បន្ទាប់ពី តារាសម្តែង Xu Lisha ចោ.ទប្រកាន់ Xu Kai ផិ.តក្ប.ត់ហើយក្រឡាស់សម្តីមកវិញមិនទាន់បានប៉ុន្មាន ពេលនេះតារាសម្តែងរូបនេះកំពុងប្រឈមនឹងការចោទប្រកាន់មួយទៀតអំពីការលេងល្បែងស៊ីសង។

នៅថ្ងៃទី៨ ខែកញ្ញា ពាក្យគន្លឹះ Xu Kai ត្រូវគេចោទថាលេងល្បែងស្រាប់តែឡើងដល់ចំណាត់ថ្នាក់កំពូល ១ នៅលើ Weibo ដែលទាក់ទាញការចាប់អារម្មណ៍នៅលើបណ្តាញសង្គមចិន។យោងតាមប្រព័ន្ធផ្សព្វផ្សាយរបស់ប្រទេសចិន ការចោទប្រកាន់ជាបន្តបន្ទាប់បានលេចចេញភ្លាមៗបន្ទាប់ពីតារាប្រុសរូបនេះបានចែករំលែកការលាគ្នាអំពីភាពយន្តរបស់លោកដែលទើបបញ្ចប់ការចាក់ផ្សាយ ក្រោយពីរឿងអាស្រូវជីវិតឯកជន។

មានការចោទប្រកាន់ថា Xu Kai លេងល្បែងស៊ីសងដោយជារឿយៗតារាប្រុសរូបនេះបានប្រមូលផ្តុំជាមួយក្រុមមិត្តភក្តិជិតស្និទ្ធដើម្បីលេងបៀ ដោយចំនួនទឹកប្រាក់ឈ្នះ ឬចាញ់ក្នុងមួយហ្គេមមានចាប់ពីពីរបីពាន់ទៅរាប់ម៉ឺនយ័ន។ ប្រភពខ្លះក៏បាននិយាយផងដែរថា ប្រតិបត្តិការទាក់ទងនឹងល្បែងស៊ីសងសរុបរបស់ Xu Kai អាចមានចំនួនរាប់លានយ័នរយៈពេលត្រឹមតែមួយឆ្នាំប៉ុណ្ណោះ។

គួរកត់សម្គាល់ថា វីឡាឯកជនរបស់ Xu Kai នៅ Hengdian ត្រូវបានពាក្យចចាមអារ៉ាមថាបានក្លាយទៅជា កាស៊ីណូឯកជន។ រូបថត Screenshot នៃការជជែក ប្រវត្តិផ្ទេរ និងវីដេអូថតនៅសណ្ឋាគារ Qingdao ក្នុងឆ្នាំ២០២៣ ដែលជាពេលដែលលោកកំពុងថតរឿង As Beautiful as You» ត្រូវបានចេញផ្សាយជា ព័ស្តុតាង នៃការលេងល្បែងរបស់តារាសម្តែងរូបនេះផងដែរ។

លើសពីនេះ ទស្សនិកជនក៏បានរំឮកដល់សាច់រឿងតាំងពីចុងឆ្នាំ ២០២១ នៅពេលដែល Xu Kai បានចូលរួមជាមួយក្រុមការងារភាពយន្ត Snow Eagle Lord រូបលោកត្រូវបានគេនិយាយថាបានឈ្នះបៀចំនួន ៨,០០០យ័នក្នុងរយៈពេលត្រឹមតែប៉ុន្មាននាទីប៉ុណ្ណោះ បន្ទាប់មកបានផ្ទេរប្រាក់ចំនួន ៦,០០០ យ័នទៅឱ្យអតីតមិត្តស្រីឈ្មោះ Xu Lisha ។

ប្រព័ន្ធផ្សព្វផ្សាយចិនបាននិយាយថា ប្រសិនបើការចោទប្រកាន់ខាងលើត្រូវបានបញ្ជាក់នោះ Xu Kai អាចប្រឈមនឹងហានិភ័យផ្លូវច្បាប់។ យោងតាមបទប្បញ្ញត្តិបច្ចុប្បន្ន ការប្រមូលផ្តុំគ្នាលេងល្បែងក្នុងគោលបំណងរកប្រាក់ចំណេញ ឬចាត់ទុកល្បែងស៊ីសងជាអាជីពអាចប្រឈមនឹងការដាក់ទណ្ឌកម្មផ្នែករដ្ឋបាល ការកាត់ទោស ឬដាក់ពន្ធនាគារ។

គិតត្រឹមរសៀលថ្ងៃទី៨ ខែកញ្ញានេះ Xu Kai និងក្រុមហ៊ុនគ្រប់គ្រងរបស់លោកមិនទាន់បានផ្តល់ការឆ្លើយតបជាផ្លូវការនៅឡើយទេ។ ទន្ទឹមនឹងនោះ មជ្ឈដ្ឋានអនឡាញមានការបែកគំនិតដោយភាគីម្ខាងរិះគន់តារាប្រុសរូបនេះចាស់ដៃ និងភាគីម្ខាងទៀតអំពាវនាវឱ្យរង់ចាំការផ្ទៀងផ្ទាត់ព័ត៌មានពីអាជ្ញាធរ។

តាមប្រភពព័ត៌មានពី Sohu បានចុះផ្សាយថា ប៉ូលិសក៏បានកត់សម្គាល់លើបញ្ហារបស់ Xu Kai ដែលត្រូវបានគេចោទប្រកាន់នេះផងដែរ៕

Rosé សមាជិកក្រុម BLACKPINK និង Bruno Mars បានឈ្នះពានរង្វាន់បទចម្រៀងប្រចាំឆ្នាំនៅក្នុងកម្មវិធី MTV Video Music Awards (VMAs) ឆ្នាំ២០២៥ ជាមួយនឹងការសហការដ៏ល្បីរបស់ពួកគេបទចម្រៀង «APT»។ ការឈ្នះពានរង្វាន់ «Song of the Year» របស់ Rosé ក្លាយជាតារាចម្រៀងអាស៊ីដំបូងនិងជាតារាចម្រៀង Kpop ដំបូងដែលឈ្នះពានរង្វាន់ដ៏សំខាន់នេះ។

នៅថ្ងៃទី៧ កញ្ញា (ម៉ោងនៅអាម៉េរិក ) នៅក្នុងពិធីប្រគល់ពានរង្វាន់ដែលធ្វើឡើងនៅ UBS Arena បទចម្រៀង «APT» បានយកឈ្នះគូប្រជែងខ្លាំងៗជាច្រើននាក់ ដើម្បីយកពានរង្វាន់ដ៏មានកិត្យានុភាពត្រឡប់ទៅផ្ទះ។ ជាមួយនឹងជ័យជម្នះនេះ Rosé បាននិយាយថា Bruno Mars មិនត្រឹមតែជា Idol របស់នាងប៉ុណ្ណោះទេ ប៉ុន្តែក៏ជាគ្រូបង្រៀនជាទីគោរពរបស់នាងផងដែរ។
ទោះបីជា Bruno Mars អវត្តមានក៏ដោយ Rosé បានទទួលពានរង្វាន់ក្នុងនាមនាង ហើយបានថ្លែងសុន្ទរកថាដ៏ស្និទ្ធស្នាល និងអស់ពីចិត្ត។ ក្នុងអំឡុងពេលនាងឡើងទទួលពានរង្វាន់ Rosé បានស្លៀករ៉ូបពណ៌លឿងភ្លឺដ៏ស្រស់ស្អាត។ នាងក៏បានថ្លែងអំណរគុណដល់ Bruno Mars សមាជិកក្រុម BLACKPINK ក្រុមគាំទ្ររបស់នាង និងខ្លួននាងផ្ទាល់ដែលមិនបោះបង់។ លើសពីនេះ Rosé ក៏បានបង្ហើបថាការឈ្នះពានរង្វាន់នេះគឺជំរុញឱ្យនាងបំពេញក្តីស្រមៃរបស់ខ្លួនតាំងពីនាងអាយុ១៦ឆ្នាំ។

ការឈ្នះពានរង្វាន់ធំ «Song of the Year» មិនត្រឹមតែជាព្រឹត្តិការណ៍ដ៏សំខាន់សម្រាប់ Rosé ក្នុងនាមជាតារាចម្រៀងទោលប៉ុណ្ណោះទេ ប៉ុន្តែក៏ជាវប្បធម៌ដ៏សំខាន់មួយផងដែរវាគឺជាលើកទីមួយហើយដែលតារាចម្រៀង K-pop បានឈ្នះពានរង្វាន់ នេះនៅ VMAs ដែលបញ្ជាក់ពីឥទ្ធិពលរបស់នាងដែលកំពុងកើនឡើងជាសកល។ ពីមុនក្រុមចម្រៀង BTS ទទួលបានការតែងតាំងសម្រាប់ពានរង្វាន់នេះប៉ុន្តែពុំបានឈ្នះឡើយ។ ជ័យជម្នះនេះមិនត្រឹមតែបញ្ជាក់ពីការអំពាវនាវជាសាកលរបស់ Rosé ក្នុងនាមជាតារាចម្រៀងទោលប៉ុណ្ណោះទេ ប៉ុន្តែវាក៏ជាការបោះជំហានទៅមុខដ៏ធំមួយសម្រាប់ Kpop នៅក្នុងទីផ្សារតន្ត្រីអន្តរជាតិ ដែលពីមុនសិល្បករអឺរ៉ុប និងអាម៉េរិកក្តោបក្តាប់ព្រឹត្តិការណ៍នេះ។

ទន្ទឹមនឹងនេះដែរ នៅក្នុងប្រភេទចម្រៀង Best K-Pop តារាចម្រៀង LISA សមាជិក BLACKPINK បានឈ្នះសម្រាប់បទ «Born Again» ដែលសហការជាមួយ Doja Cat និង RAYE ។ នេះជាការបន្ថែមពានរង្វាន់ VMA ទី៣សម្រាប់តារាចម្រៀងរូបនេះបន្ទាប់ពីបទ «LALISA» ឆ្នាំ២០២២ និង «New Women» សហការជាមួយនឹងតារាចម្រៀងអេស្ប៉ាញ Rosalía ក្នុងឆ្នាំ២០២៤។ លើសពីនេះទៅទៀត ក្រុមចម្រៀង BLACKPINK ក៏បានឈ្នះពានរង្វាន់ «Best Group» ក្នុងឆ្នាំ២០២៥នេះផងដែរ៕

វត្តមានរបស់ក្រុមចម្រៀង K-Pop ទើបរះ Nchive (អិនខាយ) មកប្រម៉ូតក្នុងប្រទេសកម្ពុជាកាលពីកន្លងមកនេះបានធ្វើឱ្យមានការចាប់អារម្មណ៍គួរឱ្យកត់សម្គាល់ ខណៈអ្នកគាំទ្របង្ហាញការនឹករលឹកក្រុមចម្រៀងនេះ។ ស្របពេលវិលត្រឡប់ទៅកាន់ប្រទេសកូរ៉េខាងត្បូងហើយក្តី តែសមាជិក Nchive នៅបង្ហោះរូបភាពកាលពីពួកគេនៅស្រុកខ្មែរទៀតផង។

អ្វីដែលគួរឱ្យកត់សម្គាល់ថ្មីៗនេះអ្នកគាំទ្រកម្ពុជាបានចែករំលែកវីដេអូនៅលើបណ្តាញសង្គមពីសមាជិកក្រុមចម្រៀង Nchive ដែលនៅចងចាំពាក្យខ្មែរមួយចំនួនហើយនិយាយជជែកកម្សាន្តជាមួយអ្នកគាំទ្រតាមរយៈការ Live។ តាមការបង្ហោះរបស់អ្នកលេងអ៊ីនធឺណិត សមាជិកពីររូបរបស់ក្រុមចម្រៀង Nchive (អិនខាយ) បាននិយាយពាក្យដែលខ្លួនឯងចេះនិងនិយាយតាមអ្នកគាំទ្រដែលខម្មិនប្រាប់ មានដូចជាពាក្យ៖ «ជម្រាបសួរ, ហូបស្ពឺអត់? ណែនាំខ្លួនឈ្មោះថា កក្កដា និងប្រុសណេង , បងស្រលាញ់អូន ,ញុំាបាយហើយនៅ? នឹកអ្នក, អរគុណច្រើន ,ជួបគ្នាពេលក្រោយ ,ចាំតិច» ជាដើម។

ភាពគួរឱ្យស្រលាញ់របស់ក្រុមចម្រៀង K-Pop នេះបានធ្វើឱ្យអ្នកគាំទ្រកម្ពុជាសរសើរជាច្រើន អ្នកមួយចំនួនថែមទាំងបាននិយាយលេងសើចថា កក់រោងការឱ្យហើយថែមទៀត។ កាលពីកន្លងមកនេះមុនពេលត្រឡប់ទៅប្រទេសកូរ៉េវិញ Nchive បាននិយាយថាពួកគេពិតជាមិនសោកស្តាយនោះទេដែលសម្រេចចិត្តមិនពន្យារពេលសម្រាប់ការមកប្រម៉ូតនៅប្រទេសកម្ពុជាដែលសារមានបញ្ហាជម្លោះព្រំដែន។ សមាជិកក្នុងក្រុមថែមទាំងខ្សឹកខ្សួលដោយទឹកភ្នែកពីព្រោះតែក្តីអាឡោះអាល័យពីអ្នកគាំទ្រខណៈពួកគេទទួលបានភាពកក់ក្តៅ ក្តីស្រលាញ់ពីហ្វេនៗនៅកម្ពុជា។

ក្នុងពេលមកប្រម៉ូតក្រុមនៅក្នុងប្រទេសកម្ពុជា Nchive បានធ្វើសកម្មភាពជាច្រើនដូចជាចូលរួមជួបជុំចុះហត្ថលេខាឱ្យអ្នកគាំទ្រ បង្ហាញសកម្មភាពនៅតំបន់ផ្លូវថ្មើរជើងចតុមុខ ដូចជាការច្រៀងរាំ ភ្លក់អាហារតាមដងផ្លូវជាពិសេសក្រុមចម្រៀង K-Pop នេះថែមទាំងរាំចង្វាក់ប្រពៃណីជាតិខ្មែរបានយ៉ាងល្អជាមួយបងប្អូនទៅកម្សាន្តនៅទីនោះ។ Nchive ក៏បានទៅខេត្តព្រះសីហនុ សម្តែងក្នុងកម្មវិធីនៅសាលាក្នុងការប្រកួតបាល់ទាត់ រួមទាំងទៅកម្សាន្តនៅកោះរ៉ុង និងមានព្រឹត្តិការណ៍សម្តែងក្នុងផាប់មួយចំនួនទៀត។

គួរបញ្ជាក់ផងដែរថា ក្រុមចម្រៀង NCHIVE មានសមាជិកចំនួន៦រូបគឺ HA.L, E.aN, Kangsan, Yuchan, Juyoung, និង Minjun ដែលស្ថិតក្រោម AUBEMOON STUDIO។ ពួកគេបានបង្ហាញខ្លួនដំបូងនៅខែមេសា ឆ្នាំ២០២៤ ជាមួយនឹងអាល់ប៊ុមទោលទី ១ របស់ពួកគេមានឈ្មោះថា «DRIVE»។ ក្រុមអ្នកគាំទ្ររបស់ NCHIVE មានឈ្មោះថា «Save»៕

តារាចម្រៀងនិងសម្តែង Liu Yuning បានថ្កោលទោសយ៉ាងខ្លាំងចំពោះពាក្យចចាមអារ៉ាមដែលបានប្រឌិតទាក់ទងនឹងចចាមអារ៉ាមស្នេហាជាមួយនឹងអ្នកគ្រប់គ្រងផ្ទាល់ខ្លួនហើយបានបញ្ជាក់ថាលោកនឹងស្វែងរកការការពារស្របច្បាប់សម្រាប់សិទ្ធិរបស់លោក។

Liu Yuning បាននិយាយដោយផ្ទាល់ជាលើកដំបូងអំពីពាក្យចចាមអារ៉ាមប្រឌិតជាបន្តបន្ទាប់ទាក់ទងនឹងជីវិតផ្ទាល់ខ្លួនរបស់លោកនិងអ្នកគ្រប់គ្រង NiuNiu ។តារាចម្រៀងដែលកើតក្នុងឆ្នាំ ១៩៩០រូបនេះបានសម្តែងការខឹងសម្បារនៅពេលដែលមនុស្សជាច្រើនបានទាញយកប្រយោជន៍ពីឈ្មោះរបស់ខ្លួនដើម្បីផ្សព្វផ្សាយព័ត៌មានដែលគ្មានមូលដ្ឋានដែលបណ្តាលឱ្យមានផលប៉ះពាល់ធ្ងន់ធ្ងរដល់អ្នកដែលជិតស្និទ្ធនឹងលោក។
Liu Yuning បាននិយាយនៅក្នុងការ Live កាលពីថ្ងៃទី៦ កញ្ញា ថា «ខ្ញុំជាមនុស្សល្បីម្នាក់ ត្រូវគេវាយប្រហារ ឬមើលងាយគឺជារឿងធម្មតា ប៉ុន្តែសូមកុំប៉ះពាល់មនុស្សជុំវិញខ្ញុំ ពួកគេមានគ្រួសារ ឪពុកម្តាយ និងជីវិតឯកជន។ ការពាក់ព័ន្ធ និងប្រឌិតជីវិតឯកជនរបស់អ្នកដទៃ ដើម្បីបំពេញការអន់ចិត្តរបស់អ្នក ពិតជាគួរឱ្យស្អប់ខ្ពើមណាស់ វាធ្វើឱ្យខ្ញុំឈឺ»។ តារាប្រុសរូបនេះបញ្ជាក់ថា លោកនឹងប្រើវិធានការច្បាប់ដើម្បីដោះស្រាយឲ្យបានហ្មត់ចត់ចំពោះបុគ្គលដែលផ្សព្វផ្សាយព័ត៌មានមិនពិត។

Liu Yuning និងអ្នកគ្រប់គ្រងរបស់ខ្លួន តែងតែរងការវាយប្រហារជាបន្តបន្ទាប់ដោយសារតែឃើញអ្នកគ្រប់គ្រងមានភាពស្និទ្ធស្នាលជាមួយតារាប្រុសខ្លាំងពេក ជាហេតុធ្វើឱ្យមហាជន ជាច្រើនគិតថាអ្នកទាំងពីរលួចលាក់មានទំនាក់ទំនងស្នេហាជាមួយគ្នា។

នេះមិនមែនជាលើកទីមួយទេដែល Liu Yuning ប្រឈមមុខនឹងពាក្យចចាមអារ៉ាមមិនពិត។ កាលពីដើមឆ្នាំ ២០១៩ តារាប្រុសរូបនេះបានចេញមុខបដិសេធជុំវិញទំនាក់ទំនងពួកគេម្តងរួចទៅហើយ ប៉ុន្តែឧប្បត្តិហេតុនៅតែបន្តកើតមានរហូតមកដល់ថ្ងៃនេះ ដោយសារតែមានអ្នកសើររើឡើងវិញដោយចេតនាដើម្បីវាយប្រហារលោក។ អ្នកគាំទ្របានសម្ដែងការសោកស្ដាយពេលឃើញ Liu Yuning ត្រូវស៊ូទ្រាំ ជាពិសេសអារម្មណ៍អស់សង្ឃឹមពេលអ្នកដែលស្រលាញ់និងគាំទ្រលោកត្រូវបានគេអូសចូលក្នុងចរន្តនៃការនិយាយដើមដោយអចេតនា។ មតិជាបន្តបន្ទាប់បានលើកទឹកចិត្តលោកដោយណែនាំតារាប្រុសរូបនេះឱ្យប្រើច្បាប់យ៉ាងម៉ឺងម៉ាត់ដើម្បីការពារកិត្តិយសផ្ទាល់ខ្លួន និងអ្នកជិតស្និទ្ធ។

ទង្វើដ៏តឹងតែងរបស់ Liu Yuning លើកនេះត្រូវបានគេមើលឃើញថាជាការព្រមានដោយផ្ទាល់ដល់អ្នកដែលផ្សព្វផ្សាយពាក្យចចាមអារ៉ាមអាក្រក់។ ទស្សនិកជនជាច្រើនជឿថា នៅពេលដែលសិល្បករជ្រើសរើសចាត់វិធានការផ្លូវច្បាប់ជំនួសឱ្យការនៅស្ងៀម នេះនឹងជាជំហានដ៏សំខាន់មួយដើម្បីបង្កើតឡើងវិញនូវព្រំដែននៃការគោរពឯកជនភាព និងបង្កើនការរារាំងប្រឆាំងនឹងទង្វើបង្ខូចកេរ្តិ៍ឈ្មោះនៅក្នុងឧស្សាហកម្មកម្សាន្ត៕