នៅយប់ថ្ងៃទី ២១ ខែមីនា ព្រឹត្តិការណ៍ «BTS comeback live: Arirang» បានធ្វើឡើងនៅទីលាន Gwanghwamun ដើម្បីអបអរសាទរការចេញអាល់ប៊ុមស្ទូឌីយោទី ៥ របស់ក្រុមចម្រៀង K-pop ដ៏ពេញនិយម BTS។ ព្រឹត្តិការណ៍នេះ រួមមានការសម្តែងបទចម្រៀងថ្មីៗជាលើកដំបូង រួមទាំងបទចម្រៀងចំណងជើង «Swim»។

អ្នកទស្សនាប្រមាណ ២២,០០០ នាក់បានបំពេញកន្លែងអង្គុយផ្លូវការ ខណៈដែលមនុស្សរាប់ម៉ឺននាក់ទៀតបានប្រមូលផ្តុំគ្នានៅជុំវិញទីលានដើម្បីធ្វើជាសាក្សីនៃពេលវេលាពិសេសនេះ។ យោងតាមការប៉ាន់ស្មានរបស់ HYBE ដោយផ្អែកលើទិន្នន័យបណ្តាញទូរស័ព្ទចល័ត និងចំនួនអ្នកទស្សនាបរទេស ចំនួនសរុបនៃអ្នកចូលរួមនៅក្នុងព្រឹត្តិការណ៍ BTS ទាំងនៅក្នុង និងក្រៅទីកន្លែង មានចំនួនប្រហែល ១០៤,០០០ នាក់។កម្មវិធីនេះក៏ត្រូវបានផ្សាយផ្ទាល់ទូទាំងពិភពលោកតាមរយៈ Netflix ដែលអនុញ្ញាតឱ្យអ្នកគាំទ្រជុំវិញពិភពលោកតាមដានបានភ្លាមៗ។

បន្ទាប់ពីព្រឹត្តិការណ៍ដ៏ធំសម្បើមនេះបានបញ្ចប់ RM ដែលជាមេក្រុម BTS បានបង្ហោះលិខិតមួយនៅលើ Weverse ដោយថ្លែងអំណរគុណដល់អាជ្ញាធរ និងសូមទោសចំពោះភាពរអាក់រអួលណាមួយ។ នៅក្នុងលិខិត RM បានសម្តែងការដឹងគុណចំពោះប៉ូលិស អ្នកពន្លត់អគ្គីភ័យ ភ្នាក់ងាររដ្ឋបាល និងអាជ្ញាធរមូលដ្ឋាន ចំពោះកិច្ចសហប្រតិបត្តិការរបស់ពួកគេក្នុងការធានាសន្តិសុខ និងសុវត្ថិភាពនៃព្រឹត្តិការណ៍ទ្រង់ទ្រាយធំ។
ជាពិសេស RM ក៏បានសូមទោសដល់អ្នកស្រុក ម្ចាស់អាជីវកម្មខ្នាតតូច និងបុគ្គលិកការិយាល័យនៅក្នុងតំបន់ Gwanghwamun ចំពោះភាពរអាក់រអួលណាមួយដែលបង្កឡើងដូចជាការកកស្ទះចរាចរណ៍ និងសំឡេងរំខាន ដោយសារតែការរៀបចំព្រឹត្តិការណ៍នេះ។

តារាចម្រៀងប្រុសរូបនេះក៏បានសង្កត់ធ្ងន់ផងដែរថា «នេះមិនមែនគ្រាន់តែជាឆាកសម្រាប់សមាជិកទាំង ៧ នាក់នោះទេ» ប៉ុន្តែជាលទ្ធផលនៃការខិតខំប្រឹងប្រែងរួមគ្នារបស់កងកម្លាំងសន្តិសុខ ការយល់ដឹងរបស់សាធារណជន និងសេចក្ដីស្រលាញ់របស់ ARMY។

RM បាននិយាយថា «សូមអរគុណច្រើនសម្រាប់ការជឿទុកចិត្តលើយើង និងរង់ចាំយើងដោយក្តីស្រលាញ់ដែលមិនរង្គោះរង្គើអស់រយៈពេលយូរ។ នៅពេលដែលយើងបានឮសំឡេងអបអរសាទររបស់អ្នកពេញទីលាន បេះដូងរបស់យើងពោរពេញដោយគំនិតថា ‘អា! ទីបំផុតយើងត្រឡប់មកវិញហើយ’។ យើងពិតជារំជួលចិត្តយ៉ាងខ្លាំងចំពោះរបៀបដែលអ្នករីករាយនឹងការសម្តែងក្នុងលក្ខណៈចាស់ទុំ និងមានសណ្តាប់ធ្នាប់បែបនេះ ដោយបង្ហាញការយកចិត្តទុកដាក់ចំពោះគ្នាទៅវិញទៅមក សូម្បីតែនៅក្នុងហ្វូងមនុស្សដ៏ច្រើនបែបនេះក៏ដោយ» ។

បន្ទាប់ពីការប្រគំតន្ត្រី BTS ត្រូវបានគេរំពឹងថានឹងចាប់ផ្តើមដំណើរទេសចរណ៍ពិភពលោក «ARIRANG» របស់ពួកគេនៅក្នុងខែមេសា ដោយចាប់ផ្តើមជាមួយនឹងការសម្តែងនៅទីក្រុង Goyang កូរ៉េខាងត្បូង មុនពេលធ្វើដំណើរទៅកាន់ទីតាំងផ្សេងៗនៅទូទាំងអាស៊ី អឺរ៉ុប និងអាម៉េរិក៕

ថ្មីៗនេះការបង្ហោះមួយនៅលើវេទិកាប្រព័ន្ធផ្សព្វផ្សាយសង្គមទាក់ទងនឹងទំនាក់ទំនងអតីតកាលរបស់តារាសម្តែង Song Hye Kyo និង Song Joong Ki បានរីករាលដាលយ៉ាងទូលំទូលាយ។ ការបង្ហោះនេះត្រូវបានគេចោទប្រកាន់ថាបានបង្ហាញពីមូលហេតុពិតប្រាកដនៅពីក្រោយការលែងលះគ្នារបស់គូស្នេហ៍នេះក្នុងឆ្នាំ ២០១៩។ ការបង្ហោះនោះបង្ហាញថា កត្តាគ្រួសារ ជាពិសេសការរំពឹងទុកពីឪពុករបស់ Song Joong Ki បានរួមចំណែកដល់ការបែកបាក់អាពាហ៍ពិពាហ៍។

អ្នកបង្ហោះរូបនេះបានចែករំលែកថា៖ «ម្តាយរបស់ខ្ញុំ និងឪពុករបស់ Song Joong Ki គឺជាមិត្តភក្តិនឹងគ្នា។ ម្តាយរបស់ខ្ញុំបានចូលរួមពិធីមង្គលការដំបូងរបស់ Song Joong Ki ទោះបីជាពួកគាត់មិនបានថតរូបក៏ដោយ ព្រោះទូរស័ព្ទមិនត្រូវបានអនុញ្ញាត»។ នាងបាននិយាយថា មូលហេតុមួយនៃការលែងលះរបស់ពួកគេគឺដោយសារតែឪពុករបស់ Song Joong Ki គិតថា Song Hye Kyo មិនសូវស្តាប់បង្គាប់គ្រប់គ្រាន់។ Song Hye Kyo ជាមនុស្សដែលចូលចិត្តសេរីភាព ខណៈដែល Song Joong Ki ស្តាប់បង្គាប់ឪពុករបស់គាត់ខ្លាំងណាស់ ដូច្នេះហើយទើបមានជម្លោះជាច្រើនរវាងពួកគេ ដែលនាំឱ្យមានការលែងលះគ្នា។

យោងតាមសេចក្តីថ្លែងការណ៍នេះ និងមូលហេតុនៃការលែងលះដែលបានលើកឡើងជាសាធារណៈពីមុនដោយតារាសម្តែងទាំងពីរ ភាពខុសគ្នានៃបុគ្គលិកលក្ខណៈ និងរបៀបរស់នៅត្រូវបានពង្រីកដោយសម្ពាធខាងក្រៅ ដែលនៅទីបំផុតនាំឱ្យមានជម្លោះ។ទោះជាយ៉ាងណាក៏ដោយ ព័ត៌មាននេះមិនទាន់ត្រូវបានផ្ទៀងផ្ទាត់នៅឡើយទេ។ ទាំង Song Hye Kyo និង Song Joong Ki មិនដែលពន្យល់ពីព័ត៌មានលម្អិតនៃការសម្រេចចិត្តលែងលះរបស់ពួកគេឡើយ។

យោងតាមប្រភពព័ត៌មានក្នុងវិស័យកម្សាន្ត Song Hye Kyo និង Song Joong Ki បានជួបគ្នាតាមរយៈការណែនាំរបស់តារាសម្តែង Jo In Sung ក្នុងឆ្នាំ ២០១៣។ ក្រោយមក ខណៈពេលកំពុងធ្វើការជាមួយគ្នាលើរឿងភាគ ម្ចាស់ព្រះអាទិត្យ «Descendants of the Sun » ក្នុងឆ្នាំ ២០១៥ អ្នកទាំងពីរបានបង្កើតអារម្មណ៍ចំពោះគ្នាទៅវិញទៅមក ហើយចាប់ផ្តើមណាត់ជួប។ នៅពេលដែលរឿងភាគបានចាក់ផ្សាយនៅឆ្នាំ ២០១៦ ហើយបានក្លាយជារឿងដ៏ល្បីមួយ ភាពស៊ីសង្វាក់គ្នា និងរូបរាងសង្ហារបស់ Song Hye Kyo និង Song Joong Ki បានបង្កឱ្យមានពាក្យចចាមអារ៉ាមថាពួកគេកំពុងណាត់ជួប។

ដំបូងឡើយ ក្រុមហ៊ុនគ្រប់គ្រងរបស់គូស្នេហ៍នេះបានបដិសេធពាក្យចចាមអារ៉ាមអំពីការណាត់ជួប បន្ទាប់ពីពួកគេត្រូវបានគេប្រទះឃើញជាមួយគ្នានៅទីក្រុងញូវយ៉ក។ ប៉ុន្តែនៅក្នុងខែកក្កដា ឆ្នាំ២០១៧ តារាសម្ដែងទាំងពីររូបនេះបានប្រកាសពីអាពាហ៍ពិពាហ៍របស់ពួកគេដោយមិននឹកស្មានដល់ ដែលជាការបង្ហាញខ្លួនជាសាធារណៈលើកដំបូងរបស់ពួកគេជាមួយគ្នា។ ពិធីមង្គលការរបស់គូស្នេហ៍មួយគូនេះ ដែលបានធ្វើឡើងនៅក្នុងខែតុលា ឆ្នាំ២០១៧ គឺជាព្រឹត្តិការណ៍មួយក្នុងចំណោមព្រឹត្តិការណ៍ដែលត្រូវបាននិយាយច្រើនបំផុតនៅក្នុងប្រទេសកូរ៉េខាងត្បូង ដែលត្រូវបានចាត់ទុកថាជា «រឿងនិទានជីវិតពិត» ដោយអ្នកគាំទ្រ។

យ៉ាងណាក៏ដោយ ផ្ទុយពីការរំពឹងទុករបស់សាធារណជន អាពាហ៍ពិពាហ៍នេះមានរយៈពេលត្រឹមតែប្រហែល ២០ ខែប៉ុណ្ណោះ។ នៅឆ្នាំ២០១៩ ពួកគេបានដាក់ពាក្យសុំលែងលះជាផ្លូវការ ដោយលើកឡើងពី «ភាពខុសគ្នានៃបុគ្គលិកលក្ខណៈ» ជាហេតុផលសង្ខេប។

នៅពេលនោះ ភាគីទាំងពីរបានជ្រើសរើសរក្សាព័ត៌មានលម្អិតជាឯកជន ដែលនាំឱ្យមានការសង្ស័យ និងពាក្យចចាមអារ៉ាមអំពីមូលហេតុនៃការលែងលះគ្នា ដែលនៅតែបន្តពិភាក្សារហូតមកដល់សព្វថ្ងៃនេះ។ មានពាក្យចចាមអារ៉ាមថា គូស្នេហ៍នេះបានបែកបាក់គ្នាដោយសារតែ Song Hye Kyo បដិសេធមិនព្រមមានកូន។ នៅខែមករា ឆ្នាំ២០២៣ Song Joong Ki បានប្រកាសរៀបការម្តងទៀតជាមួយអតីតតារាសម្តែងអង់គ្លេស Katy ។ គូស្នេហ៍នេះបានស្វាគមន៍កូនប្រុសម្នាក់នៅឆ្នាំ២០២៣ និងកូនស្រីម្នាក់នៅឆ្នាំ២០២៤ ។

មកទល់ពេលនេះ Song Hye Kyo នៅមិនទាន់ប្រកាសពីទំនាក់ទំនងថ្មីឡើយហើយក្នុងរយៈពេលប៉ុន្មានឆ្នាំចុងក្រោយនេះ នាងផ្តោតសំខាន់លើការងាររបស់នាង ហើយអាជីពសម្ដែងរបស់នាងទទួលបានជោគជ័យគួរឱ្យកត់សម្គាល់៕

នៅថ្ងៃទី២០ ខែមីនា TOP អតីតសមាជិក BIGBANG បានបន្តបង្ហោះរូបភាពផ្សព្វផ្សាយដ៏គួរឱ្យចាប់អារម្មណ៍មួយសម្រាប់អាល់ប៊ុម «Another Dimension» នៅលើគណនី Instagram ផ្ទាល់ខ្លួនរបស់លោក។ រួមជាមួយនឹងវីដេអូផ្សព្វផ្សាយថ្មី តារាចម្រៀងរ៉េបរូបនេះក៏បានប្រកាសពីការបើកដំណើរការគណនី X ផ្ទាល់ខ្លួនផ្លូវការផងដែរ។ TOP កំពុងបង្ហាញផែនការវិលត្រឡប់មកវិញរបស់លោកបន្តិចម្តងៗលើវិស័យតន្រ្តី។

អាល់ប៊ុមទោលដំបូងរបស់ TOP ដែលមានចំណងជើងថា «Another Dimension» នឹងចេញនៅថ្ងៃទី ៣ ខែមេសា ។ យោងតាមប្រព័ន្ធផ្សព្វផ្សាយកូរ៉េបានឱ្យដឹងថា ការផ្លាស់ប្តូរនេះបង្ហាញថា TOP បានដកចេតនារបស់លោកក្នុងការចាកចេញពីឧស្សាហកម្មតន្ត្រី ហើយក៏ជាការវិលត្រឡប់មកវិញគួរឱ្យកត់សម្គាល់បន្ទាប់ពីអវត្តមានជាច្រើនឆ្នាំ។ នេះក៏ជាការចេញបទចម្រៀងដំបូងរបស់ TOP ក្នុងរយៈពេលប្រហែលបីឆ្នាំចាប់តាំងពីចាកចេញពីក្រុម BIGBANG ក្នុងឆ្នាំ២០២៣។

តារាចម្រៀងប្រុសរូបនេះបានដើរតួនាទីយ៉ាងសំខាន់ក្នុងការបង្កើតអាល់ប៊ុមថ្មីនេះក្នុងនាមជាអ្នកផលិតប្រតិបត្តិ។ លោកបានចំណាយពេលជាច្រើនឆ្នាំដើម្បីធ្វើឱ្យគម្រោងនេះល្អឥតខ្ចោះមុនពេលចេញលក់ជាផ្លូវការ។ ជាមួយនឹងបទ «DESPERADO» TOP ត្រូវបានគេរំពឹងថានឹងបើកជំពូកថ្មីមួយនៅក្នុងអាជីពទោលរបស់លោកក្រោមក្រុមហ៊ុនផ្ទាល់ខ្លួនដែលតារាចម្រៀងរូបនេះបានកសាងដោយខ្លួនឯង។

TOP បានចាកចេញពី YG Entertainment នៅពេលដែលកិច្ចសន្យាផ្តាច់មុខរបស់លោកផុតកំណត់នៅក្នុងខែកុម្ភៈ ឆ្នាំ២០២២។ នៅពេលនោះ YG បានប្រកាសថា៖ «យើងគោរពបំណងប្រាថ្នារបស់ TOP ក្នុងការពង្រីកសកម្មភាពទោលរបស់គាត់ ក៏ដូចជារបស់ Big Bang ដែរ។ TOP បាននិយាយថាលោកនឹងចូលរួមក្នុងសកម្មភាពរបស់ Big Bang នៅពេលណាដែលលក្ខខណ្ឌអនុញ្ញាត»។ នៅក្នុងខែឧសភា ឆ្នាំ២០២៣ ដើម្បីឆ្លើយតបទៅនឹងអ្នកគាំទ្រម្នាក់ TOP បាននិយាយដោយត្រង់ៗថា ១ខ្ញុំបានចាកចេញពីក្រុមហើយ» ហើយបានលុប Big Bang ចេញពីប្រវត្តិរូបប្រព័ន្ធផ្សព្វផ្សាយសង្គមរបស់ខ្លួន។

នៅក្នុងខែមករា ឆ្នាំ២០២៥ TOP បានធ្វើឱ្យមានការចាប់អារម្មណ៍យ៉ាងខ្លាំងជាមួយនឹងការវិលត្រឡប់មកវិញនៅក្នុងរឿង «Squid Game 2» ក្នុងនាមជា Thanos ដែលជាអ្នករ៉េបញៀនថ្នាំ និងជាមនុស្សមានចរិតឆេវឆាវ។ នៅក្នុងបទសម្ភាសន៍មួយបន្ទាប់ពីរឿងនេះបានចាក់ផ្សាយ អតីតសមាជិកក្រុម Big Bang រូបនេះ បានបើកចំហអំពីមូលហេតុពិតប្រាកដដែលលោកបានចាកចេញពីក្រុម។

អ្នករ៉េបរូបនេះបានទទួលស្គាល់ថាលោកបានបង្កការខូចខាតយ៉ាងធ្ងន់ធ្ងរដល់ទាំងក្រុម និងក្រុមហ៊ុនចាស់របស់ខ្លួនដោយសារតែកំហុសឆ្គងកាលពីអតីតកាល។ TOP បាននិយាយថា «ខ្ញុំបានចាកចេញពីក្រុមព្រោះខ្ញុំមិនចង់បន្តធ្វើបាបក្រុមហ៊ុន និងសមាជិកទៀតទេ»។ «អារម្មណ៍មានទោសគឺលើសលប់ណាស់។ ខ្ញុំមានអារម្មណ៍ថា ប្រសិនបើខ្ញុំនៅតែក្នុងក្រុមនេះ ឈ្មោះរបស់ខ្ញុំនឹងត្រូវបានផ្សារភ្ជាប់ជាមួយក្រុមនេះជាស្នាមប្រឡាក់។ ខ្ញុំមិនអាចប្រឈមមុខនឹងរឿងនោះបានទេ វាពិតជាឈឺចាប់ណាស់»៕