ប្រទេសថៃ ៖ ប្រធានសភាពាណិជ្ជកម្មខេត្តសុរិន្ទនិយាយថា ការបិទព្រំដែន និងការប៉ះទង្គិចនៅព្រំដែនកម្ពុជា-ថៃ ធ្វើឱ្យខេត្តសុរិន្ទខាតបង់សេដ្ឋកិច្ចរហូតដល់ជាង៧០០លានបាត ដោយសារភ្ញៀវទេសចរធ្លាក់ចុះ ការលុបចោលបន្ទប់ស្នាក់នៅ និងខ្វះខាតពលករខ្មែរ ។ ប្រធានសភាពាណិជ្ជកម្មខេត្តសុរិន្ទសង្ឃឹមថា ការចរចាក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃនៅម៉ាឡេស៊ី នឹងធ្វើឱ្យស្ថានការណ៍ល្អប្រសើរវិញឆាប់ៗ ជាពិសេស ពាណិជ្ជកម្មព្រំដែន ។ នេះបើតាមការផ្សព្វផ្សាយរបស់សារព័ត៌មានថៃ The Reporters នៅថ្ងៃទី៦ ខែសីហា ឆ្នាំ២០២៥ ។

លោក វីរ៉ាត់ សេដ្ឋាវីផាវឌ្ឍនៈឆ័យ ប្រធានសភាពាណិជ្ជកម្មខេត្តសុរិន្ទ បានផ្តល់សម្ភាសន៍ពីស្ថានភាពសេដ្ឋកិច្ចជារួមនៅខេត្តសុរិន្ទថា កន្លងមក ខេត្តសុរិន្ទមានតម្លៃសេដ្ឋកិច្ចតាមព្រំដែន ចាប់ពី៣០០លានបាត ទៅ៥០០លានបាត ប៉ុន្តែសេដ្ឋកិច្ចជារួមក្នុងខេត្តនេះរងផលប៉ះពាល់ចាប់ពី៦០០លានបាត ទៅជាង៧០០លានបាត តាំងពីមានសង្គ្រាមតាមបណ្តោយព្រំដែនកម្ពុជា-ថៃ ។ ភ្ញៀវទេសចរធ្វើដំណើរមកខេត្តសុរិន្ទធ្លាក់ចុះ និងលុបចោលបន្ទប់ស្នាក់នៅក្នុងសណ្ឋាគារយ៉ាងច្រើន ធ្វើឱ្យសេដ្ឋកិច្ចរួមស្ងប់ស្ងាត់ ។

បើព្រំដែនកម្ពុជា-ថៃនៅតែបន្តបិទបែបនេះ នឹងប៉ះពាល់ពាណិជ្ជកម្មតាមព្រំដែន ឬគ្មានពាណិជ្ជកម្មតែម្តង ខណៈវិស័យទេសចរណ៍ក៏ធ្លាក់ចុះ ពីព្រោះភ្ញៀវទេសចរបារម្ភពីអសន្តិសុខ ហើយសម្រេចចិត្តពុំធ្វើដំណើរមកថៃ ។ សណ្ឋាគារ និងអាជីវកម្មដែលមានបុគ្គលិកខ្មែរក៏រងផលប៉ះពាល់ដែរ ដោយសារពលរដ្ឋខ្មែរជាច្រើនត្រឡប់មកកម្ពុជា ធ្វើឱ្យថៃខ្វះខាតកម្លាំងពលកម្មផ្នែកអាជីវកម្ម ។ ថៃរងផលប៉ះពាល់ខ្លាំង អាជីវកម្មរបស់លោកមានអតិថិជនតិចតួច ដោយសារពួកគេខ្លាច ពុំហ៊ានចំណាយប្រាក់ ពុំដឹងថាជម្លោះនឹងអូសបន្លាយយូរជាងនេះឬក៏យ៉ាងណា ។

លោក វីរ៉ាត់ សេដ្ឋាវីផាវឌ្ឍនៈឆ័យ ប្រធានសភាពាណិជ្ជកម្មខេត្តសុរិន្ទ សង្ឃឹមថា កិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ នៅម៉ាឡេស៊ី នឹងធ្វើឱ្យស្ថានការណ៍ល្អប្រសើរឡើងវិញ លោកចង់ឱ្យគ្រប់យ៉ាងត្រឡប់មកធម្មតាយ៉ាងឆាប់រហ័ស ។

បើថៃបិទព្រំដែន៦ខែ ឬបិទ១ឆ្នាំ នឹងធ្វើឱ្យពាណិជ្ជកម្មតាមព្រំដែននៅខេត្តសុរិន្ទធ្លាក់ចុះខ្លាំងរងផលប៉ះពាល់រយៈពេលយូរ ករណីពាណិជ្ជកម្មព្រំដែនងើបឡើងវិញនឹងត្រូវចំណាយពេលយូរទៀត ដោយសារទំនិញថៃដែលបញ្ជូនទៅកម្ពុជា គឺជាសម្ភារៈប្រើប្រាស់ ខណៈកម្ពុជាស្វែងរកទំនិញថ្មី ។ កន្លងមក ថៃបាននាំចូលទិន្នផលកសិកម្ម ដូចជា ៖ ដំឡូងមី បច្ចុប្បន្ន ថៃត្រូវស្វែងរកដំឡូងមីក្នុងស្រុក ដែលធ្វើឱ្យតម្លៃដំឡូងមីក្នុងស្រុកកើនឡើង និងជាប្រយោជន៍សម្រាប់កសិករថៃខ្លះ ប៉ុន្តែបើនិយាយពីការនាំចេញដំឡូងមីរបស់ថៃ គឺធ្លាក់ចុះខ្លាំង ។

មុនស្ថានការណ៍តានតឹង ឈ្មួញថៃនៅស្រុកជាប់ព្រំដែនបានធ្វើដំណើរទៅកម្ពុជា ហើយពួកគេទទួលចំណូលពីការជួញដូរទិន្នផលកសិកម្ម ប៉ុន្តែពេលថៃបិទព្រំដែន និងធ្វើសង្គ្រាមជាមួយកម្ពុជាធ្វើឱ្យសេដ្ឋកិច្ចផ្នែកនេះធ្លាក់ចុះ ពុំអាចធ្វើពាណិជ្ជកម្មតាមព្រំដែនបាន ហើយឈ្មួញស្វែងរកមុខរបរថ្មី ។ បើថៃនៅតែបន្តអនុវត្តវិធានការបិទព្រំដែនជាមួយកម្ពុជា រួមទាំងស្តុកទុកទំនិញ គឺត្រូវតែរកវិធីដោះស្រាយ ឬបញ្ចេញទំនិញពីស្តុក ពីព្រោះហាងលក់ទំនិញខ្លះស្តុកទុកទំនិញយ៉ាងច្រើន ។

សភាពាណិជ្ជកម្មខេត្តសុរិន្ទធ្លាប់បានអំពាវនាវឱ្យរដ្ឋាភិបាលស្វែងរកដំណោះស្រាយបញ្ហាពាណិជ្ជកម្មតាមព្រំដែន ប្រសិនបើកម្ពុជា-ថៃនៅតែប៉ះទង្គិចគ្នាបន្តទៀត សេដ្ឋកិច្ចខេត្តសុរិន្ទនឹងកាន់តែរងផលប៉ះពាល់ខ្លាំងឡើង ៕

នៅថ្ងៃទី២ នៃកិច្ចប្រជុំថ្នាក់ក្រុមលេខាធិការនៃគណៈកម្មាធិការព្រំដែនទូទៅ(GBC) កម្ពុជា-ថៃនៅប្រទេសម៉ាឡេស៊ី ភាគីថៃបានដាក់សំណើ៨ចំណុច ដោយអះអាងថាវាជាការអនុវត្តដើម្បីរក្សានិរន្តរភាពបទឈប់បា.ញ់ដែលបានព្រមព្រៀងគ្នាកន្លងមកជាមួយកម្ពុជា។

បើតាមការលើឡើងរបស់លោក Nattaphon Narkphanit រដ្ឋមន្ត្រីក្រសួងការពារជាតិស្តីទីរបស់ប្រទេសថៃ បាននិយាយថាសំណើ៨ចំណុច គឺជាការអនុវត្តតាមការប្តេជ្ញាចិត្តថ្នាក់មូលដ្ឋានដែលបានព្រមព្រៀងគ្នាជាមុនរវាងភាគីទាំងពីរ។ លោកថា ប្រសិនបើកម្ពុជាយល់ព្រមលើសំណើរបស់ថៃទាំង៨នោះ បញ្ហាទាំងឡាយរវាងប្រទេសទាំងពីរនឹងត្រូវបានដោះស្រាយ មុនឈានដល់ថ្ងៃទី៧ ខែសីហា ឆ្នាំ២០២៥ ជាថ្ងៃដែលថ្ងៃចុងក្រោយៃកិច្ចប្រជុំកំពូលវិសាមញ្ញគណៈកម្មាធិការព្រំដែនទូទៅ(GBC) ។

ដោយឡែក ខាងក្រុមការងារកម្ពុជាមិនបានចេញសំណើច្រើននោះទេ ដោយកត់សម្គាល់ឃើញបែបនេះ លោក Nattaphon បានបន្ថែមថា វាជារឿងធម្មតាទេសម្រាប់កម្ពុជាដែលចង់ដឹងចង់ឮពីគោលបំណងប្រទេសថៃជាមុននោះ។

ចំពោះលក្ខខណ្ឌទាំង៨ដែលប្រទេសថៃចង់បាននៅក្នុងកិច្ចប្រជុំ GBC នេះមានដូចជា៖

១. ដាច់ខាតត្រូវបញ្ឈប់ការបាញ់គ្នា
២. ការពារជនស៊ីវិល គ្មានការខូចខាតដល់មនុស្ស ផ្ទះសម្បែង ឬដីធ្លី
៣. ហាមបង្កើនចំនួនទ័ព
៤- ហាមចល័តទ័ពនៅតាមព្រំដែន
៥. ជួយសម្របសម្រួលក្នុងការបញ្ជូនត្រឡប់អ្នករបួស និងអ្នកស្លាប់
៦. បង្កើតក្រុមសម្របសម្រួល៤នាក់សម្រាប់ភាគីទាំងសងខាងដើម្បីដោះស្រាយបញ្ហាជាក់ស្តែង។
៧. កែសម្រួលកម្លាំងទ័ពដើម្បីបន្ថយភាពប្រឈមនៅតំបន់ក្តៅ
៨. បើសិនឯកភាពហើយនឹងចុះកិច្ចព្រមព្រៀង ហើយវានឹងក្លាយជាកិច្ចព្រមព្រៀងផ្លូវការ។

គួរបញ្ជាក់ថា កិច្ចប្រជុំដែលបានចាប់ផ្តើមតាំងពីថ្ងៃទី០៤ ខែសីហានេះ គឺជាថ្នាក់ក្រុមលេខាធិការGBC ដែលក្នុងនោះភាគីថៃមានគណៈប្រតិភូប្រមាណជាង៣០នាក់ ខណៈភាគីកម្ពុជាមានគណៈប្រតិភូចូលរួមប្រមាណ១៣នាក់ប៉ុណ្ណោះ។

យ៉ាងណាក៏ដោយ នៅថ្ងៃទី៦ ខែសីហានេះ មានការរាយការណ៍ថា នៅថ្ងៃទី២នៃកិច្ចប្រជុំថ្នាក់លេខាធិការដ្ឋានGBC កិច្ចពិភាក្សាបានបរាជ័យ បន្ទាប់ពីលេខាធិការដ្ឋានរបស់ភាគីទាំងពីរមិនអាចដោះស្រាយបញ្ហាជាក់លាក់បាន។ តែទោះជាយ៉ាងណា កិច្ចពិភាក្សានឹងបន្តនៅថ្ងៃពុធសប្តាហ៍នេះទៀត មុនកិច្ចប្រជុំកំពូលវិសាមញ្ញគណៈកម្មាធិការព្រំដែនទូទៅ(GBC)មកដល់។ នេះបើយោងតាមមជ្ឈមណ្ឌលអាដហុក ស្ដីពីស្ថានការណ៍ព្រំដែនកម្ពុជា-ថៃ៕

ថៃ៖ បុរសម្នាក់ដែលគេជឿថាជាទាហានខ្មែរមកពីអង្គភាពពិសេស BHQ របស់កម្ពុជា និងត្រូវជាអង្គរក្សរបស់សម្ដេចតេជោ ហ៊ុន សែន ត្រូវបានចាប់ខ្លួននៅគេហដ្ឋានក្នុងប្រទេសថៃ។ អាជ្ញាធរថៃសង្ស័យថាបុរសម្នាក់នេះបានបង្កប់ខ្លួនដើម្បីបញ្ជូនចារកម្មអំពីចលនាយោធាថៃមកខាងកម្ពុជា។ នេះបើយោងតាមសារព័ត៌មាន Khaosod របស់ថៃ។

នៅថ្ងៃពុធ ទី6 ខែសីហា ឆ្នាំ2025 ប៉ុស្តិ៍នគរបាល ឡាំដួន ស្រុកក្រសាំង ខេត្ត ប៊ូរីរ៉ាំ បានបង្ហោះសារនៅលើហ្វេសប៊ុកថា “គាត់ (សំដៅលើបុរសដែលគេបានចាប់ខ្លួន) មិនបានទៅណាទេ ឆ្មាំ BHQ របស់លោក ហ៊ុន សែន ត្រូវបានក្រុមប៉ូលីស F4 នៃអង្គភាព Col. Atsadanai Pongkan របស់ស្នងការនគរបាល ឡាំដួន ។ ប៉ូលីសថៃបានអះអាងថា៖ បុរសម្នាក់នេះ មានបំណងបង្កប់ខ្លួន និងបញ្ជូនព័ត៌មាននៃការចល័តយោធាថៃទៅឲ្យខាងកម្ពុជា”។

ការបង្ហោះព័ត៌មានពីការចាប់ខ្លួនបាននោះ គឺរួមមានទាំងរូបថតបុរសម្នាក់ និងឯកសណ្ឋានយោធា អាវក្រោះ និងមួកមានផ្លាកសញ្ញា BHQ ដែលជាកម្មសិទ្ធិរបស់ទាហានខ្មែរម្នាក់មកពីអង្គភាពអង្គរក្សពិសេសរបស់សម្ដេច ហ៊ុន សែន។ មន្ត្រីប៉ូលិសថៃ បានបញ្ជាក់ប្រាបអ្នកសារព័ត៌មានថា៖ បុរសដែលគេបានចាប់ខ្លួននេះ គឺជាជនជាតិខ្មែរ ប៉ុន្តែមានប្រពន្ធជាជនជាតិថៃ ហើយគាត់ត្រូវបានចាប់ខ្លួននៅផ្ទះរបស់គាត់នៅប្រទេសថៃ។

ទោះជាយ៉ាងណា ប៉ូលីសថៃជឿជាក់ថា បុរសម្នាក់នេះគឺជាភ្នាក់ងារចារកម្មដែលកម្ពុជាបញ្ជូនមកយ៉ាងពិតប្រាកដ ដោយពួកគេបានបញ្ជាក់ថា៖ បើតាមការស៊ើបអង្កេត និងភស្តុតាងជាឯកសណ្ឋានដែលប្រមូលបាន គឺបុរសម្នាក់នេះជាកងអង្គរក្សពិសេសរបស់លោក ហ៊ុន សែន។ ពួកគេបានបង្ហាញពីក្ដីបារម្ភថា ការប្រើប្រាស់ជនបង្កប់បែបនេះ នឹងប៉ះពាល់ដល់សន្តិសុខជាតិរបស់ថៃជាខ្លាំង។

គួរជម្រាបថា ទាំងនេះគឺជាការអះអាងរបស់ក្រុមប៉ូលីសថៃ និងសារព័ត៌មានថៃតែម្ខាងប៉ុណ្ណោះ ពុំមានការបកស្រាយណាមួយចេញពីខាងកម្ពុជាឡើយ។

លើសពីនេះ បើផ្អែកតាមលក្ខខណ្ឌកំណត់ក្នុងការចូលបំពេញការងារជាមន្រ្តីរាជការ ឬជាកងកម្លាំងមិនថាក្នុងអង្គភាពណានោះទេ គឺមិនអនុញ្ញាតឲ្យបេក្ខជនដែលមានសាក់ចូលក្នុងក្របខណ្ឌឡើយ ដោយការសាក់ដែលគឺត្រូវបានកំណត់យ៉ាងតឹងរឹង និងលើកលែងតែករណីមួយចំនួនដូចជាសាក់យ័ន្តប៉ុណ្ណោះ។

ដោយឡែក បើងាកទៅមើលសភាពបុរសដែលថៃចាប់ខ្លួនបានខាងលើ គឺមិនមានលក្ខណៈសមស្របក្នុងការបម្រើតួនាទីជាកងកម្លាំងពិសេស BHQ ទាល់តែសោះ។ ម្យ៉ាងវិញទៀត ចំពោះចំណុចដែលគួរឲ្យពិចារណាគឺថា តើអ្នកណាទៅធ្វើជាជនបង្កប់ខ្លួន ដោយយកឯកសណ្ឋានទៅប្រើប្រាស់បែបនេះ? ដូច្នេះការប្រកាសខាងលើរបស់មន្រ្តីប៉ូលីសថៃ ទំនងជាមានចេតនាចង់លាបពណ៌កម្ពុជាសារជាថ្មី ព្រោះទាំងនេះជាអ្វីដែលថៃតែងតែធ្វើកន្លងមកស្រាប់ហើយ៕

ប្រទេសថៃ ៖ នៅថ្ងៃទី៦ ខែសីហា ឆ្នាំ២០២៥ សារព័ត៌មានថៃ Khaosod ផ្សព្វផ្សាយថា ពលករខ្មែរចំនួន៣ម៉ឺននាក់ ពុំអាចរស់នៅប្រទេសថៃបន្តទៀត ហើយជិះរថយន្តឈ្នួលមកកាន់ច្រកព្រំដែនអចិន្ត្រៃយ៍បានឡែម ដើម្បីត្រឡប់មកកម្ពុជាវិញរហូតស្ទះចរាចរណ៍ ។ សារព័ត៌មាន Khaosod ផ្សាយបំភ្លៃថា ពលករខ្មែរចាកចេញពីថៃ ដោយសារសាច់ញាតិទូរស័ព្ទមកប្រាប់បើពលករពុំត្រឡប់មកកម្ពុជាទេ អាចត្រូវរឹបអូសដីធ្លី និងដកសញ្ជាតិ ហើយសារព័ត៌មានថៃថា នេះជាការដាក់សម្ពាធលើពលករខ្មែរ ។

សារព័ត៌មាន Khaosod រាយការណ៍ថា ពលករខ្មែរចំនួន៣ម៉ឺននាក់ បានធ្វើដំណើរត្រឡប់មកប្រទេសកម្ពុជាវិញតាមច្រកព្រំដែនអចិន្ត្រៃយ៍បានឡែម នៅឃុំថេពនិមិត ស្រុកប៉ូងណាមរ៉ន ខេត្តចាន់បុរី (ទល់មុខច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបង) ដោយពលករខ្មែរទាំងនេះបានមករង់ចាំការបើកព្រំដែនតាំងពីម៉ោង៦ព្រឹក រហូតធ្វើឱ្យស្ទះចរាចរណ៍នៅតាមផ្លូវនានាក្នុងប្រទេសថៃ ។

ការស្ទះចរាចរណ៍ដោយសាររថយន្តឈ្នួលដឹកពលករខ្មែរធ្វើដំណើរត្រឡប់មកកម្ពុជា ហើយធ្វើឱ្យអាជ្ញាធរថៃធ្វើចរាចរណ៍ដើម្បីកុំឱ្យរថយន្តកកស្ទះ ខណៈរថយន្តពេទ្យដឹកអ្នកជំងឺសង្គ្រោះបន្ទាន់បានបើកតាមផ្លូវវាង ។ រយៈពេល២-៣ថ្ងៃមកនេះ ពលរដ្ឋខ្មែរជាច្រើនម៉ឺននាក់បានដឹកជញ្ជូនសម្ភារៈមករង់ចាំពេញបរិវេណច្រកព្រំដែនអចិន្ត្រៃយ៍បានឡែម ហើយមន្ត្រីច្រកព្រំដែនថៃបានបើកទ្វារតូច និងទ្វារធំដើម្បីឱ្យពលករខ្មែរឆ្លងដែន ខណៈខាងកម្ពុជាបើកទ្វារធំទាំង២ ឱ្យពលរដ្ឋខ្លួនឆ្លងដែន ។

ថៃសង្កេតឃើញថា នៅថ្ងៃទី៦ ខែសីហា មានរថយន្តជាច្រើនដឹកពលករខ្មែរមកកាន់ច្រកព្រំដែនខុសធម្មតា ដែលខុសគ្នាពីប៉ុន្មានថ្ងៃមុន ។ សារព័ត៌មាន Khaosod ផ្សាយបំភ្លៃថា ពលករខ្មែរសម្រុកឆ្លងដែនមកកម្ពុជាវិញ ដោយសាររដ្ឋាភិបាលកម្ពុជាចាត់វិធានការធ្ងន់ធ្ងរមកលើពលករណាដែលពុំព្រមចាកចេញពីថៃ ដូចជា ៖ រឹបអូសដីធ្លី និងដកសញ្ជាតិ ។

សារព័ត៌មាន Khaosod ចោទប្រកាន់ថា មានការដាក់សម្ពាធឱ្យគ្រួសារពលករដែលរស់នៅកម្ពុជាព្យាយាមទំនាក់ទំនងមកសាច់ញាតិនៅថៃ ឱ្យប្រញាប់ត្រឡប់មកកម្ពុជា ទើបធ្វើឱ្យពលករខ្មែរជ្រួលច្របល់ ។ នាវេលាម៉ោង១១និង៤០នាទី ថ្ងៃទី៦ ខែសីហា មានពលករខ្មែរឆ្លងដែនមកកម្ពុជា ប្រមាណ៣ម៉ឺននាក់ តាមច្រកព្រំដែនអចិន្ត្រៃយ៍បានឡែម ហើយដោយសារមានរថយន្តដឹកពលករខ្មែរបើកមកច្រកព្រំដែនជាបន្តបន្ទាប់ទៀត គឺធ្វើឱ្យចំនួនពលករខ្មែរដែលត្រឡប់មកកម្ពុជាកើនឡើងដល់៥ម៉ឺននាក់ នៅថ្ងៃដដែល ។

គួរបញ្ជាក់ថា ការត្រឡប់មកវិញរបស់ពលករខ្មែរ ពុំមែនបណ្តាលមកពីរដ្ឋាភិបាលរឹបអូសដីធ្លី និងដកសញ្ជាតិទេ រដ្ឋាភិបាលកម្ពុជាគ្មានវិធានការបែបនេះជាមួយពលរដ្ឋខ្លួនឡើយ ។ ការត្រឡប់មកកម្ពុជា គឺជាការស្ម័គ្រចិត្តរបស់ពលករដោយសារពិបាករស់នៅថៃបន្តទៀត ហើយពលករខ្មែរយល់ថា គ្មានកន្លែងណាកក់ក្តៅជាងផ្ទះរបស់ខ្លួនឡើយ ៕