ប្រទេសថៃ ៖ អ្នកជំនាញជាច្រើនរូបនៅប្រទេសថៃបានណែនាំឱ្យលោកស្រី ផេថងថាន ស៊ីណាវ៉ាត់ លាលែងពីតំណែងនាយករដ្ឋមន្ត្រីថៃ មុនពេលតុលាការធម្មនុញ្ញចេញសេចក្តីសម្រេចជាផ្លូវការ ។ លោកស្រីគួរតែរំលាយសភា និងប្រគល់អំណាចឱ្យពលរដ្ឋ កុំរង់ចាំដល់ពេលតុលាការចេញសេចក្តីសម្រេច ពីព្រោះលោកស្រីខ្វះខាតគុណសម្បត្តិ ។

អនុប្រធានគណបក្សប្រជាជន លោកស្រី សិរិកញ្ញា តាន់សាគុន បានលើកឡើងពីតុលាការធម្មនុញ្ញសម្រេចឱ្យលោកស្រី ផេថងថាន ព្យួរតំណែងនាយករដ្ឋមន្ត្រីកាលពីថ្ងៃទី១ ខែកក្កដា ឆ្នាំ២០២៥ ថា បើលោកស្រី ផេថងថាន ចង់ដោះស្រាយវិបត្តិនយោបាយ គួរតែរំលាយសភា និងប្រគល់អំណាចឱ្យពលរដ្ឋ ។ លោកស្រីថា ៖ «បញ្ហានយោបាយគួរឱ្យពលរដ្ឋសម្រេចចិត្តច្រើនជាង បើលោកស្រី ផេថងថាន ចង់ដោះស្រាយវិបត្តិនយោបាយ គឺការរំលាយសភា និងប្រគល់អំណាចឱ្យពលរដ្ឋដោយមានការបោះឆ្នោតជាថ្មី នេះជាវិធីល្អបំផុត» ។

ចំណែកលោក យុទ្ធថាផន អ៊ីសារ៉ាក់ឆៃ សាស្ត្រាចារ្យនៅសាកលវិទ្យាល័យសុខោទ័យថាំម៉ាធិរ៉ាត គិតថា ការសម្រេចរបស់តុលាការធម្មនុញ្ញអាចនឹងមានផលអវិជ្ជមានដល់លោកស្រី ផេថងថាន ។ បើបែបនេះមែន លោកស្រី ផេថងថាន នឹងពុំអាចត្រឡប់មកកាន់តំណែងជានាយករដ្ឋមន្ត្រីទៀតទេ ដោយសារខ្វះខាតគុណសម្បត្តិ ។ ដូច្នេះ លោកចង់ណែនាំឱ្យលោកស្រី ផេថងថាន លាលែងពីតំណែងនាយករដ្ឋមន្ត្រី មុនការសម្រេចរបស់តុលាការធម្មនុញ្ញ ។

ដូចគ្នានេះ លោកសាស្ត្រាចារ្យ ស៊ុឆៃស៊ីសុធិយ៉ាកន អតីតគណៈកម្មការបោះឆ្នោតមានមតិស្រដៀងគ្នាថា លោកស្រី ផេថងថាន ប្រឈមនឹងតុលាការធម្មនុញ្ញដកពីតំណែងនាថ្ងៃអនាគត ដោយសារលោកពិចារណាពីការសម្រេចរបស់តុលាការដែលឱ្យលោកស្រីផ្អាកបំពេញតួនាទី ក្នុងសំឡេង៧ ទល់២ ។ វិធីល្អបំផុត គឺលោកស្រីគួរលាលែងពីតំណែង កុំរង់ចាំដល់ពេលតុលាការចេញសេចក្តីសម្រេច ។

ដោយឡែក ក្រុមការពារអធិបតេយ្យដឹកនាំដោយលោក ចតុផន ព្រំផាន់, លោក ផាន់ថេប ផូផុងផាន់ និងលោក ភិឈិត ឆៃមាំងឃុន ដែលបានប្រមូលផ្តុំពលរដ្ឋធ្វើបាតុកម្មបណ្តេញលោកស្រី ផេថងថាន កាលពីថ្ងៃទី២៨ ខែមិថុនា កន្លងមក បានបង្ហាញនូវគោលជំហរក្រោយពីតុលាការធម្មនុញ្ញព្យួរតំណែងនាយករដ្ឋមន្ត្រី ដោយបញ្ជាក់ថា ក្រុមការពារអធិបតេយ្យនឹងពុំបញ្ចេញមតិតវ៉ាអ្វីទេពេលនេះ ពីព្រោះអាចល្មើសនឹងអំណាចតុលាការធម្មនុញ្ញ ។

លោក ចតុផន ព្រំផាន់ និយាយថា រីករាយនឹងការសម្រេចរបស់តុលាការរដ្ឋធម្មនុញ្ញ រីឯក្រុមការពារអធិបតេយ្យនឹងពុំគាំទ្រការធ្វើរដ្ឋប្រហារ ។ ក្រុមបាតុករនៅតែប្រកាន់យកគោលជំហរដើម គឺលោកស្រី ផេថងថាន ត្រូវតែលាលែងពីតំណែងនាយករដ្ឋមន្ត្រី ហើយក្រុមការពារអធិបតេយ្យអាចនឹងប្រមូលផ្តុំធ្វើបាតុកម្មម្តងទៀតនាពាក់កណ្តាលខែសីហា ៕

ប្រទេសថៃ ៖ សារព័ត៌មាន Thai PBS រាយការណ៍ថា នៅថ្ងៃទី២ ខែកក្កដា ឆ្នាំ២០២៥ លោក ផាគូនវុទ្ធ ឧត្តមផិផាតសាគូន បានដឹកនាំកិច្ចប្រជុំគណបក្សប្រឆាំងនៅប្រទេសថៃ រួមមាន គណបក្សប្រជាជន និងគណបក្សភូមិចៃថៃ ដើម្បីពិភាក្សាពីការត្រួតពិនិត្យស្ថានការណ៍ថ្មីៗ និងការបំពេញភារកិច្ចលើកដំបូង ស្របពេលគណបក្សភូមិចៃថៃក្លាយជាគណបក្សប្រឆាំងជាផ្លូវការ ។ ប្រធានគណបក្សប្រជាជន និងគណបក្សភូមិចៃថៃ នឹងត្រៀមសួរសំណួរផ្ទាល់ក្នុងកិច្ចប្រជុំសភានៅថ្ងៃទី៣ ខែកក្កដា អំពីស្ថានការណ៍ព្រំដែនកម្ពុជា-ថៃ ។

លោក ផាគូនវុទ្ធ ឧត្តមផិផាតសាគូន ប្រធានគណៈកម្មការសម្របសម្រួលគណបក្សប្រឆាំង និងជាសមាជិកសភាមកពីគណបក្សប្រជាជន បាននិយាយពីកិច្ចប្រជុំក្រុមគណបក្សប្រឆាំងនៅថ្ងៃទី២ ខែកក្កដា និងការបើកកិច្ចប្រជុំសភានៅថ្ងៃទី៣ ខែកក្កដា ដែលជាកិច្ចប្រជុំសភាលើកដំបូងដែលគណបក្សភូមិចៃថៃ បានចូលរួមប្រជុំក្នុងឋានៈជាគណបក្សប្រឆាំង ។ រីឯការប្រជុំរបស់គណបក្សប្រឆាំងថ្ងៃនេះ (ថ្ងៃទី២ ខែកក្កដា) បានអញ្ជើញមន្ត្រីមកបំភ្លឺពីសេចក្តីព្រាងច្បាប់ប្រជាមតិ ពីព្រោះវាហួសកាលកំណត់រយៈពេល១៨០ថ្ងៃហើយ ។

លោកបន្តថា ស្ថានការណ៍ដែលពលរដ្ឋថៃចាប់អារម្មណ៍បំផុត គឺស្ថានការណ៍ព្រំដែនកម្ពុជា-ថៃ ហើយប្រធានគណបក្សប្រឆាំងនឹងសួរសំណួរផ្ទាល់លពីបញ្ហាព្រំដែនក្នុងកិច្ចប្រជុំសភា ។ ពីដំបូង គណបក្សប្រឆាំងចង់សួរផ្ទាល់ទៅលោកស្រី ផេថនថាន ប៉ុន្តែលោកស្រីត្រូវបានតុលាការធម្មនុញ្ញសម្រេចព្យួរតំណែងនាយករដ្ឋមន្ត្រីកាលពីថ្ងៃទី១ ខែកក្កដា ហើយយើងទទួលបានដំណឹងថា រដ្ឋមន្ត្រីក្រសួងការពារជាតិនឹងមកឆ្លើយសំណួរជំនួសនាយករដ្ឋមន្ត្រី ។

កិច្ចប្រជុំសភានៅថ្ងៃទី៣ ខែកក្កដា គណបក្សប្រជាជននឹងត្រៀមសាកសួរពីស្ថានការណ៍ព្រំដែនកម្ពុជា-ថៃ ដែលពលរដ្ឋថៃចាប់អារម្មណ៍ខ្លាំង ។ ហេតុនេះ ប្រធានគណបក្សប្រឆាំងនឹងជាអ្នកសួរសំណួរផ្ទាល់ក្នុងសភា ពីដំបូង យើងចង់សួរទៅលោកស្រី ផេថងថាន ដោយផ្ទាល់ ប៉ុន្តែតុលាការធម្មនុញ្ញបានសម្រេចព្យួរតំណែងលោកស្រី ក៏មានការជូនដំណឹងមកថា រដ្ឋមន្ត្រីក្រសួងការពារជាតិនឹងឆ្លើយសំណួរជំនួស ។

ការសួរសំណួរក្នុងកិច្ចប្រជុំសភានៅថ្ងៃទី៣ ខែកក្កដា អាចមានបញ្ហាមួយចំនួនដោយសាររដ្ឋមន្ត្រីខ្លះពុំទាន់ស្បថចូលកាន់តំណែង ហើយគណបក្សប្រឆាំងអាចត្រូវរង់ចាំឱ្យតុលាការធម្មនុញ្ញចេញសេចក្តីសម្រេចពីការដកតំណែងលោកស្រី ផេថងថាន ជាមុនសិន ។ នេះបើតាមការលើកឡើងរបស់លោក ផាគូនវុទ្ធ ឧត្តមផិផាតសាគូន ប្រធានគណៈកម្មការសម្របសម្រួលគណបក្សប្រឆាំង និងជាសមាជិកសភាមកពីគណបក្សប្រជាជន ៕

ប្រទេសថៃ ៖ សារព័ត៌មានថៃ Chiang Mai News រាយការណ៍ថា កាលពីថ្ងៃទី១ ខែកក្កដា ឆ្នាំ២០២៥ សមត្ថកិច្ចថៃបានចា.ប់ខ្លួនឧក្រិដ្ឋកម្មឆ្លងដែនមួយក្រុមធំ ស្ថិតនៅឃុំបានវ៉ាន ស្រុកហាងដង ខេត្តឈៀងម៉ៃ សរុបចំនួន១៧នាក់ ក្នុងនោះមានជ.នជាតិចិន ១៤នាក់ និងមីយ៉ាន់ម៉ា ៣នាក់ ។ ក្រៅពីនេះ សមត្ថកិច្ចរឹបអូសបានកុំព្យូទ័រ ចំនួន១០គ្រឿង និងទូរស័ព្ទដៃ ២៦គ្រឿង បញ្ជូនមកការិយាល័យស៊ើបអង្កេត និងស្រាវជ្រាវរកមនុស្សពាក់ព័ន្ធផ្សេងទៀតមកដាក់ទោសតាមច្បាប់ ។

នៅថ្ងៃទី១ ខែកក្កដា សមត្ថកិច្ចថៃបានចាប់ខ្លួនជនជាតិចិន និងមីយ៉ាន់ម៉ាជាច្រើននាក់ ក្រោយពីសង្ស័យថា ពួកគេប្រព្រឹត្តបទល្មើសពាក់ព័ន្ធនឹងឧក្រិដ្ឋកម្មបច្ចេកវិទ្យា និងបោកប្រាស់ជនជាតិចិនដូចគ្នា ។ រីឯទីតាំងរបស់ក្រុមឧក្រិដ្ឋកម្មឆ្លងដែន គឺស្ថិតនៅភូមិ១៣ ឃុំបានវ៉ាន ស្រុកហាងដង ខេត្តឈៀងម៉ៃ ។ សមត្ថកិច្ចនឹងស៊ើបអង្កេតបន្ថែម ព្រមទាំងស្វែងរកមនុស្សពាក់ព័ន្ធផ្សេងទៀតមកដាក់ទោសផងដែរ ។

ក្រុមឧក្រិដ្ឋកម្មឆ្លងដែនបានបោកបញ្ឆោតជនជាតិចិនដូចគ្នាឱ្យមកវិនិយោគតាមរយៈកម្មវិធីអនឡាញ ហើយពេលជនរងគ្រោះជឿជាក់តាមការអូសទាញ និងផ្ទេរប្រាក់ឱ្យក្រុមឧក្រិដ្ឋកម្ម គឺក្រុមឧក្រិដ្ឋកម្មនឹងផ្តាច់ប្រព័ន្ធទាក់ទងភ្លាមៗ ។ មេឧក្រិដ្ឋកម្ម គឺជាជនជាតិចិនមានតួនាទីមើលការខុសត្រូវការងាររបស់កូនក្រុម ហើយជនជាតិចិនបានធ្វើដំណើរមកប្រទេសថៃ ដោយប្រើប្រាស់ទិដ្ឋាការភ្ញៀវទេសចរ និងទិដ្ឋាការនិស្សិត ខណៈជនជាតិមីយ៉ាន់ម៉ា គ្មានឯកសារអ្វីទាំងអស់ ។

សមត្ថកិច្ចថៃនិយាយថា ការចាប់ខ្លួនក្រុមឧក្រិដ្ឋកម្មឆ្លងដែន គឺដោយសារកិច្ចខិតខំប្រឹងប្រែង និងតាមដានជនល្មើសរបស់សមត្ថកិច្ចផ្នែកបង្ក្រាបឧក្រិដ្ឋកម្មបច្ចេកវិទ្យា ។ ជនល្មើសតែងតែយកប្រទេសថៃធ្វើជាទីតាំងបោកបញ្ឆោតជនរងគ្រោះក្នុងប្រទេសរបស់ខ្លួន ដែលទង្វើនេះធ្វើឱ្យប៉ះពាល់ដល់សេដ្ឋកិច្ច និងទំនុកចិត្តប្រទេសថៃ ។ បច្ចុប្បន្ន អាជ្ញាធរថៃបានទាក់ទងទៅកាន់កុងស៊ុលចិនដើម្បីពិនិត្យទិន្នន័យបន្ថែម និងស៊ើបអង្កេតឈានទៅចាប់មនុស្សពាក់ព័ន្ធមកដាក់ទោសតាមច្បាប់ ។

តាមការស៊ើបអង្កេតបឋមឃើញថា ក្រុមឧក្រិដ្ឋកម្មឆ្លងដែនបានបោកបញ្ឆោតជនរងគ្រោះជាជនជាតិចិនដូចគ្នាស្មើជាង១សែននាក់ ឱ្យផ្ទេរប្រាក់មកប្រទេសថៃ ស្មើទឹកប្រាក់សរុបជាង១០០លានយាន់ (ឬប្រមាណ ៥០០លានបាត) ៕