ភ្នំពេញ៖ ស្ថានទូតអាម៉េរិកប្រកាសអំពីថវិកាជាជំនួយថ្មីចំនួន ៦៧៥០០០ ដុល្លារ ដើម្បីជួយគាំទ្រការងារបោសសម្អាតមីនដ៏មានសារៈខាន់របស់កម្ពុជា។ នេះបើយោងទំព័រហ្វេសប៊ុកស្ថានទូតសហរដ្ឋអាមេរិកផ្សព្វផ្សាយនៅព្រឹកថ្ងៃទី៣០ ខែកញ្ញា ឆ្នាំ២០២៥។

លោកស្រីភារធារី Bridgette Walker បានមានប្រសាសន៍ថា សហរដ្ឋអាមេរិកមានមោទនភាពជាម្ចាស់ជំនួយបោសសម្អាតមីនធំបំផុតនៅកម្ពុជា ដោយបានបរិច្ចាគថវិកា ២២០លានដុល្លារ ចាប់តាំងពីឆ្នាំ១៩៩៣ មកម្ល៉េះ ក្នុងនោះ ១២លានដុល្លារ សម្រាប់ឆ្នាំនេះ ដើម្បីផ្តល់លទ្ធភាពជូនក្រុមគ្រួសារខ្មែរអាចរស់នៅបានដោយសុខសន្តិភាព និងវិបុលភាព។

លោកស្រី បានបញ្ជាក់ថា៖ “សូមអរគុណដល់ដៃគូរបស់យើង មានអង្គការជំនួយប្រជាពលរដ្ឋន័រវេស្សន៍ (Norwegian People’s Aid) និងមជ្ឈមណ្ឌលសកម្មភាពកំចាត់មីនកម្ពុជា (CMAC) ចំពោះការខិតខំប្រឹងប្រែងឥតសំចៃដើម្បីធ្វើឱ្យកម្ពុជាអស់គ្រាប់មីន ហើយក៏សូមអរគុណដល់វិទ្យាស្ថានបច្ចេកទេសកំចាត់មីន ដែលបានពន្យល់លម្អិតអំពីកិច្ចខិតខំប្រឹងប្រែងមហាសាលក្នុងការរៀបចំក្រុមការងារដោះមីនជូនដល់សមាជិកសភាសហរដ្ឋអាមេរិក លោក Adam Smith លោក Michael Baumgartner លោកស្រី Chrissy Houlahan និងរូបខ្ញុំផ្ទាល់”។

ឆ្លៀតក្នុងឱកាសនេះ ឯកឧត្តម ហេង រតនា អគ្គនាយកសុីម៉ាក់ក៏បានសំដែងនូវអំណរគុណចំពោះប្រជាជននិងរដ្ឋាភិបាលសហរដ្ឋអាមេរិក តាមរយៈក្រសួងការបរទេសសហរដ្ឋអាមេរិក ក្នុងការបន្តគាំទ្រដល់ការបោសសម្អាតសំណល់យុទ្ធភណ្ឌសង្គ្រាមនៅកម្ពុជា! ។

ជាងនេះទៅទៀត ឯកឧត្តមមានក្ដីសង្ឃឹមយ៉ាងមុតមាំថា តាមរយៈដំណើរទស្សនកិច្ចនេះនិងការចុះហត្ថលេខាទទួលជំនួយ នៅថ្ងៃទី២៧ ខែកញ្ញា ឆ្នាំ២០២៥នេះ ក៏បានបង្ហាញពីការប្ដេជ្ញាចិត្តរបស់សហរដ្ឋអាមេរិកក្នុងការបន្ដជំនួយវិស័យមីនបន្ដទៅមុខទៀត៕

រាជធានីភ្នំពេញ ៖ ភាពប្រឆាំងអំពើពុករលួយ (ACU) បានរកឃើញថា លោកអធិការរងនគរបាលស្រុកបវេលម្នាក់ មានជាប់ពាក់ព័ន្ធករណីអំពើពុករលួយ ដោយបានទទួលសំណូកជាង៧៧ម៉ឺនដុល្លារពីមេក្លោងថៃ ក្នុងការដោះលែងជនជាតិថៃ ដែលសមត្ថកិច្ចបានឃាត់ខ្លួនបានក្នុងប្រតិបត្តិការរដ្ឋបាលបង្ក្រាបក្រុមបោកប្រាស់ តាមអនឡាញ Online Scam ។

បើតាមរបាយការណ៍កិច្ចប្រជុំក្រុមប្រឹក្សាលើកទី២ អាណត្តិទី៤ របស់អង្គភាពប្រឆាំងអំពើពុករលួយ នៅថ្ងៃទី២៩ ខែកញ្ញា ឆ្នាំ២០២៥នេះ បានបង្ហាញថា ACU បានឃាត់ខ្លួន និងបញ្ជូនមន្ត្រីនគរបាល ២រូប—រួមទាំងលោក វន វាសនា អធិការរង នៃអធិការដ្ឋាននគរបាលស្រុកបវេល—ទៅសាលាដំបូងរាជធានីភ្នំពេញ កាលពីថ្ងៃទី២៦ ឧសភា ២០២៥ ពាក់ព័ន្ធករណីប៉ុនប៉ងសូកប៉ាន់ប្រាក់សរុបប្រហែល ៧៧៤,០០០ ដុល្លារ ដើម្បីដោះលែងជនជាតិថៃ ៤៣ នាក់ ដែលត្រូវបានសមត្ថកិច្ចចម្រុះឃាត់ខ្លួនពីករណីស្នាក់នៅ និងធ្វើការខុសច្បាប់ក្នុងក្រុងប៉ោយប៉ែត។ ក្រោយសួរនាំ តុលាការបានសម្រេចឃុំខ្លួនជនជាប់ចោទទាំងពីរដាក់ពន្ធនាគារព្រៃស ដើម្បីបន្តនីតិវិធី (២៦ ឧសភា ២០២៥)។

តាមការបញ្ជាក់ពីអ្នកនាំពាក្យ ACU លោក សយ ច័ន្ទវិចិត្ត ព្រឹត្តិការណ៍មានដូចតទៅ៖ ក្រោយសមត្ថកិច្ចឃាត់ជនជាតិថៃ ៤៣ នាក់ នៅថ្ងៃទី២ ឧសភា ២០២៥ ពួកជនសង្ស័យបានឃុបឃិតក្នុងកម្រិតប្រាក់សូកប៉ាន់ប្រមាណ ៧៧៤,០០០ ដុល្លារ ក្នុងរយៈពេលថ្ងៃទី៤–៦ ឧសភា ដើម្បីរត់ការដោះលែង ប៉ុន្តែផែនការនេះមិនបានជោគជ័យឡើយ។ ទន្ទឹមនឹងនេះ បណ្ដុំភស្ដុតាងក៏បង្ហាញថា មានការយកប្រាក់ «កម្រៃរត់ការ» មួយផ្នែកទៅដាក់ធនាគារ និងប្រើប្រាស់ ដែលជាធាតុបង្កើតបទល្មើសលាងសម្អាតប្រាក់តាមច្បាប់។

ជនជាប់ចោទត្រូវបានដាក់បន្ទុកពីបទ «ប៉ុនប៉ងសូកប៉ាន់» និង «លាងសម្អាតប្រាក់» ខណៈករណីកំពុងបន្តនីតិវិធីស៊ើបអង្កេតតាមច្បាប់។ សម្រាប់ជនជាតិថៃ ៤៣ នាក់ ត្រូវបានចាត់នីតិវិធីបណ្តេញចេញពីព្រំដែនកម្ពុជា នៅថ្ងៃទី៨ ឧសភា ២០២៥។

ទង្វើជនជាប់ចោទខាងលើ គឺមានធាតុផ្សំ នៃបទល្មើសប៉ុនប៉ងសូកប៉ាន់ តាមប្បញ្ញត្តិមាត្រា៣២ នៃច្បាប់ស្តីពីការប្រឆាំងអំពើពុករលួយ មាត្រា២៧ និងមាត្រា៦០៥ នៃក្រមព្រហ្មទណ្ឌ)។ ដោយឡែក ឈ្មោះ វ៉ន វាសនា បានយកប្រាក់ដែលខ្លួនទទួលបានពីកម្រៃរត់ការ ទៅដាក់ធនាគារ និងប្រើប្រាស់ ដែលលោក អះអាងថា ជាធាតុផ្សំ នៃបទល្មើសលាងសម្អាតប្រាក់ តាមបទប្បញ្ញត្តិមាត្រា៣ និងមាត្រា៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេវរកម្ម ៕

ប្រទេសថៃ ៖ កាលពីថ្ងៃទី២៧ ខែកញ្ញា ឆ្នាំ២០២៥ កងទ័ពថៃបានចាប់ផ្តើមបា.ញ់ប្រ.ហារមុនមកលើទីតាំងកងកម្លាំងកម្ពុជា ដោយបា.ញ់កំាភ្លើ.ងត្បាល់ និងកាំភ្លើ.ងដៃជាច្រើនគ្រាប់មកលើមូលដ្ឋានកងទ័ពកម្ពុជានៅតំបន់អានសេះ ខណៈកងទ័ពកម្ពុជាពុំបានតបត ដោយភាគីថៃបែរជាចោទប្រកាន់កម្ពុជាបា.ញ់មុន ហើយថៃព្យាយាមផ្សព្វផ្សាយព័ត៌មានបំភ្លៃកុហកពលរដ្ឋខ្លួន ។ មេបញ្ជាការរងយោធភូមិភាគ២ថៃ ចោទថា ហេតុការណ៍នេះកើតឡើងដោយសារកម្ពុជារៀបចំឆាកល្ខោន លោកផ្តល់ជម្រើស២សម្រាប់កម្ពុជា គឺតើប្រឈមមុខគ្នាបន្ត ឬត្រឡប់មករកមិត្តភាព ។

សារព័ត៌មាន Thai Post រាយការណ៍ថា កាលពីថ្ងៃទី២៨ ខែកញ្ញា មេបញ្ជាការរងយោធភូមិភាគ២ លោក ណាត់ ស្រីអ៊ីន បានផ្តល់សម្ភាសន៍ជាមួយសារព័ត៌មានពេលចូលរួមកម្មវិធី «ប្រមូលផ្តុំអ្នកស្នេហាជាតិរំលឹកដល់កងទ័ពថៃ» ថា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានបញ្ជាឱ្យលោកមកចូលរួមកម្មវិធីជំនួស ដោយសារលោក ប៊ុនស៊ីន ជាប់តាមដានស្ថានការណ៍ព្រំដែន ។ លោក ណាត់ បានចោទប្រកាន់កម្ពុជារៀបចំឆាកល្ខោនបង្កជម្លោះជាមួយថៃ និងប្រាប់ពលរដ្ឋកុំបារម្ភពីស្ថានការណ៍នៅតំបន់អានសេះ ។

កងទ័ពថៃផ្តល់ជម្រើស២សម្រាប់កម្ពុជាជ្រើសរើស គឺតើប្រឈមមុខគ្នាបន្ត ឬត្រឡប់មករកមិត្តភាព? ពីព្រោះភាគីថៃព្យាយាមដោះស្រាយបញ្ហាដោយសន្តិវិធី ។ បើកម្ពុជាចង់ប្រឈមមុខ គឺថៃរីករាយ ប៉ុន្តែបើចង់ត្រឡប់មករកមិត្តភាពល្អជាមួយថៃ កម្ពុជាត្រូវតែបង្ហាញភាពស្មោះត្រង់ជាមុន ។ កងទ័ពថៃបានត្រៀមខ្លួនការពារអធិបតេយ្យ កន្លងមក កងទ័ពភូមិភាគ២ថៃបានដណ្តើមយកតំបន់មួយចំនួននៅព្រំដែន ដូច្នេះ ពលរដ្ឋពុំចាំបាច់បារម្ភ ឬចាប់អារម្មណ៍ មិនថាកម្ពុជាធ្វើអ្វីនៅព្រំដែន សូមពលរដ្ឋមានទំនុកចិត្តលើកងទ័ពក្នុងការរក្សាអធិបតេយ្យ ។ នេះបើតាមការអះអាងរបស់មេបញ្ជាការរងយោធភូមិភាគ២ លោក ណាត់ ស្រីអ៊ីន ។

គួរបញ្ជាក់ថា គ្រប់សារព័ត៌មានថៃ រួមទាំងពលរដ្ឋថៃ បានព្យាយាមផ្សព្វផ្សាយព័ត៌មានបំភាន់ដើម្បីរុញសភាពការណ៍ជម្លោះព្រំដែនឱ្យកាន់តែតានតឹង ពីព្រោះចង់ឱ្យផ្ទុះអាវុធម្តងទៀត ជាពិសេស ពលរដ្ឋថៃនៅព្រំដែនបានជំរុញឱ្យកងទ័ពរបស់ខ្លួនធ្វើសង្គ្រាមឱ្យដឹងឈ្នះ-ចាញ់ ខណៈរដ្ឋាភិបាលថៃថាខ្លួនជាជនរងគ្រោះ និងស្រែកប្រាប់ពិភពលោក ចង់បានបានសន្តិភាព ។

បើថៃចង់បានសន្តិភាពមែននោះ តើនរណាលួចបើកការបាញ់ប្រហារបណ្តាលឱ្យកងទ័ពខ្មែរ១រូបពលីនៅតំបន់មុំបី? នរណាបិទព្រំដែនជាឯកតោភាគី? នរណាយកបន្លាលួសទៅរាយព័ទ្ធប្រាសាទតាមាន់ធំ? នរណាបើកការវាយប្រហារលើកងទ័ពខ្មែរ រហូតបង្កើតការប្រយុទ្ធ៥យប់ ៥ថ្ងៃ? នរណារំលោភសិទ្ធិសញ្ញាបារាំង-សៀម និង MOU ឆ្នាំ២០០០? នរណាមិនចង់ទទួលប្រទេសទី៣ ចូលដោះស្រាយបញ្ហា? នរណាចាប់ទ័ពខ្មែរក្រោយបទឈប់បាញ់? ពង្រីកតំបន់ជម្លោះ? ចល័តទ័ពរហូតជាន់មីនដែលសល់ពីអតីតកាល? នរណារំលោភគោលការណ៍អន្តរជាតិទាំងកម្រោល ដោយប្រើកម្លាំងពង្រាយបន្លាលួស និងយកធ្វើជាខ្សែបន្ទាត់ព្រំដែន? បើថៃពិតជាជនរងគ្រោះ ហេតុអ្វីខ្លាចកិច្ចអន្តរាគមន៍ពីសហគមន៍អន្តរជាតិ និងខ្លាចតុលាការអន្តរជាតិ?