ទន្ទឹមនឹងតារាថៃបង្ហាញទង្វើហាក់ដូចជាសើចចំអកមកខាងកម្ពុជាតារាចម្រៀង ណុប បាយ៉ារិទ្ធ ថាកន្លងមកនេះយើងឱ្យតម្លៃតារាផ្ទះលេខ២រហូតលែងឃើញតម្លៃតារាខ្លួនឯង ប៉ុន្តែពេលនេះគ្មានអាយដលអ្វីទៀតទេ និងចងចាំមួយជីវិត។ តារាចម្រៀងរូបនេះក៏លើកចំណុចមួយចំនួនដែលទទួលបានពីការឈ្លានពានថៃលើកនេះ។

លោក ណុប បាយ៉ារិទ្ធ បានសរសេរនៅលើបណ្តាញសង្គមយ៉ាងដូច្នេះថា «កន្លងមកយើងឱ្យតម្លៃតារាប្រទេសនោះលើសលុបពេកហើយ រហូតពេលមើលលែងឃើញតម្លៃតារាខ្លួនឯង ។ ល្មមៗគេទៅជួលថៃ គេអត់យកយើងទេ ហើយជួលថៃអត់តថ្លៃមួយម៉ាត់ទេ ជួលហើយតថ្លៃដូចទិញនំ។ ទទួលស្គាល់អាចថាយើងមិនស្អាតដូចគេ សមត្ថភាពមិនដល់គេ តែកាលៈទេសៈនេះឃើញច្បាស់និងភ្នែកហើយ ដូច្នេះបើបងប្អូន អូនៗនៅតែស្រលាញ់តារាគេជាងតារាប្រទេសខ្លួនឯង ក៏ស្រលាញ់ចុះ ខ្ញុំមិនច្រណែន មិនអន់ចិត្តទេ តែសម្រាប់ខ្ញុំសូមគូសហើយ។ Rip no more Idol no more favorites អីទៀតទេ តែប៉ុណ្ណឹងចោះខួរចាំមួយជីវិត អត់បានញុះញុងអ្នកណាឱ្យរើសអើងជាតិសាសន៍ជាមួយខ្ញុំទេ តែពិចារណាខ្លួនឯង»។

ជុំវិញមន្ទីរពេទ្យថៃមួយចំនួនបានប្រកាសផ្អាកទទួលអ្នកជំងឺជាប្រជាជនកម្ពុជា តារាចម្រៀងប្រចាំផលិតកម្មរស្មីហង្សមាសរូបនេះបានលើកឡើងថា «សៀមប្រកាសឈប់ទទួលអ្នកជំងឺកម្ពុជា កម្ពុជាប្រកាសថាឈប់ឈឺទៀត ទុកឱ្យប្រជាជនសៀមឈឺឱ្យច្រើន»។

រយៈពេល៥ថ្ងៃចាប់តាំងពីថ្ងៃទី២៤ កក្កដា ដល់ថ្ងៃទី២៨ កក្កដា ដែលថៃឈ្លានពានទឹកដីខ្មែរ តារាចម្រៀង ណុប បាយ៉ារិទ្ធ បានចែករំលែកថាសង្គ្រាមមួយនេះបង្រៀនយើង៖
បណ្តុះឆន្ទៈជាតិនិយមឱ្យកាន់តែខ្លាំង។ គោរពដឹងគុណនិងកាន់តែជឿជាក់លើប្រមុខថ្នាក់ដឹកនាំកំពូល។ គោរពដឹងគុណពីវិរៈភាពរបស់កងទ័ព។ ទោះមិនបានកាន់អាវុធក្នុងសមរភូមិ តែក៏ត្រូវតែក្លាហានធ្វើសមរភូមិប្រយុទ្ធទៅតាមចំណេះជំនាញ។ រួមកម្លាំង រួមស្មារតី កម្លាំងសាមគ្គីជាតិខ្មែរ ខ្មែរតែមួយ។ មិនបោះបង់ចោលគ្នាក្នុងគ្រាលំបាក។ ក្លាហានក្នុងការបង្កើតជាសម្លេងពិតទៅកាន់ពិភពលោក។

លោក ណុប បាយ៉ារិទ្ធ បានលើកឡើងថា «បើទោះជាស្ថិតក្នុងកាលៈទេសៈណាក៏ដោយឱ្យតែយើងរួមគ្នា ចេះស្រលាញ់គ្នា ចេះជួយគ្នា សាមគ្គីគ្នា នោះគ្មានសត្រូវណាមួយអាចយកឈ្នះយើងបានឡើយ ។ ការដឹងគុណគឺជាកាតព្វកិច្ចដ៏មិនអាចខ្វះបាន មកដល់ពេលនេះម៉ោងនេះទោះសម្លេងគ្រាប់កាំភ្លើងបានស្ងាត់ ស្ថានភាពវឹកវរបានស្រាកស្រាន្ត តែយើងនៅតែត្រូវការនៅភាពយុត្តិធម៌សម្រាប់ប្រទេសដ៏កម្សត់របស់យើង សូមឱ្យកម្ពុជាទទួលបាននៅភាពយុត្តិធម៌ សូមឱ្យពិភពលោកបែងចែកនិងកាត់សេចក្តីប្រកបដោយគុណធម៌ និង យុត្តិធម៌ រវាង ជនឈ្លានពាន និង ជនរងគ្រោះ៕

ប្រទេសថៃ ៖ នៅថ្ងៃទី៣១ ខែកក្កដា ឆ្នាំ២០២៥ គណបក្សប្រជាជននៅប្រទេសថៃបានស្តីបន្ទោសមន្ទីរពេទ្យថៃមួយនៅខេត្តឧប៊ុនរ៉ាជថានី ឈ្មោះ «Sunpasitthiprasong Hospital» ក្រោយពីមន្ទីរពេទ្យនេះចេញសេចក្តីប្រកាសបន្ទាន់ផ្អាកព្យាបាលអ្នកជំងឺខ្មែរ ។ គណបក្សប្រជាជនយល់ឃើញថា ការធ្វើបែបនេះ គឺខុសនឹងគោលការណ៍មនុស្សធម៌ និងធ្វើឱ្យខូចកេរ្តិ៍ឈ្មោះប្រទេសថៃនៅលើពិភពលោក ។

គណបក្សប្រជាជនបានចេញសេចក្តីថ្លែងការណ៍មួយថា វីធីតែមួយគត់ដែលថៃអាចធ្វើបាន គឺត្រូវតែប្រកាន់យកនូវគោលការណ៍មនុស្សធម៌ស្របតាមច្បាប់អន្តរជាតិ និងលុបចោលជាបន្ទាន់នូវការរើសអើងជាតិសាសន៍ ។

គណបក្សប្រជាជនយល់ឃើញថា ប្រទេសថៃអាចឱ្យពិភពលោកមើលក្នុងផ្លូវល្អ ជាពិសេស ពេលមានស្ថានការណ៍ប៉ះទង្គិចជាមួយប្រទេសជិតខាង លុះត្រាតែថៃប្រកាន់យកគោលការណ៍មនុស្សធម៌ និងគោរពច្បាប់អន្តរជាតិយ៉ាងម៉ឺងម៉ាត់ ទើបធ្វើឱ្យប្រទេសថៃពុំចាញ់ប្រៀបលើឆាកអន្តរជាតិ ជាពិសេស អនុសញ្ញាទីក្រុងហ្សឺណែវ ចំនួន៤ច្បាប់ ចុះថ្ងៃទី១២ ខែសីហា ឆ្នាំ១៩៤៩ ។

ប្រទេសថៃបានចុះហត្ថលេខាក្នុងអនុសញ្ញានេះនៅឆ្នាំ១៩៥៤ ដែលបញ្ជាក់ថា កងទ័ព និងបុគ្គលណាមួយដែលរងរបួស ឬឈឺថ្កាត់ គឺថៃត្រូវតែព្យាបាលបុគ្គលទាំងនេះតាមគោលការណ៍មនុស្សធម៌ ដោយពុំគិតពីលក្ខណៈគ្រោះថ្នាក់ និងគិតពីភាពខុសគ្នារវាងភេទ ជាតិសាសន៍ សញ្ជាតិ សាសនា ការយល់ឃើញផ្នែកនយោបាយ ឬមូលហេតុផ្សេងៗស្រដៀងនេះ ។

ការរើសអើងជាតិសាសន៍របស់មន្ទីរពេទ្យក្នុងការព្យាបាលអ្នកជំងឺ ចាត់ទុកថា ថៃប្រឆាំងនឹងគោលការណ៍ «International Humanitarian Law» ដែលនឹងធ្វើឱ្យថៃខូចកេរ្តិ៍ឈ្មោះលើពិភពលោក ព្រមទាំងប្រឈមត្រូវកម្ពុជាយកបញ្ហាមន្ទីរពេទ្យថៃរើសអើងអ្នកជំងឺខ្មែរប្រាប់ទៅពិភពលោក ។

គណបក្សប្រជាជនទទួលបានព័ត៌មានថា ក្រសួងសុខាភិបាល និងក្រុមប្រឹក្សាវេជ្ជសាស្ត្រ រួមទាំងមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានទទួលជូនដំណឹងពីមន្ទីរពេទ្យថៃរើសអើងអ្នកជំងឺខ្មែររួចហើយ ។ ហេតុនេះ សូមឱ្យភ្នាក់ងារពាក់ព័ន្ធទាំងអស់ពន្លឿនការចេញសេចក្តីណែនាំច្បាស់លាស់ស្របតាមគោលការណ៍អន្តរជាតិ ។

គណបក្សប្រជាជនសូមបញ្ជាក់ឡើងវិញថា សង្គ្រាមកម្ពុជា-ថៃនេះ គឺជាសង្គ្រាមរវាងរដ្ឋ និងរដ្ឋ យើងពុំត្រូវការឱ្យជម្លោះនេះរាលដាលនាំឱ្យមានការស្អប់ខ្ពើមរវាងពលរដ្ឋទេ ពីព្រោះនៅទីបំផុត កម្ពុជា និងថៃ នៅតែមានទំនាក់ទំនងផ្លាស់ប្តូរសេដ្ឋកិច្ច និងសង្គមបន្តទៀត ៕

ប្រទេសម៉ាឡេស៊ី ៖ ប្រធានាធិបតីអាមេរិក លោក Donald Trump នឹងមកចូលរួមកិច្ចប្រជុំកំពូលអាស៊ាន ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី នាខែតុលាខាងមុខ ។ នេះបើតាមការផ្សព្វផ្សាយរបស់សារព័ត៌មានម៉ាឡេស៊ី នៅថ្ងៃទី៣១ ខែកក្កដា ឆ្នាំ២០២៥ ក្រោយពីសម្ភាសន៍ជាមួយលោក Anwar Ibrahim នាយករដ្ឋមន្ត្រីម៉ាឡេស៊ី ។

លោក Anwar Ibrahim នាយករដ្ឋមន្ត្រីម៉ាឡេស៊ីនិយាយមកកាន់សារព័ត៌មានថា ប្រធានាធិបតីអាមេរិក លោក Trump បាននិយាយទូរស័ព្ទជាមួយលោកនៅព្រឹកថ្ងៃទី៣១ ខែកក្កដា ដោយលោក Trump សរសើរម៉ាឡេស៊ីយ៉ាងខ្លាំងដែលបានធ្វើជាម្ចាស់ផ្ទះ និងសម្របសម្រួលការចរចាកិច្ចព្រមព្រៀងបទឈប់បាញ់បន្ទាន់ដោយឥតលក្ខខណ្ឌ ដើម្បីជួយដោះស្រាយជម្លោះរវាងកម្ពុជា និងថៃ ។

ក្រៅពីនេះ លោក Trump ក៏បាននិយាយជាមួយនាយករដ្ឋមន្ត្រីម៉ាឡេស៊ីអំពីពាណិជ្ជកម្ម ពន្ធទំនិញ និងការចរចាដែលកំពុងបន្តរវាងក្រសួងវិនិយោគ ពាណិជ្ជកម្ម និងឧស្សាហកម្ម (MITI) ព្រមទាំងនិយាយពីតំណាងពាណិជ្ជកម្មអាមេរិក និងរដ្ឋមន្ត្រីក្រសួងពាណិជ្ជកម្មអាមេរិក ។ លោក Trump បានសម្រេចចិត្តពិនិត្យមើលអត្រាពន្ធឡើងវិញនៅថ្ងៃទី១ ខែសីហា ដែលអាមេរិកកំណត់ជាមួយម៉ាឡេស៊ី ។

ចំណែកលោក Marco Rubio រដ្ឋមន្ត្រីក្រសួងការបរទេសអាមេរិក ដែលកំពុងស្ថិតនៅទីក្រុងកូឡាឡាំពួរ ប្រទេសម៉ាឡេស៊ីនៅខែកក្កដា ដើម្បីចូលរួមកិច្ចប្រជុំរដ្ឋមន្ត្រីការបរទេសអាស៊ាន លើកទី៥៨ ក្រោមការរៀបចំរបស់ម៉ាឡេស៊ីក្នុងឋានៈជាប្រធានអាស៊ាន ឆ្នាំ២០២៥ និយាយថា រដ្ឋាភិបាលក្រុងវ៉ាស៊ីនតោនកំពុងកំណត់ថ្ងៃសម្រាប់ដំណើរទស្សនកិច្ចរបស់លោក Trump មកកាន់ម៉ាឡេស៊ី ។

កិច្ចប្រជុំកំពូលអាស៊ាន-អាមេរិក លើកទី១៣ គ្រោងធ្វើឡើងស្របពេលកិច្ចប្រជុំកំពូលអាស៊ាន លើកទី៤៧ ផងដែរ ។ កន្លងមក លោក Marco Rubio រដ្ឋមន្ត្រីក្រសួងការបរទេសអាមេរិកនិយាយថា លោក Trump នឹងធ្វើដំណើរមកចូលរួមកិច្ចប្រជុំកំពូលអាស៊ាន (Asean Summit) លើកទី៤៧ នាខែតុលាខាងមុខ ។

សារព័ត៌មានម៉ាឡេស៊ីរាយការណ៍ថា លោក Anwar Ibrahim នាយករដ្ឋមន្ត្រីម៉ាឡេស៊ីបានអញ្ជើញប្រធានាធិបតីអាមេរិក លោក Trump ចូលរួមកិច្ចប្រជុំកំពូលអាស៊ាន-អាមេរិក និងកិច្ចប្រជុំកំពូលអាស៊ីបូព៌ា ៕

ក្រុងស៊ាងហៃ៖ ទីក្រុងសៀងហៃបានធ្លាក់ចូលទៅក្នុងរបៀបអាសន្ននៅថ្ងៃពុធ (ទី ៣០ ខែកក្កដា) ដោយសារព្យុះត្រូពិច Co-May បានវាយលុកភាគខាងកើតប្រទេសចិន ខណៈដែលការរញ្ជួយដីដ៏ធំមួយនៅឧបទ្វីប Kamchatka របស់រុស្ស៊ីបានបង្កឱ្យមានការព្រមានអំពីរលកយក្សស៊ូណាមិពាសពេញតំបន់ប៉ាស៊ីហ្វិក រួមទាំងនៅតាមឆ្នេរសមុទ្ររបស់ប្រទេសចិនផងដែរ។

ពលរដ្ឋជាង ២៨០,០០០ ត្រូវបានជម្លៀសពីតំបន់ងាយរងគ្រោះ ខណៈដែលអាជ្ញាធរបានទប់ទល់នឹងផលប៉ះពាល់នៃព្យុះ Co-May ដែលបានវាយប្រហារនៅ Zhoushan ខេត្ត Zhejiang នៅព្រឹកព្រលឹម។ ព្យុះនេះបានបោកបក់តំបន់នេះជាមួយនឹងកម្លាំងខ្យល់បក់ខ្លាំង រហូតដល់ ៨៣ គីឡូម៉ែត្រក្នុងមួយម៉ោង និងភ្លៀងធ្លាក់យ៉ាងខ្លាំងដែលបានជន់លិចតំបន់ទំនាប។ នៅទីក្រុងសៀងហៃ ទឹកភ្លៀងបានឡើងដល់ ១០០ មីលីម៉ែត្រ ក្នុងរយៈពេល ៦ម៉ោង ដែលស្មើនឹងកម្ពស់ទឹកភ្លៀងមួយខែ។

ជាមួយគ្នានេះ អាជ្ញាធរបានប្រកាសបិទដំណើរការជើងហោះហើរជាង ៦៤០ ជើង ដោយមាន ៤១០ នៅអាកាសយានដ្ឋានអន្តរជាតិ Pudong និង ២៣០ នៅ Hongqiao ។ សេវាដឹកជញ្ជូនផ្លូវទឹកត្រូវបានផ្អាក ខណៈចរាចរណ៍ផ្លូវគោកត្រូវបានដាក់កម្រិតល្បឿនត្រឹម ៦០ គីឡូម៉ែត្រក្នុងមួយម៉ោងនៅលើផ្លូវហាយវេ និងល្បឿនរថភ្លើងក៏ត្រូវបន្ថយមកត្រឹម ១២០ គីឡូម៉ែត្រក្នុងមួយម៉ោង ផងដែរ។

នៅពេលដែលខ្យល់របស់ព្យុះ Co-May បានបក់បោកឆ្នេរសមុទ្រ វិបត្តិទីពីរក៏បានកើតមានឡើងផងដែរ។ គ្រោះរញ្ជួយដីកម្រិត ៨.៨រ៉ិចទ័រ បានវាយប្រហារនៅមហាសមុទ្រប៉ាស៊ីហ្វិក ក្បែរឧបទ្វីប Kamchatka របស់រុស្ស៊ី ដែលមានចម្ងាយជាង ៤,០០០គីឡូម៉ែត្រពីទីក្រុងសៀងហៃ។ ការរញ្ជួយនេះបានបង្កឱ្យមានការព្រមានអំពីរលកយក្សស៊ូណាមិនៅទូទាំងប្រទេសជាច្រើន រួមទាំងប្រទេសចិន ជប៉ុន និងសហរដ្ឋអាមេរិកផងដែរ។

មជ្ឈមណ្ឌលព្រមានរលកយក្សស៊ូណាមិរបស់ប្រទេសចិនបានចេញការប្រកាសអាសន្នកម្រិតពណ៌លឿង ដោយព្យាករណ៍ថា រលកអាចមានកម្ពស់ចន្លោះពី ០,៣ ទៅ ១,៨ ម៉ែត្រ។ ទោះជាយ៉ាងណា បន្ទាប់មកអាជ្ញាធរបានបញ្ជាក់ថា ទឹករលកដែលប៉ះទីក្រុងសៀងហៃ មិនអាចលើសពីកម្រិតគ្រោះថ្នាក់នោះទេ ហើយការប្រមាននោះត្រូវបានលុបចោលវិញនៅថ្ងៃដដែលនោះ។

យ៉ាងណាមិញ ទោះបីជាមានការគំរាមកំហែងពីគ្រោះធម្មជាតិពីរជាប់គ្នាក៏ដោយ ក៏មិនមានសេចក្ដីរាយការណ៍អំពីអ្នករងគ្រោះ ឬមានការខូចខាតធ្ងន់ធ្ងរឡើយ។ ប៉ុន្តែតំបន់ឆ្នេរក្នុងទីក្រុង Zhoushan បានជួបប្រទះនូវទឹកជំនន់ និងដាច់ចរន្តអគ្គិសនី តែស្ថានភាពនៅតែស្ថិតក្រោមការគ្រប់គ្រងបាន។ មន្ត្រីបានជំរុញឲ្យអ្នកស្រុករក្សាការប្រុងប្រយ័ត្ន ព្រោះអាកាសធាតុអាចនឹងមិនមានស្ថិរភាពទេនៅប៉ុន្មានថ្ងៃខាងមុខ។

ការឆ្លើយតបយ៉ាងឆាប់រហ័ស និងសមស្របរបស់អាជ្ញាធរ ក្រុងសៀងហៃ បានបង្ហាញពីសមត្ថភាពបង្ការគ្រោះអាសន្ន និងការសហការជាឯកភាពរវាងមន្ទីរសង្រ្គោះ អាជ្ញាធរដឹកជញ្ជូន និងមន្ទីរប្រយុទ្ធគ្រោះមហន្តរាយ ដើម្បីការពារសុវត្តិភាពប្រជាជនដែលមានជាង ២៥លាននាក់ នៅក្នុងទីក្រុង៕

ថៃ៖ Boonsin Padklang មេបញ្ជាការតំបន់កងទ័ពទី២ បានបញ្ជាក់ថា ថៃនឹងដោះលែងកងកម្លាំងទាហានខ្មែរចំនួន១៨នាក់ឲ្យវិលមកមាតុភូមិវិញ នៅពេលដែលដំណើរការនីតិវិធីច្បាប់អន្តរជាតិបានបញ្ចប់រួចសព្វគ្រប់ ប៉ុន្តែមិនទាន់អាចបញ្ជាក់បានថានៅពេលណានោះទេ។ នេះបើយោងតាមសារព័ត៌មាន Khaosod។

នៅថ្ងៃព្រហស្បត្តិ៍ ទី៣១ ខែកក្កដា ឆ្នាំ២០២៥ នៅទីបញ្ជាការកងទ័ពភូមិន្ទថៃ ឧត្តមសេនីយ៍ទោ Winthai Suvaree អ្នកនាំពាក្យកងយោធពលភូមិន្ទថៃ បានលើកឡើងពីបញ្ហារបស់នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ដែលបានទាមតារឱ្យមានការដោះលែងចំណាប់ខ្មាំងដែលជាទាហានកម្ពុជាចំនួន១៨នាក់ឲ្យត្រឡប់មកមាតុភូមិវិញ។

ជាមួយនឹងការទាមទារនេះ លោក Winthai បានបញ្ជាក់ថា លោក Boonsin Padklang មេបញ្ជាការកងទ័ពតំបន់ភូមិទី២ បានបំភ្លឺជូនលោកឧត្តមសេនីយ៍ Dato’ Mohammad Nizam Jaafar អគ្គមេបញ្ជាការនៃកងកម្លាំងប្រដាប់អាវុធម៉ាឡេស៊ីរួចហើយ ក្នុងកិច្ចប្រជុំកាលពីថ្ងៃទី២៩ ខែកក្កដា ថាពួកគេនឹងប្រកាន់ខ្ជាប់នូវលក្ខខណ្ឌច្បាប់អន្តរជាតិ ហើយនឹងពន្លឿនការធ្វើមាតុភូមិនិវត្តន៍កងទ័ពកម្ពុជា នៅពេលដំណើរការផ្លូវច្បាប់បានបញ្ចប់។

ប៉ុន្តែនៅពេលសួរថា តើវាអាចនឹងសម្រេចនៅពេលណា? លោក Winthai មិនអាចបញ្ជាក់ថានឹងត្រូវចំណាយពេលប៉ុន្មាននោះទេ។

គួរជម្រាបថា បើតាមអ្នកនាំពាក្យក្រសួងការពារជាតិកម្ពុជា លោកស្រី ម៉ាលី សុជាតា នៅថ្ងៃនេះបានបញ្ជាក់ថា មកទល់ពេលនេះ កម្ពុជាទទួលបានស.ពទាហានចំនួន១រូប និងនៅសល់២០រូបទៀត ខណៈភាគីថៃអះអាងថានៅសល់តែ១៨នាក់ទៀតប៉ុណ្ណោះ ដែលកំពុងស្ថិតនៅក្រោមការគ្រប់គ្រងរបស់ថៃ។

យ៉ាងណាក៏ដោយ នេះគឺជារឿងដែលគួរឲ្យឈឺចាប់បំផុត ព្រោះទាហានខ្មែរទាំងអស់នោះ ត្រូវបានកងកម្លាំងថៃព័ទ្ធចាប់ខ្លួន ក្រោយពេលបទឈប់បា.ញ់បានចូលជាធរមានទៅហើយ នាម៉ោង៧:៥០នាទីព្រឹក ថ្ងៃទី២៩ ខែកក្កដា ឆ្នាំ២០២៥។ ក្រសួងការពារជាតិកម្ពុជា ក៏បានអំពាវនាវឲ្យភាគីថៃមើលថែរក្សាកងកម្លាំងកម្ពុជាដែលស្ថិតនៅក្រោមការគ្រប់គ្រងរបស់ខ្លួនឲ្យបានល្អ និងឆាប់ដោះលែងពួកគាត់វិញឲ្យបានឆាប់រហ័សបំផុត ស្របទៅតាមច្បាប់មនុស្សធម៌អន្តរជាតិ៕

កម្លាំងអង្គភាពសុីម៉ាក់កម្ពុជា បានចុះទៅត្រួតពិនិត្យ និងដោះគ្រាប់បែ.កទម្ងន់ជិតមួយតោន មានប្រវែងប្រមាណ3.5ម៉ែត្រ បន្ទាប់ពីមានការរាយការណ៍ពីសំណាក់ប្រជាពលរដ្ឋ ថាបានប្រទះឃើញគ្រាប់បែ.កដ៏ធំនោះ នៅក្នុងបរិវេណដីផ្ទះរបស់គាត់។ បើតាមលោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានឲ្យដឹងថា គ្រាប់នេះគឺជាស្នាដៃទម្លាក់របស់កងទ័ពអាកាសថៃ។

នៅព្រឹកថ្ងៃទី៣០ ខែកក្កដា ឆ្នាំ២០២៥នេះ កម្លាំងអង្គភាពសុីម៉ាក់ឆ្លេីយតបសំណេីរបស់ប្រជាពលរដ្ឋដែលរងគ្រោះដោយការទម្លាក់គ្រាប់បែកចំផ្ទះរបស់គាត់ បានដឹកនាំកម្លាំងចុះត្រួតពិនិត្យ និងប្រទះឃើញនូវគ្រាប់បែ.កប្រភេទ MK-84 មានទម្ងន់ជិត១តោន (១,០០០គីឡូក្រាម) មានប្រវែងសរុបប្រមាណ៣.៥ម៉ែត្រ មានជាតិផ្ទុះជាង៥០០គីឡូក្រាម ជាគ្រាប់បែកមានទំហំធំជាងបំផុតក្នុងចំណោមប្រភេទគ្រាប់បែកក្នុងក្រុមគ្រាប់បែកMK (MK-81, MK82, MK-83 និងMK-84) ដែលបានទម្លាក់ដោយកងទ័ពអាកាសសៀមកាលពីកន្លងទៅថ្មីនេះ។

លោក ហេង រតនា បានបន្ថែមថា៖ គ្រាប់បែកប្រភេទ MK-84 នេះ ក៏កម្រប្រេីប្រាស់ទម្លាក់ណាស់ កាលពីសម័យសង្គ្រាមឥណ្ឌូចិន។

យ៉ាងណាមិញ អាចថាវាជាសំណាងដ៏ធំមួយសម្រាប់ពលរដ្ឋដែលជាម្ចាស់ផ្ទះ ដែលគ្រាប់បែ.កយក្សនេះត្រូវបានគេទម្លាក់មកលើផ្ទះចំពេលដែលគ្មានមនុស្សនៅ ហើយកាន់តែសំណាងទៀតនោះគឺវាមិនបានផ្ទុះ ព្រោះបើមិនដូច្នេះទេ ប្រហែលជាពេលត្រឡប់មកពីភៀសសឹកវិញ សូម្បីតែសំបកផ្ទះរបស់គាត់ក៏មិននៅសេសសល់ផង។

គួរជម្រាបថា នេះជាភស្តុតាងជាក់ស្ដែងដែលបញ្ជាក់ថា យោធាថៃពិតជាបានប្រើប្រាស់នូវសព្វាវុធ និងគ្រឿងយុទ្ធភ័ណ្ឌធុនធ្ងន់មកគំរា.មកំហែងដល់ជីវិតជនសុីវិលកម្ពុជា ដែលមានតាំងបីយន្តហោះចម្បងF16 គ្រាប់បែ.កចង្កោម គ្រាប់បែ.កដែលមានជាតិផ្ទុះខ្លាំងក្លាដូចជាប្រភេទ MK-84 នេះជាដើម។ សកម្មភាពរបស់យោធាថៃ មិនត្រឹមតែបង្ហាញពីការឈ្លានពានយ៉ាងសា.ហាវព្រៃផ្សៃមកលើកម្ពុជាប៉ុណ្ណោះទេ ប៉ុន្តែវាជាការបំពាននឹងច្បាប់មនុស្សធម៌អន្តរជាតិ និងរំលោ.ភសិទ្ធិមនុស្សយ៉ាងពិតប្រាកដ៕

ប្រទេសថៃ ៖ ក្រោយពីសារព័ត៌មាននានានៅប្រទេសថៃផ្សព្វផ្សាយព័ត៌មានបំភ្លៃថា កងទ័ពថៃទទួលជ័យជម្នះក្នុងសង្គ្រាម និងវាយយកបានប្រាសាទតាក្របីរបស់កម្ពុជា ធ្វើឱ្យពលរដ្ឋថៃនៅទូទាំងប្រទេសអបអរសាទរយ៉ាងខ្លាំង ។ ព័ត៌មានក្លែងក្លាយពីកងទ័ពថៃគ្រប់គ្រងប្រាសាទតាក្របី ត្រូវបានពលរដ្ឋថៃចែកចាយពេញបណ្តាញសង្គម ប៉ុន្តែអ្នកនាំពាក្យកងទ័ពថៃ លោកឧត្តមសេនីយ៍ វីនឆ័យ សុវ៉ារី បញ្ជាក់ថា កងទ័ពថៃវាយយកប្រាសាទតាក្របីពុំបានទេ ប៉ុន្តែគ្រប់គ្រងតំបន់ច្រើនជាងមុន ដោយសារដល់ពេលកំណត់បទឈប់បា.ញ់ ។

តាមការផ្សព្វផ្សាយរបស់សារព័ត៌មានថៃ Mgr Online នៅថ្ងៃទី៣១ ខែកក្កដា ឆ្នាំ២០២៥ ឱ្យដឹងថា អ្នកនាំពាក្យកងទ័ពថៃ លោកឧត្តមសេនីយ៍ វីនឆ័យ សុវ៉ារី បានបញ្ជាក់ប្រាប់ទៅពលរដ្ឋថា កងទ័ពថៃវាយយកប្រាសាទតាក្របីរបស់កម្ពុជាពុំបានទេ ប៉ុន្តែអាចគ្រប់គ្រងតំបន់ជាច្រើនមុនពេលប៉ះទង្គិចគ្នា ។ មូលហេតុដែលកងទ័ពថៃពុំអាចវាយយកប្រាសាទតាក្របី គឺលោក វីនឆ័យ សុវ៉ារី ចោទប្រកាន់ថា ដោយសារកងទ័ពកម្ពុជាបង្កប់មីនច្រើនពេកមុនពេលបទឈប់បាញ់ចូលជាធរមាន ។

ក្រោយកម្ពុជា-ថៃអនុវត្តបទឈប់បាញ់នៅតំបន់ព្រំដែនក្រោមការតាមដានពីប្រទេសនានាលើពិភពលោក ពលរដ្ឋថៃបានឃើញសារព័ត៌មានកម្ពុជាបង្ហោះរូបភាពក្នុងហ្វេសប៊ុកពីកងទ័ពកម្ពុជាគ្រប់គ្រងប្រាសាទតាក្របីកាលពីថ្ងៃទី៣០ ខែកក្កដា និងសរសេរថា «កងទ័ពកម្ពុជាគ្រប់គ្រងប្រាសាទតាក្របីទាំងស្រុង» ដែលព័ត៌មាននេះធ្វើឱ្យពលរដ្ឋថៃឆ្ងល់ ។ តាមការផ្សព្វផ្សាយរបស់សារព័ត៌មាននានារបស់ថៃ គឺកងទ័ពថៃទទួលជ័យជម្នះអាចវាយយកបានប្រាសាទតាក្របី ហេតុអ្វីភាគីកម្ពុជាថា កងទ័ពកម្ពុជាគ្រប់គ្រងប្រាសាទតាក្របីទៅវិញ ។

ជាការឆ្លើយតបទៅកាន់ពលរដ្ឋថៃ អ្នកនាំពាក្យកងទ័ព លោកឧត្តមសេនីយ៍ វីនឆ័យ សុវ៉ារី និយាយថា កងទ័ពថៃពុំអាចវាយយកតួប្រាសាទតាក្របីបាន១០០% ទេ ប៉ុន្តែកងទ័ពថៃបានគ្រប់គ្រងតំបន់ក្បែរៗប្រាសាទតាក្របីតាមគោលដៅ និងអាចគ្រប់គ្រងតំបន់ជាច្រើនមុនពេលការប៉ះទង្គិចគ្នា ។ ថៃគ្រប់គ្រងផ្នែកផ្សេងគ្នាពីកម្ពុជា ដោយសារដល់ម៉ោងកំណត់ឈប់បាញ់ ។

លោកចោទប្រកាន់ថា កងទ័ពកម្ពុជាបានបង្កប់មីនប្រភេទ PMN-2 ជាច្រើននៅជុំវិញប្រាសាទតាក្របី ទើបបណ្តាលឱ្យកងទ័ពថៃដើរជាន់មីនផ្ទុះដាច់ជើងស្តាំ ខណៈកំពុងដើរចូលប្រាសាទ ។ ហេតុនេះ មេបញ្ជាការកងទ័ពនៅសមរភូមិត្រូវតែការពារជីវិតកងទ័ព ដោយសារបានឃើញមីនជាច្រើនកន្លែង ។ លោកថែមទាំងចោទទៀតថា ការបង្កប់មីន PMN-2 គឺល្មើសនឹងអនុសញ្ញាអូតាវ៉ា ។

គួរបញ្ជាក់ថា កងទ័ពកម្ពុជាពិតជាអង់អាចក្លាហានណាស់អាចប្រយុទ្ធវាយបណ្តេញចោរឈ្លានពានថៃចេញពីប្រាសាទតាក្របី ហើយកងទ័ពកម្ពុជាបានឈរជើងគ្រប់គ្រងទាំងស្រុងលើប្រាសាទតាក្របី នៅខេត្តឧត្តរមានជ័យ ។ ចាប់ពីពេលនេះទៅ យើងជាពលរដ្ឋកម្ពុជាត្រូវតែសាមគ្គីគ្នាជាធ្លុងមួយការពារប្រាសាទ និងទឹកដីពីសត្រូវឈ្លានពាន រួមទាំងបណ្តេញសត្រូវឱ្យចេញឆ្ងាយពីមាតុភូមិ ។

ចំណែកពលរដ្ឋថៃសូមកុំជឿជាក់លើការផ្សព្វផ្សាយព័ត៌មានក្លែងក្លាយ និងព័ត៌មានញុះញង់បង្កជម្លោះជាមួយប្រទេសជិតខាង ពីព្រោះដោយសារព័ត៌មានញុះញង់ជាច្រើននៅប្រទេសថៃ ទើបធ្វើឱ្យពលរដ្ឋថៃយល់ខុស ចងកំហឹងពុំចេះចប់ ។ សារព័ត៌មានថៃស្ទើរទាំងអស់បានបិទពុំឱ្យពលរដ្ឋកម្ពុជាមើលឃើញទេ ដោយសារពួកគេរអៀសខ្លួននិយាយអាក្រក់ពីកម្ពុជា កុហកពលរដ្ឋខ្លួនឯង និងពិភពលោក ៕