តើមានការគិតជាមនុស្សដែរឬអត់? សារព័ត៌មាន Khaosod ចុះផ្សាយថា កម្ពុជាបានយកជនសុីវិលមកធ្វើជាខែលបាំងមុខដើម្បីឈ្លានពានទឹកដីថៃ បន្ទាប់ពីទាហានថៃបើកការបាញ់ប្រហារភ្លាមៗដោយគ្មានមូលហេតុនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្ដាលឲ្យស្លា.ប់១នាក់ និងរបួសធ្ងន់ ៣នាក់។

តាមការចុះផ្សាយរបស់ Khaosod នាល្ងាចថ្ងៃទី១២ ខែវិច្ឆិកា ឆ្នាំ២០២៥ គឺកងទ័ពថៃបានបដិសេធថាមិនបានបាញ់ ឬធ្វើឱ្យជនស៊ីវិលកម្ពុជារងរបួសឡើយ។ អ្នកនាំពាក្យរងកងទ័ពភូមិន្ទថៃ បានបញ្ជាក់ថា ការផ្ទុះអាវុ.ធដែលមានរយៈពេលជាង ១០នាទីនៅម៉ោងប្រហែល ៤:០០ រសៀលថ្ងៃនេះ គឺឮចេញពីខាងកម្ពុជាមក ដើម្បីបង្កើតស្ថានភាពឲ្យកងទ័ពថៃបា.ញ់តបទៅវិញ។

បន្ថែមលើនោះ កងទ័ពថៃបាននិយាយបំភ្លៃការពិតថា នៅពេលបង្កសកម្មភាពញុះញង់ឲ្យកងទ័ពថៃផ្ទុះអាវុ.ធ ខាងកងកម្លាំងកម្ពុជាបានយកជនសុីវិលមកបាំងមុខ និងចោ.ទប្រកាន់ទម្លាក់កំហុសលើថៃថារំលោ.ភច្បាប់មនុស្សធម៌អន្តរជាតិ។

ជុំវិញការអះអាងទាំងបំពានការពិតរបស់ថៃដូចខាងលើនេះ ក្រសួងការពារជាតិកម្ពុជាបានបញ្ជាក់ក្រោយការធ្វើកំណត់ហេតុអំពី ករណីបាញ់ប្រហារនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យថា យោធាថៃបានបើកការបាញ់ប្រហារមកលើប្រជាពលរដ្ឋស៊ីវិលស្លូតត្រង់កម្ពុជាដោយគ្មានមូលហេតុ ខណៈពលរដ្ឋកម្ពុជាបានដើរនៅលើខ្នងប្រឡាយជាទីតាំងដែលពួកគាត់តែងតែធ្វើដំណើរជាធម្មតា។

របាយការណ៍នេះគូសបញ្ជាក់ថា ពលរដ្ឋកម្ពុជាទាំងនោះគ្រាន់តែដើរលើខ្នងប្រឡាយជាទីតាំងដែលពួកគាត់តែងធ្វើដំណើរជាធម្មតា ខណៈវត្តមានកងកម្លាំងកម្ពុជាមិនប្រដាប់ដោយអាវុធក៏កំពុងអង្គុយនៅទីតាំងនោះ ចម្ងាយប្រមាណជា១០ម៉ែត្រពីប្រជាពលរដ្ឋ ដើម្បីបំពេញភារកិច្ចការពារសុវត្ថិភាពជូនប្រជាពលរដ្ឋដូចសព្វដងប៉ុណ្ណោះ ស្រាប់តែបន្តិចក្រោយមកទាហាថៃកបានបាញ់សំដៅមកលើប្រជាពលរដ្ឋកម្ពុជាចំនួន៣នាក់ ដែលកំពុងធ្វើដំណើរលើខ្នងប្រឡាយនោះ បណ្តាលឱ្យពលរដ្ឋខ្មែរចំនួន២រូបរងរបួស។

បន្ទាប់មក កងកម្លាំងកម្ពុជាក៏បានធ្វើអន្តាគមន៍ជួយសង្គ្រោះប្រជាពលរដ្ឋភ្លាមៗ ប៉ុន្តែក៏ត្រូវបានយោធាថៃបាញ់ប្រហារសំដៅមកលើពួកគាត់ថែមទៀត។ លើសពីនេះទៅទៀត យោធាថៃបានបាញ់ប្រហារលើគោលដៅផ្សេងទៀត ដោយសំដៅលើប្រជាពលរដ្ឋស៊ីវិលស្លូតត្រង់របស់កម្ពុជា ដែលកំពុងអង្គុយជុំគ្នាលេងនៅខាងក្រោយ ដែលបណ្តាលឱ្យប្រជាពលរដ្ឋខ្មែរ១នាក់ទៀតរងរបួស ខណៈ១នាក់ទៀតត្រូវបាត់បង់ជីវិតភ្លាមៗនៅនឹងកន្លែង។

លុះរហូតដល់ម៉ោង១៧៖៥៤នាទីថ្ងៃដដែល កងកម្លាំងយោធាថៃបានបើកការវាយប្រហារជាលើកទី២ ដោយបានបាញ់កាំភ្លើងចំនួន៥គ្រាប់បន្ថែមទៀត។ បើតាមអ្នកនាំពាក្យក្រសួងកាពារជាតិបានបញ្ជាក់ថា ក្នុងគ្រានោះកងកម្លាំងកម្ពុជា គឺបានមិនតបតអ្វីឡើយ។ ពោល គឺកងកម្លាំងកម្ពុជាបានប្រកាន់ភ្ជាប់នូវគោលការណ៍អត់ធ្មត់កម្រិតខ្ពស់ដោយប្រកាន់ភ្ជាប់បំផុតនូវការគោរព និងការអនុវត្តបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ រួមទាំងគោលការណ៍បានឯកភាពគ្នាភាគីកម្ពុជា-ថៃ ដោយឈរលើមូលដ្ឋាននៃការដោះស្រាយរាល់បញ្ហាដោយសន្តិវិធី ត្រឹមត្រូវសមស្របច្បាប់អន្តរជាតិ និងដើម្បីការពារសុវត្ថិភាពជូនប្រជាពលរដ្ឋ។

ជុំវិញហេតុការណ៍នេះដែរ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានចាត់ឱ្យអាជ្ញាធរដែនដី និងគ្រប់កងកម្លាំងសមត្ថកិច្ចទាំងអស់ចាត់វិធានការជាបន្ទាន់ ក្នុងការការពារប្រជាពលរដ្ឋ និងសូមអោយមានការបើកការស៊ើបអង្កេតដោយឯករាជ្យលើករណីនេះ។ សម្ដេចក៏បានអំពាវនាវអោយមានការចូលរួមពីភាគីបរទេសដែលមានជំនាញ ដើម្បីស្វែងរកការពិត ការទទួលខុសត្រូវ និងផ្តល់យុត្តិធម៌ជូនប្រជាពលរដ្ឋដែលរងគ្រោះដោយសារការបាញ់ប្រហារនេះ៕

រាជធានីភ្នំពេញ៖ នៅថ្ងៃទី១២ ខែវិច្ឆិកា ឆ្នាំ២០២៥ ជនស៊ីវិលកម្ពុជានៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រូវបានយោធាថៃបើកការបាញ់ប្រហារភ្លាមៗបណ្ដាលឲ្យស្លា.ប់១នាក់ និងរបួសធ្ងន់ ៣នាក់។ ក្រោយការធ្វើកំណត់ហេតុ ក្រសួងការពារជាតិកម្ពុជាបញ្ជាក់ថា យោធាថៃបានបើកការបាញ់ប្រហារដោយគ្មានមូលហេតុ ខណៈពលរដ្ឋកម្ពុជាបានដើរនៅលើខ្នងប្រឡាយជាទីតាំងដែលពួកគាត់តែងតែធ្វើដំណើរជាធម្មតា។

យោងតាមដំណើរសង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពី ករណីយោធាថៃបើក ការបាញ់ប្រហារមកលើប្រជាពលរដ្ឋស៊ីវិលស្លូតត្រង់កម្ពុជាដោយគ្មានមូលហេតុ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក្រសួងការពារជាតិបានឲ្យដឹងថា៖

នៅវេលាម៉ោង១៥៖៥០នាទីរសៀលថ្ងៃទី១២ ខែវិច្ឆិកា មានប្រជាពលរដ្ឋកម្ពុជាចំនួន៣នាក់ បានដើរនៅលើខ្នងប្រឡាយជាទីតាំងដែលពួកគាត់តែងតែធ្វើដំណើរជាធម្មតា ខណៈវត្តមានកងកម្លាំងកម្ពុជាមិនប្រដាប់ដោយអាវុធក៏កំពុងអង្គុយនៅទីតាំងនោះ ចម្ងាយប្រមាណជា១០ម៉ែត្រពីប្រជាពលរដ្ឋ ដើម្បីបំពេញភារកិច្ចការពារសុវត្ថិភាពជូនប្រជាពលរដ្ឋដូចសព្វដង ផងដែរ។ ប៉ុន្តែ បន្តិចក្រោយមក ទាំងទាហាន និងពលរដ្ឋកម្ពុជា បានលឺសូរផ្ទុះអាវុធពីខាងភាគីថៃ បានបាញ់សំដៅមកលើប្រជាពលរដ្ឋកម្ពុជាចំនួន៣នាក់ ដែលកំពុងធ្វើដំណើរលើខ្នងប្រឡាយនោះ បណ្តាលឱ្យពលរដ្ឋខ្មែរចំនួន២រូបរងរបួស។

បន្ទាប់មក កងកម្លាំងកម្ពុជាដែលមិនប្រដាប់ដោយអាវុធក៏បានធ្វើអន្តាគមន៍ជួយសង្គ្រោះប្រជាពលរដ្ឋ។ ពេលនោះផងដែរ ក៏ត្រូវបានកងកម្លាំងយោធាថៃបាញ់ប្រហារសំដៅមកលើពួកគាត់ថែមទៀត។ លើសពីនេះទៅទៀត យោធាថៃបានបាញ់ប្រហារលើគោលដៅផ្សេងទៀត ដោយសំដៅលើប្រជាពលរដ្ឋស៊ីវិលស្លូតត្រង់របស់កម្ពុជា ដែលកំពុងអង្គុយជុំគ្នាលេងនៅខាងក្រោយ ដែលបណ្តាលឱ្យប្រជាពលរដ្ឋខ្មែរ១នាក់ទៀតរងរបួស ខណៈ១នាក់ទៀតត្រូវបាត់បង់ជីវិតភ្លាមៗនៅនឹងកន្លែង។

លុះរហូតដល់ម៉ោង១៧៖៥៤នាទីថ្ងៃទី១២ ខែវិច្ឆិកា កងកម្លាំងយោធាថៃបានបើកការវាយប្រហារជាលើកទី២ ដោយបានបាញ់កាំភ្លើងចំនួន៥គ្រាប់មកលើកងកម្លាំងកម្ពុជាបន្ថែមទៀត។ លោកស្រីអ្នកនាំពាក្យក្រសួងកាពារជាតិបានបញ្ជាក់ថា ក្នុងគ្រានោះកងកម្លាំងកម្ពុជា គឺបានមិនតបតអ្វីឡើយ។ ពោល គឺកងកម្លាំងកម្ពុជាបានប្រកាន់ភ្ជាប់នូវគោលការណ៍អត់ធ្មត់កម្រិតខ្ពស់ដោយប្រកាន់ភ្ជាប់បំផុតនូវការគោរព និងការអនុវត្តបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ រួមទាំងគោលការណ៍បានឯកភាពគ្នាភាគីកម្ពុជា-ថៃ ដោយឈរលើមូលដ្ឋាននៃការដោះស្រាយរាល់បញ្ហាដោយសន្តិវិធី ត្រឹមត្រូវសមស្របច្បាប់អន្តរជាតិ និងដើម្បីការពារសុវត្ថិភាពជូនប្រជាពលរដ្ឋ៕

រាជធានីភ្នំពេញ៖ អាជ្ញាធរមីនកម្ពុជា បានទទូចឲ្យភាគីថៃកុំយកបញ្ហាផ្ទុះមីននៅតំបន់ព្រំដែនកាលពីពេលថ្មីៗនេះ មកធ្វើជាមូលហេតុនៃការផ្អាកអនុវត្តជាឯកតោភាគី នូវកិច្ចព្រមព្រៀងសន្តិភាពគូឡាឡាំពួ ដែលនឹងបណ្ដាលឲ្យរាំងស្ទះដល់សន្តិភាពរវាងប្រជាជាតិទាំងពីររយៈពេលវែង។

យោងតាមសេចក្ដីថ្លែងប្រកាសព័ត៌មាន របស់អាជ្ញាធរកម្ពុជា គ្រប់គ្រងសកម្មភាពកម្ចាត់មីន នៅថ្ងៃទី១១ ខែវិច្ឆិកា ឆ្នាំ២០២៥ បានបង្ហាញការសោ.កស្ដាយចំពោះសារព័ត៌មានថៃមួយចំនួន ដែលផ្សព្វផ្សាយក្នុងចេតនាចោ.ទប្រកាន់ និងបង្ខូចកេរ្តិ៍ឈ្មោះកម្ពុជា ថាបានប្រើប្រាស់និងដាក់មីនថ្មី ក្នុងខណៈពេលដែលកម្ពុជាកំពុងខិតខំប្រឹងប្រែងលុបបំបាត់គ្រាប់មីន និងទុក្ខចេទនារបស់សហគមន៍ដែលបង្កើតឡើងដោយមីន។

សេចក្ដីប្រកាសព័ត៌មាននេះបានគូសបញ្ជាក់ថា ការចោទប្រកាន់គ្មានមូលដ្ឋានទាំងនេះ ក៏ប៉ះពាល់ដល់កិច្ចខិតខំប្រឹងប្រែងរបស់ក្រុមការងារសម្របសម្រួលរួម (JCTF) ដែលបានបង្កើតឡើងដោយប្រទេសទាំងពីរ ដើម្បីជំរុញដល់ការបោសសម្អាតមីនមនុស្សធម៌ និងបង្កើននូវទំនុកចិត្តរវាងគ្នា នៅតាមបណ្តោយព្រំដែនផងដែរ។

ក្នុងនាមជារដ្ឋភាគីអនុសញ្ញាហាមប្រាមការប្រើប្រាស់មិនប្រឆាំងមនុស្ស (អនុសញ្ញាអូតាវ៉ា) កម្ពុជា ប្រកាន់ខ្ជាប់នូវគោលការណ៍ និងគោរពយ៉ាងខ្ជាប់ខ្ជួនតាមបទដ្ឋានរបស់អនុសញ្ញាអូតាវ៉ា ហើយកម្ពុជាបាន ចាត់ទុកសកម្មភាពមីន ជាការចូលរួមចំណែកក្នុងការកសាងសន្តិភាព និងជាស្នូលនៃការអភិវឌ្ឍជាតិ។ កម្ពុជា ក្នុងនាមជាប្រទេសស្រលាញ់សន្តិភាព ទទូចដល់ភាគីថៃចៀសវាងការយកបញ្ហាផ្ទុះមីន នៅថ្ងៃទី១០ ខែវិច្ឆិកា ឆ្នាំ២០២៥ ក្នុងតំបន់ព្រំដែន ដែលបានធ្វើឱ្យទាហានថៃពីរនាក់រងរបួស ជាមូលហេតុនៃការផ្អាកអនុវត្តជា ឯកតោភាគី នូវកិច្ចព្រមព្រៀងសន្តិភាពគូឡាឡាំពួរ ថ្ងៃទី២៦ ខែតុលា ឆ្នាំ២០២៥។

ក្នុងឱកាសនៃកិច្ចប្រជុំលើកទី២២នៃរដ្ឋភាគីអនុសញ្ញាអូតាវ៉ា នៅទីក្រុងហ្សឺណែវ ប្រទេសស្វីស ដែលនឹងខិតជិតមកដល់នាពេលខាងមុខ កម្ពុជា សូមស្នើដល់ភាគីថៃ ក៏ដូចជាគ្រប់ភាគីពាក់ព័ន្ធ រក្សានូវ ស្មារតីកិច្ចសហការ វប្បធម៌សន្ទនា គោរពគ្នាទៅវិញទៅមក និងឈរលើគោលការណ៍មនុស្សធម៌ និងច្បាប់ អន្តរជាតិ ដើម្បីសម្រេចបានគោលដៅរួមពិភពលោកមួយដែលគ្មានមីន។ ចេតនាចោទប្រកាន់ណាមួយ ដែលគ្មានការពិត ឬការស៊ើបអង្កេតច្បាស់លាស់ ឬការប្រើប្រាស់មីនដើម្បីបម្រើដល់នយោបាយ អាចនឹង បំផ្លាញដល់ទំនុកចិត្តរវាងគ្នានិងគ្នា ធ្វើឱ្យអាប់ឱនដល់កិត្តិយសរបស់រដ្ឋភាគី និងស្មារតីនៃអនុសញ្ញាអូតាវ៉ា។

ជាថ្មីម្តងទៀត ក្នុងនាមជាប្រទេសដែលបានគាំទ្រយ៉ាងមុតមាំ និងជារដ្ឋភាគីអនុសញ្ញាអូតាវ៉ា កម្ពុជា មិនបានប្រើប្រាស់ ហើយនឹងមិនប្រើប្រាស់មីនថ្មីឡើយ៕

រាជធានីភ្នំពេញ៖ សម្ព័ន្ធ ព្រីនស៍ គ្រុប បានចេញមកបដិសេធយ៉ាងដាច់អហង្ការ ចំពោះការអះអាងដែលថា លោក ចេនហ្ស៊ី ដែលជាប្រធានបានចូលរួមក្នុងសកម្មភាពខុសច្បាប់ណាមួយ។ ការចោទប្រកាន់នេះគឺគ្មានមូលដ្ឋានច្បាស់លាស់ និងមានគោលបំណងរកលេសដើម្បី រឹបអូសទ្រព្យសម្បត្តិ ដែលមានតម្លៃរាប់ពាន់លានដុល្លាររបស់ក្រុមហ៊ុន។

នៅថ្ងៃទី១១ ខែវិច្ឆិកា ឆ្នាំ២០២៥នេះក្រុមហ៊ុន ព្រីសន៍ គ្រុប បានចេញសេចក្តីថ្លែងការណ៍បន្ទាន់មួយដោយបញ្ជាក់ថា ការចោទប្រកាន់ដោយគ្មានមូលដ្ឋាននេះ ទៅលើលោក ចេនហ្ស៊ី បានបង្កហានិភ័យយ៉ាងខ្លាំងដល់បុគ្គលិកដែលគ្មានកំហុសរាប់ពាន់នាក់ ដៃគូសហការ និង សហគមន៍ពាក់ព័ន្ធដែល សហការជាមួយក្រុមហ៊ុនទាំងនៅកម្ពុជា និងនៅក្រៅប្រទេស។

ការចេញប្រកាសសេចក្តីថ្លែងការណ៍បដិសេធនេះ ស្របពេល សារព័ត៌មាន Global Times របស់ចិន នៅថ្ងៃទី០៩ ខែវិច្ឆិកា ឆ្នាំ២០២៥ បានចេញផ្សាយថា មជ្ឈមណ្ឌលជាតិប្រយុទ្ធប្រឆាំងមេរោគកុំព្យូទ័ររបស់ចិន (CVERC) បានចេញផ្សាយរបាយការណ៍វិភាគបច្ចេកទេសមួយដោយចោទប្រកាន់ថា រដ្ឋាភិបាលសហរដ្ឋអាមេរិកទំនងជាអ្នកនៅពីក្រោយការលួច Bitcoin ដ៏ធំសម្បើមមួយពីបណ្តុំអ្នកជីករ៉ែ (Mining Pool) ដែលជាកម្មសិទ្ធិរបស់មហាសេដ្ឋី ចេន ហ្ស៊ី ។

ប្រភពដដែលបានឲ្យដឹងទៀតថា មជ្ឈមណ្ឌលចិនមួយនេះ បានប្រៀបធៀបករណីនេះថា ជា «ពាលស៊ីពាល» ដែលត្រូវបានរៀបចំដោយអង្គភាព Hacker កម្រិតរដ្ឋ។ របាយការណ៍នេះបានរៀបរាប់អំពីដំណើររឿងពេញលេញ ដែលចាប់ផ្តើមនៅពេលដែល Bitcoin មានតម្លៃប្រហែលជិត ១៥ ពាន់លានដុល្លារក្នុងពេលបច្ចុប្បន្ន មានត្រូវបានលួចចេញពីលោក ចេន ហ្ស៊ី។ បន្ទាប់ពីនោះ លោកចេន ហ្ស៊ី និងក្រុមហ៊ុនរបស់លោក បានព្យាយាមផ្ញើសារតាមរយៈប្រព័ន្ធប្លុកឆេនជាច្រើនលើកច្រើនសារ ដើម្បីស្នើសុំឱ្យបញ្ជូនទ្រព្យសម្បត្តិត្រឡប់មកវិញ ប៉ុន្តែគ្មានការឆ្លើយតបទាល់តែសោះ។

ចំណុចដែលគួរឱ្យសង្ស័យបំផុតគឺ Bitcoin ទាំងនោះត្រូវបានរក្សាទុកនៅក្នុងកាបូបលុយឌីជីថលតែមួយ ដោយគ្មានការចលនាអស់រយៈពេលជិត ៤ ឆ្នាំ ដែលជារឿងខុសប្លែកពីឥរិយាបថរបស់ក្រុម Hacker ធម្មតា ដែលតែងតែប្រញាប់លក់ទ្រព្យសម្បត្តិលួចបានយ៉ាងលឿន។ មជ្ឈមណ្ឌលចិនខាងលើបានលើកឡើងថា ឥរិយាបថនេះប្រៀបដូចជាប្រតិបត្តិការដែលត្រូវបានរៀបចំដោយភាពជាក់លាក់ពី «អង្គភាព Hacker កម្រិតរដ្ឋ»។ នៅខែមិថុនា ឆ្នាំ២០២៤ ទ្រព្យសម្បត្តិទាំងនោះត្រូវបានផ្ទេរទៅកាបូបលុយឌីជីថលថ្មីមួយ ដែលក្រោយមកឧបករណ៍តាមដានប្លុកឆេន ARKHAM របស់អាមេរិក បានកំណត់ថា ជាកម្មសិទ្ធិរបស់រដ្ឋាភិបាលសហរដ្ឋអាមេរិក។

ដំណើររឿងនេះបានឈានដល់ចំណុចកំពូលនៅថ្ងៃទី១៤ ខែតុលា ឆ្នាំ២០២៥ នៅពេលក្រសួងយុត្តិធម៌សហរដ្ឋអាមេរិក បានប្រកាសចោទប្រកាន់ព្រហ្មទណ្ឌ លើលោក ចេន ហ្ស៊ី ពីបទពាក់ព័ន្ធនឹងការបោកប្រាស់រូបិយប័ណ្ណឌីជីថល និងបានប្រកាសរឹបអូស Bitcoin ចំនួន ១២៧,០០០ BTC។ មជ្ឈមណ្ឌលជាតិប្រយុទ្ធប្រឆាំង មេរោគកុំព្យូទ័ររបស់ចិន បានសន្និដ្ឋានថា «ភស្តុតាងបង្ហាញថា Bitcoin ដែលត្រូវបានរឹបអូសដោយរដ្ឋាភិបាលអាមេរិក គឺត្រូវគ្នានឹង Bitcoin ដែលត្រូវបានលួចពីបណ្តុំអ្នកជីករ៉ែ LuBian។ នេះទំនងជាមានន័យថា រដ្ឋាភិបាលអាមេរិកបានលួច Bitcoin របស់លោក ចេន ហ្ស៊ី ដោយប្រើបច្ចេកទេស hacker តាំងពីឆ្នាំ២០២០មកម្ល៉េះ»។

គួរបញ្ជាក់ថា របាយការណ៍នេះក៏បានរកឃើញដែរថា ការអះអាងរបស់ក្រសួងយុត្តិធម៌អាមេរិកថា មូលនិធិទាំងអស់មានប្រភពពីអំពើខុសច្បាប់ គឺផ្ទុយពីការរកឃើញដំបូងរបស់ខ្លួន ដែលបានបង្ហាញថា Bitcoin ទាំងនោះមានប្រភពចម្រុះ រួមទាំងការជីករ៉ែដោយឯករាជ្យ និងការទូទាត់ពីបណ្តុំអ្នកជីករ៉ែផងដែរ៕