គ្មានអ្វីមួយពីប្រទេសចិនត្រូវបានអនុញ្ញាតឲ្យយកឡើងមកលើយន្តហោះ Air Force One របស់ប្រធានាធិបតីសហរដ្ឋអាមេរិកឡើយ! ក្រោយបញ្ចប់ដំណើរទស្សនកិច្ចនៅប្រទេសចិន ក្រុមការងារទាំងអស់របស់លោក ត្រាំ ត្រូវបានគេរាយការណ៍ថា បានប្រមូលអំណោយ និងសូម្បីតែរបស់តូចតាចទាំងឡាយណាដែលចិនប្រគល់ឲ្យ យកទៅបោះចោលក្នុងធុងសម្រាម មុនពេលឡើងយន្តហោះត្រឡប់ទៅសហរដ្ឋអាមេរិកវិញ។ សកម្មភាពនេះបង្ហាញពីការមិនទុកចិត្តយ៉ាងជ្រាលច្រៅ ដោយអាមេរិកខ្លាចចិនលួ.ចបង្កប់ឧបករណ៍ស៊ើបការណ៍នៅក្នុងវត្ថុទាំងនោះ។
 
យោងតាមការចុះផ្សាយរបស់ Open Source Intel ដោយដកស្រង់ពាក្យសម្ដីរបស់ Emily Goodin អ្នកឆ្លើយឆ្លងព័ត៌មានសេតវិមានសម្រាប់កាសែត New York Post បានឲ្យដឹងថា៖ អំណោយទាំងឡាយរួមទាំង ផ្លាកសញ្ញា កន្លាស់ខ្ទាស់លើអាវ និងវត្ថុអនុស្សាវរីយ៍ទាំងអស់ត្រូវបានបោះចោលទៅក្នុងធុងសំរាមនៅនឹងកន្លែង មុនពេលឡើងយន្តហោះ Air Force One នៅថ្ងៃសុក្រ។ ការណែនាំនេះគឺដាច់ខាត គ្មានរបស់របរណាមួយដែលមានប្រភពដើមពីប្រទេសចិនត្រូវបានអនុញ្ញាតឱ្យឡើងយន្តហោះនោះទេ។
 
មូលហេតុនៅពីក្រោយពិធីសារសន្តិសុខនេះត្រូវបានគេមើលឃើញថា គឺជាវិធានការការពារការស៊ើបការណ៍សម្ងាត់ ដែលជំរុញដោយក្តីបារម្ភយ៉ាងខ្លាំងផ្នែកសន្តិសុខបច្ចេកវិទ្យា (Cybersecurity) និងការលបលួចការណ៍សម្ងាត់។ ពិធីសារសន្តិសុខរបស់សហរដ្ឋអាមេរិកបានសន្មត់ថា រាល់វត្ថុរូបវន្តទាំងឡាយ ជាពិសេសឧបករណ៍អេឡិចត្រូនិក ប័ណ្ណសម្គាល់ខ្លួន ឬវត្ថុអនុស្សាវរីយ៍ ដែលមានប្រភពចេញពីបរិស្ថានសន្តិសុខដែលមានហានិភ័យខ្ពស់ អាចមានបង្កប់ឧបករណ៍លួចស្តាប់ មេរោគ (Malware) ឬឧបករណ៍តាមដាន។
 
ទោះបីជាមិនមានភស្តុតាងណាមួយដែលបង្ហាញថាវត្ថុណាមួយ​ចិនបានប្រគល់ជូនគណៈប្រតិភូអាមេរិកមានគ្រោះថ្នាក់ក៏ដោយ ប៉ុន្តែអតីតមន្ត្រីសន្តិសុខអាមេរិកបានកត់សម្គាល់ថា ប្រធានាធិបតី និងជំនួយការជាន់ខ្ពស់ជាធម្មតាអនុវត្តតាមនីតិវិធីសន្តិសុខឌីជីថលយ៉ាងតឹងរ៉ឹងបំផុត ខណៈពេលដែលនៅក្រៅប្រទេស។
 
របាយការណ៍ទាំងនេះបានលេចចេញក្នុងអំឡុងពេលដ៏តានតឹងមួយនៅក្នុងទំនាក់ទំនងអាមេរិក-ចិន ដោយប្រទេសទាំងពីរកំពុងចរចាជម្លោះពាណិជ្ជកម្ម ភាពតានតឹងយោធាជុំវិញតៃវ៉ាន់ និងការព្រួយបារម្ភកាន់តែខ្លាំងឡើងលើសង្គ្រាមតាមអ៊ីនធឺណិត។
 
ការណ៍នេះឆ្លុះបញ្ចាំងថា ទោះបីជាមានស្នាមញញឹមការទូតដែលបានបង្ហាញក្នុងអំឡុងពេលកិច្ចប្រជុំរបស់លោក Trump ជាមួយលោក Xi ក៏ដោយ ក៏វិធានការសន្តិសុខនៅពីក្រោយឆាកបានបង្ហាញពីភាពមិនទុកចិត្តយ៉ាងជ្រាលជ្រៅដែលនៅតែមានរវាងទីក្រុងវ៉ាស៊ីនតោន និងទីក្រុងប៉េកាំង។ សម្រាប់អ្នកសង្កេតការណ៍ជាច្រើន រូបភាពនៃបុគ្គលិកបោះចោលទូរស័ព្ទ និងផ្លាកសញ្ញាមុនពេលឡើងយន្តហោះ Air Force One បានក្លាយជានិមិត្តរូបដ៏មានឥទ្ធិពលនៃទំនាក់ទំនងដ៏ផុយស្រួយរវាងមហាអំណាចធំបំផុតទាំងពីររបស់ពិភពលោក៕

ពីការសម្ដែងសមត្ថភាពហោះហើរដ៏អស្ចារ្យ ក្លាយជាទស្សនីយភាពយន្តហោះបុ.កគ្នា​ដ៏រន្ធ.ត់! យោងតាមប្រព័ន្ធផ្សព្វផ្សាយរបស់អាមេរិកនៅថ្ងៃទី ១៧ ខែឧសភា ឆ្នាំ២០២៦ យន្តហោះចម្បាំងរបស់កងទ័ពជើងទឹកអាមេរិក ២គ្រឿង បានបុ.កគ្នានៅលើអាកាសក្នុងអំឡុងពេលសម្ដែងហោះហើរ Gunfighter Skies នៅឯមូលដ្ឋានទ័ពអាកាស Mountain Home ដោយយន្តហោះទាំង ២គ្រឿងបានធ្លាក់មកដីនៅចំពោះមុខអ្នកទស្សនារាប់ពាន់នាក់យ៉ាងគួរឲ្យភ្ញាក់ផ្អើល។
 
យោងតាមវីដេអូដែលថតបានដោយទស្សនិកជននៅក្នុងការព្រឹត្តិការណ៍នោះបានបង្ហាញថា មុនពេលប៉ះទង្គិចគ្នាយន្តហោះទាំងពីរបានហោះមកវិលជុំគ្នា ជាពេលដែលគេគិតថាមានកំហុសបច្ចេកទេសហើយភ្លាត់ស្នៀត ធ្វើឲ្យវាទាំងពីរបាត់បង់ការគ្រប់គ្រងនិងកកិតគ្នាយ៉ាងខ្លាំងមុនពេលធ្លាក់ចុះមកដី និងផ្ទុះជាអណ្តាតភ្លើងយ៉ាងសន្ធោសន្ធៅ នៅចម្ងាយប្រហែល ២ ម៉ាយល៍ ភាគពាយព្យនៃមូលដ្ឋានទ័ពអាកាស Mountain Home ក្នុងរដ្ឋ Idaho ភាគខាងលិចសហរដ្ឋអាមេរិក។
 
ភ្លាមៗបន្ទាប់ពីមានការធ្លាក់និងផ្ទុះឆេះនេះ សមាជិកក្រុមនាវិកទាំង ៤ នាក់នៃយន្តហោះទាំងពីរនេះ បានលោតចេញពីយន្តហោះទាន់ពេលវេលាដោយប្រើឆ័ត្រយោងចុះចតលើដីដោយសុវត្ថិភាព ហើយពុំមានសេចក្តីរាយការណ៍អំពីអ្នករងរបួសក្នុងចំណោមទស្សនិកជន ឬបុគ្គលិកនៅក្នុងមូលដ្ឋានទ័ពនោះឡើយ។
 
គួរជម្រាបថា យន្តហោះចម្បាំងដែលបានជួបគ្រោះថ្នាក់បុកគ្នានោះ គឺជានាវាចរណ៍វាយប្រហារអេឡិចត្រូនិក ប្រភេទ EA-18G Growler ផលិតដោយក្រុមហ៊ុន Boeing របស់សហរដ្ឋអាមេរិក។ ក្នុងមួយគ្រឿងៗ EA-18G Growler មានតម្លៃប្រហែល ៦៧ លានដុល្លារអាមេរិក ដូច្នេះការបាត់បង់ ២ គ្រឿងនៅពេលនេះ គឺស្មើនឹងខាតបង់ជាង ១៣០ លានដុល្លារដោយទទេៗ។
 
ទោះបីជាមានការធ្លាក់យ៉ាងខ្លាំងក៏ដោយ មន្ត្រីអាមេរិកនៅតែលើកសរសើរពីប្រតិកម្មរហ័សរបស់ក្រុមការងារ និងប្រសិទ្ធភាពនៃប្រព័ន្ធបញ្ចេញយន្តហោះសង្គ្រោះបន្ទាន់ ដែលអាចគ្រប់គ្រងស្ថានការណ៍បានទាន់ពេលវេលា និងការពារខ្លួនបានយ៉ាងល្អពីការស្លា.ប់។ ជាមួយគ្នានេះ កងទ័ពជើងទឹកអាមេរិកកំពុងដឹកនាំការស៊ើបអង្កេតជាផ្លូវការដើម្បីស្វែងរកមូលហេតុនៃការបុកគ្នានេះ។ ដោយសារតែក្រុមនាវិកទាំងអស់បានរស់រានមានជីវិត ក្រុមអ្នកស៊ើបអង្កេតរំពឹងថានឹងទទួលបានព័ត៌មានលម្អិតផ្ទាល់មាត់អំពីហេតុការណ៍នេះ៕

សូមប្រុងប្រយ័ត្នល្បិចបោកប្រា.ស់តាមបច្ចេកវិទ្យា! កាលពីថ្ងៃទី១៦ ខែឧសភា ឆ្នាំ២០២៦ សមត្ថកិច្ចសិង្ហបុរីបានប្រកាសអាសន្ន និងបង្ហាញវីដេអូភស្តុតាងអំពីល្បិចបោ.កប្រាស់ដ៏ទំនើបមួយ ដោយជនខិលខូ.ចបានប្រើប្រាស់កម្មវិធី (Deepfake) បង្កើតរូបភាព និងធ្វើសំឡេងក្លែងក្លាយជានាយករដ្ឋមន្ត្រីសិង្ហបុរី លោក Lawrence Wong ចូលរួមកិច្ចប្រជុំក្នុងកម្មវិធី Zoom ហើយធ្វើឱ្យជនរងគ្រោះម្នាក់ផ្ទេរប្រាក់រហូតដល់៤,៩លានដុល្លារសិង្ហបុរី (ប្រហែល៣,៨លានដុល្លារអាមេរិក) ។ រដ្ឋាភិបាលសិង្ហបុរីបញ្ជាក់ថា មិនធ្លាប់ទាក់ទងទៅពលរដ្ឋដើម្បីសុំឱ្យផ្ទេរប្រាក់ តាមរយៈវីដេអូខលឡើយ ។

សមត្ថកិច្ចសិង្ហបុរីបានដាស់តឿនទៅកាន់ពលរដ្ឋបង្កើនការប្រុងប្រយ័ត្នកុំឱ្យចាញ់បោកជនខិលខូច បន្ទាប់ពីប្រើប្រាស់បច្ចេកវិទ្យាសិប្បនិម្មិត (AI) បង្កើតរូបភាព និងធ្វើសំឡេងក្លែងក្លាយជាលោកនាយករដ្ឋមន្ត្រី Lawrence អង្គុយប្រជុំអនឡាញក្នុងកម្មវិធី Zoom និងអញ្ជើញឱ្យជនរងគ្រោះឱ្យចូលរួមប្រជុំ បន្ទាប់មក ក៏ស្នើឱ្យជនរងគ្រោះផ្ទេរប្រាក់បន្ទាន់ដើម្បីដោះស្រាយស្ថានការណ៍អសន្តិសុខនៅច្រកសមុទ្រ Hormuz ។

មុនដំបូង ជនខិលខូចបានក្លែងបន្លំជាលេខាធិការគណៈរដ្ឋមន្ត្រីផ្ញើសារតាមកម្មវិធី WhatsApp ទៅជនរងគ្រោះ ហើយអញ្ជើញជនរងគ្រោះឱ្យចូលរួមប្រជុំបន្ទាន់ និងសម្ងាត់ជាមួយលោកនាយករដ្ឋមន្ត្រី Lawrence ក្នុងកម្មវិធី Zoom ដែលបង្កើតឡើងដោយកម្មវិធី Deepfake ។ ជនរងគ្រោះជឿតាមការបោកប្រាស់ដោយសារមើលឃើញថា កិច្ចប្រជុំនេះក៏មានថ្នាក់ដឹកនាំក្រៅប្រទេសមួយចំនួនចូលរួមផងដែរ ។

វីដេអូភស្តុតាងដែលបង្ហាញដោយសមត្ថកិច្ច គេបានឃើញកិច្ចប្រជុំនេះលើកឡើងពីស្ថានការណ៍នៅច្រកសមុទ្រ Hormuz ដោយមានការចូលរួមពីលោកនាយករដ្ឋមន្ត្រី Lawrence, ប្រធានាធិបតីសិង្ហបុរី លោក Tharman Shanmugaratnam, រដ្ឋមន្ត្រីក្រសួងហិរញ្ញវត្ថុ លោកស្រី Indranee Rajah ព្រមទាំងមន្ត្រីធនាគារកណ្តាលសិង្ហបុរី ។ ក្រៅពីនេះ ក៏មានរដ្ឋមន្ត្រីក្រសួងការបរទេសកាណាដា រួមទាំងមន្ត្រីសំខាន់ៗមកពីប្រទេសជាច្រើនទៀត ដើម្បីឱ្យជនរងគ្រោះជឿជាក់គឺជាកិច្ចប្រជុំអន្តរជាតិ ។

បើតាមសមត្ថកកិច្ច គឺជនរងគ្រោះចូលរួមប្រជុំក្នុងនាមជាតំណាងវិស័យឯកជន ហើយនាយករដ្ឋមន្ត្រីសិង្ហបុរីក្លែងក្លាយបាននិយាយសរុបស្ថានការណ៍ និងអរគុណជនរងគ្រោះដែលបានចូលរួមប្រជុំ បន្ទាប់មក ជនខិលខូចម្នាក់ទៀតក៏ក្លែងខ្លួនជាមេធាវីទាក់ទងទៅជនរងគ្រោះឱ្យផ្ទេរប្រាក់ ។

គួរបញ្ជាក់ថា ជនខិលខូលបានកំណត់គោលដៅបោកប្រាស់លើអ្នកជំនួញ ឬបុគ្គលធ្លាប់មានទំនាក់ជាមួយរដ្ឋាភិបាល ហើយវិធីបោកប្រាស់របស់ពួកគេធ្វើឱ្យជនរងគ្រោះឆាប់ជឿជាក់ ។ សមត្ថកិច្ចបានណែនាំពីវិធីសង្កេតវីដេអូបង្កើតដោយបច្ចេកវិទ្យា AI ដូចជា ៖ សំឡេងនិយាយមិនត្រូវគ្នាជាមួយមាត់មនុស្ស និងសង្កេតផ្ទៃខាងក្រោយវីដេអូមានភាពមិនច្បាស់លាស់ ខុសទម្រង់ធម្មតា ដោយសំណូមពរឱ្យពលរដ្ឋប្រុងប្រយ័ត្ន ជាពិសេស ការទាក់ទងតាមអនឡាញ និងវីដេអូខល ដោយសារកម្មវិធី Deepfake អាចបង្កើតវីដេអូដូចបេះបិទ និងពិបាកសង្កេត ។

នាយករដ្ឋមន្ត្រីសិង្ហបុរីបានចេញសេចក្តីប្រកាសព្រមានជាសាធារណៈអំពីសកម្មភាពរបស់ក្រុមឆបោក ថារដ្ឋាភិបាលសិង្ហបុរីមិនធ្លាប់ទាក់ទងទៅពលរដ្ឋដើម្បីសុំឱ្យផ្ទេរប្រាក់, ធ្វើការវិនិយោគ ឬសុំទិន្នន័យធនាគារផ្ទាល់ខ្លួនតាមរយៈវីដេអូខល ឬទូរស័ព្ទឡើយ ៕

សមត្ថកិច្ចខេត្តស្រះកែវមួយក្រុមមានគ្នា៤នាក់ សហការជាមួយជនស៊ីវិលម្នាក់ បានប្រើប្រាស់អំណាចតួនាទីហួសព្រំដែនទៅចាប់ខ្លួនជ.នជាតិចិនចំនួន៥នាក់ដាក់ខ្នោះដៃកាលពីថ្ងៃទី១៦ ខែឧសភា ឆ្នាំ២០២៦ បន្ទាប់មក ក៏នាំទៅបង្ខាំងទុកក្នុងផ្ទះមួយកន្លែងនៅស្រុកវាំងសាំប៊ូន ខេត្តស្រះកែវ ដើម្បីជំរិ.តទារប្រាក់ក្នុងម្នាក់១ម៉ឺនដុល្លារ ជាថ្នូនឹងការដោះលែងឱ្យមានសេរីភាព បន្ទាប់ពីចោទប្រកាន់ឆ្លងដែនចូលប្រទេសថៃខុសច្បាប់ ។ ពេលនេះ ជ.នជាតិចិនទាំង៥នាក់ទទួលបានការជួយសង្គ្រោះ រីឯក្រុមសមត្ថកិច្ចជាជនល្មើ.សត្រូវបានចាប់ខ្លួនរង់ចាំការដាក់ទោ.សតាមច្បាប់ ។

ជនល្មើសជាក្រុមសមត្ថកិច្ចបានបដិសេធមិនទទួលស្គាល់កំហុស ដែលហេតុការណ៍នេះធ្វើឱ្យផ្ទុះការរិះគន់យ៉ាងខ្លាំងពីសំណាក់មហាជន ពីព្រោះកន្លងមក ក៏មានករណីសមត្ថកិច្ចថៃចាប់ជំរិតទារប្រាក់ពីជនបរទេសជាច្រើនលើករួចមកហើយ ។ ស្នងការខេត្តស្រះកែវ ប្រកាសចាត់វិធានការសមត្ថកិច្ចមួយក្រុមនេះទៅតាមផ្លូវច្បាប់ដោយគ្មានការលើកលែង ដើម្បីកុំឱ្យក្លាយជាគំរូអាក្រក់សម្រាប់សមត្ថកិច្ចដទៃទៀត និងកុំឱ្យខូចឈ្មោះសមត្ថកិច្ចថៃ ។ នេះបើតាមការចុះផ្សាយរបស់សារព័ត៌មាន Thairath ។

ហេតុការណ៍ចាប់ខ្លួនជនជាតិចិន៥នាក់ បានកើតឡើងកាលពីថ្ងៃទី១៦ ខែឧសភា ហើយនាថ្ងៃបន្ទាប់ (ថ្ងៃទី១៧ ខែឧសភា) សមត្ថកិច្ចខេត្តស្រះកែវ សហការជាមួយមន្ត្រីស្ថាប័នពាក់ព័ន្ធ ចូលរំដោះជនជាតិចិនទាំង៥នាក់ ដែលត្រូវបានបង្ខាំងទុកក្នុងផ្ទះនៅឃុំវាំងម៉ៃ ស្រុកវាំងសាំប៊ូន បន្ទាប់មក សមត្ថកិច្ចក៏បានចាប់ខ្លួនសមត្ថកិច្ចដូចគ្នាចំនួន៤នាក់ ព្រមទាំងចាប់ជនស៊ីវិលម្នាក់ទៀត ។

មុនឈានដល់ការចូលរំដោះជនជាតិចិនទាំងនេះ គឺសមត្ថកិច្ចខេត្តស្រះកែវបានទទួលសារពីសមត្ថកិច្ចអន្តោប្រវេសន៍ខេត្តប៉ាធុមថានី ថាមានជនជាតិចិន៥នាក់ផ្ញើសារសុំការជួយសង្គ្រោះជាបន្ទាន់ ពីព្រោះពួកគេត្រូវបានសមត្ថកិច្ចខេត្តស្រះកែវចាប់ខ្លួនឃុំក្នុងផ្ទះ ដើម្បីជំរិតទារប្រាក់ជាថ្នូរនឹងការដោះលែង ។

ចំណែកក្រុមជនជាតិចិនរៀបរាប់ថា សមត្ថកិច្ចថៃទាំងនេះបានចាប់ខ្លួនពួកគេដាក់ខ្នោះដៃ គំរាមកំហែង និងទារប្រាក់ក្នុងម្នាក់ចំនួន១ម៉ឺនដុល្លារ បើមិនឱ្យប្រាក់ នឹងមិនរួចខ្លួនទេ ។ ពួកគេត្រូវចាប់ខ្លួនពីបទឆ្លងដែនចូលប្រទេសថៃខុសច្បាប់ ប៉ុន្តែសមត្ថកិច្ចមិនបញ្ជូនទៅសាកសួរតាមនីតិវិធីច្បាប់ បែរជានាំមកឃុំឃាំងទៅវិញ ។ មុនពេលទទួលបានការជួយសង្គ្រោះ ពួកគេ២នាក់ បានបង្ខំចិត្តផ្ទេរប្រាក់ទៅឱ្យក្រុមសមត្ថកិច្ចរួចហើយ គឺផ្ទេរប្រាក់ក្នុងម្នាក់អស់ចំនួន២ពាន់ដុល្លារ (សរុប៤ពាន់ដុល្លារ) ដោយមានទាំងភស្តុតាងការផ្ទេរ ។

គួរបញ្ជាក់ថា ក្រុមសមត្ថកិច្ចខិលខូចទាំងនេះមកពីអង្គភាពផ្សេងៗគ្នា ប៉ុន្តែសហការគ្នាជាមួយជនស៊ីវិលម្នាក់ទៀតដើម្បីធ្វើសកម្មភាពជាប្រព័ន្ធ ដោយរង់ចាំស្ទាក់ចាប់ក្រុមជនជាតិចិននៅចំណុចដាច់ស្រយាល និងចោទប្រកាន់ឆ្លងដែនចូលប្រទេសថៃតាមច្រកធម្មជាតិនៅខេត្តស្រះកែវ ។

បច្ចុប្បន្ន ជនល្មើសទាំង៥នាក់ (សមត្ថកិច្ច៤នាក់, ជនស៊ីវិលម្នាក់) ត្រូវបានរឹបអូសយកអាវុធ, គ្រាប់កាំភ្លើងមួយចំនួន និងរថយន្ត២គ្រឿង ព្រមទាំងត្រូវឃុំខ្លួនបណ្តោះអាសន្នរង់ចាំការកាត់ទោសពីបទឧក្រិដ្ឋកម្មធ្ងន់ធ្ងរ រួមមាន ៖ ការជំរិតទារប្រាក់ បង្ខំាំងមនុស្សខុសច្បាប់ និងប្រើប្រាស់អំណាចហួសព្រំដែន ៕

ចិនបានផ្អាកនាំចូល និងដាក់ក្រុមហ៊ុនកែច្នៃសាច់មាន់ និងជើងមាន់ថៃ ចំនួន១៧ក្រុមហ៊ុនចូលក្នុង «បញ្ជីខ្មៅ» ដោយសារក្រុមហ៊ុនមិនអនុវត្តតាមស្តង់ដារអនាម័យតឹងរ៉ឹងកំណត់ដោយចិន, លួ.ចនាំចូលសាច់មាន់ និងជើងមាន់ពីប្រទេសផ្សេងដែលចិនហាមឃាត់ (ប្រទេសផ្ទុះជំងឺផ្តាសាយបក្សី) រួចបន្លំជាអាហារថៃនាំចេញទៅចិន, ផលិតកម្មខុសប្រក្រតី និងប្រើប្រាស់ឯកសារ ឬអាជ្ញាប័ណ្ណនាំចេញមិនត្រឹមត្រូវ ដែលការដាក់ក្នុងបញ្ជីខ្មៅនេះធ្វើឱ្យថៃបាត់បង់ចំណូលជាង៣ម៉ឺនលានបាត (ជាង៩១៦លានដុល្លារ) ។ រដ្ឋបាលគយចិន (GACC) បានផ្ញើលិខិតព្រមានចំនួន៤លើក មកកាន់នាយកដ្ឋានបសុសត្វ និងក្រសួងកសិកម្មថៃ ឱ្យត្រួតពិនិត្យដោះស្រាយបញ្ហា ប៉ុន្តែថៃមិនចាប់អារម្មណ៍ និងព្រងើយកន្តើយចំពោះលិខិតព្រមាន ។

ប្រសិនបើថៃនៅតែគ្មានចំណាត់ការទេនោះ វានឹងប៉ះពាល់ដល់ទំនាក់ទំនងទ្វេភាគីរវាងប្រទេសទាំងពីរ និងប៉ះពាល់ការនាំចេញផលិតផលផ្សេងទៀត ដោយសារចិនបាត់បង់ទំនុកចិត្ត ហើយក្រុមហ៊ុនថៃនឹងត្រូវបង្ខំចិត្តបិទរោងចក្រ ឬកាត់បន្ថយទំហំប្រតិបត្តិការ បណ្តាលឱ្យកម្មករជាច្រើននាក់បាត់បង់ការងារ ។

កន្លងមក មានក្រុមហ៊ុនកែច្នៃសាច់មាន់ និងជើងមាន់ថៃ ចំនួន២២ក្រុមហ៊ុនទទួលបានការអនុញ្ញាតឱ្យនាំចេញទៅចិន ប៉ុន្តែបន្ទាប់ពីចិនប្រកាសដាក់ក្រុមហ៊ុនថៃចំនួន១៧ ក្នុងបញ្ជីខ្មៅ គឺពេលនេះ ថៃមានតែ៥ក្រុមហ៊ុនប៉ុណ្ណោះដែលអាចនាំចេញបាន ។ ចិនរកឃើញសកម្មភាពផលិតជាក់ស្តែងក្នុងរោងចក្ររបស់ក្រុមហ៊ុន មិនស្របនឹងទិន្នន័យចុះបញ្ជីផ្លូវការដែលចេញដោយនាយកដ្ឋានអភិវឌ្ឍន៍បសុសត្វ (DLD) របស់ថៃឡើយ ។ នេះបើតាមការចុះផ្សាយរបស់សារព័ត៌មាន Khaosod នៅថ្ងៃទី១៨ ខែឧសភា ឆ្នាំ២០២៦ ។

នៅថ្ងៃទី១៨ ខែឧសភា អតីតតំណាងរាស្ត្រគណបក្សភឿថៃ លោក Nikhom Boonwiset ឱ្យដឹងថា អាជ្ញាធរចិនបានដាក់ក្រុមហ៊ុនកែច្នៃសាច់មាន់ និងជើងមាន់ថៃ ចំនួន១៧ក្រុមហ៊ុនចូលក្នុង «បញ្ជីខ្មៅ» ក្រោយរកឃើញភាពខុសប្រក្រតីជាច្រើន រួមមាន ៖ មិនអនុវត្តតាមស្តង់ដារអនាម័យតឹងរ៉ឹងកំណត់ដោយចិន, លួ.ចនាំចូលសាច់មាន់ និងជើងមាន់ពីប្រទេសផ្សេងដែលចិនហាមឃាត់ (ដូចជាប្រទេសផ្ទុះជំងឺផ្តាសាយបក្សី) រួចបន្លំជាអាហារថៃនាំចេញទៅចិន, ផលិតកម្មខុសប្រក្រតី និងប្រើប្រាស់ឯកសារ ឬអាជ្ញាប័ណ្ណនាំចេញមិនត្រឹមត្រូវ ។

បើតាមលោក Nikhom ចិនមិនពេញចិត្តយ៉ាងខ្លាំង ដែលថៃលួចនាំចូលសាច់មាន់ និងជើងមាន់ពីប្រទេសផ្សេងដែលចិនហាមឃាត់ (គឺប្រទេសផ្ទុះជំងឺផ្តាសាយបក្សី) រួចហើយ បន្លំជាអាហារថៃនាំចេញទៅចិន ​។ ចិនក៏បញ្ជូនមន្ត្រីរបស់ខ្លួបនមកត្រួតពិនិត្យឃើញថា ចំនួនជើងមាន់ដែលថៃបញ្ជូនទៅនោះ គឺមានបរិមាណច្រើនជាងការផលិតជាក់ស្តែង ទើបចិនដាក់ក្រុមហ៊ុនកែច្នៃសាច់មាន់ និងជើងមាន់ថៃ ចំនួន១៧ក្រុមហ៊ុនក្នុងបញ្ជីខ្មៅតែម្តង ។

គួរបញ្ជាក់ថា រដ្ឋបាលគយចិន (GACC) និងសមាគមអ្នកនាំចេញមាន់សាច់របស់ថៃ មិនទាន់បានប្រកាសជាសាធារណៈនូវ «បញ្ជីឈ្មោះផ្លូវការ និងទីតាំងជាក់លាក់» របស់ក្រុមហ៊ុនទាំង១៧ ទេ ដើម្បីការពារផលប៉ះពាល់ផ្នែកអាជីវកម្ម និងកេរ្តិ៍ឈ្មោះរបស់ក្រុមហ៊ុនទាំងនេះ ។

បច្ចុប្បន្ន ចិនបានបង្កើនការត្រួតពិនិត្យស្តង់ដារអនាម័យ និងសុវត្ថិភាពចំណីអាហារយ៉ាងតឹងរ៉ឹងបំផុត ហើយក្រុមហ៊ុនថៃទាំង១៧ មិនបានកែសម្រួលសកម្មភាពផលិតកម្មឱ្យស្របតាមលិខិតព្រមានជាច្រើនលើករបស់ចិនឡើយ ។ ចិនបានអនុវត្តវិធានការច្បាប់ និងស្តង់ដារបច្ចេកទេសកាន់តែខ្ពស់ ដើម្បីចម្រាញ់យកតែក្រុមហ៊ុនណាដែលមិនលួចបន្លំ និងអាហារមានគុណភាពខ្ពស់ប៉ុណ្ណោះ ៕