ជនជាតិថៃ ២នាក់ត្រូវអាជ្ញាធរកម្ពុជាឃា.ត់ខ្លួន ករណីបា.ញ់បោះសេរីនៅក្បែរព្រំដែន

បន្ទាយមានជ័យ៖ កុំឲ្យចេះតែព្រហើ.ន! ជនជាតិថៃ2នាក់ ត្រូវបានកម្លាំងកងរាជអាវុធហត្ថក្រុងប៉ោយប៉ែតធ្វើការឃា.ត់ខ្លួនបញ្ជូនមកដេកប៉ុស្តិ៍ប៉ូលីសទាំងយប់ បន្ទាប់ពីគេត្រូវបានប្រទះឃើញបា.ញ់បោះសេរី និងប្រើប្រាស់អាវុធដោយខុសច្បាប់នៅក្បែរព្រំដែនកម្ពុជា-ថៃ ស្ថិតក្នុងក្រុងប៉ោងប៉ែត ខេត្តបន្ទាយមានជ័យ។

បើតាមប្រភពពីសមត្ថកិច្ចបានឲ្យដឹងថា ហេតុការណ៍នេះ បានកើតឡើងកាលពីវេលាម៉ោង១២ និង៤១នាទីរំលងអធ្រាតឈានចូល ថ្ងៃទី៣ ខែតុលា ឆ្នាំ២០២៥ ពេលដែលកម្លាំងល្បាតចម្រុះរបស់កងរាជអាវុធហត្ថក្រុងប៉ោយប៉ែត សហការជាមួយក្រុមល្បាតព្រំដែន បានចុះត្រួតពិនិត្យ នៅចំណុចមុខបុរីស្តាហ្គោល ភូមិព្រៃព្រិច សង្កាត់អូរជ្រៅ ក្រុងប៉ោយប៉ែត។

កងរាជអាវុធហត្ថបានឱ្យដឹងថា ជនសង្ស័យមានឈ្មោះ ផាចារាក់ ខៅផូ ( PATCHARA KHAOPHO ) ភេទប្រុស អាយុ២៧ឆ្នាំ ជាជនជាតិថៃ ជាម្ចាស់អាវុធ។ ឈ្មោះ ឡាំភុម រ៉ាត់តាណាក់កែវមន្នី (RAMPUM RATTANAKAEWMANEE) ភេទប្រុស អាយុ២២ឆ្នាំ ជាជនជាតិថៃ ពួកគេទាំង២ស្នាក់នៅម្ដុំវត្តជាយដែន ស្ថិតក្នុងភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ ពេលឃាត់ខ្លួនកងរាជអាវុធហត្ថបានរកឃើញ និងដកហូតវត្ថុតាងជាអាវុធខ្លីម៉ាក ស៉ិចសាយអឺ (SIG SAUER) ពណ៌ខ្មៅ លេខតួ 66A986594 ចំនួន១ដើម បង់ចំនួន១ គ្រាប់ចំនួន១០គ្រាប់ និងសំបកគ្រាប់បាញ់រួចចំនួន៤គ្រាប់។

បច្ចុប្បន្នជនសង្ស័យទាំង២នាក់ ត្រូវបានឃុំខ្លួននៅទីបញ្ជាការកងរាជអាវុធហត្ថក្រុងប៉ោយប៉ែត ដើម្បីសាកសួរ ខណៈសមត្ថកិច្ចចាត់ការបន្តតាមនិតិវិធីច្បាប់។ មន្ត្រីកងរាជអាវុធហត្ថបញ្ជាក់ថា ករណីនេះនឹងត្រូវបានចាត់ការតាមច្បាប់ប្រទេសកម្ពុជា៕