ្លះថែមទាំងផ្តល់ប្រាក់ឱ្យនាងខ្លះចាយវាយរាប់លានបាតទៀតផង ។

បើស្ត្រីម្នាក់ម្នាក់នៅខេត្តពិជិត រៀបរាប់ថា នាងបានស្គាល់ស្ត្រីឈ្មោះ ស៊ីកាកូស យ៉ាងច្បាស់តាំងពីអាយុ១៦ឆ្នាំ ស្ត្រីរូបនេះចូលចិត្តមកទិញនំយកទៅធ្វើបុណ្យនៅវត្តជាញឹកញាប់ ។ កាលពីមុន នាងឈ្មោះ ប៊ីវ ហើយបានមកជួលបន្ទប់ស្នាក់នៅក្បែរនាង បន្ទាប់មក ស៊ីកាកូស ក៏ធ្វើជាប្រពន្ធបុរសចំណាស់អាយុ៦០ឆ្នាំ ដែលទើបលែងលះជាមួយប្រពន្ធ ។ មិនយូរប៉ុន្មាន អ្នកទាំង២ក៏បានចែកផ្លូវគ្នា ហើយពេលនោះ ស៊ីកាកូស អាយុ១៦ឆ្នាំ គឺនាងមានកូនម្នាក់ ប៉ុន្តែមិនមែននាងមានកូនជាមួយអតីតស្វាមីអាយុ៦០ឆ្នាំទេ គឺនាងមានកូនជាមួយប្អូនប្រុសរបស់ស្វាមី (ប្អូនថ្លៃ) ។

ពេលស្ត្រីឈ្មោះ ស៊ីកាកូស ល្បីល្បាញពេញប្រទេសថៃរឿងអាស្រូវទំនាក់ទំនងផ្លូវភេទជាមួយព្រះសង្ឃជាច្រើនអង្គ អតីតស្វាមី (អាយុ៦០ឆ្នាំ) របស់នាងប្រាប់ថា ធ្លាប់សង្ស័យភរិយាយូរមកហើយ កាលពីពេលពុំទាន់ចែកផ្លូវគ្នា ភរិយាចូលចិត្តទៅវត្តជាញឹកញាប់ ខ្លួនគិតថា តើភរិយាលួចមានអីៗជាមួយព្រះសង្ឃទេដឹង?

ចំណែកអ្នកស្រុករស់នៅខេត្តពិជិត ហួសចិត្តនឹងហេតុការណ៍កើតឡើងពេលនេះ ពីព្រោះកន្លងមក ធ្លាប់មានព័ត៌មានថា ព្រះចៅអធិការវត្ត១អង្គដែលស្ត្រីរូបនេះទៅធ្វើបុណ្យ មានកូនជាមួយនាង ។ កាលពីនាងរស់នៅខេត្តពិជិត ជីវិតនាងលំបាក ប៉ុន្តែក្រោយពេលទៅរស់នៅទីក្រុងបាងកក ស្រាប់តែនាងបើករថយន្តទំនើប មានមាសប្រាក់ពាក់ពេញខ្លួន ។

បច្ចុប្បន្ន ស្ត្រីឈ្មោះ ស៊ីកាកូស មានកូន៣នាក់ ប៉ុន្តែពុំដឹងថា តើកូនទាំង៣នាក់នេះ គឺជាកូនរបស់ព្រះសង្ឃអង្គណាឱ្យប្រាកដ ឬជាកូនរបស់ស្វាមីរូបណា ពីព្រោះគ្មានព័ត៌មានច្បាស់លាស់ថា ក្រោយពីនាងលែងលះជាមួយស្វាមីអាយុ៦០ឆ្នាំ តើនាងទៅសេពគប់ជាមួយបុរសណាទៀតក្រៅពីព្រះសង្ឃ ។

តាមពាក្យចចាមអារ៉ាម គឺព្រះចៅអធិការវត្តដ៏ល្បីនៅខេត្តពិជិត ព្រះនាម ព្រះថេបវ៉ាត់ឆារ៉ាក់ សិទ្ធិមេធី អាចជាឪពុករបស់កូនម្នាក់ក្នុងចំណោម៣នាក់ របស់ស្ត្រីឈ្មោះ ស៊ីកាកូស ។ ប៉ុន្តែព្រះចៅអធិការវត្តរូបនេះថា ពុំពិតទេ អត្មាពុំចង់សឹក ខណៈលោក គីតឆៃប៊ុនពូ ជាមេធាវីវត្តប្រាប់ថា ព្រះចៅអធិការស្អាតស្អំ ពុំពាក់ព័ន្ធរឿងអាស្រូវ ។ រីឯពាក្យចចាមអារ៉ាមថា ព្រះចៅអធិការវត្តមានកូនជាមួយស្ត្រីឈ្មោះ ស៊ីកាកូស គឺព្រះអធិការវត្តបដិសេធ និងត្រៀមខ្លួនពិនិត្យ DNA ។

ដោយឡែក មានសេចក្តីរាយការណ៍ ព្រះសង្ឃ១អង្គទៀតព្រះនាម ផាវ៉ាណា វីធីយៈគុន ឬព្រះអាចារ្យសាវ៉ៃ ប្រធានវត្តឆ័យមង្គល នៅស្រុកវាំងថង ខេត្តពិស្នុលោក បានផ្ទេរប្រាក់ឱ្យស្ត្រី ស៊ីកាកូស ជិត២សែនបាត ។ ព្រះអង្គមានសង្ឃដីកាថា បានស្គាល់ ស៊ីកាកូស កាលពីឆ្នាំ២០២៣ ដោយ ស៊ីកាកូស បានទំនាក់ទំនងតាម Chat ដើម្បីសុំប្រឹក្សាបញ្ហាជីវិត ។ នាងថា ពុំចង់មានជីវិតរស់នៅទៀតទេ ដោយសារគណនីធនាគារត្រូវបានគេហែកចូលធ្វើឱ្យនាងពុំអាចទូទាត់ថ្លៃគ្រឿងម៉ាស៊ីនកុម្ម៉ង់ពីក្រៅប្រទេស ធ្វើឱ្យអាជីវកម្មនាងដួលរលំ ស្មើទឹកប្រាក់៥លានបាត ។

ហេតុនេះ ព្រះអង្គក៏ផ្តល់លេខទូរស័ព្ទឱ្យនាងទំនាក់ទំនង និងផ្តល់កម្លាំងចិត្តឱ្យស្តាប់ធម៌ដើម្បីកុំឱ្យនាងធ្វើអត្តឃាត ។ ក្រោយមក នាងក៏ខ្ចីប្រាក់ព្រះអង្គ ចំនួន១សែនបាត ដើម្បីស្តារអាជីវកម្មកុំឱ្យរលំ ទើបព្រះអង្គសម្រេចចិត្តផ្ទេរប្រាក់ឱ្យនាង ។ ក្រោយពីបានទទួលប្រាក់ នាងក៏បាត់មុខអស់១ឆ្នាំ រហូតដល់ឆ្នាំ២០២៥ នាងប្រាប់ថា ត្រូវប្តីបោះបង់ ហើយនាងគ្មានប្រាក់ទិញទឹកដោះគោឱ្យកូន នាងថែមទាំងផ្ញើរូបកូនឈឺនៅមន្ទីរពេទ្យឱ្យមើល ទើបព្រះអង្គអាណិតក៏ផ្ទេរប្រាក់ឱ្យនាងជាបន្តបន្ទាប់ សរុបជិត២សែនបាត ។

ព្រះអង្គពុំធ្លាប់ឃើញមុខនាងទេ និងពុំធ្លាប់ទៅរកនាង រីឯនាងក៏ពុំបានមករកព្រះអង្គនៅវត្តដែរ ដូច្នេះ ព្រះអង្គគ្មានទំនាក់ទំនងស៊ីជម្រៅជាមួយនាងទេ ។ ព្រះអង្គទើបតែដឹងព័ត៌មានពេលក្រោយថា រូបស្ត្រីមើលក្មេងឈឺនៅមន្ទីរពេទ្យដែល ស៊ីកាកូស ផ្ញើមកឱ្យព្រះអង្គ គឺពុំពាក់ព័ន្ធជាមួយនាងទេ សមត្ថកិច្ចអាចពិនិត្យមើលរូបភាពព្រះសង្ឃជាច្រើនអង្គមានទំនាក់ទំនងស្នេហាជាមួយនាង គឺគ្មានរូបព្រះអង្គទេ ព្រះអង្គគ្រាន់តែផ្ទេរប្រាក់ឱ្យនាងព្រោះអាណិតមនុស្សដូចគ្នា ។

សមត្ថកិច្ចឱ្យដឹងថា ស្ត្រីដែលចាប់ព្រះសង្ឃជាច្រើនអង្គធ្វើប្តី បានទទួលប្រាក់យ៉ាងច្រើនពីព្រះសង្ឍ ហើយនាងយកទៅលេងល្បែង ។ សមត្ថកិច្ចរកឃើញភស្តុតាងព្រះចៅអធិការវត្តជាច្រើនអង្គមានទំនាក់ទំនងស្នេហាជាមួយនាង ពេលនេះ មានព្រះសង្ឃ៨អង្គសឹក ក្នុងនោះមានទាំងព្រះចៅអធិការវត្តនៅទីក្រុងបាងកក និងតាមបណ្តាខេត្ត ។ ក្រៅពីនេះ ព្រះសង្ឃ៣អង្គផ្សេងទៀតក៏មានទំនាក់ទនងជាមួយនាងដែរ ប៉ុន្តែព្រះសង្ឃបដិសេធពុំពាក់ព័ន្ធ ៕

ប្រទេសថៃ ៖ សារព័ត៌មានថៃ Khaosod រាយការណ៍កាលពីថ្ងៃទី១៤ ខែកក្កដា ឆ្នាំ២០២៥ ថា ក្រសួងទេសចរណ៍ និងកីឡាថៃបានសម្រេចចិត្តពន្យារពេលប្រមូលប្រាក់ថ្លៃជាន់ទឹកដីពីភ្ញៀវទេសចរបរទេស និងរង់ចាំការពិនិត្យឡើងវិញយ៉ាងលម្អិតក្រោយពីចំនួនភ្ញៀវទេសចរធ្លាក់ចុះ ។ ការប្រមូលប្រាក់ថ្លៃជាន់ទឹកដីពីភ្ញៀវទេសចរអាចចាប់ផ្តើមនៅត្រីមាសទី១ ឬត្រីមាសទី២ ឆ្នាំ២០២៦ ពីព្រោះស្ថានការណ៍បច្ចុប្បន្នពុំសមស្រប ត្រូវពិចារណាឱ្យគ្រប់ជ្រុងជ្រោយ ។

កាលពីថ្ងៃទី១៤ ខែកក្កដា លោក ចាក់ផុន តាំងស៊ុធិថាំ ជំនួយការរដ្ឋមន្ត្រីក្រសួងទេសចរណ៍ និងកីឡានិយាយថា ការប្រមូលប្រាក់ថ្លៃជាន់ទឹកដីពីភ្ញៀវទេសចរបរទេសដែលបានធ្វើដំណើរមកដល់ប្រទេសថៃ គឺបច្ចុប្បន្ន ក្រសួងទេសចរណ៍កំពុងពិចារណានៅឡើយ ដោយសារការវាយតម្លៃស្ថានការណ៍ពេលនេះ ពុំទាន់ដល់ពេលប្រមូលប្រាក់ជាន់ទឹកដី ។ ដូច្នេះ ប្រទេសថៃពុំទាន់មានផែនការប្រមូលប្រាក់ជាន់ទឹកដី នៅឆ្នាំ២០២៥ ទេ ។

ការប្រមូលប្រាក់ជាន់ទឹកដីពីភ្ញៀវទេសចរបរទេសត្រូវតែសិក្សាឱ្យបានគ្រប់ជ្រុងជ្រោយបន្ថែមទៀត ហើយថៃមានគម្រោងប្រមូលប្រាក់នៅត្រីមាសទី១ ឬត្រីមាសទី២ ឆ្នាំ២០២៦ ។ គម្រោងនេះត្រូវគិតគូរឱ្យបានល្អិតល្អន់ ពីព្រោះចំនួនប្រាក់ត្រូវប្រមូលពីភ្ញៀវទេសចរ គឺខុសៗគ្នាសម្រាប់ការធ្វើដំណើរតាមផ្លូវគោក ផ្លូវទឹក និងផ្លូវអាកាស ពេលនេះ ពុំទាន់បានកំណត់ចំនួនប្រាក់ច្បាស់លាស់ ។

គោលបំណងដែលប្រទេសថៃប្រមូលប្រាក់ជាន់ទឹកដីពីភ្ញៀវទេសចរ រួមមាន ៖ ដើម្បីផ្តល់សុវត្ថិភាព និងទំនុកចិត្តដល់ភ្ញៀវទេសចរឱ្យសម្រេចចិត្តមកកម្សាន្តនៅថៃ ។ បច្ចុប្បន្ន បណ្តាប្រទេសរីកចម្រើន និងពឹងផ្អែកលើវិស័យទេសចរណ៍បានប្រមូលប្រាក់ជាន់ទឹកដីពីភ្ញៀវទេសចរ ហើយថៃនឹងយកប្រាក់នេះទៅអភិវឌ្ឍន៍តំបន់ទេសចរណ៍បន្តទៀត ។ នេះបើតាមការលើកឡើងរបស់លោក ចាក់ផុន តាំងស៊ុធិថាំ ជំនួយការរដ្ឋមន្ត្រីក្រសួងទេសចរណ៍ និងកីឡា ។

ដោយឡែក គម្រោងសម្រាប់ពលរដ្ឋថៃដើរកម្សាន្តក្នុងស្រុកដែលរដ្ឋាភិបាលជួយឧបត្ថម្ភប្រាក់ឱ្យពាក់កណ្តាល គឺពលរដ្ឋបានចុះឈ្មោះក្នុងគម្រោងតិចជាងការរំពឹងទុក ប៉ុន្តែលោក ចាក់ផុន តាំងស៊ុធិថាំ ចង់ឱ្យពលរដ្ឋដើរកម្សាន្តនៅតំបន់ទេសចរណ៍ក្នុងស្រុកឱ្យបានច្រើនដើម្បីជំរុញការធ្វើដំណើរ ស្របតាមគោលនយោបាយទីក្រុងសំខាន់ៗ និងទីក្រុងទេសចរណ៍ ។

គួរបញ្ជាក់ថា ប្រទេសថៃមានគម្រោងប្រមូលប្រាក់ជាន់ទឹកដីពីភ្ញៀវទេសចរបរទេសដែលធ្វើដំណើរមកដល់ថៃ ក្នុងម្នាក់ចំនួន៣០០បាត (ឬ៣ម៉ឺនរៀល) ដើម្បីយកប្រាក់ទៅអភិវឌ្ឍន៍តំបន់ទេសចរណ៍នានា និងធានារ៉ាប់រងសុខភាពភ្ញៀវទេសចរ ។ ប៉ុន្តែដោយសារចំនួនភ្ញៀវទេសចរមកកម្សាន្តនៅប្រទេសថៃធ្លាក់ចុះ ជាពិសេស ភ្ញៀវទេសចរចិន ធ្វើឱ្យថៃសម្រេចពន្យារពេលប្រមូលប្រាក់ និងរង់ចាំពិចារណាលម្អិត ៕

ប្រទេសថៃ ៖ អនុរដ្ឋមន្ត្រីក្រសួងការពារជាតិថៃ លោក ណាតផុន ណាកផានិត បាននិយាយមកកាន់សារព័ត៌មានថា ប្រទេសថៃគ្មានគម្រោងសាងសង់របងនៅប្រាសាទតាមាន់ធំដូចការផ្សព្វផ្សាយរបស់សារព័ត៌មាន និងសូមឱ្យជឿជាក់លើព័ត៌មានផ្លូវការពីរដ្ឋាភិបាលថៃប៉ុណ្ណោះ ។ លោកសុំកិច្ចសហការពីសារព័ត៌មាននានាដែលផ្សព្វផ្សាយពីបញ្ហាកម្ពុជា-ថៃ សូមផ្សព្វផ្សាយតែព័ត៌មានច្បាស់លាស់ ។

លោក ណាតផុន ណាកផានិត អនុរដ្ឋមន្ត្រីក្រសួងការពារជាតិថៃបាននិយាយពីការផ្សព្វផ្សាយព័ត៌មានថៃត្រៀមសាងសង់របងនៅព្រំដែនកម្ពុជា-ថៃ បរិវេណប្រាសាទតាមាន់ធំ រហូតធ្វើឱ្យសម្តេចតេជោ ហ៊ុន សែន ប្រធានព្រឹទ្ធសភាកម្ពុជាថ្លែងថា បើថៃសាងសង់របងនឹងមានសង្គ្រាម ។ លោកធ្លាប់ស្នើសុំកិច្ចសហការពីប្រព័ន្ធផ្សព្វផ្សាយពាក់ព័ន្ធនឹងបញ្ហាកម្ពុជា-ថៃ គឺជាការតទល់ដោយពាក្យសម្តី ប៉ុន្តែគ្មានឯកសារផ្លូវការ ។ ដូច្នេះ លោកចង់ឱ្យស្តាប់ព័ត៌មានផ្លូវការពីរដ្ឋាភិបាលដែលទទួលខុសត្រូវផ្នែកនេះ ។

ប្រទេសថៃគ្មានគម្រោងសាងសង់របងនៅប្រាសាទតាមាន់ធំទេ កន្លងមក គឺជាការវាយប្រហារគ្នាតាមខ្យល់ដែលជាសង្គ្រាម IO ឬសង្គ្រាមព័ត៌មាន (Information Operation) ហើយគ្រប់គ្នាកំពុងស្ថិតក្នុងសង្គ្រាមព័ត៌មានរវាងប្រទេស និងក្នុងប្រទេស អ្នកនយោបាយជាច្រើនធ្លាប់និយាយថា សង្គ្រាមព័ត៌មាន មានសភាពធ្ងន់ធ្ងរ ។ ប៉ុន្តែបច្ចុប្បន្ន យើងស្ថិតក្នុងការពិត និងចង់ឱ្យសារព័ត៌មានផ្សព្វផ្សាយអ្វីច្បាស់លាស់មានហេតុផល ពីព្រោះការផ្សាយព័ត៌មាននឹងប៉ះពាល់ដល់ការចរចា ។

លោក ណាតផុន ណាកផានិត ចង់ឱ្យស្ថានការណ៍នៅតំបន់ព្រំដែនកម្ពុជា-ថៃធូរស្រាលយ៉ាងឆាប់រហ័ស ពីព្រោះពលរដ្ឋថៃរស់នៅខេត្តទាំង៧ ជួបទុក្ខលំបាកយ៉ាងខ្លាំង ។ រដ្ឋាភិបាលថៃព្យាយាមដោះស្រាយស្ថានការណ៍ឱ្យធូរស្រាល ប៉ុន្តែទទួលស្គាល់ថា វាគួរឱ្យបារម្ភ ពីព្រោះមានពលរដ្ឋថៃរស់នៅ៧ខេត្តជាប់កម្ពុជាប៉ុណ្ណោះដែលលំបាក រីឯពលរដ្ឋថៃរស់នៅ៧០ខេត្តទៀត ចាប់អារម្មណ៍នឹងអធិបតេយ្យភាព ។

លោកនឹងប្រឹងប្រែងឱ្យខ្លាំងបំផុត ប៉ុន្តែស្ថានការណ៍ធូរស្រាលក៏ត្រូវពិចារណាពីអធិបតេយ្យភាព និងកិត្តិយសរបស់ប្រទេសថៃផងដែរ ។ ជាមួយគ្នានេះ ក៏ត្រូវគិតពីហេតុផល ពុំមែនគិតតែពីកិត្តិយសតែម្យ៉ាង គឺពុំត្រឹមត្រូវឡើយ ។

ដោយឡែក លោក ប៊ុនស៊ីន ផាកក្លាង មេបញ្ជាការភូមិភាគ២ បានផ្តល់សម្ភាសន៍ជាមួយសារព័ត៌មាន នៅថ្ងៃទី១៥ ខែកក្កដា ឆ្នាំ២០២៥ ថា ការសាងសង់របងនៅប្រាសាទតាមាន់ធំអាចមានបញ្ហាកើតឡើង ប៉ុន្តែបើរដ្ឋាភិបាលថៃបញ្ជាឱ្យសាងសង់របង កងទ័ពត្រូវតែសាងសង់ ។ ដូច្នេះ ត្រូវពិចារណាឱ្យបានល្អិតល្អន់ យើងប្រើប្រាស់ផែនទីថៃ មិនថា Google កំណត់ប្រាសាទតាមាន់ធំស្ថិតនៅទីណាទេ វាជារឿងបច្ចេកទេសដែលរដ្ឋាភិបាលត្រូវដោះស្រាយ ៕

តូក្យូ: ជប៉ុនបានកំពុងបង្កើតប្រវត្តិសាស្ត្រថ្មីក្នុងវិស័យអ៊ីនធឺណិត។ អ្នកវិទ្យាសាស្ត្រនៅ ស្ថាប័នជាតិព័ត៌មាន និងបច្ចេកវិទ្យាទំនាក់ទំនង (NICT) បានសម្រេចបានល្បឿនអ៊ីនធឺណិតលឿនជាងគេបំផុតក្នុងពិភពលោក ដល់ទៅ ១២៥,០០០ ជីកាបៃ ក្នុងមួយវិនាទី (ស្មើនឹង ១.០២ ប៉េតាប៊ីតក្នុងមួយវិនាទី)។ ល្បឿននេះលឿនជាងល្បឿនអ៊ីនធឺណិតជាមធ្យមនៅសហរដ្ឋអាមេរិកដល់ទៅ ៤ លានដងឯណោះ។ នេះបើយោងតាមប្រភព Live Science។

សមិទ្ធិផលដ៏អស្ចារ្យនេះ គឺដោយសារបច្ចេកវិទ្យាថ្មីមួយដែលមានប្រភេទខ្សែអុបទិកកម្រិតខ្ពស់ដល់ទៅ ១៩ ស្នូល។ ខ្សែអុបទិកធម្មតា ប្រើស្នូលតែមួយប៉ុណ្ណោះ ដើម្បីបញ្ជូនសញ្ញាផ្លូវពន្លឺ ប៉ុន្តែក្នុងខ្សែថ្មីនេះ សំណុំសញ្ញាផ្សេងៗបានបញ្ជូនតាមស្នូលជាច្រើនក្នុងពេលតែមួយ ធ្វើអោយល្បឿនកើនឡើងយ៉ាងច្រើន ដោយមិនចាំបាច់ត្រូវការខ្សែកាបកាន់តែធំឡើយ។

ក្នុងការធ្វើតេស្ត អ្នកវិទ្យាសាស្ត្រជប៉ុនបានសាកល្បងបញ្ជូនសញ្ញាអ៊ីនធឺណិតល្បឿនខ្ពស់ តាមខ្សែអុបទិកប្រវែងជាង ១,៨០០ គីឡូម៉ែត្រ។ ពួកគេបានធ្វើអោយសញ្ញារុញទៅមុខ និងត្រឡប់មកវិញ ២១ ដង ហើយប្រើឧបករណ៍ពង្រឹងសញ្ញា ដើម្បីធានាថា វាមានស្ថិរភាព។ ដំណើរនេះបង្ហាញថា បច្ចេកវិទ្យាថ្មីនេះអាចប្រើសម្រាប់ការបញ្ជូនសញ្ញាចម្ងាយឆ្ងាយ ដោយគ្មានការបាត់បង់ទិន្នន័យ។

គួររំលឹកថា នេះមិនមែនជាលើកដំបូងទេដែលជប៉ុនវានបំបែកកំណត់ត្រាផ្នែកនេះ ពួកគេក៏ធ្លាប់បានឈានដល់ល្បឿនជិត ៥០,០០០ ជីកាបៃ ក្នុងមួយវិនាទីផងដែរ កាលពីឆ្នាំ ២០២៤។ ដោយឡែក កំណត់ត្រាថ្មីនេះគឺកើនជាងពីរដងទៅទៀត។ ទោះបីជាបច្ចេកវិទ្យានេះនៅក្នុងដំណាក់កាលសាកល្បងក៏ដោយ ប៉ុន្តែវាអាចនាំទៅកាន់ការផ្លាស់ដ៏ប្តូរធំនៃអ៊ីនធឺណិតជាសកល។ អ្នកជំនាញនិយាយថា វាអាចជួយដល់ បច្ចេកវិទ្យា AI, ការគណនាតាមCloud, មជ្ឈមណ្ឌលទិន្នន័យ, ការផ្សាយវីដេអូ 3D និងខ្សែអ៊ីនធឺណិតក្រោមសមុទ្រផងដែរ។

ទោះជាយ៉ាងណា បច្ចុប្បន្ននេះ ប្រជាជនមិនទាន់អាចប្រើប្រាស់ល្បឿននេះនៅផ្ទះបាននៅឡើយទេ ប៉ុន្តែវាបង្ហាញពីអនាគតដ៏ភ្លឺថ្លារបស់បណ្តាញអ៊ីនធឺណិត ដែលអាចទាញយកឯកសារធំៗផ្សេងៗបានក្នុងរយៈពេលតែប៉ុន្មានវិនាទីប៉ណ្ណោះ៕