Zi Yu ខឹងខ្លាំងពេកចាប់ទាញទូរសព្ទអ្នកគាំទ្រឈ្ល.ក់វង្វេ.ងដែលដេញតាមថតលោក

ចាប់តាំងពីក្រសោបភាពល្បីល្បាញក្នុងអាជីពសិល្បៈមកតារាសម្តែង Zi Yu ត្រូវបានរួមរិតដោយក្រុមអ្នកគាំទ្រងប់ងល់ឈ្លកក់វង្វេងឬហៅថា sasaengs fans បំពានជីវិតឯកជនយ៉ាងខ្លាំងក្លា។ ជាក់ស្តែងថ្មីៗនេះ Zi Yu ដោយសារតែខឹងខ្លាំងពេកបានចាប់ទាញទូរសព្ទរបស់អ្នកគាំទ្រងប់ងល់នោះធ្វើឱ្យផ្អើលពេញបណ្តាញសង្គម។

កាលពីថ្ងៃទី១៨ ខែសីហា តារាសម្តែងចិន Zi Yu និងក្រុមការងាររបស់ខ្លួនបានជួបឧប្បត្តិហេតុដ៏គួរឱ្យភ្ញាក់ផ្អើលមួយនៅពេលមកដល់ទីក្រុងប៉េកាំង។ ក្រុមអ្នកគាំទ្រឈ្លក់វង្វេង (sasaengs) បានដេញតាមរថយន្ត បិទផ្លូវ និងបង្កភាពចលាចល។ស្ថានការណ៍កាន់តែតានតឹងឡើង នៅពេលដែលអ្នកគ្រប់គ្រងរបស់ Zi Yu ដើរចេញដើម្បីបញ្ឈប់ពួកគេស្ទើរតែរងគ្រោះថ្នាក់ខណៈដែល sasaengs ម្នាក់បង្កើនល្បឿនដោយចេតនា។

យ៉ាងណាមិញ គ្មាននរណាម្នាក់រងរបួសទេប៉ុន្តែបន្ទាប់ពីការប៉ុនប៉ងមិនបានសម្រេច ក្រុម sasaengs បានប្តូរទៅប្រើពាក្យសំដី ហើយថែមទាំងរំខានដល់ចរាចរណ៍ ដោយបង្វែរផ្លូវសាធារណៈទៅជាការដេញតាមឥតឈប់ឈរ។

ដោយខឹងខ្លាំង Zi Yu បានចាប់យកទូរសព្ទរបស់ Sasaeng ចេញហើយតារាប្រុសរូបនេះបានស្រែកថា៖ «នេះជាបទឧក្រិដ្ឋ!»។ វីដេអូឃ្លីបនេះ បានផ្ទុះឡើង ដោយមានអ្នកនិយមលេងអ៊ីនធឺណិតជាច្រើននាក់បង្ហាញការគាំទ្រពាក្យសម្តីរបស់ Ziyu ព្រោះតែក្រុមហ្វេនទាំងនោះបំពានជីវិតឯកជនលោកខ្លាំងពេក។ មតិមួយសរសេរថា៖ «បើជាខ្ញុំ ខ្ញុំនឹងវាយកម្ទេចទូរសព្ទនោះ »។ យ៉ាងណាក្រៅពីមានមតិគាំទ្រអ្នកលេងបណ្តាញសង្គមមួយចំនួនទៀតបានលើកឡើងថា Ziyu មិនគួរមានប្រតិកម្មលើរាងកាយទេ ខណៈដែលមនុស្សជាច្រើនបានការពារលោកវិញ។

កាលពីកន្លងមកនេះភ្នាក់ងារគ្រប់គ្រងរបស់ Ziyu ក៏បានចេញសេចក្តីថ្លែងការព្រមាននឹងចាត់វិធានការទៅតាមផ្លូវច្បាប់ទៅកាន់ sasaengs Fans ដូចគ្នាដោយសារតែបំពានជីវិតឯកជនរបស់តារាប្រុសវ័យ២៣ឆ្នាំរូបនេះមិនថានៅកន្លែងធ្វើការឬកន្លែងស្នាក់នៅផងដែរ។

គួរបញ្ជាក់ផងដែរថា Ziyu បានសាងភាពល្បីល្បាញបន្ទាប់ពីសម្តែងក្នុងរឿង BL មានចំណងជើងថា «Revenged Love»។ទន្ទឹមនឹងប្រជាប្រិយភាពនៃរឿងនេះ Ziyu ក៏រងនូវរឿងអាស្រូវជីវិតឯកជនជាមួយអតីតសង្សារចាស់រហូតលោកចេញមកសូមទោសនិងផ្អាកសកម្មភាពបណ្តោះអាសន្ន៕