ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ The States Times នៅថ្ងៃទី១៣ ខែសីហា ឆ្នាំ២០២៥ ឱ្យដឹងថា នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បាននិយាយពីមេបញ្ជាការយោធភូមិភាគ២ លោក ប៊ុនស៊ីន ផាកក្លាង បង្ហោះហ្វេសប៊ុកសុំប្រាក់ពលរដ្ឋជួយបរិច្ចាគទិញបន្លាលួសឱ្យកងទ័ពជាបន្ទាន់សម្រាប់បំពេញភារកិច្ចនៅព្រំដែនកម្ពុជា-ថៃ ។ លោកថា បើកងទ័ពខ្វះខាតឧបករណ៍ចាំបាច់ផ្សេងៗ សូមប្រាប់មេបញ្ជាការកងទ័ពតាមត្រង់ ពុំចាំបាច់បង្ហោះហ្វេសប៊ុកសុំប្រាក់ពីពលរដ្ឋទេ ពីព្រោះរដ្ឋាភិបាលមានប្រាក់គ្រប់គ្រាន់សម្រាប់ផ្តល់ឱ្យ ។

កងទ័ពភូមិភាគ២ថៃ បានបង្ហោះហ្វេសប៊ុកសុំប្រាក់ពីពលរដ្ឋជួយបរិច្ចាគទិញបន្លាលួសឱ្យកងទ័ពជាបន្ទាន់ដើម្បីកាត់បន្ថយហានិភ័យដល់អាយុជីវិត ផ្តល់សុវត្ថិភាពដល់កងទ័ពពេលបំពេញភារកិច្ច និងការពារអធិបតេយ្យនៅព្រំដែនកម្ពុជា-ថៃ ។ កងទ័ពភូមិភាគ២ សូមការសហការពីពលរដ្ឋជួយគាំទ្រ និងបង្ហាញកម្លាំងសាមគ្គី ដោយពលរដ្ឋអាចផ្ញើប្រាក់សម្រាប់ទិញបន្លាលួសមកកាន់ផ្នែកកិច្ចការស៊ីវិល និងកងកម្លាំងស៊ុណារីដោយផ្ទាល់ ។

កងទ័ពភូមិភាគ២បញ្ជាក់ថា បន្លាលួសមានអង្កត់ផ្ចិតទំហំ១០០សង់ទីម៉ែត្រ គឺកងទ័ពពិបាកស្វែងរកណាស់នៅក្នុងតំបន់ ហើយកងទ័ពក៏ប្រើប្រាស់បន្លាលួសមានអង្កត់ផ្ចិតទំហំ៩០សង់ទីម៉ែត្រជំនួស ។ កងទ័ពភូមិភាគ២ សូមអរគុណការគាំទ្រពីពលរដ្ឋ និងសន្យាបំពេញតួនាទីអស់ពីសមត្ថភាពដើម្បីសុវត្ថិភាពប្រទេសជាតិ និងសន្តិសុខពលរដ្ឋគ្រប់រូប ។

បន្ទាប់មក លោក ភូមិថាំ នាយករដ្ឋមន្ត្រីស្តីទីបានស្នើទៅមេបញ្ជាការយោធភូមិភាគ២ លោក ប៊ុនស៊ីន ផាកក្លាង ឈប់សុំប្រាក់ពីពលរដ្ឋជួយទិញបន្លាលួស និងឱ្យកងទ័ពមកសុំប្រាក់ទិញបន្លាលួសពីរដ្ឋាភិបាលវិញ ពីព្រោះរដ្ឋាភិបាលមានប្រាក់គ្រប់គ្រាន់ ។

ដោយឡែក ករណីកងទ័ព និងទាហានឈុតខ្មៅថៃជាន់មីននៅព្រំដែនកម្ពុជា-ថៃ លោក ភូមិថាំ និយាយថា ក្រសួងការបរទេសត្រៀមដាក់ពាក្យបណ្តឹងទៅអង្គការសហប្រជាជាតិ (UN) ហើយលោកចោទប្រកាន់ថា ពាក្យបណ្តឹងនេះជាការដោះស្រាយបញ្ហាកម្ពុជាល្មើសអនុសញ្ញាអូតាវ៉ា ។ លោកចោទទៀតថា កម្ពុជាមានចេតនាពុំចង់បានសន្តិភាពក្នុងតំបន់ ហេតុនេះ កងទ័ព និងរដ្ឋាភិបាលថៃនឹងធ្វើការជាមួយគ្នាយ៉ាងជិតស្និទ្ធដើម្បីដោះស្រាយស្ថានការណ៍ និងជូនដំណឹងទៅពលរដ្ឋជាបន្តបន្ទាប់ ។

ក្រៅពីនេះ នាយករដ្ឋមន្ត្រីស្តីទីក៏បាននិយាយពីពលរដ្ឋថៃរស់នៅព្រំដែនព្រួយបារម្ភពីស្ថានការណ៍ និងជម្លៀសចេញពីលំនៅឋានជាបន្តបន្ទាប់ ដោយលោកសុំឱ្យពលរដ្ឋមានទំនុកចិត្តលើរដ្ឋាភិបាលអាចផ្តល់ការថែទាំសុវត្ថិភាព ។ ក្រៅពីនេះ លោកអំពាវនាវឱ្យសារព័ត៌មានថៃផ្សព្វផ្សាយតែព័ត៌មានពិតប្រាកដ កុំផ្សព្វផ្សាយព័ត៌មានក្លែងក្លាយ ដើម្បីកុំឱ្យពលរដ្ឋភ័យស្លន់ស្លោហួសហេតុ ៕

ប្រទេសថៃ ៖ កាលពីថ្ងៃទី១២ ខែសីហា ឆ្នាំ២០២៥ សារព័ត៌មានថៃ Nation រាយការណ៍ថា គណបក្សនយោបាយមួយរបស់ថៃឈ្មោះ «គណបក្សសេដ្ឋកិច្ច» បានស្នើរដ្ឋាភិបាលលុបចោលកិច្ចព្រមព្រៀងបទឈប់បា.ញ់ជាមួយកម្ពុជាទាំង១៣ចំណុច ព្រមទាំងផ្តល់អំណាចឱ្យកងទ័ពប្រកាសច្បាប់អាជ្ញាសឹកនៅទូទាំងប្រទេស ។ គណបក្សនេះចោទប្រកាន់កម្ពុជាបង្កប់មីនប្រឆាំងមនុស្ស ថែមទាំងចោទប្រកាន់កម្ពុជាបំពានកិច្ចព្រមព្រៀងបទឈប់បា.ញ់ ទោះជាក្រសួងការពារជាតិកម្ពុជាច្រានចោលទាំងស្រុងចំពោះការចោទប្រកាន់ដោយគ្មានមូលដ្ឋានច្បាស់លាស់របស់ភាគីថៃក្តី ។

ពេលផ្តល់សម្ភាសន៍ជាមួយសារព័ត៌មានកាលពីថ្ងៃទី១២ ខែសីហា លោក រង្ស៊ី គិតទិយ៉ានសាប់ ប្រធានគណបក្សសេដ្ឋកិច្ចចោទប្រកាន់ថា កម្ពុជាបំពានកិច្ចព្រមព្រៀងក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) ថែមទាំងចោទទៀតថា កម្ពុជាបង្កប់មីន PMN-2 ដែលធ្វើឱ្យកងទ័ពថៃម្នាក់រងរបួសដាច់ជើងម្ខាង រួមទាំងកងទ័ពថៃ៣នាក់ទៀតរបួសដោយសារជាន់មីនកន្លងមក ។ វាស្របនឹងសេចក្តីថ្លែងការណ៍របស់កងទ័ពភូមិភាគ២ ដែលចោទកម្ពុជាពុំស្មោះត្រង់ និងពុំប្រកាន់ខ្ជាប់នូវការអនុវត្តកិច្ចព្រមព្រៀងរវាងរដ្ឋាភិបាលប្រទេសទាំងពីរ ។

ប្រធានគណបក្សនយោបាយនេះចោទប្រកាន់ទៀតថា នៅមានការលួចលាក់លក់ដូរទំនិញដែលជាការល្មើសច្បាប់ ហើយគោលបំណងនៃការបិទព្រំដែនរបស់ថៃ គឺចង់ឱ្យកម្ពុជាយល់ដឹងពីសារៈសំខាន់នៃទំនិញថៃ និងយល់ពីសេដ្ឋកិច្ចថៃសម្រាប់ការរស់នៅរបស់ពលរដ្ឋកម្ពុជា ។ ប៉ុន្តែប្រធានគណបក្សនយោបាយនេះពុំបានលើកឡើងពីភាគីថៃបំពានកិច្ចព្រមព្រៀងឈប់បាញ់ទេ ពីព្រោះរហូតមកដល់ថ្ងៃទី១៣ ខែសីហា ភាគីថៃពុំទាន់បានដោះលែងវីរៈកងទ័ពកម្ពុជាជាច្រើននាក់ដែលកងទ័ពថៃចាប់ខ្លួនដោយខុសច្បាប់ក្រោយបទឈប់បាញ់ចូលជាធរមាន ។

គណបក្សនយោបាយនេះបានស្នើរដ្ឋាភិបាលថៃលុបចោលកិច្ចព្រមព្រៀងឈប់បា.ញ់ទាំង១៣ចំណុច និងផ្តល់អំណាចឱ្យកងទ័ពប្រកាសច្បាប់អាជ្ញាសឹកនៅទូទាំងប្រទេស ព្រមទាំងប្រើប្រាស់តុលាការកងទ័ពនៅតំបន់ព្រំដែនកម្ពុជា-ថៃ គឺដូចគ្នានឹងថៃប្រើប្រាស់តុលាការកងទ័ពជាមួយជនល្មើសក្នុងខេត្តចំនួន៣ នៅភាគខាងត្បូង ។

លោក រង្ស៊ី ប្រធានគណបក្សសេដ្ឋកិច្ចបន្តថា យើងពុំជឿជាក់លើពលករកម្ពុជាដែលលួចឆ្លងដែនចូលប្រទេសថៃវិញ ហើយពលករកម្ពុជានិយាយថា ដោយសារគ្មានការងារធ្វើ ទើបឆ្លងដែនចូលដីថៃ ។ តើពួកគេអាចជាអ្នកស៊ើបការណ៍សម្ងាត់របស់កម្ពុជាចូលមកស៊ើបទិន្នន័យរបស់កងទ័ពថៃឬយ៉ាងណា? ស្ថានការណ៍បែបនេះ ប្រទេសថៃត្រូវផ្តល់អំណាចទៅឱ្យកងទ័ពធ្វើការសម្រេចចិត្តពេញលេញ ។ គណបក្សសេដ្ឋកិច្ចជឿជាក់ថា ការប្រកាសច្បាប់អាជ្ញាសឹកពុំមែនរដ្ឋប្រហារទេ ហើយក៏ពុំមែនជាទង្វើឈានទៅរដ្ឋប្រហារដែរ ប៉ុន្តែជាការអនុវត្តតាមគោលបំណងនៃច្បាប់នេះ ។

កាលពីថ្ងៃទី១២ ខែសីហា លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា បានប្រកាសច្រានចោលទាំងស្រុងលើការចោទប្រកាន់ដោយគ្មានមូលដ្ឋានរបស់ភាគីថៃមកលើកម្ពុជា ពាក់ព័ន្ធនឹងការរងរបួសរបស់កងទ័ពថៃដោយសារការផ្ទុះគ្រាប់មីននៅតំបន់ប្រាសាទតាមាន់ធំ នៅថ្ងៃទី១២ ខែសីហា ។

ក្រសួងការពារជាតិកម្ពុជាសូមច្រានចោលទាំងស្រុងចំពោះការចោទប្រកាន់ដោយគ្មានមូលដ្ឋានច្បាស់លាស់របស់ភាគីថៃ ពាក់ព័ន្ធនឹងការរងរបួសរបស់កងទ័ពថៃ ដោយសារការផ្ទុះគ្រាប់មីននៅតំបន់ប្រាសាទតាមាន់ធំ ក្នុងស្រុកបន្ទាយអំពិល ខេត្តឧត្តរមានជ័យ ប្រទេសកម្ពុជា នៅថ្ងៃទី១២ ខែសីហា ឆ្នាំ២០២៥ ។

កម្ពុជានៅតែរក្សាជំហរយ៉ាងម៉ឺងម៉ាត់ គឺគ្មានការប្រើប្រាស់ ហើយនឹងមិនប្រើប្រាស់មីនថ្មីជាដាច់ខាត ។ កម្ពុជា គឺជារដ្ឋភាគីនៃអនុសញ្ញាហាមប្រាមការប្រើប្រាស់មីន ប្រឆាំងមនុស្ស ដែលកម្ពុជាបានផ្តល់សច្ចាប័នក្នុងឆ្នាំ១៩៩៩ ក៏ត្រូវបានទទួលស្គាល់ជាអន្តរជាតិ ចំពោះសមិទ្ធផលនៃការបោសសម្អាតមីន និងគ្មានការប្រើប្រាស់មីនប្រឆាំងមនុស្សនោះឡើយ ៕

ប្រទេសថៃ ៖ នៅថ្ងៃទី១៣ ខែសីហា ឆ្នាំ២០២៥ សារព័ត៌មានថៃ Top News រាយការណ៍ថា នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បានសុំភាពយុត្តិធម៌ក្រោយពីត្រូវពលរដ្ឋថៃរិះគ.ន់ខ្លាំងៗថា កាន់ជើងកម្ពុជា គ្រាន់តែលោកនិយាយពាក់ព័ន្ធនឹងកងទ័ពកម្ពុជាប្រើប្រាស់គ្រាប់រ៉ុក្កែត BM-21 បា.ញ់ធ្លាក់លើមន្ទីរពេទ្យថៃនៅព្រំដែន ។ លោកសំណូមពរទៅពលរដ្ឋកុំបំភ្លៃរឿងនេះដើម្បីបំផ្លា.ញរដ្ឋាភិបាល និងបង្កើតការមិនទុកចិត្តលើរដ្ឋាភិបាលនាំឱ្យបែកបាក់ក្នុងសង្គមក្លាយជាបញ្ហា ។

នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បាននិយាយនៅវិមានរដ្ឋាភិបាល នាថ្ងៃទី១៣ ខែសីហា ករណីពលរដ្ឋថៃរិះគន់ពីដំណោះស្រាយបញ្ហាជម្លោះព្រំដែនកម្ពុជា-ថៃថា សូមពលរដ្ឋជួយគ្នាដោះស្រាយបញ្ហា ពីព្រោះខ្លួនលោកក៏ពុំទទួលភាពយុត្តិធម៌ដែរ ប៉ុន្តែក្នុងឋានៈជានាយករដ្ឋមន្ត្រីស្តីទី លោកនឹងព្យាយាមរក្សាភាពស្ងប់ស្ងាត់ឱ្យខ្លាំងបំផុត ។

ការលើកឡើងថា លោកកាន់ជើងកម្ពុជា និងមានការរិះគន់រឿងគ្រាប់រ៉ុក្កែត BM-21 បា.ញ់ធ្លាក់លើមន្ទីរពេទ្យថៃនៅព្រំដែន លោកសូមបញ្ជាក់ថា ពុំមែនជាការពិតទេ ។ សូមពលរដ្ឋស្តាប់សំឡេងពេញដែលលោកនិយាយថា ហេតុអ្វីគ្រាប់រ៉ុក្កែតធ្លាក់លើមន្ទីរពេទ្យ? ការបាញ់របស់កងទ័ពកម្ពុជា គឺប្រើប្រាស់គ្រាប់រ៉ុក្កែត BM-21 ដែលរ៉ុក្កែតនេះបាញ់ម្តងធ្លាក់លើគោលដៅច្រើនកន្លែង ដែលពុំមែនជាគោលដៅកងទ័ព ។ ដូច្នេះ លោកសំណូមពរពលរដ្ឋកុំបំភ្លៃរឿងនេះដើម្បីបំផ្លាញរដ្ឋាភិបាល និងបង្កើតការមិនទុកចិត្តលើរដ្ឋាភិបាលនាំឱ្យបែកបាក់ក្លាយជាបញ្ហា ។

ទន្ទឹមនឹងនេះ នៅមានមនុស្សមួយចំនួនទៀតប្រាប់ឱ្យខ្ញុំសាកល្បងកាត់ជើងខ្លួនឯង ដើម្បីឱ្យដឹងពីការឈឺចាប់របស់កងទ័ពថៃរងរបួសដោយសារជាន់មីន បើទោះជាខ្ញុំមិនពុំចង់ប្តឹងអ្នកណាក៏ដោយ ប៉ុន្តែត្រូវតែបញ្ជាក់បញ្ហានេះឱ្យច្បាស់លាស់ ។ វាដូចគ្នានឹងករណីខ្ញុំរងការវាយប្រហារពីលោក ស៊ុននិធិ លីមថងគុល និយាយថា ខ្ញុំ (ភូមិថាំ វីឆាយ៉ាឆៃ) គឺជាសមាជិកគណបក្សកុម្មុយនិស្ត រហូតដល់លោក ស៊ុននិធិ ចាញ់ក្តីនៅតុលាការ ក្រោយមក លោក ស៊ុននិធិ ក៏សូមទោសខ្ញុំ ។

ចំណែកបញ្ហានេះក៏ដូចគ្នាដែរ កុំនិយាយអ្វីគ្មានហេតុផល កុំនិយាយអ្វីធ្វើឱ្យបែកបាក់គ្នា ឬបំផ្លាញអ្នកដទៃ ។ ខ្ញុំចង់ឱ្យសារព័ត៌មានជួយផ្សព្វផ្សាយអ្វីដែលខ្ញុំបាននិយាយ ហើយខ្ញុំគិតថា គ្រប់គ្នាគួរតែនិយាយនូវអ្វីដែលគួរនិយាយប៉ុណ្ណោះ ។ ខ្ញុំនឹងពុំនិយាយអ្វីច្រើនជាងនេះ ពីព្រោះបើនិយាយទៅអាចយកសំឡេងខ្ញុំទៅចោទប្រកាន់ បង្ខូចកេរ្តិ៍ឈ្មោះ ដោយការកាត់តសំឡេង ។

ចូរផ្តល់ភាពយុត្តិធម៌ឱ្យខ្ញុំផង បើមិនដូច្នោះទេ វានឹងពុំសមរម្យ ។ ខ្ញុំនឹងឱ្យមេធាវីចាត់វិធានការតាមផ្លូវច្បាប់ចំពោះអ្នកណាដែលនិយាយបំភ្លៃការពិត ពីព្រោះខ្ញុំបានរក្សាទុកសំឡេងសម្ភាសន៍ទាំងអស់រួចហើយ ។ នេះបើតាមការលើកឡើងរបស់លោក ភូមិថាំ ។

គួរបញ្ជាក់ថា រដ្ឋាភិបាលរបស់គណបក្សភឿថៃបានបាត់បង់ប្រជាប្រិយភាពពីពលរដ្ឋ ពីព្រោះពលរដ្ឋជឿជាក់លើកងទ័ពខ្លាំងជាងរដ្ឋាភិបាល ។ ពលរដ្ឋថៃដែលមានគំនិតជ្រុលនិយមកាន់តែជឿជាក់លើកងទ័ពក្រោយពីកងទ័ពរបស់ពួកគេឈ្លានពាន បើកការវាយប្រហារមកលើកម្ពុជា និងទាមទារឱ្យបន្តតំណែងមេបញ្ជាការយោធភូមិភាគ២ លោក ប៊ុនស៊ីន ផាកក្លាង រហូតបញ្ចប់ជម្លោះព្រំដែនជាមួយកម្ពុជា ។

ពលរដ្ឋថៃចោទប្រកាន់ថា កងទ័ពកម្ពុជាបាញ់សំដៅលើមន្ទីរពេទ្យនៅព្រំដែន និងទាមទារឱ្យមន្ទីរពេទ្យថៃឈប់ព្យាបាលអ្នកជំងឺកម្ពុជា ប៉ុន្តែពួកគេមើលរំលងអំពើឈ្លានពានរបស់កងទ័ពថៃមកលើកម្ពុជា ។ កាលពីផ្ទុះអាវុធនៅព្រំដែនកម្ពុជា-ថៃកន្លងមក កងទ័ពថៃបានប្រើប្រាស់យន្តហោះចម្បាំង F-16, Gripen រថក្រោះ កាំភ្លើងធំ គ្រាប់បែកចង្កោម ដ្រូនទម្លាក់គ្រាប់បែក និងផ្សែងពុល ជាដើម ៕