ប្រទេសថៃ ៖ លោក អាត់ ភីសាលវ៉ានិច អ្នកជំនាញសេដ្ឋកិច្ចអន្តរជាតិ និងអាស៊ាន បានវាយតម្លៃស្ថានការណ៍ពលករកម្ពុជាត្រឡប់មកប្រទេសវិញធ្វើឱ្យថៃខាតបង់ចំណូលសេដ្ឋកិច្ចខ្លាំងបំផុត រហូតដល់៣ម៉ឺន២ពាន់លានបាតក្នុង១ខែ (ស្មើប្រមាណ៩៩០លានដុល្លារ) ។ ចំនួនពលករកម្ពុជាស្របច្បាប់ និងមិនស្របច្បាប់ដែលធ្វើការនៅប្រទេសថៃកាលពីឆ្នាំ២០២៤ ស្មើ១លាន២សែន៥ម៉ឺននាក់ ក្នុងនោះធ្វើការផ្នែកសំណង់ ស្មើ៣សែននាក់, កសិកម្ម ស្មើ៣សែន២ម៉ឺន៥ពាន់នាក់ និងនៅសេសសល់ធ្វើការផ្នែកសេវាកម្ម ស្មើ៦សែន២ម៉ឺន៥ពាន់នាក់ ។

ពលករកម្ពុជាធ្វើការនៅថៃ ស្មើ២០.៨% នៃចំនួនពលករបរទេសទាំងអស់នៅថៃ និងស្មើ១៥.៧% នៃចំនួនពលករមកពីប្រទេស CLMV (កម្ពុជា ឡាវ មីយ៉ាន់ម៉ា និងវៀតណាម) ដែលធ្វើការនៅថៃ ។ ពលករកម្ពុជាបានរួមចំណែកជួយបង្កើនផលិតផលក្នុងស្រុកសរុប (GDP) របស់ថៃ ស្មើ៥.២% ។ រហូតមកដល់ថ្ងៃទី១៣ ខែសីហា ឆ្នាំ២០២៥ ប្រទេសថៃពុំទាន់មានតួលេខផ្លូវការពីចំនួនពលករកម្ពុជាត្រឡប់មកប្រទេសវិញប៉ុន្មាននាក់ទេ បើតាមការប៉ាន់ស្មាន គឺពលករកម្ពុជាបានត្រឡប់មកប្រទេសវិញ ចាប់ពី៣សែន ទៅ៥សែននាក់ ។

ការចាកចេញពីប្រទេសថៃរបស់ពលករកម្ពុជាបានធ្វើឱ្យប៉ះពាល់ដល់ផលិតផលក្នុងស្រុកសរុប (GDP) របស់ថៃ ចាប់ពី៥.៣% ទៅ៨.៨% ។ ផ្នែកសេវាកម្មរងផលប៉ះពាល់ខ្លាំងបំផុត បន្ទាប់មក ផ្នែកសំណង់ និងកសិកម្ម បានខាតបង់ចំណូល ចាប់ពី១៩,៤៩៨លានបាត ទៅ៣២,៤៩៦លានបាត ។ ផ្នែកផលិតទំនិញ និងសេដ្ឋកិច្ចថៃបានពឹងផ្អែកយ៉ាងខ្លាំងលើពលករកម្ពុជា ដូច្នេះ ការចាកចេញរបស់ពលករកម្ពុជាធ្វើឱ្យប៉ះពាល់ខ្លាំងដល់សេដ្ឋកិច្ចថៃ ។

អ្នកជំនាញសេដ្ឋកិច្ចអន្តរជាតិ និងអាស៊ានបានណែនាំពីដំណោះស្រាយចំពោះមុខរបស់ថៃនាពេលនេះ រួមមាន ៖

១-ស្វែងរកពលករពីប្រទេសមីយ៉ាន់ម៉ា និងឡាវ មកជំនួសពលករកម្ពុជាជាបន្ទាន់
២-បង្កើតផែនការយុទ្ធសាស្ត្រស្វែងរកពលករបរទេសមកជំនួសពលករកម្ពុជា ក្នុងរយៈពេល៥ឆ្នាំ ទៅ១០ឆ្នាំ ខាងមុខ
៣-លើកទឹកចិត្តពលករថៃមកធ្វើការជំនួសពលករកម្ពុជារយៈពេលខ្លី ដោយដំឡើងប្រាក់ខែ និងផ្តល់សិទ្ធិពិសេសផ្នែកហិរញ្ញវត្ថុ ដូចជា ៖ អត្រាការប្រាក់កម្ចីទាប ឬកាត់បន្ថយពន្ធលើការប្រាក់ពលករថៃ
៤-សិក្សាពីលទ្ធផលនាំចូលពលករពីប្រទេសបង់ក្លាដែស ឬស្រីលង្ការ មកធ្វើការជំនួសពលករកម្ពុជា ។

បច្ចុប្បន្ន ប្រទេសថៃកំពុងប្រឈមនឹងការខ្វះខាតពលករបរទេសធ្វើការដើម្បីជំរុញកំណើនសេដ្ឋកិច្ចរបស់ខ្លួន ក្រោយពីពលករកម្ពុជាបានត្រឡប់មកប្រទេសវិញជាបន្តបន្ទាប់តាំងពីកងទ័ពថៃឈ្លានពានកម្ពុជាមិនឈប់ឈរ ។ រីឯពលរដ្ឋថៃពុំចង់ធ្វើការងារលំបាកប្រើប្រាស់កម្លាំងពលកម្ម ឬហាលថ្ងៃនោះទេ ជាហេតុធ្វើឱ្យម្ចាស់ចម្ការថៃជួបការលំបាកយ៉ាងខ្លាំង ។

បើតាមម្ចាស់ចម្ការមៀន គឺពេលមានពលករបរទេសមកធ្វើការនៅប្រទេសថៃ ពលរដ្ឋថៃចោទប្រកាន់ពលករបរទេសមកដណ្តើមការងារ និងធ្វើឱ្យពលរដ្ឋថៃគ្មានការងារធ្វើ ។ ប៉ុន្តែពេលប្រទេសថៃខ្វះខាតពលករបរទេសធ្វើការ ហើយម្ចាស់ចម្ការសង្ឃឹមពឹងផ្អែកលើពលករថៃនឹងមកធ្វើការដែលពួកគេធ្លាប់ស្រែកថា គ្មានការងារធ្វើ បែរជាមានពលរដ្ឋថៃតិចតួចបំផុតមកធ្វើការក្នុងចម្ការជំនួសពលករបរទេស ហើយពលរដ្ឋថៃទាំងនេះលើកហេតុផលយ៉ាងច្រើនមកធ្វើជាលេស ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod កាលពីថ្ងៃទី១៣ ខែសីហា ឆ្នាំ២០២៥ ឱ្យដឹងថា កងទ័ពថៃបានច្រានចោលព័ត៌មានឈ្លានពានកម្ពុជាជាថ្មី នៅយប់ថ្ងៃទី១៣ និងព្រឹកថ្ងៃទី១៤ ខែសីហា គឺកងទ័ពថៃគ្មានការបញ្ជាឱ្យជម្លៀសពលរដ្ឋចេញពីលំនៅឋានតាមព្រំដែន ឬបិទសាលារៀននៅឃុំដាន ស្រុកកាបឈើង ខេត្តសុរិន្ទ ដូចការចុះផ្សាយរបស់សារព័ត៌មានទេ ។ កងទ័ពថៃគោរពកិច្ចព្រមព្រៀងបទឈប់បា.ញ់យ៉ាងម៉ឺងម៉ាត់ និងសូមឱ្យពលរដ្ឋជឿជាក់លើព័ត៌មានពីប្រភពអាចទុកចិត្តបាន ។

កាលពីថ្ងៃទី១៣ ខែសីហា នៅទីបញ្ជាការកងទ័ពជើងគោក លោក រិតឆា សុខស៊ុវ៉ាន់ណុន អ្នកនាំពាក្យរងកងទ័ពជើងគោកបានលើកឡើងពីព័ត៌មានផ្សព្វផ្សាយថា កងទ័ពថៃត្រៀមបើកការឈ្លានពានវាយប្រហារកម្ពុជាជាថ្មី អាចនៅយប់ថ្ងៃទី១៣ និងព្រឹកថ្ងៃទី១៤ ខែសីហា ក្រោយពីកងទ័ពថៃបញ្ជាឱ្យបិទសាលារៀននៅឃុំដាន ស្រុកកាបឈើង ខេត្តសុរិន្ទ ។

កងទ័ពថៃបានត្រួតពិនិត្យរួចហើយ គឺគ្មានការជម្លៀស ឬបិទសាលារៀននៅឃុំដានទេ សាលារៀននៅតែបើកទ្វារបង្រៀនសិស្សតាមធម្មតា ខណៈសាលារៀនមួយចំនួនទៀតនៅឃុំនេះ គ្រាន់តែពន្យារពេលបង្រៀនសិស្សក្នុងថ្នាក់មួយរយៈសិន ។ កងទ័ពថៃសូមបញ្ជាក់ថា នៅតែគោរពតាមកិច្ចព្រមព្រៀងបទឈប់បាញ់ក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) យ៉ាងម៉ឺងម៉ាត់ និងសូមពលរដ្ឋជឿជាក់ព័ត៌មានពីប្រភពអាចទុកចិត្តបាន ។

ដោយឡែក នៅថ្ងៃ១៣ ខែសីហា អ្នកនាំពាក្យរដ្ឋាភិបាលថៃ លោក ជិរ៉ាយុ ហួងសាប់ បានលើកឡើងពីព័ត៌មានផ្សព្វផ្សាយក្នុងបណ្តាញសង្គមថា «កងទ័ពថៃប្រកាសឱ្យពលរដ្ឋជម្លៀសចេញពីលំនៅឋានជាបន្ទាន់ ដោយសារស្ថានការណ៍ព្រំដែនកម្ពុជា-ថៃតានតឹងឡើងវិញ» ដោយលោកថា ព័ត៌មាននេះក្លែងក្លាយ ពីព្រោះបច្ចុប្បន្ន ស្ថានការណ៍នៅខេត្តព្រំដែនចំនួន៧ ជាប់កម្ពុជាធូរស្រាលហើយ ។

មជ្ឈមណ្ឌលប្រឆាំងព័ត៌មានក្លែងក្លាយប្រទេសថៃបានស៊ើបអង្កេតការពិតជាមួយកងទ័ពភូមិភាគ២ ឃើញថា កងទ័ពថៃពុំបានប្រកាសឱ្យពលរដ្ឋជម្លៀសចេញពីលំនៅឋានទេ ។ នៅតាមបណ្តោយព្រំដែនកម្ពុជា-ថៃមានស្ថានការណ៍ធម្មតា គ្រាន់តែកងទ័ពថៃត្រៀមខ្លួន និងតាមដានស្ថានការណ៍យ៉ាងដិតដល់ គឺគ្មានការប៉ះទង្គិច ឬធ្វើសង្គ្រាមឡើយ ។

រដ្ឋាភិបាលថៃសូមឱ្យពលរដ្ឋកុំជឿព័ត៌មានគ្មានប្រភពច្បាស់លាស់ ឬចែកចាយបន្ត ពលរដ្ឋគួរតែតាមដានព័ត៌មានពីស្ថាប័នរដ្ឋាភិបាល ឬសារព័ត៌មានផ្លូវការប៉ុណ្ណោះ ។ រដ្ឋាភិបាល និងកងទ័ពផ្តោតសំខាន់បំផុតលើសន្តិសុខជាតិ និងសុវត្ថិភាពពលរដ្ឋគ្រប់រូបនៅព្រំដែន ។

ចំណែកកម្ពុជាអំពាវនាវឱ្យភាគីថៃគោរពនូវលក្ខខណ្ឌនៃកិច្ចព្រមព្រៀងបទឈប់បាញ់ ព្រមទាំងស្មារតី និងការឯកភាពគ្នានៅក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅ(GBC) ដែលថា ភាគីទាំងពីរបានព្រមព្រៀងគ្នារក្សាកម្លាំងកងទ័ពរបស់ខ្លួននៅក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើងក្នុងពេលកិច្ចព្រមព្រៀងបទឈប់បាញ់ចូលជាធរមាន នៅម៉ោង១២អធ្រាត្រ (ម៉ោងក្នុងតំបន់) កាលពីថ្ងៃទី២៨ ខែកក្កដា ឆ្នាំ២០២៥ ឡើយ ។ ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការដើរល្បាតទៅលើទីតាំងរបស់ភាគីម្ខាងទៀតឡើយ ។

កម្ពុជាសូមអំពាវនាវដល់ភាគីថៃប្រកាន់ខ្ជាប់នូវស្មារតីបទឈប់បាញ់ ឈានទៅរកដំណោះស្រាយជម្លោះតាមគោលការណ៍ដែលភាគីទាំងពីរបានឯកភាពគ្នា រួមទាំងការ ប្រជុំគណៈកម្មាធិការព្រំដែនថ្នាក់យោធភូមិភាគ (RBC) និងកិច្ចប្រជុំវិសាមញ្ញរបស់គណៈកម្មាធិការព្រំដែនទូទៅកម្ពុជា-ថៃ(GBC) នាពេលខាងមុខ ៕

បំបាក់មុខគ្នាឯងច្បាស់ណាស់! ក្រសួងការពារជាតិថៃរងចោ.ទប្រកាន់ពីប្រជាជនខ្លួនថា គ្មានថវិការគ្រប់គ្រាន់ក្នុងការទំនុកបម្រុងកងទ័ព ក្រោយសុខៗមេទ័ពភូមិភាគ2 ប្រកាសសុំជំនួយពីសប្បុរសជនដើម្បីទិញបន្លាលួសបន្ថែម។ ក្រោយកើតមានបញ្ហានេះ ក្រសួងការពារជាតិថៃបានស្នើឲ្យមេទ័ពភូមិភាគ2 បញ្ឈប់ការរៃអង្គាសនេះ ដោយជំរុញឲ្យមេទ័ពរូបនេះងាកមកចរចាជាមួយថ្នាក់លើជាមុនប្រសិនបើត្រូវការអ្វីមួយ។ នេះបើយោងតាមសារព័ត៌មាន The Nation។

ថៃ៖ នៅថ្ងៃទី13 ខែសីហា មេបញ្ជាការភូមិភាគ2ថៃ លោក ប៊ុនសុីន ផាតក្លាង បានបង្ហោះសារមួយនៅលើទំព័រហ្វេសប៊ុក សុំការរៃអង្គាសប្រាក់ពីសាធារណជនក្នុងការទិញបន្លាលួសយកមកពង្រាយបន្ថែម ក្រោមហេតុផលថា ដើម្បីការពារកុំឲ្យទាហានខ្មែរលូនចូលទៅដាក់គ្រាប់មីននៅក្នុងទឹកដីថៃ។ ការបង្ហោះនេះ បានជំរុញឲ្យមានមតិរិះគ.ន់រដ្ឋាភិបាលថៃជាខ្លាំង ដោយពលរដ្ឋថៃភាគច្រើនចោ.ទសួរថា ហេតុអ្វីកងទ័ពត្រូវរៃអង្គាសប្រាក់ដូច្នេះ? តើក្រសួងការពារជាតិថៃគ្មានថវិការសម្រាប់ផ្គត់ផ្គង់លើរឿងទាំងនេះទេមែនទេ? ចុះប្រាក់ដែលតែងយកពីពលរដ្ឋថ្លៃបង់ពន្ធនោះទៅណាអស់ហើយ?

បន្ទាប់ពីការបង្ហោះនោះ នាយប់ថ្ងៃដដែល ក្រសួងការពារជាតិថៃបានចេញមកច្រានចោលទាំងស្រុងចំពោះការអះអាងថាខ្វះខាតថវិកា ដោយលោក ភូមថាំ វេឆាយ៉ាឆៃ នាយករដ្ឋមន្រ្តីស្ដីទី សូមអង្វរលោក ប៊ុនស៊ីង ផាតក្លាង ដែលជាមេភូមិភាគ2 កុំបន្តសុំជំនួយពីពលរដ្ឋបន្តទៀតអី និងជំរុញឲ្យលោក ប៊ុនសុី ដាក់សំណើរមកកាន់ថ្នាក់លើបាន។ លោកថារដ្ឋាភិបាលមិនខ្វះថវិការសម្រាប់ទ័ពនោះទេ ប្រសិនបើតំបន់កងទ័ពភាគ2 ត្រូវការឧបករណ៍ផ្សេងៗ គួរតែជូនដំណឹងទៅទីបញ្ជាការកងទ័ពភូមិន្ទថៃ (RTA) និងអគ្គមេបញ្ជាការកងទ័ព ដូច្នេះរដ្ឋាភិបាលអាចបែងចែកថវិកាបាន។

ដោយខ្លាចថាប្រជាជននឹងធ្វើការរិះគន់សារជាថ្មីជុំវិញការប្រតិបត្តិការងារមិនសុីចង្វាក់គ្នារវាងកងទ័ព និងក្រសួងការពារជាតិ អ្នកនាំពាក្យក្រសួងការពារជាតិថៃ លោក Surasant Kongsiri បានបកស្រាយថា៖ ការអំពាវនាវរបស់កងទ័ពភូមិភាគ2 គ្រាន់តែជាវិធានការបណ្តោះអាសន្ន ដើម្បីដោះស្រាយតម្រូវការការបន្ទាន់ប៉ុណ្ណោះ។ លោកបញ្ជាក់ថា៖ រដ្ឋាភិបាលមានថវិកាគ្រប់គ្រាន់ ប៉ុន្តែដំណើរការស្នើដកយកមកប្រើប្រាស់គឺអាចនឹងត្រូវការពេលវេលាមួយចំនួន ដូច្នេះទើបខាងកងទ័ពប្រកាសស្នើសុំជំនួយពីប្រជាជនបែបនេះដើម្បីភាពឆាប់រហ័ស។

ជាមួយនឹងបញ្ហាខាងលើនេះ វាបានបង្ហាញថា រវាងកងទ័ពនិងរដ្ឋាភិបាលថៃគឺតែងមានការខ្វែងគំនិតគ្នាជានិច្ច។ តួយ៉ាងដូចជាការប្រកាសរបស់មេទ័ពភូមិភាគ2 ក្នុងការស្នើសុំជំនួយពីពលរដ្ឋដោយផ្ទាល់ ដោយមិនបានដាក់សំណើរនេះមកខាងថ្នាក់លើជាមុនសិននោះ បានបញ្ជាក់យ៉ាងច្បាស់ថា មេទ័ពរូបនេះមានគំនិតមិនចង់ពាក់ព័ន្ធជាមួយរដ្ឋាភិបាលរបស់ខ្លួន ដែលជាងនេះទៅទៀត វាហាក់ជាចេតនាចង់បានមុខមាត់តែឯង ដូចការប្រកាសកាលពីថ្មីៗនេះថា នឹងវា.យយកប្រាសាទតាក្របីឲ្យបានមុនពេលចូលនិវត្តន៍ដូច្នេះដែរ៕

ថៃ៖ នាយកប្រតិបត្តិជាន់ខ្ពស់មកពីក្រុមហ៊ុន ខារ៉ាវាវ គ្រុប បាននិយាយថា បើទោះជាបច្ចុប្បន្នម៉ាកយីហោថៃ និងផលិតថៃនៅកម្ពុជាកំពុងត្រូវបានពហិការឈប់ប្រើប្រាស់ដោយពលរដ្ឋកម្ពុជាក៏ដោយ ប៉ុន្តែស្ថានភាពនេះមិនគួរឲ្យបារម្ភពេកទេ ព្រោះនៅរយៈពេលខ្លីខាងមុខប្រជាជនកម្ពុជានឹងបានរំសាយចិត្តចឹងស្អប់ហើយងាកមកប្រើប្រាស់ផលិតផលថៃដូចមុនវិញហើយ ព្រោះកម្ពុជាមានមនោសញ្ចេតនាជាមួយសម្ភារៈប្រើប្រាស់ថៃណាស់។

យោងតាមការចុះផ្សាយរបស់សារព័ត៌មាន The Nation នាថ្ងៃទី12 ខែសីហា បានឲ្យដឹងថា ផលប៉ះពាល់លើអាជីវកម្មថៃកាន់តែទូលំទូលាយ ដោយម៉ាកយីហោថៃដែលកំពុងប្រតិបត្តិការក្នុងប្រទេសកម្ពុជាបានផ្អាកទំនាក់ទំនងទីផ្សារ ហើយក្រុមហ៊ុនខ្លះ គ្រោងនឹងពន្យារពេលការបើកដំណើរការរបស់ពួកគេរហូតដល់លក្ខខណ្ឌមានស្ថេរភាពឡើងវិញ។

លោក Romtham Sathientham នាយកគ្រប់គ្រងក្រុមហ៊ុន Carabao Group Plc បាននិយាយថា ការបិទព្រំដែនកម្ពុជា-ថៃ កាលពីខែមិថុនាកន្លងទៅ បានប៉ះពាល់ដោយផ្ទាល់ដល់ការនាំចេញភេសជ្ជៈប៉ូវកម្លាំងរបស់ក្រុមហ៊ុន។ លោកថា “យើងមិនអាចដឹកជញ្ជូនទំនិញតាមផ្លូវគោកក្នុងរយៈពេលពីប្រាំពីរទៅប្រាំបីថ្ងៃ ដូច្នេះយើងត្រូវប្តូរទៅការដឹកជញ្ជូនតាមសមុទ្រ ដែលពន្យារពេលការដឹកជញ្ជូន និងប៉ះពាល់ដល់ការលក់នៅត្រីមាសទីពីរ”។

លោក Romtham បានបន្តទៀតថា៖ ការកើនឡើងនៃជម្លោះកម្ពុជា-ថៃ បានបង្ខំឱ្យយីហោថៃដែលកំពុងប្រតិបត្តិការនៅកម្ពុជា បានអនុវត្តវិធានការបណ្តោះអាសន្នមួយ ដោយផ្អាកសកម្មភាពធ្វើទីផ្សារ និងការផ្សាយពាណិជ្ជកម្ម ដើម្បីកាត់បន្ថយកំហឹង និងការស្អ.ប់មកលើផលិតផលរបស់ពួកគេ។ ប៉ុន្តែ លោក Romtham បានគូសបញ្ជាក់ថា៖ យ៉ាងណាផលិតផលភេសជ្ជៈរបស់ក្រុម ខារ៉ាបាវ នៅតែមានទីផ្សារខ្លាំង ហើយការផ្គត់ផ្គង់នៅតែមិនគ្រប់គ្រាន់ ព្រោះផលិតផលថៃតែងរក្សាបាននូវភាពទាក់ទាញ និង គុណភាព សម្រាប់អ្នកប្រើប្រាស់កម្ពុជា។

នាយកគ្រប់គ្រងក្រុមហ៊ុនមួយនេះ បាននិយាយដោយភាពជឿជាក់ថា៖ «សរុបមក ទំនិញ និងម៉ាកយីហោផលិតផលថៃអាចប្រឈមមុខនឹងបញ្ហាមួយចំនួនពិតមែននៅពេលនេះ ប៉ុន្តែយើងជឿជាក់ថា វានឹងមានត្រឹមតែរយៈពេលខ្លីប៉ុណ្ណោះ។ មនោសញ្ចេតនារបស់ពលរដ្ឋកម្ពុជានៅតែមាន ហើយវានឹងឃើញលទ្ធផលក្នុងរយៈពេលពី 6 ទៅ 12 ខែខាងមុខ យើងសង្ឃឹមថាស្ថានភាពនឹងវិលមករកភាពប្រក្រតីវិញ ដោយសារប្រជាជនកម្ពុជាចូលចិត្តផលិតផលថៃណាស់។» ទាំងនេះគឺជាការអះអាងរបស់នាយកគ្រប់គ្រងក្រុមហ៊ុន ខារ៉ាបាវ នៅក្នុងបទសម្ភាសន៍ជាមួយសារព័ត៌មានថៃ ជុំវិញការពិភាក្សាផ្នែកសេដ្ឋកិច្ចទីផ្សារពាណិជ្ជកម្មរបស់ថៃនៅកម្ពុជា។

យ៉ាងណាងាកមកខាងកម្ពុជាវិញ ចាប់តាំងពីការឈ្លានពានរបស់ថៃមកលើកម្ពុជាបានលេចឡើងម្ដងទៀតនៅក្នុងឆ្នាំ2025នេះ យុវជនខ្មែរ រួមទាំងបុគ្គលមានឥទ្ធិពលនៅក្នុងសង្គមជាច្រើន បាននាំគ្នាបង្ហាញពីការប្ដេជ្ញាចិត្ត ពហិការឈប់ប្រើប្រាស់ផលិតផលថៃ រួមទាំងការឈប់គាំទ្រសិល្បៈថៃផងដែរ។

គួរបញ្ជាក់ថា កន្លងមកមានការចុះផ្សាយព្រោងព្រាត ពីក្រុមហ៊ុនធំៗមួយចំនួនដែលទទួលបានប្រាក់ចំណេញរាប់សិបលានដុល្លារក្នុងមួយឆ្នាំៗពីប្រទេសកម្ពុជា ប៉ុន្តែបានផ្ដល់ប្រាក់ឧបត្ថមគាំទ្រដល់យោធាថៃ ក្នុងការទិញសព្វាវុ.ធទំនើបៗមកវា.យប្រហារធ្វើបាប សម្លាប់ទាហាន និងជីវិតជនសុីវិលខ្មែរយ៉ាងព្រៃផ្សៃបំផុត។ ដូច្នេះកូនខ្មែរគ្រប់រូបគួរចងចាំនូវភាពឈឺចាប់នេះ កុំឆាប់ភ្លេចនូវអ្វីដែលថៃធ្លាប់បានធ្វើកន្លងមក ហើយងាកទៅគាំទ្រពួកគេដូចមុនទៀតឲ្យសោះ៕