ស្ថានការណ៍តានតឹងរវាងអ៊ីរ៉ង់ជាមួយអាមេរិក និងអ៊ីស្រាអែលបានឡើងកំដៅខ្លាំង បន្ទាប់ពីអ៊ីរ៉ង់សម្រេចចិត្តបិទខ្ទប់ច្រកសមុទ្រ Hormuz ដែលជាសរសៃឈាមសេដ្ឋកិច្ចពិភពលោកដ៏សំខាន់ និងជាផ្លូវដឹកជញ្ជូនប្រេងរហូតដល់១ភាគក្នុងចំណោម៥ភាគ ទើបធ្វើឱ្យមេដឹកនាំអាមេរិកស្នើឱ្យប្រទេសសម្ព័ន្ធមិត្តនានាបញ្ជូននាវាចម្បាំងទៅកាន់ច្រកនេះដើម្បីការពារសុវត្ថិភាពផ្លូវទឹក ។ ប៉ុន្តែអូស្ត្រាលី និងជប៉ុនប្រកាសមិនបញ្ជូននាវាច.ម្បាំងឡើយ ក្រោមហេតុផលមិនមែនជាកាតព្វកិច្ច និងប៉ះពាល់អនាគតរបស់អង្គការណាតូ (NATO) ។

នៅថ្ងៃទី១៦ ខែមីនា ឆ្នាំ២០២៦ រដ្ឋមន្ត្រីក្រសួងគមនាគមន៍អូស្ត្រាលីប្រកាសមិនបញ្ជូននាវាចម្បាំងទៅកាន់ច្រកសមុទ្រ Hormuz ខណៈរដ្ឋមន្ត្រីក្រសួងការពារជាតិជប៉ុនក៏បដិសេធដូចគ្នាថា គ្មានការបញ្ជូននាវាចម្បាំងទៅជួយបើកច្រកនេះឡើយ ។ ការបដិសេធរបស់ប្រទេសទាំងពីរ បន្ទាប់ពីប្រធានាធិបតីអាមេរិក លោក Donald Trump ជំរុញឱ្យមហាអំណាច រួមទាំងសម្ព័ន្ធមិត្តនានារបស់អាមេរិក បញ្ជូននាវាចម្បាំងទៅការពារច្រកសមុទ្រដើម្បីបើកផ្លូវការដឹកជញ្ជូនប្រេងឥន្ធនៈ និងទំនិញ ដែលត្រូវបានអ៊ីរ៉ង់បិទខ្ទប់ ។

រដ្ឋមន្ត្រីក្រសួងគមនាគមន៍អូស្ត្រាលី អ្នកស្រី Catherine King បាននិយាយនៅថ្ងៃទី១៦ ខែមីនា ថា អូស្ត្រាលីនឹងមិនបញ្ជូននាវាចម្បាំងទៅកាន់ច្រកសមុទ្រ Hormuz ដែលត្រូវបានអ៊ីរ៉ង់បិទតាំងពីចាប់ផ្តើមសង្គ្រាមកាលពីថ្ងៃទី២៨ ខែកុម្ភៈ ។ យើងដឹងថា ការបញ្ជូននាវាចម្បាំងទៅច្រកនេះសំខាន់កម្រិតណា ប៉ុន្តែវាមិនមែនជាអ្វីដែលអូស្ត្រាលីត្រូវតែយល់ព្រមតាមសំណើ ឬជាកាតព្វកិច្ចត្រូវចូលរួមចំណែកទេ ។

លោកប្រធានាធិបតី Trump បានស្នើឱ្យមហាអំណាចពិភពលោក រួមទាំងសម្ព័ន្ធមិត្តនានារបស់អាមេរិកជួយបញ្ជូននាវាចម្បាំងទៅច្រកសមុទ្រ Hormuz ដើម្បីបើកច្រកនេះឡើងវិញជាផលប្រយោជន៍រួម ក៏ដូចជាការពារមិនឱ្យកើតហេតុការណ៍អាក្រក់ផ្សេងៗ ប៉ុន្តែអូស្ត្រាលីគិតថា ការបញ្ជូននាវាចម្បាំងទៅទីនោះ នឹងប៉ះពាល់យ៉ាងខ្លាំងដល់អនាគតរបស់អង្គការណាតូ (NATO) ។

ចំណែកជប៉ុន នៅថ្ងៃទី១៦ ខែមីនា បានប្រកាសមិនបញ្ជូននាវាចម្បាំងរបស់ខ្លួនទៅជួយបើកច្រកនៅពេលនេះទេ ដោយរដ្ឋមន្ត្រីក្រសួងការពារជាតិជប៉ុន លោក Shinjirō Koizumi និយាយទៅកាន់រដ្ឋសភាថា ៖ «យោងតាមស្ថានការណ៍សង្គ្រាមអ៊ីរ៉ង់នាពេលបច្ចុប្បន្ន យើងមិនទាន់ពិចារណាពីប្រតិបត្តិការរក្សាសន្តិសុខនៅដែនសមុទ្រទេ» ។

នាយករដ្ឋមន្ត្រីជប៉ុន លោកស្រី Sanae Takaichi ថា ជប៉ុនគ្មានផែនការបញ្ជូននាវាចម្បាំងទៅការពារនាវាដឹកប្រេងឥន្ធនៈនានាដែលឆ្លងកាត់ច្រកសមុទ្រ Hormuz ឡើយ ។ លោកស្រីថា ៖ «យើងមិនទាន់បានសម្រេចចិត្តអ្វីទាំងអស់ពីការបញ្ជូននាវាចម្បាំង និងកំពុងពិចារណាថា តើជប៉ុនអាចធ្វើអ្វីបានខ្លះដោយឯករាជ្យ និងធ្វើអ្វីបានក្នុងក្របខ័ណ្ឌច្បាប់ ។ រដ្ឋាភិបាលជប៉ុនពិចារណាពីវិធានការតបតរចាំបាច់ ព្រមទាំងវិធីការពារនាវា និងនាវិកជប៉ុនដែលឆ្លងកាត់ច្រកនេះ» ។

ការបដិសេធរបស់ប្រទេសពីរមិនបញ្ជូននាវាចម្បាំងទៅច្រកសមុទ្រ Hormuz ដោយសារ​បារម្ភពី​គ្មាន​​នាវាចម្បាំងគ្រប់គ្រាន់ដើម្បីការពារប្រទេសរបស់ពួកគេ​ ដូចពេល​កន្លង​មក​ អាមេរិកប្រកាសដកប្រព័ន្ធការពារមីស៊ីល Patriot (PAC-3) ចេញពីកូរ៉េខាងត្បូងទៅកាន់មជ្ឈិមបូព៌ាដើម្បីការពារមូលដ្ឋានទ័ពអាមេរិកពីការវាយប្រហារដោយមីស៊ីលអ៊ីរ៉ង់ ។

វាធ្វើឱ្យរដ្ឋាភិបាលកូរ៉េខាងត្បូងពិបាកសម្រេចចិត្ត ព្រោះការដកប្រព័ន្ធការពារមីស៊ីលនេះធ្វើឱ្យសមត្ថភាពការពារប្រទេសខ្លួនចុះខ្សោយ ស្របពេលកូរ៉េខាងជើងកំពុងបង្កើនការបាញ់សាកល្បងមីស៊ីល និងត្រៀមជួយអ៊ីរ៉ង់ ។

គួរបញ្ជាក់ថា លោកប្រធានាធិបតី Trump បានបង្ហោះសារក្នុងបណ្តាញសង្គម Truth Social កាលពីថ្ងៃទី១៤ ខែមីនា អំពាវនាវឱ្យមហាអំណាចពិភពលោក និងសម្ព័ន្ធមិត្តនានាសហការជាមួយអាមេរិក រួមមាន ៖ ចិន បារាំង ជប៉ុន កូរ៉េខាងត្បូង អង់គ្លេស និងប្រទេសនានា ជួយបញ្ជូននាវាចម្បាំងទៅច្រកសមុទ្រ Hormuz ដើម្បីធានាសន្តិសុខ និងសេរីភាពនៃការឆ្លងកាត់របស់នាវា ដោយសារច្រកនេះជាផ្លូវដឹកជញ្ជូនប្រេងដ៏សំខាន់លើពិភពលោក ។

ការស្នើឱ្យប្រទេសនានាបញ្ជូននាវាចម្បាំងទៅច្រកសមុទ្រ Hormuz ត្រូវបានចាត់ទុកថា ពាក់ព័ន្ធនឹងផែនការរបស់អាមេរិកដែលមានបំណងគ្រប់គ្រងច្រកនេះឡើងវិញ និងអាចឈានដល់ការវាយប្រហារប្រឆាំងអ៊ីរ៉ង់នាពេលបន្ទាប់ ។

ការបិទខ្ទប់ច្រកកំពុងតែគំរាមកំហែងសន្តិសុខស្បៀងអាហារពិភពលោកដោយសារការវិបត្តិខ្វះខាតប្រេងយ៉ាងខ្លាំង ខណៈប្រេងដ៏ច្រើនលើពិភពលោក បានឆ្លងកាត់ច្រកនេះ ។ វាថែមទាំងធ្វើឱ្យពលរដ្ឋរាប់លាននាក់ប្រឈមនឹងហានិភ័យ ប្រសិនបើនាវាមិនអាចដឹកជញ្ជូនជំនួយមនុស្សធម៌ដោយសុវត្ថិភាព ៕

សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែល បានឈានចូលសប្តាហ៍ទី៣ និងឡើងកំដៅកាន់តែខ្លាំងឡើង នៅពេលអ៊ីស្រាអែលប្រកាសកាលពីថ្ងៃទី១៥ ខែមីនា ឆ្នាំ២០២៦ ថា មានគោលដៅវាយប្រ.ហារអ៊ីរ៉ង់រាប់ពាន់កន្លែងទៀតដើម្បីបំផ្លា.ញសមត្ថភាពកងទ័ពអ៊ីរ៉ង់ ហើយ​ចំណាយពេលយ៉ាងហោចណាស់ ចំនួន៣សប្តាហ៍ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី១៥ ខែមីនា អ៊ីស្រាអែលមានផែនការវាយប្រហារអ៊ីរ៉ង់បន្តទៀត យ៉ាងហោចណាស់ក៏ រយៈពេល៣សប្តាហ៍ដែរ ដោយសារអ៊ីស្រាអែលបានកំណត់គោលដៅវាយប្រហារអ៊ីរ៉ង់រាប់ពាន់កន្លែងបន្ថែមទៀត ខណៈអ៊ីរ៉ង់ប្រកាសទៅកាន់ប្រទេសជិតខាងកុំចូលរួមក្នុងសង្គ្រាមដែលកំពុងឡើងកំដៅ ។

កាលពីថ្ងៃទី១៥ ខែមីនា អ្នកនាំពាក្យកងកម្លាំងការពារអ៊ីស្រាអែល (IDF) បាននិយាយមកកាន់សារព័ត៌មាន CNN ថា កងទ័ពអ៊ីស្រាអែលកំណត់គោលដៅបន្តវាយប្រហារអ៊ីរ៉ង់ រយៈពេល៣សប្តាហ៍ទៀត ដោយសារនៅសល់គោលដៅរាប់ពាន់កន្លែងដែលអ៊ីស្រាអែលមិនទាន់វាយប្រហារ ។ យើងបានទំនាក់ទំនងជាមួយសម្ព័ន្ធមិត្តអាមេរិកកំណត់គោលដៅជាបន្តបន្ទាប់ ព្រមទាំងមានផែនការស៊ីជម្រៅបន្ថែមបន្ទាប់ពីបញ្ចប់ការវាយប្រហាររយៈពេល ៣សប្តាហ៍ ។

ទិន្នន័យរបស់កងកម្លាំងការពារអ៊ីស្រាអែល (IDF) បង្ហាញថា តាំងពីសង្គ្រាមចាប់ផ្តើមកាលពីថ្ងៃទី២៨ ខែកុម្ភៈ កងទ័ពអាកាសអ៊ីស្រាអែលបានធ្វើប្រតិបត្តិការកំទេចគោលដៅប្រមាណ៤០០កន្លែងនៅភាគខាងលិច និងភាគកណ្តាលប្រទេសអ៊ីរ៉ង់ ដោយកងទ័ពអ៊ីស្រាអែលផ្តោតលើការបំផ្លាញហេដ្ឋារចនាសម្ព័ន្ធ និងកម្ចាត់មន្ត្រីអ៊ីរ៉ង់សំខាន់ៗ ។

កងកម្លាំងការពារអ៊ីស្រាអែល (IDF) មិនបានធ្វើការដោយកំណត់ម៉ោង ឬកាលវិភាគទេ យើងធ្វើការដើម្បីសម្រេចគោលដៅ គឺផ្តួលរំលំអំណាចគ្រប់គ្រងអ៊ីរ៉ង់ ។ អាមេរិក និងអ៊ីស្រាអែលរួមគ្នាវាយប្រហារអ៊ីរ៉ង់យ៉ាងធ្ងន់ធ្ងរ ទើបជំរុញឱ្យក្រុម Hezbollah នៅប្រទេសលីបង់សម្រេចចិត្តចូលរួមក្នុងជម្លោះនេះ ដែលខុសគ្នាពីសង្គ្រាមចំនួន១២ថ្ងៃកាលពីខែមិថុនា ឆ្នាំ២០២៥ ពួកគេមិនចូលពាក់ព័ន្ធឡើយ ។

គួរបញ្ជាក់ថា អ៊ីរ៉ង់ហាមប្រទេសជិតខាងចូលរួមក្នុងសង្គ្រាម បន្ទាប់ពីមានសេចក្តីរាយការណ៍ថា មូលដ្ឋានកងទ័ពអាមេរិក និងអ៊ីតាលីនៅប្រទេសគុយវ៉ែត រងការវាយប្រហារដោយដ្រូនអ៊ីរ៉ង់ ។ អ៊ីរ៉ង់ថា ខ្លួនមានភស្តុតាងគ្រប់គ្រាន់បង្ហាញពីអាមេរិកយកមូលដ្ឋានកងទ័ពនៅប្រទេសជិតខាងធ្វើជាកន្លែងធ្វើប្រតិបត្តិការផ្លូវអាកាសប្រឆាំងអ៊ីរ៉ង់ ។

អ៊ីរ៉ង់បន្តបិទច្រកសមុទ្រ Hormuz គឺជាផ្លូវដឹកជញ្ជូនប្រេងដ៏សំខាន់លើពិភពលោក ដែលជំរុញឱ្យស្ថានការណ៍តានតឹងកាន់តែរាលដាលខ្លាំងឡើងពេញតំបន់ ទាំងការបង្កើនប្រតិបត្តិការកងទ័ព ទាំងការប៉ះពាល់ផ្លូវដឹកជញ្ជូនថាមពលលើពិភពលោក ៕

អាជីវករនៅផ្សាររុងក្លឿ កាលពីថ្ងៃទី១៤ ខែមីនា ឆ្នាំ២០២៦ ថា មិនអាចបន្តការលក់ដូរទៀតទេ ពីព្រោះការបិទព្រំដែនកម្ពុជា-ថៃធ្វើឱ្យពួកគេរងផលប៉ះពាល់ដោយផ្ទាល់ បាត់បង់ប្រាក់ចំណូលទាំងស្រុង បើស្ថានការណ៍ព្រំដែននៅតែបែបនេះយូរទៀត មុខជាប៉ះពាល់សេដ្ឋកិច្ចខេត្តស្រះកែវ មិនខាន ។ ទោះយ៉ាងណា ពួកគេនៅតែមានក្តីសង្ឃឹមថា ព្រំដែនប្រទេសទាំងពីរនឹងបើកឡើងវិញនាពេលឆាប់ៗ បន្ទាប់ពីស្ថានការណ៍ធូរស្រាល ។

ការបិទព្រំដែនផ្លូវគោកទាំងអស់ជាមួយកម្ពុជា ជាឯកតោភាគីតាំងពីខែមិថុនា ឆ្នាំ២០២៥ ពីសំណាក់កងទ័ព និងរដ្ឋាភិបាលថៃ បានធ្វើឱ្យដល់ប៉ះពាល់សេដ្ឋកិច្ចថៃនៅតាមបណ្តោយព្រំដែនយ៉ាងខ្លាំង ជាក់ស្តែង អាជីវករថៃនៅផ្សាររុងក្លឿ ខេត្តស្រះកែវ ដង្ហែរគ្នាបិទតូបលក់ដូរ និងប្រកាសលក់តូបជាបន្តបន្ទាប់ ដោយសារស្ងប់ស្ងាត់គ្មានភ្ញៀវទេសចរ ។ អាជីវករទាំងនេះត្អូញត្អែរពីការបាត់បង់ប្រាក់ចំណូលទាំងស្រុង និងគ្មានលទ្ធភាពសងបំណុលធនាគារ ។

តាមការចុះផ្សាយរបស់សារព័ត៌មាន Thairath កាលពីថ្ងៃទី១៤ ខែមីនា ការលក់ដូរនៅផ្សាររុងក្លឿងស្រុកអារញ្ញប្រាថេត ខេត្តស្រះកែវ ដែលត្រូវបានចាត់ទុកជាផ្សារព្រំដែនដ៏ធំបំផុតនៅប្រទេសថៃ ពេលនេះ លែងមានសភាពអ៊ូអរដូចមុនទៀតហើយ បរិវេណផ្សារទាំងមូលស្ងាត់ជ្រងំ បន្ទាប់ពីស្ថានការណ៍តានតឹងកើតឡើងនៅតាមបណ្តោយព្រំដែនកម្ពុជា-ថៃ ។

បច្ចុប្បន្ន ផ្សាររុងក្លឿ កាន់តែស្ងប់ស្ងាត់ខ្លាំងឡើង ម្ចាស់តូបនានាប្រាប់ថា មិនអាចបន្តការលក់ដូរទៀតទេ និងត្រូវផ្លាស់ប្តូរមុខរបរ ។ តូបជាច្រើនក្នុងផ្សារនេះត្រូវបានបិទទ្វារជារៀងរហូត ហើយតូបមួយចំនួនធំទៀតលើកស្លាកលក់ឱ្យម្ចាស់ផ្សេង ដោយសារគ្មានភ្ញៀវទេសចរមកទិញទំនិញធ្វើឱ្យពួកគេរងផលប៉ះពាល់ដោយផ្ទាល់ ។

បើតាមអាជីវករនៅផ្សាររុងក្លឿ គឺមុនពេលមានស្ថានការណ៍តានតឹងនៅតាមព្រំដែនកម្ពុជា-ថៃ ការលក់ដូរនៅផ្សារនេះលក់ដាច់ខ្លាំងណាស់ ប្រាក់ចំណូលចូលហូរហែ ប៉ុន្តែពេលបិទព្រំដែន ប្រាក់ចំណូលក៏ធ្លាក់ចុះយ៉ាងខ្លាំង គ្មានប្រាក់បង់ឈ្នួលតូប គ្មានប្រាក់ចំណាយក្នុងជីវភាពប្រចាំថ្ងៃ ទើបពួកគេសម្រេចបិទបិទទ្វារតូប ។ ប្រសិនបើស្ថានការណ៍ព្រំដែននៅតែអូសបន្លាយបែបនេះ នឹងប៉ះពាល់ដល់សេដ្ឋកិច្ចខេត្តស្រះកែវមិនខាន អាជីវករត្រូវទៅលក់ដូរនៅកន្លែងផ្សេង ឬផ្លាស់ប្តូរមុខរបរ ។

ទោះយ៉ាងណា អាជីវករថៃផ្សាររុងក្លឿ និងពលរដ្ឋថៃមួយចំនួននៅតែមានក្តីសង្ឃឹមថា ស្ថានការណ៍ព្រំដែនរវាងកម្ពុជា-ថៃនឹងល្អប្រសើរឡើងវិញនាពេលឆាប់ៗនេះឈានទៅបើកព្រំដែន ដើម្បីឱ្យការប្រកបរបររកស៊ីដំណើរការដូចមុន ដោយពួកគេតាមដានស្ថានការណ៍ព្រំដែនជានិច្ច ៕

លោក ទៀ ស្យាម ប្រធានក្រុមប្រឹក្សាភិបាល និងជាស្ថាបនិកនៃក្រុមហ៊ុន ភីស ភេត្រូលៀម បានធ្វើការពន្យល់បកស្រាយពីមូលហេតុដែលប្រទេសថៃអាចលក់ប្រេងក្នុងតម្លៃទាបជាងនៅកម្ពុជាឲ្យប្រជាពលរដ្ឋថាបណ្ដាលមកពី«កត្តាគុណភាព»ព្រោះប្រភេទប្រេងនៅកម្ពុជា និងនៅប្រទេសថៃ មិនដូចគ្នានោះទេ។ ការបកស្រាយនេះ ធ្វើឡើងក្រោយមានមតិជាច្រើនបានចោ.ទសួរអំពីមូលហេតុដែលកម្ពុជាលក់ប្រេងក្នុងតម្លៃថៃ្លជាងនៅប្រទេសថៃ។

យោងតាមសំណេរដែលបានបង្ហោះនៅទំព័រហ្វេសប៊ុកនាយប់ថ្ងៃចន្ទ ទី១៦ ខែមីនា លោក ទៀ ស្យាម លើកឡើងយ៉ាងដូច្នេះថា ករណីប្រេងនៅថៃមានតម្លៃថោកជាងប្រេងនៅខ្មែរ គឺដោយសារលាយethanol ឬ biodiesel ដើម្បីកាត់បន្ថយថ្លៃដើម។ លោកបានពន្យល់ថា នៅកម្ពុជា ប្រេងដែលយើងប្រើជាទូទៅមាន ប្រេងសាំង ៩២, ប្រេងសាំង 95 និងប្រេងម៉ាស៊ូត (Diesel) ប៉ុន្តែនៅប្រទេសថៃ ភាគច្រើនគេប្រើប្រេងប្រភេទផ្សេងដូចជា៖ Gasohol 91, Gasohol 95, E20, E85 និងDiesel B7/B20ប្រេងប្រភេទទាំងនេះខុសពីប្រេងដែលយើងប្រើនៅកម្ពុជា ហើយតម្លៃក៏ខុសគ្នាផងដែរ។

ភាពខុសគ្នានៃតម្លៃនេះ គឺដោយសារតែប្រេងប្រភេទ Gasohol ឬ Diesel B7/B20 មានការលាយជាមួយសារធាតុផ្សេងៗ ដូចជា Ethanol (សម្រាប់ Gasohol) និងBiodiesel (សម្រាប់ Diesel) ដែលEthanol អាចផលិតពីដំណាំដូចជា អំពៅ ឬដំឡូងមី ដូច្នេះវាមានថ្លៃដើមថោកជាងប្រេងសាំងធម្មតា ហើយអាចធ្វើឱ្យតម្លៃលក់ទាបជាងបាន។

តាមការបញ្ជាក់របស់លោក តាមពិតមូលដ្ឋានប្រេងគឺនៅតែដូចគ្នា ប៉ុន្តែព្រោះមានការលាយ ethanol ចូល អាចធ្វើឱ្យការប្រើប្រាស់ប្រេងច្រើនជាងបន្តិច ចំណែករថយន្តចាស់ៗខ្លះអាចត្រូវការកែប្រែប្រព័ន្ធប្រេង។ ប៉ុន្តែបច្ចុប្បន្ននេះ រថយន្តសម័យថ្មីភាគច្រើនអាចប្រើប្រេងប្រភេទនេះបានរួចហើយ។ ហេតុអ្វីបានជាកម្ពុជាមិនប្រើប្រេងបែបនេះ? លោកបន្ថែមថា ការប្រើប្រេងប្រភេទនេះត្រូវការរចនាសម្ព័ន្ធជាច្រើន ដូចជា៖ រោងចក្រចម្រាញ់ប្រេង ការផលិត Ethanol ក្នុងប្រទេស ប្រព័ន្ធលាយប្រេងក្នុងបរិមាណធំ។

ដូច្នេះ តម្លៃប្រេងនៅកម្ពុជា មិនមែនថ្លៃជាងប្រទេសផ្សេងៗទេ ប៉ុន្តែប្រទេសខ្លះប្រើវិធី លាយ ethanol ឬ biodiesel ដើម្បីកាត់បន្ថយថ្លៃដើម។ ហើយនេះជាមូលហេតុដែលធ្វើឱ្យតម្លៃប្រេងរបស់ពួកគេមើលទៅថោកជាង។ នេះជាការបន្ថែមរបស់លោក ទៀ ស្យាម សហស្ថាបនិកក្រុមហ៊ុន Peace Petroleum៕

ក្រោយត្រូវបានអាមេរិក និងអុីស្រាអែល វាយប្រហារមិនដកដៃ ប្រទេសអុីរ៉ងបានចាប់ផ្តើមប្រើប្រាស់មីសុីលប៉ាលីស្ទិកអន្តរទ្វីប ឆ្លើយតបទៅវិញ ដែលធ្វើឱ្យពិភពលោកកំពុងសម្តែងការព្រួយបារម្ភ។

Sejjil គឺជាមីសុីលប៉ាលិស្ទិករយៈចម្ងាយមធ្យម ដែលបានអាចបាញ់បានចម្ងាយ២០០០គីឡូម៉ែត្រ ទៅ២៥០០គីឡូម៉ែត្រ ដោយអាចផ្ទុកក្បាលគ្រាប់បានទម្ងន់១៥០០គីឡូក្រាម។

មីសុីលនេះ មានល្បឿនលឿនជាងសំលេងដល់ទៅ១៣ដង ពោលអាចហោះបានចេញពីអុីរ៉ង់ សម្តៅទៅលើអុីស្រាអែល ចាយពេលត្រឹម៧នាទីប៉ុណ្ណោះ។

ជាមួយល្បឿនដល់លឿន មីសុីល Sejjil ត្រូវបានគេអះអាងថាអាចទម្លុះខែលការពារដែនអាកាស Iron Dome របស់អុីស្រាអែល។

យោងតាមប្រព័ន្ធផ្សព្វផ្សាយអ៊ីស្រាអែលបានរាយការណ៍ថា អុីរ៉ង់បានបាញ់មីសុីលនេះ ដោយសម្តៅលើទីក្រុង Tel Aviv និងមូលដ្ឋានទ័ពអាកាស។

សូមរំលឹកថា ចាប់តាំងពីអុីរ៉ង់ រងការវាយប្រហារពីអាមេរិក និងអុីស្រាអែលមក រដ្ឋអុីស្លាមមួយនេះបានប្រើប្រាស់មីសុីលអន្តរទ្វីបជាច្រើនប្រភេទរួមមានមីសុីល Emad, Ghadr-110, Kheibar Shekan, និង Shahab-3B៕

ជប៉ុន និងកូរ៉េខាងត្បូង បានបង្ហាញភាពតានតឹងដាក់គ្នាជាថ្មីម្តងទៀត ក្រោយពីនាយករដ្ឋមន្ត្រីជប៉ុន លោកស្រី សាណាអ៊េ តាកាអ៊ីឈិ (Sanae Takaichi) ប្រកាសទាមទារប្រជុំកោះដុកដូ (Dokdo)។
នាយករដ្ឋមន្ត្រីជប៉ុនរូបនេះ បានថ្លែងថា៖”ប្រជុំកោះដុកដូ (Dokdo) ឬជប៉ុនហៅថាប្រជុំកោះ តាកេស៊ីម៉ា(Takeshima) គឺស្ថិតនៅក្រោមដែនអធិបេតេយ្យភាពរបស់ជប៉ុន ដែលបានទទួលស្គាល់ពីអន្តរជាតិ។
ជុំវិញបញ្ហានេះ កូរ៉េខាងត្បូង បានបញ្ជាក់ច្បាស់ៗថា៖”យោងតាមប្រវត្តិសាស្ត្រ កូរ៉េខាងត្បូង បានគ្រប់គ្រងទីប្រជុំនេះ ចាប់ពីឆ្នាំ១៩៤៥មក ពោលគឺនៅពេលអាណានិគមជប៉ុន នៅឧបទ្វីបកូរ៉េដួលរលំ “។ជប៉ុន ធ្លាប់បានប្តឹងឡើងទៅតុលាការអន្តរជាតិចំនួន៤ដង ក៏ប៉ុន្តែកូរ៉េខាងត្បូងមិនព្រមចូលខ្លួន ហេតុដូច្នេះតុលាការអន្តរជាតិ មិនមានសិទ្ធសម្រេចសេចក្តីនោះទេ។បើក្រឡេកមកមើលពីទីតាំងភូមិសាស្ត្រ កោះនេះ ស្ថិតនៅចម្ងាយប្រមាណជា២១១គីឡូម៉ែត្រពីដែនទឹកជប៉ុន ធៀបនឹងកូរ៉េខាងត្បូងមានចម្ងាយដល់ទៅ២១៦គីឡូម៉ែត្រ៕