មេដឹកនាំកូរ៉េខាងជើង លោក Kim Jong Un បានប្រកាសនៅថ្ងៃទី៨ ខែឧសភា ឆ្នាំ២០២៦នេះថា ប្រទេសរបស់លោកនឹងដាក់ពង្រាយកាំភ្លើ.ងធំប្រភេទថ្មីនៅតាមបណ្តោយព្រំដែនជាប់កូរ៉េខាងត្បូង ដែលមានសមត្ថភាពបា.ញ់ស្រោចលើទីក្រុងសេអ៊ូល យ៉ាងងាយស្រួល ។ ការប្រកាសនេះត្រូវបានចាត់ទុកជាការគំរា.មកំហែងដល់សន្តិសុខកូរ៉េខាងត្បូង ពីព្រោះទីក្រុងសេអ៊ូលស្ថិតនៅឆ្ងាយពីព្រំដែនត្រឹមតែពី៤០គីឡូម៉ែត្រ ទៅ៥០គីឡូម៉ែត្រប៉ុណ្ណោះ ។

កូរ៉េខាងជើង នឹងដាក់ពង្រាយកាំភ្លើងធំប្រភេទថ្មីទំហំ១៥៥មីលីម៉ែត្រ នៅតាមបណ្តោយព្រំដែនជាប់កូរ៉េខាងត្បូងនៅចុងឆ្នាំ២០២៦ ដែលមានសមត្ថភាពបាញ់ឆ្ងាយរហូតដល់ទីក្រុងសេអ៊ូលតែម្តង ហើយកូរ៉េខាងជើង នឹងដាក់ពង្រាយកាំភ្លើងធំថ្មីនេះលើនាវាពិឃាតរបស់ខ្លួននាពេលឆាប់ៗផងដែរ ។ នេះបើតាមការចុះផ្សាយរបស់សារព័ត៌មានអន្តរជាតិនៅថ្ងៃទី៨ ខែឧសភា ។

ការប្រកាសដាក់ពង្រាយកាំភ្លើងធំប្រភេទថ្មីបានកើតឡើងមិនប៉ុន្មានថ្ងៃ បន្ទាប់ពីកូរ៉េខាងត្បូងលើកឡើងពីការធ្វើវិសោធនកម្មរដ្ឋធម្មនុញ្ញរបស់កូរ៉េខាងជើង ដែលលុបចោលរាល់ខ្លឹមសារទាក់ទងនឹងការបង្រួបបង្រួមជាតិរវាងកូរ៉េទាំង២ ។ ការធ្វើវិសោធនកម្មរដ្ឋធម្មនុញ្ញនេះដើម្បីឱ្យស្របនឹងការសន្យារបស់មេដឹកនាំកូរ៉េខាងជើង លោក Kim Jong Un ថា នឹងកាត់ផ្តាច់ទំនាក់ទំនងជាមួយកូរ៉េខាងត្បូង និងបង្កើតប្រព័ន្ធរដ្ឋ២ នៅឧបទ្វីបកូរ៉េ ។

សារព័ត៌មានកណ្តាលកូរ៉េខាងជើង (KCNA) រាយការណ៍ថា លោក Kim Jong Un បានចុះត្រួតពិនិត្យដំណើរការផលិតកាំភ្លើងធំទំហំ១៥៥មីលីម៉ែត្រ កាលពីថ្ងៃទី៦ ខែឧសភា កន្លងមក មុនពេលដាក់ពង្រាយនៅតាមបណ្តោយព្រំដែនជាប់កូរ៉េខាងត្បូងនាចុងឆ្នាំ២០២៦ ។ លោកថា ៖ «វាអាចបាញ់ចម្ងាយលើសពី៦០គីឡូម៉ែត្រ អាចវាយប្រហារយ៉ាងឆាប់រហ័ស និងផ្តល់ផលចំណេញយ៉ាងខ្លាំងដល់ប្រតិបត្តិកងទ័ពជើងគោករបស់យើង» ។

កូរ៉េខាងត្បូងចាត់ទុកការដាក់ពង្រាយកាំភ្លើងធំរបស់កូរ៉េខាងជើងនៅតាមបណ្តោយព្រំដែន គឺជាការគំរាមកំហែងដល់សន្តិសុខកូរ៉េខាងត្បូង ពីព្រោះទីក្រុងសេអ៊ូលដែលមានពលរដ្ឋរស់នៅចំនួន១០លាននាក់ ស្ថិតនៅឆ្ងាយពីព្រំដែនត្រឹមតែពី៤០គីឡូម៉ែត្រ ទៅ៥០គីឡូម៉ែត្រប៉ុណ្ណោះ ។

លើសពីនេះ តំបន់ជាច្រើនទៀតក្នុងខេត្ត Gyeonggi ដែលជាតំបន់ឧស្សាហកម្មសំខាន់ៗរបស់កូរ៉េខាងត្បូង និងមានមនុស្សរស់នៅយ៉ាងច្រើន ក៏ស្ថិតក្នុងគោលដៅរបស់កូរ៉េខាងជើងអាចបាញ់កាំភ្លើងធំដល់ដែរ វាធ្វើឱ្យកូរ៉េខាងត្បូងព្រួយបារម្ភយ៉ាងខ្លាំងអំពីសន្តិសុខជាតិរបស់ខ្លួន ៕

ដកទូតចេញមុនដោយខ្លួនឯង ឥឡូវសុខៗក៏នឹកឃើញចង់បញ្ជូនមកវិញដោយខ្លួនឯង! យោងតាមពាក្យសម្ដីរបស់រដ្ឋមន្រ្តីក្រសួងការបរទេសថៃនៅល្ងាចថ្ងៃព្រហស្បត្តិ៍ ម្សិលមិញនេះបានឲ្យដឹងថា ឆាប់ៗខាងមុខនេះ ប្រទេសថៃនឹងពិភាក្សាលើការបញ្ជូនទូតត្រឡប់ទៅកាន់តំណែងនៅស្ថានទូតថៃប្រចាំនៅកម្ពុជាវិញ ដើម្បីកសាងទំនុកចិត្តរវាងថៃជាមួយកម្ពុជាឡើងវិញក្នុងនាមជាអ្នកជិតខាងល្អ។

យោងតាមការចុះផ្សាយរបស់ទីភ្នាក់ងារសារព័ត៌មានថៃ នៅថ្ងៃសុក្រ ទី៨ ខែឧសភា ឆ្នាំ២០២៦ លោក Sihasak Phuangketkeow ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ បានធ្វើសេចក្តីថ្លែងការណ៍ជាពិសេសថា «ពាក់ព័ន្ធនឹងបញ្ហាព្រំដែនគោក នៃកិច្ចប្រជុំ (JBC) ជាមួយកម្ពុជា ប្រទេសថៃមិនបានគេចវេះពីកិច្ចប្រជុំទេ ប៉ុន្តែថៃត្រូវការពេលវេលាត្រៀមលក្ខណៈប្រជុំជាមុនសិនតែប៉ុណ្ណោះ»។

លោកបន្ថែមថា៖ ចំពោះបញ្ហាដែនសមុទ្រជាមួយកម្ពុជាវិញ ប្រទេសថៃ សម្រេចលុបចោល (MoU) ឆ្នាំ២០០១ ជាឯកតោភាគី គឺផ្អែកលើការពិតដែលថា ការអនុវត្តរយៈពេល ២៥ ឆ្នាំមកនេះវាមិនបានផ្តល់លទ្ធផលអ្វីឡើយ ហើយបើនៅបន្តចរចាដោយប្រើក្របខណ្ឌនេះ ទោះ ២០ឆ្នាំទៅមុខទៀត ក៏មិនរីកចម្រើនទៅណាដែរ។

តាមលោក Sihasak ប្រទេសថៃបានសង្កត់ធ្ងន់លើការកសាងឡើងវិញនូវទំនាក់ទំនងមិត្តភាព ដូច្នេះឆាប់ៗខាងមុខនេះ គណៈរដ្ឋមន្រ្តីថៃនឹងធ្វើការពិភាក្សា ក៏ដូចជាពិនិត្យទៅលើលទ្ធភាព ក្នុងការបញ្ជូនឯកអគ្គរាជទូតថៃត្រឡប់មកកាន់តំណែងជាឯកអគ្គរាជទូតថៃ ប្រចាំនៅទឹកដីនៃព្រះរាជាណាចក្រកម្ពុជា ឡើងវិញ»។

គួររម្លឹកថា រដ្ឋាភិបាលថៃ ក្រោមការដឹកនាំរបស់លោកនាយករដ្ឋមន្ត្រីស្តីទី Phumtham Wechayachai កាលពីថ្ងៃទី២៣ ខែកក្កដា ឆ្នាំ២០២៥ បានប្រកាសជាផ្លូវការនូវការសម្រេចចិត្តទម្លាក់កម្រិតទំនាក់ទំនងការទូតជាមួយកម្ពុជា។ ភាគីថៃបានដកឯកអគ្គរាជទូតរបស់ខ្លួនត្រឡប់ទៅវិញទាំងយប់ និងបានបណ្តេញឯកអគ្គរាជទូតកម្ពុជា ប្រចាំទីក្រុងបាងកកឱ្យត្រឡប់មកភ្នំពេញវិញ។

ជាការឆ្លើយតប រាជរដ្ឋាភិបាលកម្ពុជាក៏បានទម្លាក់កម្រិតការទូតជាមួយថៃមកនៅត្រឹមកម្រិតទី២ដូចគ្នា ហើយកម្ពុជាបានបង្គាប់ឱ្យមន្ត្រីការទូតទាំងអស់ដែលបម្រើការងារនៅស្ថានទូតកម្ពុជាប្រចាំទីក្រុងបាងកក ចាកចេញ និងត្រឡប់មកភ្នំពេញវិញជាបន្ទាន់។ ទោះបីជាស្ថានការណ៍បច្ចុប្បន្នលែងមានការបាញ់បោះដូចមុនក៏ដោយ ប៉ុន្តែទំនាក់ទំនងការទូតនៅតែស្ថិតក្នុងស្ថានភាព “កកស្ទះ” នៅឡើយ។ ភាគីទាំងពីរកំពុងស្ថិតក្នុងដំណាក់កាល “ស្ទាបស្ទង់” គ្នា ដើម្បីរកវិធីស្ដារទំនាក់ទំនងឡើងវិញដោយមិនឱ្យចាញ់ប្រៀបរៀងៗខ្លួន៕

មានមាត់ចេះតែនិយាយ! ឆ្លៀតក្នុងឱកាសឡើងថ្លែងសន្ទរកថាក្នុងកិច្ចប្រជុំត្រីភាគី នៅចំពោះមុខប្រធានអាស៊ាន លោក Anutin Charnvirakul នាយករដ្ឋមន្ត្រីថៃ បាននិយាយឡើងយ៉ាងដូច្នេះថា៖ លោកសំណូមពរឱ្យប្រជាជនខ្មែរ កុំឱ្យមានការរើសអើងទៅលើពលរដ្ឋថៃ ដែលកំពុងរស់នៅក្នុងប្រទេសកម្ពុជាអី ព្រោះទំនាស់ព្រំដែនគឺបញ្ហារវាងរដ្ឋនិងរដ្ឋប៉ុណ្ណោះ»។ តើមានជនជាតិថៃប៉ុន្មាននាក់ហើយដែលត្រូវពលរដ្ឋខ្មែរព្រួតធ្វើបាប ទើបលោក អនុទីន មកធ្វើជាស្នើសុំយ៉ាងកំសត់បែបនេះ?

យោងតាមការចុះផ្សាយរបស់បណ្ដាញសារព័ត៌មានថៃ ដែលដកស្រង់ពាក្យសម្ដីពីលោក អនុទីន នៅល្ងាចថ្ងៃព្រហស្បត្តិ៍ ទី៧ ខែឧសភា ដែលបានបង្ហាញក្ដីបារម្ភចំពោះជនជាតិថៃ ដែលរស់នៅក្នុងប្រទេសកម្ពុជា ដោយបានស្នើសុំឱ្យប្រជាជនកម្ពុជាកុំមានការរើសអើងចំពោះពួកគេ និងបានសង្កត់ធ្ងន់លើសារៈសំខាន់នៃការរស់នៅជាមួយគ្នាដោយសន្តិវិធី។

លោក អនុទីន បានលើកឡើងថា បើទោះបីជាកម្ពុជា-ថៃ កំពុងដោះស្រាយបញ្ហានេះមិនទាន់ដាច់ស្រេចក៏ដោយ ប៉ុន្តែលោកសង្ឃឹមថាប្រជាជនខ្មែរនឹងមិនពង្រីកបញ្ហានេះឲ្យក្លាយជាការរើសអើងពូជសាសន៍នោះទេ ដោយលោកបានបញ្ជាក់យ៉ាងច្បាស់ថា «ជម្លោះដែលកើតឡើងគឺជាបញ្ហារវាងរដ្ឋាភិបាល និងរដ្ឋាភិបាល មិនមែនជាជម្លោះរវាងប្រជាជន និងប្រជាជននោះទេ»។

សូមជម្រាបថា បច្ចុប្បន្នជនជាតិថៃដែលកំពុងរស់នៅ និងប្រកបរបររកស៊ីនៅកម្ពុជាមានចំនួនប្រមាណ ៣,៣០០០ នាក់ នេះបើយោងតាមទិន្នន័យពី នាយកដ្ឋានសេដ្ឋកិច្ច និងសង្គមរបស់អង្គការសហប្រជាជាតិ (UNDESA)។ ចាប់តាំងពីមានជម្លោះព្រំដែនរវាងកម្ពុជា និងថៃ នៅខែកក្កដា ឆ្នាំ២០២៥ រហូតមកដល់បច្ចុប្បន្ន ពុំមានសេចក្ដីរាយការណ៍អំពីករណីជនជាតិថៃរស់នៅកម្ពុជាត្រូវពលរដ្ឋខ្មែរធ្វើបាបសូម្បីតែម្នាក់។

របាយការណ៍នេះផ្ទុយស្រឡះពីស្ថានភាពជនជាតិខ្មែរដែលកំពុងរស់នៅក្នុងប្រទេសថៃ ដែលកាលពីកន្លងធ្លាប់មានការបង្ហោះក្នុងបណ្ដាញសង្គមថា ត្រូវបានពលរដ្ឋថៃជ្រុលនិយមមួយចំនួនជិះជាន់ធ្វើបាប ប្រើអំពោះហិង្សាដាក់ទាំងមិនមានកំហុសអ្វីទាល់តែសោះ។ ចំណែកការលើកឡើងរបស់នាយករដ្ឋមន្រ្តីថៃដូចខាងលើនេះ ហាក់សបញ្ជាក់ឲ្យឃើញពីចេតនាដែលចង់បង្កឲ្យមានការយល់ច្រលំនៅចំពោះមុខសមាគមន៍អន្តរជាតិ៕

អ្នកឡើងភ្នំ បានស្លា.ប់ចំនួន៣នាក់ និងបាត់ខ្លួនរហូតដល់២០នាក់ បន្ទាប់ពីភ្នំភ្លើង Dukono លើកោះ Halmahera នៅភាគខាងកើតប្រទេសឥណ្ឌូណេស៊ី បានផ្ទុះកាលពីវេលាម៉ោង៧ និង៤១នាទីព្រឹក ថ្ងៃទី៨ ខែឧសភា ឆ្នាំ២០២៦ ដែលបញ្ចេញផ្សែងផេះទៅលើអាកាសក្នុងកម្ពស់ប្រមាណ១០គីឡូម៉ែត្រ ។ អាជ្ញាធរបានប្រកាសពីផ្សែងផេះភ្នំភ្លើងប៉ះពាល់ដល់សុខភាពពលរដ្ឋ និងការធ្វើដំណើរ ព្រមទាំងប្រកាសអាសន្នពីកម្រិតគ្រោះថ្នា.ក់ក្នុងលំដាប់ទី៣ ក្នុងចំណោម៤លំដាប់ ។

ក្រុមជួយសង្គ្រោះឱ្យដឹងថា ពួកគេបានធ្វើដំណើរទៅកាន់កន្លែងកើតហេតុ បន្ទាប់ពីមានសេចក្តីរាយការណ៍ពីអ្នកឡើងភ្នំបាត់ខ្លួនរហូតដល់២០នាក់ រួមទាំងជនបរទេស ។ ភ្នំភ្លើងនេះត្រូវបានបិទមិនឱ្យឡើងតាំងពីថ្ងៃទី១៧ ខែមេសា មកម៉្លេះ ដោយសារអ្នកវិទ្យាសាស្ត្រសង្កេតឃើញមានភាពខុសប្រក្រតីកើតឡើងជាបន្តបន្ទាប់ ប៉ុន្តែអ្នកឡើងភ្នំទាំងនេះមិនអើពើនឹងបម្រាមរបស់អាជ្ញាធរឡើយ ដោយពួកគេនៅតែផ្គើនធ្វើដំណើរឡើងភ្នំ ទាំងដែលមានហានិភ័យខ្ពស់ ។

ផ្សែងផេះចេញពីភ្នំភ្លើងបានបក់ទៅទិសខាងជើង ហើយអាជ្ញាធរប្រកាសឱ្យពលរដ្ឋដែលរស់នៅទីក្រុង Tobelo ក្បែរភ្នំភ្លើង ត្រូវតាមដានស្ថានការណ៍ផ្សែងផេះបក់ទៅទិសខាងណា ពីព្រោះផ្សែងផេះប៉ះពាល់សុខភាពពលរដ្ឋ និងធ្វើឱ្យការដឹកជញ្ជូនសាធារណៈផ្អាកដំណើរការ ប៉ុន្តែមិនទាន់មានសេចក្តីរាយការណ៍ពីផលប៉ះពាល់ដល់ការហោះហើរតាមផ្លូវអាកាសទេ ។

បើតាមសមត្ថកិច្ច គឺអ្នកឡើងភ្នំ បានស្លាប់ចំនួន៣នាក់ក្នុងហេតុការណ៍ផ្ទុះភ្នំភ្លើង (ក្នុងនោះមានជនបរទេស២នាក់) រីឯអ្នកឡើងភ្នំបាត់ខ្លួនរហូតដល់២០នាក់ (ក្នុងនោះមានជនជាតិសិង្ហបុរី ៩នាក់) ។

គួរបញ្ជាក់ថា ភ្នំភ្លើង Dukono ស្ថិតនៅខេត្ត North Maluku បានផ្ទុះបញ្ចេញឧស្ម័នជាបន្តបន្ទាប់តាំងពីឆ្នាំ១៩៣៣ ។ វាជាភ្នំភ្លើងសកម្មមួយ និងមានប្រជាប្រិយភាពបំផុតសម្រាប់អ្នកឡើងភ្នំ និងភ្ញៀវទេសចរ បើទោះជាការឡើងភ្នំមានភាពលំបាក និងប្រកបដោយគ្រោះថ្នាក់ក្តី ។

ហេតុការណ៍នេះធ្វើឱ្យពលរដ្ឋឥណ្ឌូណេស៊ី និងសិង្ហបុរី បារម្ភយ៉ាងខ្លាំងពីអាយុជីវិតមនុស្សបាត់ខ្លួនទាំងអស់ ដោយពួកគេនៅតែមានសង្ឃឹមថា មនុស្សបាត់ខ្លួនមិនទាន់ស្លាប់ទេ ។ ការស្វែងរក និងសង្គ្រោះកំពុងតែធ្វើឡើងយ៉ាងប្រញាប់ប្រញាល់បំផុត ហើយប្រឈមនឹងការលំបាកដោយសារភ្នំភ្លើងនៅតែបន្តផ្ទុះ ៕

ការកោប្រាក់ពីភ្ញៀវទេសចរបរទេសដែលមកកម្សាន្តនៅប្រទេសថៃ កំពុងតែល្បីល្បាញហើយពេលនេះ! ប្រព័ន្ធផ្សព្វផ្សាយជប៉ុន Nagoya TV News បានចុះផ្សាយកាលពីថ្ងៃទី១ ខែឧសភា ឆ្នាំ២០២៦ ថា ថៃបានកោប្រាក់ពីភ្ញៀវទេសចរបរទេសក្នុងតម្លៃខ្ពស់កប់ពពក មិនថាការធ្វើដំណើរតាមរថយន្តតាក់ស៊ី រ៉ឺម៉កកង់៣ និង​ថ្លៃអាហារ ដែលនេះជាការទារប្រាក់ពីភ្ញៀវទេសចរបរទេសតាមអំពើចិត្ត ។ ប្រសិនបើរដ្ឋាភិបាលថៃមិនដោះស្រាយបញ្ហាទាំងនេះទេ វានឹងប៉ះពាល់ដល់មុខមាត់វិស័យទេសចរណ៍ថៃ និងធ្វើឱ្យចំនួនភ្ញៀវទេសចរបរទេសធ្លាក់ចុះ ។

កាលពីថ្ងៃទី១ ខែឧសភា ឆ្នាំ២០២៦ ប្រព័ន្ធផ្សព្វផ្សាយជប៉ុន Nagoya TV News ផ្សាយថា អ្នកបើកតាក់ស៊ីនៅទីក្រុងបាងកក តែងតែបដិសេធមិនប្រើប្រាស់ឧបករណ៍វាស់ចម្ងាយផ្លូវ (Meter) ហើយទារប្រាក់ក្នុងតម្លៃ (ម៉ៅ) ដែលខ្ពស់ជាងតម្លៃគិតតាម Meter រហូតដល់៤ដង ជាពិសេស នៅមុខព្រះរាជវាំង ខណៈតាក់ស៊ីខ្លះទៀតនាំភ្ញៀវទៅកន្លែងខុសគោលដៅ រួចហើយទារប្រាក់ច្រើន ។ រីឯអ្នកបើករ៉ឺម៉កកង់៣ (Tuk Tuk) នៅតំបន់ប្រវត្តិសាស្ត្រ ច្រើនតែទារតម្លៃចាប់ពី៣០០ ទៅ៥០០បាត សម្រាប់ការធ្វើដំណើរជិតៗ ដែលតម្លៃពិតប្រាកដក្រោម១០០បាត ។

ភោជនីយដ្ឋានវិញ មិនបានដាក់តម្លៃម្ហូបអាហារក្នុងបញ្ជីមុខម្ហូប ឬមានបញ្ជីមុខម្ហូបចំនួន២ (បញ្ជីមុខមួយ គឺសម្រាប់ជនជាតិថៃមានតម្លៃអាហារសមរម្យ និងមួយទៀត សម្រាប់ជនបរទេសមានតម្លៃអាហារខ្ពស់) ព្រមទាំងបន្ថែមសេវាកម្ម ឬអាហារដែលភ្ញៀវមិនបានកុម្ម៉ង់ចូលក្នុងវិក្កយបត្រ ដែលច្រើនកើតឡើងនៅខេត្តភូកេត និងប៉ាតាយ៉ា ។

តម្លៃសេវាកម្ម និងម្ហូបអាហារ គឺខុសគ្នាដាច់រវាងជនជាតិថៃ និងភ្ញៀវទេសចរបរទេស ជាពិសេស មុខព្រះរាជវាំង និងឧទ្យានជាតិសំខាន់ៗនៅទីក្រុងបាងកក ។ ជនជាតិថៃអាចចូលទស្សនាទីតាំងទាំងនេះមិនគិតថ្លៃ ឬបង់ប្រាក់ក្នុងតម្លៃថោក ប៉ុន្តែភ្ញៀវទេសចរបរទេសវិញត្រូវបង់ប្រាក់ចូលទស្សនារហូតដល់៥០០បាត (ឬជាង១៥ដុល្លារ) ខណៈរដ្ឋាភិបាលថៃថា ដោយសារជនជាតិថៃបង់ពន្ធ និងសុំឱ្យជនបរទេសចូលរួមបង់ប្រាក់ក្នុងតម្លៃខ្ពស់ ។

អ្វីធ្វើឱ្យភ្ញៀវទេសចរបរទេសកាន់តែមិនពេញចិត្តបំផុតនោះ គឺការ «កោ» ឬយកប្រាក់ពីភ្ញៀវទេសចរបរទេសក្នុងតម្លៃខ្ពស់ហួសហេតុពីសំណាក់តាក់ស៊ី, រ៉ឺម៉កកង់៣ (Tuk Tuk) និងភោជនីយដ្ឋាននៅតំបន់ទេសចរណ៍ ដែលបានគិតប្រាក់ពីភ្ញៀវទេសចរបរទេសក្នុងតម្លៃខ្ពស់កប់ពពក បើធៀបនឹងជនជាតិថៃ ។ ភ្ញៀវទេសចរបរទេសមានអារម្មណ៍ថា ត្រូវបានគេដើរខ្សែលើ និងប្រុងប្រយ័ត្នខ្ពស់ក្នុងការចំណាយប្រាក់ធ្វើដំណើរ ។

ភ្ញៀវទេសចរជប៉ុនជាច្រើនដែលបានមកលេងព្រះរាជវាំងថៃ និយាយថា ពួកគេតែងតែឃើញពីការយកតម្លៃខុសគ្នារវាងភ្ញៀវទេសចរបរទេស និងជនជាតិថៃ ជាពិសេស នៅឧទ្យានជាតិ សួនសត្វ អាងចិញ្ចឹមត្រី និងកន្លែងទេសចរណ៍បុរាណ ។ ដូចគ្នានេះ ជនជាតិជប៉ុនដែលស្នាក់នៅ និងធ្វើការនៅថៃ ក៏ត្រូវបង់ប្រាក់ទស្សនាកន្លែងទេសចរណ៍ក្នុងតម្លៃខ្ពស់ដែរ ដែលធ្វើឱ្យពួកគេចាត់ទុកគ្មានភាពយុត្តិធម៌ ។

ភ្ញៀវទេសចរបរទេសគ្មានជម្រើសផ្សេង ក្រៅពីយល់ព្រមបង់ប្រាក់ក្នុងតម្លៃខ្ពស់កប់ពពកទៅឱ្យតំបន់ទេសចរណ៍ តាក់ស៊ី រ៉ឺម៉កកង់៤ និងភោជនីយដ្ឋាននោះទេ បើទោះជាមិនពេញចិត្តក៏ដោយ ។ ប្រព័ន្ធផ្សព្វផ្សាយជប៉ុនព្រមានថា ទង្វើទាំងនេះកំពុងធ្វើឱ្យប៉ះពាល់អារម្មណ៍ភ្ញៀវទេសចរបរទេស និងប៉ះពាល់ដល់គម្រោងរបស់រដ្ឋាភិបាលថៃដែលចង់ទាក់ទាញភ្ញៀវទេសចរក្នុងកម្រិតខ្ពស់ ៕