នាយករដ្ឋមន្ត្រីវៀតណាម លោក Pham Minh Chinh បានធ្វើដំណើរបំពេញទស្សនកិច្ចជាផ្លូវការនៅប្រទេសរុស្ស៊ីកាលពីថ្ងៃទី២២ ខែមីនា ឆ្នាំ២០២៦ ដើម្បីជួបពិភាក្សាជាមួយនាយករដ្ឋមន្ត្រីរុស្ស៊ី លោក Mikhail Mishustin ក្នុងគោលបំណងពង្រឹងទំនាក់ទំនងទ្វេភាគី និងកិច្ចសហការវិស័យថាមពល ស្របពេលតម្លៃប្រេងឥន្ធនៈកើនឡើងខ្ពស់លើពិភពលោក រួមទាំងតម្លៃប្រេងនៅវៀតណាមកើនឡើងផងដែរ រហូតដល់៥០% ទៅ៧០% ។

តាមការចុះផ្សាយរបស់សារព័ត៌មាន AFP ដែលដកស្រង់ប្រភពពីមន្ត្រីនៅទីក្រុងហាណូយ គឺនាយករដ្ឋមន្ត្រីវៀតណាម លោក Pham Minh Chinh បានធ្វើដំណើរបំពេញទស្សនកិច្ចទៅប្រទេសរុស្ស៊ីជាផ្លូវការកាលពីថ្ងៃទី២២ ខែមីនា ហើយប្រទេសទាំងពីរនឹងចុះហត្ថលេខាលើកិច្ចព្រមព្រៀងជាច្រើនច្បាប់ រួមទាំងពង្រឹងកិច្ចសហការវិស័យថាមពល និងឧស្ម័ន ។ ដំណើរទស្សនកិច្ចរបស់នាយករដ្ឋមន្ត្រីវៀតណាមទៅកាន់ប្រទេសផលិតប្រេងឥន្ធនៈ ស្របពេលវៀតណាមព្យាយាមបម្រុងប្រេងសម្រាប់ប្រើប្រាស់ក្នុងប្រទេស បន្ទាប់ពីការផ្គត់ផ្គង់ប្រេងលើពិភពលោកផ្អាកដំណើរការភ្លាមៗដោយសារសង្គ្រាមមជ្ឈិមបូព៌ា ។

យោងតាមការបញ្ជាក់របស់រដ្ឋាភិបាលវៀតណាមក្នុងសេចក្តីថ្លែងការណ៍ វៀតណាមនឹងផ្តោតលើការពង្រឹងទំនាក់ទំនងជាមួយរុស្ស៊ី និងបង្កើនកិច្ចសហការពាណិជ្ជកម្ម វិនិយោគ និងថាមពល ។ ក្នុងអំឡុងពេលការបំពេញទស្សនកិច្ចនេះ នឹងមានការចុះហត្ថលេខាលើកិច្ចព្រមព្រៀងសំខាន់ជាច្រើនច្បាប់ពាក់ព័ន្ធនឹងគម្រោងរោងចក្រថាមពលនុយក្លេអ៊ែរ កិច្ចសហការផ្នែកថាមពល ប្រេងឥន្ធនៈ និងឧស្ម័ន ដោយពង្រឹងគ្រប់ផ្នែកនៃពាណិជ្ជកម្ម ការរុករក និងបណ្តុះបណ្តាលធនធានមនុស្ស ។

តាំងពីផ្ទុះសង្គ្រាមរវាងអ៊ីរ៉ង់ជាមួយអាមេរិក និងអ៊ីស្រាអែលកាលពីចុងខែកុម្ភៈ ឆ្នាំ២០២៦ ធ្វើឱ្យតម្លៃប្រេងកើនឡើងខ្ពស់បង្កការបារម្ភពីកង្វះខាតប្រេងលើពិភពលោក ។ តម្លៃប្រេងនៅវៀតណាមក៏កើនឡើងដែរ ក្នុងនោះតម្លៃប្រេងសាំងស៊ុបពែរនៅវៀតណាមកើនឡើងរហូតដល់៥០% និងប្រេងម៉ាស៊ូតកើនឡើង៧០% ។

ហេតុនេះ នាយករដ្ឋមន្ត្រីវៀតណាមក៏ពិភាក្សាតាមទូរស័ព្ទជាមួយប្រទេសជាច្រើនដើម្បីស្នើសុំជំនួយប្រេង រួមមាន ៖ ប្រទេសកាតា គុយវ៉ែត អាល់ហ្សេរី និងជប៉ុន ។ នាយករដ្ឋមន្ត្រីវៀតណាមគ្រោងជួបពិភាក្សាជាមួយនាយករដ្ឋមន្ត្រីរុស្ស៊ី លោក Mikhail Mishustin នៅថ្ងៃទី២៣ ខែមីនា ហើយភាគីទាំងពីរនឹងពិភាក្សាគ្នាពីពាណិជ្ជកម្មរវាងរុស្ស៊ី និងវៀតណាម ដោយផ្តោតលើគម្រោងសហការវិស័យថាមពល និងវិស័យផ្សេងៗ ។

គួរបញ្ជាក់ថា នាយករដ្ឋមន្ត្រីរុស្ស៊ី លោក Mikhail Mishustin ធ្លាប់បំពេញទស្សនកិច្ចនៅទីក្រុងហាណូយកាលពីខែមករា ឆ្នាំ២០២៥ និងចេញសេចក្តីថ្លែងការណ៍រួមបញ្ជាក់ថា រុស្ស៊ីនឹងចូលរួមបង្កើតឧស្សាហកម្មថាមពលនុយក្លេអ៊ែរនៅវៀតណាម ហើយប្រទេសទាំងពីរនឹងធ្វើការរួមគ្នាលើគម្រោងប្រេង និងឧស្ម័ន ។ ពេលនោះ ប្រទេសទាំងពីរបានចុះហត្ថលេខាលើកិច្ចព្រមព្រៀងថាមពលនុយក្លេអ៊ែរ ដោយវៀតណាមកំណត់គោលដៅសាងសង់រោងចក្រថាមពលនុយក្លេអ៊ែរក្នុងរយៈពេល៥ឆ្នាំ ៕

សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែលដែលអូសបន្លាយពេលជាច្រើនសប្តាហ៍ បានបង្កផលប៉ះពាល់ដល់ពលរដ្ឋនៅជុំវិញពិភពលោក ដោយសារស្ថានការណ៍អសន្តិសុខ កង្វះខាតប្រេងឥន្ធនៈ ឧស្ម័ន និងទំនិញឡើងថ្លៃ ។ ចាប់ពីថ្ងៃទី២១ ដល់ថ្ងៃទី២២ ខែមីនា ឆ្នាំ២០២៦ ពលរដ្ឋប្រទេសជាច្រើន រួមមាន ៖ ពលរដ្ឋអ៊ីស្រាអែល អង់គ្លេស អាល្លឺម៉ង់ អេស្ប៉ាញ និងឥណ្ឌា បានជួបជុំគ្នាធ្វើបាតុកម្មប្រឆាំងសង្គ្រា.មដែលនាំឱ្យបាត់បង់ជីវិ.តមនុស្ស ។

តាមការចុះផ្សាយរបស់សារព័ត៌មានបរទេសកាលពីថ្ងៃទី២២ ខែមីនា ពលរដ្ឋនៅប្រទេសនានាបានប្រមូលផ្តុំគ្នាធ្វើបាតុកម្មប្រឆាំងសង្គ្រាមនៅតំបន់មជ្ឈិមបូព៌ាបង្កឡើងដោយអាមេរិក និងអ៊ីស្រាអែល ដែលរហូតមកដល់ពេលនេះ បានអូសបន្លាយរហូតដល់ជាង៣សប្តាហ៍ ។ សង្គ្រាមបង្កឱ្យមានវិបត្តិថាមពលលើពិភពលោក លើសពីនេះ នឹងរាលដាលកាន់តែខ្លាំងក្លាយជាវិបត្តិសេដ្ឋកិច្ចពិភពលោក នាថ្ងៃអនាគត ។

ពលរដ្ឋអ៊ីស្រាអែលជាច្រើននាក់បានធ្វើបាតុកម្មដោយដើរជាក្បួននៅទីក្រុង Tel Aviv ដើម្បីប្រឆាំងការធ្វើសង្គ្រាម ក្នុងនោះក្រុមបាតុករខ្លះបានលាបពណ៌ក្រហមលើបាតដៃរបស់ពួកគេ ខណៈបាតុករខ្លះទៀតលើកស្លាកសរសេរអក្សរថា «បញ្ឈប់សង្គ្រាម» ឬ «បញ្ឈប់ការបញ្ជូនអាវុធឥឡូវនេះ» ។

នៅទីក្រុងឡុងដ៍ ប្រទេសអង់គ្លេស ពលរដ្ឋបានប្រមូលគ្នាធ្វើបាតុកម្មនៅតាមផ្លូវកាលពីថ្ងៃទី២១ ខែមីនា ព្រមទាំងលើកស្លាកសរសេរអក្សរថា «បញ្ឈប់សង្គ្រាមរបស់លោកប្រធានាធិបតី Trump» និង «បញ្ឈប់ការទម្លាក់គ្រាប់បែកនៅអ៊ីរ៉ង់» ខណៈក្រុមបាតុករខ្លះទៀតជួបជុំគ្នានៅអគារលេខ១០ ផ្លូវដាវនីង គឺជាកន្លែងស្នាក់នៅរបស់នាយករដ្ឋមន្ត្រីអង់គ្លេស ។

រីឯមូលដ្ឋានកងទ័ពអាកាស Fairford តំបន់ Gloucestershire ប្រទេសអង់គ្លេស ដែលកងទ័ពអាកាសអាមេរិក (USAF) មានវត្តមាននៅទីនេះ ក៏បានធ្វើបាតុកម្មប្រឆាំងសង្គ្រាមដែរ ដោយការកាន់បដាសរសេរអក្សរថា «ឈប់វាយប្រហារអ៊ីរ៉ង់» និង «ឈប់ធ្វើឱ្យមនុស្សស្លាប់» ។

ដូចគ្នានេះ ពលរដ្ឋអាល្លឺម៉ង់ជាច្រើននាក់បានធ្វើបាតុកម្មនៅទីក្រុងប៊ែរឡាំងកាលពីថ្ងៃទី២២ ខែមីនា ដើម្បីរំឭកពីកូនសិស្សស្លាប់ក្នុងការវាយប្រហារសាលាបឋមសិក្សានៅប្រទេសអ៊ីរ៉ង់ពេលសង្គ្រាមចាប់ផ្តើម ។ ពលរដ្ឋអាល្លឺម៉ង់លើកស្លាកថា «សិស្សស្រីតូចៗចំនួន១៦៨នាក់ បានស្លាប់ដោយសារអាមេរិក និងអ៊ីស្រាអែល» ។ ពលរដ្ឋអាល្លឺម៉ង់ថា ការបង្កសង្គ្រាមនេះ គឺជាការល្មើសច្បាប់អន្តរជាតិ ហើយវាដូចសង្គ្រាមនៅអ៊ីរ៉ាក់ ។

ចំណែកពលរដ្ឋអេស្ប៉ាញបានជួបជុំគ្នាធ្វើបាតុកម្មនៅទីក្រុងម៉ាឌ្រីដ ដោយកាន់ស្លាកសរសេរថា «ប្រឆាំងសង្គ្រាម» និង «សូមសន្តិភាព» ដោយពលរដ្ឋអេស្ប៉ាញជាច្រើនបានគ្រវីទង់ជាតិប៉ាឡេស្ទីនផងដែរ ។

ប្រទេសឥណ្ឌាវិញ ក្រុមមូស្លីមបានមកចូលរួមធ្វើបាតុកម្មតាមផ្លូវនៅតំបន់កាស្មៀដែលគ្រប់គ្រងដោយឥណ្ឌា ព្រមទាំងបង្ហាញរូបភាពរបស់អតីតមេដឹកនាំកំពូលអ៊ីរ៉ង់ដែលបានស្លាប់ គឺលោក Ayatollah Ali Khamenei ដោយក្រុមមូស្លីមបានស្លៀកពាក់ឈុតពណ៌ខ្មៅដើម្បីកាន់ទុក្ខអតីតមេដឹកនាំកំពូលអ៊ីរ៉ង់ ៕

បន្ទាប់ពីចារកម្មសហរដ្ឋអាមេរិកលាតត្រដាងថារុស្ស៊ីគឺជាអ្នកនៅពីក្រោយដែលជួយផ្ដល់ព័ត៌មានសម្ងាត់ផ្សេងៗទៅឲ្យអ៊ីរ៉ង់ លោក Putin មិនត្រឹមតែមិនបដិសេធនឹងរបាយការណ៍នេះនោះទេ តែថែមទាំងបានយកវាមកធ្វើជាលក្ខខណ្ឌចរចាជាមួយអាមេរិកទៀតផង ដោយទទូចថា ប្រសិនបើអាមេរិកមិនចង់ឲ្យរុស្ស៊ីជួយអ៊ីរ៉ង់បែបនេះ អាមេរិកត្រូវបញ្ឈប់ការជួយអ៊ុយក្រែនជាមុនសិន។

យោងតាមរបាយការណ៍ប្រព័ន្ធផ្សព្វផ្សាយជាច្រើន លោក Vladimir Putin ត្រូវបានគេរាយការណ៍ថាបានស្នើឱ្យបញ្ឈប់ការចែករំលែកព័ត៌មានស៊ើបការណ៍សម្ងាត់ជាមួយអ៊ីរ៉ង់ ប្រសិនបើសហរដ្ឋអាមេរិកយល់ព្រមបញ្ចប់ការគាំទ្ររបស់ខ្លួនចំពោះអ៊ុយក្រែន។ សំណើនេះត្រូវបានបញ្ជូនដោយបេសកជនរុស្ស៊ីម្នាក់ក្នុងអំឡុងពេលចរចាជាមួយតំណាងសហរដ្ឋអាមេរិក ចំពេលមានភាពតានតឹងកើនឡើងដែលទាក់ទងនឹងសង្គ្រាមនៅអ៊ុយក្រែន និងជម្លោះកាន់តែកើនឡើងនៅមជ្ឈិមបូព៌ា។

តាមសំណើដែលបានដាក់ចេញខាងលើ រុស្ស៊ីនឹងកាត់បន្ថយ ឬបញ្ឈប់កិច្ចសហប្រតិបត្តិការជាមួយអ៊ីរ៉ង់ ជាថ្នូរនឹងការបញ្ចប់ជំនួយយោធា និងព័ត៌មានស៊ើបការណ៍សម្ងាត់ដែលជួយអ៊ុយក្រែនទប់ទល់នឹងកងកម្លាំងរុស្ស៊ី។ ទោះជាយ៉ាងណាក៏ដោយ បើយោងតាមមន្ត្រីដែលនៅក្នុងការពិភាក្សានោះបានឲ្យដឹងថា សហរដ្ឋអាមេរិកបានបដិសេធភ្លាមៗចំពោះសំណើរនេះ ដែលធ្វើឲ្យសមាគមន៍អឺរ៉ុបមានការព្រួយបារម្ភជាខ្លាំង។

គួរជម្រាបថា ស្ថានភាពនេះក៏បានបង្ហាញពីលក្ខណៈស្មុគស្មាញ និងគោលគំនិតផ្ទុយគ្នានៃគោលនយោបាយការបរទេសរបស់រុស្ស៊ីនៅក្នុងចំណោមបណ្ដារប្រទេសនៅលោកខាងលិច ខណៈពេលដែលរបាយការណ៍បានបង្ហាញថា ទីក្រុងមូស្គូបានលើកសំណើនេះ។ លោកពូទីនបានពណ៌នាជាសាធារណៈអំពីរុស្ស៊ីថាជា “ដៃគូដែលអាចទុកចិត្តបាន” ចំពោះអ៊ីរ៉ង់ ដោយសង្កត់ធ្ងន់លើចំណងមិត្តភាពជាបន្តបន្ទាប់រវាងប្រទេសទាំងពីរ។

អ្នកវិភាគបានសម្តែងការសង្ស័យអំពីភាពធ្ងន់ធ្ងរនៃសំណើនេះ ដោយកត់សម្គាល់ថាការគាំទ្ររបស់រុស្ស៊ីចំពោះអ៊ីរ៉ង់គឺនៅមានកម្រិតឋបើប្រៀបធៀបទៅនឹងទំហំនៃការគាំទ្ររបស់សហរដ្ឋអាមេរិកចំពោះអ៊ុយក្រែន។ ជាងនេះទៅទៀតគឹបានព្រ.មានថា ការផ្លាស់ប្តូរណាមួយនៅក្នុងការរៀបចំចែករំលែកព័ត៌មានស៊ើបការណ៍សម្ងាត់អាចមានផលវិបាកកាន់តែទូលំទូលាយសម្រាប់សន្តិសុខសកល និងទំនាក់ទំនងការទូត៕

មិនចាំបាច់ធ្វើអ្វីច្រើននាំតែហត់ គ្រាន់តែគេងស្ងៀមៗក៏បានលុយ! សួនច្បារសាធារណៈមួយក្នុងទីក្រុងសៀងហៃបានចាប់ផ្តើមការប្រកួតដ៏ពិសេសមួយ ដោយផ្តល់ជូនអ្នកចូលរួមនូវឱកាសឈ្នះរង្វាន់រហូតដល់ 3,000 យ័ន (ប្រហែល 400 ដុល្លារ) សម្រាប់អ្នកដែលគេងបានស្កប់ស្កល់និងយូរជាងគេបង្អស់។ កម្មវិធីនេះធ្វើឡើងដើម្បីលើកកម្ពស់ការសម្រាក និងអបអរសាទរទិវាគេងពិភពលោក។

យោងតាមការចុះផ្សាយរបស់សារព័ត៌មាន The Global Times កាលពីថ្ងៃសៅរិ៍ សប្ដាហ៍មុនបានឲ្យដឹងថា សួនច្បារ Dongping ក្នុងសង្កាត់ Chongming នៃទីក្រុងសៀងហៃ បានរៀបចំការប្រកួតដ៏ប្លែកមួយគឺ «ការប្រកួតគេងក្នុងព្រៃ» បានចាប់ផ្តើមកាលពីថ្ងៃ២១ មីនាកន្លងទៅ។ ក្នុងការប្រកួតនេះ បេក្ខជនត្រូវបានតម្រូវឱ្យគេងនៅលើពូកក្នុងបរិយាកាសធម្មជាតិមានខ្យល់អាកាសបរិសុទ្ធ ចាប់ពីម៉ោង ៩ ព្រឹក ដល់ម៉ោង ៧:២០ យប់ ដោយមានឧបករណ៍បច្ចេកទេសតាមដានគុណភាពនៃការគេងយ៉ាងម៉ត់ចត់។

នៅក្នុងការប្រកួត គេបែងចែករង្វាន់ទៅតាមលក្ខខណ្ឌដែលបានកំណត់ដូចជា សម្រាប់បេក្ខជនដែលមានពិន្ទុគេងបានស្កប់បំផុតនឹងទទួលបានប្រាក់រង្វាន់ ៣,០០០ យ័ន (ប្រហែល ៤៣៥ ដុល្លារ) ចំណែកអ្នកឆាប់គេងលក់ជាងគេនឹងទទួលបាន ២,០០០ យ័ន(ប្រហែល ២៩០ដុល្លារ) ហើយបេក្ខជនផ្សេងទៀតដែលអាចអនុវត្តតាមច្បាប់គេងដែលមានគុណភាពបានតាំងពីដើមរហូតដល់ចប់ ក៏នឹងត្រូវបែងចែកប្រាក់រង្វាន់សរុបចំនួន ១០,០០០ យ័ន (ប្រហែលជិត ១៥០០ដុល្លារ)ផងដែរ។

អ្នករៀបចំកម្មវិធីនេះបាននិយាយថា ការប្រកួតប្រជែងនេះបង្ហាញពីការព្រួយបារម្ភកាន់តែខ្លាំងឡើងអំពីបញ្ហាប្រឈមរឿងដំណេក ជាពិសេសក្នុងចំណោមយុវវ័យ និងបុគ្គលិកការិយាល័យ ដែលជារឿយៗតស៊ូជាមួយនឹងភាពតានតឹង ម៉ោងធ្វើការយូរ និងអង្គុយនៅមុខអេក្រង់ទូរស័ព្ទ ឬកុំព្យូទ័រច្រើន។

គួរបញ្ជាក់ថា ការគេងមិនគ្រប់គ្រាន់ត្រូវបានផ្សារភ្ជាប់ទៅនឹងបញ្ហាសុខភាពជាច្រើន រួមទាំងអស់កម្លាំង ការថយចុះការផ្តោតអារម្មណ៍ និងហានិភ័យរយៈពេលវែងលើបញ្ហាជំងឺបេះដូង។ ដូច្នេះការរៀបចំកម្មវិធីនេះឡើង គេមានគោលបំណងជួយឱ្យអ្នករស់នៅទីក្រុងបានសម្រាកពីភាពមមាញឹក និង ភាពតានតឹង ដោយទាញយកថាមពលពីធម្មជាតិមកជួយឱ្យរាងកាយ និងស្មារតីមានភាពធូរស្រាល។

ហើយបច្ចុប្បន្នការប្រកួតដ៏ប្លែកនេះ កំពុងទទួលបានការចាប់អារម្មណ៍យ៉ាងខ្លាំងនៅលើបណ្តាញសង្គម និងត្រូវបានរៀបចំលើកោះ Chongming ដែលត្រូវបានគេស្គាល់ថាជាតំបន់ដែលមានគុណភាពខ្យល់ល្អបំផុត និងមានផ្ទៃដីព្រៃឈើធំជាងគេក្នុងទីក្រុងស៊ាងហៃ ប្រទេសចិន៕

វិបត្តិប្រេងឥន្ធនៈបានកើតឡើងនៅប្រទេសនានាលើពិភពលោក រួមទាំងថៃផងដែរ ដោយសារសង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែលអូសបន្លាយ ដែលធ្វើឱ្យរដ្ឋាភិបាលថៃចាត់វិធានការសន្សំសំចៃប្រេង ដូចជា ៖ ឱ្យពលរដ្ឋធ្វើការពីផ្ទះតាមអនឡាញ (Work form Home), ស្វែងរកទិញប្រេងពីប្រទេសផ្សេង និងបិទភ្លើងអគ្គិសនីរយៈពេល១ម៉ោងនៅទូទាំងប្រទេស នៅថ្ងៃទី២៨ ខែមីនា ខាងមុខ ។

តាមការចុះផ្សាយរបស់សារព័ត៌មាន Thairath កាលពីថ្ងៃទី២២ ខែមីនា ឆ្នាំ២០២៦ រដ្ឋាភិបាលថៃបានប្រកាសឱ្យពលរដ្ឋនៅទូទាំងប្រទេសចូលរួមកម្មវិធីរបស់ពិភពលោក «60 Earth Hour» ដើម្បីសន្សំសំចៃប្រេងឥន្ធនៈ និងកាត់បន្ថយការឡើងកំដៅផែនដី ដោយមិនប្រើប្រាស់ភ្លើងអគ្គិសនីរយៈពេល១ម៉ោង ចាប់ពីម៉ោង៨កន្លះយប់ រហូតដល់ម៉ោង៩កន្លះយប់ ថ្ងៃទី២៨ ខែមីនា ។

អ្នកស្រី សាវវ៉លិដា ភិរឺតវិវឌ្ឍនា អ្នកនាំពាក្យរដ្ឋាភិបាលថៃ កាលពីថ្ងៃទី២២ ខែមីនា និយាយថា រដ្ឋាភិបាលថៃឱ្យពលរដ្ឋនៅទូទាំងប្រទេសមិនប្រើប្រាស់ភ្លើងអគ្គិសនី១ម៉ោង ដើម្បីសន្សំសំចៃប្រេងនៅក្នុងប្រទេស និងជាការចូលរួមកម្មវិធីរបស់ពិភពលោក «60 Earth Hour 2026» ជាការកាត់បន្ថយកំដៅផែនដីដែលពិភពលោកផ្តល់ភាពសំខាន់ ។

ការមិនប្រើប្រាស់អគ្គិសនីចំនួន១ម៉ោងរបស់ពលរដ្ឋ និងស្ថាប័ននានានៅប្រទេសថៃ ក្នុងគោលបំណងបង្កើនយល់ដឹងពីកង្វះប្រេង និងផែនដីឡើងកំដៅ ។ កម្មវិធីនេះធ្វើឡើងលើកដំបូងនៅប្រទេសអូស្ត្រាលីកាលពីឆ្នាំ២០០៧ ដែលពេលនោះ ទទួលការចូលរួមពីពលរដ្ឋអូស្ត្រាលីស្មើជាង២លាន ២សែននាក់ និងអ្នកប្រកបអាជីវកម្មជាង២,០០០នាក់ គឺអាចកាត់បន្ថយការប្រើប្រាស់ប្រេងរហូតដល់១០.២% បើធៀបនឹងបរិមាណការបើកបររថយន្តតាមផ្លូវ គឺធ្លាក់ចុះដល់៤ម៉ឺន ៨ពាន់គ្រឿងក្នុង១ឆ្នាំ ។

អ្នកនាំពាក្យរដ្ឋាភិបាលថៃបន្តថា ចំណែកប្រទេសថៃមានស្ថាប័នជាច្រើនផ្តល់ភាពសំខាន់លើការមិនប្រើប្រាស់អគ្គិសនីចំនួន១ម៉ោង ដូចជា ៖ អាជ្ញាធរអគ្គិសនី (MEA) ដែលទទួលខុសត្រូវការអនុវត្តគោលនយោបាយសន្សំសំចៃថាមពល និងការពារបរិស្ថាន បានប្រកាសឱ្យពលរដ្ឋនៅទីក្រុងបាងកក ខេត្តណុនថាក់បុរី និងសមុទ្រប្រាកាន ចូលរួមកម្មវិធីនេះ ។ រីឯរដ្ឋបាលក្រុងបាងកកប្រកាសឱ្យពលរដ្ឋចូលរួមចំណែកកាត់បន្ថយការប្រើប្រាស់ថាមពលក្នុងលំនៅឋាន ខុនដូ បន្ទប់ស្នាក់នៅ ការិយាល័យធ្វើការ សាលារៀន សាកលវិទ្យាល័យ និងទីកន្លែងផ្សេងទៀតមិនប្រើប្រាស់អគ្គិសនី ចំនួន១ម៉ោង ។

ការកំណត់ឱ្យពលរដ្ឋចូលរួមកម្មវិធី «60 Earth Hour 2026» ដោយការបិទអគ្គិសនីចំនួន១ម៉ោង ចាប់ពីម៉ោង៨កន្លះយប់ រហូតដល់ម៉ោង៩កន្លះយប់ ថ្ងៃទី២៨ ខែមីនា ដើម្បីបង្ហាញគោលបំណងរួមគ្នាកាត់បន្ថយការប្រើប្រាស់អគ្គិសនីមិនចាំបាច់ និងដោះស្រាយបញ្ហាការឡើងកំដៅផែនដីដោយសារការបំភាយឧស្ម័នផ្ទះកញ្ចក់ដើម្បីការពារបរិស្ថាន ។ រដ្ឋាភិបាលថៃមើលឃើញថា ការចូលរួមរបស់ពលរដ្ឋមិនត្រឹមតែជួយកាត់បន្ថយការប្រើប្រាស់អគ្គិសនីរយៈពេលខ្លីប៉ុណ្ណោះទេ ប៉ុន្តែជាយន្តការសំខាន់ឱ្យពលរដ្ឋមានទម្លាប់សន្សំសំចៃអគ្គិសនី និងជាការផ្លាស់ប្តូរទៅកាន់សេដ្ឋកិច្ចបៃតងរយៈពេលវែង ។

គួរបញ្ជាក់ថា ពលរដ្ឋថៃនៅគ្រប់ខេត្ត-ក្រុងកំពុងខ្វះខាតប្រេងប្រើប្រាស់យ៉ាងខ្លាំង ជាពិសេស ប្រេងម៉ាស៊ូត ពួកគេសំណូមពរឱ្យរដ្ឋាភិបាលដោះស្រាយបញ្ហានេះជាបន្ទាន់ដើម្បីជួយសម្រាលទុក្ខលំបាក ស្របពេលប្រាក់ចំណូលពួកគេកំពុងបាត់បង់ស្រាប់ទៅហើយដោយសារការបិទព្រំដែនកម្ពុជា-ថៃ ។ ជម្លោះនៅមជ្ឈិមបូព៌ាធ្វើឱ្យពលរដ្ឋថៃកាន់តែលំបាកខ្លាំងថែមទៀត ព្រោះតែទំនិញគ្រប់មុខចាប់ផ្តើមឡើងថ្លៃ ៕

ពលរដ្ឋអាមេរិករស់នៅប្រទេសណាក៏ដោយ គ្មានសុវត្ថិភាពទេពេលនេះ! ក្រសួងការបរទេសអាមេរិកបានប្រកាសទៅកាន់ពលរដ្ឋរបស់ខ្លួនដែលរស់នៅជុំវិញពិភពលោក ជាពិសេស រស់នៅបណ្តាប្រទេសក្នុងតំបន់មជ្ឈិមបូព៌ា ត្រូវតែប្រុងប្រយ័ត្នការពារសុវត្ថិភាពឱ្យបានខ្ពស់ ពីព្រោះពួកគេអាចក្លាយជាគោលដៅនៃការវាយប្រ.ហាររបស់ក្រុមជនគាំទ្រអ៊ីរ៉ង់ ពីព្រោះស្ថានទូតអាមេរិកប្រចាំប្រទេសមួយចំនួន រងការវាយប្រ.ហាររួចមកហើយ ។

តាមការចុះផ្សាយរបស់សារព័ត៌មានបរទេសនៅថ្ងៃទី២៣ ខែមីនា ឆ្នាំ២០២៦ ក្រសួងការបរទេសអាមេរិកបានចេញសេចក្តីប្រកាសអំពីហានិភ័យនឹងកើតឡើងចំពោះពលរដ្ឋអាមេរិករស់នៅជុំវិញពិភពលោក ជាពិសេស អ្នករស់នៅតំបន់មជ្ឈិមបូព៌ា ត្រូវប្រុងប្រយ័ត្នខ្លួនជានិច្ច ដោយសារអាចក្លាយជាគោលដៅវាយប្រហារ ។ ម្យ៉ាងទៀត ប្រទេសនានាអាចបិទជើងហោះហើរតាមយន្តហោះ ដែលប៉ះពាល់ដល់ការធ្វើដំណើររបស់ពលរដ្ឋអាមេរិក ។

សេចក្តីប្រកាសរបស់ក្រសួងការបរទេសអាមេរិកទៅកាន់ពលរដ្ឋបញ្ជាក់ថា ពលរដ្ឋអាមេរិករស់នៅក្រៅប្រទេសគួរតែអនុវត្តតាមការណែនាំពីសុវត្ថិភាពដែលចេញសេចក្តីប្រកាសដោយស្ថានទូត ឬស្ថានកុងស៊ុលអាមេរិកនៅជិតបំផុត ។ ការបិទជើងហោះហើរតាមយន្តហោះបណ្តោះអាសន្នរបស់ប្រទេសនានា គឺអាចប៉ះពាល់ដល់ការធ្វើដំណើររបស់ពលរដ្ឋអាមេរិក ហើយកន្លងមក ស្ថានទូតអាមេរិកនៅក្រៅប្រទេសបានក្លាយជាគោកដៅវាយប្រហាររួចហើយ មិនមែនមានតែស្ថានទូតអាមេរិកនៅមជ្ឈិមបូព៌ាទេ ។

ក្រុមជនគាំទ្រប្រទេសអ៊ីរ៉ង់អាចកំណត់គោលដៅវាយប្រហារពលរដ្ឋអាមេរិករស់នៅជុំវិញពិភពលោកដើម្បីបំផ្លាញផលប្រយោជន៍អាមេរិក ឬវាយប្រហារស្ថានទូត ឬទីកន្លែងនានាដែលមានទំនាក់ទំនងជាមួយអាមេរិក ។ ហេតុនេះ ក្រសួងការបរទេសអាមេរិកសំណូមពរឱ្យពលរដ្ឋរស់នៅក្រៅប្រទេសចុះឈ្មោះនៅក្រសួងការបរទេសដើម្បីទទួលបានការជូនដំណឹងថ្មីៗ និងតាមដានការផ្សព្វផ្សាយរបស់ US Department of State – Security Updates for US Citizens ។

អាមេរិកប្រកាសឱ្យពលរដ្ឋរស់នៅក្រៅប្រទេសប្រយ័ត្នខ្លួន ស្របពេលក្រសួងការបរទេសអាមេរិកកំណត់វិធានការពង្រឹងសន្តិសុខពេលការធ្វើសង្គ្រាមជាមួយអ៊ីរ៉ង់មិនទាន់បញ្ចប់ ។ ក្រសួងការបរទេសអាមេរិកបានបញ្ជាទៅកាន់ស្ថានទូត និងស្ថានកុងស៊ុលទាំងអស់អនុវត្តវិធានការពង្រឹងសន្តិសុខជាបន្ទាន់ ដោយសារស្ថានការណ៍មិនច្បាស់លាស់នៅមជ្ឈិមបូព៌ាបង្កផលប៉ះពាល់ដល់ផលប្រយោជន៍អាមេរិកនៅក្រៅប្រទេស ។

គួរបញ្ជាក់ថា ប្រធានាធិបតីអាមេរិក លោក Donald Trump កាលពីថ្ងៃទី២២ ខែមីនា បានទុកពេលចំនួន៤៨ម៉ោងឱ្យអ៊ីរ៉ង់បើកច្រកសមុទ្រ Hormuz បើមិនចង់ឱ្យអាមេរិកវាយប្រហារទីតាំងថាមពល ប៉ុន្តែទោះរងការវាយប្រហារពីអាមេរិក និងអ៊ីស្រាអែលរយៈពេល៣សប្តាហ៍ ក៏អ៊ីរ៉ង់មិនចុះចាញ់ឡើយ ។ កាលពីថ្ងៃទី២២ ខែមីនា អ៊ីរ៉ង់បន្តបាញ់មីស៊ីល និងដ្រូនទៅកាន់ទឹកដីអ៊ីស្រាអែល ទើបធ្វើឱ្យអាមេរិកបារម្ភពីក្រុមជនគាំទ្រអ៊ីរ៉ង់ដាក់គោលដៅវាយប្រហារពលរដ្ឋអាមេរិក ដូចដែលពួកគេដាក់គោលដៅកំទេចស្ថានទូតអាមេរិកនៅក្រៅប្រទេស ៕