ប្រទេសថៃ ៖ កាលពីថ្ងៃទី២០ ខែសីហា ឆ្នាំ២០២៥ សារព័ត៌មានថៃ Mgr Online រាយការណ៍ថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយពីការដាក់ពាក្យប្តឹងសម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅប្រទេសថៃជាមុនសិន លោកអាចនឹងប្តឹងសម្តេចទាំងពីរទៅអន្តរជាតិ ប៉ុន្តែត្រូវសិក្សាលម្អិត និងរង់ចាំការស៊ើបអង្កេតរបស់សមត្ថកិច្ចថៃ ។ ពេលនេះ នាយករដ្ឋមន្ត្រីស្តីទីថៃពុំទាន់ដឹងថា តើសម្តេចទាំងពីរបានវិនិយោគអ្វីខ្លះនៅថៃ ។

លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីនិយាយថា ការប្តឹងសម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត គឺត្រូវប្តឹងតាមច្បាប់នៅថៃជាមុន រីឯការប្តឹងទៅអន្តរជាតិត្រូវតែសិក្សាលម្អិត ពីព្រោះវានឹងប៉ះពាល់ដល់ទំនាក់ទំនង ។ លោកបានឱ្យមន្ត្រីច្បាប់ក្រុមប្រឹក្សាសន្តិសុខជាតិពិភាក្សាជាមួយក្រសួងការបរទេស និងពុំទាន់ដឹងថា តើសម្តេចទាំងពីរបានវិនិយោគអ្វីខ្លះនៅថៃ និងមានបញ្ហាអ្វី ដូច្នេះ ស្ថាប័នពាក់ព័ន្ធនឹងត្រួតពិនិត្យជាមុន ។

នាយករដ្ឋមន្ត្រីស្តីទីថៃបានផ្តល់សម្ភាសន៍ជាមួយសារព័ត៌មាន កាលពីថ្ងៃទី២០ ខែសីហា ថា រដ្ឋាភិបាលថៃត្រៀមប្តឹងសម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នៅប្រទេសថៃ រីឯការប្តឹងទៅអន្តរជាតិ គឺត្រូវសិក្សាឱ្យបានលម្អិត ពីព្រោះវាប៉ះពាល់ដល់ទំនាក់ទំនង និងប៉ះពាល់ផ្នែកផ្សេងៗ ។ ហេតុនេះ មន្ត្រីច្បាប់ និងក្រសួងការបរទេស រួមទាំងក្រុមប្រឹក្សាសន្តិសុខជាតិ ត្រូវតែពិភាក្សាគ្នាពីការប្តឹងនេះ ។

លោក ភូមិថាំ ពុំទាន់បានត្រួតពិនិត្យថា តើសម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត បានវិនិយោគអ្វីខ្លះនៅថៃ ហើយលោកនឹងឱ្យស្ថាប័នពាក់ព័ន្ធត្រួតពិនិត្យ ។ លោកពុំដឹងថា តើសម្តេចទាំងពីរមានបញ្ហាអ្វីនៅថៃ ប៉ុន្តែអ្វីៗត្រូវដោះស្រាយតាមនីតិវិធីច្បាប់ បើធ្វើឱ្យខូចខាតដល់ប្រទេសថៃ គឺត្រូវតែឆ្លងកាត់ដំណើរការយុត្តិធម៌ ខណៈការប្តឹងទៅអន្តរជាតិនឹងមានលក្ខខណ្ឌលម្អិតមួយចំនួន ។

ពេលនេះ ថៃនឹងពុំទាន់ប្តឹងទៅសមត្ថកិច្ចអន្តរជាតិឱ្យចាប់ខ្លួនសម្តេចទាំងពីរមកកាត់ទោសទេ គឺនឹងអនុវត្តតាមនីតិវិធីច្បាប់នៅប្រទេសថៃ ។ រីឯការប្តឹងទៅ Interpol ឬក៏អត់នោះ គឺនឹងរង់ចាំឱ្យសមត្ថកិច្ចថៃស៊ើបអង្កេតសិន ប្រសិនបើអាចប្តឹងបាន ថៃនឹងប្តឹង ។ នេះបើតាមការអះអាងរបស់លោក ភូមិថាំ ។

ក្រសួងការបរទេស និងសហប្រតិបត្តិការកម្ពុជាបានចាត់ទុកចំណាត់ការផ្លូវច្បាប់របស់ប្រទេសថៃ ដែលគ្រោងចាប់ខ្លួនមេដឹកនាំកម្ពុជា ថា ជាសកម្មភាពប៉ះពាល់ធ្ងន់លើបទឈប់បា.ញ់ដើម្បីស្ដារសន្តិភាព និងខូចខាតដល់ទំនាក់ទំនងរវាងកម្ពុជា-ថៃ ។

កាលពីថ្ងៃទី១៨ ខែសីហា កន្លងមក សារព័ត៌មាននានារបស់ថៃបានផ្សព្វផ្សាយពីចំណាត់ការផ្លូវច្បាប់របស់ថៃក្នុងការចាប់ខ្លួនមេដឹកនាំកម្ពុជា២រូប រួមមាន ៖ សម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ពីបទឧក្រិដ្ឋកម្មសង្រ្គាម និងរំលោភលើអធិបតេយ្យថៃ ៕

ណារ៉ាធីវ៉ាត់៖ ជម្លោះជាមួយប្រទេសជិតខាងផង ផ្ទៃក្នុងអុកឡុកផងធ្វើឲ្យថៃប្រុងជើងការកាន់ខ្លាំងឡើង ដោយយ៉ាងហោចណាស់មានមន្ត្រីស្ម័គ្រចិត្តរបស់ថៃ១នាក់ទៀតហើយ បានរងរបួសធ្ងន់ធ្ងរត្រូវបញ្ចូនទៅសង្រ្គោះនៅមន្ទីរពេទ្យភ្លាមៗ ក្រោយហេតុការណ៍បំផ្ទុះគ្រាប់បែកដោយក្រុមផ្ដាច់ខ្លួនភាគខាងត្បូងដើម្បីវា.យប្រហារទៅលើប៉ុស្តិ៍ត្រួតពិនិត្យក្នុងស្រុក Tan Bai ប្រទេសថៃ កាលពីយប់ថ្ងៃទី២០ ខែសីហា។

យោងតាមការចុះផ្សាយរបស់សារព័ត៌មាន Khaosod បានឲ្យដឹងថា ហេតុការណ៍ដ៏រន្ធ.ត់នេះ បានកើតឡើងកាលពីវេលាម៉ោង៨និង១៥នាទីយប់ នៅមូលដ្ឋានអង្គភាពការពារសង្កាត់ Sala Mai ដែលមានទីតាំងនៅជាប់ស្ថានីយប្រេងឥន្ធនៈផ្កាយរណប ក្នុងសង្កាត់ Ban Khok Ma Fueang ស្រុក Tak Bai ខេត្ត Narathiwat ។

សាក្សីក្នុងដែលបាននៅផ្ទាល់នឹងទីតាំងដែលមានការបំផ្ទុះនេះបានរៀបរាប់ថា អ្នកបំផ្ទុះនោះបានដាក់គ្រាប់បែ.កបង្កប់នៅរថយន្ត Toyota Yaris រួចបានបើកវាសំដៅចូលទៅប៉ុស្តិ៍ត្រួតពិនិត្យ Tan Bai ដោយផ្ទាល់ដើម្បីធ្វើការបំផ្ទុះ។ ក្រោយពេលរថយន្តផ្ទុះភ្លាមៗ មន្ត្រីថៃជាង១០នាក់ ដែលឈរជើងនៅមូលដ្ឋាន បានបើកការបា.ញ់ប្រហារទៅលើជនបង្កវិញ ប៉ុន្តែគេបានរត់គេចខ្លួនបាត់ស្រមោល។

គួរឲ្យដឹងថា ស្ថានភាពក្នុងប្រទេសរបស់ថៃនៅពេលនេះមានភាពវឹកវរជាខ្លាំង ជាពិសេសនៅតំបន់ភាគខាងត្បូង ដែលក្រុមផ្ដាច់ខ្លួនមូស្លីមម៉ាឡេបានអុកឡុកបង្ករហិង្សាប្រដាប់អាវុ.ធស្ទើជារៀងរាល់ថ្ងៃ។ កាលពីថ្ងៃទី១៦ ខែសីហា ថ្មីៗកន្លងទៅនេះ សកម្មប្រយុទ្ធប្រមាណពី ១០ ទៅ ១៥នាក់ បានចូលរួមក្នុងការវា.យប្រហារលើរោងចក្រគីមីមួយកន្លែងបណ្តាលឱ្យរោងចក្ររងការខូចខាត និងត្រូវផ្អាកប្រតិបត្តិការ។

ជាការឆ្លើយតប អាជ្ញាធរថៃបានដាក់ពង្រាយកម្លាំង និងរឹតបន្តឹងសន្តិសុខនៅតាមតំបន់ព្រំដែន និងចំណុចរសើបនានា ដើម្បីទប់ស្កាត់ការវាយប្រហារដែលអាចកើតមានឡើងទៀត។ តែទោះជាយ៉ាងណា អំពើហិង្សានៅខេត្តភាគខាងត្បូងរបស់ថៃនេះ បានក្លាយជាជម្លោះប្រដាប់អាវុធដ៏រ៉ាំរ៉ៃរវាងរដ្ឋាភិបាលថៃ និងក្រុមបះបោរផ្តាច់ខ្លួន ដោយបើយោងតាមក្រុមស្រាវជ្រាវ Deep South Watch ជម្លោះនេះបានបណ្តាលឱ្យមនុស្សជាង ៧,៥០០នាក់ស្លាប់ និងជាង ១៣,៥០០នាក់ផ្សេងទៀតរងរបួស ចាប់តាំងពីឆ្នាំ២០០៤ មក៕

យោងតាមសេចក្តីថ្លែងការណ៍របស់ក្រសួងការបរទេសឥណ្ឌាឱ្យដឹងថា ឥណ្ឌានឹងស្តារទំនាក់ទំនងល្អជាមួយចិនជាច្រើនផ្នែក ដូចជា ៖ បើកការហោះហើរត្រង់រវាងប្រទេសទាំងពីរឡើងវិញ ជំរុញពាណិជ្ជកម្ម ការវិនិយោគ ជួញដូរនៅតំបន់ព្រំដែន៣កន្លែង និងផ្តល់ភាពងាយស្រួលក្នុងការស្នើសុំទិដ្ឋាការ ។ នេះបើតាមការផ្សព្វផ្សាយរបស់សារព័ត៌មានបរទេស នៅថ្ងៃទី២០ ខែសីហា ឆ្នាំ២០២៥ ។

សេចក្តីថ្លែងការណ៍របស់ក្រសួងការបរទេសឥណ្ឌាត្រូវបានចាត់ទុកថា គឺជាសញ្ញាវិជ្ជមានក្នុងការស្តារទំនាក់ទំនងរវាងប្រទេសទាំងពីរក្រោយពីបានប្រឈមមុខ និងប៉ះទង្គិចនៅព្រំដែនកាលពីឆ្នាំ២០២០ ខណៈជើងហោះហើរត្រង់រវាងឥណ្ឌា-ចិនត្រូវបានផ្អាកដោយសារការឆ្លងរាតត្បាតនៃជំងឺកូវីដ-១៩ ក្នុងឆ្នាំ២០២០នេះ ។

ការចេញសេចក្តីថ្លែងការណ៍របស់ក្រសួងការបរទេសឥណ្ឌា គឺក្រោយពីលោក វាំង អ៊ី រដ្ឋមន្ត្រីក្រសួងការបរទេសចិនបានធ្វើដំណើរទស្សនកិច្ចនៅទីក្រុងញូវដេលី ប្រទេសឥណ្ឌា ចំនួន២ថ្ងៃ ដើម្បីចរចាជាមួយលោក Ajit Doval ទីប្រឹក្សាសន្តិសុខជាតិរបស់ឥណ្ឌា ស្តីពីការបញ្ចប់ជម្លោះព្រំដែនដែលអូសបន្លាយពេលជាច្រើនឆ្នាំ ។

មន្ត្រីក្រសួងការបរទេសឥណ្ឌាបញ្ជាក់ថា ការចរចាបញ្ចប់ជម្លោះព្រំដែនបានលើកឡើងពីប្រធានបទជាច្រើនពាក់ព័ន្ធនឹងការដកថយកម្លាំងកងទ័ពទាំងពីរប្រទេសចេញពីតំបន់ជម្លោះនៅជួរភ្នំហិម៉ាឡៃ ការកំណត់ និងបោះបង្គោលព្រំដែន រួមទាំងពិភាក្សាពីកិច្ចការព្រំដែន ។

បើតាមសេចក្តីថ្លែងការណ៍របស់ក្រសួងការបរទេសចិនដែលផ្សព្វផ្សាយនៅថ្ងៃទី២០ ខែសីហា គឺចិន និងឥណ្ឌា បានព្រមព្រៀងគ្នាបង្កើតក្រុមការងារពិភាក្សា និងសម្របសម្រួលកិច្ចការព្រំដែន ក៏ដូចជាជំរុញការចរចាព្រំដែន ។ យន្តការនេះនឹងពង្រីកការចរចាពីតំបន់ព្រំដែនខាងកើត និងកណ្តាល ហើយប្រទេសទាំងពីរនឹងចរចាជាថ្មីពីព្រំដែនខាងលិច ដែលការចរចា គឺនៅចិន ក្នុងឆ្នាំ២០២៦ ។

នាយករដ្ឋមន្ត្រីឥណ្ឌា លោក Narendra Modi បានសរសេរក្នុងបណ្តាញសង្គម X ក្រោយពីជជែកជាមួយលោក វាំង អ៊ី រដ្ឋមន្ត្រីក្រសួងការបរទេសចិន ថា ទំនាក់ទំនងមានស្ថិរភាពរវាងឥណ្ឌា-ចិន នឹងមានសារៈសំខាន់សម្រាប់សន្តិភាព និងការរីកចម្រើនទាំងក្នុងតំបន់ ក៏ដូចជាពិភពលោក ។

គួរបញ្ជាក់ថា ការព្យាយាមពង្រឹងទំនាក់ទំនងរវាងប្រទេសទាំងពីរ គឺស្របពេលពុំអាចទាយទុកជាមុនពីគោលនយោបាយការបរទេសរបស់លោក Donald Trump ប្រធានាធិបតីអាមេរិក ។ ថ្មីៗនេះ ឥណ្ឌាប្រឈមនឹងការដំឡើងពន្ធទំនិញនាំចូលអាមេរិកខ្ពស់ ដោយសារឥណ្ឌាពុំបញ្ឈប់ទិញប្រេងឥន្ធនៈពីរុស្ស៊ី ៕

(ភ្នំពេញ)៖ ក្រោយពេលថៃអះអាងថាខ្លួនបានរកឃើញទូរស័ព្ទដៃរបស់ទាហានខ្មែរដែលលាក់នៅក្នុងគន្លាតថ្ម ពេលចូលទៅបង្កប់មីនក្នុងទឹកដីថៃ លោក ម៉ៃឃើល ប៊ីអាល់ហ្វារ៉ូ (Michael B Alfaro) បង្ហាញការហួសចិត្តជាខ្លាំង ដោយចង់ហៅលោក អុីឡុន ម៉ាសក៍ មកវិនិយោគនៅកម្ពុជា ព្រោះកម្ពុជាអាចផលិតទូរស័ព្ទដែលអាចត្រូវភ្លៀងត្រូវខ្យល់ ទុកចោលអស់ជាច្រើនថ្ងៃបានដោយមិនជ្រាបទឹកខូច និងមិនអស់ថ្ម។

នៅយប់ថ្ងៃទី១៩ ខែសីហា ឆ្នាំ២០២៥ សារព័ត៌មានរបស់ថៃបានចុះផ្សាយព្រោងព្រាតថាកងទ័ពភូមិន្ទថៃ បានរកឃើញទូរស័ព្ទមួយគ្រឿងដែលជារបស់ទាហានខ្មែរបានលាក់ទុកនៅគន្លាតថ្មហើយភ្លេច ពេលចូលមកបង្កប់មីននៅក្នុងទឹកដីថៃ។ ក្រោយការរកឃើញ កងទ័ពថៃបានឆែកមើលក្នុងទូរស័ព្ទនោះដោយបានប្រទះឃើញរូបថត និងវីដេអូសកម្មភាពដាក់បង្កប់មីនរបស់ទាហានខ្មែរដែលបានថតទុកនៅក្នុងនោះ ហើយកងទ័ពថៃបានអះអាងថា ទាំងនេះគឺជាភស្តុតាងដ៏ច្បាស់លាស់បំផុតថាកម្ពុជាពិតជាបានលួ.ចដាក់គ្រាប់មីននៅក្នុងទឹកដីថៃពិតមែន។

បន្ទាប់ពីការប្រកាសរបស់ថៃបែបនេះ មានអ្នកវិភាគជាច្រើនបានលើកឡើងថាវាគ្រាន់តែជាការសម្ដែងរបស់ថៃ ដើម្បីចោ.ទប្រកាន់ និងបង្ខូចឈ្មោះកម្ពុជានៅចំពោះមុខអន្តរជាតិតែប៉ុណ្ណោះ។ បើតាមផេកជនបរទេសម្នាក់ដែលមានឈ្មោះថា Kevin Smith KH បានបង្ហោះវីដេអូមួយដោយរៀបរាប់ថា វាមានចំណុចជាច្រើនដែលមិនសមហេតុផលទាល់តែសោះ ក្នុងការឲ្យជឿថាទូរស័ព្ទនេះគឺជារបស់ទាហានកម្ពុជា។

ចំណុចធំៗដែលគេយល់ថានេះជាការសម្ដែងរបស់ថៃរួមមាន៖ ១. តើអ្នកណាទុកទូរស័ព្ទចោលជាមួយនឹងខ្សែសាកដូចនេះ? ២. តើអ្នកណាទៅល្ងង់ដល់ថ្នាក់ថតសកម្មភាពខុសច្បាប់របស់ខ្លួនទុកក្នុងទូរស័ព្ទធ្វើអ្វី? ៣. បើមើលទៅ ទូរស័ព្ទនេះទំនងជាទុកចោលច្រើនថ្ងៃហើយ តែហេតុអ្វីបានជាវាមិនត្រូវភ្លៀងជ្រាបទឹកខូច និងមិនអស់ថ្មបែបនេះ?

ទន្ទឹមនឹងការបង្ហោះវិដេអូរបស់ Kevin Smith KH លោក Michael B Alfaro ដែលទើបចាក់ចេញពីប្រទេសកម្ពុជាទៅដល់សហរដ្ឋអាមេរិកនោះ បានចែករំលែកបន្តនិងសរសេសំណេរខ្លីមួយបែបហួសចិត្តថា៖ តើអ្នកគិតថាកម្ពុជាអាចផលិតទូរសព្ទមិនជ្រាបទឹក ជាមួយនឹងថ្មកាន់ដែលទុកចោលយូរហើយមិនចេះអស់ដូចនេះឬ? អ្នកណាក៏បានដែរ សូមប្រាប់ លោក Elon Musk ឱ្យទាក់ទងមកកម្ពុជាផង។

ក្រៅពីលោក Alfaro ប្រជាជនខ្មែរគ្រប់រូបដែលបានឃើញព័ត៌មាននេះ ក៏មានការហួសចិត្តមិនស្ទើរនោះដែរ ដ្បិតថៃមិនត្រឹមតែចូលចិត្តផលិតភាពយន្តដែលមានល្បិចពិសពុលប៉ុណ្ណោះទេ ប៉ុន្តែសូម្បីថ្នាក់ដឹកនាំរដ្ឋាភិបាល អ្នកសារព័ត៌មាន និងប្រជាជនថៃមួយចំនួនក៏ចូលចិត្តសម្ដែងផងដែរ៕