កំពត៖ គណៈបញ្ជាការឯកភាពខេត្តកំពត បានដឹកនាំកម្លាំងចម្រុះរបស់ស្នងការដ្ឋាននគរបាល មន្ត្រីជំនាញ និងអាជ្ញាធរពាក់ព័ន្ធ បានបើកប្រតិបត្តិការបង្ក្រាបទ្រង់ទ្រាយធំក្នុងការអនុវត្តនីតិវិធីលើបណ្ដាញឧក្រិដ្ឋជនឆបោកតាមប្រព័ន្ធបច្ចេកវិទ្យា ដោយចាប់បានមេខ្លោង សរុបចំនួន១៤នាក់ ទាក់ទងនឹងករណីផ្សេងៗគ្នារួមមានទាំងការឆបោ.កអនឡាញ ការធ្វើទារុ.ណកម្ម និងអំពើឃាតកម្មនៅក្នុងភូមិសាស្ត្រ ខេត្តកំពត ។
ប្រតិបត្តិការបង្រ្កាបនេះបានចាប់ពីថ្ងៃទី០៨ ខែសីហា ដល់ថ្ងៃទី១២ ខែសីហា ឆ្នាំ២០២៥ បានទទួលលទ្ធផលដូចជា៖ បានបង្រ្កាបបទល្មើសឆបោកតាមប្រព័ន្ធបច្ចេកវិទ្យា (Online Scam) និងករណីឃា.តក.ម្មដោយមានទារុ.ណកម្មនិងអំពើឃោ.រឃៅ នៅបូរី Villa Crown (តំបន់ ៣) និងអគារ (តំបន់៤) ចំណុចលើភ្នំបូកគោ ស្ថិតក្នុងភូមិរលួស សង្កាត់ បឹងទូក ក្រុងបូកគោ ខេត្តកំពត ចំនួន ០២ករណី។
*ករណីទី០១ សមត្ថកិច្ចចាប់បានជនសង្ស័យ៣នាក់ និងកំពុងបន្តតាមចាប់មេខ្លោង ពាក់ព័ន្ធនឹងករណីឆបោ.កតាមអនឡាញ ដោយដកហូតបានសម្ភារៈបម្រើឱ្យការឆបោករួមមាន៖ ទូរស័ព្ទដៃចំនួន ៣០១គ្រឿង កុំព្យូទ័រ Desktop ចំនួន ៣៩គ្រឿង Pad ចំនួន ១គ្រឿង Tablet ចំនួន ១៤គ្រឿង។
*ករណីទី០២ សមត្ថកិច្ចបានឃា.ត់ខ្លួនជនសង្ស័យ៤នាក់ ករណីរកឃើញមានមនុស្សស្លាប់ក្នុងរថយន្ត កាលពីវេលាម៉ោង១២រំលងអធ្រាត្រ ឆ្លងចូលថ្ងៃទី១០ ខែសីហា ឆ្នាំ២០២៥។ ក្រោយមកជណសង្ស័យទាំង៤នាក់បានសារភាពថា ខ្លួនពិតជាពាក់ព័ន្ធនឹងអំពើទារុ.ណកម្ម និង ឃា.តកម្មពិតមែន។
បច្ចុប្បន្នជនសង្ស័យទាំង៤នាក់ កំពុងត្រូវបានសមត្ថកិច្ចឃាត់ខ្លួនបណ្តោះអាសន្ន ដើម្បីបញ្ជូនទៅតុលាការ និងបន្តនីតិវិធីស្វែងចាប់ខ្លួនមេខ្លោងដែលនៅពីក្រោយរឿងនេះ។ក្នុងប្រតិបត្តិការបង្រ្កាបនេះដែរ សមត្ថកិច្ចចម្រុះក៏បានជួយសង្គ្រោះជនជាតិកូរ៉េជាង១០នាក់ឱ្យរួចផុតចេញពីមណ្ឌលឆបោកផងដែរ។
ដោយឡែកក្នុងប្រតិបត្តិការបង្ក្រាបនេះដែរ លោក ឈុន ច័ន្ទសីហា ចៅក្រមស៊ើបសួរនៃសាលាដំបូងខេត្តកំពត កាលពីថ្ងៃទី៩ ខែសីហា ឆ្នាំ២០២៥ បានចេញដីកាចំនួន០៥ផ្សេងៗ ដោយបង្គាប់ឱ្យឃុំខ្លួនជនបរទេសចំនួន៥រូបពាក់ព័ន្ធអំពើឃា.តកម្មដោយអំពើឃោរឃៅ និងសង្ស័យបទល្មើសបទឆបោកអនឡាញ។ ជនជាប់ចោ.ទទាំង៥នាក់នោះរួមមាន៖ ជនជាតិភូមា១នាក់ និងជនជាតិចិន៤នាក់។
ក្រៅពីនេះ ទាក់ទងនឹងប្រតិបត្តិការបង្ក្រាបការលក់-ជួញដូរមនុស្ស សមត្ថកិច្ចចាប់បានជនសង្ស័យចំនួន៥នាក់បន្ថែមទៀត និងពេលនេះកំពុងដាក់ឲ្យនៅក្រោមការឃុំខ្លួនជាបណ្តោះអាសន្ន។ ជនសង្ស័យទាំង៥នាក់ រួមមាន៖ ជនជាតិខ្មែរ១នាក់ និងជនជាតិចិន៤នាក់ ជាប់ចោ.ទពីបទដឹកជញ្ជូនដោយមានគោលដៅលក់-ជួញដូរមនុស្ស ប្រព្រឹត្តនៅចំណុចស្ថានីយប្រេងឥន្ធនៈសូគីមិច ស្ថិតនៅភូមិកែបថ្មី សង្កាត់បឹងទូក ក្រុងបូកគោ ខេត្តកំពត កាលពីថ្ងៃទី១២ ខែសីហា ឆ្នាំ២០២៥។
ក្នុងក្របខណ្ឌនៃការបង្រ្កាបទ្រង់ទ្រាយធំនេះ រាល់ករណីនិងទីតាំងពាក់ព័ន្ធទាំងអស់ នឹងត្រូវបានដាក់ឱ្យស្ថិតក្រោមការត្រួតពិនិត្យ និងយាមកាមតឹងរឹង ព្រមទាំងបញ្ឈប់សកម្មល្មើសពាក់ព័ន្ធនឹងករណីទាំងអស់បានទាំងស្រុង។
គួររំលឹកថា កាលពីខែកក្កដាកន្លងទៅ រាជរដ្ឋាភិបាលកម្ពុជា បានដាក់ចេញយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា ដើម្បីបង្ការ ទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាឱ្យមានប្រសិទ្ធភាពខ្ពស់ សំដៅចូលរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម៕
