អាមេរិកអនុញ្ញាតឱ្យប្រទេសមួយចំនួនអាចទិញប្រេងរុស្ស៊ីដើម្បីដោះស្រាយបញ្ហាខ្វះខាតប្រេងលើពិភពលោកដោយសារតម្លៃប្រេងកើនឡើងយ៉ាងឆាប់រហ័ស បន្ទាប់ពីស្ថានការណ៍តានតឹងនៅតំបន់មជ្ឈិមបូព៌ា ។ ប៉ុន្តែការអនុញ្ញាតនេះក្នុងរយៈពេលខ្លីប៉ុណ្ណោះ និងអាចទិញប្រេងដែលរុស្ស៊ីបញ្ជូនដាក់កប៉ាល់រួចហើយ ដែលបច្ចុប្បន្ន ប្រេងទាំងនេះកំពុងតែកកស្ទះនៅលើសមុទ្រនានា ។

រដ្ឋាភិបាលអាមេរិកបានចេញអាជ្ញាប័ណ្ណពិសេសអនុញ្ញាតឱ្យប្រទេសមួយចំនួនទិញប្រេងរុស្ស៊ីបណ្តោះអាសន្ន ស្របពេលតម្លៃប្រេងនៅលើពិភពលោក កើនឡើងខ្ពស់រហូតដល់ជាង១០០ដុល្លារក្នុង១បារ៉ែល ដែលបណ្តាលមកពីសង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែល ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី១៣ ខែមីនា ឆ្នាំ២០២៦ ។

តម្លៃប្រេងឆៅ Brent បានកើនឡើងជាង១០០ដុល្លារក្នុង១បារ៉ែល ដែលជាការកើនឡើងលើកដំបូងតាំងពីខែសីហា ឆ្នាំ២០២២ ដោយសារសង្គ្រាមមជ្ឈិមបូព៌ាអូសបន្លាយប៉ះពាល់ដល់ការដឹកជញ្ជូនប្រេងលើពិភពលោក ទើបធ្វើឱ្យប្រទេសនានាប្រឈមនឹងការខ្វះខាតប្រេង ។

អនុរដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent ឱ្យដឹងថា ក្រសួងហិរញ្ញវត្ថុអាមេរិកបានចេញអាជ្ញាប័ណ្ណបណ្តោះអាសន្នអនុញ្ញាតឱ្យប្រទេសមួយចំនួនទិញប្រេងរុស្ស៊ីដែលជាប់គាំងនៅសមុទ្រ ។ ប៉ុន្តែការអនុវត្តតាមអាជ្ញាប័ណ្ណនេះមានរយៈពេលខ្លី ដោយអនុញ្ញាតឱ្យទិញប្រេងដែលរុស្ស៊ីបញ្ជូនដាក់កប៉ាល់រួចហើយប៉ុណ្ណោះ និងមិនផ្តល់ប្រាក់ចំណេញដល់រដ្ឋាភិបាលរុស្ស៊ីទេ ។

គេហទំព័ររបស់ក្រសួងហិរញ្ញវត្ថុអាមេរិកបានផ្សព្វផ្សាយពីការអនុញ្ញាតឱ្យប្រទេសមួយចំនួនអាចទិញប្រេងរុស្ស៊ី ដោយបញ្ជាក់ថា អាចទិញប្រេងឆៅរុស្ស៊ីដែលបញ្ជូនទៅកាន់កប៉ាល់ត្រឹមថ្ងៃទី១២ ខែមីនា និងអនុញ្ញាតឱ្យទិញ-លក់ ឬដឹកជញ្ជូនរហូតដល់ថ្ងៃទី១១ ខែមេសា ឆ្នាំ២០២៦ ។

អាមេរិកអនុញ្ញាតឱ្យប្រទេសមួយចំនួនទិញប្រេងរុស្ស៊ី ស្របពេលសង្គ្រាមនៅមជ្ឈិមបូព៌ាអូសបន្លាយរយៈពេលជាង១០ថ្ងៃ ដែលធ្វើឱ្យការដឹកជញ្ជូនប្រេងតាមកប៉ាល់នានាឆ្លងកាត់ច្រកសមុទ្រ Hormuz គឺជាផ្លូវដឹកជញ្ជូនសំខាន់លើពិភពលោក រាំងស្ទះភ្លាមៗ ។ ស្ថានការណ៍នេះធ្វើឱ្យតម្លៃប្រេងលើពិភពលោក កើនឡើងខ្ពស់យ៉ាងឆាប់រហ័ស ខណៈអ្នកវិភាគ អ្នកសេដ្ឋកិច្ច និងឈ្មួញថាមពលថា បើទោះជាសង្គ្រាមមជ្ឈិមបូព៌ានឹងបញ្ចប់ក្តី ក៏អ៊ីរ៉ង់មិនអនុញ្ញាតឱ្យនាវាដឹកប្រេងទាំងអស់ឆ្លងកាត់ច្រកសមុទ្រ Hormuz ដែរ ។

គួរបញ្ជាក់ថា អាមេរិកបានដកទណ្ឌកម្មបន្ថែមទៀតលើប្រេងរុស្ស៊ី ហើយមុននេះ អាមេរិកអនុញ្ញាតឱ្យឥណ្ឌាទិញប្រេងរុស្ស៊ីដើម្បីរក្សាស្ថិរភាពទីផ្សារប្រេងឆៅលើពិភពលោកដែលកើនឡើងបន្តបន្ទាប់ ។ រីឯប្រទេសមួយចំនួនដែលទទួលបានការអនុញ្ញាតឱ្យទិញប្រេងរុស្ស៊ីលើកនេះ ពុំត្រូវបានបញ្ជាក់លម្អិតពីប្រទេសណាខ្លះទេ ។

មុនពេលកើតសង្គ្រាមនៅអ៊ុយក្រែន ប្រទេសនានានៅអឺរ៉ុបបានទិញប្រេងរុស្ស៊ីអស់រយៈពេលជាច្រើនឆ្នាំ ប៉ុន្តែដោយសាររុស្ស៊ីធ្វើសង្គ្រាមជាមួយអ៊ុយក្រែនកាលពីឆ្នាំ២០២២ ធ្វើឱ្យឧស្សាហកម្មប្រេង និងឧស្ម័នរុស្ស៊ីរងការដាក់ទណ្ឌកម្មពីសហភាពអឺរ៉ុប និងអាមេរិក តាំងពីពេលនោះមក រុស្ស៊ីក៏លក់ប្រេងឱ្យប្រទេសផ្សេងវិញ ដូចជា ៖ ឥណ្ឌា តួកគី និងចិន ៕

អ៊ីរ៉ង់គួរប្រយ័ត្នទង្វើរបស់ខ្លួនបន្តិច បើមិនចង់ឲ្យថៃលូកដៃចូលបញ្ហានៅមជ្ឈិមបូព៌ា! ព្រោះនៅខណៈនេះក្រសួងការបរទេសថៃកំពុងពិភាក្សាជាមួយទូតអ៊ីរ៉ង់ដើម្បីទាមទារឲ្យអ៊ីរ៉ង់ចេញធ្វើការសុំទោ.សជាផ្លូវការចំពោះការវា.យប្រ.ហារនាវាដឹកទំនិញរបស់ខ្លួននៅច្រកសមុទ្រ Hormuz ។

យោងតាមការចុះផ្សាយរបស់សារព័ត៌មាន The Nation របស់ថៃ នាថ្ងៃព្រហស្បត្តិ៍ ទី១២ ខែមីនា បានឲ្យដឹងថា លោកស្រី Sirilak Niyom អនុរដ្ឋលេខាធិការអចិន្ត្រៃយ៍ទទួលបន្ទុកកិច្ចការបរទេស បានជួបជាមួយលោក Nassereddin Heidari ឯកអគ្គរដ្ឋទូតនៃសាធារណរដ្ឋអ៊ីស្លាមអ៊ីរ៉ង់ប្រចាំប្រទេសថៃ ដើម្បីតវ៉ាជាផ្លូវការទៅកាន់ប្រទេសអ៊ីរ៉ង់ បន្ទាប់ពីកប៉ាល់ដឹកទំនិញដែលមានទង់ជាតិថៃមួយត្រូវបានវាយប្រហារនៅក្នុងច្រកសមុទ្រ Hormuz ។

តាមរយៈកិច្ចពិភាក្សាខាងលើនោះ ភាគីថៃបានទាមទារឱ្យអ៊ីរ៉ង់ធ្វើការសុំទោស និងការពន្យល់ច្បាស់លាស់អំពីហេតុការណ៍នេះ ខណៈអាជ្ញាធរថៃអះអាង នាវារបស់ពួកគេមិនបានបើកបរល្មើសច្បាប់អន្តរជាតិឡើយ ប៉ុន្តែនៅតែត្រូវរងការវា.យប្រហា.រដោយកងឆ្មាំបដិវត្តន៍អ៊ីស្លាម។

បើតាមរបាយការណ៍ពីប្រទេសថៃបានបង្ហាញថា កប៉ាល់នេះ មានឈ្មោះថា Mayuree Naree និងមានសមាជិកនាវិកចំនួន 23 នាក់នៅលើកប៉ាល់។ នៅខណៈពេលកំពុងធ្វើដំណើរឆ្លងកាត់ផ្លូវទឹកយុទ្ធសាស្ត្រនៅក្នុងច្រកសមុទ្រ Hormuz បន្ទាប់ពីចាកចេញពីកំពង់ផែ Khalifa ក្នុងប្រទេសអារ៉ាប់រួម Mayuree Naree ត្រូវបានវាយប្រហារយ៉ាងធ្ងន់ធ្ងរ បណ្ដាលឲ្យប៉ះពាល់ដល់សមាជិកនាវិកថៃចំនួន 23 នាក់។

បើតាមប្រភពព័ត៌មានអ៊ីរ៉ង់ក្រោយមកបាននិយាយថា ការវាយប្រហារនេះបានកើតឡើងដោយសារតែកប៉ាល់នេះត្រូវបានគេចោទប្រកាន់ថាមិនអើពើនឹងការព្រមានរបស់កងឆ្មាំបដិវត្តន៍ ដោយនៅតែចចេសឆ្លងកាត់ចូលច្រកសមុទ្រ ដែលជាផ្លូវដឹកជញ្ជូនប្រេងដ៏សំខាន់បំផុតមួយរបស់ពិភពលោក។ ហេតុការណ៍នេះបង្ហាញពីហានិភ័យកាន់តែខ្លាំងឡើងចំពោះចរាចរណ៍ផ្លូវសមុទ្រអន្តរជាតិ ខណៈដែលការប្រយុទ្ធគ្នានៅក្នុងតំបន់នៅតែបន្តកាន់តែខ្លាំងឡើង៕

ខណៈពេលដែលមនុស្សម្នារនៅទូទាំងពិភពលោកកំពុងផ្ដោតការចាប់អារម្មណ៍លើភាពតានតឹងនៃការកើនឡើងតម្លៃប្រេងដែលជាប់ពាក់ព័ន្ធនឹងសង្រ្គាមនៅអ៊ីរ៉ង់, នៅកូរ៉េខាងជើងឯណោះមេដឹកនាំដ៏មានឥទ្ធិពល គីម ជុងអ៊ុន បានអង្គុយទស្សនាការបា.ញ់បង្ហោះសាកល្បងនូវមីស៊ីល Cruise Missiles ដែលទើបអភិវឌ្ឍន៍ថ្មីយ៉ាងរីករាយ។ នេះជាសញ្ញាបង្ហាញថា កម្លាំងយោធារបស់កូរ៉េខាងជើងគឺមានសមត្ថភាពពេញលេញក្នុងការឆ្លើយតប ប្រសិនបើមានការរំខានពីប្រទេសណាមួយ។

យោងតាមប្រព័ន្ធផ្សព្វផ្សាយរដ្ឋកាលពីថ្ងៃពុធ ទី១២ ខែមីនា បានឲ្យដឹងថា មេដឹកនាំកូរ៉េខាងជើង គីម ជុងអ៊ុន បានចុះត្រួតពិនិត្យដោយផ្ទាល់នូវការបាញ់មីស៊ីល Cruise Missiles ចេញពីនាវាពិឃាតកងទ័ពជើងទឹកដែលទើបសាងសង់រួចរាល់។ មីស៊ីលទាំងនោះត្រូវបានគេរាយការណ៍ថាត្រូវបានបាញ់ឆ្ពោះទៅកាន់តំបន់គោលដៅនៅឯឆ្នេរសមុទ្រភាគខាងលិចរបស់ប្រទេស ដែលជាផ្នែកមួយនៃសមយុទ្ធយោធាដែលត្រូវបានរចនាឡើងដើម្បីបង្អួតពីសមត្ថភាពការពារជាតិ បង្ហាញពីការត្រៀមខ្លួនប្រយុទ្ធ និងពង្រឹងការទប់ស្កាត់នុយក្លេអ៊ែរ។

ការសាកល្បងមីស៊ីលនេះកើតឡើងនៅពេលដែលភាពតានតឹងកើនឡើងនៅទូទាំងតំបន់ជាច្រើនក្នុងពេលដំណាលគ្នា។ ខណៈពេលដែលមជ្ឈិមបូព៌ាកំពុងដោះស្រាយជាមួយនឹងការប្រយុទ្ធគ្នាយ៉ាងខ្លាំង ទីក្រុងព្យុងយ៉ាងនៅតែបន្តពង្រីកកម្មវិធីមីស៊ីលរបស់ខ្លួន រួមទាំងប្រព័ន្ធដែលមានសមត្ថភាពផ្ទុកក្បាលគ្រាប់នុយក្លេអ៊ែរទម្ងន់រាប់តោន និងមានសមត្ថភាពវា.យប្រហារគោលដៅបានរាប់ពាន់គីឡូម៉ែត្រ។

អ្នកវិភាគនិយាយថា ក្នុងពេលវេលានេះអាចមានបំណងបង្ហាញថាកូរ៉េខាងជើងអាចរក្សាជំហរយោធារបស់ខ្លួនបានយ៉ាងរឹងមាំ ទោះបីជាការយកចិត្តទុកដាក់ជាសកលកំពុងផ្តោតលើកន្លែងផ្សេងក៏ដោយ។ ទន្ទឹមគ្នានេះ មន្ត្រីរបស់កូរ៉េខាងជើងក៏បានរិះគន់សហរដ្ឋអាមេរិក និងសម្ព័ន្ធមិត្តរបស់ខ្លួនចំពោះសមយុទ្ធយោធានៅក្នុងតំបន់ ដោយព្រមានថា ការគំរាមកំហែងណាមួយចំពោះសន្តិសុខរបស់កូរ៉េខាងជើង នោះនឹងនាំឱ្យមាន “ការឆ្លើយតបដ៏ធ្ងន់ធ្ងរ”កើតឡើង។

បន្ថែមលើនេះ បើតាមអ្នកជំនាញផ្នែកភូមិសាស្រ្តនយោបាយក៏បាននិយាយដែរថា ការបាញ់បង្ហោះទាំងនេះបានបង្ហាញពីរបៀបដែលវិបត្តិភូមិសាស្ត្រនយោបាយជាច្រើនកំពុងកើតឡើងក្នុងពេលស្របគ្នា ដែលបង្កើនការព្រួយបារម្ភអំពីអស្ថិរភាពកាន់តែខ្លាំងឡើងនៅទូទាំងតំបន់ផ្សេងៗគ្នានៃពិភពលោក៕