ប្រទេសម៉ាឡេស៊ី ៖ ក្រោយពីសមត្ថកិច្ចថៃបានប្រព្រឹត្តអំពើហិ.ង្សាមកលើពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្តាលឱ្យដួលសន្លប់ និងរងរបួសធ្ងន់ស្រាលជាច្រើននាក់កាលពីថ្ងៃទី១៧ ខែកញ្ញា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានសុំការគាំទ្រពីប្រធានអាស៊ាន និងថ្នាក់ដឹកនាំពិភពលោក ដើម្បីជំរុញការអនុវត្តបទឈប់បា.ញ់រវាងកម្ពុជា-ថៃឱ្យមានប្រសិទ្ធភាព ។ ជាការឆ្លើយតប នាយករដ្ឋមន្ត្រីម៉ាឡេស៊ី លោក Anwar Ibrahim បានស្នើថៃឈប់ឈ្លានពាននៅភូមិព្រៃចាន់ និងដោះស្រាយបញ្ហាព្រំដែនក្នុងកិច្ចប្រជុំ JBC ។

សារព័ត៌មាន New Straits Times របស់ម៉ាឡេស៊ីរាយការណ៍ថា នាយករដ្ឋមន្ត្រីម៉ាឡេស៊ី លោក Anwar Ibrahim បានបង្ហាញក្តីបារម្ភចំពោះហេតុការណ៍ដែលកើតឡើងនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលបង្កឡើងដោយកងទ័ពឈ្លានពានថៃកាលពីថ្ងៃទី១៧ ខែកញ្ញា ព្រមទាំងស្នើឱ្យថៃឈប់បង្កសកម្មភាពឈ្លានពាននៅភូមិព្រៃចាន់ ។ លោកសំណូមពរឱ្យកម្ពុជា-ថៃដោះស្រាយបញ្ហាព្រំដែនដោយសន្តិវិធីក្នុងកិច្ចប្រជុំ JBC នាពេលខាងមុខ ។

នាយករដ្ឋមន្ត្រីម៉ាឡេស៊ី លោក Anwar បានពិភាក្សាតាមទូរស័ព្ទជាមួយនាយករដ្ឋមន្ត្រីថៃ លោក អនុថីន ឆាន់វីរៈគូន ដោយលោក Anwar បានសង្កត់ធ្ងន់លើសារៈសំខាន់នៃការរក្សាសន្តិសុខនៅតំបន់ព្រំដែនកម្ពុជា-ថៃ និងការពារកុំឱ្យជម្លោះព្រំដែនរីករាលដាលកាន់តែខ្លាំង ។

លោក Anwar បានសរសេរក្នុងហ្វេសប៊ុកថា ៖ «ខ្ញុំបានពិភាក្សាពីស្ថានការណ៍នៅតាមបណ្តោយព្រំដែនកម្ពុជា-ថៃ និងសំណូមពរឱ្យប្រទេសទាំងពីរដោះស្រាយបញ្ហាព្រំដែនដោយសន្តិវិធី និងពុំគួរបង្កើនភាពតានតឹងដែលពុំចាំបាច់ ។ ម៉ាឡេស៊ីសំណូមពរឱ្យប្រទេសទាំងពីរដោះស្រាយបញ្ហាព្រំដែនក្នុងកិច្ចប្រជុំទ្វេភាគី JBC ដែលជាការចរចាស្វែងរកសន្តិភាព និងស្ថិរភាពក្នុងតំបន់អាស៊ានយូរអង្វែង» ។

លោកជឿលើការចរចា និងការយល់ពីគ្នាទៅវិញទៅមក គឺជាវិធីល្អបំផុតក្នុងការរក្សាសន្តិភាព និងសន្តិសុខក្នុងតំបន់ ។ ក្រៅពីនេះ នាយករដ្ឋមន្ត្រីម៉ាឡេស៊ីសង្ឃឹមថា នាយករដ្ឋមន្ត្រីថៃ លោក អនុថីន នឹងធ្វើទស្សនកិច្ចជាផ្លូវការនៅម៉ាឡេស៊ីនាពេលឆាប់ៗក្រោយពីលោកកាន់តំណែងនាយករដ្ឋមន្ត្រី ដើម្បីពង្រឹងទំនាក់ទំនងរវាងប្រទេសទាំងពីរ និងពិភាក្សាពីស្ថានការណ៍ព្រំដែនកម្ពុជា-ថៃ ។

គួរបញ្ជាក់ថា កាលពីថ្ងៃទី១៨ ខែកញ្ញា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានជួបពិភាក្សាតាមទូរស័ព្ទជាមួយលោក Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន ពាក់ព័ន្ធនឹងការវិវត្តន៍នៃស្ថានការណ៍គួរឱ្យព្រួយបារម្ភនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក្នុងរយៈពេលប៉ុន្មានថ្ងៃនេះ រហូតដល់មានការប៉ះទង្គិចគ្នារវាងកងកម្លាំងប្រដាប់អាវុធថៃ និងពលរដ្ឋកម្ពុជា ដែលបណ្តាលឱ្យរងរបួសជាច្រើននាក់ ។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានស្នើឱ្យលោក Anwar ធ្វើអន្តរាគមន៍ជាបន្ទាន់ ដើម្បីបន្ធូរភាពតានតឹងរវាងកងកម្លាំងប្រដាប់អាវុធថៃ និងពលរដ្ឋកម្ពុជា ដោយឱ្យរក្សាស្ថានភាពដដែល កុំឱ្យមានការរាយបន្លាលួសបន្ថែម ឬធ្វើសកម្មភាពណាមួយដែលពង្រីកវិសាលភាពនៃជម្លោះ និងរង់ចាំដំណោះស្រាយបញ្ហាព្រំដែនពីគណៈកម្មការចម្រុះព្រំដែន (JBC) នាពេលខាងមុខ ស្របតាមការឯកភាពគ្នារវាងភាគីកម្ពុជា-ថៃក្នុងកិច្ចប្រជុំពិសេសគណៈកម្មាធិការព្រំដែនទូទៅ (GBC) កាលពីថ្ងៃទី១០ ខែកញ្ញា ឆ្នាំ២០២៥ កន្លងទៅ ៕

ប្រទេសថៃ ៖ កងទ័ពឈ្លានពានថៃបានចាប់ផ្តើមគម្រោងសាងសង់របងនៅព្រំដែនខេត្តស្រះកែវមុនគេក្រោមហេតុផលពង្រឹងសន្តិសុខ ការពារការល្មើសអធិបតេយ្យ និងផ្តល់ភាពងាយស្រួលសម្រាប់ការយាមល្បាតនៅព្រំដែន ។ ការចាប់ផ្តើមគម្រោងសាងសង់របង គឺក្រោយពីកងទ័ពថៃប្រើប្រាស់អំពើហិ.ង្សាយ៉ាងសា.ហាវព្រៃ.ផ្សៃមកលើពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ នេះបើតាមការផ្សព្វផ្សាយរបស់សារព័ត៌មាន Khaosod នៅថ្ងៃទី១៨ ខែកញ្ញា ឆ្នាំ២០២៥ ។

កាលពីថ្ងៃទី១៧ ខែកញ្ញា សមត្ថកិច្ចថៃបានបា.ញ់កាំភ្លើងគ្រាប់ជ័រ គ្រាប់បែកផ្សែង និងឧបករណ៍បំពងសំឡេងមកលើពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្តាលឱ្យហៀរទឹកភ្នែក ប៉ះពាល់ក្រដាសត្រចៀក និងប្រព័ន្ធខួរក្បាល ។ លើសពីនេះ កងទ័ពថៃបានបង្កអំពើហិង្សាដោយប្រើប្រាស់ឧបករណ៍បង្ក្រាប និងបា.ញ់ជំពាមកៅស៊ូគ្រាប់ឃ្លីបណ្តាលឱ្យពលរដ្ឋខ្មែរដួលសន្លប់ និងរងរបួសធ្ងន់ស្រាលជាច្រើននាក់ ដោយចោទប្រកាន់ពីបទល្មើសអធិបតេយ្យ ។

ការចាប់ផ្តើមគម្រោងសាងសង់របងព្រំដែន គឺក្រោមហេតុផលបង្កើនប្រសិទ្ធភាពនៃការរក្សាសុវត្ថិភាព និងសន្តិភាពនៅតាមបណ្តោយព្រំដែនជ ។ កាលពីថ្ងៃទី១៨ ខែកញ្ញា កងទ័ពថៃបានដំឡើងកាមេរ៉ាសុវត្ថិភាព CCTV នៅបង្គោលព្រំដែនលេខ៥០ ស្ថិតក្រោយព្រំដែនបានឃ្លងលឹក ស្រុកអារញ្ញប្រាថេត ខេត្តស្រះកែវ (ទល់មុខច្រកទ្វារអន្តរជាតិប៉ោយប៉ែត-ច្រកព្រំដែនអន្តរជាតិប៉ោយប៉ែត ខេត្តបន្ទាយមានជ័យ) ដែលព្រំដែនខេត្តស្រះកែវជាការទទួលខុសត្រូវរបស់កងកម្លាំងបូរ៉ាផា ។

ក្រៅពីការដំឡើងកាមេរ៉ាលើរបងព្រំដែន ក៏មានការដំឡើងប្រព័ន្ធភ្លើងបំភ្លឺ និងសូឡាផងដែរ ដើម្បីផ្តល់ភាពងាយស្រួលដល់ការយាមល្បាតព្រំដែនរបស់កងទ័ពថៃ ។ ក្រៅពីនេះ នឹងមានប្រព័ន្ធចាប់ទិន្នន័យដែលអាចរក្សាទុករូបភាពរហូតដល់៣០ថ្ងៃ ។ ទាហានឈុតខ្មៅបានកាប់ដើមឈើធំៗនៅតំបន់ព្រំដែនកម្ពុជា-ថៃ ដើម្បីឱ្យកាមេរ៉ាលើរបងចាប់រូបភាពបានច្បាស់ ហើយទាហានឈុតខ្មៅថៃនឹងកាប់ដើមឈើធំៗបន្តទៀត ។

គួរបញ្ជាក់ថា គណបក្សភឿថៃរបស់អតីតនាយករដ្ឋមន្ត្រី លោកស្រី ផេថងថាន ស៊ីណាវ៉ាត់ បានប្រគល់អំណាចឱ្យកងទ័ពថៃមានសិទ្ធិសម្រេចចិត្តបើក-បិទព្រំដែនកម្ពុជា-ថៃ និងចាត់វិធានការផ្សេងៗ ។ ពេលនេះ លោក អនុថីន ឆាន់វីរៈគូន មកពីគណបក្សភូមិចៃថៃក្លាយជានាយករដ្ឋមន្ត្រីថ្មី ក៏បានប្រគល់អំណាចឱ្យកងទ័ពថៃមានអំណាចសម្រេចចិត្តលើការងារព្រំដែនដូចគ្នា ។ វាធ្វើឱ្យកងទ័ពថៃកាន់តែខ្លាំងដៃប្រឌិតរឿងចោទប្រកាន់កម្ពុជាល្មើសអធិបតេយ្យ និងបង្កប់មីនថ្មី ខណៈពលរដ្ឋថៃជ្រុលនិយមគាំទ្រសកម្មភាពឈ្លានពានរបស់កងទ័ពខ្លួន ។

កាលពីថ្ងៃទី១៨ ខែកញ្ញា នាយករដ្ឋមន្ត្រីថៃ លោក អនុថីន បាននិយាយមកកាន់សារព័ត៌មាននៅសភាពាណិជ្ជកម្មថា កងទ័ពថៃជាអ្នកចាត់វិធានការនៅព្រំដែនខេត្តស្រះកែវ និងគ្មានការបើកព្រំដែនឡើយ រដ្ឋាភិបាលនឹងស្តាប់មតិកងកម្លាំងនៅព្រំដែន ថៃត្រូវតែរក្សាផលប្រយោជន៍ជាតិ ។ កងទ័ពជាអ្នកចាត់វិធានការ មានសិទ្ធិសម្រេចចិត្ត និងរាយការណ៍ពីបញ្ហានៅព្រំដែនខេត្តស្រះកែវ ពីព្រោះច្បាប់អាជ្ញាសឹកបានប្រកាសនៅតំបន់នេះរួចហើយ ៕

សារព័ត៌មានថៃ Khaosod រាយការណ៍កាលពីថ្ងៃទី១៨ ខែកញ្ញា ឆ្នាំ២០២៥ ថា ស្នងការនគរបាលខេត្តស្រះកែវបានត្រៀមកម្លាំងសមត្ថកិច្ចបង្ក្រាបហ្វូងមនុស្សមកពី៤ខេត្ត រួមមាន ៖ ឆាក់ឈើងសៅ ប្រាជីនបុរី រ៉ាក់យ៉ង និងឈុនបុរី ដើម្បីសហការជាមួយសមត្ថកិច្ចបង្ក្រាបហ្វូងមនុស្សនៅខេត្តស្រះកែវ ។ សមត្ថកិច្ចគ្រប់រូបនឹងប្រើប្រាស់ឧបករណ៍សម្រាប់បង្ក្រាបពលរដ្ឋខ្មែរដែលតវ៉ាការរាយបន្លាលួសរបស់កងទ័ពថៃនៅព្រំដែនខេត្តស្រះកែវ ទល់មុខភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។

កាលពីថ្ងៃទី១៧ ខែកញ្ញា សមត្ថកិច្ចថៃបានបា.ញ់កាំភ្លើងគ្រាប់ជ័រ គ្រាប់បែកផ្សែង និងឧបករណ៍បំពងសំឡេងមកលើពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្តាលឱ្យហៀរទឹកភ្នែក ប៉ះពាល់ក្រដាសត្រចៀក និងប្រព័ន្ធខួរក្បាល ។ លើសពីនេះ សមត្ថកិច្ចថៃបានបង្កអំពើហិង្សាដោយប្រើប្រាស់ឧបករណ៍បង្ក្រាប និងបា.ញ់ជំពាមកៅស៊ូគ្រាប់ឃ្លីបណ្តាលឱ្យពលរដ្ឋខ្មែរដួលសន្លប់ និងរងរបួសធ្ងន់ស្រាលជាច្រើននាក់ ដោយចោទប្រកាន់ពីបទល្មើសអធិបតេយ្យ ។

ក្រោយកើតហេតុការណ៍នេះ ស្នងការនគរបាលខេត្តស្រះកែវ លោកឧត្តមសេនីយ៍ ថាវន ឌុលយ៉ាវីត និយាយថា បានត្រៀមកម្លាំងសមត្ថកិច្ចបង្ក្រាបហ្វូងមនុស្ស ចំនួន២កងពល មកពីខេត្តឆាក់ឈើងសៅ និងប្រាជីនបុរី ព្រមទាំងចែកចាយឧបករណ៍ដល់សមត្ថកិច្ចគ្រប់រូបដើម្បីបង្ក្រាបអ្នកតវ៉ានៅព្រំដែនខេត្តស្រះកែវ ។ ក្រុមសមត្ថកិច្ចបង្ក្រាបហ្វូងមនុស្សនឹងត្រូវបញ្ជូនទៅកាន់ភូមិណងញ៉ាកែវ ស្រុកខូកស៊ូង ខេត្តស្រះកែវ ដើម្បីផ្តល់ភាពងាយស្រួលឱ្យកងទ័ពថៃរាយបន្លាលួសបន្តទៀត ។

ចំណែកលោកឧត្តមសេនីយ៍ ធិតាវ៉ាត់ សុរិយៈឆាយ ស្នងការរងនគរបាលខេត្តស្រះកែវ បានចោទប្រកាន់ពលរដ្ឋខ្មែររុះរើបន្លាលួស និងធ្វើឱ្យកងកម្លាំងថៃរងរបួស ទើបសមត្ថកិច្ចថៃប្រើប្រាស់អំពើហិង្សានៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយការប្រើប្រាស់គ្រាប់បែកផ្សែងទឹកភ្នែក និងបាញ់កាំភ្លើងគ្រាប់ជ័រដើម្បីបំបែកហ្វូងពលរដ្ឋខ្មែរ ។

កាលពីថ្ងៃទី១៨ ខែកញ្ញា លោកឧត្តមសេនីយ៍ ធិតាវ៉ាត់ និយាយថា ការត្រៀមកម្លាំងសមត្ថកិច្ចបង្ក្រាបហ្វូងមនុស្សមកពីខេត្តឆាក់ឈើងសៅ និងប្រាជីនបុរី គឺដើម្បីរួមកម្លាំងជាមួយសមត្ថកិច្ចបង្ក្រាបហ្វូងមនុស្សខេត្តស្រះកែវទប់ទល់ការតវ៉ារបស់ពលរដ្ឋខ្មែរ ដោយលោកចោទប្រកាន់ពីបទល្មើសអធិបតេយ្យ ។ លោកក៏បានត្រៀមសមត្ថកិច្ចបង្ក្រាបហ្វូងមនុស្សមកពីខេត្តរ៉ាក់យ៉ង និងឈុនបុរី មកកាន់ព្រំដែនខេត្តស្រះកែវផងដែរដើម្បីជួយគ្នាបង្ក្រាបក្រុមតវ៉ា ហើយសមត្ថកិច្ចគ្រប់រូបនឹងប្រើប្រាស់ឧបករណ៍បង្ក្រាបគ្រប់ដៃ ដោយចាត់វិធានការពីកម្រិតស្រាលទៅធ្ងន់ ។

ក្រៅពីការត្រៀមកម្លាំងសមត្ថកិច្ចជំនាញបង្ក្រាបហ្វូងមនុស្ស កងទ័ពថៃបានបញ្ជូនរថយន្តបាញ់ទឹកជាច្រើនគ្រឿងមកប្រចាំការនៅព្រំដែនភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ហើយរថយន្តបាញ់ទឹកទាំងនេះមានកម្រិតបាញ់ទឹកខ្លាំងអាចធ្វើឱ្យមនុស្សខ្ទាតឡើងលើ ។

ការប្រមូលកងកម្លាំងសមត្ថកិច្ចមកពីខេត្តនានា រួមទាំងការប្រើប្រាស់ឧបករណ៍បង្ក្រាបតូចធំគ្រប់ប្រភេទ ក៏ដូចជារថយន្តបាញ់ទឹក បង្ហាញថា កងទ័ពថៃកាន់តែប្រព្រឹត្តទង្វើព្រៃផ្សៃមកលើកម្ពុជា ។ ការឈ្លានពានរបស់ថៃគ្មានការគាំទ្រពីប្រទេសណាទេ ពិភពលោកកំពុងតែថ្កោលទោសថៃ និងស្នើឱ្យថៃបញ្ឈប់សកម្មភាពឈ្លានពានកម្ពុជាដែលជាសមាជិកអាស៊ានដូចគ្នា ៕